နယူးယောက်ရှိ လာဂွါဒီယာလေဆိပ်၌ Air Canada လေယာဉ်နှင့်မီးသတ်ကားတိုက်မိ၊ လေယာဉ်မှူးနှစ်ဦးသေဆုံး

အမေရိကန်နိုင်ငံ နယူးယောက်မြို့ရှိ လာဂွါဒီယာလေဆိပ်၌ မတ်လ ၂၃ ရက်အစောပိုင်းတွင် Air Canada လေကြောင်းလိုင်းမှ လေယာဉ်တစ်စင်း ဆင်းသက်စဉ် မီးသတ်ကားတစ်စီးနှင့် တိုက်မိမှုဖြစ်ပွားရာ လေယာဉ်မှူးနှစ်ဦးသေဆုံးပြီး လူအများအပြား ဒဏ်ရာရရှိကြောင်း တာဝန်ရှိသူများက အတည်ပြုပြောသည်။

ကနေဒါနိုင်ငံ မွန်ထရီရယ်မြို့မှ ထွက်ခွာလာသည့် ထိုလေယာဉ်ပေါ်တွင် ခရီးသည် ၇၂ ဦးနှင့် လေယာဉ်အမှုထမ်း လေးဦးလိုက်ပါလာခြင်းဖြစ်သည်။ အဆိုပါ မတော်တဆမှုကြောင့် လေယာဉ်မှူးနှင့် လက်ထောက်လေယာဉ်မှူးတို့ သေဆုံးပြီး စုစုပေါင်း ၄၁ ဦး ဒဏ်ရာရရှိရာ ၎င်းတို့အနက်ကိုးဦးမှာ ဆေးရုံတွင် စိုးရိမ်ရသည့် အခြေအနေဖြင့် ကုသမှုခံယူနေရသည်။

မီးသတ်ကားသည် အခြားလေယာဉ်တစ်စင်း၏ အရေးပေါ်အခြေအနေကို သွားရောက်ကူညီရန်ပြေးလမ်းကို ဖြတ်သန်းခွင့်ရရှိထားပြီး ဖြတ်သန်းစဉ် ပြေးလမ်းသို့ ဆင်းလာသည့် လေယာဉ်နှင့် ယခုကဲ့သို့ တိုက်မိခြင်း ဖြစ်သည်။ အမေရိကန်အမျိုးသား သယ်ယူပို့ဆောင်ရေး ဘေးကင်းလုံခြုံရေးဘုတ်အဖွဲ့က စုံစမ်းစစ်ဆေးရေးအဖွဲ့ကို စေလွှတ်ထားပြီး လေကြောင်းထိန်းသိမ်းရေး ဆက်သွယ်မှုများကို အဓိကထား စစ်ဆေးသွားမည်ဖြစ်သည်။

ထိုဖြစ်စဉ်ကြောင့် လေဆိပ်ကိုနေ့လယ်ပိုင်းအထိ ပိတ်ထားရသဖြင့် လေကြောင်းခရီးစဉ် ၅၀၀ ကျော်ကို ဖျက်သိမ်းရပြီး ယခုဖြစ်စဉ်က အမေရိကန်၌ လေကြောင်းထိန်းသိမ်းရေး ဝန်ထမ်းရှားပါးမှု ဖြစ်ပေါ်နေစဉ် ဖြစ်ပွားခြင်းဖြစ်ကာ လုံခြုံရေးအရ စိုးရိမ်မှုများကို မြင့်တက်စေသည်။     

  Ref: AGC