တရုတ်နိုင်ငံသည် ကမ္ဘာပေါ်တွင် ပညာသင်ကြားရေးကို အလေးထားဆောင်ရွက်နေသည့် နိုင်ငံတစ်နိုင်ငံဖြစ်သည်။ ထိုသို့ ဆောင်ရွက်ရာတွင် တောင်တန်းဒေသရှိ ကျောင်းသားများ ခေတ်မီပညာရေးစနစ်ကို လက်လှမ်းမီစေရေးအတွက် ကြိုးပမ်းဆောင်ရွက်လာသည်ကို တွေ့ရှိရသည်။ ပညာသင်ကြားရေးကဏ္ဍတွင် သမားရိုးကျပညာသင်ကြားရေးစနစ်သာမက ဒစ်ဂျစ်တယ်နည်းပညာများကို ပေါင်းစပ်ခြင်းဖြင့် တောင်တန်းဒေသမှ ကျောင်းသားများအတွက် အင်္ဂလိပ်စာအပါအဝင် နိုင်ငံတကာဘာသာရပ်များ တတ်မြောက်မည့် အခွင့်အရေးများ ရရှိလာစေသည်။ တရုတ်နိုင်ငံ၏ ဝေးလံခေါင်ဖျားသော တောင်တန်းဒေသများရှိ ကျောင်းသားများအတွက် ဒစ်ဂျစ်တယ်နည်းပညာသည် ပညာသင်ကြားရေးတွင် အဓိကကျသော ပေါင်းကူးတံတားတစ်စင်း ဖြစ်လာသည်။

ထိုသို့ဆောင်ရွက်ချက်ကြောင့် တရုတ်ဘာသာအပြင် နိုင်ငံတကာသုံး အင်္ဂလိပ်ဘာသာ တတ်ကျွမ်းစေရေးအတွက် ကျောင်းသားများကို အခွင့်အရေး ရရှိစေခဲ့သည်။

တရုတ်နိုင်ငံအရှေ့ပိုင်း ဇီကျန်းပြည်နယ်ရှိ တောင်တန်းဒေသတစ်ခုဖြစ်သော ကိုင်ဟွာစီရင်စု ကွီရှီမြို့နယ်ဗဟိုကျောင်းတွင် ကျောင်းသားများသည် တက်ဘလက်များဖြင့် တရုတ်နှင့် အင်္ဂလိပ်ဘာသာဖြင့် ပုံပြင်စာအုပ်များကို ဖတ်ရှုနေသည်။

 အဆိုပါကျောင်းမှ ကျောင်းသားများသည် "Qian Xiaowa" ဟု လူသိများသော AI စွမ်းအင်သုံးစက်ရုပ်နှင့် အပြန်အလှန်ဆက်သွယ်ကြပြီး ဉာဏ်ရည်တုနည်းပညာဖြင့် ဖန်တီးထားသည့် စက်ရုပ်က ကျောင်းသားများအား ဂန္ထဝင်စာပေများကို ဖတ်ရှုရန်နှင့် ကဗျာများရွတ်ဆိုရန် ကူညီခဲ့သည်။

“တက်ဘလက်ထဲမှာ မိမိတစ်ခါမှ မဖတ်ဖူးတဲ့ စာအုပ်တွေနဲ့ ရုပ်ပြပုံပြင်တွေ အများကြီးရှိကြောင်းနှင့် တစ်ချက်နှိပ်ရုံနဲ့ အင်္ဂလိပ်စာသားတွေပဲဖြစ်ဖြစ်၊ တရုတ်စာသားတွေပဲဖြစ်ဖြစ် အသံထွက်အမှန်ကို သူကြားနိုင်ကြောင်း” အသက် ၁၀ နှစ်အရွယ် ကျောင်းသူတစ်ဦးက ဆိုသည်။

အဆိုပါကျောင်း၌ နှစ်ပေါင်းများစွာ သက်တမ်းရှိသည့် ကျောင်းစာကြည့်တိုက်တွင် စာအုပ်အနည်းငယ်သာရှိပြီး အများစုမှာ ခေတ်မမီသည့် စာအုပ်များသာဖြစ်ကြောင်းကျောင်းမှ ဆရာမ Wang Wenhui က ဆိုသည်။

ယင်းပြည်နယ်တစ်ဝန်းရှိ ကျေးလက်ကျောင်းများကို ဒစ်ဂျစ်တယ်နည်းပညာဖြင့် စွမ်းဆောင်ရည်မြှင့်တင်ရန် ရည်ရွယ်သည့် အဆိုပါအစီအစဉ်သည် လွန်ခဲ့သော ခြောက်လခန့်က စတင်ခဲ့သည်။ ၂၀၂၅ ခုနှစ် နိုဝင်ဘာလတွင်စတင်ခဲ့သော ဤအစီအစဉ်သည် ကျောင်းသား ၁၀၀ အောက်ရှိသော ကျောင်းများသို့ နည်းပညာဖြင့် ပံ့ပိုးပေးခဲ့သည်။ ကွီရှီမြို့နယ်တွင် လေးတန်းမှ ခြောက်တန်းအထိ ကျောင်းသားများသည် ယခုအခါဒစ်ဂျစ်တယ်နည်းပညာဖြင့် စာပေများလေ့လာနိုင်ပြီဖြစ်သည်။

“ဒစ်ဂျစ်တယ်နည်းပညာသည် စာဖတ်ရန် အရင်းအမြစ်များ ရှားပါးမှုကို အဓိကဖြေရှင်းပေးသည်”ဟု Wang က ပြောကြားခဲ့သည်။ ယခုကဲ့သို့ နည်းပညာအသုံးပြုခြင်းဖြင့် ကလေးများကို စာပေလေ့လာစေရေးအတွက် ဆွဲဆောင်နိုင်ခဲ့သည်။

ယင်းကျောင်းရှိ ကျောင်းသားထက်ဝက်ခန့်သည် ယခုအစီအစဉ်အရ နေ့စဉ်စာဖတ်ခြင်း အလေ့အထကို ဆောင်ရွက်ခဲ့ကြသည်ဟု သူကထပ်လောင်းပြောကြားခဲ့သည်။ ဇီကျန်းပြည်နယ်နှင့် တရုတ်နိုင်ငံတစ်ဝန်းရှိ အခြားနေရာများတွင် အလားတူအောင်မြင်သည့် ပြောင်းလဲမှုများ ဖြစ်ပေါ်နေကြောင်း သိရသည်။ ဇီကျန်းပြည်နယ် ပူတူအိုခရိုင်ရှိ ကျောင်းများသည် မူလကစာအုပ်စုဆောင်းမှု အကန့်အသတ်ရှိသော သေးငယ်သည့်ကျောင်းများ ဖြစ်သည်။ ယခုအခါ ဒစ်ဂျစ်တယ်ပလက်ဖောင်းတစ်ခုသည် အဆိုပါကျောင်းများရှိ စာကြည့်တိုက်များတွင် စာအုပ်များ ငှားရမ်းခြင်းလုပ်ငန်းကို ဆောင်ရွက်ခြင်းဖြင့် ‌ကျောင်းသားများအား အသိပညာဗဟုသုတများကို ဖြန့်ဖြူးနေသည်။

တရုတ်နိုင်ငံ အနောက်တောင်ပိုင်း တောင်တန်းဒေသ ကွေ့ကျိုးပြည်နယ်တွင် ဒစ်ဂျစ်တယ်ပလက်ဖောင်းတစ်ခုသည် အီလက်ထရွန်နစ်စာအုပ်တစ်သန်းကျော်၊ ဒစ်ဂျစ်တယ်ဂျာနယ် ၁၀၀၀၀၊ ရုပ်သံဟောပြောပွဲ ၃၆၀၀၀ နှင့် အသံစာအုပ် ၁ ဒသမ ၅ သန်းကို မြို့ပြနှင့် ကျေးလက်ဒေသရှိ စာဖတ်ပရိသတ်များအတွက် ဒစ်ဂျစ်တယ်နည်းပညာဖြင့် ဖြန့်ဖြူးပေးနေသည်။

တရုတ်နိုင်ငံ အနောက်တောင်ပိုင်း ယူနန်ပြည်နယ်ဒါဂွမ်စီရင်စုရှိ စာကြည့်တိုက်သည် ကလေးများအတွက် အီလက်ထရွန်နစ် စာဖတ်ကိရိယာများနှင့် ဒစ်ဂျစ်တယ်ဝန်ဆောင်မှုများကို မိတ်ဆက်ခဲ့ပြီး အီလက်ထရွန်နစ်စာအုပ် ၆၀၀၀၀ နှင့် ဂျာနယ် ၄၀၀၀ ကို ဒစ်ဂျစ်တယ်စင်္ကြံများမှ အခမဲ့ပေးပို့ခဲ့သည်။

၂၀၂၅ ခုနှစ်ကုန်တွင် အရွယ်မရောက်သေးသူများကြား ဒစ်ဂျစ်တယ်စာဖတ်နှုန်းမှာ ၇၅ ဒသမ ၉ ရာခိုင်နှုန်းအထိ ရောက်ရှိခဲ့ပြီး ယခင်နှစ်ထက် သုညဒသမ ၈ ရာခိုင်နှုန်း မြင့်တက်လာခဲ့ကြောင်း အမျိုးသားစစ်တမ်းတစ်ခုအရ သိရသည်။ ယခုအချိန်တွင် ဒစ်ဂျစ်တယ်နည်းပညာဖွံ့ဖြိုးလာခြင်းကြောင့် တောင်တန်းဒေသရှိ ကျောင်းသားများအနေဖြင့် အရည်အသွေးမြင့်စာပေများဖတ်ရှုရန် အကန့်အသတ်များရှိတော့မည်မဟုတ်ကြောင်း ဇီကျန်းတက္ကသိုလ်မှ ကျွမ်းကျင်သူ ဝူဇန်ယူက ပြောကြားသည်။

တရုတ်အစိုးရသည် "AI Plus Education" ကဲ့သို့သော စီမံကိန်းများဖြင့် နည်းပညာကို အခြေခံအဆင့်မှစတင်၍ ဖော်ဆောင်ပေးလျက်ရှိသည်။

တရုတ်နိုင်ငံသည် ၂၀၂၅ ခုနှစ် စက်တင်ဘာလ ၁ ရက်နေ့မှစတင်ကာ တစ်နိုင်ငံလုံးရှိ မူလတန်းနှင့် အလယ်တန်းကျောင်းများတွင် AI (Artificial Intelligence - ဉာဏ်ရည်တုနည်းပညာ) ဘာသာရပ်ကို မသင်မနေရ ဘာသာရပ်အဖြစ်ပြဋ္ဌာန်းခဲ့ပြီး ၎င်းစည်းမျဉ်းအရ ကျောင်းသား ကျောင်းသူတိုင်းတစ်နှစ်လျှင် အနည်းဆုံးရှစ်နာရီ ဉာဏ်ရည်တုနည်းပညာသင်ခန်းစာများကို သင်ယူရမည်ဖြစ်သည်။

တရုတ်တောင်တန်းဒေသ ကျောင်းသားများ၏ ဒစ်ဂျစ်တယ်နည်းပညာသုံးစာပေလေ့လာမှုပုံစံများကို အောက်ပါအတိုင်းတွေ့ရှိနိုင်သည် -

၁။ ဉာဏ်ရည်တုနည်းပညာနှင့် ဒစ်ဂျစ်တယ် စာသင်ခန်းများ (AI & Digital Classrooms)

တရုတ်နိုင်ငံတောင်ပိုင်းရှိ ကွမ်ရှီးကျန်း (Guangxi Zhuang) ကဲ့သို့သော ကိုယ်ပိုင်အုပ်ချုပ်ခွင့်ရဒေသများတွင် အလယ်တန်းကျောင်းများမှစ၍ ဉာဏ်ရည်တုနည်းပညာ သင်ခန်းစာများကို စတင်သင်ကြားပေးနေပြီဖြစ်သည်။ ၎င်းသည် တောင်တန်းဒေသရှိ ကျောင်းသားများကို မြို့များရှိ ကျောင်းသားများနှင့် ရင်ပေါင်တန်းနိုင်စေရန် ရည်ရွယ်သည်။

၂။ အွန်လိုင်းမှတစ်ဆင့် သင်ကြားမှု (Remote Learning)

တောင်တန်းဒေသများတွင် ဆရာ ဆရာမ အင်အားမလုံလောက်မှုပြဿနာကို ဖြေရှင်းရန် ဒစ်ဂျစ်တယ်တွန်းအား (Digital Drive) ကို အရှိန်မြှင့်တင်ပြီး မြို့ကြီးများမှ ကျွမ်းကျင်သောဆရာများ၏ သင်ကြားမှုကို အင်တာနက်မှတစ်ဆင့် တိုက်ရိုက်ကြည့်ရှုလေ့လာနိုင်ရန် စီစဉ်ပေးထားသည်။

၃။ ဒစ်ဂျစ်တယ် စာကြည့်တိုက်များနှင့် ရင်းမြစ်များ

ကျောင်းသားများသည် ဖတ်စာအုပ်များအပြင် အွန်လိုင်းပေါ်ရှိ ဒစ်ဂျစ်တယ်ရင်းမြစ်များ၊ ရုပ်သံသင်ခန်းစာများကို အသုံးပြု၍ ဘာသာစကားနှင့် အထွေထွေဗဟုသုတများကို လေ့လာကြသည်။

တရုတ်နိုင်ငံမှ ကျောင်းသားများ စာဖတ်ခြင်းကို ပိုမိုစိတ်ဝင်စားလာစေရန်အတွက် ကျေးလက်စာသင်ကျောင်းများတွင် စမတ်စာဖတ်ကိရိယာများ (Smart Terminals/E-reading devices) ကို ပံ့ပိုးပေးထားသည်။

စာကြည့်တိုက်များအပြင် နည်းပညာကုမ္ပဏီကြီးများကလည်း ကျေးလက်ဒေသရှိ ကျောင်းသားများအတွက် အွန်လိုင်းသင်ကြားရေး ပလက်ဖောင်းများကို ဖန်တီးပေးထားသည်။

Tencent ကဲ့သို့သော နည်းပညာကုမ္ပဏီများက စေတနာ့ဝန်ထမ်းဆရာများမှတစ်ဆင့် ကျေးလက်ကျောင်းပေါင်း ၁၀၀၀ ကျော်သို့ တိုက်ရိုက်သင်ကြားမှု (Livestream lessons) များနှင့် ပညာရေးရင်းမြစ်များကို ဖြန့်ဖြူးပေးနေသည်။

ကျောင်းသားများ လွယ်ကူစွာသင်ယူနိုင်စေရန် "TaoliOnline" ကဲ့သို့သော အွန်လိုင်းဂိမ်းပုံစံ သင်ကြားရေးပလက်ဖောင်းများဖြင့် သင်္ချာ၊ တရုတ်စာနှင့် အင်္ဂလိပ်စာတို့ကိုလေ့လာနိုင်ရန် စီစဉ်ပေးထားကြောင်း တွေ့ရှိရသည်။

 နိုင်ငံတစ်ဝန်းရှိ စာကြည့်တိုက်တည်ဆောက် ရန်ခက်ခဲသည့် တောင်တန်းဒေသရှိ ရွာများတွင် Cloud-based Library များကို အသုံးပြု၍ စာပေများ လေ့လာနေသည်။

ယင်းအစီအစဉ်အရ ကျောင်းသားများသည် ကျောင်းနံရံနှင့် ဘတ်စ်ကားမှတ်တိုင်များရှိ ကျူအာကုတ်များကို စကင်ဖတ်ရုံဖြင့် အီလက်ထရွန်နစ်စာအုပ်များကို ဖတ်ရှုနိုင်သည်။

နိုင်ငံတော်အပိုင်းက စာပေဖတ်ရှုလေ့လာခြင်းကို အားပေးသည့်အစီအစဉ်များ ဆောင်ရွက်လာသည်ကို တွေ့ရှိရသည်။ တရုတ်နိုင်ငံတွင် စာဖတ်ရှိန်မြှင့်တင်ရေးကိုလည်းဆောင်ရွက်နေပြီး ဧပြီလ၏ နောက်ဆုံးသီတင်းပတ်ကို အမျိုးသားစာဖတ်ရှိန် မြှင့်တင်ရေးရက်သတ္တပတ်အဖြစ် သတ်မှတ်ခဲ့သည်။

ပညာရေးသည် နိုင်ငံဖွံ့ဖြိုးရေးအတွက် အဓိကအရေးပါသည့် လိုအပ်ချက်တစ်ခုဖြစ်ရာ တရုတ်နိုင်ငံတောင်တန်းဒေသများတွင် ဆောင်ရွက်နေသည့် ဒစ်ဂျစ်တယ်နည်းပညာဖြင့် ကျောင်းသားများအား စာပေလေ့လာရေးဆောင်ရွက်ချက်သည် ပညာရေးကဏ္ဍအတွက် ကြိုဆိုရမည့်ဆောင်ရွက်ချက်ဖြစ်ကြောင်း ဂုဏ်ပြုရေးသားလိုက်ရပါသည်။ ။

ကိုးကား - Digital tools help bridge reading gap for rural Chinese children

moi

တရုတ်နိုင်ငံသည် ကမ္ဘာပေါ်တွင် ပညာသင်ကြားရေးကို အလေးထားဆောင်ရွက်နေသည့် နိုင်ငံတစ်နိုင်ငံဖြစ်သည်။ ထိုသို့ဆောင်ရွက်ရာတွင် တောင်တန်းဒေသရှိ ကျောင်းသားများ ခေတ်မီ ပညာရေးစနစ်ကို လက်လှမ်းမီစေရေးအတွက် ကြိုးပမ်းဆောင်ရွက်လာသည်ကို တွေ့ရှိရသည်။ ပညာသင်ကြားရေးကဏ္ဍတွင် သမားရိုးကျ ပညာသင်ကြားရေးစနစ်သာမက ဒစ်ဂျစ်တယ်နည်းပညာများကိုပေါင်းစပ်ခြင်းဖြင့် တောင်တန်းဒေသမှ ကျောင်းသားများအတွက် အင်္ဂလိပ်စာအပါအဝင် နိုင်ငံတကာဘာသာရပ်များ တတ်မြောက်မည့် အခွင့်အရေးများ ရရှိလာစေသည်။ တရုတ်နိုင်ငံ၏ ဝေးလံခေါင်ဖျားသော တောင်တန်းဒေသများရှိ ကျောင်းသားများအတွက် ဒစ်ဂျစ်တယ်နည်းပညာသည် ပညာသင်ကြားရေးတွင် အဓိကကျသော ပေါင်းကူးတံတားတစ်စင်း ဖြစ်လာသည်။

ထိုသို့ဆောင်ရွက်ချက်ကြောင့် တရုတ်ဘာသာအပြင် နိုင်ငံတကာသုံး အင်္ဂလိပ်ဘာသာ တတ်ကျွမ်း စေရေးအတွက် ကျောင်းသားများကို အခွင့်အရေး ရရှိစေခဲ့သည်။

တရုတ်နိုင်ငံအရှေ့ပိုင်း ဇီကျန်းပြည်နယ်ရှိ တောင်တန်းဒေသတစ်ခုဖြစ်သော ကိုင်ဟွာ စီရင်စု ကွီရှီမြို့နယ်ဗဟိုကျောင်းတွင် ကျောင်းသားများသည် တက်ဘလက်များဖြင့် တရုတ်နှင့် အင်္ဂလိပ်ဘာသာဖြင့် ပုံပြင်စာအုပ်များကို ဖတ်ရှုနေသည်။

အဆိုပါကျောင်းမှ ကျောင်းသားများသည် "Qian Xiaowa" ဟု လူသိများသော AI စွမ်းအင်သုံး စက်ရုပ်နှင့် အပြန်အလှန်ဆက်သွယ်ကြပြီး ဉာဏ်ရည်တုနည်းပညာဖြင့် ဖန်တီးထားသည့် စက်ရုပ်က ကျောင်းသားများအား ဂန္ထဝင်စာပေများကို ဖတ်ရှုရန်နှင့် ကဗျာများရွတ်ဆိုရန် ကူညီခဲ့သည်။

“တက်ဘလက်ထဲမှာ မိမိတစ်ခါမှ မဖတ်ဖူးတဲ့ စာအုပ်တွေနဲ့ ရုပ်ပြပုံပြင်တွေ အများကြီးရှိကြောင်းနှင့် တစ်ချက်နှိပ်ရုံနဲ့ အင်္ဂလိပ်စာသားတွေပဲဖြစ်ဖြစ်၊ တရုတ်စာသားတွေပဲဖြစ်ဖြစ် အသံထွက်အမှန်ကို သူကြားနိုင်ကြောင်း” အသက် ၁၀ နှစ်အရွယ် ကျောင်းသူတစ်ဦးက ဆိုသည်။

အဆိုပါကျောင်း၌ နှစ်ပေါင်းများစွာ သက်တမ်းရှိသည့် ကျောင်းစာကြည့်တိုက်တွင် စာအုပ် အနည်းငယ်သာရှိပြီး အများစုမှာ ခေတ်မမီသည့် စာအုပ်များသာဖြစ်ကြောင်း ကျောင်းမှ ဆရာမ Wang Wenhui က ဆိုသည်။

ယင်းပြည်နယ်တစ်ဝန်းရှိ ကျေးလက်ကျောင်းများကို ဒစ်ဂျစ်တယ်နည်းပညာဖြင့် စွမ်းဆောင် ရည်မြှင့်တင်ရန် ရည်ရွယ်သည့် အဆိုပါအစီအစဉ်သည် လွန်ခဲ့သော ခြောက်လခန့်က စတင်ခဲ့သည်။ ၂၀၂၅ ခုနှစ် နိုဝင်ဘာလတွင်စတင်ခဲ့သော ဤအစီအစဉ်သည် ကျောင်းသား ၁၀၀ အောက်ရှိသော ကျောင်းများသို့ နည်းပညာဖြင့် ပံ့ပိုးပေးခဲ့သည်။ ကွီရှီမြို့နယ်တွင် လေးတန်းမှ ခြောက်တန်းအထိ ကျောင်းသားများသည် ယခုအခါ ဒစ်ဂျစ်တယ် နည်းပညာဖြင့် စာပေများလေ့လာနိုင်ပြီဖြစ်သည်။

“ဒစ်ဂျစ်တယ်နည်းပညာသည် စာဖတ်ရန် အရင်းအမြစ်များ ရှားပါးမှုကို အဓိကဖြေရှင်းပေး သည်”ဟု Wang က ပြောကြားခဲ့သည်။ ယခုကဲ့သို့ နည်းပညာအသုံးပြုခြင်းဖြင့် ကလေးများကို စာပေ လေ့လာစေရေးအတွက် ဆွဲဆောင်နိုင်ခဲ့သည်။

