၂၀၂၅-၂၀၂၆ ဘောလုံးရာသီရဲ့ အီတလီစီးရီးအေပြိုင်ပွဲနောက်ဆုံးပွဲစဉ်တွေကို မေ ၂၅ ရက် နံနက်ပိုင်းက ယှဉ်ပြိုင်ကစားပြီးနောက် နည်းပြ ဖာဘရီဂတ်ရဲ့ ကိုမိုအသင်းဟာ အသင်းရဲ့သမိုင်းတစ်လျှောက် ပထမဆုံးအကြိမ် ချန်ပီယံလိဂ်ဝင်ခွင့်ရရှိခဲ့ပြီး အေစီမီလန်အသင်းနဲ့ ဂျူဗင်တပ်အသင်းတို့ကတော့  ချန်ပီယံလိဂ်ဝင်ခွင့်နဲ့ လွဲ‌ချော်ခဲ့ရတာဖြစ်ပါတယ်။        

ကိုမိုအသင်းဟာ   နောက်ဆုံးပွဲစဉ်မှာ ခရီမိုနိစ်အသင်းကို လေးဂိုး-တစ်ဂိုးနဲ့ အနိုင်ရရှိခဲ့ပြီး ရမှတ်ဖြင့်   အမှတ်ပေးဇယား အဆင့်(၄) နေရာမှာ ရပ်တည်နိုင်ခဲ့ကာ ချန်ပီယံလိဂ်ဝင်ခွင့်ရရှိခဲ့တာ ဖြစ်ပါတယ်။

ဂျူဗင်တပ်အသင်းကတော့ နောက်ဆုံးပွဲစဉ်မှာ တိုရီနိုအသင်းကို တစ်ဖက်နှစ်ဂိုးစီ သရေရလဒ်သာထွက်ပေါ်အောင် ကစားနိုင်ခဲ့တာကြောင့် အဆင့်(၆) နေရာမှာ ရပ်တည်နိုင်ခဲ့ကာ  ချန်ပီယံလိဂ်ဝင်ခွင့်နဲ့ လွဲခဲ့ရတာဖြစ်ပါတယ်။        

ယခုဘောလုံးရာသီ အီတလီစီးရီးအေပြိုင်ပွဲ ပြီးဆုံးချိန်မှာ အင်တာမီလန်အသင်းက ချန်ပီယံဖြစ်လာခဲ့ပြီး   အင်တာမီလန်အသင်း၊  နာပိုလီအသင်း၊   ရိုးမားအသင်းနဲ့ ကိုမိုအသင်းတို့ဟာ ချန်ပီယံလိဂ် ဝင်ခွင့်ရရှိခဲ့ပါတယ်။

အေစီမီလန်အသင်းနဲ့ ဂျူဗင်တပ်အသင်းတို့ကတော့ ယူရိုပါလိဂ်ဝင်ခွင့်ရရှိခဲ့ပြီး အတ္တလန္တာအသင်းက ကွန်းဖရန့်လိဂ်ဝင်ခွင့်ရရှိခဲ့တာဖြစ်ပါတယ်။  အမှတ်ပေးဇယား အဆင့်(၁၈)၊ အဆင့်(၁၉) နဲ့အဆင့် (၂၀)တို့မှာ ရပ်တည်နေတဲ့ ခရိုမိုနိစ်အသင်း၊ ဗီရိုနာအသင်းနဲ့ ပီဆာအသင်းတို့ကတော့ အီတလီစီးရီး အေပြိုင်ပွဲကနေ တန်းဆင်းသွားခဲ့ရတာဖြစ်ပါတယ်။      

ငွေကြယ်

MDN

လန်ဒန်    မေ   ၂၅

‌     ဆန်းဒါးလန်းအသင်းသည်    ယခုဘောလုံးရာသီ ပရီးမီးယားလိဂ်ပြိုင်ပွဲ နောက်ဆုံးပွဲစဉ်တွင် ချယ်လ်ဆီး အသင်းကိုအနိုင်ရရှိပြီးနောက် နှစ်ပေါင်း  ၅၃   နှစ် အတွင်း   ဥရောပအဆင့်ပြိုင်ပွဲဝင်ခွင့် ရရှိခဲ့ကြောင်း သိရသည်။

