နိုင်ငံတိုင်း၊  လူမျိုးတိုင်းတွင် နှစ်သစ်ကူးပွဲတော်ကိုယ်စီရှိကြရာ   ဘာသာဓလေ့ကို  အခြေခံသည့် ပွဲတော်၊  နေထိုင်မှုစနစ်ကိုအခြေခံသည့်  ပွဲတော်၊ ပုဂ္ဂလိကမိသားစုသဘောကို  အခြေခံသည့်ပွဲတော် နှင့် လူမှုအသိုင်းအဝိုင်းကို အခြေခံသည့် ပွဲတော်ဟူ၍ အမျိုးမျိုးအဖုံဖုံကွဲပြားကြသည်။  မြန်မာနိုင်ငံ၏ နှစ်သစ်ကူးသင်္ကြန်ပွဲတော်သည် လူမှုအသိုင်းအဝိုင်းတစ်ခုလုံးကို ဗဟိုပြုသည့် ပွဲတော်အမျိုးအစားဖြစ်သည်။ မြန်မာ့နှစ်သစ်ကူးသင်္ကြန်တွင် လူမျိုးမရွေး၊ ဘာသာမရွေး၊   လူတန်းစားမရွေး   ပါဝင်ဆင်နွှဲပျော်ရွှင်လေ့ရှိကြသည်။ သင်္ကြန်ပွဲတော်သည် မြန်မာနိုင်ငံအပါအဝင် အရှေ့တောင်အာရှ နိုင်ငံအတော်များများတွင် နှစ်သစ်ကိုကြိုဆိုသည့်အနေဖြင့် ကျင်းပသည့်ပွဲတော်ဖြစ်သည်။

သင်္ကြန်ပွဲတော်၏အနှစ်သာရ

    “မြနန္ဒာ x x နေညိုညိုရစ်ကာသန်းတော့ x ရွှေမန်းတောင်ရိပ် တူတူခိုမယ် ပျိုဖြူတွေရယ် x မျှော်ခင်းလေး သာပါဘိတယ် နိမိတ်ကောင်းယူမယ် နှစ်ကူးသင်္ကြန်တော်ဝယ်”  ဆိုသည့်  သီချင်းသံ များ  ပျံ့လွင့်လာလျှင်  မြန်မာ့ရိုးရာနှစ်သစ်ကူး သင်္ကြန်ခါရောက်ပြီဟု အလိုလိုသိနိုင်သည်။ သင်္ကြန် ဆိုသည်မှာ“ကူးပြောင်းခြင်း”၊ “ပြောင်းရွှေ့လာခြင်း”ဟုအဓိပ္ပာယ်ရသည့် ပါဠိဘာသာသင်္ကန္တ၊ သက္ကတ ဘာသာ သင်္ကြန္တတို့မှ တိုက်ရိုက်မြန်မာမှုပြုထားခြင်းဖြစ်သည်။   မြန်မာ့နှစ်ကူးသင်္ကြန်ပွဲတော်တွင် နှစ်ဟောင်းကိုစွန့်ကာ နှစ်သစ်ကို ကူးပြောင်းသည့်အခါသမယတွင် နှစ်ဟောင်းမှ အညစ်အကြေးများ ကင်းစင်အောင် ရေစင်သွန်းလောင်းသည် ဟူသော အဓိပ္ပာယ်ဖြင့် ဆင်နွှဲကြသည်။

သင်္ကြန်ပွဲတော်၏ အသွင်သဏ္ဌာန်

     သင်္ကြန်ရေသဘင်ပွဲသည်   သာကီဝင်တို့၏ဓလေ့မှကူးစက်လာသည်ဟုဆိုနိုင်သည်။ ထိုမှ တကောင်းခေတ်၊  ပုဂံခေတ်တို့မှ  လက်ဆင့်ကမ်း သယ်ဆောင်ကာ ယနေ့ကာလအထိ မြန်မာတို့၏ နှစ်သစ်ကူးပွဲတော်အဖြစ် တည်ရှိနေခဲ့သော ဓလေ့ဖြစ်သည်။    မြန်မာ့ရိုးရာပွဲတော်များထဲတွင် အကြီးမားဆုံးနှင့်   အထင်ရှားဆုံးသော   ပွဲတော်တစ်ခုလည်းဖြစ်သည်။   သင်္ကြန်ရေသဘင်ပွဲသည် ခေတ်ကာလ အခြေအနေအပေါ်မူတည်ကာ အသွင်သဏ္ဌာန်အမျိုးမျိုးကွဲပြားပြောင်းလဲလာခဲ့သည်။ ရှေးမြန်မာဘုရင်များသည် နှစ်သစ်ကူးပွဲတော်ကို ယဉ်ကျေးသိမ်မွေ့စွာဖြင့် သပြေခက်နှင့် နံ့သာရည်များ ပက်ဖျန်း၍     ဆင်ယင်ကျင်းပခဲ့ကြသည်။ သင်္ကြန်ကာလတွင် လူပျိုကာလသားများက ရေပက်ကစားကြသလို သက်ကြီးရွယ်အိုများနှင့် အပျိုကာလသမီးတို့ကလည်း  ဘုရားသွား၊ သီလယူခြင်းဖြင့် ကုသိုလ်ပြုကြလေ့ရှိသည်။   သင်္ကြန်ကာလတွင် အပျော်ကြူးစွာ ရေကစားခြင်းကြောင့် နောက်ဆက်တွဲ ပြဿနာများဖြစ်တတ်ပုံကို  သမိုင်းတွင်ထင်ရှားစွာတွေ့မြင်နိုင်သည်။ ပုဂံခေတ်နောက်ဆုံးမင်းဆက် နရသီဟပတေ့မင်းလက်ထက်တွင် အသက်အငယ်ဆုံး မိဖုရားစောလုံကို ဘုရင်နရသီဟပတေ့နှင့် ကျန်သည့်မိဖုရားများက ရေမွန်းအောင် ရေပက်ကစားကြသဖြင့် မိဖုရားစောလုံက အငြိုးထားကာ ဘုရင်၏ပွဲတော်အုပ်အတွင်း အဆိပ်ခတ်သည်အထိ ရုပ်ဆိုးအကျည်းတန်သည့်     အဖြစ်အပျက်ရှိခဲ့သည်။ 

“နှစ်အကူး xxx ရွှင်မြူးလေတဲ့သင်္ကြန်” ဆိုသည့်အတိုင်းပင် သင်္ကြန်အခါသမယတွင် ပျော်တတ်သူတို့က ရေပက်ကစားခြင်းအပြင် အိုးမဲသုတ်ခြင်း စသည့်ကျီစားမှုများလည်းပြုတတ်ကြသည်။

ယခုခေတ်တွင်မူ   မြို့ကြီးများတွင်  ရေပက်မဏ္ဍပ်များဆောက်လုပ်ကာ အတီး၊ အမှုတ်၊ အက၊ အခုန်များဖြင့် ဖျော်ဖြေခြင်း၊ ရေပိုက်များဖြင့် ရေပက်ကစားခြင်းများပြုလုပ်ကြသည်။    သင်္ကြန်တွင် ရေပက်ခံထွက်သူများကလည်း အမျိုးအစားစုံသော ကားများပေါ်တွင်    ရောင်စုံအဝတ်အစားများဖြင့် ပျော်ရွှင်မြူးတူးစွာ မြို့အနှံ့ ရေပက်ခံထွက်ကြသည်။ နယ်မြို့များတွင်မူ  စက်ဘီး၊ ဆိုင်ကယ်များဖြင့် ရေပက်ခံထွက်ကြသည်။  အချို့သောကျေးလက်တောရွာများတွင်မူ နွားလှည်းများပေါ်တွင် ရေစည် များတင်ဆောင်ကာ ရေပက်ကစားကြသည့်ဓလေ့များ ယခုတိုင်ရှိနေသေးပေသည်။

သင်္ကြန်ရေသဘင်ပွဲတော်ကို ဗမာတိုင်းရင်းသားများသာမက အခြားသော တိုင်းရင်းသားများကလည်း မိမိတို့ရိုးရာဓလေ့အတိုင်း ဆင်ယင်ကျင်းပလေ့ရှိသည်။   ထိုအထဲတွင်  ရခိုင်တိုင်းရင်းသားတို့၏သ င်္ကြန်ပွဲမှာ ထင်ရှားသည်။ ရခိုင်တိုင်းရင်းသားတို့သည်   သစ်ထွင်းလှေများထဲတွင် ရေထည့်ကာ လူပျို၊  အပျိုတို့ကို  တစ်ဖက်တစ်ချက်စီမှနေ၍ ရေပက်ကစားကြခြင်းဖြစ်သည်။  တစ်ဦးနှင့်တစ်ဦး မောင်ရင်းနှမသဖွယ် ချစ်ခင်စွာ  နှစ်ကူးပွဲတော်ကို ဆင်နွှဲကြသည်။

သင်္ကြန်ပွဲတော်နှင့်အစားအစာ

    သင်္ကြန်နှင့်အတူပါဝင်လာသည့် သင်္ကြန်အစားအစာတစ်မျိုးမှာ မုန့်လုံးရေပေါ်ဖြစ်သည်။ မုန့်နှစ်အတွင်း ထန်းလျက်ခဲများထည့်ကာ လုံးဝန်းအောင်ပြုလုပ်ပြီး ရေနှင့်ပြုတ်ထားသည့် မုန့်လုံးရေပေါ်ကို အုန်းသီးများများနှင့်   စားရသည်က  သင်္ကြန်ရေစိုစိုတွင် တစ်သက်မမေ့စရာ အရသာပင်ဖြစ်သည်။ သင်္ကြန်ကာလတွင်  မြို့တိုင်း၊  ရွာတိုင်း၊  လမ်းတိုင်းတွင် မုန့်လုံးရေပေါ်စတုဒိသာကျွေးသည့်   ပုံရိပ်များကို အထင်းသား   တွေ့မြင်နိုင်သည်။   သင်္ကြန်နှင့် မုန့်လုံးရေပေါ်မှာ ခွဲခြားမရသော အမှတ်သင်္ကေတ များပင်ဖြစ်သည်။ ထိုအထဲတွင်မှ မွန်တိုင်းရင်းသားတို့၏   သင်္ကြန်ထမင်းမှာလည်း   ထင်ရှားသည်။ ရေဆမ်းထားသည့် ထမင်းကို ငါးခြောက်ထောင်းကြော် မွမွရွရွနှင့် တွဲဖက်စားသောက်ရသည်မှာ တစ်မျိုးထူးခြားသော အရသာဖြစ်ပြီး သင်္ကြန်၏ နိမိတ်ပုံနှင့် အပ်စပ်မှုရှိသည့် အစားအစာတစ်မျိုးဖြစ်သည်။

သင်္ကြန်ပွဲတော်နှင့်ရာသီပန်း

    သင်္ကြန်ကာလတွင် ပွင့်လေ့ရှိသည့် ရာသီပန်းမှာ ပိတောက်ပန်းပင်ဖြစ်သည်။     နွေရာသီတွင် ငုဝါပန်းတို့ ပွင့်လေ့ရှိသော်လည်း ပိတောက်ပန်းမှာ သင်္ကြန်အကြိုလက်ဆေးမိုးရွာမှ    ပွင့်လေ့ရှိပြီး သင်္ကြန်ကာလအတွင်းတွင်သာ အများဆုံးပွင့်သည့် ပန်းဖြစ်သည့်အတွက်    သင်္ကြန်နှင့်ပိတောက်မှာ ခွဲခြား၍မရသလိုပင်ဖြစ်ခဲ့သည်။   ပိတောက်ကို သင်္ကြန်၏   နိမိတ်ပုံသင်္ကေတအဖြစ်ပင်   ထားရှိ ခဲ့ကြသည်။ ရေစိုစိုတွင် ပိတောက်ပန်းတဝင့်ဝင့်နှင့် အလှတင့်နေသော    မြန်မာလှပျိုဖြူလေးများမှာ မြင်သူတိုင်း  ရင်အေးစရာဖြစ်ခဲ့သည်။  ရာသီဥတုပြောင်းလဲလာသည့်ကာလများတွင်မူ  ပိတောက် ပန်းများသည်လည်း     ပွင့်သည့်အချိန်ကာလအနည်းငယ် ရွေ့လျားမှုရှိခဲ့သော်လည်း ပိတောက်ပန်း အများစုမှာ  သင်္ကြန်ကာလတွင် ပွင့်ကြမြဲဖြစ်သည်။

သင်္ကြန်ပွဲတော်နှင့်ဘာသာရေး

     သင်္ကြန်ကာလတွင် တရားစခန်းများ အများဆုံးဖွင့်လှစ်ပြီး သင်္ကြန်ပိတ်ရက်အတွင်း တရားအားထုတ်ကြသည်။ သင်္ကြန်ကာလအတွင်း သက်ကြီးရွယ်အိုများနှင့်   ဘာသာရေးလေ့လာလိုက်စားသူများက ဘုရားကျောင်းကန်များတွင် သီလယူခြင်း၊ ဥပုသ်သီတင်းဆောက်တည်ခြင်းများ ပြုလေ့ရှိကြသည်။ ထို့ပြင် သင်္ကြန်ကာလအတွင်း စတုဒိသာကျွေးမွေးခြင်း၊ နှစ်သစ်ကူးတွင် သက်ကြီးရွယ်အိုများအား ခေါင်းလျှော်ခြင်း၊ လက်သည်း၊ ခြေသည်းလှီးခြင်း၊ တိရစ္ဆာန်များအား ဘေးမဲ့လွှတ်ခြင်းတို့ဖြင့် ကုသိုလ်ယူကြလေ့ရှိသည်။

သင်္ကြန်ပွဲတော်နှင့်အနုပညာ

     သင်္ကြန်ကာလတွင်  သင်္ကြန်ပုံရိပ်ကို  ထင်ဟပ်စေသော သီချင်းများ ဖွဲ့နွဲ့သီဆိုလေ့ရှိသလို သင်္ကြန်ကာလကို အခြေပြုသည့် ရုပ်ရှင်များလည်း ရိုက်ကူးထုတ်လွှင့်လေ့ရှိကြသည်။ ထို့ပြင် သင်္ကြန်အကနှင့် သင်္ကြန်သံချပ်များကလည်း   သင်္ကြန်၏ပုံရိပ်ကို ပိုမိုပေါ်လွင်စေသည်။ “တူးပို့ တူးပို့” တီးလုံးသံကြားလျှင်ပင် မြန်မာလူမျိုးတို့၏ စိတ်တွင် သင်္ကြန်၏အရသာကို ထိတွေ့ခံစားမိကြသည်။ သင်္ကြန်သီချင်းများထဲတွင် မြို့မငြိမ်း၏ သင်္ကြန်တေးသီချင်းများမှာ ထင်ရှားသည်။   “မြနန္ဒာ”၊    “မန်းမြို့သူဇာမေ”၊ “ရှာပုံတော် မင်းသားကြီး” စသည့် တေးသီချင်းများမှာ သင်္ကြန်ကာလတိုင်း မရိုးနိုင်အောင် ဆိုကြတီးကြကကြသည့်သီချင်းများဖြစ်သည်။

သင်္ကြန်ပွဲတော်နှင့်အိမ်နီးချင်းနိုင်ငံများ

     ထိုင်း၊ အိန္ဒိယ၊ လာအို၊ ဗီယက်နမ်၊ ကမ္ဘောဒီးယားနိုင်ငံများနှင့်ယူနန်   စသည့်ဒေသများတွင်လည်း ရေသဘင်ပွဲတော်များ ဆင်နွှဲလေ့ရှိသည်။ မြန်မာနိုင်ငံတွင်လည်း ပြောင်းလဲလာသည့် နိုင်ငံရေး၊ စီးပွားရေးစနစ်များကြောင့်   နိုင်ငံခြားသားဧည့်သည်များ လာရောက်လည်ပတ်ကြသည့်အတွက်  မြန်မာ့ရိုးရာနှစ်သစ်ကူး သင်္ကြန်ပွဲတော်တွင် နိုင်ငံခြားသားခရီးသွားများ ပါဝင်ဆင်နွှဲမှု များပြားလာသည်ကို တွေ့ရသည်။ ထို့ကြောင့် မိမိတို့လူမျိုး၏ ယဉ်ကျေးမှုဓလေ့ထုံးစံကို   မပျောက်ပျက်စေဘဲ  သင်္ကြန်၏ အနှစ်သာရကို ပေါ်လွင်စေသည့် အကြောင်းအရာ၊ အပြင်အဆင်များဖြင့် သင်္ကြန်ပွဲတော်ကို ဆင်နွှဲကြခြင်းဖြင့် မြန်မာ့ရိုးရာသင်္ကြန်၏ သွင်ပြင်သဏ္ဌာန်ကို မြှင့်တင်သွားကြရမည်ဖြစ်သည်။

ဒြပ်မဲ့ယဉ်ကျေးမှုအမွေအနှစ်ပါဝင်လက်ရှိတွင်   မြန်မာ့ရိုးရာနှစ်သစ်ကူး  အတာသင်္ကြန်ပွဲတော်သည်    ကမ္ဘာ့ဒြပ်မဲ့ယဉ်ကျေးမှု အမွေအနှစ်စာရင်းတွင်    မြန်မာနိုင်ငံအနေဖြင့် ပထမဆုံးတရားဝင် ပါဝင်နိုင်ခဲ့ပြီဖြစ်သည်။ မြန်မာ့ရိုးရာ နှစ်သစ်ကူး အတာသင်္ကြန်ပွဲတော်ကို ပါရာဂွေးနိုင်ငံ အာဆွန်စီယွန်မြို့၌ ၂၀၂၄ ခုနှစ် ဒီဇင်ဘာလ ၂ ရက်မှ ၇ ရက်အထိကျင်းပသည့် (၁၉)ကြိမ်မြောက် ဒြပ်မဲ့ယဉ်ကျေးမှုအမွေအနှစ်ညီလာခံတွင် ဒီဇင်ဘာလ ၅ ရက်၌  တရားဝင်ဆုံးဖြတ်ခဲ့သည်။   ထို့ကြောင့် မြန်မာတို့၏ ရိုးရာအတာသင်္ကြန်တွင် ယဉ်ကျေးမှုနှင့် သွေဖည်သည့်   အပြုအမူ၊ အပြောအဆိုများနှင့် သရုပ်ပျက်ဝတ်စားဆင်ယင်မှုများကို    ရှောင်ရှား၍ မြန်မာ့ရိုးရာ  ယဉ်ကျေးမှုသင်္ကြန်မှ   ရရှိလာသော လန်းဆန်းမှုများ၊    စိတ်ဓာတ်ခွန်အားများဖြင့် ပြည်ထောင်စုကြီး ငြိမ်းချမ်းသာယာရေး၊ တိုင်းသူပြည်သားများ၏ လူမှုစီးပွားဘဝများ သာယာဝ ပြောရေးတို့အတွက် ဝိုင်းဝန်းကြိုးပမ်း ဆောင်ရွက်သွားကြရမည်ဖြစ်သည်။

အချုပ်အားဖြင့်ဆိုရသော်    ခေတ်ကာလ၏ အပြောင်းအလဲများနောက်တွင် အကောင်းနှင့် အဆိုးက ဒွန်တွဲလိုက်ပါလာကြမည်သာဖြစ်သည်။  ကောင်းမွန်သည့်အကျင့်စရိုက်များကို ထိန်းသိမ်းပြီး မကောင်းသည့်အကျင့်စရိုက်ဆိုးများကို    ဖယ်ရှားနိုင်မှသာ တိုးတက်သည့်   လူမှုဝန်းကျင်ကောင်းတစ်ရပ်ကို ဖော်ဆောင်နိုင်မည်ဖြစ်သည်။  ခေတ်နှင့်မလျော်ညီသော   အတွေးအခေါ်၊ အယူအဆများကို လိုအပ်လျှင် စွန့်ပစ်ရမည်ဖြစ်သလို မိမိတို့လူမှု အသိုင်းအဝိုင်းအတွက်  မရှိမဖြစ်လိုအပ်သော   အတွေးအခေါ်နှင့် ယဉ်ကျေးမှုဓလေ့ ထုံးတမ်းများကို လက်ဆင့်ကမ်းထိန်းသိမ်းစောင့်ရှောက်ရမည်ဖြစ်သည်။ မြန်မာလူမျိုးတို့၏ စိတ်စေတနာ အလှတရားကို အခြေခံကာ မြန်မာ့နှစ်သစ်ကူး ပွဲတော်ကို  အဓိပ္ပာယ်ပြည့်ဝစေရန်   ကြိုးပမ်းဆောင်ရွက် သွားကြရမည်ဖြစ်ပေသည်။    ။
MWD