ယင်းကျောင်းရှိ ကျောင်းသားထက်ဝက်ခန့်သည် ယခုအစီအစဉ်အရ နေ့စဉ်စာဖတ်ခြင်း အလေ့အထကို ဆောင်ရွက်ခဲ့ကြသည်ဟု သူကထပ်လောင်းပြောကြားခဲ့သည်။ ဇီကျန်းပြည်နယ်နှင့် တရုတ်နိုင်ငံတစ်ဝန်းရှိ အခြားနေရာများတွင် အလားတူအောင်မြင်သည့် ပြောင်းလဲမှုများ ဖြစ်ပေါ် နေကြောင်းသိရသည်။ ဇီကျန်းပြည်နယ် ပူတူအိုခရိုင်ရှိ ကျောင်းများသည် မူလကစာအုပ်စုဆောင်းမှု အကန့်အသတ်ရှိသော သေးငယ်သည့်ကျောင်းများ ဖြစ်သည်။ ယခုအခါ ဒစ်ဂျစ်တယ်ပလက်ဖောင်း တစ်ခုသည် အဆိုပါကျောင်းများရှိ စာကြည့်တိုက်များတွင် စာအုပ်များ ငှားရမ်းခြင်းလုပ်ငန်းကို ဆောင်ရွက်ခြင်းဖြင့် ‌ကျောင်းသားများအား အသိပညာဗဟုသုတများကို ဖြန့်ဖြူးနေသည်။

တရုတ်နိုင်ငံ အနောက်တောင်ပိုင်း တောင်တန်းဒေသ ကွေ့ကျိုးပြည်နယ်တွင် ဒစ်ဂျစ်တယ် ပလက်ဖောင်းတစ်ခုသည် အီလက်ထရွန်နစ် စာအုပ်တစ်သန်းကျော်၊ ဒစ်ဂျစ်တယ်ဂျာနယ် ၁၀၀၀၀၊ ရုပ်သံဟောပြောပွဲ ၃၆၀၀၀ နှင့် အသံ စာအုပ် ၁ ဒသမ ၅ သန်းကို မြို့ပြနှင့် ကျေးလက်ဒေသရှိ စာဖတ်ပရိသတ်များအတွက် ဒစ်ဂျစ်တယ် နည်းပညာဖြင့် ဖြန့်ဖြူးပေးနေသည်။

တရုတ်နိုင်ငံ အနောက်တောင်ပိုင်း ယူနန်ပြည်နယ် ဒါဂွမ်စီရင်စုရှိ စာကြည့်တိုက်သည် ကလေးများအတွက် အီလက်ထရွန်နစ် စာဖတ်ကိရိယာများနှင့် ဒစ်ဂျစ်တယ်ဝန်ဆောင်မှုများကို မိတ်ဆက်ခဲ့ပြီး အီလက်ထရွန်နစ်စာအုပ် ၆၀၀၀၀ နှင့် ဂျာနယ် ၄၀၀၀ ကို ဒစ်ဂျစ်တယ်စင်္ကြံများမှ အခမဲ့ပေးပို့ခဲ့သည်။

၂၀၂၅ ခုနှစ်ကုန်တွင် အရွယ်မရောက်သေးသူများကြား ဒစ်ဂျစ်တယ်စာဖတ်နှုန်းမှာ ၇၅ ဒသမ ၉ ရာခိုင်နှုန်းအထိ ရောက်ရှိခဲ့ပြီး ယခင်နှစ်ထက် သုည ဒသမ ၈ ရာခိုင်နှုန်း မြင့်တက်လာခဲ့ကြောင်း အမျိုးသားစစ်တမ်းတစ်ခုအရ သိရသည်။ ယခုအချိန်တွင် ဒစ်ဂျစ်တယ်နည်းပညာဖွံ့ဖြိုးလာခြင်းကြောင့် တောင်တန်းဒေသရှိ ကျောင်းသားများအနေဖြင့် အရည်အသွေးမြင့်စာပေများဖတ်ရှုရန် အကန့်အသတ်များရှိတော့မည်မဟုတ်ကြောင်း ဇီကျန်း တက္ကသိုလ်မှ ကျွမ်းကျင်သူ ဝူဇန်ယူက ပြောကြားသည်။

တရုတ်အစိုးရသည် "AI Plus Education" ကဲ့သို့သော စီမံကိန်းများဖြင့် နည်းပညာကို အခြေခံ အဆင့်မှစတင်၍ ဖော်ဆောင်ပေးလျက်ရှိသည်။

တရုတ်နိုင်ငံသည် ၂၀၂၅ ခုနှစ် စက်တင်ဘာလ ၁ ရက်နေ့မှစတင်ကာ တစ်နိုင်ငံလုံးရှိ မူလတန်းနှင့် အလယ်တန်းကျောင်းများတွင် AI (Artificial Intelligence - ဉာဏ်ရည်တုနည်းပညာ)ဘာသာ ရပ်ကို မသင်မနေရ ဘာသာရပ်အဖြစ် ပြဋ္ဌာန်းခဲ့ပြီး ၎င်းစည်းမျဉ်းအရ ကျောင်းသား ကျောင်းသူတိုင်း တစ်နှစ်လျှင် အနည်းဆုံး ရှစ်နာရီ ဉာဏ်ရည်တု နည်းပညာသင်ခန်းစာများကို သင်ယူရမည် ဖြစ်သည်။

တရုတ်တောင်တန်းဒေသ ကျောင်းသားများ၏ ဒစ်ဂျစ်တယ်နည်းပညာသုံး စာပေလေ့လာမှုပုံစံများကို အောက်ပါအတိုင်း တွေ့ရှိနိုင်သည် -

၁။ ဉာဏ်ရည်တုနည်းပညာနှင့် ဒစ်ဂျစ်တယ် စာသင်ခန်းများ (AI & Digital Classrooms)

တရုတ်နိုင်ငံတောင်ပိုင်းရှိ ကွမ်ရှီးကျန်း (Guangxi Zhuang) ကဲ့သို့သော ကိုယ်ပိုင်အုပ်ချုပ်ခွင့် ရ ဒေသများတွင် အလယ်တန်းကျောင်းများမှစ၍ ဉာဏ်ရည်တုနည်းပညာ သင်ခန်းစာများကို စတင် သင်ကြားပေးနေပြီဖြစ်သည်။ ၎င်းသည် တောင်တန်းဒေသရှိ ကျောင်းသားများကို မြို့များရှိ ကျောင်းသားများနှင့် ရင်ပေါင်တန်းနိုင်စေရန် ရည်ရွယ်သည်။

၂။ အွန်လိုင်းမှတစ်ဆင့် သင်ကြားမှု (Remote Learning)

တောင်တန်းဒေသများတွင် ဆရာ ဆရာမ အင်အားမလုံလောက်မှုပြဿနာကို ဖြေရှင်းရန် ဒစ်ဂျစ်တယ်တွန်းအား (Digital Drive) ကို အရှိန် မြှင့်တင်ပြီး မြို့ကြီးများမှ ကျွမ်းကျင်သော ဆရာများ ၏ သင်ကြားမှုကို အင်တာနက်မှတစ်ဆင့် တိုက်ရိုက်ကြည့်ရှုလေ့လာနိုင်ရန် စီစဉ်ပေးထားသည်။

၃။ ဒစ်ဂျစ်တယ် စာကြည့်တိုက်များနှင့် ရင်းမြစ်များ

ကျောင်းသားများသည် ဖတ်စာအုပ်များအပြင် အွန်လိုင်းပေါ်ရှိ ဒစ်ဂျစ်တယ်ရင်းမြစ်များ၊ ရုပ်သံ သင်ခန်းစာများကို အသုံးပြု၍ ဘာသာစကားနှင့် အထွေထွေဗဟုသုတများကို လေ့လာကြသည်။

 တရုတ်နိုင်ငံမှ ကျောင်းသားများ စာဖတ်ခြင်းကို ပိုမိုစိတ်ဝင်စားလာစေရန်အတွက် ကျေးလက် စာသင်ကျောင်းများတွင် စမတ်စာဖတ်ကိရိယာများ (Smart Terminals/E-reading devices) ကို ပံ့ပိုး ပေးထားသည်။

စာကြည့်တိုက်များအပြင် နည်းပညာကုမ္ပဏီကြီးများကလည်း ကျေးလက်ဒေသရှိ ကျောင်းသား များအတွက် အွန်လိုင်းသင်ကြားရေး ပလက်ဖောင်းများကို ဖန်တီးပေးထားသည်။

Tencent ကဲ့သို့သော နည်းပညာကုမ္ပဏီများက စေတနာ့ဝန်ထမ်း ဆရာများမှတစ်ဆင့် ကျေးလက်ကျောင်းပေါင်း ၁၀၀၀ ကျော်သို့ တိုက်ရိုက်သင်ကြားမှု (Livestream lessons) များနှင့် ပညာရေးရင်းမြစ်များကို ဖြန့်ဖြူးပေးနေသည်။

ကျောင်းသားများ လွယ်ကူစွာသင်ယူနိုင်စေရန် "TaoliOnline"ကဲ့သို့သောအွန်လိုင်းဂိမ်းပုံစံ သင်ကြားရေး ပလက်ဖောင်းများဖြင့် သင်္ချာ၊ တရုတ်စာနှင့် အင်္ဂလိပ်စာတို့ကိုလေ့လာနိုင်ရန် စီစဉ်ပေး ထားကြောင်း တွေ့ရှိရသည်။

 နိုင်ငံတစ်ဝန်းရှိ စာကြည့်တိုက်တည်ဆောက် ရန်ခက်ခဲသည့် တောင်တန်းဒေသရှိရွာများတွင် Cloud-based Library များကို အသုံးပြု၍ စာပေများလေ့လာနေသည်။

ယင်းအစီအစဉ်အရ ကျောင်းသားများသည် ကျောင်းနံရံနှင့် ဘတ်စ်ကားမှတ်တိုင်များရှိ ကျူအာ ကုတ်များကို စကင်ဖတ်ရုံဖြင့် အီလက်ထရွန်နစ် စာအုပ်များကို ဖတ်ရှုနိုင်သည်။

နိုင်ငံတော်အပိုင်းက စာပေဖတ်ရှုလေ့လာခြင်းကို အားပေးသည့်အစီအစဉ်များ ဆောင်ရွက်လာ သည်ကို တွေ့ရှိရသည်။ တရုတ်နိုင်ငံတွင်စာဖတ်ရှိန် မြှင့်တင်ရေးကိုလည်း ဆောင်ရွက်နေပြီး ဧပြီလ၏ နောက်ဆုံးသီတင်းပတ်ကို အမျိုးသားစာဖတ်ရှိန် မြှင့်တင်ရေးရက်သတ္တပတ်အဖြစ် သတ်မှတ်ခဲ့သည်။

ပညာရေးသည် နိုင်ငံဖွံ့ဖြိုးရေးအတွက် အဓိကအရေးပါသည့် လိုအပ်ချက်တစ်ခုဖြစ်ရာ တရုတ် နိုင်ငံတောင်တန်းဒေသများတွင် ဆောင်ရွက်နေသည့် ဒစ်ဂျစ်တယ်နည်းပညာဖြင့် ကျောင်းသားများ အား စာပေလေ့လာရေးဆောင်ရွက်ချက်သည် ပညာရေးကဏ္ဍအတွက် ကြိုဆိုရမည့်ဆောင်ရွက်ချက် ဖြစ်ကြောင်း ဂုဏ်ပြုရေးသားလိုက်ရပါသည်။ ။

ကိုးကား - Digital tools help bridge reading gap for rural Chinese children

MDN (ကြေးမုံ)

ဤနေရာသည် နိုင်ငံတော်၏ အနာဂတ်ကိုပိုမိုတောက်ပစေရန်  လူသားအရင်းအမြစ်များ  ပြုစုပျိုးထောင်ပေးနေသော    နေရာများစွာအနက်မှ တစ်ခုပင်ဖြစ်သည်။

စာရေးသူသည်   “ပြည်ထောင်စုတိုင်းရင်းသားလူငယ်များ   စွမ်းရည်ဖွံ့ဖြိုးရေး ဒီဂရီကောလိပ်” (Nationalities Youth Resource Development Degree College) ကျောင်းဆင်းပွဲ အခမ်းအနားသို့ ရောက်ရှိနေခြင်းဖြစ်သည်။

မနေ့က “ပညာသင်ကြားနေသည့် ကျောင်းသား၊ ကျောင်းသူများ” သည် ယနေ့တွင် “နိုင်ငံ့ဝန်ထမ်းများ” ဖြစ်လာကြပေပြီ။

သူတို့သည် ‌ဤကျောင်းတော်ကြီးတွင် လေးနှစ်တာကာလ အတူဖြတ်သန်းနေခဲ့ကြသည်။ အတူတူလက်ရည်တစ်ပြင်တည်း စားသောက်ခဲ့ကြသည်။   

အတူတူကျောင်းတက်ခဲ့ကြသည်။ အတူတူ စာကျက်ခဲ့ကြသည်။ အတူတူအားကစားပွဲများ၌ ပျော်ရွှင်ခဲ့ကြသည်။ အတူတူလုပ်အားပေးခဲ့ကြသည်။ အိပ်မက်များလည်း တူညီခဲ့ကြသည်။

တကယ်တော့သူတို့သည်   အမည်အမျိုးမျိုးဖြင့် သတ်မှတ်ခေါ်ဝေါ်နေကြသည့်   မြန်မာနိုင်ငံသား ပြည်ထောင်စုဖွား တိုင်းရင်းသားများဖြစ်ကြသည်။

ပြည်ထောင်စုစိတ်ဓာတ်

အချို့က တောင်တန်းမြင့်မြင့် မိုးတိမ်များအောက်မှာ နေထိုင်ခဲ့ကြသည်။ အချို့က မြေပြန့်လယ်ပြင်နေရောင်အောက်တွင်   ကြီးပြင်းလာကြသူများဖြစ်ကြသည်။ အခြေခံအားဖြင့် မတူညီကြ။ သူတို့၏ယဉ်ကျေးမှုဓလေ့ထုံးစံ ဝတ်စားဆင်ယင်မှုများလည်း အရောင်အသွေးအမျိုးမျိုးဖြင့်  လှပစွာကွဲပြားနေကြသည်။ သို့သော်ကွဲပြားမှုများ၏ နောက်ကွယ်တွင်  တူညီသောနှလုံးသားအစုံတို့ တိတ်ဆိတ်စွာခုန်လှုပ်နေကြသည်။ ထိုနှလုံးသားတို့သည် နိုင်ငံ၏အနာဂတ်ကို    တာဝန်ယူထမ်းဆောင်လိုသော “စိတ်” ဖြစ်ပြီး မျိုးဆက်သစ်များအတွက် အလင်းတံခါးများကို တည်ဆောက်ပေးလိုသော “ဆန္ဒ” ပင်ဖြစ်သည်။

သူတို့သည် မတူညီကွဲပြားမှုများကို မငြင်းဆန်ကြ။ အဟန့်အတားမဖြစ်ကြ။ ယုံကြည်လက်ခံကြသည်။

နားလည်မှုဖြင့် ချိတ်ဆက်ကြသည်။ ကျောင်းတော်ကြီးများတွင် အေးအတူပူအမျှ အတူတကွ ဖြတ်သန်းကြလျက်   “အပြုံးမပျက်ကြ၊  အမုန်းမဖက်ကြ။” မတူကွဲပြားမှုများသည် ခွဲခြားမှုအတွက် မဟုတ်တော့ဘဲ “ချိတ်ဆက်မှု” ဖြစ်လာသောအချိန်တွင် လူမျိုးစုများအတွက် “တစ်နိုင်ငံတည်း” ဟူသော အဓိပ္ပာယ်က အသက်ရှူသကဲ့သို့ ခိုင်မြဲစွာ အသက်ဝင်လျက်ရှိပေသည်။

သူတို့သည် မြေတစ်မြေ၊ သွေးတစ်စည်း၊ စိတ်တစ်ဝမ်းဖြင့် မတူကွဲပြားမှုများကြားမှ အတူယှဉ်တွဲကာ ညီညွတ်ခြင်းကိုအခြေခံလျက် အနာဂတ်တစ်ခုဆီသို့ရည်ရွယ်၍ စည်းလုံးစွာလက်တွဲလျှောက်လှမ်းခဲ့ကြသည်။ 

ထိုအချိန်တွင် “စည်းလုံးမှု” သည် စကားတစ်လုံး မဟုတ်တော့ဘဲ ရှင်သန်နေသော တန်ဖိုးတစ်ခုဖြစ်လာသည်။   မတူညီသော ဓလေ့စရိုက်များကို ရည်မှန်းချက်တစ်ခုတည်းဖြင့် ချည်နှောင်ပေးသော မေတ္တာကြိုးသည် စည်းလုံးမှုဖြစ်သည်။ ထိုစည်းလုံးမှုကြောင့်ပင် အခက်အခဲများကြုံတွေ့ရာတွင်လည်း တစ်ဦးကိုတစ်ဦးဖေးမကူညီအားပေးရင်း အတူတကွရှေ့ဆက်နိုင်သော ညီညွတ်ခြင်းကို ဖော်ဆောင်သည်။

ထိုစိတ်ဓာတ်သည်ပင် မတူကွဲပြားမှုများ၌ တည်မြဲနေသော “ပြည်ထောင်စုစိတ်ဓာတ်”၏ အမှန်တရားဖြစ်ပေသည်။

ကျောင်းဆင်းပွဲမြင်ကွင်း

ပြည်ထောင်စုတိုင်းရင်းသား  လူငယ်များ၏ ‌ကျောင်းဆင်းပွဲ၊ ဘွဲ့နှင်းသဘင် အခမ်းအနားများသည်  ပျော်ရွှင်မှုတစ်ခုတည်းကိုသာ မဟုတ်ဘဲ နိုင်ငံ၏ အတိတ်၊ ပစ္စုပ္ပန်နှင့် အနာဂတ်တို့ ပေါင်းစည်းနေသော အဓိပ္ပာယ်ပြည့်ဝသည့် မြင်ကွင်းတစ်ခုလည်းဖြစ်သည်။ 

ကျောင်းဝင်းအတွင်းသို့   ဝင်ရောက်လိုက်သည့်အချိန်တွင်  အရောင်အသွေးစုံလင်လှသော  လူအုပ်ကြီးက အမြင်အာရုံကိုချက်ချင်း ဖမ်းစားသွားသည်။ တောင်တန်းဒေသမှလာသော မိဘများ၏ဝတ်စုံများသည် တောက်ပသော အရောင်စုံများဖြင့်လှပနေကြသည်။ မြေပြန့်မှ မိဘများ၏ အဝတ်အစားများနှင့် ပေါင်းစည်းရောယှက်သွားသည့်အခါ တစ်နိုင်ငံလုံး၏ ယဉ်ကျေးမှုကို တစ်နေရာတည်း၌ တစုတစည်းတည်း မြင်တွေ့နိုင်သည့် မြင်ကွင်းပင်ဖြစ်သည်။

မိဘများ၏မျက်နှာပေါ်တွင်ပီတိစိတ်ဖြင့် သားသမီးများ၏ အောင်မြင်မှုအပေါ် ဂုဏ်ယူမှုများကတူညီနေကြသည်။ တချို့မိဘများ၏မျက်ဝန်းတွင် မျက်ရည်စက်တို့ဖြင့် စိုစွတ်တောက်ပနေသည်ကို တွေ့မြင်ရသည်။  ဝမ်းနည်းမှုကြောင့် မဟုတ်သည်မှာတော့သေချာသည်။ ဂုဏ်ယူမှု၏ အသံမဲ့သီချင်းများပင်ဖြစ်ပေလိမ့်မည်။

အခမ်းအနားအတွင်းရှိ ဆရာ၊ ဆရာမများ၏ မျက်နှာများတွင်လည်း တိတ်တဆိတ်ထင်ဟပ်နေသော  ပီတိကိုမြင်တွေ့ရသည်။ လေးနှစ်တာကာလအတွင်း သင်ကြားပေးခဲ့သော ပညာရပ်များ၊ လမ်းညွှန်ဖြေရှင်းပေးခဲ့သော အခက်အခဲများ၊ တစ်ခါတစ်ရံတင်းကျပ်ခဲ့ရသော စည်းကမ်းများသည် ယနေ့တွင် အဓိပ္ပာယ်ပြည့်ဝခဲ့ပေပြီ။    “ငါတို့စိုက်ပျိုးခဲ့သောမျိုးစေ့သည်  အခုအချိန်တွင် ရှင်သန်သီးပွင့်ခဲ့ပြီ” ဆိုသောပြောမပြနိုင်သော ဝမ်းသာမှုများက လင်းထွက်နေသည်။

ကျောင်းဆင်းများသည်လည်း   ပျော်ရွှင်မှုနှင့်ဂုဏ်ယူမှုတို့ ပေါင်းစည်းနေသည့်ဘွဲ့လက်မှတ်နှင့်အတူ တာဝန်ပေးအပ်ထားသည့် အလုပ်ခန့်စာကိုပါ ပူးတွဲကိုင်ထားပြီး အနာဂတ်ကို စတင်တော့မည်ဆိုသည့် ယုံကြည်မှုကြောင့် မျက်နှာပေါ်တွင် လင်းလက်နေကြသည်။   တောင်တန်းသားဖြစ်စေ၊   မြေပြန့်သား

ဖြစ်စေ  ယနေ့တွင် နိုင်ငံတော်၏ အနာဂတ်အတွက် ကျရာအခန်းကဏ္ဍ၌ တာဝန်ယူရန် အဆင်သင့် ဖြစ်နေကြပေပြီ။

ပြည်ထောင်စုဝန်ကြီး၏ မိန့်ခွန်းကလည်း လူငယ်များအပေါ်ထားရှိသော ယုံကြည်မှုကိုပြသနေသည်။

“သင်တို့သည် နိုင်ငံ၏အနာဂတ်ဖြစ်သည်” ဟူသောစကားရပ်နှင့်အတူ နိုင်ငံအတွက် တာဝန်တစ်ခုကိုပေးအပ်လိုက်ခြင်းဖြစ်သည်။  ထိုယုံကြည်မှုသည် ကျောင်းဆင်းလူငယ်များ၏   ရင်ထဲ၌  တာဝန်ယူစိတ်တစ်ခုအဖြစ် အမြဲတည်ရှိနေမည်ဟု ယုံကြည်မိသည်။

စာရေးသူသည် ဤမြင်ကွင်းများကို ကြည့်နေမိစဉ် မိဘများ၏  မေတ္တာ၊ ဆရာ၊ ဆရာမများ၏ ပီတိ၊ ကျောင်းဆင်းလူငယ်များ၏   မျှော်လင့်ချက်၊ အကြီးအကဲများ၏  ယုံကြည်မှုတို့ကို  ပေါင်းစည်းခံစားရမိလိုက်သည်။   ဤအရာအားလုံးသည် တစ်ခုတည်းသော   လမ်းကြောင်းသို့   ညီညာစွာ စီးဆင်းနေသည်ကိုသိမြင်မိသည်။ “ပြည်ထောင်စု၏ အနာဂတ်ကိုတည်ဆောက်မည့် စိတ်ဓာတ်”ပင် ဖြစ်ပေလိမ့်မည်။