ဆန်းဒါးလန်းအသင်းသည်  နောက်ဆုံးပွဲစဉ်တွင် ချယ်လ်ဆီးအသင်းကို ၂ ဂိုး- ၁ ဂိုးဖြင့်  အနိုင်ရရှိပြီး နောက် ပရီးမီးယားလိဂ်ပြိုင်ပွဲတွင် အဆင့်(၇)နေရာ၌ ရပ်တည်နိုင်သည့်အတွက် လာမည့်ဘောလုံး ရာသီတွင် ဥရောပအဆင့်ပြိုင်ပွဲဖြစ်သည့်  ယူရိုပါလိဂ်ပြိုင်ပွဲ ဝင်ခွင့်ရရှိမည်ဖြစ်သည်။

ဆန်းဒါးလန်းအသင်းသည် ယခုဘောလုံးရာသီတွင် အင်္ဂလန်ချန်ပီယံရှစ်ပြိုင်ပွဲမှ  ပရီးမီးယားလိဂ်ပြိုင်ပွဲ သို့တန်းတက်လာနိုင်ပြီးနောက်  ယခုဘောလုံးရာသီ တွင် ရလဒ်ကောင်းများရရှိအောင် စွမ်းဆောင်နိုင်ကာ   ပရီးမီးယားလိဂ်ပြိုင်ပွဲတွင် ဘောလုံးတစ်ရာသီသာ ကစားပြီး   နှစ်ပေါင်းအတန်ကြာ ဝေးကွာနေသည့် ဥရောပအဆင့်ပြိုင်ပွဲဖြစ်သည့်   ယူရိုပါလိဂ်ပြိုင်ပွဲကို ဝင်ခွင့်ရရှိခဲ့ခြင်းဖြစ်သည်။

‌ဆန်းဒါးလန်းအသင်းသည်  ၁၉၇၃ ခုနှစ်က  ယူရိုပါလိဂ်ပြိုင်ပွဲ ကစားခွင့်ရရှိခဲ့ပြီး နောက်ပိုင်းနှစ်များတွင် ကစားခွင့်မရရှိဘဲ ယခုဘောလုံးရာသီမှသာ  ယူရိုပါလိဂ်ပြိုင်ပွဲဝင်ခွင့် ပြန်လည်ရရှိခဲ့ခြင်းဖြစ်သည်။

ဆန်းဒါးလန်းအသင်းကို   ရှုံးနိမ့်ခဲ့သည့်  ချယ်လ်ဆီး အသင်းသည်  အမှတ်ပေးဇယား  အဆင့်(၁၀)နေရာ၌သာ ရပ်တည်နိုင်သည့်အတွက် လာမည့်ဘောလုံး ရာသီတွင်  ဥရောပဝင်ခွင့်နှင့် လွဲချော်ခဲ့ကြောင်း  သိရသည်။ 

MWD

မန်ချက်စတာ    မေ     ၂၅

‌     မန်ယူအသင်းကွင်းလယ်ကစားသမား ဖာနန်ဒက် သည် ပရီးမီးယားလိဂ်ပြိုင်ပွဲ နောက်ဆုံးပွဲစဉ်အဖြစ် ကစားသည့် ဘရိုက်တန်အသင်းနှင့် မန်ယူအသင်းတို့ပွဲစဉ်တွင်   ဂိုးဖန်တီးမှုတစ်ကြိမ် ပြုလုပ်နိုင်ပြီးနောက် ပရီးမီးယားလိဂ်ပြိုင်ပွဲသမိုင်း တစ်လျှောက် တစ်ရာသီအတွင်း   ဂိုးဖန်တီးမှုအများဆုံး ကစားသမားအဖြစ် စံချိန်သစ်တင်နိုင်ခဲ့ကြောင်း သိရသည်။

ဖာနန်ဒက်သည် ဘရိုက်တန်အသင်းနှင့် ပွဲစဉ်တွင်ပွဲချိန်  ၃၃ မိနစ်၌ သွင်းယူနိုင်သည့် အသင်းဖော်ဒိုကူ၏ သွင်းဂိုးကို  ဂိုးဖန်တီးမှုပြုလုပ်နိုင်သကဲ့သို့ ပွဲချိန် ၄၄ မိနစ်တွင်လည်း   ကိုယ်တိုင်တစ်ဂိုး သွင်းယူနိုင်သည်အထိ အကောင်းဆုံး ခြေစွမ်းပြနိုင်ခဲ့သည်။

