အွန်လိုင်းပေါ်တွင် ပျံ့နှံ့လာသည့် ဗီဒီယိုမှတ်တမ်းများအရ ရုရှား ကာကွယ်ရေးပစ္စည်းထုတ်လုပ်သူများသည် စက်ရုပ်လက်တံ (Mechanical Arm) တပ်ဆင်ထားပြီး စိန်ပြောင်းကျည်များကို ကိုယ်တိုင် ဖြည့်သွင်း ပစ်ခတ်နိုင်သည့် ဘီးတပ် (Tracked) စက်ရုပ်ဒရုန်းတစ်မျိုးကို စမ်းသပ်လျက်ရှိသည်။ အဆိုပါစမ်းသပ်မှုကို နှင်းများဖုံးလွှမ်းနေသည့် လေ့ကျင့်ရေးကွင်းတစ်ခုတွင် ပြုလုပ်ခဲ့ခြင်းဖြစ်ပြီး ဒရုန်းသည် ၎င်း၏ ကိုယ်ထည်ပေါ်တွင်ပါရှိသော ခဲယမ်းသိုလှောင်ရာမှ စိန်ပြောင်းကျည်များကို စက်ရုပ် လက်တံဖြင့်ကောက်ယူကာ ပြောင်းအတွင်းသို့ စနစ်တကျ ထည့်သွင်းနိုင်သည်။

Bagulnik-82 ဟု အမည်ပေးထားသည့် ထိုစနစ်သည် ၂၀၂၄ ခုနှစ်တွင် စတင်မိတ်ဆက်ခဲ့သော Kurier လျှပ်စစ်စွမ်းအင်သုံး အသေးစားယာဉ် ကိုယ်ထည်ကို အခြေခံ၍ တည်ဆောက်ထားခြင်းဖြစ်သည်။ ၎င်းတွင် ဆိုဗီယက်ခေတ်သုံး ၈၂ မီလီမီတာ 2B14 Podnos စိန်ပြောင်းကို အသုံးပြု ထားပြီး၊ စက်ရုပ်လက်တံသည် ကျည်တစ်တောင့်ဖြည့်သွင်းရန် ငါးစက္ကန့်ခန့် ကြာမြင့်သည်။ အဆိုပါပစ်ခတ်နှုန်းသည် လေ့ကျင့်ထားသော လူသားစစ်သည်များထက် နှေးကွေးသော်လည်း၊ စစ်သည်များ၏ အသက်အန္တရာယ်ကို မထိခိုက်စေဘဲ ဘေးအန္တရာယ်ရှိသော ရှေ့တန်းစစ်မျက်နှာ များတွင် စစ်ဆင်နိုင်ခြင်းက အဓိကအားသာချက်ဖြစ်သည်။

သို့သော် အဆိုပါဒရုန်း၏ စိန်ပြောင်း ပစ်ခတ်နိုင်မှု အကွာအဝေးမှာ ၄ ကီလိုမီတာအောက်သာရှိသောကြောင့် ရန်သူ့ဘက်မှ FPV Kamikaze ဒရုန်းများ၏ ခြိမ်းခြောက်မှုဒဏ်ကို ခံရနိုင်ခြေရှိခြင်းမှာ အဓိက အားနည်းချက်တစ်ခု ဖြစ်နေသည်။ လက်ရှိတွင် ထိုစက်ရုပ်အမျိုးအစားများအနက် စက်သေနတ်တပ်ဆင်ထားသည့် ဗားရှင်းကို ယူကရိန်း စစ်ပွဲတွင် စတင်အသုံးပြုနေပြီဖြစ်ပြီး အခြားဗားရှင်းတစ်ခုအဖြစ် မီးလောင်ဗုံးပစ်လောင်ချာ တပ်ဆင်ထားသည့် အမျိုးအစားကိုလည်း ထုတ်လုပ်ထားကြောင်း သိရှိရသည်။

ကိုးကား- RT

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး

     ရုရှားနိုင်ငံသည် မျက်မှောက်ကာလတွင် မိတ်ဖက်နိုင်ငံများနှင့် ပူးပေါင်းဆောင်ရွက်မှုများ တိုးမြှင့်၍ အာကာသနယ်ပယ်တွင် လွှမ်းမိုးနိုင်စွမ်းရှိသည့်    ထိပ်တန်းနိုင်ငံကြီးအဖြစ် အခိုင်အမာ တည်ဆောက်နိုင်ရန်ကြိုးပမ်းလျက်ရှိသည်။ 

