ရန်ကုန်   ဧပြီ   ၈

မြန်မာနေရှင်နယ်လိဂ်ကလပ် ရတနာပုံအသင်းသည် ရာသီသစ်အတွက် ကစားသမားများ စတင်ခေါ်ယူနေပြီး ပထမဆုံးခေါ်ယူမှုအဖြစ် လက်ရွေးစင်ဟောင်း တိုက်စစ်ကစားသမား ဆွမ်လမန်ကို ခေါ်ယူလိုက်ပြီဖြစ်သည်။

ဆွမ်လမန်သည် မြန်မာ့လက်ရွေးစင် ကစားသမားအဖြစ် ကာလအတန်ကြာ  ပါဝင်ကစားခဲ့သလို  ပြည်တွင်း၊  ပြည်ပကလပ်အသင်းများစွာတွင် ကစားခဲ့သည့် အတွေ့အကြုံရှိ ကစားသမားတစ်ဦး ဖြစ်သည်။ ဆွမ်လမန်သည် MNL ကလပ်များဖြစ်သည့် ချင်းယူနိုက်တက်၊ ဇွဲကပင်ယူနိုက်တက်၊ ရန်ကုန်ယူနိုက်တက်၊ ရှမ်းယူနိုက်တက်၊ ဒဂုံစတားယူနိုက်တက်အသင်းတို့အပြင် ထိုင်းကလပ်အသင်းများတွင်လည်း   ကစားခဲ့သူဖြစ်ကာ   ဒဂုံစတားယူနိုက်တက်အသင်းတွင် နောက်ဆုံးကစားခဲ့ခြင်းဖြစ်သည်။

ရတနာပုံအသင်းသည် နည်းပြချုပ်အဖြစ် ဦးမင်းထွန်းလင်းအား ခန့်အပ်ခဲ့ပြီးနောက် ၎င်းနှင့်လက်တွဲခဲ့ဖူးသည့် တိုက်စစ်ကစားသမား ဆွမ်လမန်ကို  စတင်ခေါ်ယူခဲ့ခြင်းဖြစ်သည်။

သတင်း - ရှိုင်းထက်ဇော်

MDN

ဧပြီ ၈ ရက် နံနက်ပိုင်းက   ယှဉ်ပြိုင်ကစားခဲ့တဲ့ ချန်ပီယံလိဂ်ကွာတားဖိုင်နယ်အဆင့် ပထမအကျော့ပွဲစဉ်တွေမှာ အာဆင်နယ်အသင်းနဲ့ ဘိုင်ယန်မြူးနစ်အသင်းတို့ဟာ ပြိုင်ဘက်အသင်းတွေကို အသီးသီးအနိုင်ရရှိခဲ့ပါတယ်။

အာဆင်နယ်အသင်းဟာ  စပို့တင်းအသင်းနဲ့ ယှဉ်ပြိုင်ကစားခဲ့ရကာ သာမန်ပွဲကစားချိန်အတွင်း  ဘယ်အသင်းကမှ ဂိုးမသွင်းနိုင်ခဲ့ဘဲ   မိနစ်  ၉၀   ပြည့်ပြီး နာကျင်အချိန်ပို  တစ်မိနစ်မှာ  ရရှိခဲ့တဲ့ ကိုင်ဟာဗက်ဇ်ရဲ့ တစ်လုံးတည်းသော သွင်းဂိုးနဲ့ အာဆင်နယ်အသင်းက အနိုင်ရရှိခဲ့တာဖြစ်ပါတယ်။   စပို့တင်းအသင်းဟာ အာဆင်နယ်အသင်းကို ရှုံးနိမ့်ခဲ့တာကြောင့် အိမ်ကွင်း နောက်ဆုံး  ၁၇  ပွဲဆက်  နိုင်ပွဲရရှိခဲ့တဲ့  စံချိန်လည်း ရပ်တန့်ခဲ့ပြီဖြစ်ပါတယ်။ အာဆင်နယ်အသင်းဟာ လာမယ့်ပွဲစဉ်မှာ ဘုန်းမောက်အသင်းနဲ့ ပရီမီယာလိဂ်ယှဉ်ပြိုင်ကစားရမှာဖြစ်ပြီး စပို့တင်းအသင်းက  အာမာဒိုရာအသင်းနဲ့ ယှဉ်ပြိုင်ကစားရမှာဖြစ်ပါတယ်။