ဖာနန်ဒက်သည်   ယခုဘောလုံးရာသီတွင်  မန်ယူ အသင်းနှင့်အတူ အကောင်းဆုံးခြေစွမ်းပြနိုင်ပြီး မန်ယူအသင်း   ချန်ပီယံလိဂ်ပြိုင်ပွဲဝင်ခွင့် ရရှိရာတွင် အဓိက ကစားသမားအဖြစ်ပါဝင်ကာ ဘရိုက်တန် အသင်းနှင့်ပွဲစဉ်တွင် ဂိုးဖန်တီးမှု တစ်ကြိမ်ပြုလုပ်နိုင် ပြီးနောက် ယခုဘောလုံးရာသီတွင်  ဂိုးဖန်တီးမှု  ၂၁ကြိမ်အထိရှိလာခဲ့သည်။ 

ဖာနန်ဒက်သည်    ပရီးမီးယားလိဂ်ပြိုင်ပွဲသမိုင်း တစ်လျှောက်တွင်  ဘောလုံးတစ်ရာသီအတွင်း ဂိုးဖန်တီးမှုအများဆုံး ကစားသမားအဖြစ် ရပ်တည်နေသည့် အာဆင်နယ်အသင်း ကစားသမားဟောင်း အွန်နရီနှင့်မန်စီးတီးအသင်း ကစားသမားဟောင်း ဒီဘရိုင်းတို့ကိုကျော်ဖြတ်ပြီး စံချိန်သစ်တင်နိုင်ခဲ့ခြင်းဖြစ်သည်။

အစောပိုင်းက  ဘောလုံးတစ်ရာသီဂိုး ဖန်တီးမှုအများဆုံး ကစားသမားများအဖြစ် အွန်နရီက ၂၀၀၂-၂၀၀၃   ဘောလုံးရာသီ၊  ဒီဘရိုင်းက    ၂၀၁၉-၂၀၂၀   ဘောလုံးရာသီတို့တွင်  ဂိုးဖန်တီးမှုအကြိမ် ၂၀ ပြုလုပ်နိုင်ခဲ့ပြီး     ဘောလုံးတစ်ရာသီအတွင်း    ဂိုးဖန်တီးမှုအများဆုံး ကစားသမားအဖြစ်     ရပ်တည်နေခြင်းကို ယခုအခါ ဖာနန်ဒက်က တစ်ကြိမ်အသာဖြင့် ကျော်ဖြတ်နိုင်ခဲ့ခြင်းဖြစ်သည်။

ဖာနန်ဒက်သည်   ယခုဘောလုံးရာသီတွင်  မန်ယူ အသင်းနှင့်  အကောင်းဆုံး ခြေစွမ်းပြနိုင်ပြီးနောက် ဘောလုံးကလောင်ရှင် အစည်းအရုံးက ပေးအပ်သည့် တစ်နှစ်တာ အကောင်းဆုံးကစားသမားဆု၊ ပရီးမီးယားလိဂ်ပြိုင်ပွဲ၏တစ်နှစ်တာအကောင်းဆုံး ကစားသမားဆုနှင့် မန်ယူအသင်း၏ တစ်နှစ်တာ အကောင်းဆုံးကစားသမားဆု  စသည့် တစ်ဦးချင်း ဆုတံဆိပ်များကို ဆွတ်ခူးနိုင်ခဲ့ကြောင်း သိရသည်။

MWD

နေပြည်တော်     မေ    ၂၅

၂၀၂၆ ခုနှစ် တိုင်းဒေသကြီး နှင့်ပြည်နယ်  အသက်(၁၈)နှစ်အောက်(အမျိုးသား)   ဘောလုံးပြိုင်ပွဲကို ယနေ့မွန်းလွဲပိုင်းတွင် ကရင်ပြည်နယ်   ဘားအံမြို့ရှိ ဇွဲကပင်ကွင်း၊ ရှမ်းပြည်နယ် တောင်ကြီးမြို့ရှိ    ပြည်နယ်ကွင်း၊ ပဲခူးတိုင်းဒေသကြီး ပဲခူးမြို့ရှိ အားကစားဥယျာဉ်ကွင်းနှင့် ဧရာဝတီတိုင်းဒေသကြီး ပုသိမ်မြို့ရှိ  ကိုးသိန်းအားကစားကွင်းတို့၌ ဇုန်လေးဇုန်ခွဲ၍ ကျင်းပရာ အားကစားရေးရာဝန်ကြီးဌာနမှ ပြိုင်ပွဲကျင်းပရေးဆိုင်ရာ တာဝန်ရှိသူများ၊ တိုင်းဒေသကြီးနှင့် ပြည်နယ်အစိုးရအဖွဲ့မှ တာဝန်ရှိသူများ၊ ဌာနဆိုင်ရာများနှင့် အားကစားဝါသနာရှင် ပရိသတ်များ တစ်ခဲနက်လာရောက်ကြည့်ရှု အားပေးကြသည်။