ရုရှားနိုင်ငံသည် အာကာသနယ်ပယ်တွင် ဦးဆောင်ဦးရွက်ပြုခြင်းကို ဆက်လက်ထိန်းသိမ်းသည့် အနေဖြင့်   အာကာသဖိုရမ်တစ်ခုကို အိမ်ရှင်အဖြစ် လက်ခံကျင်းပမည်ဖြစ်သည်။ 

အဆိုပါ အာကာသဖိုရမ်ကို ဧပြီလ ၉ ရက်နေ့တွင် မော်စကိုမြို့၌ ကျင်းပမည်ဖြစ်သည်။ ရုရှားအာကာသဖိုရမ် (Russian Space Forum) ဟု အမည်ပေးထားသည့် အဆိုပါအခမ်းအနားသို့ နိုင်ငံပေါင်း ၄၀ မှ ကိုယ်စားလှယ်များ တက်ရောက်မည်ဖြစ်ကြောင်း ရုရှား Roscosmos ၏သတင်းထုတ်ပြန်ချက်အရ သိရသည်။ 

ဖိုရမ်တွင် အဓိကပါဝင်မည့်နိုင်ငံများမှာ  တရုတ်၊ အိန္ဒိယနိုင်ငံနှင့် အာရပ်စော်ဘွားများ ပြည်ထောင်စုတို့အပြင် မြန်မာနိုင်ငံလည်းပါဝင်မည်ဖြစ်သည်။

ရုရှားနိုင်ငံသည် လကမ္ဘာစူးစမ်းလေ့လာရေးပြိုင်ပွဲတွင် တက်ကြွစွာပါဝင်လျက်ရှိပြီး တရုတ်နိုင်ငံနှင့်အတူ နိုင်ငံတကာသိပ္ပံဆိုင်ရာ လကမ္ဘာလေ့လာရေးစခန်းတည်ဆောက်ရေးအပါအဝင် စီမံကိန်းများတွင်လည်း    ပူးပေါင်းဆောင်ရွက်လျက်ရှိသည်။ 

၁၉၆၁ ခုနှစ် ဧပြီလတွင်စတင်ခဲ့သော ဆိုဗီယက်ယူနီယံ (ရုရှား) အာကာသယာဉ်မှူး ယူရီ ဂါဂါရင်၏သမိုင်းဝင်ခရီးစဉ်သည် အာကာသစူးစမ်းလေ့လာရေးတွင် အရေးအကြီးဆုံးမှတ်တိုင်တစ်ခု ဖြစ်လာခဲ့သည်။ 

မျက်မှောက်ကာလတွင်လည်း ရုရှားနိုင်ငံသည်  အာကာသနယ်ပယ်ဖွံ့ဖြိုးတိုးတက်ရေးကဏ္ဍအပါအဝင် နိုင်ငံအများအပြား၏သိပ္ပံနှင့် နည်းပညာဖွံ့ဖြိုးတိုးတက်မှုအတွက် အဓိကမောင်းနှင်အားတစ်ခုဖြစ်လာခဲ့သည်။ ဧပြီလ ၉ ရက်နေ့တွင် မော်စကိုမြို့၌ ကျင်းပမည့် ရုရှား အာကာသဖိုရမ်သည် အဆိုပါရည်မှန်းချက် အတွက် ရည်ရွယ်ထားခြင်းဖြစ်သည်။

အာကာသနယ်ပယ်အပြင် အခြားကဏ္ဍ အများအပြား၌ ပူးပေါင်းဆောင်ရွက်နေသည့် ရုရှားနိုင်ငံ၏ အဓိကမိတ်ဖက်နိုင်ငံမှာ တရုတ်နိုင်ငံဖြစ်သည်။ ၂၀၂၁ ခုနှစ်မှစ၍ တရုတ်အမျိုးသား အာကာသစီမံခန့်ခွဲမှုဌာနနှင့် ရုရှားအာကာသအေဂျင်စီ Roscosmos တို့သည် နိုင်ငံတကာ လကမ္ဘာလေ့လာရေးစခန်း     တည်ထောင်ရန် သဘောတူညီခဲ့ကြပြီးဖြစ်သည်။

ယခင်က ရုရှားနှင့် တရုတ်နိုင်ငံတို့သည် အဆိုပါစခန်းအတွက် စွမ်းအင်စနစ် တည်ဆောက်ရေးဆိုင်ရာ   နားလည်မှုစာချွန်လွှာတစ်ရပ်ကို လက်မှတ်ရေးထိုးခဲ့ကြပြီးဖြစ်သည်။ ထို့အတူပင် ရုရှားနှင့် တရုတ်နိုင်ငံတို့သည် ၎င်းတို့၏ လကမ္ဘာလေ့လာရေးမစ်ရှင်များဖြစ်သည့် Luna-26 နှင့် Chang'e-7 တို့နှင့်စပ်လျဉ်း၍လည်း ညှိနှိုင်းဆောင်ရွက်လျက်ရှိသည်။ 