ဘိုင်ယန်မြူးနစ်အသင်းကတော့  ချန်ပီယံလိဂ်ဘုရင်လို့ တင်စားခေါ်ဝေါ်ကြတဲ့ ရီးယဲလ်မက်ဒရစ်အသင်းကို နှစ်ဂိုး-တစ်ဂိုးနဲ့ အနိုင်ရရှိခဲ့တာဖြစ်ပါတယ်။

အဲဒီပွဲစဉ်မှာ ဘိုင်ယန်မြူးနစ်အသင်းအတွက် သွင်းဂိုးတွေကို ပထမပိုင်းပွဲကစားချိန် ၄၁ မိနစ်မှာ ဒီယက်ဇ်ကတစ်ဂိုး၊ ဒုတိယပိုင်း ၄၆ မိနစ်မှာ ဟယ်ရီကိန်းကတစ်ဂိုးသွင်းယူပေးခဲ့ပြီး ရီးယဲလ်မက်ဒရစ်အသင်းအတွက် ချေပဂိုးတစ်ဂိုးကိုတော့ ပွဲကစားချိန် ၇၄ မိနစ်မှာ အမ်ဘတ်ပီက သွင်းယူပေးခဲ့တာဖြစ်ပါတယ်။                                               

ငွေကြယ်

MDN

ရန်ကုန်     ဧပြီ    ၆

မြန်မာနေရှင်နယ်လိဂ်ကလပ် ရတနာပုံအသင်းသည် လာမည့်ရာသီအတွက် အပြောင်းအလဲများစွာ ပြုလုပ်မည်ဖြစ်ပြီး နည်းပြချုပ်သစ် စတင်ခေါ်ယူခန့်အပ်ခဲ့သည်။

ရတနာပုံအသင်းသည် အသင်းပိုင်ရှင်သစ်ပြောင်းလဲထားပြီး ရာသီသစ်အတွက် ပထမဆုံးခေါ်ယူမှု အဖြစ် နည်းပြချုပ်သစ် စတင်ခေါ်ယူခြင်းဖြစ်သည်။ ရတနာပုံအသင်းသည် မြန်မာနေရှင်နယ်လိဂ်  အတွေ့အကြုံရှိသည့် ဦးမင်းထွန်းလင်းကို နည်းပြချုပ်အဖြစ် ခေါ်ယူခန့်အပ်ခဲ့ပြီး ပြည်တွင်း၊ ပြည်ပ ကစားသမားသစ်များ ဆက်လက်ခေါ်ယူမည်ဖြစ်သည်။ ဦးမင်းထွန်းလင်းသည် မြန်မာနေရှင်နယ်လိဂ်ကလပ်အသင်းများဖြစ်သည့် ချင်းယူနိုက်တက်၊ ဇွဲကပင်ယူနိုက်တက်၊ ရန်ကုန်ယူနိုက်တက်၊ ဒဂုံစတားယူနိုက်တက်၊   ရခိုင်ယူနိုက်တက်အသင်းတို့ကို ကိုင်တွယ်ခဲ့သူဖြစ်သည်။

ချန်ပီယံဆုရယူနိုင်ခဲ့

ရတနာပုံအသင်းသည် မြန်မာနေရှင်နယ် လိဂ်စတင်ကတည်းက တည်ထောင်ခဲ့သည့် အသင်းဖြစ်ပြီး ပြည်တွင်း၊ ပြည်ပပြိုင်ပွဲများတွင် အောင်မြင်မှုများ ရယူနိုင်ခဲ့သော်လည်း ၂၀၁၆ ရာသီ MNL ပြိုင်ပွဲတွင် ချန်ပီယံဆုရယူပြီးနောက်ပိုင်း အောင်မြင်မှုနှင့် ဝေးကွာနေခြင်းဖြစ်သည်။ ရတနာပုံ အသင်းသည် MNL အမှတ်ပေးချန်ပီယံဆု  လေးကြိမ်ရထားပြီး ပြည်ပအောင်မြင်မှုအဖြစ် AFC President's Cup  ပြိုင်ပွဲတွင် ၂၀၁၁ ခုနှစ်၌ ချန်ပီယံဆု ရယူနိုင်ခဲ့သည်။    