ယနေ့ ဘောလုံးပြိုင်ပွဲ ပွဲစဉ်များအဖြစ် မွန်းလွဲ ၃ နာရီမှစတင်၍  ကရင်ပြည်နယ် ဘားအံမြို့ ဇွဲကပင်အားကစားကွင်း၌ စစ်ကိုင်းတိုင်းဒေသကြီးအသင်းနှင့် ရခိုင်ပြည်နယ်အသင်းတို့ ယှဉ်ပြိုင်ကစားခဲ့ရာ တစ်ဖက်တစ်ဂိုးစီ သရေရလဒ်ဖြင့်လည်းကောင်း၊ ပဲခူးတိုင်းဒေသကြီး ပဲခူးမြို့အားကစားဥယျာဉ်ကွင်းတွင် ချင်းပြည်နယ်အသင်းနှင့် မကွေးတိုင်းဒေသကြီးအသင်းတို့  ယှဉ်ပြိုင်ကစားခဲ့ရာ ချင်းပြည်နယ်အသင်းက မကွေးတိုင်းဒေသကြီးအသင်းကို သုံးဂိုး- ဂိုးမရှိဖြင့်လည်းကောင်း၊ ရှမ်းပြည်နယ်   တောင်ကြီးမြို့ရှိ ပြည်နယ်အားကစားကွင်းတွင် မွန်ပြည်နယ်အသင်းနှင့် တနင်္သာရီတိုင်းဒေသကြီးအသင်းတို့ ယှဉ်ပြိုင်ကစားခဲ့ရာ မွန်ပြည်နယ်အသင်းက တနင်္သာရီတိုင်းဒေသကြီးအသင်းကို   နှစ်ဂိုး-တစ်ဂိုးဖြင့် လည်းကောင်း၊ ဧရာဝတီတိုင်းဒေသကြီး ပုသိမ်မြို့ ကိုးသိန်းအားကစားကွင်းတွင် ဧရာဝတီတိုင်းဒေသကြီးအသင်းနှင့်  မန္တလေးတိုင်းဒေသကြီးအသင်းတို့ ယှဉ်ပြိုင်ကစားခဲ့ရာ ဧရာဝတီတိုင်းဒေသကြီးအသင်းက မန္တလေးတိုင်းဒေသကြီးအသင်းကို  နှစ်ဂိုး-တစ်ဂိုးဖြင့် လည်းကောင်း ယှဉ်ပြိုင်အနိုင်ရရှိခဲ့ကြောင်း သိရသည်။

သတင်းစဉ်

MDN

ရန်ကုန်   မေ   ၂၅

၂၀၂၆-၂၀၂၇  ရာသီ  MNL ယူ-၂၀ လူငယ်လိဂ်ပြိုင်ပွဲ ပွဲစဉ်(၁) နောက်ဆုံးနေ့ကို မေ ၂၅ ရက်က ဆက်လက်ကျင်းပရာ သစ္စာအားမာန်အသင်းနှင့် စစ်ကိုင်းယူနိုက်တက်အသင်းတို့ နိုင်ပွဲရရှိသည်။

YUSC ကွင်း၌ ကျင်းပသည့်ပွဲတွင် သစ္စာအားမာန်အသင်းက ဟံသာဝတီယူနိုက်တက်အသင်းကို တစ်ဂိုး-ဂိုးမရှိဖြင့် အနိုင်ရရှိသည်။ သစ္စာအားမာန်အသင်းသည် ဒုတိယပိုင်းတွင် သွင်းယူသည့်ဂိုးဖြင့် အဖွင့်ပွဲတွင် အမှတ်ပြည့်ရယူနိုင်ခဲ့ပြီး ဟံသာဝတီယူနိုက်တက်အသင်းမှာမူ ရှုံးပွဲနှင့် စတင်ခဲ့သည်။ သစ္စာအားမာန်အသင်းအတွက် အနိုင်ဂိုးကို မိနစ် ၆၀ တွင် ဟိန်းလင်းဇော်က သွင်းယူသည်။