အနောက်နိုင်ငံများ၏ ပိတ်ဆို့အရေးယူမှုများရှိနေသော်လည်း ရုရှားနိုင်ငံသည် အာကာသနယ်ပယ်တွင်   အမေရိကန်ပြည်ထောင်စုနှင့် ပူးပေါင်းဆောင်ရွက်နေဆဲဖြစ်သည်။ အဆိုပါ ပူးပေါင်းဆောင်ရွက်မှုသည် ရုရှားနှင့်အမေရိကန်တို့အကြား နည်းပညာပူးပေါင်းဆောင်ရွက်မှုများကို ဆက်လက်ထိန်းသိမ်းထားသည့် တစ်ခုတည်းသော    နည်းပညာကဏ္ဍဖြစ်သည်။

လက်ရှိအသုံးပြုနေသည့် နိုင်ငံတကာ အာကာသစခန်းကို ၂၀၃၀ ပြည့်နှစ်တွင် ပတ်လမ်းကြောင်းအတွင်းမှ ဖယ်ရှားရန် စီစဉ်ထားသည်။ ထို့ကြောင့် အာကာသနယ်ပယ်တွင် တရုတ်အပါအဝင် အခြားနိုင်ငံများနှင့် ပူးပေါင်းဆောင်ရွက်ခြင်းအားဖြင့် ရုရှားနိုင်ငံအနေဖြင့် ၎င်း၏ကိုယ်ပိုင် အာကာသစခန်းတစ်ခုကို တည်ဆောက်နိုင်မည့် အလားအလာကို ပိုမိုတိုးတက် လာစေနိုင်ပြီး အာကာသနယ်ပယ်တွင် ဦးဆောင်နိုင်ငံတစ်နိုင်ငံအဖြစ် အခိုင်အမာ ရပ်တည်စေနိုင်မည်ဖြစ်ကြောင်း ရေးသား ဖော်ပြလိုက်ရပါသည်။ 

MWD

     အာကာသယာဉ်မှူးများကို တင်ဆောင်သွားသည့် Artemis II အာကာသယာဉ်၏ ခရီးစဉ်သည် လူသားများက ကမ္ဘာမြေနှင့် အဝေးဆုံး အာကာသအတွင်းသို့ ခရီးသွားနိုင်ခဲ့သည့် ခရီးစဉ်အဖြစ် စံချိန်သစ်တင်နိုင်ခဲ့ကြောင်းသိရသည်။

အဆိုပါ Artemis II အာကာသယာဉ်သည် ယခင် Apollo 13 အာကာသယာဉ်က ရာစုနှစ်ဝက်ကျော်ကြာ ထိန်းသိမ်းထားနိုင်ခဲ့သည့် စံချိန်ဟောင်းကိုချိုးဖျက်၍ သမိုင်းမှတ်တိုင်သစ် စိုက်ထူနိုင်ခဲ့ခြင်းဖြစ်သည်။

Artemis II အာကာသယာဉ်သည် ဧပြီလ၁ ရက်တွင် နာဆာမှ အာကာသယာဉ်မှူးများဖြစ်ကြသည့် ရိဝိုက်စမန်း၊ ဗစ်တာဂလက်ဗာနှင့် ခရစ်စတီနာကော့ချ် အပြင် ကနေဒါနိုင်ငံမှ ဂျယ်ရမီဟန်ဆင် တို့အားတင်ဆောင်၍ အာသာသအတွင်းသို့ ထွက်ခွာခဲ့ခြင်းဖြစ်သည်။ အဆိုပါ အာကာသယာဉ်မှူးများ လိုက်ပါသွားသည့်ခရီးစဉ်သည် ၁၉၇၀ ပြည့်နှစ်အတွင်း၌ Apollo 13 အာကာသ ယာဉ်က စံချိန်တင်ထားခဲ့သော ကမ္ဘာမြေမှ မိုင်ပေါင်း ၂၄၈၆၅၅ အကွာအဝေးစံချိန်ကို ကျော်ဖြတ်၍ ခန့်မှန်းခြေအရ ကမ္ဘာမြေမှ အများဆုံးအကွာအဝေး ၂၅၂၇၅၇ မိုင်အထိ    ရောက်ရှိခဲ့ခြင်းဖြစ်ကြောင်း သိရသည်။

၁၀ ရက်ကြာမြင့်မည့် အဆိုပါအာကာသခရီးစဉ်အတွင်း အာကာသယာဉ်မှူးများသည် လကမ္ဘာကိုပတ်ပြီးနောက် Orion အာကာသယာဉ်ဖြင့် ကမ္ဘာမြေသို့ပြန်လည် ရောက်ရှိလာမည်ဖြစ်သည်။