      အာရောဂျံ ပရမံ လာဘံ ကျန်းမာခြင်းသည် လာဘ် တစ်ပါးဟု ဆိုရိုးရှိသည်နှင့်အညီ လောကတွင် ကျန်းမာ ရေးပြည့်စုံကောင်းမွန်ခြင်းသည်    ဘုရားပေးသော ဆုလာဘ်တစ်ပါးဖြစ်ပါသည်။ ထို့ကြောင့် ကျန်းမာ ရေးဝန်ကြီးဌာနအနေဖြင့် လူတိုင်း  သက်တမ်းစေ့ အသက်ရှည်စွာနေထိုင်နိုင်ရေးနှင့် လူတိုင်း ရောဂါ ဘယကင်းရှင်းရေးတို့ကိုရည်မှန်းချက်ထား၍ အဆင့် အတန်းမြင့်မားသော  ကျန်းမာရေးစောင့်ရှောက်မှု လုပ်ငန်းများကို  အရှိန်အဟုန်မြှင့်ဆောင်ရွက်လျက် ရှိသည်။  ထိုသို့ဆောင်ရွက်ရာတွင် ကျေးလက်ဒေသ အောက်ခြေအထိ  ကျန်းမာရေးအသိပညာပေးခြင်း၊ ရောဂါကာကွယ်တားဆီးခြင်း၊ ရောဂါဖြစ်ပွားလာလျှင် ထိရောက်စွာကုသပေးခြင်း၊ ကျန်းမာရေးလူ့စွမ်းအား အရင်းအမြစ်များမွေးထုတ်ခြင်း၊    ဆေးသုတေသန လုပ်ငန်းများ၊ တိုင်းရင်းဆေးပညာ တိုးတက်မြင့်မား စေရေးလုပ်ငန်းများ၊  အစားအသောက်နှင့် ဆေးဝါး ကွပ်ကဲရေးလုပ်ငန်းများကို   ဦးစီးဌာနခြောက်ခုဖြင့် အထူးအလေးပေးပြီး  စနစ်တကျဆောင်ရွက်လျက် ရှိပါသည်။

ကျန်းမာရေးဝန်ကြီးဌာနအနေဖြင့် ပြည်သူများ၏ ကျန်းမာရေးစောင့်ရှောက်မှုလုပ်ငန်းများ ဆောင်ရွက် ရာတွင် အရေးကြီးပြီး တချို့သောရောဂါများ၏ အစ ပြုရာနေရာဖြစ်သည့် သွားနှင့်ခံတွင်းကျန်းမာရေးကို လည်း  အထူးအလေးထား  ဆောင်ရွက်ပေးလျက်ရှိ ပါသည်။   ခံတွင်းကျန်းမာမှ   လူကျန်းမာမည် (No Health without Oral Health) ဟူသော ဆောင်ပုဒ်နှင့် အညီ သွားနှင့်ခံတွင်းရောဂါများဖြစ်သည့် သွားပိုးစား ရောဂါ၊ သွားဖုံးရောဂါနှင့် ခံတွင်းကင်ဆာရောဂါများ သည် အထွေထွေရောဂါများဖြစ်သည့် နှလုံးနှင့် သွေး ကြောရောဂါ၊ ဆီးချိုသွေးချိုရောဂါနှင့် ကင်ဆာရောဂါ များကဲ့သို့ပင် ဆေးနှင့်ဆေးရွက်ကြီး၊ အရက်၊ သကြား နှင့် အာဟာရတန်ဖိုးနည်းပါးသည့် အစားအစာများ ကြောင့်  ဖြစ်ပွားရခြင်းဖြစ်ပါသည်။   ပုံမှန်အားဖြင့် လူ့ခံတွင်းတွင် ရောဂါပိုးပေါင်း ၅၀၀ ကျော်ရှိပြီး ရောဂါ ဖြစ်စေသောပိုးနှင့် အကျိုးပြုပိုးမွှားများသည် ညီညွတ် မျှတစွာရှိနေသဖြင့် ရောဂါဖြစ်ပွားမှု မရှိခြင်းဖြစ်ပါသည်။ အဆိုပါမျှခြေအနေအထားပျက်ယွင်းသွားပါ က   သွားနှင့်ခံတွင်းကျန်းမာရေး ထိခိုက်မှုရှိလာပြီး နောက်ဆက်တွဲအနေဖြင့်  နှလုံးနှင့်သွေးကြောကျဉ်း ရောဂါ၊  မှတ်ဉာဏ်ချို့ယွင်း အားနည်းခြင်း၊  အဆုတ် ရောဂါဝေဒနာများ၊  သွေးချိုဆီးချိုရောဂါ၊  သားပျက် သားလျှောခြင်း၊ ကလေးအသေမွေးခြင်း၊ လမစေ့ဘဲ မွေးဖွားခြင်း၊  ကိုယ်အလေးချိန်မပြည့်သော ကလေး များမွေးဖွားခြင်းနှင့်   မွေးရာပါနှလုံးရောဂါဝေဒနာ ရှင်ကလေးများမွေးဖွားခြင်း၊    သန္ဓေမအောင်ခြင်း၊ ကင်ဆာရောဂါ၊  ကျောက်ကပ်ရောဂါ၊  နာတာရှည် အဆစ်ရောင်ရောဂါဖြစ်ခြင်း  စသည့်ဆိုးကျိုးများကို  တွေ့ကြုံခံစားရမည်ဖြစ်ပါသည်။

သွားနှင့်ခံတွင်းကျန်းမာရေးတွင်  သွားဖုံးရောင် ရမ်းခြင်း၊  သွားဖုံးမှသွေးထွက်ခြင်း ဖြစ်ပွားရာ၌ ခံတွင်းထဲတွင်ရှိသော ရောဂါပိုးများသည်  သွားဖုံးရှိ ပေါက်ပြဲသွားသော သွေးကြောများအတွင်းသို့  ဝင် ရောက်ပြီး သွေးကြောနံရံများကို ရောင်ရမ်းပျက်စီးစေပါသည်။ အဆိုပါ ပျက်စီးနေသောသွေးကြောနံရံ များကို ခန္ဓာကိုယ်၏   ကိုယ်ခံစွမ်းအားစနစ်မှ တုံ့ပြန် ပြုပြင်မွမ်းမံရာမှ ကျန်းမာရေးကို ထိခိုက်စေနိုင်သော အခြေအနေဖြစ်သည့် သွေးကြောနံရံများ  ထူထဲ မာကျောလာလေ့ရှိပါသည်။  ထို့ကြောင့် ကျန်းမာရေး ဝန်ကြီးဌာနအနေဖြင့် ကျန်းမာရေးအတွက် အရေးကြီးသော  သွားနှင့်ခံတွင်း ကျန်းမာရေးကဏ္ဍ    ဖွံ့ဖြိုးတိုး တက်ရေးအတွက် နိုင်ငံတော်ဘဏ္ဍာငွေများ တိုးမြှင့် ကျခံသုံးစွဲကာ ကျန်းမာရေးစောင့်ရှောက်မှု လုပ်ငန်းများကို  အဆင့်မြှင့်တင်ခဲ့ပါသည်။ 

ယခင်က သွားနှင့်ခံတွင်းကျန်းမာရေးကိစ္စရပ်များအတွက် ပြည်သူ့ဆေးရုံများတွင်    ပြင်ပလူနာအနေ ဖြင့်သာ ဝန်ဆောင်မှုပေးနေရာမှ  နေပြည်တော်တွင် ပထမဆုံး  သွားနှင့်ခံတွင်း အထူးကုဆေးရုံကြီးအဖြစ် သွားဘက်ဆိုင်ရာ‌ရောဂါကုသမှုများကို One Stop Service  အနေဖြင့် ဆောင်ရွက်ခဲ့ပါသည်။   ထို့ပြင်  ၂၀၂၃ ခုနှစ်တွင် ရန်ကုန်သွားနှင့်ခံတွင်း အထူးကုဆေးရုံ (သာကေတ)၊ ၂ဝ၂၄ ခုနှစ်တွင်  မန္တလေးသွားနှင့် ခံတွင်းအထူးကုဆေးရုံ(ကန်တော်နဒီ)နှင့်   ရန်ကုန် တက္ကသိုလ်များဆေးရုံများ၌  သွားနှင့်ခံတွင်းအထူးကု ဌာနများ    အောင်မြင်စွာဖွင့်လှစ်နိုင်ခဲ့ပြီး    သွားနှင့် ခံတွင်းလူနာများကို    အရည်အသွေးမြင့်မားသည့် ကျန်းမာရေးစောင့်ရှောက်မှုများအား    ဝန်ဆောင်မှု ကောင်းကောင်းဖြင့်   ပေးအပ်နိုင်ခဲ့သည့်အတွက်     ပြည်သူများ စိတ်အေးချမ်းသာစွာ  ကုသမှုခံယူနိုင်ပြီ ဖြစ်ပါသည်။ အဆိုပါ သွားဆေးရုံများ၌ စနေ၊ တနင်္ဂနွေ ရုံးပိတ်ရက်များတွင် သွားနှင့်ခံတွင်း ကျန်းမာရေးစောင့်ရှောက်မှု ပေးလျက်ရှိပါသည်။  ထို့ပြင် ရန်ကုန်မြို့ရှိ မင်္ဂလာဒုံကူးစက်ဆေးရုံကိုလည်း   ရန်ကုန်သွားနှင့် ခံတွင်းအထူးကုဆေးရုံ (မင်္ဂလာဒုံ) အဖြစ်   တိုးချဲ့ဖွင့် လှစ်နိုင်ရန်  ပြင်ဆင်ဆောင်ရွက်လျက်ရှိရာ  မကြာမီ အချိန်အတွင်းမှာပင် ပြည်သူများကို သွားနှင့်ခံတွင်း ကျန်းမာရေးစောင့်ရှောက်မှု ပိုမိုဆောင်ရွက်ပေးနိုင်တော့မည်ဖြစ်ပါသည်။

ကျန်းမာရေးဝန်ကြီးဌာနအနေဖြင့်  လူတိုင်းလက် လှမ်းမီသော ကျန်းမာရေးစောင့်ရှောက်မှု (Universal Health Coverage) ရရှိနိုင်ရေးအတွက် ဆေးရုံများ၌ လူနာများ ဆေးကုသစရိတ်လျော့နည်းသက်သာစေ ရန် ကုသမှုတိုင်းကို  အခမဲ့နီးပါး ဆောင်ရွက်ပေးနေသည့်အပြင်  လူနာများအနေဖြင့် စရိတ်ကုန်ကျမှုမရှိ စေရန် ဝေးလံခက်ခဲသည့် ဒေသများအထိ နယ်လှည့် ကွင်းဆင်းဆေးကုသခြင်း လုပ်ငန်းများ (သွားနှင့် ခံတွင်းကျန်းမာရေး စောင့်ရှောက်မှုလုပ်ငန်းများ အပါအဝင်) ဆောင်ရွက်ပေးလျက်ရှိပါသည်။ ပြည်သူများအား သွားနှင့်ခံတွင်းဆိုင်ရာ ကျန်းမာရေးစောင့်ရှောက် မှုတိုးတက်ဖြည့်ဆည်း ပေးနိုင်ရေးအတွက်     ပြည်သူများအတွင်း ကွင်းဆင်းဆေးကုသခြင်းလုပ်ငန်း များ၊ ကျောင်းကျန်းမာရေး လုပ်ငန်းများကို ပြည်သူ့ဆေးရုံများ၊  ပြည်သူ့ကျန်းမာရေးဦးစီးဌာနနှင့် သွားဘက် ဆိုင်ရာဆေးတက္ကသိုလ်များမှ သွားဆရာဝန်များသည် အတူတကွ ပူးပေါင်းဆောင်ရွက်လျက်ရှိပါသည်။

ကိုဗစ်-၁၉  ရောဂါနှင့်အတူ ၂ဝ၂၁ ခုနှစ်က ဖြစ် ပေါ်ခဲ့သောအခြေအနေများကြောင့် သွားကျန်းမာရေး လူ့စွမ်းအားအရင်းအမြစ်များလျော့နည်းခဲ့ရာ အဆို ပါလိုအပ်ချက်များကို အမြန်ဆုံးကုစားဖြည့်တင်းပေး နိုင်ရေးအတွက် ကျန်းမာရေးလူ့စွမ်းအားအရင်းအမြစ် ဦးစီးဌာန၊  သွားဘက်ဆိုင်ရာ ဆေးတက္ကသိုလ်များမှ အရည်အချင်းပြည့်ဝသည့် သွားဘက်ဆိုင်ရာဆရာဝန် များ၊   သွားကျန်းမာရေး စောင့်ရှောက်သူ သူနာပြု ဆရာမများ၊ သွားတုကျွမ်းကျင်သူများကို မွေးထုတ် ပေးနေသကဲ့သို့   ကုသရေးဦးစီးဌာနမှလည်း သွားကျန်းမာရေး အကူသူနာပြုများ၊ လက်ထောက်သွားတု ကျွမ်းကျင်သူများကို ဆေးရုံလုပ်ငန်း အခြေပြုသင်တန်း များဖွင့်လှစ်မွေးထုတ်ကာ ကျန်းမာရေးဝန်ဆောင် မှုများကို အပြည့်အဝပေးနိုင်ရေးအတွက်  အလုပ်များ ခန့်အပ်တာဝန်ပေးခဲ့ခြင်းကြောင့် လက်ရှိတွင် သွားနှင့်ခံတွင်း ကျန်းမာရေးစောင့်ရှောက်မှုမှာ   ယခင်ထက် သာလွန်စွာ ဆောင်ရွက်ပေးနိုင်ခဲ့ပြီဖြစ်ပါသည်။

၂၀၂၃ ခုနှစ်တွင်    နိုင်ငံတော်အစိုးရ၏ ပံ့ပိုးမှုဖြင့် ကျန်းမာရေးဝန်ကြီးဌာနမှ  ဦးဆောင်ကျင်းပခဲ့သော သွားဘက်ဆိုင်ရာ ဆေးပညာညီလာခံတွင် အကြံပြု တင်ပြဆွေးနွေးခဲ့သည့် Digital Dentistry ကို ကျန်းမာရေးဝန်ကြီးဌာနအနေဖြင့်      ချက်ချင်းလက်တွေ့ အကောင်အထည်ဖော်      ဆောင်ရွက်နိုင်ခဲ့ပြီး     သွားကျန်းမာရေး စောင့်ရှောက်မှုကဏ္ဍကို  နိုင်ငံတကာ အဆင့်အတန်းမီစွာ  ဆောင်ရွက်နိုင်ခဲ့ပြီးဖြစ်ပါသည်။ ခေတ်မီသွားတုပြုလုပ်ခြင်းဆိုင်ရာနည်းစနစ် (Digital Dentistry Lab) များအဖြစ် နေပြည်တော်၊ ရန်ကုန်မြို့နှင့် မန္တလေးမြို့များရှိ သွားနှင့်ခံတွင်းဆိုင်ရာ အထူးကု ဆေးရုံများတွင် တည်ထောင်ဖွင့်လှစ်ထားပြီး တစ်နိုင်ငံလုံးသို့  ဝန်ဆောင်မှုဖြန့်ဝေနိုင်ရန်  စီစဉ်ဆောင်ရွက် လျက်ရှိပါသည်။ လက်ရှိ အဆိုပါဆေးရုံများတွင် အငြိမ်းစားဝန်ထမ်းများနှင့် သက်ကြီးဘိုးဘွားများ အာဟာရပြည့်ဝစွာ စားသောက်နိုင်ရေးအတွက် သွားတုများကို အခမဲ့တပ်ဆင်ပေးလျက်ရှိပါသည်။ ကျန်းမာရေးဝန်ကြီးဌာန၏  ဦးဆောင်ပံ့ပိုးမှုဖြင့် သွားတုတပ်ဆင်ခြင်း   အခမဲ့ဝန်ဆောင်မှုကို  မြန်မာ နိုင်ငံ၌ ၂၀၂၃ ခုနှစ်မှစ၍ ဝန်ဆောင်မှုပေးလျက်ရှိပါ သည်။

သွားကျန်းမာရေးကြောင့် ဖြစ်ပေါ်တတ်သော ကိုယ်ဝန်ဆောင်များ၏ ဆိုးကျိုးများကို လျော့နည်းကျဆင်း စေရေးအတွက်လည်း  ကိုယ်ဝန်ဆောင်မိခင်များနှင့် မီးဖွားပြီးကလေးမိခင်များ၏  ခံတွင်းသန့်ရှင်းကျန်းမာရေး ကောင်းမွန်စေရန်အတွက်လည်း ပြည်သူ့ ဆေးရုံများရှိ  သွားဆေးခန်းများတွင်   မဖြစ်မနေ ဆောင်ရွက်ပေးရန်  လုပ်ငန်းလမ်းညွှန်အဖြစ်  ချမှတ်ပေးထားပြီးဖြစ်ပါသည်။

ကျန်းမာရေးဝန်ကြီးဌာနအနေဖြင့် နိုင်ငံတစ်ဝန်းရှိ မွေးရာပါနှုတ်ခမ်းကွဲ၊ အာခေါင်ကွဲလူနာများအား လည်း  ဆေးရုံကြီးများတွင်  အခမဲ့ခွဲစိတ်ကုသပေးခြင်း၊  မွေးရာပါနှုတ်ခမ်းကွဲ၊ အာခေါင်ကွဲကလေးငယ် များ မူလတန်းကျောင်းမတက်မီ နှုတ်ခမ်းကွဲ၊ အာခေါင်ကွဲခြင်းကို ခွဲစိတ်ပြုပြင်ပေးခြင်းနှင့် ထိုကလေးငယ် နှင့်မိသားစုများ၏ လူမှုရေးအခက်အခဲများကို ဖြေရှင်း ဆောင်ရွက်ပေးလျက်ရှိပါသည်။  ထိုသို့ဆောင်ရွက် ရာတွင် ကျန်းမာရေးဝန်ကြီးဌာနသည် သက်ဆိုင်ရာ တိုင်းဒေသကြီး၊  ပြည်နယ်အစိုးရအဖွဲ့များ၊  မြန်မာနိုင်ငံ မိခင်နှင့်ကလေး စောင့်ရှောက်ရေးအသင်း၊ အမျိုး သမီးရေးရာအဖွဲ့ချုပ်၊  နိုင်ငံတကာအဖွဲ့အစည်းများ နှင့် ပူးပေါင်းဆောင်ရွက်လျက်ရှိပါသည်။ 

အချုပ်အားဖြင့်ဆိုရသော် ကျန်းမာရေးဝန်ကြီး ဌာနသည် ကျန်းမာရေးစောင့်ရှောက်မှုအနေဖြင့် ကဏ္ဍစုံတွင်  အချိုးညီဖွံ့ဖြိုး တိုးတက်အောင်ဆောင် ရွက်ပေးလျက်ရှိရာ သွားနှင့်ခံတွင်းကျန်းမာရေး စောင့်ရှောက်မှုတွင် ယခုထက်ပိုမိုတိုးတက်ကောင်းမွန်သော ဝန်ဆောင်ကုသမှုများ  ပေးအပ်နိုင်ရေး အတွက်    နိုင်ငံတော်အစိုးရ၏ ပံ့ပိုးဖြည့်ဆည်းမှု၊ ပြည်သူတစ်ရပ်လုံး၏ ပူးပေါင်းကူညီမှုများဖြင့် လူတိုင်း ရောဂါဘယကင်းရှင်းပြီး သက်တမ်းစေ့နေနိုင်အောင် အစဉ်ကြိုးစား   ဆောင်ရွက်ပေးလျက် ရှိပါကြောင်း ရေးသား တင်ပြလိုက်ရပါသည်။    ။