တောင်ဒဂုံကွင်း၌ ကျင်းပသည့်ပွဲတွင် စစ်ကိုင်းယူနိုက်တက်အသင်းက ရန်ကုန်စီးတီးအသင်းကို သုံးဂိုး-တစ်ဂိုးဖြင့် အနိုင်ရရှိသည်။ ရန်ကုန်စီးတီးအသင်းသည် ဦးဆောင်ဂိုး သွင်းယူနိုင်သော်လည်း အနိုင်ရလဒ်မထိန်းနိုင်သဖြင့် အရေးနိမ့်ခဲ့ခြင်းဖြစ်သည်။ စစ်ကိုင်းယူနိုက်တက်အသင်းမှာမူ  နောက်မှလိုက်ကစားကာ အမှတ်ပြည့်ရယူခဲ့ခြင်းဖြစ်သည်။ ရှစ်မိနစ်တွင် ကျော်မင်းမောင်က ရန်ကုန်စီးတီးအသင်းအတွက် ဂိုးစတင်သွင်းယူသော်လည်း စစ်ကိုင်းယူနိုက်တက်အသင်းအတွက် ချေပဂိုးကို ၂၄ မိနစ်တွင် ကျော်မင်းစိုး၊ အနိုင်ဂိုးများကို ၄၂ မိနစ်နှင့် ၇၁ မိနစ်တွင် မျိုးသူလွင်က သွင်းယူသည်။

ပွဲစဉ်(၁)အပြီးတွင် အား/ကာသိပ္ပံ၊ စစ်ကိုင်းယူနိုက်တက်၊ သစ္စာအားမာန်၊ Falcon၊ မြဝတီနှင့် Galaxy အသင်းတို့ နိုင်ပွဲရရှိထားသည်။

သတင်း-ညီမြတ်သော်တာ

ဓာတ်ပုံ-MNL

MDN

မြန်မာနိုင်ငံဆိုင်ရာ အိန္ဒိယနိုင်ငံသံအမတ်ကြီး H.E. Mr. Abhay Thakur

“ကျန်းမာသုခ၊ ဉာဏ်ပညာနှင့် ကမ္ဘာ့ငြိမ်းချမ်းရေး အတွက် ယောဂ” (Yoga for Wellness, Wisdom, and World Peace) ဆောင်ပုဒ်ဖြင့် ၂၀၂၆ ခုနှစ် (၁၂) ကြိမ်မြောက် အပြည်ပြည်ဆိုင်ရာ ယောဂနေ့ အထိမ်းအမှတ် ယောဂ သရုပ်ပြ စုပေါင်းလေ့ကျင့်ခြင်း အခမ်းအနားကို မေ ၂၄ ရက် နံနက်ပိုင်းတွင် ပြည်ထောင်စုနယ်မြေ နေပြည်တော် ဒက္ခိဏသီရိ မြို့နယ်ရှိ မာရဝိဇယဗုဒ္ဓ ရုပ်ပွားတော်မြတ်ကြီး ဥယျာဉ်တော် အတွင်း ရေပန်းရင်ပြင်၌ ကျင်းပသည်။

“အပြည်ပြည်ဆိုင်ရာ ယောဂနေ့ အထိမ်းအမှတ် အစီအစဉ်ထဲမှာ တစ်ခုအပါအဝင်အဖြစ် ယောဂ သရုပ်ပြလေ့ကျင့်ခြင်း အစီအစဉ်ကို နေပြည်တော်ရဲ့ အထင်ကရ နေရာဖြစ်တဲ့ မာရဝိဇယဗုဒ္ဓ ရုပ်ပွားတော်မြတ်ကြီး ပရိဝုဏ်မှာ ဒီနေ့ အိန္ဒိယသံရုံးနဲ့ မြန်မာနိုင်ငံ အစိုးရတို့ အတူတကွကျင်းပခွင့် ရတဲ့အတွက် ကျွန်တော့်အနေနဲ့ အထူးဝမ်းမြောက် ဂုဏ်ယူမိပါတယ်”ဟု မြန်မာနိုင်ငံဆိုင်ရာ အိန္ဒိယ နိုင်ငံသံအမတ်ကြီး H.E. Mr. Abhay Thakur က ပြောကြားသည်။

၂၀၁၄ ခုနှစ် ဒီဇင်ဘာလတွင် ကျင်းပခဲ့သည့် ကုလသမဂ္ဂ အထွေထွေညီလာခံ၌ အဖွဲ့ဝင် ၁၉၃ နိုင်ငံက အဆိုထောက်ခံခဲ့ပြီး နိုင်ငံပေါင်း ၁၇၇ နိုင်ငံက ပူးပေါင်း ဆောင်ရွက်မည်ဟု ကတိပြုခဲ့သည့် အတွက် အပြည်ပြည်ဆိုင်ရာ ယောဂနေ့ဖြစ်ပေါ်လာခဲ့ခြင်းဖြစ်သည်။