MWD

      ရုရှားနိုင်ငံသည်   အထူးစစ်ဆင်ရေး နယ်မြေအတွင်းရှိ ၎င်းတို့၏တပ်ဖွဲ့ဝင်များ အသုံးပြုနိုင်ရန်     ဖိုက်ဘာအော့ပတစ် ဆက်သွယ်ရေးစနစ်သုံး နောက်ဆုံးပေါ် မောင်းသူမဲ့ရေယာဉ်များကို ပေးအပ်လိုက်ပြီဖြစ်ကြောင်း ရုရှားစစ်ဘက်သုံးလက်နက် ထုတ်လုပ်ရေးနှင့်    သုတေသနဌာနမှ ဒုတိယအထွေထွေညွှန်ကြားရေးမှူး အဗ်ဂျီနီ မန်ဒယ်လ်စတမ်က မတ်လ ၃၁ ရက်တွင် ပြောကြားသည်။

Shell ဟုအမည်ပေးထားသည့် အဆိုပါမောင်းသူမဲ့ရေယာဉ်များအား ရုရှားတပ်ဖွဲ့အချို့    လက်ခံရရှိထားပြီးဖြစ်ကြောင်း၊ ၎င်းတပ်ဖွဲ့များအား အော်ပရေတာများက ကြိုတင်လေ့ကျင့် ပေးထားပြီးဖြစ်ကြောင်း  မန်ဒယ်လ်စတမ်က TASS သတင်းဌာနနှင့် လုပ်ဆောင်ခဲ့သည့် တွေ့ဆုံမေးမြန်းခန်းတစ်ခုတွင်ပြောကြားသည်။

ထို့ပြင် လူမဲ့စနစ်များဆိုင်ရာ နည်းပညာနှင့် စစ်ဆင်ရေးဌာနမှ စစ်ဘက်ကျွမ်းကျင်သူများသည် Koshchey ဟု အမည်ပေးထားသည့် အကြီးစားဒရုန်းအသစ်များကို အထူးစစ်ဆင်ရေး နယ်မြေအတွင်းရှိ ရုရှားတပ်ဖွဲ့များထံ ပေးပို့ရန် ပြင်ဆင်လျက်ရှိကြောင်း  ရုရှားကာကွယ်ရေး ဝန်ကြီးဌာနက ဇန်နဝါရီလ ၃၁ ရက်နေ့တွင် ထုတ်ပြန်ထားသည်။

MWD

AI နည်းပညာလောက၏ ထိပ်သီးကုမ္ပဏီတစ်ခုဖြစ်သော Anthropic သည် ၎င်းတို့၏ အလွန်လျှို့ဝှက်ထားသော အတွင်းပိုင်းသုံး ကုဒ် (Internal code) များကို မှားယွင်းထုတ်ပြန်မိခဲ့ရာမှ GitHub ပေါ်တွင် ကုဒ်များကို ပြန်လည်ပြင်ဆင်ရေးသားသည့် ဂယက်ရိုက်မှုများဖြစ်ပေါ် ခဲ့ပြီး Amazon က ကျောထောက်နောက်ခံပြုထားသည့် ၎င်းတို့၏ စီးပွားရေးပုံစံအပေါ် အကြီးအကျယ် ထိခိုက်ပျက်စီးမှုများရှိလာနိုင်သည့် အခြေအနေသို့ ဆိုက်ရောက်နေသည်။

Claude chatbot ကို တီထွင်ခဲ့သည့် အဆိုပါကုမ္ပဏီက ယခုဖြစ်ရပ်သည် "လုံခြုံရေးကျိုးပေါက်မှုကြောင့်မဟုတ်ဘဲ လူသားတို့၏ မှားယွင်းမှုကြောင့်ဖြစ်သော ထုတ်ပြန်မှုဆိုင်ရာ ပြဿနာသာဖြစ်သည်" ဟု ဖော်ပြခဲ့ကြောင်း အမေရိကန် နည်းပညာသတင်းဝက်ဘ်ဆိုက်ဖြစ်သော VentureBeat က အင်္ဂါနေ့ (မတ် ၃၁) တွင် ဖော်ပြခဲ့သည်။

၎င်းတို့၏ AI စနစ်များ အသုံးပြုမှုနှင့်ပတ်သက်၍ ပင်တဂွန်နှင့် သဘောထားကွဲလွဲမှုများ ဖြစ်ပေါ်ခဲ့ပြီးနောက် ပြီးခဲ့သည့်ဖေဖော်ဝါရီလအတွင်းက အမေရိကန် ကာကွယ်ရေးဝန်ကြီး Pete Hegseth က Anthropic ကို "အမျိုးသားလုံခြုံရေးအတွက် စိုးရိမ်ရသည့် အန္တရာယ်" အဖြစ် သတ်မှတ် ခဲ့သည်။