တာဝန်ကိုယ်စီ

နယ်စပ်‌ရေးရာဝန်ကြီးဌာနတွင်   ပြည်ထောင်စုတိုင်းရင်းသား လူငယ်များ စွမ်းရည်ဖွံ့ဖြိုးရေးဒီဂရီ ကောလိပ်နှစ်ကျောင်းရှိသည်။ ရန်ကုန်နှင့်စစ်ကိုင်းတို့တွင်ဖြစ်သည်။ ဤကျောင်းတော်ကြီးများအား နယ်စပ်ဒေသရှိ တိုင်းရင်းသားလူငယ်များ အဆင့်မြင့်ပညာရပ်များ ဆက်လက်သင်ယူနိုင်စေရန် ရည်ရွယ်၍၂၀၀၀-၂၀၀၁ ပညာသင်နှစ်မှ စတင်ဖွင့်လှစ်ခဲ့ခြင်းဖြစ်သည်။ တိုင်းဒေသကြီးနှင့် ပြည်နယ်အသီးသီးမှ အခြေခံပညာ အထက်တန်းအောင်မြင်‌သော တိုင်းရင်းသားလူငယ်များအားသင်တန်းသားရွေးချယ်ရေး ကော်မတီကအရည်အချင်းအလိုက်ရွေးချယ်ကာ ရွေးချယ်ခံရသော ကျောင်းသားများကို  သိပ္ပံ/ဝိဇ္ဇာနှင့် အင်ဂျင်နီယာ ဘာသာရပ်များကို သင်ကြားပေးလျက်ရှိသည်။

ကျောင်းအုပ်ချုပ်ရေးအဖွဲ့များအပြင် ကျောင်းသားအချင်းချင်း   သံယောဇဉ်ရှိစေသော၊   စည်းလုံးညီညွတ်စေသော၊ တစ်ကိုယ်ကောင်း မဆန်စေသော စီနီယာ၊   ဂျူနီယာစနစ်ဖြင့်   ကျောင်းစည်းကမ်းများကို စနစ်တကျထိန်းသိမ်းခဲ့ကြသည်။ ၂၀၁၁-၂၀၁၂ ပညာသင်နှစ်မှစ၍   သိပ္ပံ/ဝိဇ္ဇာ ဘာသာရပ်အတွက်   ပညာသင်နှစ်လေးနှစ်၊   ၂၀၁၂-၂၀၁၃ ပညာသင်နှစ်မှစ၍ အင်ဂျင်နီယာ ဘာသာရပ်အတွက် ပညာသင်နှစ်သုံးနှစ် သတ်မှတ်ထားရှိပြီး သိပ္ပံ/ဝိဇ္ဇာဘွဲ့နှင့် အင်ဂျင်နီယာ ဒီပလိုမာများ အပ်နှင်းပေးသည်။

သိပ္ပံ/ဝိဇ္ဇာဘွဲ့နှင့် အင်ဂျင်နီယာဘာသာရပ်များအပြင်  ပြည်ထောင်စုစိတ်ဓာတ်၊  ခေါင်းဆောင်မှု၊ အဆင့်မြင့်ယဉ်ကျေးမှု၊ ကွန်ပျူတာသိပ္ပံဘာသာရပ်တို့အား ပူးတွဲသင်ကြားပေးသည်။

ပြည်ထောင်စုတိုင်းရင်းသားလူငယ်များ စွမ်းရည်ဖွံ့ဖြိုးရေးဒီဂရီကောလိပ် (ရန်ကုန်)  စတင်ဖွင့်လှစ်သည့်အချိန်မှ ယနေ့အချိန်ထိ ဝိဇ္ဇာဘွဲ့ ၇၃၁ ဦး၊ သိပ္ပံဘွဲ့ ၁၅၅၂ ဦး၊ B.Tech ဘွဲ့ ၁၃၅ ဦးနှင့် AGTI ဒီပလိုမာ ၁၁၂၃ ဦး စုစုပေါင်း ၃၅၄၁ ဦးရှိပြီဖြစ်သည်။

၎င်းတို့သည် ဝန်ကြီးဌာနများ၊ ပြည်ထောင်စုရာထူးဝန်အဖွဲ့နှင့် တိုင်းဒေသကြီး/ ပြည်နယ်စည်ပင်သာယာရေး အဖွဲ့အသီးသီးတွင် နိုင်ငံ့ဝန်ထမ်းများအဖြစ် နိုင်ငံ့တာဝန်များအား ထမ်းဆောင်လျက်ရှိပေသည်။

ပြည်ထောင်စုတိုင်းရင်းသားလူငယ်များ စွမ်းရည်ဖွံ့ဖြိုးရေးဒီဂရီကောလိပ်(ရန်ကုန်)မှ  ယခုကျောင်းဆင်းခဲ့သည့်  အမှတ်စဉ်မှာ  (၂၂)   ဖြစ်ပြီး  ပြည်ထောင်စုတိုင်းရင်းသားလူငယ်များ စွမ်းရည်ဖွံ့ဖြိုးရေးဒီဂရီကောလိပ်(စစ်ကိုင်း)မှာ အမှတ်စဉ် (၁၉) ဟုသိရသည်။ ကျောင်းဆင်း ကျောင်းသား၊ ကျောင်းသူများသည် ပြည်ထဲရေးဝန်ကြီးဌာန၊ နယ်စပ်ရေးရာဝန်ကြီးဌာန၊ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန၊ သမဝါယမနှင့် ကျေးလက် ဖွံ့ဖြိုးရေးဝန်ကြီးဌာနတို့တွင်  တာဝန်ချထားခြင်းခံရကြောင်း သိရသည်။

သူတို့အားလုံးတစ်ဦးချင်း  အလုပ်ခန့်စာများ လက်ခံရရှိထားကြပြီဖြစ်သည်။  တစ်ယောက်တစ်နေရာ၊ တစ်ယောက်တစ်ဌာနဖြစ်ပေလိမ့်မည်။ 

အချို့တောင်တန်းဒေသများကို ပြန်ရသူရှိပါလိမ့်မည်။ အချို့မြေပြန့်မြို့ကြီးများဆီ တာဝန်ကျသူရှိပေလိမ့်မည်။ ထိုနည်းတူ မြန်မာနိုင်ငံ၏ အရှေ့ဘက်၊ အနောက်ဘက်စသည့်   မတူညီသောအရပ်များ၌ မတူညီသောဌာန၊   မတူညီသောတာဝန်များကို ထမ်းဆောင်ကြရပေတော့မည်။

တကယ်တော့  နိုင်ငံ့တာဝန်ထမ်း‌ဆောင်မည်ဆိုသည့် ကျောင်းဆင်းများမှာ အသက်နှစ်ဆယ်ကျော် အရွယ်လေးများဖြစ်သဖြင့် အိပ်မက်အလွန်များသည့် အရွယ်လေးများပင်ဖြစ်သည်ဟုဆိုရပါမည်။ သို့သော် သူတို့၏အိပ်မက်များသည် အတ္တအတွက် ရှေ့တန်းတင်ခြင်း အလျှင်းမရှိကြ။   

တောင်တန်းပေါ်က  တိတ်ဆိတ်သော  ရွာလေးတစ်ရွာ၊ မြေပြန့်ဒေသက မဖွံ့ဖြိုးသောဒေသတစ်ခုတွင် မဆုံဘူးသေးသော  ဒေသခံတွေ၊ မသိသေးသောဘဝများနှင့် ကြုံရပေတော့မည်။ တစ်ယောက်က ကလေးငယ်များကို   စာသင်ပေးနေလိမ့်မည်။ တစ်ဦးက    ဌာနတစ်ခုတွင်    ပြည်သူလူထုကို ဝန်ဆောင်မှုပေးနေလိမ့်မည်။ တစ်ဦးက ဒေသဖွံ့ဖြိုးရေးအတွက်ကြိုးပမ်းနေလိမ့်မည်။ တစ်ယောက်က နိုင်ငံတော်တည်ငြိမ်ရေးအတွက် တာဝန်ယူနေပေလိမ့်မည်။

နိုင်ငံတော်မှ ပညာရေးဖြင့်ပြုစုပျိုးထောင်ပေးလိုက်သော သား၊ သမီးများအား   နိုင်ငံအနှံ့နေရာ ဒေသအစုံသို့ အင်အားပြည့်ထမ်းဆောင်ရန် “တာဝန်ကိုယ်စီ” ခွဲဝေပေးလိုက်ခြင်းဖြစ်သည်။

ရည်ရွယ်ချက်

ထိုကျောင်းတော်ကြီးများ၏ ကျေးဇူးကား ကြီးမားလှပေသည်။ ကျောင်းတော်ကြီးများ ဖွင့်လှစ်ရခြင်း၏ ရည်ရွယ်ချက်များကလည်း အနှစ်သာရရှိလှပေသည်။ အဓိပ္ပာယ်လည်း ပြည့်ဝလှပေသည် -

(၁)       တိုင်းရင်းသားလူငယ်များသည်  ပညာရှာမှီးရင်း   တိုင်းရင်းသားအချင်းချင်း ပိုမိုစည်းလုံးချစ်ခင်လျက် ပြည်ထောင်စုစိတ်ဓာတ်ခိုင်မြဲသည့် လူငယ်များဖြစ်လာစေရန်။

(၂)        ပြည်ထောင်စု တိုင်းရင်းသားလူငယ်များသည် ပြည်ထောင်စုမပြိုကွဲရေး၊ တိုင်းရင်းသား စည်းလုံးညီညွတ်မှုမပြိုကွဲရေး၊ အချုပ်အခြာအာဏာ တည်တံ့ခိုင်မြဲရေးဟူသော ဒို့တာဝန် အရေးသုံးပါးကို သက်ဝင်ယုံကြည်၍ ထိန်းသိမ်းစောင့်ရှောက်သော လူငယ်များဖြစ်လာစေရန်။

(၃)       နယ်စပ်ဒေသဖွံ့ဖြိုးရေးနှင့် တိုင်းရင်းသားလူမျိုးများ၏  လူနေမှုအဆင့်အတန်း မြင့်မားရေးအတွက် ဆောင်ရွက်လိုသည့်စိတ်ဓာတ်မွေးမြူပေးရန်။

(၄)       အေးချမ်းသာယာ၍   ခေတ်မီဖွံ့ဖြိုးတိုးတက်သော နိုင်ငံတော်အဖြစ် တည်ဆောက်ရာတွင်  စွမ်းစွမ်းတမံဆောင်ရွက်လိုသည့် စိတ်ဓာတ်များမွေးမြူပေးရန်။

(၅)       အဆင့်မြင့်တက္ကသိုလ်ဘာသာရပ်များတတ်မြောက်၍ ကျောင်းဆင်းပြီးသွားပါက မိမိဒေသတွင်   ဖွံ့ဖြိုးရေးလုပ်ငန်းများအား   ကျရာကဏ္ဍမှ တက်ကြွစွာပါဝင်‌ဆောင်ရွက်စေရန်တို့ဖြစ်သည်။

ထိုရည်ရွယ်ချက်များက တိုင်းရင်းသားလူငယ်များအတွက် ပြည့်စုံသော အနာဂတ်ကို ပေါ်လွင်အောင်ဖော်ဆောင်ပေးခဲ့သည်။ ထို့ကြောင့် ကျောင်းတော်ကြီးများသည်  ပညာရေးအတွက်  စာသင်ကြားခြင်းတစ်ခုပင် မဟုတ်တော့ဘဲ   လူငယ်များ၏ဘဝနှင့် နိုင်ငံတော်ကိုပြောင်းလဲမြှင့်တင်ပေးရန် ပြုစုပျိုးထောင် တည်ဆောက်‌ပေးလျက်ရှိသော “အင်အား” တစ်ခုဖြစ်ပေသည်။

စည်းလုံးမှုရှိရာအရပ်တွင် အင်အားရှိပြီး အင်အားရှိရာမှ   အောင်မြင်မှုပေါ်ထွန်းလာရသည်ဖြစ်ရာ တစ်ဦးချင်း၏ “ရုပ်ပိုင်းဆိုင်ရာအင်အား”၊ “စိတ်ပိုင်းဆိုင်ရာအင်အား”   တို့မှတစ်ဆင့်   လူအများ၏ပေါင်းစည်းမှုဖြင့်  စည်းလုံးမှုအင်အားကိုရရှိလာမည်ဖြစ်သည်။

ပညာရေးမှ တာဝန်သို့

နိုင်ငံတော်၏ အနာဂတ်အတွက်  “အစ”  သည် ပညာရေးဖြစ်ပြီး ထိုပညာရေး၏ “အဆုံး”သည် နိုင်ငံတော်တည်ဆောက်ရေးတာဝန်ပင်ဖြစ်သည်။ 

ကောင်းမွန်သောစနစ်မရှိသည့်   ပညာရေးသည် အလင်းမရှိသော လမ်းကြောင်းနှင့်တူသည်ဟုဆိုသည်။

ကျောင်းတော်ကြီးများ၏   ကောင်းမွန်သော ပညာရေးစနစ်၊    တိကျသောလေ့လာရေးစနစ်၊ စည်းကမ်းရှိသော အုပ်ချုပ်မှုများ၊ အမျိုးသားရေးစိတ်ဓာတ်ကို ဖွံ့ဖြိုးမြှင့်တင်ပေးသော ပတ်ဝန်းကျင်များက  လူငယ်တို့၏ အရည်အသွေးကိုသာမက သူတို့၏နှလုံးသားတွင်  “နိုင်ငံချစ်စိတ်”   ကိုပါ အရောင်တင်‌ပေးခဲ့သည်။

ယခုအခါ တိုင်းရင်းသားကျောင်းသား လူငယ်များသည် သင်ယူသူများမဟုတ်တော့ တာဝန်ယူထမ်းဆောင်ကြသူများဖြစ်လာကြပေပြီ။ ထို့ကြောင့် ပညာရေးမှရရှိလာသောအသိပညာများကို တာဝန်ယူမှုနှင့်ပေါင်းစပ်လျက် နိုင်ငံတော်အတွက် အသုံးချနိုင်သော အင်အားတစ်ခုအဖြစ ပြောင်းလဲရမည်ဖြစ်သည်။

နိုင်ငံတော်က “ရာထူး” ခန့်အပ်ခြင်း၊ နေရာချထားခြင်းများဆောင်ရွက်ပေးခဲ့ပြီ။ “တာဝန်” နှင့် “အရည်အချင်း” ကိုတော့ မိမိတို့ကိုယ်တိုင်ကြိုးစားရပေလိမ့်မည်။

မတူညီသော ဒေသများသို့ သွားရောက်တာဝန်ထမ်းဆောင်ကြမည့် တိုင်းရင်းသား လူငယ်များသည် လမ်းကြောင်းများကွဲပြားကြမည်ဖြစ်သော်လည်း နိုင်ငံ၏အကျိုးအတွက်    ကျရာအခန်းကဏ္ဍမှ တာဝန်ထမ်းဆောင်မည်ဟူသော စိတ်ဓာတ်တစ်ခုတည်းကိုသာ ခံယူထားကြရပါလိမ့်မည်။

Education is the most powerful weapon which you can use to change the nation.ထို့ကြောင့် “ပညာရေးမှ တာဝန်သို့” ကူးပြောင်းခြင်းသည်    ကျောင်းဆင်းတိုင်းရင်းသားလူငယ်တစ်ဦးချင်းစီ၏  ပညာရေးအောင်မြင်မှုသာမဟုတ် နိုင်ငံတစ်နိုင်ငံ၏   အနာဂတ်တည်ဆောက်ရေး တာဝန်၏ “အစ” ဖြစ်ပါကြောင်း ရေးသား ဖော်ပြအပ်ပါသည်။   ။

MWD

နွေရာသီကျောင်းပိတ်ရက် သုံးလတာကာလသည် ကျောင်းတော်ကြီးနှင့်ဝေးကွာပြီး ပျင်းရိငြီးငွေ့ဖွယ်ဟု ဆိုနိုင်သည်။ ကျောင်းပိတ်ရာသီ၌ ပျော်ရာပျော်ရာ ဌာနများနှင့် သန်ရာ သန်ရာတို့တွင် ကျင်လည်ကြသည်ဆိုသော်လည်း အပေါင်းအသင်းသူငယ်ချင်းများနှင့် တစုတဝေးတည်း ပေါင်းစုံရာ စာသင်ကျောင်းများ၏ ပျော်ရွှင်မှုကို လိုက်မမီဟုထင်သည်။

နုပျိုသစ်လွင်နေပြီး အဖူးအငုံပန်းလေးများ အသွင်ဆောင်သည့် မျိုးဆက်သစ်ကျောင်းသား ကျောင်းသူလေးများ၏ ကျက်သရေမင်္ဂလာအဖြာဖြာက ညွှန်းဖွဲ့မကုန်ဖြစ်သည်။ ငယ်ဂုဏ်ဟုဆိုသည့် နုပျိုသစ်လွင်မှုများနှင့် တက်ကြွလန်းဆန်းနေသည့် မျိုးဆက်သစ်ပန်းကလေးများ အစဉ်လန်းဆန်း နေရအောင် ပျိုးထောင်ကြရမည်မှာ မိဘ၊ ဆရာများ၏တာဝန်ဖြစ်သည်။ ကျောင်းသား ကျောင်းသူလေးများ ရှင်သန်ပွင့်လန်းဖွံ့ဖြိုးလာအောင် ထိန်းသိမ်းစောင့်ရှောက် မြေတောင်မြှောက် ပေးကြရေးသည် ကျွန်ုပ်တို့အားလုံး၏ တာဝန်ဖြစ်သည်။ ပန်းပင်ပျိုးပင် အဖူးအငုံလေးများနှင့် တူသည့် ကလေးသူငယ်၊ လူငယ်လူရွယ်များ၏ အနာဂတ်တောက်ပြောင်လာအောင်၊ မျှော်လင့်ချက်များ ဝေစည်လာအောင် ပညာသင်ကြားရေးကို အားပေးရမည်ဖြစ်သည်။ ပညာရေးကို မြှင့်တင်ရမည် ဖြစ်သည်။ ပညာအသီးသီး တည်ထွန်းရာ ဘူမိနက်သန်အောင်မြေသည် နိုင်ငံတစ်ဝန်းရှိ စာသင် ကျောင်းများပင်ဖြစ်သည်။

မေလ နောက်ဆုံးပတ်တွင် ကျောင်းအပ်နှံကြမည်။ ဇွန်လဆန်းတွင် ကိုယ်စီကိုယ်စီ စာသင်ကျောင်း အသီးသီးတွင် ပညာရည်နို့ သောက်စို့ကြတော့မည်ဖြစ်သည်။ ကျွန်ုပ်တို့၏ဆန္ဒအရင်းခံမှာ တစ်နိုင်ငံလုံး အတိုင်းအတာဖြင့် ကျောင်းများအားလုံး ဖွင့်လှစ်စေချင်သည့်ဆန္ဒဖြစ်သည်။ တစ်နိုင်ငံလုံးရှိ ကျောင်းသား ကျောင်းသူလေးများအားလုံး တူတူညီညီ ရယ်ရယ်ပြုံးပြုံး၊ ပျော်ပျော်ရွှင်ရွှင်၊ တစုတရုံး ကျောင်းတက်ကြစေလိုသည်။ သို့သော်အခြေအနေအရ ကျောင်းမဖွင့်နိုင်သည့် ဒေသအချို့လည်း ရှိမည်ဖြစ်သည်။ အဖျက်သမားသောင်းကျန်းသူများ၏ နှောင့်ယှက်ဖျက်ဆီးမှုများကြောင့် ကျောင်းမဖွင့်နိုင်သည့် ဒေသများလည်းရှိသည်။ မကြာသောကာလတွင် တစ်နိုင်ငံလုံးရှိ ကျောင်းများ အားလုံး ဖွင့်လှစ်၍ ကလေးသူငယ်အားလုံး ကျောင်းတက်ခွင့်ရနိုင်တော့မည်ဟု ယုံကြည်ထားသည်။

ဘက်စုံပညာရေးစနစ်

လက်ရှိတွင် တည်ငြိမ်အေးချမ်းသော မြို့ရွာများ၌ အခြေခံပညာကျောင်းများ ဖွင့်လှစ်နိုင်ရန် အသင့် ဖြစ်နေကြပြီ။ အကြောင်းအမျိုးမျိုးပြ၍ ပညာရေးကို နှောင့်ယှက်ဖျက်ဆီးမှုများကြောင့် မညီမမျှဖြစ်နေသည့် အခြေအနေအပေါ် စိတ်မကောင်းဖြစ်ရသည်။ ပညာရေးတွင် အနှောင့်အယှက်များ၊ စိန်ခေါ်မှုများ၊ အခက်အခဲများရှိသော်လည်း နိုင်ငံတော်အစိုးရအနေဖြင့် ပြည်သူများ၏ လူမှုဘဝလုံခြုံရေး၊ ကလေးသူငယ်များ အေးချမ်းစွာ ပညာသင်ကြားနိုင်ရေးအတွက် ပြည်ထောင်စုတစ်ဝန်းလုံး တည်ငြိမ်အေးချမ်းရေးနှင့် တရားဥပဒေစိုးမိုးရေး အလေးထား ဆောင်ရွက်နေသည်ကို တွေ့ရသည်။ တစ်နိုင်ငံလုံး အသိပညာ၊ အတတ်ပညာ မြင့်မားတိုးတက်စေရေး၊ ကုန်ထုတ်လုပ်မှု အထောက်အကူပြု အတတ်ပညာရှင်များ ထွန်းကားရေးအတွက် လူတိုင်း လက်လှမ်းမီသည့် ဘက်စုံပညာရေးစနစ်ကို အကောင်အထည်ဖော်နေသည်။ ကျောင်းနေအရွယ် ကလေးတိုင်း ကျောင်းနေနိုင်ရေး၊ အခမဲ့ပညာသင်ကြားရေးကို နိုင်ငံအနှံ့တွင် ‌ဖော်ဆောင်နေသည်။