“မြန်မာနိုင်ငံအစိုးရနဲ့ နီးကပ်စွာ ပူးပေါင်း ဆောင်ရွက်လျက်ရှိပါတယ်။ ဒီနေ့ကျင်းပတဲ့ အခမ်း အနားကို အထူးဧည့်သည်တော်အဖြစ် တက်ရောက်ပေးတဲ့ ဒုတိယ သမ္မတ ဦးညိုစော၊ နိုင်ငံခြားရေးဝန်ကြီးဌာန၊ သာသနာရေးဝန်ကြီးဌာန၊ ဟိုတယ်၊ ခရီးသွားလာရေးနှင့် ယဉ်ကျေးမှုဝန်ကြီးဌာန တို့က ပြည်ထောင်စုဝန်ကြီးတွေ၊ ဒုတိယဝန်ကြီးတွေ၊ တာဝန်ရှိသူတွေ၊ ယောဂ ဝါသနာရှင်တွေကို  ကျွန်တော့်အနေနဲ့ အထူးကျေးဇူး တင်ရှိပါကြောင်း ပြောကြားလိုပါ တယ်” ဟု အိန္ဒိယနိုင်ငံ သံအမတ်ကြီးက ပြောကြားသည်။

“ယောဂရဲ့ အထူးထင်ရှားတဲ့ အချက်ကတော့ ဟိန္ဒီ (Hindi) လို ယိုး(ဂ်)လို့သုံးပြီး အင်္ဂလိပ်လို ယောဂလို့ အသံထွက်ပါတယ်။ ဒီနေရာမှာ ကျွန်တော့်အနေနဲ့ ယိုး(ဂ်)လို့ အသံထွက်ပါမယ်။ သူရဲ့ အဓိပ္ပာယ်က စုစည်းညီညွတ်မှု ဖြစ်ပါတယ်။ ယောဂဟာ ကာယ လေ့ကျင့်ခန်းတစ်ခုထက် များစွာ ပိုမိုပါတယ်။ ယောဂဟာ ရုပ်ပိုင်း ဆိုင်ရာနဲ့ စိတ်ပိုင်းဆိုင်ရာအကြား ဟန်ချက်ညီမှု၊ အတွေးအခေါ်နဲ့ အပြုအမူတို့မှာ စည်းကမ်းရှိမှု၊ တစ်ဦး တစ်ယောက်ချင်းစီနဲ့ လူ့အဖွဲ့အစည်းအကြား သဟဇာတ ဖြစ်မှုကို ကိုယ်စားပြုပါတယ်။ ဒီနေ့ကျင်းပတဲ့ အပြည်ပြည် ဆိုင်ရာယောဂနေ့မှာ အတူတကွ ဆင်နွှဲကျရင်း ကျွန်တော်တို့ရဲ့ လူ့အဖွဲ့အစည်းကြားမှာ ဟန်ချက် ညီမှု၊ ကရုဏာတရားနဲ့ အတူယှဉ်တွဲ နေထိုင်ခြင်းတို့ကို ထပ်လောင်း အတည်ပြုရင်း ယောဂရဲ့ စိတ်ဓာတ် ဖြစ်တဲ့ လူသားတွေအကြား ညီညွတ်မှု၊ စည်းလုံးမှုနဲ့ နိုင်ငံအချင်းချင်း ချစ်ကြည်ရင်းနှီးမှုတွေကို ဆက်လက်လှုံ့ဆော်ပေးနိုင်ပါစေကြောင်း ဆုမွန်ကောင်းတောင်း အပ်ပါတယ်” ဟု ၎င်းက ဆက်လက် ပြောကြားသည်။

သတင်းစဉ်

MDN

ရီယက်   မေ  ၂၄

     အယ်နာဆာအသင်း       တိုက်စစ်ကစားသမား ဂျာအိုဖီးလစ်သည်  အသင်းဖော်  စီရော်နယ်ဒိုကို ကျော်ဖြတ်ပြီး   ယခုဘောလုံးရာသီ ဆော်ဒီပရိုလိဂ် ပြိုင်ပွဲ၏ တစ်နှစ်တာ အကောင်းဆုံး ကစားသမားဆုကို ဆွတ်ခူးနိုင်ခဲ့ကြောင်း သိရသည်။