MWD

မြန်မာတို့၏ တစ်နှစ်တာကာလအတွင်း အထွတ်အမြတ်အထားဆုံးနှင့် အနှစ်သက်ဆုံးသော ပွဲတော်ကိုပြပါဆိုလျှင် တန်ခူးလ၏ သင်္ကြန်ပွဲတော်သည် ပြည်သူတို့၏ နှလုံးသားဝယ် ထာဝရကိန်းအောင်းနေသည့် ပွဲတော်တစ်ခုဖြစ်ပါသည်။ အတာရေစင်ဖြင့် အညစ်အကြေးတို့ကို ဆေးကြောသန့်စင်ကာ နှစ်ဟောင်းမှ အညစ်အကြေးများကိုပယ်၍ နှစ်သစ်ကို တည်ဆောက်ကြသည့် ဤအချိန်အခါသမယသည် မြန်မာ့ယဉ်ကျေးမှု၏အနှစ်သာရကို ဖော်ကျူးနေရုံသာမက နိုင်ငံတော်နှင့် ပြည်သူတို့၏ ငြိမ်းချမ်းသာယာရေးမျှော်မှန်းချက်များကိုလည်း တစ်ပါတည်း သယ်ဆောင်လာခြင်းဖြစ်ပါသည်။

​တန်ခူးလ၏ သဘာဝအလှနှင့် သင်္ကြန်အကြိုကာလ

နွေဦးကဗျာကို ရေးထိုးသည့် ပိတောက်ရွှေဝါတို့နှင့်အတူ သင်္ကြန်၏အငွေ့အသက်များ စတင်လာပြီ ဖြစ်ပါသည်။ ပူပြင်းသောနေရှိန်အောက်တွင် လန်းဆန်းစိုပြည်သည့် သဘာဝအလှတရားတို့က ပြည်သူတို့၏စိတ်နှလုံးကို ပွဲတော်ဆီသို့ခေါ်ဆောင်သွားပြီး နှစ်ဟောင်းကုန်ဆုံးတော့မည့် နိမိတ်ပုံများကို ဖော်ဆောင်နေပါသည်။

​အတာရေစင်နှင့် စိတ်ဓာတ်ခွန်အား သန့်စင်ခြင်း

ပူပြင်းသော နွေအပူကို အေးမြစေသည့် ရေစင်ဖြင့် စိတ်ပိုင်းဆိုင်ရာ အညစ်အကြေးများကို ဆေးကြောသန့်စင်ကြပါသည်။ ထိုရေစင်သည် ကိုယ်ခန္ဓာကိုသာမက စိတ်အတွင်းသန္တာန်ရှိ အာဃာတနှင့် ဒေါသတရားတို့ကို ငြိမ်းအေးစေကာ နှစ်သစ်အတွက် စိတ်ဓာတ်ခွန်အားအသစ်များကို ပေးစွမ်းနိုင်ပါသည်။

​မြန်မာ့ရိုးရာ ယဉ်ကျေးမှုအမွေအနှစ်ကို ထိန်းသိမ်းခြင်း

ခေတ်အဆက်ဆက် လက်ဆင့်ကမ်းလာသည့် မဟာသင်္ကြန်၏ ခိုင်မာသောယဉ်ကျေးမှုအမြုတေကို ထိန်းသိမ်းရပါမည်။ ရိုးရာမပျက် ဝတ်စားဆင်ယင်မှု၊ စကားပြောဆိုမှုနှင့် ပြုမူနေထိုင်မှုတို့သည် မြန်မာ့ဂုဏ်ကို ကမ္ဘာ့အလယ်တွင် ဝင့်ထည်စေသော အမွေအနှစ်များဖြစ်ပါသည်။

​စည်းလုံးညီညွတ်ခြင်း၏ပြယုဂ် သင်္ကြန်ပွဲတော်

လူမျိုး၊ ဘာသာ၊ ဆင်းရဲချမ်းသာ မခွဲခြားဘဲ တစ်ဦးပေါ်တစ်ဦး မေတ္တာဖြင့် ရေပက်ဖျန်းကြခြင်းသည် အမျိုးသားစည်းလုံးညီညွတ်မှုကို ခိုင်မာစေပါသည်။ ဤစည်းလုံးမှုအင်အားသည် နိုင်ငံတော်တည်ဆောက်ရေးအတွက် အခြေခံအကျဆုံးသော ရိက္ခာတစ်ရပ်ပင်ဖြစ်ပါသည်။

​ဘုရားကျောင်းကန်နှင့်ကုသိုလ်ပွားရာအတာကာလ

ပျော်ပွဲရွှင်ပွဲများအပြင် ဘာသာရေးအသိဖြင့် ကောင်းမှုကုသိုလ်ပြုကြသည့် မြတ်နိုးဖွယ်ဓလေ့သည် မြန်မာတို့၏ ဝိညာဉ်ပင်ဖြစ်ပါသည်။ ဥပုသ်သီလ ဆောက်တည်ခြင်း၊ ပရိတ်တရားတော်များ နာကြားခြင်းဖြင့် နှစ်ဟောင်းကို ကုသိုလ်ဖြင့် နှုတ်ဆက်ကြပါသည်။

​သက်ကြီးပူဇော်ပွဲနှင့် ကတညုတတရားပွားများခြင်း

လူကြီးမိဘများကို ခေါင်းဆေးမင်္ဂလာပြုပေးခြင်းနှင့် ကန်တော့ခြင်းတို့ဖြင့် ရိုသေလေးစားမှုကို ဖော်ကျူးကြပါသည်။ ဤကတညုတတရားသည် လူမှုအဖွဲ့အစည်းကို ပိုမိုခိုင်မာစေပြီး မိသားစုတန်ဖိုး ကိုမြှင့်တင်ပေးသည့် ယဉ်ကျေးမှုတစ်ရပ်ဖြစ်ပါသည်။

​ဇီဝိတဒါန ငါးလွှတ်ပွဲနှင့် မေတ္တာကမ္ဘာ

သတ္တဝါတို့၏အသက်ကို ဘေးမဲ့ပေးခြင်းဖြင့် ငြိမ်းချမ်းခြင်း၏အစပျိုးမှုကို ဖော်ဆောင်ကြပါသည်။ သတ္တဝါအားလုံး အေးချမ်းပါစေဟူသော မေတ္တာစိတ်သည် ကမ္ဘာလောကကြီးကို ပိုမိုလှပစေပြီး ငြိမ်းချမ်းရေး၏ အခြေခံအုတ်မြစ်လည်းဖြစ်ပါသည်။

​သင်္ကြန်မုန့်လုံးရေပေါ်နှင့် ဝေမျှခြင်းအနုပညာ

စုပေါင်းလုပ်ဆောင်မှုနှင့် စေတနာရှေ့ထားသည့် စတုဒိသာကျွေးမွေးလှူဒါန်းခြင်းယဉ်ကျေးမှုသည် မြန်မာတို့၏ရက်ရောမှုကို ပြသနေပါသည်။ မုန့်လုံးရေပေါ်ပြုလုပ်ရာတွင် ပါဝင်သည့် စုပေါင်းအင်အားသည် အောင်မြင်မှု၏ လျှို့ဝှက်ချက်ပင် ဖြစ်ပါသည်။

​နန်းတွင်းသင်္ကြန်မှသည် ပြည်သူ့သင်္ကြန်သို့

သမိုင်းကြောင်းအစဉ်အလာ ကြီးမားခဲ့သည့် မြန်မာ့သင်္ကြန်၏ ဖြစ်တည်မှုအဆင့်ဆင့်ကို ပြန်လည်လေ့လာခြင်းဖြင့် အမျိုးသားရေး ဂုဏ်သိက္ခာကို ခံစားသိရှိနိုင်ပါသည်။ ခေတ်အဆက်ဆက် မရိုးနိုင်သော အတာရေသဘင်သည် ပြည်သူတို့၏ အသည်းစွဲဖြစ်လာခဲ့ပါသည်။

​နိုင်ငံတော်တည်ငြိမ်အေးချမ်းရေးနှင့် ပွဲတော်၏ကဏ္ဍ

ပြည်သူများ အေးချမ်းစွာပျော်ရွှင်နိုင်ခြင်းသည် နိုင်ငံတော်တည်ငြိမ်မှု၏ ပြယုဂ်ဖြစ်သကဲ့သို့ ပွဲတော်ကာလ တည်ငြိမ်အေးချမ်းမှုသည်လည်း နိုင်ငံ၏ ပုံရိပ်ကို မြှင့်တင်ပေးနိုင်ပါသည်။ အေးချမ်းသော သင်္ကြန်သည် အေးချမ်းသောအနာဂတ်၏ အစပျိုး ခြင်းဖြစ်ပါသည်။

​ယဉ်ကျေးသိမ်မွေ့သော ပျော်ရွှင်မှု အလေ့အထကို ပျိုးထောင်ခြင်း

အစဉ်အလာမပျက် ယဉ်ကျေးစွာ ကစားကြခြင်းဖြင့် မြန်မာ့ဂုဏ်ကို မြှင့်တင်ကြရပါမည်။ ကြမ်းတမ်း သောအပြုအမူများကို ရှောင်ကြဉ်ပြီး မွန်မြတ်သော အတာရေဖြင့် တစ်ဦးကိုတစ်ဦး ချစ်ခင်စွာဖျန်းပက်ကြရမည်ဖြစ်ပါသည်။

​စီးပွားရေးကဏ္ဍနှင့် MSMEs များအပေါ် သင်္ကြန်၏ သက်ရောက်မှု

ဒေသထွက်ကုန်များနှင့် လက်မှုအနုပညာများ ပွဲတော်ကာလအတွင်း အရှိန်အဟုန်ရရှိလာခြင်းသည် ပြည်တွင်းစီးပွားရေးအတွက် အထောက်အကူပြုပြီး အသေးစားနှင့် အလတ်စားလုပ်ငန်းများအတွက် ဈေးကွက်သစ်များ ဖော်ဆောင်ပေးသည့် ကာလလည်း ဖြစ်ပါသည်။

​ခရီးသွားကဏ္ဍ ဖွံ့ဖြိုးတိုးတက်ရေးနှင့် ဒေသန္တရအလှများ

သင်္ကြန်ခရီးသွားလာမှုမှတစ်ဆင့် ပြည်တွင်း ခရီးသွားလုပ်ငန်းကိုမြှင့်တင်နိုင်ပြီး ဒေသအသီးသီး၏ ယဉ်ကျေးမှုနှင့်သဘာဝအလှများကိုလေ့လာခွင့် ရရှိစေနိုင်ပါသည်။ ဤသည်မှာ နိုင်ငံတော်၏ ခရီးသွားလုပ်ငန်းဖွံ့ဖြိုးတိုးတက်ရေးအတွက် အခွင့် အလမ်းကောင်းပင်ဖြစ်ပါသည်။

​အနာဂတ်မျိုးဆက်သစ်တို့၏ ယဉ်ကျေးမှုတာဝန်

အနာဂတ်မျိုးဆက်သစ်တို့က မိမိတို့၏ရိုးရာကို တန်ဖိုးထားထိန်းသိမ်းရမည့် အသိစိတ်ရှိရပါမည်။ နောင်လာနောက်သားများထံသို့ မှန်ကန်သော ယဉ်ကျေးမှုအမွေအနှစ်များကို လွှဲပြောင်းပေးအပ် ရန်မှာ ယနေ့လူငယ်များ၏ တာဝန်ပင်ဖြစ်ပါ သည်။

နိုင်ငံတကာသို့ ပျံ့နှံ့သွားသည့် မြန်မာ့ရေသဘင်

ကမ္ဘာက အသိအမှတ်ပြုရသည့် မြန်မာ့အလှနှင့် အတာရေသဘင်၏ ထူးခြားချက်များသည် ကမ္ဘာလှည့်ခရီးသည်များကို ဆွဲဆောင်လျက်ရှိပါသည်။ ရိုးရာပွဲတော်သည် ကမ္ဘာ့ယဉ်ကျေးမှုမြေပုံပေါ်တွင် ထင်ရှားသောနေရာတစ်ခု ရရှိထားပြီးဖြစ်ပါသည်။

​အဟောင်းကို စွန့်ပယ်၍ အသစ်ကို ကြိုဆိုခြင်း

အတိတ်မှအမှားများကို သင်ခန်းစာယူကာ ပိုမိုကောင်းမွန်သော နမူနာသစ်များ ဖော်ဆောင်ကြရပါမည်။ နှစ်ဟောင်းမှ မကောင်းသော အလေ့အထများကို အတာရေဖြင့် ဆေးကြောပြီး နှစ်သစ်တွင် သစ်လွင်သော စိတ်ကူးများဖြင့် စတင်ကြရမည် ဖြစ်ပါသည်။

​နှစ်သစ်ကူးအဓိဋ္ဌာန်နှင့် အမျိုးသားရေး ရည်မှန်းချက်

နိုင်ငံတော် ဖွံ့ဖြိုးတိုးတက်ရေးအတွက် တစ်ဦးချင်းစီမှ အားသစ်လောင်း အဓိဋ္ဌာန်ပြုကြရမည် ဖြစ်ပါမည်။ ကိုယ်စီတာဝန်ကို ကျေပွန်စွာထမ်းဆောင်ခြင်းဖြင့် နိုင်ငံတော်၏ ရည်မှန်းချက်ပန်းတိုင်များသို့ အတူတကွ ချီတက်ကြရမည်ဖြစ်ပါသည်။

​ငြိမ်းချမ်းရေးပန်းတိုင်ဆီသို့ ဦးတည်ခြင်း

သင်္ကြန်မိုးနှင့်အတူ တစ်နိုင်ငံလုံး အေးချမ်းသာယာစေမည့် ငြိမ်းချမ်းရေးမျှော်လင့်ချက်များ ထွက်ပေါ်လာမည်ဖြစ်ပါသည်။ စစ်မှန်သော ငြိမ်းချမ်းရေးသည် အားလုံး၏ဆန္ဒဖြစ်ပြီး နှစ်သစ်တွင် ထိုဆန္ဒများ ပြည့်ဝပါစေကြောင်း ဆုမွန်ကောင်း တောင်းအပ်ပါသည်။

​စည်းကမ်းပြည့်ဝသော နှစ်သစ်ကူးအထိမ်းအမှတ်

စည်းစနစ်ကျနမှုဖြင့် နိုင်ငံတော်အဆင့် ဂုဏ်သိက္ခာကိုဖော်ဆောင်သည့် ပွဲတော်ဖြစ်စေရန် အားလုံးတွင် တာဝန်ရှိပါသည်။ စည်းကမ်းရှိသော ပျော်ရွှင်မှုသည် ဘေးအန္တရာယ်ကင်းဝေးစေပြီး မြင်ရသူအပေါင်းကို ကြည်နူးစေပါသည်။

​ပြည်သူ့အကျိုးပြုလုပ်ငန်းများဖြင့် နှစ်သစ်ကိုအလှဆင်ခြင်း

ပွဲတော်အပြီးတွင် လုပ်ငန်းခွင်အသီးသီးသို့ တက်ကြွစွာဖြင့် ပြန်လည်ဝင်ရောက်ပြီး နိုင်ငံတော်တည်ဆောက်ရေးတွင် ပါဝင်ကြရပါမည်။ နှစ်သစ်၏ အားမာန်များဖြင့် မိမိတို့၏လုပ်ငန်းစွမ်းဆောင်ရည် ကိုမြှင့်တင်ကာ တိုင်းပြည်အကျိုးကို ဆောင်ရွက်ကြရမည်ဖြစ်ပါသည်။

​ဆိုရပါလျှင် မဟာသင်္ကြန်ပွဲတော်သည် ရာသီစက်ဝန်း၏ အပြောင်းအလဲတစ်ခုမျှသာမဟုတ်ဘဲ မြန်မာပြည်သူ ပြည်သားများ၏ စည်းလုံးညီညွတ်မှု၊ ချစ်ကြည်ရင်းနှီးမှုနှင့် သာယာဝပြောမှုကို ဖော်ဆောင်သည့် အမျိုးသားရေးပြယုဂ်တစ်ခုဖြစ်ပါသည်။ တန်ခူးလ၏ ပူပြင်းမှုအောက်တွင် ပိတောက်ရွှေဝါတို့က လန်းဆန်းမှုကို ပေးစွမ်းသကဲ့သို့ အတာရေစင်သည်လည်း လူတို့၏ စိတ်နှလုံးကိုအေးမြ စေပါသည်။ သင်္ကြန်ပွဲတော်မှရရှိလိုက်သော စုပေါင်းအင်အား၊ သည်းခံခွင့်လွှတ်ခြင်းနှင့် မေတ္တာတရား တို့ကိုအခြေခံ၍ ငြိမ်းချမ်းသာယာသော နိုင်ငံတော်သစ်ကို ဝိုင်းဝန်းတည်ဆောက်ကြရမည် ဖြစ်ပါသည်။

နှစ်ဟောင်းမှ အညစ်အကြေးများ ကင်းစင် လွင့်ပျောက်ကာ၊ နှစ်သစ်တွင် သန့်ရှင်းလတ်ဆတ်သော စိတ်ဓာတ်များဖြင့် နိုင်ငံတော်၏အနာဂတ်ကို အလှဆင်ကြပါစို့ဟု တိုက်တွန်းရင်း မဟာသင်္ကြန်မှသည် ငြိမ်းချမ်းသာယာသော နှစ်သစ်ဆီသို့ လျှောက်လှမ်းနိုင်ကြပါစေကြောင်း ဂုဏ်ယူစွာ ရေးသားအပ်ပါသည်။ ။

moi

       သရေစာစားခြင်းသည် တစ်နေ့တာ လုံးအတွက်     ခန္ဓာကိုယ်၏စွမ်းအင်ကိုတည်ငြိမ်စေရန် လောင်စာဖြည့်တင်းပေးသော နည်းလမ်းတစ်ခုဖြစ်သည်။ သုတေ သနပြုချက်များအရ သရေစာများသည် လူတစ်ဦး၏  နေ့စဉ်ပျမ်းမျှ   ကယ်လိုရီစားသုံးမှု၏ သုံးပုံတစ်ပုံခန့်ကို ပေးစွမ်းနိုင် သောကြောင့်  သရေစာရွေးချယ်မှုသည် ကျန်းမာရေးအတွက်  ကြီးမားသော သက်ရောက်မှုရှိနိုင်သည်။  အဓိကအရေးကြီးသော အချက်မှာ ဆာလောင်မှုကို ဖြည့်ဆည်းပေးရုံသာမက နောက်တစ် နပ်မစားခင်အထိ ခန္ဓာကိုယ်ကို စွမ်းအင်အဆက်မပြတ် ပေးစွမ်းနိုင်သည့် ကျန်းမာရေးနှင့်ညီညွတ်သော သရေစာများကို ရွေးချယ်ရန်ဖြစ်သည်။

သရေစာများစွာစားသုံးခြင်းသည် ကိုယ် အလေးချိန်တက်စေပြီး     အနည်းဆုံးကင်ဆာအမျိုးအစား ၁၃  မျိုး ဖြစ်ပွားနိုင် ခြေမြင့်မားခြင်းနှင့် ဆက်စပ်နေကြောင်း ကို  တွေ့ရှိရသည်။ ထို့ကြောင့်  သကြားသို့မဟုတ်  ဆားပါဝင်သော သရေစာများ အစား အာဟာရပြည့်ဝသောအစားအစာ များကို       ရွေးချယ်စားသုံးသင့်သည်။ အာလူးကြော်နှင့် သကြားလုံးများအစား ကောက်နှံများ၊    ဟင်းသီးဟင်းရွက်များ၊ သစ်သီးများ၊  ဒိန်ချဉ်နှင့်  အခွံမာသီးများ ကဲ့သို့ ကယ်လိုရီနည်း၍ အာဟာရပြည့်ဝ သော  အစားအစာများဖြင့်  ပြုလုပ်ထား သည့် မုန့်များကို ပိုမိုရွေးချယ်စားသုံးသင့် သည်။ ချိစ်၊ သကြားလုံးနှင့်မုန့်များကဲ့သို့သော သရေစာများကို လျှော့စားပါ။  လူ အများစုက  လုံလောက်သောအသီးအနှံ များကို    မစားကြသောကြောင့်  သရေစာ စားခြင်းဖြင့်    သစ်သီးဝလံနှင့်   ဟင်းသီး ဟင်းရွက်များကဲ့သို့      အာဟာရဓာတ်ကြွယ်ဝသောအစားအစာများ  စားသုံးမှုကို    တိုးမြှင့်ရန်  အထောက်အကူပြုနိုင်သည်။