အလေးထားသတိပြု

ယခု နိုင်ငံတော်အစိုးရသစ်လက်ထက်တွင် ပညာရေးကဏ္ဍအနာဂတ်အတွက် အားတက်ဖွယ်ရာ အခြေအနေများကို ကြားသိနေရသည်မှာ ဝမ်းမြောက်ဖွယ်ဖြစ်သည်။ ဧပြီလ ၁၀ ရက်နေ့က နိုင်ငံတော် သမ္မတ မိန့်ခွန်းပြောကြားခဲ့ရာတွင် “ပညာရေးမြှင့်တင်ဖို့ဆိုရင် ကျောင်းနေအရွယ် ကလေးတိုင်း ကျောင်းနေဖို့နဲ့ ကျောင်းထွက်နှုန်းလျှော့ချစေဖို့၊ ပညာကိုဆုံးခန်းတိုင် သင်ကြားကြစေဖို့ လိုအပ်ပါတယ်။ ပညာနိမ့်ပါးရင် စဉ်းစားတွေးခေါ်မှုနဲ့ လုပ်ကိုင်ဆောင်ရွက်မှုတွေဟာလည်း နိမ့်ကျ နေမှာလည်းဖြစ်ပါတယ်။ ဒါ့ကြောင့် ကျွန်တော့်အနေနဲ့ အခြေခံပညာကဏ္ဍမှာ KG+9 အဆင့်အထိ အားလုံးသင်ယူနိုင်ကြဖို့ မူဝါဒချမှတ်ဆောင်ရွက်လျက်ရှိပါတယ်။ ဒါကို မိဘများ၊ ဆရာများအပါအဝင် တာဝန်ရှိသူများနဲ့ နိုင်ငံသားအားလုံးက သဘောပေါက်လက်ခံပြီး အောင်မြင်အောင် ဆောင်ရွက်ကြဖို့” တိုက်တွန်းပြောကြားချက်က ပညာရေးကဏ္ဍအတွက် အလေးထားသတိပြု လိုက်နာဆောင်ရွက် ရမည့် အရေးကြီးကိစ္စဖြစ်သည်။

ပညာရေးကဏ္ဍနိမ့်ကျ

နိုင်ငံလူဦးရေ၏ ၇၀ ရာခိုင်နှုန်းသည် ကျေးလက်ဒေသများတွင် နေထိုင်ကြပြီး ယင်းတို့အနက် အသက် ၁၅ နှစ်အထက် ၄၅ ရာခိုင်နှုန်းသော လူဦးရေသည် စိုက်ပျိုးမွေးမြူရေးဖြင့် အသက်မွေး ဝမ်းကျောင်း ပြုကြကာ ၉ ဒသမ ၅ ရာခိုင်နှုန်းသည် ကုန်ထုတ်လုပ်မှု လုပ်ငန်းတွင်ပါဝင်လုပ်ကိုင်နေသည်ကို တွေ့ရသည်။ အလယ်တန်းနှင့် အထက်တန်း ပြီးမြောက်သူများတက်ရောက်ကြသည့် နည်းပညာ၊ သက်မွေးပညာသင်တန်းကျောင်းနှင့် ဒီပလိုမာတန်း ပြီးမြောက်သူများသည် တစ်နိုင်ငံလုံးတွင် သုံးသိန်း ခန့်သာရှိသည်။ သုံးသိန်းဆိုသည့် အရေအတွက်က အသက် ၁၅ နှစ်အထက် လူဦးရေ၏ တစ်ရာခိုင်နှုန်း ကျော်သာရှိနေသည်ဖြစ်ရာ တိုင်းပြည်အနာဂတ်အတွက် ရင်လေးစရာဖြစ်သည်။ ပညာရေးကဏ္ဍ နိမ့်ကျနေသည်မှာ ယနေ့ထက်တိုင်ဖြစ်သည်။

ထို့ကြောင့် လေ့လာတွေ့ရှိချက်များအရ လုပ်ကိုင်စားသောက်နိုင်သည့် အခြေအနေဖြစ်အောင် အနည်းဆုံးအနေဖြင့် KG+9 ဟုခေါ်သည့် အလယ်တန်းအဆင့်ပညာရေးကို ပြီးမြောက်အောင် သင်ကြားသင့်သည်။ မိဘအုပ်ထိန်းသူများနှင့် တာဝန်ရှိသူများ၊ လုပ်ကိုင်နိုင်စွမ်းရှိသူ နိုင်ငံသား အားလုံးအနေဖြင့် တိုင်းပြည်နှင့် မျိုးဆက်များ၏ အနာဂတ်ကိုမြော်တွေး၍ ခိုင်မာသည့်ပညာရေး ကဏ္ဍတွင် လျှောက်လှမ်းနိုင်အောင် ဝိုင်းဝန်းဆောင်ရွက်ကြရန်လိုအပ်သည်။ အားလုံးစုစည်း ညီညွတ်မှုဖြင့် ဆောင်ရွက်ခဲ့ကြသဖြင့် အောင်မြင်မှုရခဲ့သည့် သာဓကများစွာလည်းရှိသည်။ ထို့ကြောင့် ကျောင်းနေ အရွယ်ကလေးအားလုံး ပညာသင်ယူခွင့်ရရှိရေး၊ အနည်းဆုံး အလယ်တန်းအဆင့် (KG+9) ပြီးမြောက်သည်အထိ ပညာသင်ယူနိုင်ကြရေးနှင့် အနာဂတ်ပညာရေးကို ပိုမိုကောင်းမွန် လာစေရေးအတွက် အမျိုးသားရေးတာဝန်တစ်ရပ်အနေဖြင့် တက်ညီလက်ညီ ကြိုးပမ်း ဆောင်ရွက်ပါက တိုင်းပြည် အနာဂတ်အတွက် စိတ်အေးဖွယ်ဖြစ်သည်။

ကျောင်းနေရေးထောက်ကူ

သုတေသနပြုချက်များအရ ကလေးသူငယ်များအား ကျောင်းထားရန် တွန့်ဆုတ်နေကြသည့် မိဘများကို ပညာတန်ဖိုးနားလည်သဘောပေါက်လာအောင် စည်းရုံးပြီး နိုင်ငံတော်နှင့် လူမှု ပတ်ဝန်းကျင် အသိုင်းအဝိုင်းက ကူညီပံ့ပိုးပေးရန် အသင့်ရှိနေသည်ကို ယုံကြည်လာအောင် စွမ်းဆောင်ပေးနိုင်ကြပါက မိမိတို့၏ရင်သွေး ကလေးသူငယ်များ ကျောင်းပရဝဏ်အသီးသီးသို့ စုံစုံညီညီ ရောက်ရှိလာမည်မှာ သေချာသည်။ နိုင်ငံတော်အနေဖြင့် အခမဲ့ပညာရေးအစီအစဉ်အရ ပြဋ္ဌာန်းစာအုပ်များ၊ ဗလာစာအုပ်များ၊ ခဲတံ၊ ဘောပင်၊ ကျောင်းဝတ်စုံများကို အခမဲ့ထောက်ပံ့ ပေးနေသကဲ့သို့ အတန်းကူးပြောင်းသွားကြသည့် ကျောင်းသားများထံမှ ကျောင်းဝတ်စုံများနှင့် စာအုပ်များကိုလိုအပ်သည့် ကျောင်းသားများထံ လွှဲပြောင်းပေးအပ်ခြင်းနှင့် အမှန်တကယ် ကျောင်း နေရန် အခက်အခဲရှိသည့် ချို့တဲ့နွမ်းပါးသူများကို ပညာသင်ထောက်ပံ့ကြေး ပံ့ပိုးပေးခြင်းတို့သည် အခက်အခဲရှိသည့် မိဘများ၏ဝန်ထုပ်ဝန်ပိုးကို အထိုက်အလျောက်လျော့ကျစေနိုင်ပြီး ကလေးများကို ကျောင်းထားရေးအတွက် အထောက်အကူပြုနိုင်မည်ဖြစ်သည်။

ကျောင်းသားမိဘများအနေဖြင့်လည်း မိမိသားသမီးများကို အမှန်တကယ် စာတတ်မြောက်စေရန် အရည်အသွေးရှိသည့် ပညာများသင်ကြားမှုကိုလိုလားကြသည်။ ထို့ကြောင့်လည်း ဆရာ ဆရာမ လုံလောက်ရေး၊ ရရှိထားသည့်ဘွဲ့နှင့် သင်ကြားနေသည့် ဘာသာရပ်ကိုက်ညီရေး၊ ဆရာ ဆရာမများ အရည်အသွေးမြှင့်တင်ရေး၊ ဆရာ ဆရာမများ သက်သာချောင်ချိရေး၊ သင်ရိုးညွှန်းတမ်း များမွမ်းမံရေး၊ ကျောင်းဥပဓိရုပ် ကောင်းမွန်ရေးတို့ကို ဆောင်ရွက်ပေးကြရေးတို့သည် အလွန်အရေး ကြီးသဖြင့် နိုင်ငံတော်က ဆောင်ရွက်ပေးနေသည်။ အလယ်တန်းဆင့်ပြီးမြောက်သူများကို စက်မှု၊ စိုက်ပျိုး မွေးမြူရေးနှင့် သက်မွေးပညာသင်တန်းများ ပိုမိုတက်ရောက်နိုင်ရန် လမ်းဖွင့်ပေးလျက်ရှိသည်။ ကျောင်းတက်သူဦးရေတိုးတက်ရေး၊ အတန်းကူးပြောင်းမှုနှုန်း မြင့်မားရေးကို အဟန့်အတားဖြစ်စေ သည့်အကြောင်းရင်းများကို အဖြေရှာပြီး ဖြေရှင်း ပေးကြရမည်ဖြစ်သည်။

ရင်ပေါင်တန်းလာနိုင်ရေး

နိုင်ငံတော်က ကျောင်းနေအရွယ် ကလေးများအားလုံး အရည်အသွေးကောင်းမွန်ပြီး အဆင့်မီသည့် ပညာသင်ယူနိုင်ခွင့်ရအောင် ဖန်တီးဖော်ဆောင်ပေးနိုင်ရန် ကြိုးပမ်းဆောင်ရွက်လျက်ရှိသည်။ Education for All ဆိုသည့်အတိုင်း အားလုံးအတွက် ပညာရေးကို မဖြစ်မနေ အကောင်အထည် ဖော်လျက်ရှိသည်။ ရည်ရွယ်ချက်မှာ ကလေးသူငယ် လူငယ်လူရွယ်အားလုံး ကျောင်းနေနိုင်ရေး ဖြစ်သည်။ ရည်မှန်းချက်သို့ ရောက်သည်အထိ စဉ်ဆက်မပြတ် ပညာသင်နိုင်ရေးဖြစ်သည်။ နိုင်ငံအတွင်း ပညာတတ်သူများ ပေါများလာရေးဖြစ်သည်။ ပေါများကြွယ်ဝသည့် ပညာတတ်များ၊ လူ့စွမ်းအားအရင်းအမြစ်များဖြင့် နိုင်ငံကိုတည်ဆောက်ကြရန်၊ နိုင်ငံဖွံ့ဖြိုးတိုးတက်လာရန်၊ နိုင်ငံတကာနှင့် ရင်ပေါင်တန်းနိုင်လာရန် ကြိုးစားကြရမည်ဖြစ်သည်။

ကျောင်းအပ်နှံကြပါစို့

နိုင်ငံ၏အနာဂတ်က မျှော်လင့်ချက်ရောင်ခြည်များ လင်းလက်နေသည်။ အဓိကကျသည့် ပညာရေး နိမ့်ကျနေမှုကို မြှင့်တင်ပေးနိုင်ရန်အတွက် ရည်မှန်းချက်ကြီးကြီး ထားရှိဆောင်ရွက်နေသည်။ ယနေ့ ကျောင်းသား ကျောင်းသူ၊ မိဘအုပ်ထိန်းသူ၊ ဆရာ ဆရာမများက တောက်ပလာတော့မည့် ပညာရေးခရီးလမ်းတွင် စဉ်ဆက်မပြတ် ဖြတ်သန်းနိုင်ရန်အတွက် ပညာရေးနှိုးဆော်ချက်တစ်ခု ဖြစ်သည့် “ကျောင်းနေ အရွယ်ကလေးအားလုံး အခြေခံပညာသင်ယူဖို့ ကျောင်းအပ်နှံကြပါစို့” ဆောင်ပုဒ်ပါအတိုင်း ၂၀၂၆-၂၀၂၇ ခုနှစ် ပညာသင်နှစ်တွင် အားလုံး စုံစုံညီညီ ကျောင်းတက်နိုင်ရေး ဆောင်ရွက်ကြရမည်ဖြစ်သည်။

မိဘအုပ်ထိန်းသူများအနေဖြင့် မိမိတို့၏ ကလေးငယ်များဘဝရှေ့ရေး၊ နိုင်ငံတော်အနာဂတ် တောက်ပြောင် လာရေးအတွက် လက်ငင်းအရေးကြီးသည့် ကျောင်းနေအရွယ် ကလေးငယ်တိုင်း ကျောင်းနေနိုင်ရေး၊ ကျောင်းနေကလေးတိုင်း စဉ်ဆက်မပြတ် ကျောင်းတက်နိုင်ရေး၊ ထူးချွန် ထက်မြက်သူများဖြစ်လာစေရေး နိုင်ငံတော်၏ ပညာရေးအစီအမံများနှင့်အတူ လိုက်ပါဆောင်ရွက် ကြပါရန် တိုက်တွန်းနှိုးဆော်အပ်ပါသည်။

MDN

လေအဝှေ့တွင် ပိတောက်ရနံ့တို့က သင်းပျံ့ချိုအီနေသည်။ မိုးလေးတစ်ဖြိုက်နှစ်ဖြိုက် ရွာသွန်းဖြိုးသည်နှင့် ပန်းပိတောက်တို့သည် ပင်လုံးကျွတ်မျှ ဝေဆာပွင့်ဖူးလာသည်။ မကြာမီ မိုးဖြိုင်ဖြိုင်ရွာတော့မည်။ ပန်းကလေးများပွင့်တော့မည်။ ကျောင်းဖွင့်ရာသီရောက်တော့မည်။ အဖြူနှင့်အစိမ်း တူညီကျောင်းဝတ်စုံဝတ်ဆင်၍ ကျောင်းတက်လာကြသော ရင်သွေးငယ်များကို ကြည်နူးဖွယ်ရာ မြင်တွေ့ကြရတော့မည်။

မြန်မာတို့သည် ပညာရေးနှင့်ပတ်သက်လျှင် ရှေးယခင်ကတည်းက ပညာရေချိန် နိမ့်ပါးသူများ မဟုတ်ကြပါ။ ပညာဉာဏ်စွမ်းအား ထက်မြက်သူများဖြစ်ကြသည်။ ကုလသမဂ္ဂ အတွင်းရေးမှူးချုပ် ဦးသန့်အပါအဝင် မြန်မာနိုင်ငံသား အသိပညာရှင်၊ အတတ်ပညာရှင်များစွာသည် ကမ္ဘာ့အလယ်တွင် ပညာရဲရင့် ပွဲလယ်တင်ခဲ့ကြပေသည်။

သို့ရာတွင် နိုင်ငံရေးသဘောထားကွဲလွဲမှုနှင့် တိုင်းရင်းသားရေးရာပြဿနာများကြောင့် ပြည်သူများ ပညာသင်ကြားရေးအတွက် အခက်အခဲများရှိခဲ့သဖြင့် ပညာရေးအားနည်းချက်များ ရှိခဲ့လေသည်။ အထူးသဖြင့် ပညာရေးလောကအတွင်းသို့ နိုင်ငံရေးပယောဂများ မကြာခဏပူးကပ်လာမှုများကြောင့် ပညာရေးကဏ္ဍတွင် နှောင့်နှေးမှုများ ဖြစ်ပေါ်ခဲ့ရသည်။

မြန်မာ့လူ့ဘောင်အဖွဲ့အစည်းသည် ပညာကိုအလေးအနက်တန်ဖိုးထားလေ့ရှိသော လူ့အဖွဲ့အစည်းတစ်ရပ်ဖြစ်သည်။ အသိပညာကိုမြတ်နိုးဖွယ်ရာ ရတနာအဖြစ် တင်စားပမာပြုလေ့ရှိကြသည်။ ပညာတတ်မြောက်ပါမှ အဆိုးအကောင်း၊ အကျိုးအကြောင်းကို ခွဲခြားသိမြင်နိုင်မည်ဖြစ်သည်။ ပညာမတတ်သူသည် မျက်မမြင်နှင့်အလားတူပြီး သူကန်းစမ်းတဝါးဝါးစခန်းသွားလျှင် လိုရာဌာနမရောက်ဘဲ ဒုက္ခအဖုံဖုံကြုံရသကဲ့သို့ ပညာမတတ်လျှင် အရာရာတွင် ဆင်ခြင်ဆုံးဖြတ်နိုင်စွမ်းမရှိသဖြင့် အမှားမှားအယွင်းယွင်းဖြင့် နောက်ဆုံးဒုက္ခတွင်း၌သာ နစ်မြုပ်ရသည်။ ထို့ကြောင့် အရာရာတွင် အဆိုးအကောင်း၊ အကျိုးအကြောင်းကို ခွဲခြားသိတတ်သောပညာကို ရရှိရန်လိုအပ်ပါသည်။

လောကီလူသားများတွင် ပဋိသန္ဓေမွေးရာပါ ပညာဉာဏ်ထက်မြက်သူနှင့် အဆင့်ဆင့်သင်ယူ ကြိုးစားလေ့ကျင့်၍ ပညာဉာဏ်ထက်မြက်လာသူဟူ၍ နှစ်မျိုးနှစ်စားရှိသည့်အနက် ပဋိသန္ဓေမွေးရာပါ ပညာဉာဏ်ထက်မြက်သူက အလွန်နည်းပါးပြီး အဆင့်ဆင့်သင်ယူကြိုးစားလေ့ကျင့်၍ ဉာဏ်ပညာထက်မြက်လာသူက အများစုဖြစ်ရကား အသိပညာရှင်၊ အတတ်ပညာရှင်များပေါ်ထွက်လာရေးအတွက် ကမ္ဘာ့နိုင်ငံများသည် ပညာရေးကဏ္ဍကိုမြှင့်တင်၍ အဆင့်ဆင့်လေ့ကျင့်ပျိုးထောင်ပြီး မွေးထုတ်ပေးနေကြခြင်း ဖြစ်ပါသည်။

နိုင်ငံတော်အစိုးရအနေဖြင့်လည်း ပညာရေးရင်းနှီးမြှုပ်နှံမှုက နိုင်ငံ့အတွက် တန်ဖိုးအရှိဆုံးသော ရင်းနှီးမြှုပ်နှံမှုအဖြစ်ရှုမြင်ကာ ပညာရေးအဆင့် အတန်းတိုးတက်မြင့်မားရေးအတွက် နှစ် ၃၀ အမျိုးသားပညာရေးစီမံကိန်းကို ဆက်လက်အကောင်အထည်ဖော် ဆောင်ရွက်လျက်ရှိသည်။

ယခင်က ပညာရေးနှင့်ပတ်သက်၍ အခြေခံပညာမူလတန်းအဆင့်အား မသင်မနေရစနစ်အဖြစ် ဆောင်ရွက်ခဲ့သော်လည်း လူတိုင်းအခြေခံပညာ မူလတန်းတက်ရောက်သင်ကြားမှုမရှိခဲ့၍ မျက်မှောက်ကာလတွင် KG+9 မသင်မနေရ ပညာရေးစနစ်အဖြစ် ပြောင်းလဲဆောင်ရွက်ခဲ့သည်။

ကျောင်းနေအရွယ် ကလေးငယ်အားလုံး ကျောင်းတက်နိုင်ရေးနှင့် KG+9 ပြီးမြောက်ရေး၊ အလယ်တန်းပညာရေး ပြီးဆုံးအောင်မြင်သူများကို စက်မှု၊ စိုက်ပျိုး၊ မွေးမြူရေး အထက်တန်း ကျောင်းများ၌ တက်ရောက်သင်ယူနိုင်ရေး၊ အသက်မွေးဝမ်းကျောင်းမှု အခြေခံများရရှိနိုင်ရန် Grade 10 ၊ Grade 11 ၊ Grade 12 အတန်းများတွင် စိုက်ပျိုးရေး၊ မွေးမြူရေးနှင့် စက်မှုနည်းပညာရပ်များ သင်ကြားနိုင်ရေး၊ အဆင့်မီသူများကို သိပ္ပံ၊ ကောလိပ်နှင့် တက္ကသိုလ်များတွင် ဆက်လက်ပညာသင်ကြားနိုင်ရေးအစီအမံများကို ကွင်းဆက်ကျကျ ချိတ်ဆက်အကောင်အထည်ဖော်ဆောင်ရွက်လျက်ရှိပါသည်။

ထို့အတူ ယနေ့ခေတ်သည် နည်းပညာခေတ်ဖြစ်သည်နှင့်အညီ နိုင်ငံတော်က နည်းပညာနှင့် ကွန်ပျူတာတက္ကသိုလ်များ အရည်အသွေးကို မြှင့်တင်ပေးခဲ့ပြီး နေပြည်တော်တွင် Napyitaw State Academy နှင့် Napyitaw State Polytechnic တို့ကို ဖွင့်လှစ်ပေးခဲ့သည်။ တိုင်းဒေသကြီးနှင့် ပြည်နယ်လေးခုတို့၌လည်း Polytechnic University တို့ကိုဖွင့်လှစ်ပေးခဲ့ပြီး ဆက်လက်တိုးချဲ့ဖွင့်လှစ်ပေးနိုင်ရန် စီမံဆောင်ရွက်လျက်ရှိကြောင်း သိရသည်။

မျိုးဆက်သစ်လူငယ်မောင်မယ်များ ပညာရည်မြင့်မားရေး၊ ဗလငါးတန်ပြည့်ဝစေရေးအတွက် နိုင်ငံတော်အစိုးရက အဘက်ဘက်မှ စီမံဆောင်ရွက်လျက်ရှိသည့်နည်းတူ မိဘ၊ ဆရာများကလည်း အားတက်သရော ပူးပေါင်းပါဝင်ဆောင်ရွက်ကြရပါမည်။

မိဘဟူသည်ကား သားသမီးတို့၏ ပုဗ္ဗာစရိယ လက်ဦးဆရာများဖြစ်ပါသည်။ မကောင်းမြစ်တာ၊ ကောင်းရာညွှန်လတ်၊ အတတ်သင်စေ စသည့် မိဘတို့၏ဝတ္တရားနှင့်အညီ သားငယ်၊ သမီးငယ်များ အတတ်ပညာတတ်မြောက်ကာ လိမ္မာရေးခြားရှိကြစေရန် ဆရာထံ အပ်နှံပေးကြရသည်။

မြတ်ဆရာတို့ကလည်း တပည့်တို့အပေါ် “အတတ်လည်းသင်၊ ပဲ့ပြင်ဆုံးမ၊ သိပ္ပမချန်၊ ဘေးရန် ဆီးကာ၊ သင့်ရာအပ်ဖို့” ဟူသော ဆရာ့ဝတ္တရား ငါးပါးနှင့်အညီ -

၁။ ဝိဇ္ဇာ၊ သိပ္ပံအတတ်ပညာတို့ကို သင်ကြားပေးရခြင်း၊

၂။ ဘဝလမ်းကြောင်း မတိမ်းမစောင်းရလေအောင် ထိန်းကျောင်းပဲ့ပြင်ရခြင်း၊

၃။ ဆရာစားမချန် အိတ်သွန်ဖာမှောက် အတတ်ပညာသင်ကြားပေးရခြင်း၊

၄။ အန္တရာယ်ရန်စွယ်အဝဝ မကျရောက်ရအောင် ကာကွယ်ပေးရခြင်း၊

၅။ အခြေခံမှ အထက်တန်းအဆင့်မြင့်ပညာရပ်များကို လက်ဆင့်ကမ်းသင်ကြားစေရ ခြင်းတို့ကို ဆရာ့ဝတ္တရားအတိုင်း လိုက်နာဆောင်ရွက်ကြရပါမည်။