Axios နှင့် The Verge တို့၏ ဖော်ပြချက်အရ ပေါက်ကြားသွားသောအချက်အလက်များထဲတွင် Natural language ဖြင့် ဆော့ဖ်ဝဲလ်များ ရေးသားစီမံရာတွင် အသုံးပြုသည့် Anthropic ၏ AI coding assistant ဖြစ်သော Claude Code နှင့် ဆက်စပ်နေသည့် ကုဒ်လိုင်းပေါင်း ၅ သိန်း ကျော် ပါဝင်နေသည်။ ထိုအထဲတွင် ထုတ်မပြရသေးသော လုပ်ဆောင်ချက်အသစ်များ (Features)၊ စွမ်းဆောင်ရည်ဆိုင်ရာ အချက်အလက်များနှင့် Developer များ၏ မှတ်စုများ ပါဝင်နေသည်။

Ars Technica နှင့် The Verge တို့၏ အဆိုအရ အဆိုပါကုဒ်များသည် အွန်လိုင်းပေါ်တွင် အလျင်အမြန်ပျံ့နှံ့သွားခဲ့ပြီး ကုဒ်မျှဝေသည့် ပလက်ဖောင်း ဖြစ်သော GitHub ပေါ်သို့ ရောက်ရှိကာ နာရီပိုင်းအတွင်း အကြိမ်ပေါင်း ထောင်နှင့်ချီ၍ ပုံတူကူးယူခြင်း ခံခဲ့ရသည်။ Anthropic အနေဖြင့် အဆိုပါ အချက်အလက်များကို ဖယ်ရှားရန်နှင့် ဖြန့်ဝေမှုရပ်ဆိုင်းရန် အကြောင်းကြားစာများ ထုတ်ပြန်ခဲ့သော်လည်း အဆိုပါအချက်အလက်များသည် ကျယ်ကျယ်ပြန့်ပြန့် ကူးယူဖြန့်ဝေခြင်းခံထားရပြီးဖြစ်ကြောင်း သိရှိရသည်။

VentureBeat ၏ အဆိုအရ Claude Code ၏ အသေးစိတ်ပုံစံငယ်များ (Blueprints) ပေါက်ကြားသွားခြင်းသည် မသမာသူများ (Bad actors) အတွက် လုံခြုံရေးစစ်ဆေးမှုများကို ကျော်ဖြတ်ရန် သို့မဟုတ် အသုံးပြုသူမသိဘဲ လျှို့ဝှက်ကုဒ်များလုပ်ဆောင်စေရန်နှင့် အချက်အလက်များကို ခိုးယူရန်အတွက် လမ်းပြမြေပုံတစ်ခုပေးလိုက်သကဲ့သို့ ဖြစ်နေနိုင်သည်။

ပြီးခဲ့သည့် ဖေဖော်ဝါရီလကလည်း Anthropic ၏ ထုတ်မပြရသေးသော Claude Mythos မော်ဒယ်၏ အသေးစိတ်အချက်အလက်များပါဝင်သော အတွင်းပိုင်းစာရွက်စာတမ်း မူကြမ်းပေါင်းထောင်နှင့်ချီ၍ လူအများကြည့်ရှုနိုင်သောနေရာတွင် ကျန်ရှိနေခဲ့မှုကြောင့် သီးခြား အချက်အလက် ပေါက်ကြားမှုတစ်ခု ဖြစ်ပေါ်ခဲ့သေးသည်။

ကိုးကား- RT

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ ဝန်ကြီး-၂

     ရုရှားနိုင်ငံ နိုဗိုစီဘတ်တက္ကသိုလ်မှ  သိပ္ပံပညာရှင်များသည်  သမိုင်းမတင်မီခေတ်အတွင်း၌ ရှင်သန်ကျက်စားပြီး မျိုးသုဉ်းသွားခဲ့သည့်  အမွေးရှည်ကြံ့ကြီးများ၏ မေးရိုးများကို  ပထမဆုံးအကြိမ်အဖြစ် ကွန်ပျူတာဓာတ်မှန်အား အသုံးပြု၍ လေ့လာခဲ့ကြကြောင်း သိရသည်။