အိမ်တွင်ကျန်းမာရေးနှင့်ညီညွတ်သော သရေစာများကို ဖန်တီးခြင်းသည် ကျန်းမာ ရေးနှင့် မညီညွတ်သောစားသောက်မှုပုံစံများကိုရှောင်ရှားရန်နှင့် အာဟာရမျှတမှု ကိုထိန်းသိမ်းရန် ရိုးရှင်းသော်လည်းထိရောက်သောနည်းလမ်းတစ်ခုဖြစ်သည်။ ပရိုတင်း၊ အမျှင်ဓာတ်၊ အစေ့အဆန်များ၊ သစ်သီးများ၊     ကျန်းမာရေးနှင့်ညီညွတ် သောအဆီများကို  ပေါင်းစပ်ခြင်းဖြင့် တည်ငြိမ်သောစွမ်းအင်နှင့် ကိုယ်အလေး ချိန်ထိန်းညှိမှုကို ပိုကောင်းစေရန် စီမံခန့်ခွဲ နိုင်သည်။ ကျန်းမာရေးနှင့်ညီညွတ်သော သရေစာများကို ပြင်ဆင်ခြင်းသည် အစား အစာပမာဏကို   ထိန်းချုပ်နိုင်ခြင်းနှင့်သတိပြုစားသုံးနိုင်ခြင်းကြောင့်       ပိုမိုကျန်းမာသောလူနေမှုပုံစံအတွက် ကုန်ကျ စရိတ်လည်း သက်သာနိုင်သည်။

ကျန်းမာရေးနှင့်ညီညွတ်သော သရေစာ၏အကျိုးကျေးဇူးများ

    မျှတသောသရေစာများသည် အဓိက အစားအစာများစားသုံးချိန် တစ်ခုနှင့်တစ်ခုကြားတွင် စွမ်းအင်လျော့ကျခြင်းကို ကာကွယ်ပေးသည်။     ကျန်းမာရေးနှင့်ညီညွတ်သောသရေစာများမှ    တည်ငြိမ် သော သွေးတွင်းသကြားဓာတ်ပမာဏကိုပံ့ပိုးပေးနိုင်ပြီး  ဦးနှောက်သို့    တည်ငြိမ် သောဂလူးကို့စ်ထောက်ပံ့မှုကို ပေးစွမ်းနိုင်သဖြင့် အာရုံစူးစိုက်မှုနှင့် မှတ်ဉာဏ်ဆိုင်ရာစွမ်းဆောင်ရည်ကို   ထိန်းညှိပေး နိုင်ကြောင်း သုတေသနပြုချက်များအရတွေ့ရှိထားသည်။    အမျှင်ဓာတ်မြင့်မားသောသစ်သီးများ၊ ဟင်းသီးဟင်းရွက်များနှင့်အစေ့အဆန်များသည် အစာချေဖျက် မှုနှင့်    အူလမ်းကြောင်းကျန်းမာရေးကိုမြှင့်တင်ပေးသည်။ အာဟာရဓာတ်ပြည့်ဝ သော  သရေစာများသည်  စားသုံးသောအစားအစာပမာဏကို    ထိန်းချုပ်နိုင်ပြီး ကျန်းမာရေးနှင့်မညီညွတ်သော သရေစာ များစားသုံးခြင်းကို လျှော့ချပေးသည်။

ကောင်းစွာပြင်ဆင်ထားသော သရေစာသည် အလုပ်၊ ကျောင်း သို့မဟုတ်  ခရီး သွားစဉ်အတွင်း အာဟာရပြည့်ဝပြီး  ဇီဝ ဖြစ်စဉ်ကို မြှင့်တင်ပေးခြင်းဖြင့်  စွမ်းအင် လျော့ကျခြင်းကို ကာကွယ်ပေးသည်။ ပရို တင်းဓာတ်ကြွယ်ဝသော အစားအစာများ၊ အမျှင်ဓာတ်၊  အစေ့အဆန်များ၊  သစ်သီးများတွင်    ကျန်းမာရေးနှင့်ညီညွတ်သော အဆီများ ရောနှောပါဝင်ခြင်းကြောင့် တစ်နေ့တာလုံး  ခွန်အားဖြစ်စေသည်။ အာဟာရဓာတ်ပြည့်ဝသော သရေစာများသည်  ဆာလောင်မှုကိုလျှော့ချပေးကာသွေးတွင်းသကြားဓာတ် ထိန်းညှိမှုကို တိုးတက်ကောင်းမွန်စေပြီး ကိုယ်အလေးချိန် ထိန်းညှိရန်လည်း အထောက်အကူပြုသည်။

ညဘက်သရေစာစားခြင်းနှင့်ကိုယ်အလေးချိန်

    ညဘက်တွင်     အစာစားခြင်းသည် ကိုယ်အလေးချိန်တက်နိုင်ခြေ    မြင့်မားကြောင်း အထောက်အထားတချို့ရှိသည်။ ထို့ကြောင့် ညဘက်တွင်စားမည်ဆိုပါက ဟင်းသီးဟင်းရွက်များ၊  သစ်သီးများ၊ ကောက်နှံများ၊ နို့ထွက်ပစ္စည်းများ၊ ကြက်ဥ နှင့်အခွံမာသီးများကဲ့သို့   ကယ်လိုရီနည်း ၍   အာဟာရဓာတ်ကြွယ်ဝသော  အစား အစာများကို ရွေးချယ်ခြင်းသည် အကောင်း ဆုံးဖြစ်သည်။

အာဟာရမျှတသော သရေစာ၏ အစိတ်အပိုင်းများ

    အာဟာရ      ပြည့်စုံကောင်းမွန်သော သရေစာပုံစံတွင် အမျှင်ဓာတ်ကြွယ်ဝသောကာဗိုဟိုက်ဒရိတ်၊ ပရိုတင်းနှင့် ကျန်းမာ ရေးနှင့်ညီညွတ်သောအဆီများ ပေါင်းစပ် ပါဝင်သင့်သည်။    အာဟာရမျှတသောသရေစာ၏ အဓိကအစိတ်အပိုင်းများမှာအောက်ပါအတိုင်းဖြစ်သည် -

အမျှင်ဓာတ်ကြွယ်ဝသောကာဗိုဟိုက်ဒရိတ်

    ကာဗိုဟိုက်ဒရိတ်သည်   ခန္ဓာကိုယ်အတွက်  အဓိကလောင်စာဖြစ်သည်။ သကြားဓာတ်များသော   မုန့်များထက်အမျှင်ဓာတ်ပါသော ကာဗိုဟိုက်ဒရိတ်ကိုရွေးချယ်ခြင်းဖြင့်  စွမ်းအင်ကို   တဖြည်း ဖြည်းချင်း  ထုတ်လွှတ်ပေးနိုင်သည်။ ဥပမာ-အုတ်ဂျုံ၊   ကောက်နှံတစ်ခုလုံးပါသောပေါင်မုန့်နှင့် အစေ့အဆန်များသည် ကြာရှည်ခံစွမ်းအင်နှင့်အမျှင်ဓာတ်ကိုထောက်ပံ့ပေးနိုင်သည်။ လတ်ဆတ်သော အသီးအနှံများ (ပန်းသီး၊ စပျစ်သီး၊ ဘယ်ရီ သီး၊ လိမ္မော်သီး သို့မဟုတ် သစ်တော်သီး) နှင့်  ဟင်းသီးဟင်းရွက်များ  (မုန်လာဥနီ၊ သခွားသီး၊ တရုတ်နံနံနှင့် ငရုတ်သီး) သည် အမျှင်ဓာတ်အပြင် ဗီတာမင်၊ သတ္တုဓာတ် နှင့် ဓာတ်တိုးဆန့်ကျင်ပစ္စည်းများကို ပေး စွမ်းနိုင်သည်။ 

ပရိုတင်း

     ပရိုတင်းသည် ကြာရှည်စွာဗိုက်ပြည့်မှု ကိုခံစားစေပြီး ကြွက်သားကျန်းမာရေးကို ထောက်ပံ့ပေးသည်။  ကြက်ဥပြုတ်တွင်  မရှိမဖြစ်လိုအပ်သော     အမိုင်နိုအက်စစ် များ ကြွယ်ဝသည်။ ကာဗိုဟိုက်ဒရိတ်နှင့် တွဲစားသောအခါ သွေးတွင်းသကြားဓာတ် တက်မလာအောင် ထိန်းညှိပေးနိုင်သည်။ ဂရိဒိန်ချဉ်သည် ပရိုတင်းဓာတ်နှင့် ပရိုဘိုင် အိုတစ်များ မြင့်မားစွာပါဝင်ပြီး အစာအိမ် ကျန်းမာရေးကို ကောင်းမွန်စေသည်။ ပြည့်ဝဆီစားသုံးမှုကိုလျှော့ချရန်အဆီ နည်းသောဒိန်ခဲအမျိုးအစားများကို  ရွေး ချယ်ပါ။ ဗာဒံစေ့၊ သစ်ကြားသီး၊ နေကြာစေ့ သို့မဟုတ် ရွှေဖရုံစေ့များကဲ့သို့ အခွံမာသီး များနှင့် အစေ့အဆန်များသည်  ပရိုတင်း၊ ကျန်းမာရေးနှင့်ညီညွတ်သော  အဆီများ ကို ပေးစွမ်းနိုင်သည်။  ပဲအမျိုးမျိုးသည်  အာဟာရသိပ်သည်းသော  အပင်အခြေခံပရိုတင်းအရင်းအမြစ်ဖြစ်သည်။

ကျန်းမာရေးနှင့်ညီညွတ်သောအဆီများ

    ကျန်းမာရေးနှင့်ညီညွတ်သော  အဆီများသည် ဦးနှောက်၏လုပ်ဆောင်ချက်ကို ပံ့ပိုးပေးပြီး စိတ်ကျေနပ်မှုကို တိုးမြှင့်စေ ခြင်းဖြင့် ဗိုက်ဆာခြင်းကို ဟန့်တားပေး သည်။ ထောပတ်သီး၊ သံလွင်သီး၊ ဗာဒံစေ့၊ မြေပဲ သို့မဟုတ် သီဟိုဠ်စေ့၊ အစေ့အဆန်များ (နေကြာစေ့၊ဖရုံစေ့)တွင် ကျန်းမာရေး နှင့်ညီညွတ်သော မိုနိုမပြည့်ဝဆီများပါဝင် သည်။  အနက်ရောင်ချောကလက်ကဲ့သို့ ပစ္စည်းများကို   ပေါင်းစပ်ထည့်သွင်းခြင်း ဖြင့် ဓာတ်တိုးဆန့်ကျင်ပစ္စည်းများကို ပံ့ပိုး ပေးကာ   စိတ်ကျေနပ်မှုကို  တိုးမြင့်စေ သည်။

သရေစာများကို ပြင်ဆင်ရန် အကြံပြုချက်များ 

      သရေစာများကို လတ်ဆတ်နေစေရန်နှင့်    အနံ့အရသာများ    ရောနှောခြင်းမှ တားဆီးရန် အကန့်များပါသော ဘူးများကို အသုံးပြုပါ။  နို့ထွက်ပစ္စည်း   သို့မဟုတ် ဥများပါဝင်ပါက  အအေးဓာတ်ပါသော ထမင်းဘူးကို  အသုံးပြုနိုင်သည်။ အချိန်ကုန်သက်သာစေရန် သရေစာဘူးများကို ရက်သတ္တပတ်အတွက်    တစ်ကြိမ်တည်း ပြင်ဆင်နိုင်သည်။    အသွင်အပြင်နှင့် အရောင်များကို    ရောနှောပြင်ဆင်ခြင်းဖြင့်    သရေစာသည်   အမြင်အာရုံနှင့် ဆွဲဆောင်မှုရှိပြီး စိတ်ကျေနပ်မှုရရှိစေနိုင်သည်။

အချုပ်အားဖြင့်ဆိုရသော် တစ်နေ့တာ လုံးဗိုက်ပြည့်နေစေရန်  ပရိုတင်း၊ အမျှင် ဓာတ်ကြွယ်ဝသော  ကာဗိုဟိုက်ဒရိတ်၊ကျန်းမာရေးနှင့်ညီညွတ်သည့်အဆီများ ပါဝင်သော  သရေစာများကို   ရွေးချယ်စားသုံးသင့်သည်။ အာဟာရကြွယ်ဝသောသရေစာများကိုစားသုံးရန်  ကြိုတင်စီစဉ် ခြင်းအားဖြင့်  ဆာလောင်မှုကို စီမံခန့်ခွဲ နိုင်ပြီး  အစာစားခြင်းဖြင့်  စိတ်ပျော်ရွှင် ကျေနပ်မှုကိုခံစားရစေကာ ကိုယ်အလေးချိန်စီမံခန့်ခွဲမှု ရည်မှန်းချက်များနှင့် အလုံးစုံ ကျန်းမာရေးကို ပံ့ပိုးပေးနိုင်သည်။ လတ်ဆတ်၍ အာဟာရဓာတ်ကြွယ်ဝသော အိမ်လုပ်သရေစာများကို စားသုံးခြင်းသည် ပိုမိုကောင်းမွန်သောအာဟာရနှင့် ပိုမိုကျန်းမာသော  လူနေမှုပုံစံဆီသို့ လျှောက်လှမ်းနေသော   ခြေလှမ်းတစ်ခု ဖြစ်ပါကြောင်း  ကျန်းမာသုတမျှဝေပေး လိုက်ရပါသည်။

MWD

“အာရောဂျံ ပရမံလာဘံ” ကျန်းမာခြင်းသည်လာဘ်တစ်ပါးဟု ဆိုရိုးရှိသည်နှင့်အညီ လောကတွင် ကျန်းမာရေးပြည့်စုံကောင်းမွန်ခြင်းသည် ဘုရားပေးသော ဆုလာဘ်တစ်ပါးဖြစ်ပါသည်။ ထို့ကြောင့် ကျန်းမာရေးဝန်ကြီးဌာနအနေဖြင့် လူတိုင်းသက်တမ်းစေ့အသက်ရှည်စွာ နေထိုင်နိုင်ရေးနှင့် လူတိုင်းရောဂါဘယကင်းရှင်းရေးတို့ကို ရည်မှန်းချက်ထား၍ အဆင့်အတန်းမြင့်မားသော ကျန်းမာရေးစောင့်ရှောက်မှုလုပ်ငန်းများကို အရှိန်အဟုန်မြှင့် ဆောင်ရွက်လျက်ရှိပါသည်။

ထိုသို့ဆောင်ရွက်ရာတွင် ကျေးလက်ဒေသအောက်ခြေအထိ ကျန်းမာရေးအသိပညာပေးခြင်း၊ ရောဂါကာကွယ်တားဆီးခြင်း၊ ရောဂါဖြစ်ပွားလာလျှင် ထိရောက်စွာ ကုသပေးခြင်း၊ ကျန်းမာရေးလူ့စွမ်းအားအရင်းအမြစ်များ မွေးထုတ်ခြင်း၊ ဆေးသုတေသနလုပ်ငန်းများ၊ တိုင်းရင်းဆေးပညာ တိုးတက်မြင့်မားစေရေးလုပ်ငန်းများ၊ အစားအသောက်နှင့် ဆေးဝါးကွပ်ကဲရေးလုပ်ငန်းများကို ဦးစီးဌာနခြောက်ခုဖြင့် အထူးအလေးပေးပြီး စနစ်တကျ ဆောင်ရွက်လျက်ရှိပါသည်။

ခံတွင်းကျန်းမာမှ လူကျန်းမာမည်

ကျန်းမာရေးဝန်ကြီးဌာနအနေဖြင့် ပြည်သူများ၏ ကျန်းမာရေးစောင့်ရှောက်မှုလုပ်ငန်းများ ဆောင်ရွက်ရာတွင် အရေးကြီးပြီး အချို့သောရောဂါများ၏ အစပြုရာနေရာဖြစ်သည့် သွားနှင့်ခံတွင်းကျန်းမာရေးကိုလည်း အထူးအလေးထားဆောင်ရွက်ပေးလျက်ရှိပါသည်။ ခံတွင်းကျန်းမာမှ လူကျန်းမာမည် (No Health without Oral Health) ဆိုသော ဆောင်ပုဒ်နှင့်အညီ သွားနှင့်ခံတွင်းရောဂါများဖြစ်သည့် သွားပိုးစားရောဂါ၊ သွားဖုံးရောဂါနှင့် ခံတွင်းကင်ဆာရောဂါများသည် အထွေထွေရောဂါများဖြစ်သည့် နှလုံးနှင့် သွေးကြောရောဂါ၊ ဆီးချိုသွေးချိုရောဂါနှင့် ကင်ဆာရောဂါများကဲ့သို့ပင် ဆေးနှင့် ဆေးရွက်ကြီး၊ အရက်၊ သကြားနှင့် အာဟာရတန်ဖိုးနည်းပါးသည့် အစားအစာများကြောင့် ဖြစ်ပွားရခြင်းဖြစ်ပါသည်။ ပုံမှန်အားဖြင့် လူ့ခံတွင်းတွင် ရောဂါပိုးပေါင်း ၅၀၀ ကျော်ရှိပြီး ရောဂါဖြစ်စေသောပိုးနှင့် အကျိုးပြုပိုးမွှားများသည် ညီညွတ်မျှတစွာရှိနေသဖြင့် ရောဂါဖြစ်ပွားမှုမရှိခြင်းဖြစ်ပါသည်။ အဆိုပါမျှခြေအနေအထား ပျက်ယွင်းသွားပါက သွားနှင့် ခံတွင်းကျန်းမာရေးထိခိုက်မှုရှိလာပြီး နောက်ဆက်တွဲအနေဖြင့် နှလုံးနှင့် သွေးကြောကျဉ်းရောဂါ၊ မှတ်ဉာဏ် ချို့ယွင်းအားနည်းခြင်း၊ အဆုတ်ရောဂါဝေဒနာများ၊ သွေးချိုဆီးချို ရောဂါ၊ သားပျက်သားလျှောခြင်း၊ ကလေးအသေမွေးခြင်း၊ လမစေ့ဘဲမွေးဖွားခြင်း၊ ကိုယ်အလေးချိန်မပြည့်သော ကလေးများမွေးဖွားခြင်းနှင့် မွေးရာပါနှလုံးရောဂါဝေဒနာရှင် ကလေးများမွေးဖွားခြင်း၊ သန္ဓေမအောင်ခြင်း၊ ကင်ဆာရောဂါ၊ ကျောက်ကပ်ရောဂါ၊ နာတာရှည်အဆစ်ရောင်ရောဂါနှင့် အမျိုးသားများပန်းသေခြင်း စသည့်ဆိုးကျိုးများကို ကြုံတွေ့ခံစားရမည်ဖြစ်ပါသည်။

သွားနှင့်ခံတွင်းကျန်းမာရေးတွင် သွားဖုံးရောင်ရမ်းခြင်း၊ သွားဖုံးမှ သွေးထွက်ခြင်းဖြစ်ပွားရာ ခံတွင်းထဲတွင်ရှိသော ရောဂါပိုးများသည် သွားဖုံးရှိပေါက်ပြဲသွားသော သွေးကြောများအတွင်းသို့ ဝင်ရောက်ပြီး သွေးကြောနံရံများကို ရောင်ရမ်းပျက်စီးစေပါသည်။ အဆိုပါပျက်စီးနေသော သွေးကြောနံရံများကို ခန္ဓာကိုယ်၏ ကိုယ်ခံစွမ်းအားစနစ်မှ တုံ့ပြန်ပြုပြင်မွမ်းမံရာတွင် ကျန်းမာရေးကိုထိခိုက်စေနိုင်သော အခြေအနေဖြစ်သည့် သွေးကြောနံရံများ ထူထဲမာကြောလာလေ့ရှိပါသည်။ ထို့ကြောင့် ကျန်းမာရေးဝန်ကြီးဌာနအနေဖြင့် ကျန်းမာရေးအတွက် အရေးကြီးသော သွားနှင့် ခံတွင်းကျန်းမာရေးကဏ္ဍ ဖွံ့ဖြိုးတိုးတက်ရေးအတွက် နိုင်ငံတော်ဘဏ္ဍာငွေများ တိုးမြှင့်ကျခံသုံးစွဲကာ ကျန်းမာရေးစောင့်ရှောက်မှုလုပ်ငန်းများကို အဆင့်မြှင့်တင်ခဲ့ပါသည်။