ထို့အတူ “ကျောင်းမှာမြဲနေ၊ စာပေသင်သင်၊ သို့လျှင် သို့ဖတ်၊ သို့မှတ် သို့ရေး၊ သို့မေး သို့ဖြေ၊ သို့နေ သို့ထိုင်၊ သို့ကိုင် သို့ကြွ၊ သို့ကွ သို့ကုန်း၊ သို့သုံး သို့စွဲ၊ သို့လဲ သို့ထား၊ သို့စား သို့သောက်၊ သို့လျှောက် သို့ဆို၊ သို့ကို သို့ကျင့်၊ သို့နှင့် သို့လျှိုး၊ သို့ရှိခိုး” ဟူ၍ ကန့်ကူ လက်လှည့်လက်ဆုပ် လက်ကိုင် ဂဃနဏ တိတိကျကျသင်ပြပေးကြရသည်။

မကြာမီကျောင်းအပ်နှံရေး ရက်သတ္တပတ်အစီအစဉ်များ စတင်တော့မည်။ တစ်ဆက်တည်းမှာပင် ကျောင်းခေါင်းလောင်းသံချိုမြမြနှင့် ရင်သွေးငယ်များ၏ စာအံသံတစာစာကို ကြားကြရပါတော့မည်။ ၂၀၂၆-၂၀၂၇ ပညာသင်နှစ်အစတွင် ပျော်ရွှင်စွာ ကျောင်းတက်လာကြမည့် ရင်သွေးငယ်များကို ကြည်နူးဖွယ်ရာ မြင်တွေ့ကြရပါတော့မည်။

နိုင်ငံတော်အပိုင်းက ပညာရေးကဏ္ဍကို နိုင်ငံတော်၏ အနာဂတ်ဖွံ့ဖြိုးတိုးတက်ရေးအတွက် ရင်းနှီးမြှုပ်နှံမှုအဖြစ် ဆောင်ရွက်နေသကဲ့သို့ မိဘများကလည်း ရင်သွေးငယ်များ အနာဂတ်ဘဝလှပစေဖို့ ငယ်စဉ်အခါမှာ ပညာသင်ကြားရန် မပျက်မကွက် ကျောင်းအပ်နှံပေးကြရပါမည်။

ပန်းပုသမား၊ ကျောက်သွေးသမား၊ ဥယျာဉ်မှူး၊ မာလိန်မှူးတို့နှင့် ပမာပြုရသည့် ဆရာသမားတို့ကလည်း လူမမည်သူငယ်ရင်သွေးငယ်များကို ပန်းပုရုပ်အသွင် အနုစိတ်ထုဆစ်ခြယ်မှုန်းသကဲ့သို့၊ ကျောက်အရိုင်းတုံးကလေးများကို အကွက်ပေါ်၍ အရောင်အသွေး တလက်လက်တောက်ပလာအောင် သွေးယူသကဲ့သို့၊ သစ်သီးဝလံ ပန်းမန်များကို စနစ်တကျ ပြုစုယုယစိုက်ပျိုးသကဲ့သို့၊ လိုရာခရီးကို ရောက်အောင် ပို့ဆောင်ပေးသကဲ့သို့ ပညာသင်ကြား စောင့်ရှောက်ကြရပါမည်။

ပညာဖြင့်တည်ဆောက်ထားသောဝန်းကျင်သည် ပျော်ရွှင်ချမ်းမြေ့ သာယာလှပပါသည်။ ပညာဖြင့် တည်ဆောက်ထားသော နိုင်ငံသည် ငြိမ်းချမ်းသာယာဝပြောပါသည်။ ပညာဖြင့် တည်ဆောက်ထားသော လူ့အဖွဲ့အစည်းသည် ဂုဏ်သိက္ခာအဆင့်အတန်း မြင့်မားပါသည်။ “အမျိုးသားစည်းကမ်းအစ စာသင်ကျောင်းက”၊ “စာသင်ကျောင်းတစ်ခု ဖွင့်လိုက်ခြင်းသည် အကျဉ်းထောင်ဆယ်ခုပိတ်လိုက်ခြင်းနှင့် တူညီသည် ”ဟူသော ပညာရေးအဆိုအမိန့်များ လည်းရှိခဲ့သည် မဟုတ်ပါလား။     ။

MDN (မြန်မာ့အလင်း)

ကျွန်တော်သည် ပညာရေးဝန်ကြီးဌာနတွင် ၁၉၈၀ ပြည့်နှစ်မှ ၂၀၁၇ ခုနှစ်အထိ ၃၇ နှစ် တာဝန်ထမ်းဆောင်ခဲ့ပါသည်။ တက္ကသိုလ်ဆရာ ဘဝမှစတင်ပြီး စစ်တက္ကသိုလ်၊ မုံရွာကောလိပ်၊ မန္တလေးတက္ကသိုလ်၊ ဒဂုံတက္ကသိုလ်၊ ရန်ကုန်အနောက်ပိုင်းတက္ကသိုလ်၊ ဟင်္သာတတက္ကသိုလ်၊ ပညာရေးသုတေသနဦးစီးဌာန၊ ကျောင်းပြင်ပနှင့် တစ်သက်တာပညာရေးဦးစီးဌာန စသည်တို့တွင် တာဝန်ထမ်းဆောင်ခဲ့ပြီး ၂၀၁၇ ခုနှစ်တွင် ဒုတိယညွှန်ကြားရေးမှူးချုပ်တာဝန်ဖြင့် သက်ပြည့် အငြိမ်းစားယူခဲ့ပါသည်။

KG + 12 ပညာရေးစတင်နိုင်ရန် ပညာရေးသုတေသနဦးစီးဌာနတွင် Task Manager အဖြစ် တာဝန်ထမ်းဆောင်ခဲ့ပါသည်။ ကျွန်တော်၏မိခင်ဖြစ်သူမှာ မူလတန်းပြဆရာမတစ်ဦးဖြစ်ပြီး ဦးကြီး၊ ဦးလေး၊ အဒေါ်များမှာလည်း အခြေခံပညာဝန်ထမ်းများဖြစ်ပါသည်။ အခြေခံပညာရေးကို များစွာ စိတ်ဝင်စားမိပါသည်။

၂၀၁၆ ခုနှစ်တွင်စတင်ခဲ့သည့် သူငယ်တန်း+ ၁၂ နှစ် ( KG + 12)သင်ရိုးသည် သူငယ်တန်းအပါအဝင် စုစုပေါင်းစာသင်နှစ် ၁၃ နှစ်ရှိသော စနစ်ဖြစ်ပါသည် ။ သူငယ်တန်း + ၁၂ နှစ်သင်ရိုးတွင် အသက် ငါးနှစ်ပြည့်ပြီးသော ကလေးတစ်ဦးသည် သူငယ်တန်း (KG) တွင် စတင်တက်ရောက်ပြီး တန်းစဉ် အောင်မြင်ပါက အသက် ၁၇ နှစ်ပြည့်သောအခါ ဒွါဒသမ ၁၂ တန်းသို့ ရောက်ရှိမည်ဖြစ်ပါသည်။ ထိုအတန်းကိုအောင်မြင်ပါက တက္ကသိုလ်သို့ရောက်ရှိမည့် နိုင်ငံတကာနှင့် တန်းညှိထားသောစနစ်ဖြစ်ပါ သည်။

မူလတန်းအဆင့်ပညာရေးတွင် (ပထမတန်းမှ ပဉ္စမတန်းအထိ) ငါးနှစ်၊ အလယ်တန်းအဆင့်ပညာ ရေးတွင် (ဆဋ္ဌမတန်းမှ နဝမတန်းအထိ) လေးနှစ်၊ အထက်တန်းအဆင့်တွင် (ဒသမတန်းမှ ဒွါဒသမ တန်းအထိ) သုံးနှစ်ဟူ၍ (၅ : ၄ : ၃) ပုံစံဖြစ်ပါသည်။ အခြေခံပညာရေးကို အဓိပ္ပာယ်ဖွင့်ဆိုရာတွင် ၂၀၁၄ ခုနှစ် အမျိုးသားပညာရေးဥပဒေ၌ “အခြေခံပညာရေးဆိုသည်မှာ နိုင်ငံသားတိုင်းတတ်မြောက်ရန် သတ်မှတ်ထားသော အခြေခံပညာကို သင်ယူတတ် မြောက်စေရန်နှင့် နည်းပညာနှင့် သက်မွေးပညာ တစ်ခုခုကိုဖြစ်စေ၊ အဆင့်မြင့်ပညာကိုဖြစ်စေ ဆက်လက်သင်ယူနိုင်စေရန် သင်ကြားလေ့ကျင့်ပေးသည့် ပညာရေးကိုဆိုလိုသည်”ဟု ဖော်ပြထားပါ သည်။

စိုက်ပျိုးရေး၊ မွေးမြူရေးပညာများကို ထည့်သွင်းသင်ကြားမည်

ယခုအခါ နိုင်ငံတော်အစိုးရက ပညာရေးကဏ္ဍတွင် နိုင်ငံတော်၏ဘတ်ဂျက်ငွေကို များစွာအသုံးပြု ကာ အလေးထား မြှင့်တင်ပေးလျက်ရှိပါသည်။ ပညာရေး၏အရေးကြီးပုံနှင့် ပညာရေးကဏ္ဍမြှင့်တင် ရေးကို ဦးစားပေးဆောင်ရွက်နေပါသည်။ ကျောင်းနေအရွယ်ကလေးတိုင်း အနည်းဆုံး အခြေခံပညာ (KG + 9)အထိ သင်ကြားတတ်မြောက်စေရန် ဆောင်ရွက်နေပါသည်။ အခြေခံပညာသင်ရိုးများတွင် လက်တွေ့အသုံးကျသော စိုက်ပျိုးရေး၊ မွေးမြူရေး ပညာများကို ထည့်သွင်းသင်ကြားမည်ဖြစ်ပါသည်။

မကြာမီတွင် Smart School နှင့် Football for School Program တို့ကို ရန်ကုန်၊ မန္တလေး၊ ဧရာဝတီ၊ ပဲခူးတိုင်းဒေသကြီးနှင့် ရှမ်းပြည်နယ်တို့၌ရှိသော အခြေခံပညာကျောင်းများတွင် Pilot Project အဖြစ် စတင်အကောင်အထည်ဖော် ဆောင်မည်ဖြစ်ကြောင်း သိရပါသည်။ ပညာရေးဝန်ကြီးဌာန၊ လူငယ်ရေးရာဝန်ကြီးဌာနနှင့် မြန်မာနိုင်ငံဘောလုံးအဖွဲ့ချုပ်တို့ပေါင်းစပ်၍ အကောင်အထည်ဖော် ဆောင်ရွက်သွားမည်ဖြစ်ပါသည်။

အားကစားကဏ္ဍတိုးမြှင့်ရေးအတွက် ဆောင်ရွက်

မြန်မာနိုင်ငံ၏ ဘောလုံးအားကစားသည် တစ်ခါက အာရှနှင့် အရှေ့တောင်အာရှတွင် နာမည်ကြီး ထင်ရှားခဲ့ပါသည်။ ယခုအခါ အခြေခံပညာ ကျောင်းများမှ မျိုးဆက်သစ်လူငယ်များကို ပြုစု ပျိုးထောင်လေ့ကျင့်ကာ အားကစားကဏ္ဍတိုးမြှင့်ရေးအတွက် ဆောင်ရွက်ပေးသည်ကို ကြိုဆိုရပါ သည်။ ဘောလုံးအားကစားသည် လူအများ စုပေါင်းကစားရသည့်အားကစားဖြစ်ပြီး တစ်ဦးကောင်း တစ်ယောက်ကောင်းအပြင် စုပေါင်းဆောင်ရွက်မှ အောင်မြင်မှုရနိုင်သည့် အားကစားဖြစ်ပါသည်။ အပေးအယူမျှတရမည်ဖြစ်ပြီး အချိန်တိုအတွင်း ဆုံးဖြတ်ချက် မှန်မှန်ကန်ကန်ချ၍ တစ်ဖက်အသင်း ကို အနိုင်ဂိုးများသွင်းကာ ကစားရသည့်နည်းဖြစ်ပါသည်။ သက်လုံကောင်းမှု၊ ညီညွတ်မှု၊ သည်းခံစိတ်ရှိ မှု၊ အချင်းချင်းနားလည်မှုရှိမှုတို့ကို သင်ကြားပေးသည့် အားကစားနည်းဖြစ်၍ လူငယ်များအတွက် အထူးသင့်လျော်ပါသည်။

စာရေးသူသည် ပညာရေးဝန်ထမ်းဘဝတွင် ဂျပန်၊ စင်ကာပူ၊ ထိုင်းနှင့် အိန္ဒိယနိုင်ငံတို့သို့ ပညာရေးလေ့လာရေးခရီး မကြာခဏရောက်ခဲ့ပါသည်။ ဂျပန်နိုင်ငံတွင် အခြေခံပညာမှစ၍ ကျောင်းသား ကျောင်းသူများကိုယ်တိုင် အားထားသင်ယူသည့်စနစ်ကို လေ့ကျင့်ပေးပါသည်။ ကျောင်းသို့လာရာတွင် အတန်းကြီးကျောင်းသားများက အတန်းငယ်ကျောင်းသားများကို ဂရုတစိုက် ခေါ်ဆောင်ပြီး ကျောင်းစာသင်ခန်း၊ အိမ်သာ၊ ထမင်းစားခန်း၊ ကျောင်းတွင်းသန့်ရှင်းရေးများကို ကိုယ်တိုင်ပါဝင်ဆောင်ရွက်ကြရပါသည်။

နေ့လယ်စာကျွေးသည့် တချို့ကျောင်းများ၌ ကျောင်းသား ကျောင်းသူများကိုယ်တိုင် ထမင်းစား ခန်းမှ ထမင်းဟင်းများကို အလှည့်ကျသွားယူကာ ထမင်း၊ ဟင်းနှင့် နွားနို့ပုလင်းတို့ကို မိမိကုန်နိုင် သလောက်သာ စားသုံးတတ်စေရန်၊ ထမင်းစားပြီး ပုံစံပန်းကန်ခွက်များကို သက်ဆိုင်ရာနေရာသို့ စနစ်တကျပြန်ထားရန် စသည်တို့ကို လေ့ကျင့်ပေးထားပါသည်။ သန့်စင်ခန်းများကိုလည်း ကျောင်းသား ကျောင်းသူများ အလှည့်ကျ နေ့စဉ်သန့်ရှင်းရေး လုပ်ရပါသည်။ အားကစားကဏ္ဍအပြင် မိမိတို့ ကိုယ်တိုင် ကျောင်းအတွင်း သစ်ပင်ပန်းပင်များကို စိုက်ပျိုးရပါသည်။ စာသင်ကြားရာတွင် ဆရာနှင့်တပည့် အမေး၊ အဖြေစနစ်နှင့်အတူ ကျောင်းသား ကျောင်းသူအုပ်စုများ အလျဉ်းသင့်သလိုဖွဲ့၍ ဆရာ၏မေးခွန်းများကို စုပေါင်းဖြေဆိုကြပါသည်။ ဆရာနှင့် ကျောင်းသားအချိုးမှာလည်း ၁ : ၂၀ ခန့် သာရှိပါသည်။

Smart School ကို လေ့လာမိသည်မှာ ကျောင်းသားများ၏ သင်ယူမှုနှင့် သင်ကြားမှု လုပ်ငန်းစဉ်များကို ပိုမိုထိရောက်စေရန်အတွက် ခေတ်မီနည်းပညာများကို အသုံးပြုထားသော ကျောင်းကိုဆိုလိုပါသည်။ ယင်းသည် ရိုးရာသင်ကြားမှုပုံစံမှ ခေတ်မီဒစ်ဂျစ်တယ်စနစ်သို့ ကူးပြောင်းသင်ကြားခြင်းကို အခြေခံပါသည်။

Smart School ၏ အဓိကအချက်များ

Smart School ၏ အဓိကအချက်များမှာ-

၁။      ကျောက်သင်ပုန်းများအစား အပြန်အလှန် ထိတွေ့အသုံးပြုနိုင်သော Smart Board များ၊ တက်ဘလက်များနှင့် ကွန်ပျူတာများ အသုံးပြုခြင်း။

၂။       ကျောင်းသားတစ်ဦးချင်းစီ၏ ပညာအရည်အချင်းအလိုက် ဉာဏ်ရည်တု (AI) နည်းပညာ သုံးသင်ခန်းစာများဖြင့် သင်ကြားပေးခြင်း၊

၃။      e Book စာအုပ်များ၊ ဗီဒီယိုသင်ခန်းစာများနှင့် အွန်လိုင်းမှတစ်ဆင့် မည်သည့်နေရာတွင်မဆို လေ့လာသင်ကြားနိုင်ခြင်း၊

၄။      ကျောင်းသား၊ ဆရာနှင့် မိဘများအကြား အွန်လိုင်းမှတစ်ဆင့် ကျောင်းသား၏တိုးတက်မှုကို အချိန်နှင့်တစ်ပြေးညီ သိရှိနိုင်ခြင်း၊

၅။      အားကစား၊ သိပ္ပံလက်တွေ့၊ လူမှုရေး၊ ပြည်သူ့နီတိတို့တွင် ကျောင်းသား ကျောင်းသူတိုင်း စိတ်ပါဝင်စားစွာ သင်ယူနိုင်ခြင်း၊ မိမိတို့၏ Mindset များကို အစဉ်မြှင့်တင်ပေးနေခြင်း စသည်တို့ဖြစ်ကြောင်း လေ့လာမိပါသည်။

သင်ယူမှုပုံစံ

ပညာရေးလောကတွင် ကျောင်းသားများကို အမျိုးအစားခွဲခြားရာ၌ သင်ယူမှုပုံစံ (Learning Styles) ပေါ်မူတည်၍ ခွဲခြားနိုင်ပါသည် -

(၁)     အမြင်ဖြင့် သင်ယူသူများ။ ရုပ်ပုံများ၊ ပုံကြမ်း များဖြင့် ဗီဒီယိုများကိုကြည့်ရှုကာ အကောင်း ဆုံး သင်ယူနိုင်သူများဖြစ်ပါသည်။ ၎င်းတို့သည် စာဖတ်ခြင်းထက် မြေပုံများ၊ ဂရပ်ပုံစံများကို ပိုမိုနှစ်သက်ကြပါသည်။

(၂)      အကြားဖြင့် သင်ယူသူများ။ ဆရာ၏ဟောပြော ပို့ချချက်များကို နားထောင်ခြင်း၊ အုပ်စုလိုက် ဆွေးနွေးခြင်းမှတစ်ဆင့် အကောင်းဆုံးမှတ်မိသူများဖြစ်ပါသည်။ ၎င်းတို့သည် စာကိုအသံ ထွက်ဖတ်ခြင်း၊ အသံဖိုင်များကို နားထောင်ခြင်းဖြင့် ပိုမိုထိရောက်စွာ လေ့လာနိုင်ပါသည်။

(၃)     စာဖတ်ခြင်း၊ စာရေးခြင်းဖြင့် သင်ယူသူများ။ စာအုပ်ဖတ်ခြင်း၊ မှတ်စုရေးခြင်း၊ စာစီစာကုံး ရေးသားခြင်းတို့ကို နှစ်သက်သူများဖြစ်ပါသည်။ ၎င်းတို့သည် အချက်အလက်များကို စာသားအဖြစ်ဖော်ပြထားမှသာ ပိုမိုနားလည် လွယ်ပါသည်။

(၄)     လက်တွေ့လုပ်ဆောင်မှုဖြင့် သင်ယူသူများ။ လက်တွေ့စမ်းသပ်ခန်းများတွင် လုပ်ဆောင်ရ ခြင်း၊ ပြင်ပသို့ ကိုယ်တိုင်ထွက်၍ လက်တွေ့သင်ယူရခြင်းတို့ကို နှစ်သက်သူများဖြစ်ပါသည်။ ၎င်းတို့သည် ကိုယ်တိုင်လက်တွေ့မလုပ်ရပါက အာရုံစူးစိုက်ရန် ခက်ခဲသူများဖြစ်ပါသည်။

ထို့အပြင် ကျောင်းသားတစ်ယောက် အောင်မြင်နိုင်ရန် အမှတ်ကောင်းရေးသာမကဘဲ အမူအကျင့် ကောင်းမွေးမြူပေးနိုင်ရပါမည်။ (၁) စည်းကမ်း ရှိရပါမည်၊ (၂) အချိန်ကို စီမံခန့်ခွဲတတ်ရပါမည်၊ (၃) သိလိုစိတ်ရှိရပါမည်၊ (၄) ဇွဲရှိရပါမည်၊ (၅) စာသင်ကြားရာတွင် ကိုယ်တိုင်တက်ကြွစွာ ပါဝင်ဆွေးနွေးနိုင်ရပါမည်၊ (၆) ရည်မှန်းချက် ပန်းတိုင်ရှိရပါမည်။ အဓိကအားဖြင့် ကြိုးစားမှု၊ စည်းကမ်းရှိမှု၊ ဇွဲရှိမှု စသည့် ကျောင်းသား ကျောင်းသူများဖြစ်ရပါမည်။

အရည်အသွေးရှိပညာရေးသို့ ဦးတည်ရာတွင် ဆရာ၏လစာ၊ ဆရာ၏လူမှုစီးပွားရေးဘဝ၊ ဆရာ၏ ဂုဏ်သိက္ခာနှင့် ဆရာ၏ကျင့်ဝတ်များ ကောင်းမွန်ခိုင်မာရေးသည်လည်း အဓိကကျပါသည်။ စွမ်းဆောင် ရည်မြင့်မားသည့် ပညာရေးစနစ်တည်ဆောက်ရာတွင် ဆရာ ဆရာမများအတွက် ထိုက်တန်လျော်ကန်သော ကူညီပံ့ပိုး ချီးမြှင့်မှုအစီအစဉ်များ လိုအပ်ပါသည်။ ထို့အတူ ဆရာ ဆရာမများကလည်း မိမိ၏ စွမ်းဆောင်ရည်နှင့် သင်ကြားရေးအရည်အသွေးများကို အစဉ်အမြဲ မြှင့်တင်နေရပါမည်။