ဂျာအိုဖီးလစ်သည် ပြီးခဲ့သည့်  နွေရာသီကစားသမား အပြောင်းအရွှေ့ကာလက ချယ်လ်ဆီးအသင်း မှ ပြောင်းရွှေ့ကြေးယူရို သန်း ၃၀ ဖြင့်   အယ်နာဆာ အသင်းသို့ ပြောင်းရွှေ့ကစားခဲ့ပြီး အသင်းနှင့်အတူ ပထမဆုံး ဘောလုံးရာသီတွင်ပင် အကောင်းဆုံး ခြေစွမ်းပြနိုင်ကာ  ဆော်ဒီပရိုလိဂ်တစ်နှစ်တာ အကောင်းဆုံး ကစားသမားဆုကို ဆွတ်ခူးနိုင်ခဲ့ခြင်း ဖြစ်သည်။

အသက် ၂၆ နှစ်အရွယ် ဂျာအိုဖီးလစ်သည် အယ်နာဆာအသင်းနှင့်အတူ ဆော်ဒီပရိုလိဂ်ပြိုင်ပွဲတွင် ၃၃ ပွဲကစားရာ သွင်းဂိုး ၂၀ သွင်းယူနိုင်သည့်အပြင် ဂိုးဖန်တီးမှုလည်း ၁၃  ကြိမ်ပြုလုပ်နိုင်ကာ ဂိုးပါဝင် ပတ်သက်မှု  ၃၃ ကြိမ်အထိ လုပ်ဆောင်နိုင်ပြီး  ဂိုးဖန်တီးမှုအများဆုံး ကစားသမားစာရင်းတွင် ထိပ်ဆုံး မှ ဦးဆောင်နိုင်ခဲ့သည်။

ဂျာအိုဖီးလစ်သည်  အသင်းနှင့် အကောင်းဆုံး ခြေစွမ်းပြနိုင်ပြီးနောက်    အသင်းဖော်   စီရော်နယ်ဒို နှင့်အယ်အာလီအသင်းမှ အိုင်ဗန်တိုနေးတို့ကို ကျော်ဖြတ်ပြီး တစ်နှစ်တာ အကောင်းဆုံး ကစားသမားဆုကို ဆွတ်ခူးနိုင်ခဲ့ခြင်းဖြစ်သည်။  ဆော်ဒီပရိုလိဂ် ပြိုင်ပွဲ၏ တစ်နှစ်တာ အကောင်းဆုံးနည်းပြဆုကိုလည်း အယ်နာဆာအသင်းကို   ချန်ပီယံဆုဆွတ်ခူး ပေးနိုင်သည့်   နည်းပြ ဂျီးဆပ်က ဆွတ်ခူးရရှိခဲ့ကြောင်း သိရသည်။ 

MWD

ဘာလင်   မေ  ၂၄

     ယခုဘောလုံးရာသီ  ဂျာမန်ပိုကယ်ဖလားပြိုင်ပွဲ ဗိုလ်လုပွဲတွင် ဘိုင်ယန်မြူးနစ်အသင်းက စတုဂတ် အသင်းကို ၃ ဂိုး- ဂိုးမရှိဖြင့် အနိုင်ရရှိပြီး ချန်ပီယံဆုဖလားဆွတ်ခူးနိုင်ခဲ့ကြောင်း သိရသည်။

အဆိုပါပွဲစဉ်တွင်  ဘိုင်ယန်မြူးနစ်အသင်းက စတုဂတ်အသင်းကို အကောင်းဆုံး ဖိအားပေးကစား နိုင်ကာ ပွဲချိန် ၅၅ မိနစ်၊   ပွဲချိန် မိနစ် ၈၀  နှင့် ပွဲချိန် ၉၂ မိနစ်တို့တွင် ဟယ်ရီကိန်း တစ်ဦးတည်းက ဘိုင်ယန် မြူးနစ်အသင်းအတွက်   သွင်းဂိုးများသွင်းယူနိုင်ပြီး နောက် ချန်ပီယံဆုဖလား ဆွတ်ခူးနိုင်ခဲ့ခြင်းဖြစ်သည်။