ပြည်သူများ စိတ်အေးချမ်းသာစွာ ကုသမှုခံယူနိုင်ပြီ

ယခင်က သွားနှင့် ခံတွင်းကျန်းမာရေးကိစ္စရပ်များအတွက် ပြည်သူ့ဆေးရုံများတွင် ပြင်ပလူနာအနေဖြင့်သာ ဝန်ဆောင်မှုပေးနေရာမှ နေပြည်တော်တွင် ပထမဆုံးသွားနှင့် ခံတွင်းအထူးကုဆေးရုံကြီးအဖြစ် သွားဘက်ဆိုင်ရာရောဂါကုသမှုများကို One Stop Service အနေဖြင့် ဆောင်ရွက်ခဲ့ပါသည်။ ထို့ပြင် ၂၀၂၃ ခုနှစ်တွင် ရန်ကုန်သွားနှင့်ခံတွင်းအထူးကုဆေးရုံ (သာကေတ)၊ ၂၀၂၄ ခုနှစ်တွင် မန္တလေးသွားနှင့် ခံတွင်းအထူးကုဆေးရုံ (ကန်တော်နဒီ) နှင့် ရန်ကုန်တက္ကသိုလ်များဆေးရုံတို့တွင် သွားနှင့်ခံတွင်းအထူးကုဌာနများ အောင်မြင်စွာဖွင့်လှစ်နိုင်ခဲ့ပြီး သွားနှင့်ခံတွင်းလူနာများကို အရည်အသွေးမြင့်မားသည့် ကျန်းမာရေးစောင့်ရှောက်မှုများကို ဝန်ဆောင်မှုကောင်းကောင်းဖြင့် ပေးအပ်နိုင်ခဲ့သည့်အတွက် ပြည်သူများ စိတ်အေးချမ်းသာစွာ ကုသမှုခံယူနိုင်ပြီဖြစ်ပါသည်။ အဆိုပါသွားဆေးရုံများ၌ စနေ၊ တနင်္ဂနွေရုံးပိတ်ရက်များတွင်ပါ သွားနှင့်ခံတွင်း ကျန်းမာရေးစောင့်ရှောက်မှုပေးလျက်ရှိပါသည်။ ထို့ပြင် ရန်ကုန်မြို့ရှိ မင်္ဂလာဒုံကူးစက်ဆေးရုံကိုလည်း ရန်ကုန်သွားနှင့်ခံတွင်း အထူးကုဆေးရုံ (မင်္ဂလာဒုံ) အဖြစ် တိုးချဲ့ဖွင့်လှစ်နိုင်ရန် ပြင်ဆင်ဆောင်ရွက်လျက်ရှိရာ မကြာမီအချိန်အတွင်းမှာပင် ပြည်သူများကို သွားနှင့်ခံတွင်း ကျန်းမာရေးစောင့်ရှောက်မှု ပိုမိုဆောင်ရွက်ပေးနိုင်တော့မည်ဖြစ်ပါသည်။

ကျန်းမာရေးဝန်ကြီးဌာနအနေဖြင့် လူတိုင်းလက်လှမ်းမီသော ကျန်းမာရေးစောင့်ရှောက်မှု (Universal Health Coverage) ရရှိနိုင်ရေးအတွက် ဆေးရုံများတွင် လူနာများ ဆေးကုသစရိတ်လျော့နည်း သက်သာစေရန် ကုသမှုတိုင်းကို အခမဲ့နီးပါး ဆောင်ရွက်ပေးနေသည့်အပြင် လူနာများအနေဖြင့် စရိတ်ကုန်ကျမှုမရှိစေရန် ဝေးလံခက်ခဲသည့် ဒေသများအထိ နယ်လှည့်ကွင်းဆင်းဆေးကုသခြင်း လုပ်ငန်းများ (သွားနှင့် ခံတွင်းကျန်းမာရေးစောင့်ရှောက်မှု လုပ်ငန်းများအပါအဝင်) ဆောင်ရွက်ပေးလျက်ရှိပါသည်။ ပြည်သူများအား သွားနှင့် ခံတွင်းဆိုင်ရာ ကျန်းမာရေးစောင့်ရှောက်မှု တိုးတက်ဖြည့်ဆည်းပေးနိုင်ရေးအတွက် ကွင်းဆင်းဆေးကုသခြင်းလုပ်ငန်းများ၊ ကျောင်းကျန်းမာရေးလုပ်ငန်းများကို ပြည်သူ့ဆေးရုံများ၊ ပြည်သူ့ကျန်းမာရေးဦးစီးဌာနနှင့် သွားဘက်ဆိုင်ရာ ဆေးတက္ကသိုလ်များမှ သွားဆရာဝန်များသည် အတူတကွ ပူးပေါင်းဆောင်ရွက်လျက်ရှိပါသည်။

ကျန်းမာရေးဝန်ဆောင်မှုများ အပြည့်အဝပေးနိုင်ရေး အလုပ်များ ခန့်အပ်တာဝန်ပေး

ကိုဗစ်-၁၉ ကပ်ရောဂါနှင့်အတူ ၂၀၂၁ ခုနှစ်တွင် ဖြစ်ပေါ်ခဲ့သော အခြေအနေများကြောင့် သွားကျန်းမာရေး လူ့စွမ်းအားအရင်း အမြစ်များလျော့နည်းခဲ့ရာ အဆိုပါလိုအပ်ချက်များကို အမြန်ဆုံး ကုစားဖြည့်တင်းပေးနိုင်ရေးအတွက် ကျန်းမာရေးလူ့စွမ်းအားအရင်း အမြစ်ဦးစီးဌာန၊ သွားဘက်ဆိုင်ရာ ဆေးတက္ကသိုလ်များမှ အရည်အချင်းပြည့်ဝသည့် သွားဘက်ဆိုင်ရာဆရာဝန်များ၊ သွားကျန်းမာရေးစောင့်ရှောက်သူ သူနာပြုဆရာမများ၊ သွားတုကျွမ်းကျင်သူများကို မွေးထုတ်ပေးနေသကဲ့သို့ ကုသရေးဦးစီးဌာနကလည်း သွားကျန်းမာရေးအကူသူနာပြုများ၊ လက်ထောက်သွားတုကျွမ်းကျင်သူများကို ဆေးရုံလုပ်ငန်းအခြေပြု သင်တန်းများဖွင့်လှစ်မွေးထုတ်ကာ ကျန်းမာရေးဝန်ဆောင်မှုများ အပြည့်အဝပေးနိုင်ရေးအတွက် အလုပ်များခန့်အပ်တာဝန်ပေးခဲ့ခြင်းကြောင့် လက်ရှိတွင် သွားနှင့်ခံတွင်းကျန်းမာရေး စောင့်ရှောက်မှုမှာ ယခင်ထက်သာလွန်စွာ ဆောင်ရွက်ပေးနိုင်ခဲ့ပြီ ဖြစ်ပါသည်။

၂၀၂၃ ခုနှစ်တွင် နိုင်ငံတော်အစိုးရ၏ ပံ့ပိုးမှုဖြင့် ကျန်းမာရေးဝန်ကြီးဌာနက ဦးဆောင်ကျင်းပခဲ့သော သွားဘက်ဆိုင်ရာဆေးပညာ ညီလာခံတွင် အကြံပြုတင်ပြဆွေးနွေးခဲ့သည့် Digital Dentistry ကို ကျန်းမာရေးဝန်ကြီးဌာနအနေဖြင့် ချက်ချင်းလက်တွေ့အကောင် အထည်ဖော်ဆောင်ရွက်နိုင်ခဲ့ပြီး သွားကျန်းမာရေးစောင့်ရှောက်မှု ကဏ္ဍကို နိုင်ငံတကာအဆင့်အတန်းမီစွာ ဆောင်ရွက်နိုင်ခဲ့ပြီးဖြစ်ပါသည်။ ခေတ်မီသွားတုပြုလုပ်ခြင်းဆိုင်ရာနည်းစနစ် (Digital Dentistry Lab) များအဖြစ် နေပြည်တော်၊ ရန်ကုန်မြို့နှင့် မန္တလေးမြို့တို့ရှိ သွားနှင့်ခံတွင်းဆိုင်ရာ အထူးကုဆေးရုံများတွင် တည်ထောင်ဖွင့်လှစ်ထားပြီး တစ်နိုင်ငံလုံးသို့ ဝန်ဆောင်မှုဖြန့်ဝေနိုင်ရန် စီစဉ်ဆောင်ရွက်လျက်ရှိပါသည်။ လက်ရှိအဆိုပါဆေးရုံများတွင် အငြိမ်းစား ဝန်ထမ်းများနှင့် သက်ကြီးဘိုးဘွားများ အာဟာရပြည့်ဝစွာ စားသောက်နိုင်ရေးအတွက် သွားတုများကို အခမဲ့တပ်ဆင်ပေးလျက်ရှိပါသည်။ ကျန်းမာရေးဝန်ကြီးဌာန၏ လမ်းညွှန်ပံ့ပိုးမှုဖြင့် သွားတုတပ်ဆင်ခြင်း အခမဲ့ဝန်ဆောင်မှုကို မြန်မာနိုင်ငံတွင် ၂၀၂၃ ခုနှစ်မှစ၍ ဝန်ဆောင်မှုပေးလျက်ရှိပါသည်။

ကိုယ်ဝန်ဆောင်များတွင် သွားကျန်းမာရေးကြောင့် ဖြစ်ပေါ်တတ်သော ဆိုးကျိုးများကို လျော့နည်းကျဆင်းစေရေးအတွက်လည်း ကိုယ်ဝန်ဆောင်မိခင်များနှင့် မီးဖွားပြီးကလေးမိခင်များ၏ ခံတွင်းသန့်ရှင်းကျန်းမာရေးကောင်းမွန်စေရန်အတွက်လည်း ပြည်သူ့ဆေးရုံများရှိ သွားဆေးခန်းများတွင် မဖြစ်မနေဆောင်ရွက်ပေးရန် လုပ်ငန်းလမ်းညွှန်ချမှတ်ပေးထားပြီးဖြစ်ပါသည်။

ကျန်းမာရေးဝန်ကြီးဌာနအနေဖြင့် နိုင်ငံတစ်ဝန်းရှိ မွေးရာပါနှုတ်ခမ်းကွဲ၊ အာခေါင်ကွဲလူနာများကိုလည်း ဆေးရုံကြီးများတွင် အခမဲ့ခွဲစိတ်ကုသပေးခြင်း၊ မွေးရာပါနှုတ်ခမ်းကွဲ၊ အာခေါင်ကွဲကလေးငယ်များ မူလတန်းကျောင်းမတက်မီနှုတ်ခမ်းကွဲ၊ အာခေါင်ကွဲခြင်းကို ပြုပြင်ခွဲစိတ်ပေးခြင်းနှင့် ထိုကလေးငယ်နှင့် မိသားစုများ၏ လူမှုရေးအခက်အခဲများကို ဖြေရှင်းဆောင်ရွက်ပေးလျက်ရှိပါသည်။ ထိုသို့ဆောင်ရွက်ရာတွင် ကျန်းမာရေးဝန်ကြီးဌာနသည် သက်ဆိုင်ရာတိုင်းဒေသကြီး၊ ပြည်နယ်အစိုးရအဖွဲ့များ၊ မြန်မာနိုင်ငံမိခင်နှင့် ကလေးစောင့်ရှောက်ရေးအသင်း၊ အမျိုးသမီးရေးရာအဖွဲ့ချုပ်နှင့် နိုင်ငံတကာအဖွဲ့အစည်းများနှင့် ပူးပေါင်းဆောင်ရွက်လျက်ရှိပါသည်။

ကျန်းမာရေးဝန်ကြီးဌာနက ကျန်းမာရေးစောင့်ရှောက်မှုအနေဖြင့် ကဏ္ဍစုံတွင် အချိုးညီတိုးတက်ဖွံ့ဖြိုးအောင် ဆောင်ရွက်ပေးလျက်ရှိရာ သွားနှင့်ခံတွင်းကျန်းမာရေးစောင့်ရှောက်မှုတွင် ယခုထက်ပိုမိုတိုးတက်ကောင်းမွန်သော ဝန်ဆောင်ကုသမှုများ ပေးအပ်နိုင်ရေးအတွက် နိုင်ငံတော်အစိုးရ၏ ပံ့ပိုးဖြည့်ဆည်းမှု၊ ပြည်သူတစ်ရပ်လုံး၏ ပူးပေါင်းကူညီမှုများဖြင့် လူတိုင်းရောဂါဘယကင်းရှင်းပြီး သက်တမ်းစေ့နေနိုင်အောင် အစဉ်ကြိုးစားဆောင်ရွက်ပေးလျက်ရှိပါကြောင်း တင်ပြအပ်ပါသည်။ ။

moi

Photo: Gemini

     ယနေ့ ကမ္ဘာ့စီးပွားရေးဖွံ့ဖြိုးတိုးတက်ရန် အကောင်အထည်ဖော်ဆောင်မှု လုပ်ငန်းစဉ်များတွင် ယဉ်ကျေးမှုနှင့် တီထွင်ဖန်တီးမှုဆိုင်ရာ လုပ်ငန်းများ (Cultural and Creative Industries – CCIs)သည် အရေးပါသော ကဏ္ဍတစ်ခုအဖြစ် ဦးတည်လာသည်။ အကြောင်းမူကား  ယဉ်ကျေးမှုနှင့် တီထွင်ဖန်တီးမှုဆိုင်ရာ လုပ်ငန်းများသည် ယဉ်ကျေးမှုအရင်းအမြစ်များနှင့် လူသားတို့၏တီထွင် ဖန်တီးနိုင်စွမ်းကို အသုံးပြု၍ စီးပွားရေးတန်ဖိုး၊ လူမှုရေးတန်ဖိုးနှင့် ယဉ်ကျေးမှုတန်ဖိုးတို့ကို မြှင့်တင်ပေးနိုင်ခြင်းတို့ကြောင့် နိုင်ငံများစွာတွင် ဖွံ့ဖြိုးရေးမဟာဗျူဟာချမှတ်ရေး၌ထည့်သွင်းရေးဆွဲ၍ အလေးပေးဆောင်ရွက်လာကြသည်။

မြန်မာနိုင်ငံသည် ယဉ်ကျေးမှုအမွေအနှစ်များနှင့် ရိုးရာလက်မှုပညာရပ်များ ကြွယ်ဝသော နိုင်ငံတစ်နိုင်ငံဖြစ်သည့် အားလျော်စွာ ယဉ်ကျေးမှုနှင့် တီထွင်ဖန်တီးမှုဆိုင်ရာလုပ်ငန်းများကို မြှင့်တင်ပေးနိုင်ရေးတွင် အခွင့်အလမ်းများစွာရှိသည်။

အဓိပ္ပာယ်ဖွင့်ဆိုချက်

     ယဉ်ကျေးမှုနှင့် တီထွင်ဖန်တီးမှုဆိုင်ရာ လုပ်ငန်းများ (Cultural and Creative Industries–CCIs) ဆိုသည်မှာ ယဉ်ကျေးမှု(Culture)၊ တီထွင်ဖန်တီးမှု(Creativity)၊ အသိပညာ (Knowledge)နှင့် ဉာဏမူပိုင်ခွင့်(Intellectual Property)တို့ကို အခြေခံ၍ ယဉ်ကျေးမှုဆိုင်ရာ ကုန်ပစ္စည်းများနှင့် ဝန်ဆောင်မှုများကို ဖန်တီးထုတ်လုပ်ပြီး ယဉ်ကျေးမှုတန်ဖိုး၊ စီးပွားရေးတန်ဖိုးနှင့် လူမှုရေးတန်ဖိုးများ ဖန်တီးမြှင့်တင်ပေးသောလုပ်ငန်းများဟု ကုလသမဂ္ဂပညာရေး၊ သိပ္ပံပညာနှင့် ယဉ်ကျေးမှုဆိုင်ရာအဖွဲ့အစည်း (United Nations Educational, Scientific and Cultural Organization - UNESCO)က ဖွင့်ဆိုထားသည်။ 

တစ်နည်းအားဖြင့် ယဉ်ကျေးမှုနှင့် တီထွင်ဖန်တီးမှုဆိုင်ရာ လုပ်ငန်းများ (CCIs)သည် ယဉ်ကျေးမှုအရင်းအမြစ်များနှင့် ဖန်တီးမှုစွမ်းရည်များကို  အသုံးပြု၍ အလုပ်အကိုင်ဖန်တီးခြင်း၊  စီးပွားရေး တိုးတက်မှုကိုအားပေးခြင်း၊ ယဉ်ကျေးမှုအမွေအနှစ်များကို ထိန်းသိမ်းစောင့်ရှောက်ခြင်းတို့ အတွက် ဆောင်ရွက်သည့် လုပ်ငန်းများပင်ဖြစ်ပေသည်။

ယဉ်ကျေးမှုနှင့် တီထွင်ဖန်တီးမှုဆိုင်ရာ လုပ်ငန်းများ (CCIs) တွင် အောက်ဖော်ပြပါကဏ္ဍများ ပါဝင်သည်-

-          ဖျော်ဖြေရေးအနုပညာ (ကပွဲ၊ ပြဇာတ်၊ ရိုးရာအကအလှ)၊

-          အနုပညာ (ပန်းချီ၊ ပန်းပုနှင့်လက်ရာအနုပညာများ)၊

-          ရုပ်ရှင်နှင့် မီဒီယာ၊

-          ဂီတ၊

-          ယဉ်ကျေးမှုဆိုင်ရာ ခရီးသွားလုပ်ငန်း၊

-          ရိုးရာလက်မှုပညာနှင့် ဒီဇိုင်းလုပ်ငန်း၊

-          ယဉ်ကျေးမှုအမွေအနှစ်နှင့် ဆက်စပ်သော ဒစ်ဂျစ်တယ်တီထွင်ဖန်တီးမှုဆိုင်ရာလုပ်ငန်း။

မြန်မာ့ရိုးရာလက်မှုပညာများ၏အခန်းကဏ္ဍ

     မြန်မာ့ဒြပ်မဲ့ယဉ်ကျေးမှုအမွေအနှစ်များ(Myanmar’s Intangible Cultural Heritage) ဖြစ်သည့် ရိုးရာလက်မှုပညာများနှင့် ရိုးရာအနုပညာများသည် ယဉ်ကျေးမှုနှင့် တီထွင်ဖန်တီးမှုဆိုင်ရာလုပ်ငန်းများပင်ဖြစ်ပေသည်။

ပန်းပဲ၊ ပန်းထိမ်၊ ပန်းတဉ်း၊ ပန်းတော့၊ ပန်းရန်၊ ပန်းပု၊ ပန်းတမော့၊ ပန်းပွတ်၊ ပန်းချီ၊ ပန်းယွန်း အစရှိသည့် မြန်မာ့ပန်းဆယ်မျိုး  လက်မှုအနုပညာများသည် အနုပညာတန်ဖိုးရှိရုံသာမက စီးပွားရေးတန်ဖိုးကိုလည်း  ဖန်တီးပေးနိုင်သော ယဉ်ကျေးမှုနှင့် တီထွင်ဖန်တီးမှုဆိုင်ရာလုပ်ငန်းများ(CCIs) ဖြစ်သည်။

အထူးသဖြင့် ပုဂံဒေသတွင် ထင်ရှားလျက်ရှိသည့် ပန်းယွန်းလုပ်ငန်းသည် ရိုးရာဒီဇိုင်းများ၊ အနုပညာလက်ရာများနှင့် အတတ်ပညာများပေါင်းစပ်ထားသည့် ယဉ်ကျေးမှုထုတ်ကုန်များဖြစ်သည်။ အဆိုပါထုတ်ကုန်များသည် ယဉ်ကျေးမှုအမွေအနှစ် ထိန်းသိမ်းရေး၊  ခရီးသွားဈေးကွက်ဖွံ့ဖြိုးရေးနှင့် လက်မှုပညာရှင်များ၏ အသက်မွေးဝမ်းကျောင်းတို့ကို အထောက်အကူပြုသည့် ယဉ်ကျေးမှုနှင့် တီထွင်ဖန်တီးမှုဆိုင်ရာ လုပ်ငန်းဖြစ်ပေသည်။