သိပ္ပံပညာရှင်များ၏ အဆိုပါလေ့လာမှုသည် ရှေးဟောင်းတိရစ္ဆာန်များ၏ သွားများ မည်သို့ပြောင်းလဲလာသည်ကို နားလည်သဘောပေါက်စေရန် အထောက်အကူပြုမည်ဖြစ်ပြီး ထိုသို့လေ့လာရာမှ ရရှိလာသည့်တွေ့ရှိမှုများကို   လက်ရှိမျိုးသုဉ်းမည့်ဘေးနှင့် ကြုံတွေ့နေရသည့်ကြံ့များအား လေ့လာရာတွင် အသုံးပြုသွားမည်ဖြစ်ကြောင်း အဆိုပါတက္ကသိုလ်ရှိ ပြန်ကြားရေးဌာနက ထုတ်ပြန်ထားသည်။

လေ့လာခဲ့သည့်ပစ္စည်းများတွင် ပလိုက်စတိုဆင်းခေတ်အတွင်း    ဆိုက်ဘေးရီးယားတောင်ပိုင်း၌ နေထိုင်ခဲ့သည့် အမွေးရှည်ကြံ့များ၏ မေးရိုးအပိုင်းအစ ငါးခုပါဝင်ပြီး သိပ္ပံပညာရှင်များက အရည်အသွေးမြင့် 3D ပုံရိပ်ဖော်စနစ်ကိုအသုံးပြု၍ လေ့လာခဲ့ကြခြင်းဖြစ်သည်။ 

ယခုလေ့လာခဲ့သည့်နမူနာများသည်  အသက် ၃ နှစ်ခွဲမှ ၅ နှစ်ဝန်းကျင်ရှိ အမွေးရှည် ကြံ့အကောင်ပေါက်လေးများ၏ မေးရိုးများဖြစ်ကြောင်း၊ အဆိုပါအသက်အရွယ်သည် ၎င်းတို့၏ ငယ်သွားများမှ အရွယ်ရောက်ပြီး ကြံ့များ၏ သွားများအဖြစ် ပြောင်းလဲသည့် အချိန်ဖြစ်ကြောင်း ဘူမိဗေဒနှင့် တွင်းထွက်ပစ္စည်းဗေဒဌာနမှ    အကြီးတန်းသုတေသီ တစ်ဦးဖြစ်သူ ဒီမီထရီမာလီကော့က ပြောကြားထားကြောင်း သိရသည်။

MWD

     ရုရှားနိုင်ငံမှ အင်ဂျင်နီယာများသည် ဒရုန်းများ  ထိန်းချုပ်မောင်းနှင်သူများကို လေ့ကျင့်သင်ကြားပေးရာတွင်  အလုံးစုံအသုံးချနိုင်မည့်  ဒရုန်းထိန်းချုပ်ရေး ဆော့ဝဲတစ်ခုကို ဖန်တီးထုတ်လုပ်လိုက်ပြီဖြစ်ကြောင်း သိရသည်။ 

မော်စကိုလေကြောင်းတက္ကသိုလ်မှ လူငယ်အင်ဂျင်နီယာ အဖွဲ့တစ်ဖွဲ့သည် မည်သည့်ဒရုန်းအမျိုးအစား နှင့်မဆို တွဲဖက်အသုံးပြုနိုင်သည့်  ဆော့ဝဲတစ်ခုကို တီထွင်ဖန်တီးလိုက်ခြင်းဖြစ်သည်။

အဆိုပါဆော့ဝဲသည် WiFi မှတစ်ဆင့် မည်သည့်ဒရုန်း အမျိုးအစားကိုမဆိုထိန်းချုပ်နိုင်သည့် အဝေးထိန်းစနစ်ပင်ဖြစ်သည်။ သာမန်လက်ကိုင်ထိန်းချုပ်စနစ်နှင့် အထူးကျွမ်းကျင်မှုများ မလိုအပ်ဘဲ ပျံသန်းမှုကို လုပ်ဆောင်နိုင်စေသောကြောင့် အော်ပရေတာများကို လေ့ကျင့်သင်ကြားပေးရာတွင်  ပိုမိုမြန်ဆန်စေမည်ဖြစ်သည်။

ထို့ကြောင့် အဆိုပါ ဒရုန်းထိန်းချုပ်ရေး ဆော့ဝဲသည်     WiFi ချိတ်ဆက်မှုကို အသုံးပြု၍ မည်သည့်ဒရုန်း အမျိုးအစားနှင့်မဆို တွဲဖက်အသုံးပြုနိုင်သည့် မိုဘိုင်းအက်ပလီကေးရှင်း တစ်ခုဖြစ်လာမည်ဖြစ်သည်။ 

MWD

NASA က ၎င်း၏ နှစ်ပေါင်း ၅၀ ကျော်ကာလအတွင်း ပထမဆုံးအကြိမ် လူလိုက်ပါသော လကမ္ဘာပတ်ခရီးစဉ် Artemis II ကို ဗုဒ္ဓဟူးနေ့ (ဧပြီ ၁) တွင် လွှတ်တင်ခဲ့သည်။