ထို့အပြင် မိဘ ဆရာအသင်းများကိုလည်း သေချာကျနစွာ ဖွဲ့စည်းထားပြီး မိဘများ၏ ကျောင်းတွင်းလှုပ်ရှားမှုများ၊ ပညာရေးဆောင်ရွက် ချက်များ၊ လူမှုရေးဆောင်ရွက်ချက်များတွင် ပါဝင် လာနိုင်ရန် ဆွေးနွေးတိုင်ပင် ဆောင်ရွက်သင့်ပါသည်။ မိဘများသည် မိမိတို့ကလေးကို ကျောင်းအပ်ပြီးပါက မိမိတို့တာဝန်ကျေပွန်ပြီဟု မသတ်မှတ်ဘဲ ဆရာ ဆရာမများနှင့်တွေ့ဆုံကာ မိမိတို့သားသမီးများ၏ ပညာရေးကို လေ့လာမေးမြန်း ကူညီဆောင်ရွက်ပေးရပါမည်။

နိုင်ငံတော်က ပညာရေးကဏ္ဍ တိုးတက်ကောင်းမွန်ရန် အားထုတ်ကြိုးပမ်းနေပါသည်။ ကျောင်းသား၊ မိဘ၊ ဆရာများ၊ ပြည်သူများပူးပေါင်းပြီး ကျွန်တော်တို့နိုင်ငံ၏ အခြေခံပညာကဏ္ဍ တိုးတက်ကောင်းမွန်ရေးအတွက် ပူးပေါင်းဆောင်ရွက်ကြပါရန် တိုက်တွန်းရေးသားလိုက်ရပါသည်။ ။

ကိုးကား ။ ။    အခြေခံပညာ သိကောင်းစရာများ (မောင်မြကျော်၊ ကျောင်းအုပ်ကြီး- ငြိမ်း၊ ရန်ကင်းပညာရေးကောလိပ်)

- ပညာရေးသိကောင်းစရာများ (အင်တာနက်)

MDN  (ကြေးမုံ)

ပညာရေးက ကလေးတစ်ယောက်ရဲ့ သိမြင်မှုကိုမြှင့်တင်ပေးသလို အကျင့်စာရိတ္တ၊ စဉ်းစားတွေးခေါ်နိုင်စွမ်း၊ ဘဝမှာအခက်အခဲတွေ ရင်ဆိုင်ဖြေရှင်းနိုင်စွမ်းနဲ့ ဆုံးဖြတ်ချက်ချမှတ်နိုင်စွမ်းတွေကို တည်ဆောက်ပေးနိုင်ပါတယ်။

ပညာရေးက လူတစ်ယောက်ရဲ့ဘဝ

ဒါကြောင့် ကလေးတစ်ယောက်ကို လူ့အသိုင်းအဝိုင်းအတွက် တန်ဖိုးရှိတဲ့ပုဂ္ဂိုလ်တစ်ဦးအဖြစ် ထုဆစ်ပုံဖော်ချင်တယ်ဆိုရင် ပညာရေးနဲ့ကောင်းမွန်စွာ ပြုစုပျိုးထောင်ပေးရမှာဖြစ်ပါတယ်။ ယနေ့ခေတ်မှာ ပညာရေးက လူတစ်ယောက်ရဲ့ဘဝ၊ နိုင်ငံတစ်ခုကိုသာမက ကမ္ဘာကြီးကိုပါ ပြောင်းလဲပေးနိုင်တဲ့ အရေးကြီးဆုံးအခြေခံစွမ်းအားတစ်ခု ဖြစ်လာပါတယ်။

တောင်အာဖရိကနိုင်ငံရဲ့ ပထမဆုံးသော လူမည်းသမ္မတ နယ်ဆင်မင်ဒဲလားက “ပညာရေးက ကမ္ဘာကြီးကိုပြောင်းလဲဖို့ သင်အသုံးပြုနိုင်တဲ့ အင်အားအကြီးမားဆုံးသောလက်နက်ဖြစ်တယ်” လို့ ဆိုမိန့်ခဲ့ဖူးပါတယ်။

ပညာရေးက လူတစ်ယောက်ကို အရည်အချင်းနဲ့ ကိုယ်ရည်ကိုယ်သွေးတိုးတက်လာစေပါတယ်။ ပညာကိုအသုံးချပြီး မိမိဘဝကို ပိုမိုတန်ဖိုးရှိအောင်ဖန်တီးနိုင်သလို လူအများကို ဦးဆောင်နိုင်ပြီး အနာဂတ်တွေကို ပြောင်းလဲစေနိုင်ပါတယ်။ ပညာရေးက သာမန်အသိပညာထက်ပိုပြီး လူ့တန်ဖိုး၊ စည်းကမ်းနဲ့ တာဝန်ယူမှုတို့ကိုပါ တွဲပြီးသင်ကြားပေးနိုင်တဲ့အတွက် လူ့အဖွဲ့အစည်းကို ပိုမိုတည်ငြိမ်ခိုင်မာအားကောင်းစေပါတယ်။

ဒါကြောင့် ပညာရေးကို အလေးထားမြှင့်တင်ခြင်းက လူတစ်ယောက်ရဲ့ အနာဂတ်ကိုသာမက နိုင်ငံနဲ့ကမ္ဘာ့အနာဂတ်ကိုပါ ပြုပြင်ပြောင်းလဲနိုင်တဲ့ အရေးကြီးဆုံးအခြေခံအင်အားတစ်ခုဖြစ်လို့ နိုင်ငံတစ်နိုင်ငံရဲ့ဖွံ့ဖြိုးတိုးတက်မှုက ပညာရေးကဏ္ဍအပေါ် တည်မှီနေပါတယ်။

ဖွံ့ဖြိုးတိုးတက်အောင်တည်ဆောက်နိုင်ဖို့ဆိုရင် ထူးချွန်ထက်မြက်တဲ့ အသိပညာရှင်၊ အတတ်ပညာရှင် လူ့စွမ်းအားအရင်းအမြစ်တွေ အများကြီးလိုအပ်ပါတယ်။ ပညာရည်နိမ့်သူတွေ၊ ပညာမဲ့သူတွေ၊ အသိပညာနိမ့်ကျသူတွေနဲ့ နိုင်ငံကိုတည်ဆောက်လို့မရနိုင်ပါဘူး။

ခေတ်အဆက်ဆက်ဖွံ့ဖြိုးတိုးတက်နေတဲ့ ကမ္ဘာ့နိုင်ငံတွေကိုလေ့လာကြည့်ရင် ပညာရေးက အဆုံးအဖြတ်ပေးခဲ့တာကို တွေ့မြင်ရပါတယ်။ ပညာရေးကဏ္ဍ အရည်အသွေးမြင့်မားတဲ့ တိုင်းပြည်က နိုင်ငံကြီးတာ၊ ငယ်တာ၊ သယံဇာတကြွယ်ဝတာ၊ မကြွယ်ဝတာထက် နိုင်ငံမှာရှိတဲ့ လူ့စွမ်းအားအရင်းအမြစ်တွေအပေါ်မူတည်ပြီး အကျိုးရှိရှိစီမံခန့်ခွဲနိုင်တဲ့အတွက် တိုးတက်ကြတာတွေ့ရပါတယ်။ တိုးတက်ကြတဲ့အတွက်လည်း နိုင်ငံတိုင်းက နိုင်ငံသူနိုင်ငံသားတွေ ပညာရည်မြင့်မားရေးကို အထူးအလေးထားမြှင့်တင်ဆောင်ရွက်လာကြပါတယ်။

ပညာရေးကဏ္ဍမှာ ရင်းနှီးမြှုပ်နှံခြင်းက နိုင်ငံတော်၏အနာဂတ် ဖွံ့ဖြိုးတိုးတက်ရေးအတွက် ရင်းနှီးမြှုပ်နှံခြင်းဖြစ်တဲ့အတွက် မြန်မာနိုင်ငံအနေနဲ့ လာမယ့်ဘဏ္ဍာနှစ်မှာ ပညာရေးကဏ္ဍကို နိုင်ငံတော်ဘဏ္ဍာငွေရဲ့ ၁၀ ရာခိုင်နှုန်းထက်မနည်း၊ လာမယ့်တစ်နှစ်ကျော်မှာ နိုင်ငံတော်ဘဏ္ဍာငွေရဲ့ ၁၅ ရာခိုင်နှုန်းအထိ တိုးမြှင့်အသုံးပြုသွားမှာဖြစ်ပြီး အစိုးရအဖွဲ့တာဝန်ယူနေတဲ့ ငါးနှစ်တာကာလအတွင်း ရာခိုင်နှုန်း ၂၀ အထိ တိုးမြှင့်ဆောင်ရွက်သွားမယ်လို့ သိရပါတယ်။

မြန်မာတွေဟာ ဉာဏ်ရည်ထက်မြက်သူတွေဖြစ်ပြီး ခေတ်အဆက်ဆက် မြန်မာ့ပညာရေးက မညံ့ခဲ့သလို သင်ရိုးတွေကလည်း နိုင်ငံတကာအဆင့်မီခဲ့တယ်လို့ ပြောလို့ရပါတယ်။ သမိုင်းတစ်လျှောက်မှာ ထူးချွန်ထက်မြက်တဲ့ ပညာရှင်တွေများစွာ ပေါ်ထွက်ခဲ့ပါတယ်။

လက်ရှိအချိန်မှာလည်း အနာဂတ်နိုင်ငံတော်ရဲ့ တာဝန်တွေကို ပခုံးပြောင်းထမ်းဆောင်ကြရမယ့် မျိုးဆက်သစ်လူငယ်တွေအတွက် နိုင်ငံတကာနဲ့ ရင်ပေါင်တန်းနိုင်မယ့် အတတ်ပညာရှင်၊ အသိပညာရှင်တွေဖြစ်ဖို့နဲ့ ဗလငါးတန်ပြည့်ဝဖို့အတွက် ပညာရေးကဏ္ဍကို မဖြစ်မနေမြှင့်တင်ဆောင်ရွက်သွားရမှာဖြစ်ပါတယ်။

ကျောင်းနေအရွယ်ကလေးအားလုံး ကျောင်းတက်နိုင်ဖို့

“ပညာ”ဆိုတဲ့စကားလုံးက အဓိပ္ပာယ်ကျယ်ဝန်းပါတယ်။ ကျောင်းပညာရေး၊ ကျောင်းပြင်ပပညာရေးနဲ့ ကိုယ်တိုင်သင်ယူပညာရေးစသဖြင့် ပညာရယူနည်းတွေရှိရာမှာ စာသင်ခန်းတွေက ပညာသင်ကြားရေးရဲ့ အခြေခံအုတ်မြစ်ဖြစ်ပါတယ်။

နှစ်စဉ် မေလနောက်ဆုံးပတ်နဲ့ ဇွန်လပထမပတ်က မြန်မာနိုင်ငံရဲ့ကျောင်းအပ်နှံရေး သီတင်းပတ်ဖြစ်ပြီး ကျောင်းနေအရွယ်ကလေးအားလုံး ကျောင်းတက်နိုင်ဖို့ ကျောင်းအပ်နှံရေးလုပ်ငန်းစဉ်ကို မဖြစ်မနေဆောင်ရွက်ကြဖို့လိုပါတယ်။

ကျောင်းအပ်နှံရေး ရက်သတ္တပတ်ဟာ ကျောင်းသားတိုင်းအတွက် ပညာရေးခရီးစဉ် အသစ်တစ်ခုစတင်ရာ အရေးကြီးဆုံးအချိန်အခါဖြစ်ပါတယ်။ ကျောင်းအပ်ခြင်းက ကျောင်းနေအရွယ်ကလေးအားလုံးအတွက် ပညာသင်ယူဖို့စတင်လိုက်တဲ့ ပထမဆုံးခြေလှမ်းဖြစ်ပါတယ်။

ကလေးတစ်ယောက်ကို ကျောင်းအပ်နှံပေးခြင်းဆိုတာ စာသင်ခန်းထဲကို ပို့ဆောင်ပေးတာတစ်ခုတည်းမဟုတ်ပါဘူး။ စာသင်ကျောင်းတံခါးဖွင့်လိုက်ခြင်းက ထောင်တံခါးပိတ်လိုက်ခြင်းလည်းဖြစ်သလို အနာဂတ်ကိုပုံဖော်ပေးနိုင်ဖို့ ဘဝလမ်းကြောင်းသစ်တစ်ခု ဖွင့်လှစ်ပေးလိုက်ခြင်းအထိ အဓိပ္ပာယ်ကျယ်ဝန်းပါတယ်။ စာသင်ခန်းတိုင်းရဲ့ ထိုင်ခုံတိုင်းမှာ အနာဂတ်ခေါင်းဆောင်တွေ မွေးထုတ်ပေးဖို့ အစပြုရာနေရာတွေဖြစ်ပါတယ်။

မြန်မာနိုင်ငံရဲ့ အခြေခံပညာကဏ္ဍမှာ ကျောင်းနေအရွယ်တိုင်းမသင်မနေရ အခမဲ့မူလတန်းပညာရေးကို ဖော်ဆောင်ပြီး နိုင်ငံသူနိုင်ငံသားတွေ ပညာရည်မြင့်မားရေးကို စွမ်းဆောင်ကြိုးပမ်းနေပြီဖြစ်ပါတယ်။

ကျောင်းအပ်နှံရာမှာ အခကြေးငွေပေးစရာ မလိုအပ်တဲ့အပြင် သူငယ်တန်း (KG) ကနေ ဒွါဒသမတန်း (Grade - 12) အထိ ဖတ်စာအုပ်၊ ဗလာစာအုပ်၊ စာရေးကိရိယာတွေ ထောက်ပံ့ပေးနေသလို သူငယ်တန်း (KG) ကနေ ပဉ္စမတန်း (Grade - 5) အထိကို ကျောင်းဝတ်စုံတစ်စုံစီလည်း ထောက်ပံ့ပေးပါတယ်။

အခြေခံပညာကျောင်းတွေမှာ ကျောင်းအပ်နှံမှုအနေနဲ့ ၂၀၂၁ - ၂၀၂၂ ပညာသင်နှစ်မှာ ကျောင်းသားဦးရေ ၅ ဒသမ ၃ သန်း၊ ၂၀၂၂ - ၂၀၂၃ ပညာသင်နှစ်မှာ ကျောင်းသားဦးရေ ၇ ဒသမ ၂၃ သန်း၊ ၂၀၂၃ - ၂၀၂၄ ပညာသင်နှစ်မှာ ကျောင်းသားဦးရေ ရှစ်သန်းကျော်နဲ့ ၂၀၂၄ - ၂၀၂၅ ပညာသင်နှစ်မှာ ၇ ဒသမ ၃ သန်းကျော် ကျောင်းအပ်နှံခဲ့ပါတယ်။

ပညာရေးမြှင့်တင်ဖို့ဆိုရင် ကျောင်းနေအရွယ်ကလေးတိုင်း ကျောင်းနေဖို့နဲ့ ကျောင်းထွက်နှုန်းလျှော့ချစေဖို့၊ ပညာကိုဆုံးခန်းတိုင်သင်ကြားနိုင်ဖို့ လိုအပ်ပါတယ်။ ပညာရေးအားနည်းရင် တရားဥပဒေလိုက်နာမှု၊ တရားဥပဒေစိုးမိုးမှုမှာလည်း အားနည်းလာတာ ဖြစ်ပါတယ်။ ပညာရည်နိမ့်ပါးရင် စဉ်းစားတွေးခေါ်မှုနဲ့ လုပ်ကိုင်ဆောင်ရွက်မှုတွေလည်း နိမ့်ကျနေမှာဖြစ်ပါတယ်။ ဘဝမှာ အမှားအမှန်ဝေဖန်ပိုင်းခြားနိုင်ဖို့က အနိမ့်ဆုံး KG + 9 အခြေခံပညာလောက်တော့ တတ်ကြရမှာဖြစ်ပါတယ်။

KG + 9 အထိပြီးမြောက်ပြီး အကြောင်းအမျိုးမျိုးကြောင့် ပညာဆက်လက်သင်ယူဖို့ အခက်အခဲရှိသူတွေအနေနဲ့ အသက်မွေးဝမ်းကျောင်းပညာတွေ ဆက်လက်သင်ယူနိုင်ဖို့ အခွင့်အလမ်းတွေ ဖန်တီးပေးထားပါတယ်။ စက်မှု၊ စိုက်ပျိုး၊ မွေးမြူရေး အထက်တန်းကျောင်းတွေ တက်ရောက်နိုင်ပြီး ကျွမ်းကျင်လုပ်သားတွေ၊ နည်းပညာကျွမ်းကျင်သူတွေ၊ အင်ဂျင်နီယာပညာရှင်တွေ၊ ကွန်ပျူတာပညာရှင်တွေအဖြစ် ပျိုးထောင်ပေးလျက်ရှိပါတယ်။

ကျောင်းဆိုတာ လူတစ်ယောက်ရဲ့ဘဝကို တိုးတက်ကောင်းမွန်စေတဲ့ အရေးကြီးတဲ့နေရာတစ်ခုဖြစ်ပါတယ်။ ပညာသင်ကြားရုံသာမက အရည်အချင်းနဲ့ ကျွမ်းကျင်မှုတွေတိုးတက်လာအောင်၊ လိမ္မာယဉ်ကျေးလာအောင် ကူညီပေးနိုင်ပါတယ်။

လူတစ်ယောက်ရဲ့အသိဉာဏ်ကို မြှင့်တင်ပေး

ဒါ့အပြင် လူတစ်ယောက်ရဲ့ အသိဉာဏ်ကိုမြှင့်တင်ပေးပြီး စိတ်ဓာတ်ပိုင်းကိုလည်း တည်ငြိမ်ကောင်းမွန်လာအောင် ပြုပြင်ပေးပါတယ်။ ကျောင်းက စာပေသာမက စာရိတ္တနဲ့ ပြည်သူ့နီတိ၊ ဘဝတွက်တာကျွမ်းကျင်စရာတွေက ကျန်းမာရေး၊ ဘေးအန္တရာယ်ကင်းရှင်းရေး၊ ကိုယ်ကျင့်တရား၊ လူမှုဆက်ဆံရေးဆိုင်ရာ၊ လူအချင်းချင်းတန်ဖိုးထားလေးစားတတ်လာပြီး စာနာနားလည်စိတ်တွေ ဖြစ်ထွန်းပေါ်ပေါက်လာစေပါတယ်။ ချစ်ခြင်းမေတ္တာနဲ့ ရိုင်းပင်းကူညီတတ်တဲ့စိတ်တွေ ပိုမိုဖြစ်ပေါ်လာစေပါတယ်။

ဒါကြောင့် ကျောင်းတွေကို အမျိုးကိုချစ်၊ နိုင်ငံကိုချစ်ပြီး တာဝန်ယူတတ်တဲ့ နိုင်ငံ့သားကောင်းတွေ မွေးထုတ်ပေးနိုင်တဲ့ အခြေခံနေရာတစ်ခုလို့ ပြောလို့ရပါတယ်။ ကလေးတိုင်း ကျောင်းနေနိုင်ဖို့၊ ပညာသင်ယူခွင့်ရရှိဖို့လည်း လူမှုအသိုင်းအဝိုင်းတစ်ခုလုံးက ဝိုင်းဝန်းအားပေးဖို့လိုအပ်ပါတယ်။

ပညာရေးအဆင့်အတန်းမြင့်မားအောင်၊ လူတွေရဲ့ပညာဉာဏ်၊ ဗဟုသုတတွေဖွံ့ဖြိုးအောင်လုပ်ဆောင်ဖို့က ပညာရေးဝန်ကြီးဌာန၊ ပညာရေးဝန်ထမ်းတွေနဲ့ အစိုးရမှာသာ တာဝန်ရှိတာမဟုတ်ပါဘူး။ ပြည်သူအားလုံးမှာ တာဝန်ရှိပါတယ်။

မိမိတို့ရင်သွေးသားသမီးလေးတွေ ပညာတတ်ဖို့၊ မိမိတို့ ပညာတတ်ဖို့က မိမိတို့တာဝန်သာဖြစ်ပါတယ်။ ကိုယ့်တာဝန်ကို ရှောင်လွှဲနေလို့မရပါဘူး။ ယနေ့ခေတ်မှာ နည်းပညာတွေတိုးတက်လာတာနဲ့အမျှ အသိပညာတွေကလည်း အချိန်တိုအတွင်း လျင်လျင်မြန်မြန်ပဲ ပြောင်းလဲနေပါတယ်။ ဒီလိုပြောင်းလဲနေတဲ့ကမ္ဘာမှာ နောက်ကျမကျန်ဖို့ဆိုရင် အမြဲတမ်းသင်ယူနေဖို့ လိုပါတယ်။ မိဘတွေအနေနဲ့ သားသမီးတွေကို ပညာရေးအတွက် အားပေးမှုနဲ့ လမ်းညွှန်မှုတွေပေးနိုင်ဖို့ အရေးကြီးပါတယ်။

တချို့ကလေးတွေဟာ ဆင်းရဲနွမ်းပါးမှု၊ မိသားစုအခက်အခဲကြောင့် ကျောင်းထွက်ရတာ၊ ပညာရေးကို လက်လှမ်းမမီတာတွေ ဖြစ်တတ်ပါတယ်။ ဒီလိုကလေးတွေကို လျစ်လျူရှုထားမယ်ဆိုရင် လူ့စွမ်းအားရင်းအမြစ်ဖွံ့ဖြိုးမှုကို အဟန့်အတားဖြစ်စေပါတယ်။

ပညာရေးဆိုတာ လူတိုင်းအတွက် အခွင့်အရေးတစ်ခုဆိုတဲ့အမြင်နဲ့ ကလေးတိုင်းကို ပညာသင်ယူခွင့်ရရှိနိုင်ရေး အားပေးကူညီဖို့လိုပါတယ်။ ပညာရေးတိုးတက်လာတာနဲ့အမျှ လူမှုစီးပွားဘဝတွေ၊ ယဉ်ကျေးမှုတန်ဖိုးမြင့်မားမှုတွေ၊ နိုင်ငံဖွံ့ဖြိုးတိုးတက်မှုတွေအထိပါ တစ်ပြိုင်နက်တည်း အထောက်အကူပြုလာနိုင်ပါတယ်။

ပညာတတ်လူငယ်တွေ များပြားလာခြင်းက နိုင်ငံအတွက် အဖိုးတန်တဲ့လူ့စွမ်းအားအရင်းအမြစ်တွေ ဖြစ်လာစေတဲ့အတွက် အနာဂတ်လူ့ဘောင်အဖွဲ့အစည်းကို ပိုမိုတိုးတက်ကောင်းမွန်စေပါတယ်။ ဒါကြောင့် ကလေးတိုင်းပညာသင်ယူခွင့်ရရှိဖို့၊ အရည်အသွေးရှိတဲ့ ပညာရေးရရှိဖို့ မကြာမီရောက်ရှိလာတော့မယ့် ကျောင်းအပ်နှံရေး ရက်သတ္တပတ်မှာ မိဘတွေအနေနဲ့ မိမိတို့သားသမီးတွေကို ကျောင်းအပ်နှံကြဖို့နဲ့ လူမှုအသိုက်အဝန်းတစ်ခုလုံးကလည်း ပညာရေးကဏ္ဍကို ဝိုင်းဝန်းပံ့ပိုးကူညီကြခြင်းဖြင့် အနာဂတ်နိုင်ငံတော်ကို ပိုမိုတောက်ပအောင် ဖန်တီးလိုက်ကြရအောင်လို့ ပြောကြားလိုပါတယ်။ ။