လက်မှုပညာများသည် ယဉ်ကျေးမှုအမွေအနှစ်ကို ထိန်းသိမ်းပေးရုံသာမက ခရီးသွားလုပ်ငန်းနှင့် ပေါင်းစပ်၍ ဒေသခံပြည်သူများအတွက် ဝင်ငွေအခွင့်အလမ်းများ ဖန်တီးပေးနိုင်သည်။ သို့ဖြစ်ပါ၍ စီးပွားရေးတန်ဖိုးနှင့် လူမှုရေးတန်ဖိုးတက်စေသည့်အပြင် ယဉ်ကျေးမှုမူပိုင်ကိုလည်းဖြစ်စေသည်။ ထို့ကြောင့် CCIs များသည် ယဉ်ကျေးမှုအရင်းအမြစ်များကို စီးပွားရေးနှင့်  လူမှုရေးဆိုင်ရာတန်ဖိုးများအဖြစ် ပြောင်းလဲပေးနိုင်သော အရေးပါသည့် လုပ်ငန်းများပင်ဖြစ်ပေသည်။

ယဉ်ကျေးမှုခရီးသွားလုပ်ငန်း

     မြန်မာနိုင်ငံတွင်  ခရီးသွားလာရေးအတွက် အထင်ကရနေရာ များစွာရှိသည့်အနက် ပုဂံဒေသသည်  မြန်မာနိုင်ငံ၏ ယဉ်ကျေးမှုအမွေအနှစ်ဒေသတစ်ခုဖြစ်ပြီး ကမ္ဘာ့အမွေအနှစ် စာရင်းဝင်ဒေသလည်း ဖြစ်သည်။ ပုဂံဒေသတွင် စေတီပုထိုးများ၊ ရှေးဟောင်းဗိသုကာ လက်ရာများနှင့် လက်မှုပညာရပ်များသည်   ခရီးသွားလုပ်ငန်းဖွံ့ဖြိုးတိုးတက်စေရန် အရေးပါသော အရင်းအမြစ်များပင်ဖြစ်ပေသည်။

ထို့ပြင် ရိုးရာအစားအစာဖြစ်သည့် ပုံးရည်ကြီး၊ ထန်းလျက်၊ ယိုမျိုးစုံနှင့် လက်မှုပစ္စည်းများဖြစ်သည့် ယွန်းထည်၊ ချည်ထည်စသည့် ယဉ်ကျေးမှုနှင့် တီထွင်ဖန်တီးမှုဆိုင်ရာလုပ်ငန်း (CCIs)တို့သည်လည်း ပုဂံဒေသ၌ ထင်ရှားစွာရှင်သန်လျက်ရှိပြီး ခရီးသွားဝင်ငွေတိုးတက်စေခြင်း၊ ဒေသခံပြည်သူများအတွက် အလုပ်အကိုင်ဖန်တီးခြင်းနှင့် ယဉ်ကျေးမှုအမွေအနှစ် ထိန်းသိမ်းခြင်းတို့ကိုဖြစ်ပေါ်စေသည်။

နိုင်ငံတကာပူးပေါင်းဆောင်ရွက်မှု၏ ရလဒ်များ စာအုပ်ထုတ်ဝေမှု

     UNESCO က ၂၀၂၁ ခုနှစ်တွင် ထုတ်ဝေခဲ့သော  “Backstage: Managing creativity and the arts in  South-East Asia” စာအုပ်တွင် မြန်မာနိုင်ငံအပါအဝင် အရှေ့တောင်အာရှနိုင်ငံ ကိုးနိုင်ငံ၏ တီထွင်ဖန်တီးမှုကဏ္ဍဆိုင်ရာ လေ့လာတွေ့ရှိချက်များကို ဖော်ပြထားပါသဖြင့် online ဖြင့် အခမဲ့ဝင်ရောက်ဖတ်ရှုနိုင်သည်။

(https://unesdoc.unesco.org/ark:/48223/pf0000381380)

နိုင်ငံတကာပူးပေါင်းဆောင်ရွက်မှု

      Mekong Institute (MI) သည် မဲခေါင်-ကိုရီးယား ပူးပေါင်းဆောင်ရွက်ရေးရန်ပုံငွေ (MKCF)၏   ပံ့ပိုးမှုဖြင့် “Creative4Mekong” စီမံကိန်းကို ဆောင်ရွက်လျက်ရှိရာ ၂၀၂၄ ခုနှစ် ဒီဇင်ဘာလ ၃ ရက်နှင့် ၄ ရက်တို့တွင် မဲခေါင်ဒေသတွင်းနိုင်ငံများ (ကမ္ဘောဒီးယား၊ လာအို၊ မြန်မာ၊ ထိုင်း၊ ဗီယက်နမ်)မှ ကိုယ်စားလှယ်များသည် တောင်ကိုရီးယားနိုင်ငံသို့ သွားရောက်ကာ အတွေ့အကြုံဖလှယ်ခဲ့ကြသည်။ 

မြန်မာနိုင်ငံမှ ပုဂံမြို့ရှိ အနုပညာ၊ လက်မှုပညာနှင့် ဒီဇိုင်းနယ်ပယ်မှ ကိုယ်စားလှယ်များ  ပါဝင်တက်ရောက်ခဲ့ကြသည်။ 

တောင်ကိုရီးယားနိုင်ငံ၏  ဉာဏမူပိုင်ခွင့် ကာကွယ်ရေးစနစ်နှင့် တီထွင်ဖန်တီးမှုဆိုင်ရာ လုပ်ငန်းများဖွံ့ဖြိုးတိုးတက်ရေး အတွေ့အကြုံများကို လေ့လာခွင့်ရရှိခဲ့ကြသည်။

ဤသို့ဖြင့် မြန်မာနိုင်ငံ၏ ယဉ်ကျေးမှုနှင့် တီထွင်ဖန်တီးမှုဆိုင်ရာ လုပ်ငန်းများဖွံ့ဖြိုး တိုးတက်လာစေရန်အတွက် နိုင်ငံတကာ အဖွဲ့အစည်းများနှင့် ပူးပေါင်းဆောင်ရွက်လျက်ရှိသည်။

အာဆီယံနှင့် ယဉ်ကျေးမှုဆိုင်ရာ ပူးပေါင်းဆောင်ရွက်မှု

     မြန်မာနိုင်ငံသည် အရှေ့တောင်အာရှ နိုင်ငံများအသင်း၌ အဖွဲ့ဝင်နိုင်ငံတစ်နိုင်ငံ ဖြစ်သည့်အတွက် အာဆီယံဒေသတွင်း၌ ချမှတ်ထားသော ယဉ်ကျေးမှုဆိုင်ရာ အရေးပါသောမူဝါဒများနှင့်  ကြေညာစာတမ်းများကို  မြန်မာနိုင်ငံဆိုင်ရာ အာဆီယံယဉ်ကျေးမှုနှင့် အနုပညာဆိုင်ရာဝန်ကြီးက ထောက်ခံချက် (Endorsement)ပေး၍ အာဆီယံထိပ်သီး အစည်းအဝေးများ၌ အတည်ပြုခြင်း(Adoption)နှင့် အသိအမှတ်ပြုခြင်း(Notation)များ ဆောင်ရွက်ကြသည်။

ထိုအနက် ၂၀၂၂ ခုနှစ် ဇူလိုင်လ ၇ ရက်တွင် ကမ္ဘောဒီးယားနိုင်ငံ ဆီယမ်ရိမြို့၌ အတည်ပြုခဲ့သည့် တီထွင်ဖန်တီးနိုင်စွမ်းရှိပြီး လိုက်လျောညီထွေဖြစ်သောအာဆီယံ အသိုက်အဝန်းကို    ယဉ်ကျေးမှုနှင့် ဖန်တီးမှုစီးပွားရေး မြှင့်တင်ခြင်းဆိုင်ရာကြေညာစာတမ်း "Siem Reap Declaration on Promoting a Creative and Adaptive ASEAN Community to Support the Cultural and Creative Economy" သည် အရေးပါသော ကြေညာစာတမ်းတစ်ရပ်ဖြစ်သည်။ ဤကြေညာစာတမ်းသည် ယဉ်ကျေးမှု၊ အနုပညာကဏ္ဍများနှင့် စီးပွားရေးပြန်လည် နာလန်ထူရေးနှင့် ရေရှည်တည်တံ့ဖွံ့ဖြိုး တိုးတက်မှုတို့အတွက် အထောက်အကူပြုရန်ရည်ရွယ်သည်။

ကြေညာစာတမ်းကို ချမှတ်ခဲ့ရသည့်အကြောင်းရင်းများ နောက်ခံသမိုင်း

     ၂၀၂၀ ပြည့်နှစ် အောက်တိုဘာလတွင် ကျင်းပခဲ့သည့် (၉)ကြိမ်မြောက် အာဆီယံယဉ်ကျေးမှုနှင့် အနုပညာဆိုင်ရာဝန်ကြီးများ အစည်းအဝေး (AMCA)၌  ကိုဗစ် -၁၉ ရောဂါကြောင့် ယဉ်ကျေးမှုနှင့် အနုပညာကဏ္ဍအပေါ် သက်ရောက်မှုနှင့် အနာဂတ်တွင်    ဆောင်ရွက်ရမည့်အချက်များကို ဆွေးနွေးခဲ့ကြသည်။

အာဆီယံဒေသတွင်းအဓိပ္ပာယ်ဖွင့်ဆိုချက်

     ဆက်လက်၍ ၂၀၂၁ ခုနှစ် နိုဝင်ဘာလတွင် ကျင်းပခဲ့သည့် ဒုတိယအကြိမ် အာဆီယံဒေသတွင်း  တီထွင်ဖန်တီးမှုစီးပွားရေး အလုပ်ရုံဆွေးနွေးပွဲ(ARWCE)တွင် အာဆီယံတီထွင် ဖန်တီးမှုစီးပွားရေး (ASEAN Creative Economy – ACE)ကို “အမွေအနှစ်၊ ယဉ်ကျေးမှု၊ အနုပညာ၊ ဒီဇိုင်း၊ သိပ္ပံနှင့် မီဒီယာပညာတို့အပေါ် အခြေခံသည့်လူသား၏ တီထွင်ဖန်တီးနိုင်စွမ်းမှပေါ်ထွန်းလာသော ကုန်ပစ္စည်းနှင့်  ဝန်ဆောင်မှုများ” ဟုသတ်မှတ်ဖွင့်ဆိုခဲ့သည်။

ACRF နှင့်ဆက်စပ်မှု

     ထို့ပြင် အာဆီယံဘက်စုံပြန်လည် ထူထောင်ရေးမူဘောင်  (ASEAN   Comprehensive   Recovery  Framework –ACRF)  တွင်လည်း   ယဉ်ကျေးမှုနှင့် တီထွင်ဖန်တီးမှု စီးပွားရေးကို ကိုဗစ်-၁၉ ရောဂါနောက်ပိုင်း စီးပွားရေးပြန်လည် နာလန်ထူရေးအတွက် အရေးပါသည့်ကဏ္ဍတစ်ခုအဖြစ် သတ်မှတ်လာကြသည်။

အာဆီယံကြေညာစာတမ်းများ၏ အရေးပါမှု

    အဆိုပါကြေညာစာတမ်းသည် ယဉ်ကျေးမှုအမွေအနှစ်များကို ထိန်းသိမ်းခြင်းနှင့် တန်ဖိုးမြှင့်တင်ခြင်း၊ CCIs များ ဖွံ့ဖြိုးတိုးတက်စေရန် အားပေးခြင်း၊ ဒေသတွင်းယဉ်ကျေးမှုဆိုင်ရာ ပူးပေါင်းဆောင်ရွက်မှု တိုးမြှင့်ခြင်းတို့ကို အဓိကရည်ရွယ်ကာ အကောင်အထည်ဖော်ဆောင်သည့်အတွက် အာဆီယံဒေသတွင်း၌ အရေးပါလှသည်။

ပူးပေါင်းဆောင်ရွက်ရေးနှင့် အနာဂတ် လုပ်ဆောင်ချက်များ

     အာဆီယံနိုင်ငံများသည် CCIs များ ဖွံ့ဖြိုးတိုးတက်စေရန် သုတေသနနှင့် ဖွံ့ဖြိုးတိုးတက်ရေးကို အားပေးခြင်း၊ ယဉ်ကျေးမှုလက်မှုပညာ ဖန်တီးသူများ၏ စွမ်းရည်မြှင့်တင်ရေး၊ ယဉ်ကျေးမှုဆိုင်ရာ အသိပညာပြန့်ပွားရေး၊  ယဉ်ကျေးမှုဆိုင်ရာ  ခရီးသွားလုပ်ငန်းဖွံ့ဖြိုးရေး၊ ဒစ်ဂျစ်တယ်နည်းပညာ  အသုံးပြုမှုတိုးမြှင့်ရေးတို့ကို ပူးပေါင်းဆောင်ရွက်လျက်ရှိသည်။ ထိုသို့သော  ပူးပေါင်းဆောင်ရွက်မှုများမှတစ်ဆင့်   CCIs များသည် အာဆီယံဒေသ၏ ရေရှည်တည်တံ့ခိုင်မြဲသော ဖွံ့ဖြိုးတိုးတက်မှုအတွက် အရေးပါသော အင်အားတစ်ရပ်ဖြစ်လာရန်မျှော်မှန်းသည်။ 

ယဉ်ကျေးမှုအမွေအနှစ် တန်ဖိုးဖန်တီးခြင်းဆိုင်ရာ မလက်ကာကြေညာစာတမ်း ဆက်လက်၍ အာဆီယံအဖွဲ့ဝင်နိုင်ငံများသည် ယဉ်ကျေးမှုအမွေအနှစ် တန်ဖိုးဖန်တီးခြင်းဆိုင်ရာ မလက်ကာကြေညာစာတမ်း (Melaka Declaration On Cultural Heritage Value Creation)ကို ၂၀၂၅ ခုနှစ် အောက်တိုဘာလ ၂၆ ရက်တွင် အာဆီယံဒေသတွင်း၌ ချမှတ်အတည်ပြုခဲ့ကြသည်။

အဆိုပါကြေညာစာတမ်းသည် အာဆီယံ အဖွဲ့ဝင်နိုင်ငံများ၏ သက်ဆိုင်ရာယဉ်ကျေးမှု အမွေအနှစ်များကို ခွဲခြားသတ်မှတ်ရန်၊ ကာကွယ်ရန်၊ မြှင့်တင်ရန်၊ အခွင့်အရေးရရှိရန်နှင့် ရေရှည်တည်တံ့ခိုင်မြဲပြီး အားလုံးပါဝင်နိုင်သော ဖွံ့ဖြိုးတိုးတက်မှုရှိစေရန် ရည်ရွယ်သည်။ ထို့ပြင် ယဉ်ကျေးမှုဆိုင်ရာ ခရီးသွားလုပ်ငန်းနှင့်  ရင်းနှီးမြှုပ်နှံရန်ရည်ရွယ်ထားသည်။

ကြေညာစာတမ်းပါ  အဓိက သဘောတူညီချက်ကြီး(၅)ရပ်မှာ အောက်ပါအတိုင်းဖြစ်ပါသည် -

(၁)   ယဉ်ကျေးမှုဆိုင်ရာ တန်ဖိုးကွင်းဆက်များအား အဖွဲ့အစည်းဆိုင်ရာ အထောက်အပံ့ဖြင့် မြှင့်တင်ရန် နိုင်ငံအဆင့် ဥပဒေပြုချက်များ၊ ဒေသတွင်းမူဘောင်များ ချမှတ်မှုအားကောင်းခိုင်မာစေခြင်း၊

(၂)  ဝင်ငွေနှင့် အလုပ်အကိုင်အရင်းအမြစ်အသစ်များဖန်တီးနိုင်ရေး ယဉ်ကျေးမှုအမွေအနှစ်များ၏ တန်ဖိုးဖန်တီးမှုအတွက် စီးပွားရေးပုံစံသစ်များဖော်ဆောင်ခြင်း၊ 

(၃)     ယဉ်ကျေးမှုအမွေအနှစ် ကာကွယ်စောင့်ရှောက်ရေးနှင့်   တန်ဖိုးဖန်တီးရေးတို့တွင် စွမ်းဆောင်ရည်နှင့် အရည်အချင်းမြှင့်တင်ရန် အမွေအနှစ်ဆိုင်ရာ ကျွမ်းကျင်ပညာရှင်များ၊ ယဉ်ကျေးမှုဆိုင်ရာ ဆောင်ရွက်နေသူများ၊ ဥပဒေ၊ အကောက်ခွန်နှင့်သက်ဆိုင်ရာ အရာရှိများအတွက် လေ့ကျင့်ရေး အစီအစဉ်များ ဆောင်ရွက်ခြင်း၊ 

(၄)   ယဉ်ကျေးမှုဆိုင်ရာ အဖွဲ့အစည်း၊ ပညာရပ်ဆိုင်ရာအဖွဲ့အစည်း၊ ပုဂ္ဂလိကကဏ္ဍ  အဖွဲ့အစည်းနှင့် လူမှုအဖွဲ့အစည်းတို့အကြား ဒေသတွင်းနှင့် နိုင်ငံတကာမိတ်ဖက် ဆက်ဆံရေးများ အားကောင်းစေခြင်း၊

(၅)     ချောမွေ့ပြီး   ထိရောက်သော အကောင်အထည်ဖော်မှုနှင့် ပူးပေါင်းဆောင်ရွက်မှု ရှိစေရေး မူဘောင်လုပ်ငန်းစဉ်တစ်ရပ်မှတစ်ဆင့် စောင့်ကြည့်အကဲဖြတ်မှုကိုမြှင့်တင်ခြင်း။

အာဆီယံဒေသတွင်း ရင်ဆိုင်နေရသော စိန်ခေါ်မှုများ

     ထိုသို့ အာဆီယံဒေသတွင်း CCIs ကဏ္ဍ ဖွံ့ဖြိုးတိုးတက်အောင် ပူးပေါင်းဆောင်ရွက်နေပါသော်လည်း ရင်ဆိုင်နေရသော စိန်ခေါ်မှုများမှာ ရန်ပုံငွေရှားပါးမှု၊ ဉာဏမူပိုင်ခွင့်   အကာအကွယ်အားနည်းမှု၊ ခေတ်မီနည်းပညာ သုံးစွဲနိုင်မှုနည်းပါးခြင်း၊ ဈေးကွက်ချဲ့ထွင်ရေး  အားနည်းခြင်း၊ မျိုးဆက်သစ်လက်မှုပညာရှင်များ ရှားပါးလာခြင်းနှင့် ကုန်ကြမ်းပစ္စည်းရရှိရေး အခက်အခဲများပင်ဖြစ်ပေသည်။

ယဉ်ကျေးမှုနှင့် တီထွင်ဖန်တီးမှုဆိုင်ရာ လုပ်ငန်းများ (CCIs) သည် ယနေ့ခေတ် စီးပွားရေးဖွံ့ဖြိုးတိုးတက်မှုတွင် အရေးပါသော အခန်းကဏ္ဍဖြစ်ရုံသာမက လူမှုအသိုက်အဝန်း၏ ယဉ်ကျေးမှုကို တိုးတက်မြှင့်တင်နိုင်ပြီး ဖန်တီးနိုင်စွမ်းကိုလည်း အားပေးထောက်ပံ့ပေးသည်။ မြန်မာနိုင်ငံသည်   ရှေးဟောင်းယဉ်ကျေးမှုအမွေအနှစ်များ၊ ဒြပ်မဲ့ယဉ်ကျေးမှုအမွေအနှစ်များနှင့်   ရိုးရာလက်မှုပညာများ ကြွယ်ဝစွာတည်ရှိရာ နိုင်ငံဖြစ်သဖြင့် CCIs ဖွံ့ဖြိုးတိုးတက်ရေးအတွက်  အာဆီယံဒေသတွင်း၌ အလားအလာကောင်းများရှိသည့် နိုင်ငံများထဲမှ တစ်နိုင်ငံအဖြစ် ရပ်တည်နေသည်။