ဘိုင်ယန်မြူးနစ်အသင်းသည်  ယခုဘောလုံး ရာသီတွင် ဂျာမန်ဘွန်ဒက်လီဂါပြိုင်ပွဲတွင်လည်း ချန်ပီယံဆုဖလား ဆွတ်ခူးနိုင်သကဲ့သို့   ဂျာမန်စူပါ ဖလားပြိုင်ပွဲတွင်လည်း ချန်ပီယံဆုဖလားဆွတ်ခူး နိုင်ခဲ့ကာ ယခုအခါတွင်လည်း ဂျာမန်ပိုကယ်ဖလားကိုပါ ဆွတ်ခူးနိုင်သည့်အတွက်  တစ်ရာသီအတွင်း ပြည်တွင်းဆုဖလား သုံးလုံးစလုံးဆွတ်ခူးနိုင်ခြင်းဖြစ် ပြီး ချန်ပီယံလိဂ်ပြိုင်ပွဲတွင်လည်း ဆီမီးဖိုင်နယ် အဆင့်အထိတက်ရောက်နိုင်ခဲ့သော်လည်း  ပီအက်စ်ဂျီ အသင်းကိုရှုံးနိမ့်သည့်အတွက် ဆီမီးဖိုင်နယ်အဆင့် ဖြင့်သာ ကျေနပ်ခဲ့ရသည်။

ဘိုင်ယန်မြူးနစ်အသင်းသည် ဂျာမန်ပိုကယ်ဖလား ပြိုင်ပွဲတွင် ၂၀၁၉-၂၀၂၀  ဘောလုံးရာသီက နောက်ဆုံး အကြိမ် ချန်ပီယံဆုဆွတ်ခူးနိုင်ခဲ့ခြင်းဖြစ်ပြီး ယခု ဘောလုံးရာသီမှသာ   ပြန်လည်ဆွတ်ခူးနိုင်ကာ  ၂၁ ကြိမ်မြောက်အဖြစ် ဆွတ်ခူးနိုင်ခဲ့ခြင်းဖြစ်သည်။

ဘိုင်ယန်မြူးနစ်အသင်းသည် ဂျာမန်ပိုကယ်ဖလား ပြိုင်ပွဲတွင် ဗိုလ်လုပွဲအဆင့်သို့ ၂၅ ကြိမ်မြောက်တက် ရောက်နိုင်ခဲ့ကာ   ၂၁  ကြိမ်ချန်ပီယံဆုဆွတ်ခူးပြီး လေးကြိမ်ဒုတိယဆုရရှိခဲ့ကာ  ပြိုင်ပွဲတွင် အအောင် မြင်ဆုံးအသင်းအဖြစ် ရပ်တည်လျက်ရှိသည်။

ဂျာမန်ပိုကယ်ဖလားပြိုင်ပွဲတွင် သွင်းဂိုး ၁၀  ဂိုး ဖြင့် သွင်းဂိုးအများဆုံး ကစားသမားဆုအပြင် ပြိုင်ပွဲ ၏ အကောင်းဆုံး ကစားသမားဆုကိုပါ ဆွတ်ခူးနိုင်ခဲ့ သည့်ဟယ်ရီကိန်းသည် ယခုဘောလုံး ရာသီတွင် နိုင်ငံအသင်းနှင့် ကလပ်အသင်း သွင်းဂိုး ၆၆  ဂိုးအထိ ရှိလာပြီး   ဥရောပထိပ်တန်း လိဂ်များတွင်  သွင်းဂိုး အများဆုံးကစားသမားအဖြစ်  ရပ်တည်နေကြောင်း သိရသည်။               

MWD

ကျောင်းကုန်း မေ ၂၄

ဧရာဝတီတိုင်းဒေသကြီး ကျောင်းကုန်းမြို့နယ် မီတာ ၄၀၀ မြို့မအားကစားကွင်းအတွင်း၌ Pilot Project အစီအစဉ်အရ ဖွင့်လှစ်သင်ကြားလျက်ရှိသည့် Football for School ၊ Smart-School အားကစားသင်တန်းသားများအား မေ ၂၂ ရက်က သာဂူတိုက်ကျွေးခဲ့သည်။

အားကစားရေးရာဝန်ကြီးဌာနပြည်ထောင်စုဝန်ကြီး ဦးရဲမြင့်ထွန်းနှင့် ဧရာဝတီတိုင်းဒေသကြီး လွှတ်တော်ဥက္ကဋ္ဌ ဦးသိန်းထွန်းတို့ ထောက်ပံ့ပေးအပ်သည့် ငွေကျပ် ငါးသိန်းဖြင့် သင်တန်းသားများအား နို့ဆန်ပြုတ်နှင့် သာဂူများ ကျွေးမွေးလှူဒါန်းခဲ့ကြောင်း သိရသည်။

ဝင်းကြိုင်(ပြန်/ဆက်)

MDN