နည်းပညာဆိုင်ရာ အခက်အခဲအချို့ကြောင့် ခေတ္တနှောင့်နှေးခဲ့သော်လည်း NASA မှ အာကာသယာဉ်မှူးများဖြစ်ကြသော Reid Wiseman ၊ Victor Glover ၊ Christina Koch နှင့် ကနေဒါနိုင်ငံမှ Jeremy Hansen တို့ လိုက်ပါသွားသည့် ဒုံးပျံကို ဖလော်ရီဒါပြည်နယ်ရှိ Kennedy Space Center မှ အောင်မြင်စွာ လွှတ်တင်နိုင်ခဲ့သည်။

၁၀ ရက်ကြာမြင့်မည့် အဆိုပါခရီးစဉ်တွင် အာကာသယာဉ်မှူးများသည် လကမ္ဘာကိုပတ်ပြီးနောက် Orion အာကာသယာဉ်ဖြင့် ကမ္ဘာမြေသို့ ပြန်လည်ရောက်ရှိလာမည်ဖြစ်သည်။ ဤသည်မှာ ၁၉၇၂ ခုနှစ် Apollo 17 ခရီးစဉ်နောက်ပိုင်း ကမ္ဘာပတ်လမ်းကြောင်းနိမ့် (Low Earth orbit) ကို ကျော်လွန်၍ လူလိုက်ပါသွားသည့် ပထမဆုံးသော အာကာသခရီးစဉ်လည်း ဖြစ်သည်။

Orion အာကာသယာဉ်သည် ဧပြီလ ၆ ရက်နေ့တွင် လကမ္ဘာကို စတင်ပတ်မည်ဖြစ်သည်။ ScienceAlert ၏ အဆိုအရ ထိုခရီးစဉ်တွင်အာကာသယာဉ်မှူးများသည် ယခင် Apollo 13 က တင်ခဲ့သည့်၄၀၀,၁၇၁ ကီလိုမီတာ (၂၄၈,၆၅၅ မိုင်) အကွာအဝေးစံချိန်ကို ကျော်ဖြတ်ပြီး လူသားသမိုင်းတွင် ကမ္ဘာမြေနှင့် အဝေးဆုံးနေရာအထိ ရောက်ရှိသွားကြမည်ဖြစ်သည်။

ကိုးကား- RT

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ ဝန်ကြီး-၂

အမေရိကန်ဒုတိယသမ္မတ J.D. Vance က အမျိုးအမည်မသိယာဉ်ပျံ (UFO) များနှင့် ဂြိုဟ်သား (Aliens) ဆိုသည်မှာ အမှန်တကယ်တွင် "မိစ္ဆာများ (Demons)" သာဖြစ်ကြောင်းနှင့် ယင်းနှင့်ပတ်သက်သည့် အစိုးရ၏ လျှို့ဝှက်ဖိုင်တွဲများကို ရှာဖွေဖော်ထုတ်သွားမည်ဖြစ်ကြောင်း ထုတ်ဖော်ပြောကြားလိုက်သည်။ 

ပြီးခဲ့သည့် သောကြာနေ့ (မတ် ၂၇) က Podcaster Benny Johnson နှင့် အင်တာဗျူးရာတွင် Vance က ၎င်းအနေဖြင့် UFO ကိစ္စရပ်များကို အထူးစိတ်ဝင်စားပြီး အစိုးရ၏ အဆင့်မြင့်လျှို့ဝှက်ချက်များကို ကြည့်ရှုခွင့်ရသည့် လက်ရှိ ၃ နှစ်တာကာလအတွင်း Area 51 ကဲ့သို့သောလျှို့ဝှက်စခန်းများအထိ သွားရောက်ကာ အမှန်တရားကို စုံစမ်း ဖော်ထုတ်သွားမည်ဟု ဆိုသည်။

Vance ၏ အမြင်အရ ဂြိုဟ်သားဆိုသည်မှာ အာကာသမှလာသူများမဟုတ်ဘဲ ခရစ်ယာန်ဘာသာရေးအယူအဆအရ လူသားတို့အပေါ် ထူးဆန်းသောအပြုအမူများပြုလုပ်လေ့ရှိသည့် "ကောင်းကင်ယံမှ နတ်မိစ္ဆာသတ္တဝါများ" သာဖြစ်ကြောင်း ဖွင့်ဆိုခဲ့သည်။