ယွန်းထည်လုပ်ငန်းအပါအဝင် ရိုးရာအနုပညာနှင့် လက်မှုပညာရပ်များကို စနစ်တကျထိန်းသိမ်း မြှင့်တင်နိုင်ပါက ယဉ်ကျေးမှု အမွေအနှစ်များ၏ ရေရှည်တည်တံ့ရေးကို အထောက်အကူပြုနိုင်သည့် အပြင် နိုင်ငံ့စီးပွားရေး ဖွံ့ဖြိုးတိုးတက်မှုနှင့် ပြည်သူများ၏ လူမှုဘဝဖူလုံရေးတို့ကိုပါ ပံ့ပိုးပေးနိုင်မည်ဖြစ်သည်။ ထို့ပြင် အာဆီယံအဆင့် ဆောင်ရွက်လျက်ရှိသည့် ပူးပေါင်းဆောင်ရွက်မှုများ၊ ချမှတ်ထားသော မူဝါဒများနှင့် ကြေညာစာတမ်းများသည်လည်း မြန်မာနိုင်ငံ၏ CCIs ကဏ္ဍ မြှင့်တင်ရေးအတွက် အရေးပါလှသည်။

သို့ရာတွင် အဆိုပါအလားအလာများကို လက်တွေ့အကောင်အထည်ဖော်ရာတွင် ကျော်လွှားရမည့် စိန်ခေါ်မှုများလည်း ရှိနေသေးသည်။ သို့ဖြစ်ပါ၍ CCIs လုပ်ငန်းများအတွက် သီးသန့်မူဝါဒနှင့် မဟာဗျူဟာများချမှတ်ခြင်း၊ ဉာဏမူပိုင်ခွင့်ကာကွယ်ရေးဥပဒေများကို ထိထိရောက်ရောက် ပြဋ္ဌာန်းအကောင်အထည်ဖော်နိုင်ရန် အရေးကြီးလှသည်။

CCIs လုပ်ငန်းများအတွက် အထူးရန်ပုံငွေအစီအစဉ်များဖန်တီးခြင်း၊ ဘဏ်ချေးငွေရယူနိုင်ရေးကို လွယ်ကူချောမွေ့စေခြင်းနှင့် ရင်းနှီးမြှုပ်နှံသူများကို ဖိတ်ခေါ်ခြင်းတို့ ဆောင်ရွက်သင့်လှသည်။   ယဉ်ကျေးမှုနှင့် သက်ဆိုင်သူများ၊ လက်မှုပညာရှင်များအတွက်  ခေတ်မီစီးပွားရေးစီမံခန့်ခွဲမှု၊ ဒစ်ဂျစ်တယ်နည်းပညာအသုံးချမှု၊ ဈေးကွက်ချဲ့ထွင်မှုဆိုင်ရာ သင်တန်းများစနစ်တကျ ပြုလုပ်ပေးရန်လည်း လိုအပ်သည်။

ဒစ်ဂျစ်တယ်အသွင်ကူးပြောင်းရေးကို အရှိန်မြှင့်ဆောင်ရွက်ရန် အွန်လိုင်းဈေးကွက်များဖန်တီးခြင်း၊ ဒစ်ဂျစ်တယ်အနုပညာလက်ရာများ ဖွံ့ဖြိုးတိုးတက်ရေး အားပေးခြင်း၊ e-Commerce စနစ်များနှင့် ချိတ်ဆက်နိုင်ရေး ဆောင်ရွက်ခြင်းတို့သည် ယနေ့ခေတ်ကာလ၌ မလွှဲမရှောင် လိုအပ်သည်။

မဟာဗျူဟာများချမှတ်မှုများ၊ ရင်းနှီးမြှုပ်နှံမှုများ၊ စွမ်းရည်မြှင့်တင်ရေးလုပ်ငန်းများနှင့် ဒစ်ဂျစ်တယ်အသွင်ကူးပြောင်းရေးတို့ကို သက်ဆိုင်ရာကဏ္ဍအလိုက် သီးခြားဆောင်ရွက်နေရုံမျှ ဆောင်ရွက်နေခြင်းသည် လုံလောက်မှုမရှိနိုင်ပါ။ 

အဆိုပါလုပ်ငန်းစဉ်များအောင်မြင်စွာ အကောင်အထည်ပေါ်လာစေရန် အစိုးရဌာနများအကြား၊ အစိုးရနှင့် ပုဂ္ဂလိကအကြား၊ နိုင်ငံတကာမိတ်ဖက် အဖွဲ့အစည်းများနှင့် ပြည်တွင်းအဖွဲ့အစည်းများအကြား၊ ယဉ်ကျေးမှုဆိုင်ရာ လုပ်ငန်းရှင်များအကြား ပူးပေါင်းဆောင်ရွက်မှုကို ခိုင်မာစွာတည်ဆောက်ရန် မရှိမဖြစ်လိုအပ်သည်။

ဘက်စုံပါဝင်သည့် ပူးပေါင်းဆောင်ရွက်မှုများနှင့်အတူ မဟာဗျူဟာများချမှတ်မှု၊ ရင်းနှီးမြှုပ်နှံမှု၊ စွမ်းရည်မြှင့်တင်မှုနှင့် ဒစ်ဂျစ်တယ် အသွင်ကူးပြောင်းမှုတို့ကို စနစ်တကျ အကောင်အထည်ဖော်နိုင်မည် ဆိုပါက မြန်မာနိုင်ငံ၏ CCIs ကဏ္ဍသည် ရေရှည်တည်တံ့ခိုင်မြဲသော ဖွံ့ဖြိုးတိုးတက်မှုကိုရရှိနိုင်ပေမည်။ ထို့ပြင် အာဆီယံဒေသတွင်း ယဉ်ကျေးမှုဆိုင်ရာစီးပွားရေး ဖွံ့ဖြိုးတိုးတက်မှုအတွက်ပါ အဓိကမောင်းနှင်အား တစ်ရပ်အဖြစ် ပါဝင်လာနိုင်မည်မှာ ဧကန်အမှန်ပင်ဖြစ်ပါကြောင်း အလေးအနက်ထား၍ ရေးသား တင်ပြလိုက်ရပါသည်။    ။

MWD

     သံပရိုသီးသည် ရှောက်၊ သံပရာ၊ ကျွဲကောသီးတို့နှင့်မျိုးရင်းတူပြီး သံပရာသီးထက် အရွယ်အစားကြီးမားကာ အရောင်မှာ စိမ်းဝါရောင်မှ   တောက်ပသည့် အဝါရောင်အထိရှိတတ်သည်။ အရည်ရွှမ်းပြီး အနံ့မွှေးသောကြောင့်  ဖျော်ရည်အဖြစ် ဖျော်သောက်၍ဖြစ်စေ၊ စားစရာများတွင် ထည့်စား၍ဖြစ်စေ   အသုံးပြုကြသည်။ သံပရိုသီးကို အင်္ဂလိပ်လို Lemon ဟုခေါ်ပြီး  မျိုးရင်းမှာ Rutaceae ဖြစ်သည်။ ဗီတာမင်-C နှင့် တခြားမရှိမဖြစ် လိုအပ်သောအာဟာရဓာတ်များပြည့်စုံသည့်   သံပရိုသီး၏မွှေးသောရနံ့သည် အမူးအမော်ပြေစေရုံသာမက  ထုတ်ကုန်များတွင်ပါသည့် ဗက်တီးရီးယားပိုးမွှားများကို   သန့်စင်ပေးခြင်း၊  အသားအရေထိန်းသိမ်းပေးခြင်း၊   အစာချေဖျက်ပေးခြင်းတို့အပြင် အအေးမိခြင်းအပါအဝင်     တခြားသောရောဂါများကို ကာကွယ်ပေးနိုင်ရန် ကိုယ်ခံအားမြှင့်တင်ပေးခြင်းကဲ့သို့ ကျန်းမာရေးအကျိုးကျေးဇူး များစွာရှိသည်။

သွေးတိုးကာကွယ်ပေးသော သံပရိုသီး

     သံပရိုသီးတွင် ပိုတက်ဆီယမ်ကြွယ်ဝမှုကြောင့် သွေးပေါင်ချိန်ကို ထိန်းညှိပေးပြီး သွေးတိုးခြင်းကြောင့်   ဖြစ်လာနိုင်သည့် လေဖြတ်ခြင်းနှင့်  ရုတ်တရက်နှလုံးရပ်မှုဖြစ်နိုင်ခြေကို သိသာစွာလျှော့ချပေးနိုင်သည့်အတွက် နေ့စဉ်စားသုံးမှုတွင် သံပရိုသီးကို အနည်းငယ် ထည့်စားသင့်သည်။

ရောင်ရမ်းမှုကိုကာကွယ်ပေးသော သံပရိုသီး

    သံပရိုသီးတွင်ပါဝင်သည့် Polyphenols နှင့် Antioxidants များသည် Oxidative Stress ကို တိုက်ဖျက်ရာတွင် ကူညီပေးပြီး နာတာရှည်ရောဂါများကိုဖြစ်စေနိုင်သည့် ရောင်ရမ်းမှုကိုကာကွယ်ပေးသည်။

နှလုံးကျန်းမာစေသောသံပရိုသီး

    သံပရိုသီးတွင် ဗီတာမင်-C ကြွယ်ဝသောကြောင့်   နှလုံးကိုကျန်းမာစေပြီး  နှလုံးရောဂါခံစားရခြင်းနှင့် လေဖြတ်ခြင်းမဖြစ်စေရန် ကာကွယ်ပေးသည်။ သံပရိုသီးတွင်ပါဝင်သည့် အပင်မှရသောဒြပ်ပေါင်းများဖြစ်ကြသည့် Hesperidin နှင့် Diosmin တို့က သွေးတွင်းကိုလက်စထရောကို ကျဆင်းစေနိုင်သဖြင့်  သံပရိုသီးကို ပုံမှန်စားသုံးပေးသင့်သည်။ ထို့ပြင် သံပရိုသီး အရွယ်တော်တစ်လုံးတွင်    အမျှင်ဓာတ် ၂ ဒသမ ၄ ဂရမ်အထိပါဝင်ပြီး ဆီးချိုရောဂါရှိသူများတွင်    ဆီးချိုကြောင့်ဖြစ်သောနောက်ဆက်တွဲ ကျန်းမာရေးပြဿနာဖြစ် သည့်နှလုံးရောဂါမဖြစ်စေရန် အထိရောက်ဆုံး ကာကွယ်ပေးသည်။ 

ဝိတ်ကျစေနိုင်သောသံပရိုသီး

     သံပရိုသီးတွင် အချဉ်ဓာတ်ပါဝင်သောကြောင့် ဝိတ်ကျစေနိုင်သည်ဟု အများကလက်ခံထားကြသည်။  နောက်တစ်ချက်မှာ  သံပရိုသီးတွင်    ပျော်ဝင်လွယ်သည့် အမျှင်ဓာတ်ပါဝင်နေခြင်းကြောင့်လည်းကိုယ်အလေးချိန်ကျစေသည်။ သံပရိုသီးကို ရေနွေးနွေးနှင့်စိမ်သောက်ခြင်းဖြင့် ကိုယ်အလေးချိန် လျှော့ချနေသူများအတွက် အထောက်အကူပြုပေးနိုင်သည်။

သွေးအားနည်းရောဂါမဖြစ်အောင် ကာကွယ်ပေးသော သံပရိုသီး

 သံပရိုသီးတွင်  သံဓာတ်ပါဝင်သကဲ့သို့ အစားအစာထဲတွင်ပါဝင်သည့် သံဓာတ်ကိုအူနံရံများမှ စုပ်ယူနိုင်စွမ်းကို မြှင့်တင်ပေးနိုင်သောကြောင့် သွေးအားနည်းရောဂါမဖြစ်စေရန်  အထိရောက်ဆုံး ကာကွယ်ပေးနိုင်မည်ဖြစ်သည်။ လူအများတွင် သံဓာတ်အားနည်းခြင်းကြောင့် သွေးအားနည်းရောဂါအဖြစ်များပြီး  အစားအသောက်များတွင် သံဓာတ်လုံလောက်စွာ ပါဝင်မှုမရှိခြင်းသည် သွေးအားနည်းရောဂါဖြစ်ရခြင်း၏ အဓိကအကြောင်းရင်းဖြစ်သည်။

ကျောက်ကပ် ကျောက်မတည်စေရန် ကာကွယ်ပေးသော သံပရိုသီး

    သံပရိုသီးတွင်ပါဝင်သည့် Citric Acid က ဆီးရွှင်စေနိုင်ပြီး ဆီးထဲမှ pH ပမာဏကိုတိုးစေနိုင်သောကြောင့် ကျောက်ကပ်ကျောက်တည်ခြင်း မဖြစ်အောင် ကာကွယ်ပေးသည်။

သွေးတွင်းသကြားဓာတ်ကို ထိန်းညှိပေးသော သံပရိုသီးသံပရိုသီးတွင် အမျှင်ဓာတ်ပါဝင်သောကြောင့် အင်ဆူလင်ထုတ်လွှတ်အောင် အကောင်းဆုံးလှုံ့ဆော်ပေးနိုင်ပြီး   သွေးတွင်းသကြားဓာတ်ကို   ထိန်းညှိရာတွင် များစွာအထောက်အကူပြုသည်။  ဗီတာမင်-C   စားသုံးမှုနည်းခြင်းသည်   ဆီးချိုရောဂါဖြစ်နိုင်ခြေကို များစေသောကြောင့် နေ့စဉ်စားသုံးမှုများတွင် ဗီတာမင်-C ပါဝင်အောင်  စားသုံးသင့်သည်။  ကိုယ်တွင်းက ဗီတာမင် -C ကိုမြှင့်တင်ရန် အကောင်းဆုံးသောနည်းလမ်းမှာ  သံပရိုသီးစားသုံးပေးခြင်းလည်းပါဝင်သောကြောင့် ဆီးချိုရောဂါကိုကာကွယ်ရန်ဖြစ်စေ၊ ကုသထိန်းချုပ်ရန်ဖြစ်စေ သံပရိုသီးကိုစားသုံးပေးနိုင်သည်။ ထို့ပြင် သံပရိုသီးတွင်ပါဝင်သော အမျှင်ဓာတ်က   အဆာခံနိုင်စေသောကြောင့် ဆီးချိုရောဂါရှိသူများတွင်  သွေးတွင်းသကြားဓာတ်မြင့်တက်မှုကို အကောင်းဆုံးကာကွယ်ပေးနိုင်သည်။ သွေးတွင်းသကြားဓာတ်ကို ကျဆင်းစေပြီး သွေးပေါင်ချိန်ကိုထိန်းညှိပေးကာ ကိုယ်ခံအားကို အားဖြည့်ပေးသကဲ့သို့ အနာကျက်စေရန်လည်း ကူညီပေးသည်။  ဆီးချိုရောဂါရှိသူများအနေဖြင့်  အစာခြေစနစ်ကောင်းမွန်စွာ လုပ်ဆောင်နိုင်ရန်လိုအပ်ပြီး လုပ်ဆောင်နိုင်ခြင်းမရှိပါက ဆီးချိုရောဂါရှိသူများတွင် စားချဉ့်ရည်ပြန်ဆန်တက်ခြင်း၊ အစာကြေခဲခြင်း   စသည့်အစာခြေစနစ်အပါအဝင်  ခန္ဓာကိုယ်မှ တခြားစနစ်များကိုပါ ထိခိုက်နိုင်သည်။ ထို့ကြောင့်   အစာခြေစနစ်ကျန်းမာပြီး   သွေးတွင်းသကြားဓာတ်ကို အကောင်းဆုံးထိန်းညှိနိုင်စေရန် သံပရိုသီးစားသုံးပေးသင့်သည်။ ဆီးချိုရောဂါရှိသူများ ဓာတ်စာတစ်ခုအနေဖြင့် ဟင်းခါးပူပူတွင် ငရုတ်ကောင်းဖြူး သံပရိုရည်ညှစ်၍ သောက်သုံးပေးနိုင်သည်။

ကင်ဆာကာကွယ်ပေးသောသံပရိုသီး

      သံပရိုသီးတွင်ပါဝင်သည့်  ဒြပ်ပေါင်းများသည် ကင်ဆာဆဲလ်များကို တိုက်ဖျက်ပေးနိုင်စွမ်းရှိပြီး ကင်ဆာမဖြစ်အောင်လည်း ကာကွယ်ပေးနိုင်သဖြင့် ကင်ဆာကာကွယ်ရန်နှင့် ကုသရန်အတွက်ပါ သံပရိုသီးကို စားသုံးပေးနိုင်သည်။ သံပရိုသီးကဲ့သို့  ချဉ်သည့်အသီးများကို စားသုံးသူများသည် ကင်ဆာရောဂါခံစားရနိုင်ခြေနည်းသည်ဟု လေ့လာမှုများအရ သိရှိရသည်။

အစာခြေစနစ်ကျန်းမာစေသော သံပရိုသီး

    သံပရိုသီးတွင်  ကယ်လိုရီပါဝင်ပြီး ပျော်ဝင်နိုင်သည့်   အမျှင်ဓာတ်များနှင့် သကြားဓာတ်များပါဝင်နေမှုက အစာခြေစနစ်ကိုကျန်းမာစေရန်   အကောင်းဆုံး အားဖြည့်ပေးသည်။ ထို့ပြင် သံပရိုသီးသည် အစာခြေစနစ်ကိုကူညီရန်  သည်းခြေရည်ထွက်အားကောင်းစေသောကြောင့် အစာချေဖျက်ခြင်းလုပ်ငန်းကို  ပိုမိုကောင်းမွန်စေနိုင်ပြီး အစာအိမ်အူလမ်းကြောင်းမှ အဆိပ်အတောက်များကိုလည်း ဖယ်ရှားပေးနိုင်သည်။

ကိုယ်တွင်းမှအဆိပ်အတောက်များကို ဖယ်ရှားပေးသော သံပရိုသီး

     နံနက်အစောပိုင်းတွင်  သံပရိုရည်နွေးနွေးတစ်ခွက်   သောက်ပေးခြင်းဖြင့် ခန္ဓာကိုယ်အတွင်း သန့်စင်စေသည်။ သံပရိုသီးတွင် ဆီးရွှင်စေသည့်အာနိသင်ရှိခြင်းကြောင့် ခန္ဓာကိုယ်တွင်းမှ အဆိပ်အတောက်များကို ဆီးနှင့်အတူစွန့်ထုတ်ပေးနိုင်သည့်အပြင် ကိုယ်ခံစွမ်းအားကိုလည်း တိုးတက် ကောင်းမွန်စေသည်။

ကော်လာဂျင်မြှင့်တင်ပေးနိုင်သော သံပရိုသီး

     သံပရိုရည်တွင်     ဓာတ်တိုးဆန့်ကျင် အာနိသင်တစ်မျိုးဖြစ်သည့် ဗီတာမင်-C ကြွယ်ဝစွာပါဝင်သောကြောင့် ကော်လာဂျင် (Collagen) ပမာဏကို မြှင့်တင်ပေးနိုင်သည်။ ခန္ဓာကိုယ်က ကော်လာဂျင်ကို အလိုအလျောက်ထုတ်ပေးနိုင်သော်လည်း အသက်အရွယ်    ရလာသည့်အချိန်တွင် ထုတ်လုပ်နိုင်စွမ်းကျလာပြီး အရေးအကြောင်းများဖြစ်ခြင်းနှင့် အသားအရေ လျော့ရဲခြင်းများဖြစ်လာနိုင်သည်။ ထို့ကြောင့်  အရေပြား ကျန်းမာစေရန် သံပရိုသီးကို အသုံးပြုပေးသင့်သည်။

ဝက်ခြံသက်သာစေနိုင်သောသံပရိုသီး

     သံပရိုသီးတွင် အက်စစ်ပါသော်လည်း pH ပမာဏကြွယ်ဝစွာ ပါဝင်သောကြောင့် ချွေးပေါက်များပိတ်ဆို့မှုကို   ကင်းစေပြီး နာကျင်ရောင်ရမ်းမှုကို     သက်သာစေနိုင်သကဲ့သို့   ဝက်ခြံကိုသက်သာစေရန် အထိရောက်ဆုံး အားဖြည့်ပေးသည်။ ဆဲလ်သေများကို    ဖယ်ရှားပေးနိုင်သောကြောင့် ဆားဝက်ခြံများကိုလည်း   သက်သာစေနိုင်သည်။ ဝက်ခြံကိုညှစ်လိုက်သည့် အချိန်တွင်   ပိုးဝင်ပြီးကျန်ခဲ့သည့် အမာရွတ်များကို သက်သာစေရန်   သံပရိုရည်ကို ရှားစောင်းလက်ပပ်နှင့်ရောစပ်၍   ပုံမှန်လိမ်းပေးနိုင်သည်။