MDN (ကြေးမုံ)

ပညာပန်းတို့ လန်းဆန်းမည့် မိုးဦးကာလ

မြန်မာစကားပုံတွင် “အလိမ္မာ စာမှာရှိ” ဟု ဆိုခဲ့သည့်အလျောက် ပညာသည် လူသားတို့၏ ဘဝခရီးလမ်းကို လမ်းညွှန်ပေးသည့် ထာဝရအလင်းတန်းတစ်ခု ဖြစ်ပါသည်။ မြန်မာနိုင်ငံ၏ ပညာရေးပြက္ခဒိန်တွင် မေလလယ်ကာလသည် အလွန်အရေးပါပြီး ရင်ခုန်စရာကောင်းသော အချိန်အခါသမယဖြစ်သည်။ ၂၀၂၆ ခုနှစ် မေလနောက်ဆုံးပတ်မှစ၍ တစ်နိုင်ငံလုံးရှိ ကျောင်းသား ကျောင်းသူများသည် မိမိတို့၏ အိပ်မက်လမ်းကြောင်းဆီသို့ ပြန်လည်ခြေလှမ်းပြင်နေကြပြီဖြစ်သည်။

ပညာသည်ရတနာ၊ ပြည်သူ့အကျိုးသယ်ပိုးရာ ဟူသည့်အတိုင်း မိဘပြည်သူများအနေဖြင့် မိမိတို့၏ ရင်နှစ်သည်းချာ သားသမီးများကို သက်ဆိုင်ရာဒေသအလိုက် ကျောင်းအပ်နှံခြင်းများ ပြုလုပ်နိုင်မည်ဖြစ်သည်။ ကျောင်းအပ်နှံခြင်းဆိုသည်မှာ ရိုးရှင်းသော အုပ်ချုပ်မှုဆိုင်ရာ ကိစ္စရပ်တစ်ခုမျှသာ မဟုတ်ဘဲသားသမီးတို့၏ နောင်ရေးအတွက် “ပညာတည်းဟူသောရတနာ” ကို အမွေပေးလိုက်ခြင်းပင် ဖြစ်သည်။

ဇွန်လ ၁ ရက်နေ့တွင် တစ်နိုင်ငံလုံးရှိ စာသင်ကျောင်းတံခါးများ ပွင့်လာမည်ဖြစ်သည်။ ထိုနေ့ရက်သည် ပညာရောင်ခြည်တို့ လင်းလက်လာမည့်၊ ကလေးငယ်များ၏ ဆော့ကစားသံ၊ ရယ်သံ၊ ငိုသံ၊ ​အော်ဟစ်သံများဖြင့် စာသင်ကျောင်းများ အသက်ဝင်လာမည့် မျှော်လင့်ချက်၏ အစပြုချိန်ပင်ဖြစ်သည်။

ကလေးငယ်များသည် ပညာဟူသောရေစင်ကို သောက်သုံးကာ အသိဉာဏ်၏ အစွမ်းဖြင့် ကမ္ဘာကိုယှဉ်နိုင်သည့် လူသားကောင်းများဖြစ်လာစေရန် မိဘများက သားသမီးများကို အချိန်မီကျောင်းအပ်နှံပေးခြင်းဖြင့် ပညာရေး၏ လမ်းကြောင်းပေါ်သို့ လှပစွာချစ်ခြင်းမေတ္တာဖြင့် လက်တွဲပို့ဆောင်ပေးကြရမည်ဖြစ်သည်။

မိုးဦး၏ အလှနှင့်ပညာပန်းတို့ ဖူးပွင့်မည့် အချိန်အခါ

ဇွန်လ၏ မိုးဦးကာလသည် မြေပြင်ကို အသက်သွင်းပေးသကဲ့သို့ ပညာရေးသည်လည်း လူငယ်မျိုးဆက်သစ်တို့၏ အသိဉာဏ်ကို ရှင်သန်ဖွံ့ဖြိုးစေပါသည်။ မိုးဦး၏ အေးမြသော လေပြေ၊ မိုးစက်တို့၏ ပျော်ရွှင်သော ကကွက်များနှင့်အတူ စာသင်ကျောင်းများသည် ကျွန်ုပ်တို့၏ ရင်နှစ်သည်းချာ ရတနာ ပန်းလေးများကို လှိုက်လှဲစွာကြိုဆိုရန် အသင့်ရှိနေပါပြီ။ ကျောင်းများသည် မေတ္တာအပြည့်ဖြင့် သားသမီးလေးများကို လက်ကမ်းကြိုဆိုရန် စောင့်မျှော်နေပါသည်။ “ကျောင်းတော်ကြီးများ” ၏ တံခါးများပွင့်လာမည့် ဤအချိန်အခါသည် ကလေးငယ်များ၏ အိပ်မက်များကို စတင်ပျိုးထောင်မည့် အခွင့်ကောင်းပင်ဖြစ်သည်။

“မိုးစက် ဝတ်မှုန်ကလို့ ခုန်တော့

ဒို့ကျောင်းတော်ကြီး ဖွင့်တော့မည်။

ရင်နှစ်သည်းချာ ရတနာပန်းတို့

ဘဝလမ်းအတွက် ကျောင်းသို့ချီ။”

ဤကဗျာလေးအတိုင်းပင် မိုးစက်၊ မိုးပွင့်တို့ ခုန်ပေါက်နေသည့်ကြားမှ မိမိတို့၏ သားသမီးလေးများက ဘဝလမ်းအတွက် ပညာကိုရှာဖွေရန် စာသင်ကျောင်းများဆီသို့ ပျော်ရွှင်စွာ ချီတက်ကြပါတော့မည်။ မိုးစက်ကလေးများကဲ့သို့ ရိုးသားဖြူစင်သော ကျွန်ုပ်တို့၏ ရတနာပန်းလေးများအတွက် ပညာဟူသောရေစင်ကို တိုက်ကျွေးခြင်းသည် မိဘတိုင်း၏ အမြင့်မြတ်ဆုံးသော လက်ဆင့်ကမ်းတာဝန် တစ်ခုဖြစ်ပါသည်။

မိဘများအနေဖြင့် မိမိတို့၏ သားသမီးလေးများကို စာသင်ကျောင်းတော်ကြီးများသို့ လက်တွဲခေါ်ဆောင်ကာ ကျောင်းအပ်နှံပေးခြင်းသည် သူတို့၏ ဘဝတစ်သက်တာအတွက် အကောင်းဆုံးသော လက်ဆောင်တစ်ခုပင် ဖြစ်ပါသည်။ ပညာရေးခရီးကို မိုးဦး၏အလှနှင့်အတူ စတင်လိုက်ကြပါစို့။ ဤပညာရေးခရီးသည် သားသမီးတို့အတွက် အလင်းရောင်တောက်ပသော ဘဝလမ်းကြောင်းတစ်ခု ဖြစ်လာမည်မှာ အမှန်ပင်ဖြစ်ပါသည်။

မေတ္တာမိုးစက်များဖြင့် ပုံဖော်မည့် အနာဂတ်

စာသင်ကျောင်းဆိုသည်မှာ ကလေးငယ်တို့၏ စိတ်ကူးယဉ်အိပ်မက်များကို ပုံဖော်ပေးရာ၊ အသိဉာဏ်၏ အစွမ်းဖြင့်ဘဝကို အရောင်တင်ပေးရာ နေရာများဖြစ်သည်။ ကျောင်းဖွင့်ချိန် ရောက်လာလျှင် ကျောင်းတော်ကြီးများသည် မေတ္တာတရား၏ အလင်းရောင်များဖြင့် တောက်ပနေသည်။ ထိုနေရာတွင် ဆရာ ဆရာမတို့သည် ကလေးငယ်များအား မိမိတို့၏ ရင်သွေးအရင်းအချာကဲ့သို့ သံယောဇဉ်တရားအပြည့်ဖြင့် နွေးထွေးစွာ ကြိုဆိုကြသည်။

ဆရာ ဆရာမတို့၏ အပြုံးသည် ကလေးငယ်များအတွက် ကမ္ဘာ့အလှဆုံး လက်ဆောင်တစ်ခုပင်ဖြစ်သည်။ အေးမြသော မိုးဦးကာလ၏ နံနက်ခင်းတွင် ကလေးငယ်လေးများ ကျောင်းခန်းထဲသို့ တိုးဝင်လာပြီး ရိုးသားဖြူစင်သော မျက်ဝန်းလေးများဖြင့် “မင်္ဂလာပါ ဆရာမ”ဟု ညီညီညာညာ နှုတ်ဆက်ကြသည့် မြင်ကွင်းသည် မည်မျှပင် ငြိမ်းချမ်းပြီး ချစ်စရာကောင်းလိုက်ပါသနည်း။

ဆရာတို့၏ လက်ကမ်းကြိုဆိုမှုသည် ကလေးငယ်များ၏ ကြောက်ရွံ့မှုကို ပျောက်ကွယ်သွားစေပြီး ယုံကြည်မှုနှင့် ပညာရှာလိုစိတ်တို့ကို အစားထိုးပေးလိုက်ခြင်းပင် ဖြစ်သည်။ ဤနွေးထွေးလှသော ကြိုဆိုခြင်းများ၊ ဆရာမတို့၏ စေတနာမေတ္တာ လက်တစ်စုံဖြင့် ကလေးငယ်များ၏ပညာရေး ခရီး ကို အလှပဆုံးသော အစပြုမှုဖြင့် စတင်ပေးလိုက်ကြပါစို့။ ဤပတ်ဝန်းကျင်၊ ဤကျောင်းတော်သည် ကလေးငယ်များအတွက် အိမ်တစ်အိမ်လိုပင်နွေးထွေးပြီး အသိပညာတို့ စုဝေးရာဖြစ်လာမည်မှာ အသေအချာပင် ဖြစ်သည်။

ပညာရှာမည့် မျိုးဆက်သစ်တို့၏ အားမာန်

ပညာရေးခရီးဆိုသည်မှာ ပန်းခင်းလမ်းသဖွယ် အစဉ်အမြဲလွယ်ကူချောမွေ့နေတတ်သည့် လမ်းကြောင်းတစ်ခု မဟုတ်ပါ။ တစ်ခါတစ်ရံတွင် မိုးသည်းထန်စွာ ရွာသွန်းနိုင်သည်၊ တစ်ခါတစ်ရံတွင် လေပြင်းများ တိုက်ခတ်နိုင်သည်၊ သို့သော် ဖြူစင်သော စိတ်ဓာတ်တို့၏ ပိုင်ရှင်ဖြစ်သည့် ကျွန်ုပ်တို့၏ သားသမီးငယ်လေးများသည် ထိုအခက်အခဲများကို စိန်ခေါ်မှုများအဖြစ်သာ သဘောထားကြပါ သည်။ ဖြူဖြူစိမ်းစိမ်း ကျောင်းဝတ်စုံလေးများကို ဝတ်ဆင်ထားသော သူတို့၏ နှလုံးသားထဲတွင် ပညာကို ဆည်းပူးရန်ဟူသော အာသီသပညာဆီမီးသည် အမြဲထွန်းလင်း​တောက်ပ​နေမည်သာ ဖြစ်သည်။

“ညီညီညာညာ ဖြူဖြူစိမ်းနှင့်

ကျောင်းကိုသွားဖို့ ဒို့မကြောက်တယ်

မိုးတွေရွာလို့ လေတွေ တိုက်လည်း

ပညာရေးအတွက် ကျောင်းတက်မယ်

ကျောင်းတက်မယ် ကျောင်းတက်မယ်။”

ဤကဗျာလေးသည် ကလေးငယ်တို့၏ စိတ်ဓာတ်ကို အထင်းသားပုံဖော်ထားခြင်းဖြစ်သည်။ “ဒို့မကြောက်တယ်” ဟူသော စကားလုံးသည်သူတို့၏ ရဲရင့်မှုကိုပြသနေပြီး “ကျောင်းတက်မယ်” ဟူသောစကားကို ထပ်ကာတလဲလဲ ရွတ်ဆိုခြင်းသည် ပညာရေးအတွက် မည်သည့်အတားအဆီးကိုမဆို ကျော်လွှားမည်ဟူသော ခိုင်မာသည့် ဆုံးဖြတ်ချက်ကို ဖော်ညွှန်းနေပါသည်။

မိုးရွာလျှင် စိုစွတ်မှာကို မကြောက်၊ လေတိုက်လျှင် ပင်ပန်းမှာကို မတွေးတော၊ သူတို့၏ အဓိကပန်းတိုင်မှာ ပညာရေးပင်ဖြစ်သည်။ ဤရဲရင့်သော စိတ်ဓာတ်မျိုးဖြင့် ပညာရှာမည့် သားသမီးတို့၏ စိတ်အစဉ်ကို မိဘများအနေဖြင့် လေးစားဂုဏ်ယူ ရမည်ဖြစ်ပါသည်။ အခက်အခဲများကို ကျော်လွှားရန် ပညာသင်ယူနေသည့် ဤမျိုးဆက်သစ်တို့၏ စိတ်ဓာတ်သည် အနာဂတ်နိုင်ငံတော်၏ ခိုင်မာသောအုတ်မြစ်များ ဖြစ်လာမည်မှာ မလွဲဧကန်ပင်။ မိဘများအနေဖြင့်လည်း ဤကဲ့သို့ စိတ်ဓာတ်တက်ကြွနေသည့် ရင်သွေးငယ်များကို “စာသင်ကျောင်းများ” ဆီသို့ လက်တွဲခေါ်ဆောင်ကာ ပညာရေး ခရီးကို အတူတကွပံ့ပိုးပေးကြပါစို့။

ပညာပန်းခင်းမှ ပွင့်လန်းမည့်အနာဂတ်

ကျောင်းအပ်နှံရေး ရက်သတ္တပတ်များက မိသားစုတိုင်းအတွက် မျှော်လင့်ချက်အပြည့်ရှိသော၊ အနာဂတ်ကိုပုံဖော်ရန် စတင်ပြင်ဆင်ရသော အချိန်အခါ သမယဖြစ်သည်။ “ကျောင်းတော်ကြီးများ” သည် မိုးဦးကာလ၏ ပန်းမာလာတို့နှင့်အတူ အသက်ဝင်လှပနေပြီး စာသင်ကျောင်းဝင်းအတွင်းရှိ သဘာဝအလှတရားများသည် ကလေးငယ်တို့၏ စိတ်နှလုံးကို နူးညံ့သိမ်မွေ့စေပါသည်။

“တို့ကျောင်း” ကဗျာလေးက မြန်မာနိုင်ငံ၏ စာပေအမွေအနှစ်တစ်ခုဖြစ်ပြီး ယင်း၏ အဓိပ္ပာယ်မှာ ကျယ်ပြန့်နက်နဲလှပါသည်။ ဤကဗျာလေး၏ စာသားများက ကျွန်ုပ်တို့၏ ကလေးငယ်များအတွက် အလွန်လှပသော တင်စားချက်များဖြစ်ပါသည်။ “ပန်းကလေးများ ပွင့်တော့မည်” နှင့် “ဖူးတံဝင့်လို့ချီ” ဆိုသည့် စာသားများတွင် ကလေးငယ်များကို ပညာသင်ယူရန် အသင့်ဖြစ်နေသော ပွင့်လုဆဲပန်းကလေးများနှင့် တင်စားထားပါသည်။ သူတို့သည် အနာဂတ်တွင် လှပစွာပွင့်လန်းလာမည့် မျိုးဆက်သစ်များဖြစ်ကြပြီး “ဝင့်လို့ချီ” ဟူသော စကားလုံးက ကလေးငယ်တို့၏ ယုံကြည်မှုနှင့်ပညာကို မြတ်နိုးတန်ဖိုးထားသော စိတ်ဓာတ်တို့ကို အကောင်းဆုံးကိုယ်စားပြု ဖော်ပြနေပါသည်။

ထို့ပြင် “နေခြည်မှာ ရွှေရည်လောင်း” ဟူသည့်အပိုဒ်တွင် နေရောင်ခြည်ကို အသိပညာ၏ အလင်းတရားအဖြစ် တင်စားထားပြီး ဆရာ ဆရာမများက ထိုအသိပညာရောင်ခြည်ကို ကလေးငယ်တို့၏ နှလုံးသားပေါ်သို့ ရွှေရည်လောင်းပေးသကဲ့သို့ စေတနာအပြည့်ဖြင့် သွန်းလောင်းပေးကြသူများဖြစ်ကြောင်း ဖော်ကျူးထားသည်။ ဤစာသားများသည် ပညာပေးခြင်း၏ ဂုဏ်သိက္ခာနှင့် ဆရာတို့၏ မွန်မြတ်သော စေတနာကို အကောင်းဆုံး ထင်ဟပ်ဖော်ပြနေခြင်းပင်ဖြစ်သည်။

ကျောင်းတော်ကြီးများ၏ အလှတရား

ကျောင်းတော်ကြီးများသည် သဘာဝတရား၏ အလှပဆုံးပန်းခင်းကြီးများဖြစ်သည်။ ပန်းမာလာတို့ကဲ့သို့ ကွဲပြားသော အရည်အချင်းရှိသည့် ကလေးငယ်များသည် ဤစာသင်ကျောင်းဝင်းအတွင်း စုစည်းလာသောအခါ ပညာရေး၏ ပန်းခင်းကြီးတစ်ခု ဖြစ်လာသည်။ စာသင်ကျောင်းများသည် ကလေးငယ်တို့၏ ဉာဏ်ရည် ဉာဏ်သွေးများကို ရွှေရည်လောင်းသကဲ့သို့ ပိုမိုတောက်ပလာစေသည်။ သဘာဝပတ်ဝန်းကျင်၏ လတ်ဆတ်မှု၊ ဆရာတို့၏ မေတ္တာရောင်ခြည်နှင့် ကလေးငယ်တို့၏ ကြိုးစားအားထုတ်မှုတို့ ပေါင်းစပ်လိုက်သောအခါ ကျွန်ုပ်တို့၏ စာသင်ကျောင်းများက လူသားကောင်း ရတနာများ မွေးထုတ်ပေးရာ အမြတ်ဆုံးသော နေရာဒေသများ ဖြစ်လာမည်မှာ အမှန်ပင်ဖြစ်သည်။ မိဘပြည်သူများအနေဖြင့်... သင်တို့၏ သားသမီးများကို ဤသို့သော “ပညာပန်းခင်းကြီး” ထဲသို့ အချိန်မီပို့ဆောင်ပေးလိုက်ပါ။

ပညာပန်းရနံ့တို့ လွှမ်းခြုံမည့် နိမိတ်ပုံများ

စာသင်ကျောင်းများသည် လူငယ်တို့၏ အိပ်မက်များကို ပုံဖော်ပေးရာ နေရာများဖြစ်ပြီး ဇွန်လ ၁ ရက်နေ့တွင် တစ်နိုင်ငံလုံးရှိ “စာသင်ကျောင်းများ”သည် ကျောင်းသား ကျောင်းသူများ၏ ဆော့ကစားသံ၊ ရယ်သံ၊ ငိုသံ၊ ​ အော်ဟစ်သံများဖြင့် တက်ကြွစွာ အသက်ဝင်လာတော့မည်ဖြစ်သည်။ ပညာရနံ့တို့ သင်းပျံ့နေမည့် ထို“စာသင်ကျောင်းများ”က ကျွန်ုပ်တို့၏ နိုင်ငံတော်အနာဂတ်ကို ပုံဖော်ပေးမည့် တန်ဖိုးမဖြတ်နိုင်သော “ပညာအ​မွေမွေးထုတ်ရာ အဖိုးတန်နေရာများ”ပင် ဖြစ်သည်။

ကျောင်းတော်ကြီးများသည် ကလေးငယ်တို့၏ ဉာဏ်ရည် ဉာဏ်သွေးများကို ရွှေရည်လောင်း သကဲ့သို့ ပိုမိုတောက်ပလာစေသည်။ ဤပညာပန်း ရနံ့သင်းပျံ့ရာ စာသင်ကျောင်းတော်များက ကျွန်ုပ်တို့၏ သားသမီးများကို အနာဂတ်အတွက် စွမ်းရည်ရှိသူများ၊ ကျန်းမာပျော်ရွှင်သူများ ဖြစ်လာစေရန် ပျိုးထောင်ပေးနေသည့် နေရာများပင် ဖြစ်ပါသည်။

မိဘ၊ ဆရာ၊ ကျောင်းသား - အနာဂတ်အတွက် ပေါင်းစည်းညီညွတ်ခြင်း

မိဘများသည် အိမ်တွင်အခြေခံအုတ်မြစ်ကို တည်ဆောက်ပေးသူများဖြစ်ပြီး ဆရာများသည် ကျောင်းတွင် ပညာတန်ခိုးဖြင့် ထုဆစ်ပုံဖော်သူများ ဖြစ်ကြသည်။ ဤမွန်မြတ်လှသော ပညာရေးခရီးတွင် မိဘ၊ ဆရာနှင့် ကျောင်းသားတို့သည် တစ်စိတ် တစ်ဝမ်းတည်း ပူးပေါင်းဆောင်ရွက်မှသာ သားကောင်းရတနာတို့၏ ဘဝသည် လှပသော ပန်းဥယျာဉ်ကြီးကဲ့သို့ တောက်ပနေမည် ဖြစ်သည်။

မိဘများခင်ဗျား... သင်တို့၏ ရင်သွေးများကို အချိန်မီကျောင်းအပ်နှံပေးခြင်းဖြင့် သူတို့၏ အနာဂတ်ကို တံခါးဖွင့်ပေးလိုက်ပါ။ ပညာအမွေပေးကြပါ။

ဆရာများခင်ဗျား... မေတ္တာ၊ စေတနာ၊ ဝါသနာ၊ အနစ်နာခံမှုတို့ဖြင့် ကလေးငယ်တို့၏ ဘဝကို အလင်းပေးကြပါ။

ချစ်သား ချစ်သမီးတို့ ... ဇွဲ လုံ့လ၊ ဝီရိယတို့ဖြင့် နိုင်ငံတော်၏ အားကိုးရသော သားကောင်းရတနာများ ဖြစ်လာစေရန် ကြိုးပမ်းကြပါ။