ထိုအတောအတွင်း သမ္မတ Donald Trump ကလည်း အများပြည်သူ၏ စိတ်ဝင်စားမှုမြင့်တက်လာခြင်းကြောင့် UFO နှင့်ပတ်သက်သည့် အစိုးရ ဖိုင်တွဲများကို ရှာဖွေထုတ်ပြန်ရန် ဖက်ဒရယ်အေဂျင်စီများကို ညွှန်ကြားထားသည်။ ထို့ပြင် သမ္မတဟောင်း Barack Obama က ဂြိုဟ်သား များသည် "တကယ်ရှိကြောင်း" လူသိရှင်ကြားပြောဆိုခဲ့မှုအပေါ် Trump က ဝေဖန်ခဲ့ပြီး ယင်းသည် လျှို့ဝှက်သတင်းအချက်အလက်များကို မလို အပ်ဘဲ ထုတ်ဖော်ပြောဆိုခြင်းဖြစ်သည်ဟု မှတ်ချက်ပြုခဲ့သည်။

အမေရိကန်အစိုးရသည် မကြာသေးမီနှစ်များအတွင်း ပင်တဂွန် စစ်ဌာနချုပ်၏ AARO ရုံးမှတစ်ဆင့် UFO သတင်းပို့မှုများကို စုံစမ်းစစ်ဆေးမှုများ တိုးမြှင့်လုပ်ဆောင်လာခဲ့သည်။ သို့သော်လည်း ၂၀၂၄ ခုနှစ်၊ မတ်လတွင် ပင်တဂွန်က ထုတ်ပြန်ခဲ့သည့် အစီရင်ခံစာအရ ယခုအချိန်အထိ တွေ့ရှိရသည့်ဖြစ်စဉ်များသည် ဂြိုဟ်သားနည်းပညာဖြစ်ကြောင်း သက်သေအထောက်အထားမရှိသေးဘဲ အများစုမှာ မိုးလေဝသပူဖောင်းများ၊ ဂြိုဟ်တုများနှင့် ထောက်လှမ်းရေးလေယာဉ်များကဲ့သို့သော ပုံမှန်အရာဝတ္ထုများသာဖြစ်ကြောင်း သိရှိရသည်။

ကိုးကား- RT

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ ဝန်ကြီး-၂

     တရုတ်နိုင်ငံရဲ့ ရိုင်ဖယ်တပ်စက်ရုပ်ခွေး အမြောက်အမြားဟာ ဒရုန်းအုပ်စုတွေလို ဦးနှောက်တစ်ခုတည်းကို မျှဝေသုံးစွဲပြီး စုဖွဲ့တိုက်ခိုက်နိုင်တဲ့ စနစ်အသစ်ကို အသုံးပြုကာ မြို့ပြရှင်းလင်းရေး စစ်ဆင်ရေးတွေကို အောင်မြင်စွာ လုပ်ဆောင်နိုင်ခဲ့ပါတယ်။ ဝံပုလွေအုပ်စုလိုမျိုး စုပေါင်းလှုပ်ရှားနိုင်တဲ့ ဒီစက်ရုပ်ခွေးတွေဟာ ခန္ဓာကိုယ်ကြံ့ခိုင်မှုနဲ့ လုပ်ဆောင်နိုင်စွမ်းမြင့်မားအောင် တည်ဆောက်ထားပြီး ခက်ခဲတဲ့မြေပြင်အနေအထားတွေမှာပါ မြန်မြန်ဆန်ဆန်သွားလာနိုင်သလို ပစ္စည်းကိရိယာ အမြောက်အမြားကိုလည်း သယ်ဆောင်နိုင်ပါတယ်။ သူတို့ကို အသံနဲ့ဖြစ်စေ၊ လက်အိတ်နဲ့ဖြစ်စေ ထိန်းချုပ်နိုင်ပြီး တစ်နာရီကို ၁၅ ကီလိုမီတာနှုန်းအထိပြေးနိုင်ကာ အလေးချိန် ၂၅ ကီလိုဂရမ်အထိ သယ်ဆောင်နိုင်စွမ်း ရှိပါတယ်။ 

ဒီစက်ရုပ်ခွေးတွေဟာ ဒရုန်းတွေနဲ့ပါ ပူးပေါင်းပြီး ဝေဟင်နဲ့မြေပြင် ဟန်ချက်ညီ စစ်ဆင်ရေးတွေ လုပ်ဆောင်နိုင်တာကြောင့် အနာဂတ်စစ်ပွဲတွေရဲ့ပုံစံကို ပြောင်းလဲနိုင်တဲ့နည်းပညာတစ်ခု ဖြစ်လာမှာပါ။ ဒါ့အပြင်စက်ရုပ်တွေက ကိုယ်ပိုင်ဆုံးဖြတ်ချက်နဲ့ပါ တိုက်ခိုက်လာနိုင်မှာဖြစ်တယ်လို့ ပညာရှင်များက ပြောပါတယ်။

MWD