သတင်း - ရှိုင်းထက်ဇော်

ဓာတ်ပုံ - YDNB FC

MDN

အက်ဖ်အေဖလားပြိုင်ပွဲ  ကွာတားဖိုင်နယ်ပွဲစဉ်များ  ယှဉ်ပြိုင်ကစားပြီးနောက်  ဆီမီးဖိုင်နယ်ပွဲစဉ်များကို  မဲခွဲထုတ်ပြန်လိုက်ပြီဖြစ်ရာ နှစ်ပေါင်း ၃၉ နှစ်အတွင်း ဆီမီးဖိုင်နယ်သို့  ပထမဆုံးအကြိမ်   တက်လှမ်းနိုင်ခဲ့သည့် လိဒ်စ်အသင်းက အသင်းကြီး ချယ်ဆီးအသင်းနှင့် တွေ့ဆုံ နေသည်။ 

ဒန်နီရယ်ဖာကီ၏ လိဒ်စ်အသင်းသည် အက်ဖ်အေဖလားပြိုင်ပွဲ ကွာတားဖိုင်နယ်တွင် ဝက်စ်ဟမ်းအသင်းကို အကြိတ်အနယ်ယှဉ်ပြိုင်ကစားပြီး ပယ်နယ်တီအဆုံးအဖြတ်တွင်  လေးဂိုး-နှစ်ဂိုးဖြင့် နိုင်ပွဲရရှိကာ ဆီမီးဖိုင်နယ်သို့ တက်လှမ်းလာသည့် အသင်းဖြစ်သည်။

ထို့အပြင် လိဒ်စ်အသင်းသည် ဆီမီးဖိုင်နယ်သို့ တက်လှမ်းနိုင်ခြင်းမှာ ၁၉၈၇ ခုနှစ်နောက်ပိုင်း ပထမဆုံးအကြိမ်ဖြစ်သည်။ ယမန်နှစ်က အက်ဖ်အေဖလားပြိုင်ပွဲ ဗိုလ်လုပွဲသို့ တက်လှမ်းနိုင်ခဲ့သည့်  နည်းပြ ဂွါဒီယိုလာ၏ မန်စီးတီးအသင်းက ဆောက်သမ်တန်အသင်းနှင့် တွေ့ဆုံနေသည်။   ၁၉၇၆ ခုနှစ်က အက်ဖ်အေဖလား ဆွတ်ခူးထားနိုင်သော ဆောက်သမ်တန်အသင်းသည် ကွာတားဖိုင်နယ်တွင် နာမည်ကြီး အာဆင်နယ်အသင်းကို  ချားလိစ်၏  နောက်ကျသွင်းဂိုးကြောင့်  နှစ်ဂိုး-တစ်ဂိုးဖြင့်  နိုင်ပွဲရရှိပြီး  ဆီမီးဖိုင်နယ်သို့ တက်လှမ်းလာသည့်အသင်းဖြစ်သည်။

ဆောက်သမ်တန်အသင်းသည် ၁၉၈၇ ခုနှစ်က အက်ဖ်အေဖလားပြိုင်ပွဲ ဆီမီးဖိုင်နယ်သို့ နောက်ဆုံးတက်လှမ်းထားနိုင်သည့် အသင်းဖြစ်သည်။ ယခုနှစ် အက်ဖ်အေဖလားပြိုင်ပွဲ ဆီမီးဖိုင်နယ်ပွဲစဉ်များကို လာမည့်  ဧပြီ ၂၅  ရက်နှင့် ၂၆ ရက်တွင် ယှဉ်ပြိုင်ကစားသွားမည်ဖြစ်သည်။

အောင်ဇော်

MDN

နေပြည်တော်    ဧပြီ    ၆

၂၀၂၆ အာဆီယံ ဖူဆယ်ချန်ပီယံရှစ်ပြိုင်ပွဲ အုပ်စုပထမနေ့ကို ဧပြီ ၆ ရက်က ထိုင်းနိုင်ငံ၌ စတင်ကျင်းပရာ မြန်မာအသင်း  ရှုံးပွဲကြုံတွေ့ခဲ့သည်။

မြန်မာအသင်းသည် အုပ်စုပထမပွဲအဖြစ် နာမည်ကြီး ဗီယက်နမ်အသင်းနှင့်တွေ့ဆုံရာ လေးဂိုးပြတ် အရေးနိမ့်ခဲ့သည်။ မြန်မာအသင်းသည် ပထမပိုင်းတွင် တစ်ဂိုးသာပေးခဲ့ရသော်လည်း ဒုတိယပိုင်းတွင် သုံးဂိုးထပ်ပေးရကာ ဂိုးပြတ်အရေးနိမ့်ခဲ့ခြင်းဖြစ်သည်။ လူငယ်ကစားသမားများဖြင့် ပြန်လည်တည်ဆောက်နေသည့် မြန်မာ့လက်ရွေးစင် ဖူဆယ်အသင်းသည် အာဆီယံထိပ်သီး အသင်းများနှင့် ယှဉ်ပြိုင်ရာတွင် လိုအပ်ချက်များရှိနေဆဲဖြစ်သည်။