ကျွန်ုပ်တို့အားလုံး စည်းလုံးညီညွတ်စွာ ပေါင်းစပ် လက်တွဲ၍ မြန်မာနိုင်ငံ၏ ပညာရေးအလင်းတန်းကို တစ်ဆင့်မြင့်တက်အောင် အတူတကွပုံဖော်ကြပါစို့။ ဇွန်လ ၁ ရက်နေ့မှ စတင်မည့် ပညာရေးခရီးလမ်းသည် အားလုံးအတွက် ထူးချွန်အောင်မြင်မှုများဖြင့် ပြည့်နှက်နေပါစေကြောင်း မိဘပြည်သူများနှင့်အတူ ဝမ်းမြောက်စွာ ကြိုဆိုအပ်ပါသည်။ ။

moi

Photo: Gemini

မြန်မာစကားပုံတွင် “အလိမ္မာ စာမှာရှိ” ဟု ဆိုခဲ့သည့်အလျောက် ပညာသည် လူသားတို့၏ ဘဝခရီးလမ်းကို လမ်းညွှန်ပေးသည့် ထာဝရအလင်းတန်းတစ်ခု ဖြစ်ပါသည်။ မြန်မာနိုင်ငံ၏ ပညာရေးပြက္ခဒိန်တွင် မေလလယ်ကာလသည် အလွန်အရေးပါပြီး ရင်ခုန်စရာကောင်းသော အချိန်အခါသမယဖြစ်သည်။ ၂၀၂၆ ခုနှစ် မေလနောက်ဆုံးပတ်မှစ၍ တစ်နိုင်ငံလုံးရှိ ကျောင်းသား ကျောင်းသူများသည် မိမိတို့၏ အိပ်မက်လမ်းကြောင်းဆီသို့ ပြန်လည်ခြေလှမ်းပြင်နေကြပြီဖြစ်သည်။

ပညာသည်ရတနာ၊ ပြည်သူ့အကျိုးသယ်ပိုးရာ ဟူသည့်အတိုင်း မိဘပြည်သူများအနေဖြင့် မိမိတို့၏ ရင်နှစ်သည်းချာ သားသမီးများကို သက်ဆိုင်ရာဒေသအလိုက် ကျောင်းအပ်နှံခြင်းများ ပြုလုပ်နိုင်မည်ဖြစ်သည်။ ကျောင်းအပ်နှံခြင်းဆိုသည်မှာ ရိုးရှင်းသော အုပ်ချုပ်မှုဆိုင်ရာ ကိစ္စရပ်တစ်ခုမျှသာ မဟုတ်ဘဲသားသမီးတို့၏ နောင်ရေးအတွက် “ပညာတည်းဟူသောရတနာ” ကို အမွေပေးလိုက်ခြင်းပင် ဖြစ်သည်။

ဇွန်လ ၁ ရက်နေ့တွင် တစ်နိုင်ငံလုံးရှိ စာသင်ကျောင်းတံခါးများ ပွင့်လာမည်ဖြစ်သည်။ ထိုနေ့ရက်သည် ပညာရောင်ခြည်တို့ လင်းလက်လာမည့်၊ ကလေးငယ်များ၏ ဆော့ကစားသံ၊ ရယ်သံ၊ ငိုသံ၊ ​အော်ဟစ်သံများဖြင့် စာသင်ကျောင်းများ အသက်ဝင်လာမည့် မျှော်လင့်ချက်၏ အစပြုချိန်ပင်ဖြစ်သည်။

ကလေးငယ်များသည် ပညာဟူသောရေစင်ကို သောက်သုံးကာ အသိဉာဏ်၏ အစွမ်းဖြင့် ကမ္ဘာကိုယှဉ်နိုင်သည့် လူသားကောင်းများဖြစ်လာစေရန် မိဘများက သားသမီးများကို အချိန်မီကျောင်းအပ်နှံပေးခြင်းဖြင့် ပညာရေး၏ လမ်းကြောင်းပေါ်သို့ လှပစွာချစ်ခြင်းမေတ္တာဖြင့် လက်တွဲပို့ဆောင်ပေးကြရမည်ဖြစ်သည်။

မိုးဦး၏ အလှနှင့်ပညာပန်းတို့ ဖူးပွင့်မည့် အချိန်အခါ

ဇွန်လ၏ မိုးဦးကာလသည် မြေပြင်ကို အသက်သွင်းပေးသကဲ့သို့ ပညာရေးသည်လည်း လူငယ်မျိုးဆက်သစ်တို့၏ အသိဉာဏ်ကို ရှင်သန်ဖွံ့ဖြိုးစေပါသည်။ မိုးဦး၏ အေးမြသော လေပြေ၊ မိုးစက်တို့၏ ပျော်ရွှင်သော ကကွက်များနှင့်အတူ စာသင်ကျောင်းများသည် ကျွန်ုပ်တို့၏ ရင်နှစ်သည်းချာ ရတနာ ပန်းလေးများကို လှိုက်လှဲစွာကြိုဆိုရန် အသင့်ရှိနေပါပြီ။ ကျောင်းများသည် မေတ္တာအပြည့်ဖြင့် သားသမီးလေးများကို လက်ကမ်းကြိုဆိုရန် စောင့်မျှော်နေပါသည်။ “ကျောင်းတော်ကြီးများ” ၏ တံခါးများပွင့်လာမည့် ဤအချိန်အခါသည် ကလေးငယ်များ၏ အိပ်မက်များကို စတင်ပျိုးထောင်မည့် အခွင့်ကောင်းပင်ဖြစ်သည်။

“မိုးစက် ဝတ်မှုန်ကလို့ ခုန်တော့

ဒို့ကျောင်းတော်ကြီး ဖွင့်တော့မည်။

ရင်နှစ်သည်းချာ ရတနာပန်းတို့

ဘဝလမ်းအတွက် ကျောင်းသို့ချီ။”

ဤကဗျာလေးအတိုင်းပင် မိုးစက်၊ မိုးပွင့်တို့ ခုန်ပေါက်နေသည့်ကြားမှ မိမိတို့၏ သားသမီးလေးများက ဘဝလမ်းအတွက် ပညာကိုရှာဖွေရန် စာသင်ကျောင်းများဆီသို့ ပျော်ရွှင်စွာ ချီတက်ကြပါတော့မည်။ မိုးစက်ကလေးများကဲ့သို့ ရိုးသားဖြူစင်သော ကျွန်ုပ်တို့၏ ရတနာပန်းလေးများအတွက် ပညာဟူသောရေစင်ကို တိုက်ကျွေးခြင်းသည် မိဘတိုင်း၏ အမြင့်မြတ်ဆုံးသော လက်ဆင့်ကမ်းတာဝန် တစ်ခုဖြစ်ပါသည်။

မိဘများအနေဖြင့် မိမိတို့၏ သားသမီးလေးများကို စာသင်ကျောင်းတော်ကြီးများသို့ လက်တွဲခေါ်ဆောင်ကာ ကျောင်းအပ်နှံပေးခြင်းသည် သူတို့၏ ဘဝတစ်သက်တာအတွက် အကောင်းဆုံးသော လက်ဆောင်တစ်ခုပင် ဖြစ်ပါသည်။ ပညာရေးခရီးကို မိုးဦး၏အလှနှင့်အတူ စတင်လိုက်ကြပါစို့။ ဤပညာရေးခရီးသည် သားသမီးတို့အတွက် အလင်းရောင်တောက်ပသော ဘဝလမ်းကြောင်းတစ်ခု ဖြစ်လာမည်မှာ အမှန်ပင်ဖြစ်ပါသည်။

မေတ္တာမိုးစက်များဖြင့် ပုံဖော်မည့် အနာဂတ်

စာသင်ကျောင်းဆိုသည်မှာ ကလေးငယ်တို့၏ စိတ်ကူးယဉ်အိပ်မက်များကို ပုံဖော်ပေးရာ၊ အသိဉာဏ်၏ အစွမ်းဖြင့်ဘဝကို အရောင်တင်ပေးရာ နေရာများဖြစ်သည်။ ကျောင်းဖွင့်ချိန် ရောက်လာလျှင် ကျောင်းတော်ကြီးများသည် မေတ္တာတရား၏ အလင်းရောင်များဖြင့် တောက်ပနေသည်။ ထိုနေရာတွင် ဆရာ ဆရာမတို့သည် ကလေးငယ်များအား မိမိတို့၏ ရင်သွေးအရင်းအချာကဲ့သို့ သံယောဇဉ်တရားအပြည့်ဖြင့် နွေးထွေးစွာ ကြိုဆိုကြသည်။

ဆရာ ဆရာမတို့၏ အပြုံးသည် ကလေးငယ်များအတွက် ကမ္ဘာ့အလှဆုံး လက်ဆောင်တစ်ခုပင်ဖြစ်သည်။ အေးမြသော မိုးဦးကာလ၏ နံနက်ခင်းတွင် ကလေးငယ်လေးများ ကျောင်းခန်းထဲသို့ တိုးဝင်လာပြီး ရိုးသားဖြူစင်သော မျက်ဝန်းလေးများဖြင့် “မင်္ဂလာပါ ဆရာမ”ဟု ညီညီညာညာ နှုတ်ဆက်ကြသည့် မြင်ကွင်းသည် မည်မျှပင် ငြိမ်းချမ်းပြီး ချစ်စရာကောင်းလိုက်ပါသနည်း။

ဆရာတို့၏ လက်ကမ်းကြိုဆိုမှုသည် ကလေးငယ်များ၏ ကြောက်ရွံ့မှုကို ပျောက်ကွယ်သွားစေပြီး ယုံကြည်မှုနှင့် ပညာရှာလိုစိတ်တို့ကို အစားထိုးပေးလိုက်ခြင်းပင် ဖြစ်သည်။ ဤနွေးထွေးလှသော ကြိုဆိုခြင်းများ၊ ဆရာမတို့၏ စေတနာမေတ္တာ လက်တစ်စုံဖြင့် ကလေးငယ်များ၏ပညာရေး ခရီး ကို အလှပဆုံးသော အစပြုမှုဖြင့် စတင်ပေးလိုက်ကြပါစို့။ ဤပတ်ဝန်းကျင်၊ ဤကျောင်းတော်သည် ကလေးငယ်များအတွက် အိမ်တစ်အိမ်လိုပင်နွေးထွေးပြီး အသိပညာတို့ စုဝေးရာဖြစ်လာမည်မှာ အသေအချာပင် ဖြစ်သည်။

ပညာရှာမည့် မျိုးဆက်သစ်တို့၏ အားမာန်

ပညာရေးခရီးဆိုသည်မှာ ပန်းခင်းလမ်းသဖွယ် အစဉ်အမြဲလွယ်ကူချောမွေ့နေတတ်သည့် လမ်းကြောင်းတစ်ခု မဟုတ်ပါ။ တစ်ခါတစ်ရံတွင် မိုးသည်းထန်စွာ ရွာသွန်းနိုင်သည်၊ တစ်ခါတစ်ရံတွင် လေပြင်းများ တိုက်ခတ်နိုင်သည်၊ သို့သော် ဖြူစင်သော စိတ်ဓာတ်တို့၏ ပိုင်ရှင်ဖြစ်သည့် ကျွန်ုပ်တို့၏ သားသမီးငယ်လေးများသည် ထိုအခက်အခဲများကို စိန်ခေါ်မှုများအဖြစ်သာ သဘောထားကြပါ သည်။ ဖြူဖြူစိမ်းစိမ်း ကျောင်းဝတ်စုံလေးများကို ဝတ်ဆင်ထားသော သူတို့၏ နှလုံးသားထဲတွင် ပညာကို ဆည်းပူးရန်ဟူသော အာသီသပညာဆီမီးသည် အမြဲထွန်းလင်း​တောက်ပ​နေမည်သာ ဖြစ်သည်။

“ညီညီညာညာ ဖြူဖြူစိမ်းနှင့်

ကျောင်းကိုသွားဖို့ ဒို့မကြောက်တယ်

မိုးတွေရွာလို့ လေတွေ တိုက်လည်း

ပညာရေးအတွက် ကျောင်းတက်မယ်

ကျောင်းတက်မယ် ကျောင်းတက်မယ်။”

ဤကဗျာလေးသည် ကလေးငယ်တို့၏ စိတ်ဓာတ်ကို အထင်းသားပုံဖော်ထားခြင်းဖြစ်သည်။ “ဒို့မကြောက်တယ်” ဟူသော စကားလုံးသည်သူတို့၏ ရဲရင့်မှုကိုပြသနေပြီး “ကျောင်းတက်မယ်” ဟူသောစကားကို ထပ်ကာတလဲလဲ ရွတ်ဆိုခြင်းသည် ပညာရေးအတွက် မည်သည့်အတားအဆီးကိုမဆို ကျော်လွှားမည်ဟူသော ခိုင်မာသည့် ဆုံးဖြတ်ချက်ကို ဖော်ညွှန်းနေပါသည်။

မိုးရွာလျှင် စိုစွတ်မှာကို မကြောက်၊ လေတိုက်လျှင် ပင်ပန်းမှာကို မတွေးတော၊ သူတို့၏ အဓိကပန်းတိုင်မှာ ပညာရေးပင်ဖြစ်သည်။ ဤရဲရင့်သော စိတ်ဓာတ်မျိုးဖြင့် ပညာရှာမည့် သားသမီးတို့၏ စိတ်အစဉ်ကို မိဘများအနေဖြင့် လေးစားဂုဏ်ယူ ရမည်ဖြစ်ပါသည်။ အခက်အခဲများကို ကျော်လွှားရန် ပညာသင်ယူနေသည့် ဤမျိုးဆက်သစ်တို့၏ စိတ်ဓာတ်သည် အနာဂတ်နိုင်ငံတော်၏ ခိုင်မာသောအုတ်မြစ်များ ဖြစ်လာမည်မှာ မလွဲဧကန်ပင်။ မိဘများအနေဖြင့်လည်း ဤကဲ့သို့ စိတ်ဓာတ်တက်ကြွနေသည့် ရင်သွေးငယ်များကို “စာသင်ကျောင်းများ” ဆီသို့ လက်တွဲခေါ်ဆောင်ကာ ပညာရေး ခရီးကို အတူတကွပံ့ပိုးပေးကြပါစို့။

ပညာပန်းခင်းမှ ပွင့်လန်းမည့်အနာဂတ်

ကျောင်းအပ်နှံရေး ရက်သတ္တပတ်များက မိသားစုတိုင်းအတွက် မျှော်လင့်ချက်အပြည့်ရှိသော၊ အနာဂတ်ကိုပုံဖော်ရန် စတင်ပြင်ဆင်ရသော အချိန်အခါ သမယဖြစ်သည်။ “ကျောင်းတော်ကြီးများ” သည် မိုးဦးကာလ၏ ပန်းမာလာတို့နှင့်အတူ အသက်ဝင်လှပနေပြီး စာသင်ကျောင်းဝင်းအတွင်းရှိ သဘာဝအလှတရားများသည် ကလေးငယ်တို့၏ စိတ်နှလုံးကို နူးညံ့သိမ်မွေ့စေပါသည်။

“တို့ကျောင်း” ကဗျာလေးက မြန်မာနိုင်ငံ၏ စာပေအမွေအနှစ်တစ်ခုဖြစ်ပြီး ယင်း၏ အဓိပ္ပာယ်မှာ ကျယ်ပြန့်နက်နဲလှပါသည်။ ဤကဗျာလေး၏ စာသားများက ကျွန်ုပ်တို့၏ ကလေးငယ်များအတွက် အလွန်လှပသော တင်စားချက်များဖြစ်ပါသည်။ “ပန်းကလေးများ ပွင့်တော့မည်” နှင့် “ဖူးတံဝင့်လို့ချီ” ဆိုသည့် စာသားများတွင် ကလေးငယ်များကို ပညာသင်ယူရန် အသင့်ဖြစ်နေသော ပွင့်လုဆဲပန်းကလေးများနှင့် တင်စားထားပါသည်။ သူတို့သည် အနာဂတ်တွင် လှပစွာပွင့်လန်းလာမည့် မျိုးဆက်သစ်များဖြစ်ကြပြီး “ဝင့်လို့ချီ” ဟူသော စကားလုံးက ကလေးငယ်တို့၏ ယုံကြည်မှုနှင့်ပညာကို မြတ်နိုးတန်ဖိုးထားသော စိတ်ဓာတ်တို့ကို အကောင်းဆုံးကိုယ်စားပြု ဖော်ပြနေပါသည်။

ထို့ပြင် “နေခြည်မှာ ရွှေရည်လောင်း” ဟူသည့်အပိုဒ်တွင် နေရောင်ခြည်ကို အသိပညာ၏ အလင်းတရားအဖြစ် တင်စားထားပြီး ဆရာ ဆရာမများက ထိုအသိပညာရောင်ခြည်ကို ကလေးငယ်တို့၏ နှလုံးသားပေါ်သို့ ရွှေရည်လောင်းပေးသကဲ့သို့ စေတနာအပြည့်ဖြင့် သွန်းလောင်းပေးကြသူများဖြစ်ကြောင်း ဖော်ကျူးထားသည်။ ဤစာသားများသည် ပညာပေးခြင်း၏ ဂုဏ်သိက္ခာနှင့် ဆရာတို့၏ မွန်မြတ်သော စေတနာကို အကောင်းဆုံး ထင်ဟပ်ဖော်ပြနေခြင်းပင်ဖြစ်သည်။

ကျောင်းတော်ကြီးများ၏ အလှတရား

ကျောင်းတော်ကြီးများသည် သဘာဝတရား၏ အလှပဆုံးပန်းခင်းကြီးများဖြစ်သည်။ ပန်းမာလာတို့ကဲ့သို့ ကွဲပြားသော အရည်အချင်းရှိသည့် ကလေးငယ်များသည် ဤစာသင်ကျောင်းဝင်းအတွင်း စုစည်းလာသောအခါ ပညာရေး၏ ပန်းခင်းကြီးတစ်ခု ဖြစ်လာသည်။ စာသင်ကျောင်းများသည် ကလေးငယ်တို့၏ ဉာဏ်ရည် ဉာဏ်သွေးများကို ရွှေရည်လောင်းသကဲ့သို့ ပိုမိုတောက်ပလာစေသည်။ သဘာဝပတ်ဝန်းကျင်၏ လတ်ဆတ်မှု၊ ဆရာတို့၏ မေတ္တာရောင်ခြည်နှင့် ကလေးငယ်တို့၏ ကြိုးစားအားထုတ်မှုတို့ ပေါင်းစပ်လိုက်သောအခါ ကျွန်ုပ်တို့၏ စာသင်ကျောင်းများက လူသားကောင်း ရတနာများ မွေးထုတ်ပေးရာ အမြတ်ဆုံးသော နေရာဒေသများ ဖြစ်လာမည်မှာ အမှန်ပင်ဖြစ်သည်။ မိဘပြည်သူများအနေဖြင့်... သင်တို့၏ သားသမီးများကို ဤသို့သော “ပညာပန်းခင်းကြီး” ထဲသို့ အချိန်မီပို့ဆောင်ပေးလိုက်ပါ။

ပညာပန်းရနံ့တို့ လွှမ်းခြုံမည့် နိမိတ်ပုံများ

စာသင်ကျောင်းများသည် လူငယ်တို့၏ အိပ်မက်များကို ပုံဖော်ပေးရာ နေရာများဖြစ်ပြီး ဇွန်လ ၁ ရက်နေ့တွင် တစ်နိုင်ငံလုံးရှိ “စာသင်ကျောင်းများ”သည် ကျောင်းသား ကျောင်းသူများ၏ ဆော့ကစားသံ၊ ရယ်သံ၊ ငိုသံ၊ ​ အော်ဟစ်သံများဖြင့် တက်ကြွစွာ အသက်ဝင်လာတော့မည်ဖြစ်သည်။ ပညာရနံ့တို့ သင်းပျံ့နေမည့် ထို“စာသင်ကျောင်းများ”က ကျွန်ုပ်တို့၏ နိုင်ငံတော်အနာဂတ်ကို ပုံဖော်ပေးမည့် တန်ဖိုးမဖြတ်နိုင်သော “ပညာအ​မွေမွေးထုတ်ရာ အဖိုးတန်နေရာများ”ပင် ဖြစ်သည်။

ကျောင်းတော်ကြီးများသည် ကလေးငယ်တို့၏ ဉာဏ်ရည် ဉာဏ်သွေးများကို ရွှေရည်လောင်း သကဲ့သို့ ပိုမိုတောက်ပလာစေသည်။ ဤပညာပန်း ရနံ့သင်းပျံ့ရာ စာသင်ကျောင်းတော်များက ကျွန်ုပ်တို့၏ သားသမီးများကို အနာဂတ်အတွက် စွမ်းရည်ရှိသူများ၊ ကျန်းမာပျော်ရွှင်သူများ ဖြစ်လာစေရန် ပျိုးထောင်ပေးနေသည့် နေရာများပင် ဖြစ်ပါသည်။

မိဘ၊ ဆရာ၊ ကျောင်းသား - အနာဂတ်အတွက် ပေါင်းစည်းညီညွတ်ခြင်း

မိဘများသည် အိမ်တွင်အခြေခံအုတ်မြစ်ကို တည်ဆောက်ပေးသူများဖြစ်ပြီး ဆရာများသည် ကျောင်းတွင် ပညာတန်ခိုးဖြင့် ထုဆစ်ပုံဖော်သူများ ဖြစ်ကြသည်။ ဤမွန်မြတ်လှသော ပညာရေးခရီးတွင် မိဘ၊ ဆရာနှင့် ကျောင်းသားတို့သည် တစ်စိတ် တစ်ဝမ်းတည်း ပူးပေါင်းဆောင်ရွက်မှသာ သားကောင်းရတနာတို့၏ ဘဝသည် လှပသော ပန်းဥယျာဉ်ကြီးကဲ့သို့ တောက်ပနေမည် ဖြစ်သည်။

မိဘများခင်ဗျား... သင်တို့၏ ရင်သွေးများကို အချိန်မီကျောင်းအပ်နှံပေးခြင်းဖြင့် သူတို့၏ အနာဂတ်ကို တံခါးဖွင့်ပေးလိုက်ပါ။ ပညာအမွေပေးကြပါ။

ဆရာများခင်ဗျား... မေတ္တာ၊ စေတနာ၊ ဝါသနာ၊ အနစ်နာခံမှုတို့ဖြင့် ကလေးငယ်တို့၏ ဘဝကို အလင်းပေးကြပါ။

ချစ်သား ချစ်သမီးတို့ ... ဇွဲ လုံ့လ၊ ဝီရိယတို့ဖြင့် နိုင်ငံတော်၏ အားကိုးရသော သားကောင်းရတနာများ ဖြစ်လာစေရန် ကြိုးပမ်းကြပါ။

ကျွန်ုပ်တို့အားလုံး စည်းလုံးညီညွတ်စွာ ပေါင်းစပ် လက်တွဲ၍ မြန်မာနိုင်ငံ၏ ပညာရေးအလင်းတန်းကို တစ်ဆင့်မြင့်တက်အောင် အတူတကွပုံဖော်ကြပါစို့။ ဇွန်လ ၁ ရက်နေ့မှ စတင်မည့် ပညာရေးခရီးလမ်းသည် အားလုံးအတွက် ထူးချွန်အောင်မြင်မှုများဖြင့် ပြည့်နှက်နေပါစေကြောင်း မိဘပြည်သူများနှင့်အတူ ဝမ်းမြောက်စွာ ကြိုဆိုအပ်ပါသည်။ ။

MDN