ပြိုင်ပွဲကို အုပ်စုနှစ်ခုခွဲ၍ ကျင်းပလျက်ရှိပြီး အုပ်စု (B) ပွဲစဉ်များတွင် အင်ဒိုနီးရှားအသင်းက ဘရူနိုင်းအသင်းကို ခုနစ်ဂိုးပြတ်၊ သြစတြေးလျအသင်းက မလေးရှားအသင်းကို နှစ်ဂိုး-တစ်ဂိုးဖြင့် အနိုင်ရခဲ့သည်။ အုပ်စုဒုတိယနေ့ကို ဧပြီ ၇ ရက်တွင် ဆက်လက်ကျင်းပမည်ဖြစ်ပြီး မြန်မာစံတော်ချိန် မွန်းတည့် ၁၂ နာရီတွင် ဘရူနိုင်းအသင်းနှင့် သြစတြေးလျအသင်း၊ မြန်မာစံတော်ချိန် မွန်းလွဲ ၂ နာရီခွဲတွင် မလေးရှားအသင်းနှင့် အင်ဒိုနီးရှားအသင်း၊ မြန်မာစံတော်ချိန် ညနေ ၅ နာရီခွဲတွင် ဗီယက်နမ်အသင်းနှင့် တီမောအသင်း၊ မြန်မာစံတော်ချိန် ည ၇ နာရီခွဲတွင် မြန်မာအသင်းနှင့် ထိုင်းအသင်းတို့ ယှဉ်ပြိုင်ကစားမည်ဖြစ်သည်။                                

ကိုညီလေး

MDN

လန်ဒန်     ဧပြီ    ၆

     ချယ်လ်ဆီးအသင်းက  အသင်းနှင့်  အနာဂတ်မရေမရာဖြစ်နေသည့် ကွင်းလယ်ကစားသမား အန်ဇိုဖာနန်ဒက်အတွက် ပြောင်းရွှေ့ကြေး စတာလင်ပေါင် သန်း ၁၀၀  နှင့်အထက် ကမ်းလှမ်းမှသာ လက်ခံ ဆွေးနွေးမည်ဖြစ်ကြောင်း အတည်ပြုသည်။

အန်ဇိုဖာနန်ဒက်သည် ၂၀၂၂ ခုနှစ်က ဘင်ဖီကာ အသင်းမှ ချယ်လ်ဆီးအသင်းသို့ ပြောင်းရွှေ့ကစား ပြီးနောက်   အသင်းနှင့်ပထမဆုံးဘောလုံးရာသီတွင် ခြေစွမ်းပြနိုင်ရန် ရုန်းကန်ခဲ့ရသော်လည်း နောက်ပိုင်း ဘောလုံးရာသီများတွင် အကောင်းဆုံးခြေစွမ်းပြလျက် ရှိနေသူဖြစ်သည်။

အန်ဇိုဖာနန်ဒက်သည် ယခုဘောလုံးရာသီ တွင်လည်း အသင်းနှင့်အတူ အကောင်းဆုံးခြေစွမ်း ပြနိုင်ပြီး  အသင်းအတွက်အရေးပါသည့်သွင်းဂိုးများ ကိုလည်းသွင်းယူနိုင်ခဲ့ကာ  ပရီးမီးယားလိဂ်ပြိုင်ပွဲ တွင်  အကောင်းဆုံးကွင်းလယ်ကစားသမားများမှ တစ်ဦးအပါအဝင်ရပ်တည်နေသူဖြစ်သည်။

အန်ဇိုဖာနန်ဒက်သည် ယခုလအတွင်း နိုင်ငံတကာပွဲစဉ်များ ကစားရန် အာဂျင်တီးနားအသင်းနှင့် ပူးပေါင်း စဉ် အသင်းနည်းပြဟောင်း မာရက်စ်ကာအား ထုတ် ပယ်ခဲ့သည့်ဖြစ်ရပ်အတွက် အသင်းတာဝန်ရှိသူများ ကို ဝေဖန်မှုများ လုပ်ဆောင်ခဲ့သည့်အပြင် ရီးယဲလ် မက်ဒရစ်အသင်းသို့   ပြောင်းရွှေ့ကစားရန် ပြောကြားပြီးနောက်   ချယ်လ်ဆီးအသင်းနည်းပြ ရိုစင်နီယာက အသင်းကစားသမား စာရင်းမှ နှစ်ပွဲပယ်သည့် ပြစ်ဒဏ် ချမှတ်ခဲ့ခြင်းဖြစ်သည်။

နှစ်ပွဲပယ်ပြစ်ဒဏ်ချမှတ်ခံရပြီးနောက် ချယ်လ်ဆီး အသင်းနှင့်အန်ဇိုဇာနန်ဒက်တို့ အနာဂတ်မရေမရာဖြစ်လာပြီး အန်ဇိုဖာနန်ဒက်၏ အေးဂျင့်ဖြစ်သူကလည်း ချယ်လ်ဆီးအသင်း၏လုပ်ရပ်ကို  ဝေဖန်မှုများလုပ်ဆောင်ပြီးနောက်  ပိုမိုမရေမရာဖြစ်လာသည့် အတွက် ချယ်လ်ဆီးအသင်းအနေဖြင့်  လာမည့် နွေရာသီ  ကစားသမားအပြောင်းအရွှေ့ကာလတွင် ရီးယဲလ်မက်ဒရစ်အသင်းထံ လက်လွှတ်ရဖွယ်ရှိနေ ခြင်းဖြစ်သည်။

ချယ်လ်ဆီးအသင်းက အန်ဇိုဖာနန်ဒက်ကို လက် မလွှတ်လိုသော်လည်း အန်ဇိုဖာနန်ဒက်ကိုယ်တိုင်က အသင်းမှထွက်ခွာဖွယ်ရှိသည့်အတွက် ပြောင်းရွှေ့ ကြေးကို  စတာလင်ပေါင်  သန်း ၁၀၀ နှင့်အထက် ကမ်းလှမ်းမှသာ  လက်ခံမည်ဟု   အတည်ပြုခဲ့ခြင်း ဖြစ်ကြောင်း သိရသည်။ 
MWD

ဘာစီလိုနာအသင်းဟာ ဧပြီ ၄ ရက် ညပိုင်းက ယှဉ်ပြိုင်ကစားခဲ့တဲ့  စပိန်လာလီဂါ ပွဲစဉ်(၃၀)မှာ အက်သလက်တီကို မက်ဒရစ်အသင်းကို အနိုင်ရရှိခဲ့ပါတယ်။

ဘာစီလိုနာအသင်းဟာ အက်သလက်တီကိုမက်ဒရစ်အသင်းကို နှစ်ဂိုး-တစ်ဂိုးဖြင့်  အနိုင်ရရှိခဲ့တာဖြစ်ပြီး  အဲဒီပွဲစဉ်မှာ ဘာစီလိုနာအသင်းအတွက် သွင်းဂိုးတွေကို ပထမပိုင်းပွဲကစားချိန် ၄၂ မိနစ်မှာ ရက်ရှ်ဖို့ဒ်က တစ်ဂိုး၊ ဒုတိယပိုင်းပွဲကစား ချိန် ၈၇ မိနစ်မှာ လီဝန်ဒိုစကီးက တစ်ဂိုးသွင်းယူပေးခဲ့တာ ဖြစ်ပါတယ်။

အိမ်ရှင်အဖြစ် ဧည့်ခံကစားရတဲ့ အက်သလက်တီကိုမက်ဒရစ်အသင်းကတော့ ပထမပိုင်းပွဲကစားချိန် ၃၉ မိနစ်မှာ ဦးဆောင်ဂိုး စတင်ရရှိခဲ့ပေမယ့် ပထမပိုင်း ပွဲကစားချိန် ၄၅ မိနစ်အပြီး နာကျင်အချိန်ပို ခုနစ်မိနစ်မှာ ဂွန်ဇာလက် တိုက်ရိုက်အနီကတ်ပြ ထုတ်ပယ်ခံခဲ့ရလို့ ကစားသမားတစ်ယောက်လျော့ နဲ့ ယှဉ်ပြိုင်ကစားခဲ့ရတာဖြစ်ပါတယ်။

အက်သလက်တီကိုမက်ဒရစ်အသင်းနဲ့ ဘာစီလိုနာအသင်းတို့ဟာ စပိန်ကိုပါဒယ်ရေးဖလား  ဆီမီးဖိုင်နယ်အဆင့်မှာလည်း  နှစ်ကြိမ်တွေ့ဆုံခဲ့တာကြောင့် ဒီနှစ်သင်းကြား  ယခုဘောလုံးရာသီအတွင်း လေးကြိမ်မြောက် တွေ့ဆုံခြင်းလည်းဖြစ်ပါတယ်။

အက်သလက်တီကိုမက်ဒရစ်အသင်းဟာ ဘာစီလိုနာအသင်းကို ရှုံးနိမ့်ခဲ့တာကြောင့် စပိန်လာလီဂါ ပွဲစဉ်(၃၀) ယှဉ်ပြိုင်ကစားပြီးချိန်မှာ ရမှတ် ၅၇ မှတ်သာ စုဆောင်းနိုင်ခဲ့တာကြောင့် အမှတ်ပေးဇယား အဆင့်(၄)နေရာမှာ ရပ်တည်နေတာဖြစ်ပါတယ်။

ခုနစ်မှတ်ဖြတ် ဦးဆောင်

ဘာစီလိုနာအသင်းကတော့ အက်သလက်တီကိုမက်ဒရစ်အသင်းကို အနိုင်ရရှိခဲ့တာကြောင့် အမှတ်ပေးဇယား ဒုတိယနေရာက ရီးယဲလ်မက်ဒရစ်အသင်းကို  ခုနစ်မှတ်ဖြတ်ကာ ဇယားထိပ်မှာ ဦးဆောင်နိုင်ခဲ့တာ ဖြစ်ပါတယ်။

အမှတ်ပေးဇယား ဒုတိယနေရာက ရီးယဲလ်မက်ဒရစ်အသင်းဟာ စပိန်လာလီဂါပွဲစဉ်(၃၀)မှာ မာယော့ကာအသင်းကို  ရှုံးနိမ့်ခဲ့တာကြောင့်  ဇယားထိပ်က ဘာစီလိုနာအသင်းကို ဆက်လက်ဖိအား‌ပေးနိုင်ခြင်းမရှိဘဲ စပိန်လာအမှတ်ပေးဇယားအဆင့်(၂)နေရာမှာ ရပ်တည်နေတာ ဖြစ်ပါတယ်။

ငွေကြယ် - ရေးသားသည်

MDN

ရန်ကုန်      ဧပြီ     ၅

မြန်မာဖိုက်တာ ဂျိုရှုအာဗန်၏ UFC ဖလိုင်းဝိတ်တန်း ကမ္ဘာ့ချန်ပီယံကာကွယ်ပွဲကို ယခင်စီစဉ်ထားသည့်  UFC 327 ပြိုင်ပွဲတွင် မပါဝင်ဘဲ  UFC 328 ပြိုင်ပွဲသို့ ရွှေ့ဆိုင်းလိုက်သည်။

ယခင်က မြန်မာစံတော်ချိန် ဧပြီ ၁၂ ရက်တွင်ကျင်းပမည့်  UFC 327 ပြိုင်ပွဲတွင် မြန်မာဖိုက်တာ ဂျိုရှုအာဗန်၏ ပထမဆုံး ကမ္ဘာ့ချန်ပီယံ ကာကွယ်ပွဲကို Co Main Event  အဖြစ်   ထည့်သွင်းထားသော်လည်း ဂျိုရှုအာဗန်၏  ဒဏ်ရာပြဿနာကြောင့်  ပွဲပျက်သွားပြီး  တစ်လနီးပါးအကြာ  မေ  ၉  ရက်တွင်ကျင်းပမည့်  UFC  328  ပြိုင်ပွဲသို့  ပြောင်းလဲကျင်းပမည်ဖြစ်ကြောင်း  UFC  က   ဧပြီ  ၅  ရက်တွင်  သတင်းထုတ်ပြန်သည်။

ဂျိုရှုအာဗန်သည် ပထမဆုံးကမ္ဘာ့ချန်ပီယံကာကွယ်ပွဲအတွက် သေချာပြင်ဆင်ထားသော်လည်း   ပွဲထိုးသတ်ခါနီး  ရက်ပိုင်းအလိုမှ   ဒဏ်ရာပြဿနာကြောင့် ရက်အပြောင်းအလဲဖြစ်ခဲ့ခြင်းဖြစ်သည်။ ဂျိုရှုအာဗန်သည် ကမ္ဘာ့ချန်ပီယံကာကွယ်ပွဲအဖြစ် ဂျပန်ဖိုက်တာ တက်ဆုရိုနှင့် ယှဉ်ပြိုင်ထိုးသတ် ရမည်ဖြစ်ပြီး ရက်ပြောင်းလဲသော်လည်း ပြိုင်ဘက်ပြောင်းလဲခြင်းမရှိကြောင်း သိရသည်။

ဂျိုရှုအာဗန်သည် ပရော်ဖက်ရှင်နယ်   MMA   ကစားသမားဘဝ စုစုပေါင်း ၁၈ ပွဲထိုးသတ်ရာတွင် ၁၆ ပွဲနိုင် နှစ်ပွဲရှုံးနိမ့်ထားပြီး UFC နှင့် ၁၀ ပွဲထိုးသတ်ရာတွင် ကိုးပွဲနိုင် တစ်ပွဲရှုံးနိမ့်ထားသည်။ ဂျိုရှုအာဗန်သည် UFC တွင် နောက်ဆုံး ခြောက်ပွဲဆက်တိုက်အနိုင်ရပြီး ကမ္ဘာ့ချန်ပီယံပါ ဖြစ်လာ ခဲ့ခြင်းဖြစ်သည်။ ဂျိရှုအာဗန်သည် ၂၀၂၃ ခုနှစ်တွင် နာမည်ကျော် တိုက်ခိုက်ရေးအဖွဲ့အစည်း UFC  နှင့် စတင်လက်တွဲပြီးနောက် နှစ်နှစ်ကျော်ကာလအတွင်း ကမ္ဘာ့ချန်ပီယံဖြစ်လာခြင်းဖြစ်သည်။  ဂျိုရှုအာဗန်သည် ၂၀၂၅ ခုနှစ်  ဒီဇင်ဘာ ၆  ရက်က ထိုးသတ်သည့်ပွဲတွင် ဘရာဇီးဖိုက်တာ  ပန်တိုဂျာကို   အလဲထိုးအနိုင်ယူပြီးနောက် ကမ္ဘာ့ချန်ပီယံဖြစ်လာပြီး လေးလကျော်အကြာတွင်  ချန်ပီယံကာကွယ် ပွဲ ပထမဆုံးအကြိမ် ထိုးသတ်ရမည်ဖြစ်သည်။

သတင်း-ရှိုင်းထက်ဇော်

ဓာတ်ပုံ-UFC

MDN

နောက်တန်းကစားသမား ကီယန်ထရစ်ပီယာဟာ ယခုဘောလုံးရာသီကုန်မှာ နယူးကာဆယ်အသင်းကနေ ထွက်ခွာတော့မှာဖြစ်တယ်လို့ သိရပါတယ်။

အသက် ၃၅ နှစ်အရွယ်ရှိ နောက်တန်းကစားသမား ထရစ်ပီယာဟာ ၂၀၂၂ ခုနှစ် ဇန်နဝါရီလက အက်သလက်တီကို မက်ဒရစ်အသင်းကနေ  ပြောင်းရွှေ့လာခဲ့သူဖြစ်ပြီး နယူးကာဆယ်အသင်း အတွက် ပွဲစဉ်စုစုပေါင်း ၁၅၃၈ ပွဲ ပါဝင်ကစားပေးထားတာလည်း ဖြစ်ပါတယ်။

ထရစ်ပီယာဟာ ၂၀၂၄ ခုနှစ်အတွင်းက အင်္ဂလန်နိုင်ငံ လက်ရွေးစင်ကစားသမားဘဝကနေ အနားယူခဲ့တာဖြစ်ပြီး အင်္ဂလန်အသင်းနဲ့အတူ နိုင်ငံတကာပွဲစဉ်စုစုပေါင်း ၅၄ ပွဲ ပါဝင်ကစားပေးခဲ့တာ ဖြစ်ပါတယ်။

ထရစ်ပီယာဟာ နယူးကာဆယ်အသင်းအပြင် ဘန်လေအသင်း၊ မန်စီးတီးအသင်းနဲ့ စပါးအသင်းတို့မှာလည်း ပါဝင်ကစားခဲ့ဖူးတာဖြစ်ပါတယ်။

ငွေကြယ် - ရေးသားသည်

MDN