ဗက်တီးရီးယားများကို တိုက်ဖျက်ပေးသောသံပရိုသီး

     သံပရိုသီးက  ဗက်တီးရီးယားများကို တိုက်ဖျက်နိုင်သောကြောင့်  အရေပြားချွေးပေါက်များမှပိုးဝင်ပြီး  အရေပြားရောင်ရမ်းမှုများကို သက်သာစေနိုင်သည့်အပြင် ဝက်ခြံဖုများ နီရဲရောင်ရမ်းခြင်းကို သက်သာစေရန်အတွက်လည်း အသုံးပြုပေးနိုင်သည်။

သံပရိုသီး၏တခြားသောအသုံးပြုမှုများ

     သားငါးခုတ်ရာတွင်   အသုံးပြုသည့် ပလတ်စတစ်ပြား သို့မဟုတ်  စဉ်းတီတုံးပေါ်သို့ သံပရိုသီးနှင့်ပွတ်တိုက်သန့်စင်ပေးပါက ကပ်တွယ်နေသော ပိုးမွှားများအား သေစေနိုင်သည်။ စိတ်ထားသော ပန်းသီးနှင့်ထောပတ်သီးပေါ်ကိုသံပရိုသီးနှင့်ပွတ်တိုက်ပေးပါက အညိုဘက်သန်းမသွား အောင်ကာကွယ်ပေးနိုင်သည်။ တစ်ခြမ်းပိုင်းထားသည့်   သံပရိုသီးခြမ်းပေါ်တွင် လေးညှင်းပွင့်များ   သိပ်ထည့်ထားပါက ခြင်ပြေးစေနိုင်သဖြင့်   ခြင်ဆေးအဖြစ်လည်း အသုံးပြုနိုင်သည်။

ဆေးဖက်ဝင်သော သံပရိုသီးခွံ

    Citric Acid ဓာတ်ကြွယ်ဝသော  သံပရိုသီးကို ဗီတာမင်-C  ဖြည့်စွက်စာအဖြစ် သာမက သံပရိုသီးခွံသည် အတွင်းအသားထက် ဗီတာမင်ဓာတ် ၅ ဆမှ ၁၀ ဆအထိ ပိုမိုပါဝင်ကြောင်း သိရသည်။  သံပရိုသီးခွံထဲတွင် ကယ်လ်စီယမ်၊ ပိုတက်ဆီယမ်၊ ဗီတာမင်-C  ဓာတ်များပါရှိသဖြင့်  အရိုးသန်မာစေပြီး  အဆစ်အမျက်ရောင်ခြင်း၊ အရိုးအားနည်းခြင်းကို ကာကွယ်ပေးနိုင်သည်။

ထိုကဲ့သို့ ဗီတာမင်နှင့်သတ္တုဓာတ်များအပြင် ဓာတ်တိုးဆန့်ကျင်ပစ္စည်းများ(Antioxidants) ကြွယ်ဝစွာပါရှိသဖြင့် သံပရိုသီးခွံကိုစားပေးပါက   အသားကျစ်လျစ်ခြင်း၊ အဆိပ်အတောက်ကင်းခြင်း၊ သွေးသားသန့်စင်ခြင်း၊   ဆံသားကောင်းမွန်ခြင်း၊   အသားအရေဝင်းပကြည်လင်ခြင်း အကျိုးကျေးဇူးများရရှိနိုင်သည်။  ထို့ပြင် သံပရိုသီးခွံထဲတွင်ပါရှိသော သဘာဝအဆီဓာတ်က သွေးလေကြေစေခြင်း၊  အဆီကျစေခြင်း၊  မကောင်းသောကိုလက်စထရောများကျစေခြင်း စသည့် အာနိသင်ရှိသော ကြောင့် ထမင်းစားသည့်အခါတိုင်း   အရည်ညှစ်ပြီးသား   သံပရိုသီးခွံကို  ပါးပါးလှီး၍  အတို့အမြှုပ်အဖြစ်စားသုံးနိုင်သည်။ သံပရိုသီးခွံထဲတွင် အင်ဇိုင်းများစွာပါရှိသဖြင့်    ကင်ဆာရောဂါဖြစ်ခြင်းမှ ကာကွယ်ပေးနိုင်သည်။

သံပရိုသီးခွံတွင်အမျှင်ဓာတ်များစွာ ပါရှိသဖြင့် အစာခြေစနစ်ကိုအကျိုးပြုသည့်အပြင်  ခန္ဓာကိုယ်တွင်း သွေးယိုစီးမှုမဖြစ်စေရန် ကာကွယ်ပေးသည်။ နာတာရှည်သွေးတိုးရောဂါရှိသူများအတွက်   သံပရိုသီးခွံက  သက်စောင့်ဆေးတစ်လက်ဖြစ်သည်။  နှာစေး၊     ချောင်းဆိုးခြင်းအတွက် သံပရိုသီးခွံကိုမီးဖုတ်၍    ထွက်လာသောအနံ့ကို  ရှူရှိုက်ပေးခြင်းဖြင့်  သက်သာပျောက်ကင်းစေနိုင်သည်။ ခေါင်းတစ်ခြမ်းကိုက်ခြင်း၊  ခေါင်းမကြည်လင်ခြင်း၊  စိတ်ဖိစီးမှုများခြင်းအတွက် သံပရိုသီးခွံကိုလက်သည်းဖြင့်ဆိတ်၍ ထွက်လာသောသံပရိုသီးခွံအဆီကို  ရှူရှိုက်ပေးခြင်းဖြင့် ပျောက်ကင်းစေနိုင်သည်။ ကားမူးခြင်း၊ ရထားမူးခြင်း၊    လေယာဉ်မူးခြင်းကြောင့်   မူးဝေ  အော့အန်လေ့ရှိသူများ အနေဖြင့် သံပရိုသီးခွံကိုငုံထားပါက  သက်သာစေနိုင်သည်။

လတ်ဆတ်သောသံပရိုသီးကို အစိတ်များစိတ်၍ ကြွေဖန်ခွက်ထဲသို့ အရည်ညှစ်ပြီး သံပရိုသီးခွံပါထည့်၍ ရေနွေးဆူဆူဖြင့်သောက်သုံးခြင်း၊တစ်ကြိမ်သောက်ပြီးတိုင်း  ကြွေဖန်ခွက်ထဲသို့  ရေနွေးပူဖြည့်ထည့်၍ ရေဆာတိုင်းသောက်ခြင်း၊ နေ့စဉ်မှန်မှန်သောက်ပေးခြင်းဖြင့် သွေးထဲရှိ အဆီခဲများကိုကြေပျက်စေခြင်း၊ သွေးတိုးကျခြင်း၊  ခန္ဓာကိုယ်တွင်းအရည်ဓာတ်ကို   ထိန်းညှိပေးခြင်း၊ ခန္ဓာကိုယ်တွင်း ဗက်တီးရီးယားပိုးများ အလွယ်တကူဝင်ရောက်ခြင်းမှ ကာကွယ်ပေးခြင်း၊  ကိုယ်အလေးချိန်ကျဆင်းစေခြင်း၊ ကင်ဆာရောဂါများမှ ကာကွယ်ပေးခြင်း စသည့်ကျန်းမာရေး အကျိုးကျေးဇူးများစွာရရှိနိုင်သည်။ ထို့ကြောင့်  အရည်ညှစ်   အသုံးပြုပြီးသော သံပရာသီးခွံများကို  အလွယ်တကူစွန့်မပစ်ဘဲ ပြန်လည်အသုံးပြုခြင်းဖြင့် ကျန်းမာရေး ကောင်းကျိုးများစွာ ရရှိနိုင်သည်။

အချုပ်အားဖြင့် သံပရိုသီးက စားလိုက်သည့်အာဟာရများကိုအကောင်းဆုံးစုပ်ယူနိုင်ပြီး  ကိုယ်ခံအားကောင်းစေနိုင်သကဲ့သို့ ကိုယ်တွင်းကအဆိပ်အတောက်များကိုလည်း   အထိရောက်ဆုံးဖယ်ရှားပေးနိုင်သည်။ အနံ့မွှေးမွှေးနှင့် ချဉ်ပြုံးပြုံးအရသာရှိလှပြီး  ဖျော်ရည်သောက်၍ဖြစ်စေ၊ အသုပ်ထဲ ထည့်စား၍ဖြစ်စေ အရသာရှိသကဲ့သို့   ခံတွင်းရှင်းပြီး   သံပရိုသီးခွံကလည်း    နေ့စဉ်ဘဝတွင်    ကျန်းမာရေးကို အထောက်အကူ များစွာပေးသည့်အတွက်  သင့်တင့်မျှတစွာ  စားပေးသင့်ပါကြောင်း  ရေးသား တင်ပြလိုက်ရပါသည်။

MWD

      အမျိုးအစား- ၂  သွေးချိုဆီးချိုရောဂါဖြစ်ပွားမှုနှုန်းသည်  ငယ်ရွယ်သူများနှင့်   သက်လတ်ပိုင်း အရွယ်များတွင် မြင့်တက်လာနေသည်။ အထူးသဖြင့် အမျိုးအစား -၂ သွေးချိုဆီးချိုရောဂါ မိသားစုရာဇဝင် ရှိသူများတွင် ပိုမိုဖြစ်ပွားနိုင်ကြောင်း တွေ့ရှိရသည်။ မိသားစုရာဇဝင်သည် အနာဂတ်တွင် အမျိုးအစား-၂ သွေးချိုဆီးချိုရောဂါဖြစ်ပွားရန် အပြင်းထန်ဆုံး အန္တရာယ်အချက်များထဲမှ တစ်ခုဖြစ်သည်။ လေ့လာ မှုများအရ မိသားစုရာဇဝင်နှင့် သွေးချိုဆီးချိုရောဂါ

ဖြစ်နိုင်ခြေဆက်နွှယ်မှုသည် နှစ်ဆမှခြောက်ဆအထိတိုးလာနိုင်ကြောင်းဖော်ပြခဲ့သည်။ သို့ဖြစ်၍ ငယ်ရွယ် သူများတွင် မိသားစုရာဇဝင်ကြောင့်ဖြစ်ပေါ်လာသော သွေးချိုဆီးချိုရောဂါအန္တရာယ်အကြောင်း  အသိပညာ ပေးခြင်းသည်   သွေးချိုဆီးချိုရောဂါ ကာကွယ်တားဆီးရေး ကြိုးပမ်းမှုများကို အထောက်အကူဖြစ်စေနိုင် သည်။

မိသားစုတွင်  သွေးချိုဆီးချိုရောဂါ ရာဇဝင်ရှိခြင်းသည် ရောဂါဖြစ်ပွားနိုင်ခြေကို သိသိသာသာမြင့်တက် စေပြီး  လေ့လာမှုများအရ သွေးချိုဆီးချိုရောဂါရှိသူ ၆၀-၆၈.၈ ရာခိုင်နှုန်းတွင်   အနည်းဆုံး မိသားစုဝင် တစ်ဦးရှိကြောင်း ပြသထားသည်။ မိဘ သို့မဟုတ် မောင်နှမတစ်ဦးဦးတွင် သွေးချိုဆီးချိုရောဂါဖြစ်ပွား ပါက ဖြစ်နိုင်ခြေ ၇၆.၃ ရာခိုင်နှုန်းရှိပြီး အန္တရာယ်ပိုမို မြင့်မားသည်။ အမျိုးအစား-၂ သွေးချိုဆီးချိုရောဂါ ရှိသူများ၏ ဆွေမျိုးများသည် ရောဂါဖြစ်ပွားနိုင်ခြေ သုံးဆပိုများသည်။ 

မိသားစုရာဇဝင်အရ သွေးချိုဆီးချိုရောဂါ ဖြစ်ပွားမှုနှုန်းနှင့် အန္တရာယ်များ

      သွေးချိုဆီးချိုရောဂါရှိသော   မိခင်ရှိသူများသည် သွေးချိုဆီးချိုရောဂါရှိသော ဖခင်ရှိသူများနှင့် နှိုင်း ယှဉ်ပါက ရောဂါဖြစ်ပွားမှုနှုန်းပိုများသည်။ မိခင်တွင် သွေးချိုဆီးချိုရောဂါရှိခြင်းသည်  ကိုယ်ဝန်ဆောင် ဆီးချိုရောဂါဖြစ်နိုင်ခြေ ပိုများသည်။    သွေးချိုဆီးချို ရောဂါရှိသော          မောင်နှမတစ်ဦးဦး ရှိခြင်းသည် အဓိကအန္တရာယ်ဖြစ်နိုင်ခြေ အချက်တစ်ခုဖြစ်ပြီး တစ်ခါတစ်ရံတွင် မိဘရာဇဝင်၏ သက်ရောက်မှုထက် ကျော်လွန်သည်။ မိသားစုရာဇဝင်ကြောင့် ဖြစ်ပေါ်လာ သောအန္တရာယ်သည် အမျိုးသားများအတွက်  အမျိုး သမီးများထက် ပိုမိုများပြားသည်။  မိဘနှင့် မောင်နှမ ဖြစ်သောဆွေမျိုးအရင်းတစ်ဦးတည်းတွင်   သွေးချို ဆီးချိုရောဂါရှိခြင်းသည် အန္တရာယ်ကို နှစ်ဆနီးပါး မြင့်တက်စေပြီး ဆွေမျိုးနှစ်ဦး သို့မဟုတ် နှစ်ဦးထက် ပိုလျှင် အန္တရာယ်ကို လေးဆကျော်မြင့်တက်စေသည်။ ထို့ပြင်   မိသားစုရာဇဝင်ရှိသူများသည်   အစောပိုင်း အသက်အရွယ်တွင်   အမျိုးအစား-၂ သွေးချိုဆီးချို ရောဂါဖြစ်ပွားမှုနှင့် သိသိသာသာ ဆက်စပ်နေကြောင်း တွေ့ရှိရသည်။

အမျိုးအစား-၂   သွေးချိုဆီးချိုရောဂါဖြစ်ပွားမှု သည် အကြောင်းရင်းများစွာကြောင့်ဖြစ်သော ရောဂါ တစ်ခုဖြစ်ပြီး မျိုးရိုးဗီဇသည်  အဓိကအခန်းကဏ္ဍမှ ပါဝင်သော်လည်း  ပတ်ဝန်းကျင်ဆိုင်ရာ အချက်များ(လူနေမှုပုံစံ၊အစားအသောက်၊ အဝလွန်ခြင်း) ကြောင့် မကြာခဏဖြစ်ပေါ်လာခြင်းများစွာရှိသည်။ သွေးချိုဆီးချိုရောဂါဖြစ်နိုင်ခြေ၏  ၂၀  ရာခိုင်နှုန်းမှ   ၈၀ ရာခိုင်နှုန်းသည် မျိုးရိုးဗီဇအချက်များကြောင့်ဖြစ်ပြီး ပတ်ဝန်းကျင်ဆိုင်ရာအချက်များ   (အဝလွန်ခြင်း၊ ထိုင်၍နေထိုင်မှုပုံစံ) သည်လည်း အဓိကအခန်းကဏ္ဍ မှပါဝင်ကြောင်း လေ့လာမှုများက ဖော်ပြသည်။

ထို့ကြောင့်    လူတစ်ဦးသည်   မျိုးရိုးဗီဇဆိုင်ရာ သွေးချိုဆီးချိုရောဂါဖြစ်နိုင်ခြေ အန္တရာယ်မြင့်မားမှု အမွေဆက်ခံထားလျှင်တောင်မှ  အမျိုးအစား-၂ သွေးချိုဆီးချိုရောဂါဖြစ်လာစေရန်ပတ်ဝန်းကျင် ဆိုင်ရာအစပျိုးမှုများ (ဥပမာ- ထိုင်၍နေထိုင်မှုပုံစံ၊ အစားအသောက်ညံ့ဖျင်းခြင်း၊ ကယ်လိုရီများလွန်းခြင်း) လိုအပ်လေ့ရှိသည်။ 

၂၀၁၇ ခုနှစ်က အင်္ဂလန်နိုင်ငံမှ Viner နှင့်အဖွဲ့သည် ငယ်ရွယ်သော သွေးချိုဆီးချိုရောဂါရှိသူများ၏ ၆၀   ရာခိုင်နှုန်းတွင် မိသားစုဝင်တစ်ဦးဦးနှင့် ၃၀ ရာခိုင် နှုန်းတွင် အဘိုး၊   အဘွားမိသားစုဝင်တစ်ဦးဦးတွင် သွေးချိုဆီးချိုရောဂါခံစားနေရသည်ကို တွေ့ရကြောင်း Lancet တွင် ဖော်ပြခဲ့သည်။ မိသားစုရာဇဝင်ရှိသော အိန္ဒိယလူဦးရေတွင်ပြုလုပ်ခဲ့သည့်  လေ့လာမှုတစ်ခု အရ အမျိုးအစား -၂   သွေးချိုဆီးချိုရောဂါစတင် ဖြစ်ပွားသည့် ပျမ်းမျှအသက်မှာ ပထမမျိုးဆက်တွင် ၅၅.၉၅  နှစ်နှင့်  ဒုတိယမျိုးဆက်တွင်   ၃၈.၄ နှစ် အသီးသီးဖြစ်သည်ဟု  ကောက်ချက်ချခဲ့သည်။

ရောဂါလက္ခဏာများ

      မိသားစုရာဇဝင်ရှိသောလူနာများသည် ကိုယ်အလေးချိန်နှင့် BMI မြင့်မားခြင်း၊  ခါးမှတင်ပါးအချိုး မြင့်မားခြင်း၊ HbA1c အဆင့်မြင့်မားခြင်းနှင့် သွေးပေါင် ချိန်မြင့်မားခြင်းတို့ကို မကြာခဏတွေ့ရလေ့ရှိသည်။ မိခင်   သို့မဟုတ်  မောင်နှမရာဇဝင်ရှိသူများသည် အင်ဆူလင်ထုတ်လွှတ်မှုနည်းပါးခြင်း     သို့မဟုတ် အင်ဆူလင်ခံနိုင်ရည်ရှိခြင်းကြောင့်  သွေးမှဆဲလ် များထဲသို့     သကြားဓာတ်ကိုရွှေ့ပြောင်းရန်  မလုပ်ဆောင်နိုင်သောကြောင့်  အချိန်ကြာလာသည်နှင့် အမျှ သွေးကြောထဲတွင်  သကြားဓာတ်စုပုံလာခြင်း သည်   ရောဂါလက္ခဏာများမပေါ်လာမီ    နှစ်ပေါင်း များစွာရှိနေနိုင်သည်။

အထူးဂရုစိုက်ရန် လိုအပ်သူများ

       မိသားစုရာဇဝင်ရှိသူအားလုံးသည် သွေးချိုဆီးချို ရောဂါဖြစ်နိုင်ခြေအန္တရာယ်များသော်လည်း   မိဘ တစ်ဦး  သို့မဟုတ်   နှစ်ဦးစလုံးတွင်   သွေးချိုဆီးချို ရောဂါရှိကြောင်း ရောဂါရှာဖွေတွေ့ရှိသူများ၊ ဝမ်းဗိုက် အဝလွန်ခြင်း သို့မဟုတ်   ခါးအရွယ်အစားတိုးလာသူများ၊ ပုံမှန်အလုပ်များကို ထိုင်၍လုပ်သူများ သို့မဟုတ် စားပွဲထိုင်အလုပ်လုပ်သူများ၊  ကိုယ်ဝန်ဆောင် ဆီးချိုရောဂါရာဇဝင်ရှိသောအမျိုးသမီးများ၊ သွေးတိုး ရောဂါ သို့မဟုတ် ကိုလက်စထရောမြင့်မားသူ မည်သူ မဆို ပိုမိုအာရုံစိုက်ရန် လိုအပ်သည်။  ယခုအခါ ကမ္ဘာ့နိုင်ငံအသီးသီး၌  လူနေမှုပုံစံပြောင်းလဲမှုများ လျင်မြန်စွာဖြစ်ပေါ်နေပြီး အသက် ၂၀ နှင့် ၃၀ ကြားရှိ လူငယ်များပင် သွေးချိုဆီးချိုရောဂါအန္တရာယ်ဇုန်သို့ မျှော်မှန်းထားသည်ထက်    စောစီးစွာဝင်ရောက်နေ ကြောင်း တွေ့ရသည်။

သွေးချိုဆီးချိုရောဂါအန္တရာယ်ကို စောင့်ကြည့်ရှာဖွေခြင်း

       စောစီးစွာရှာဖွေတွေ့ရှိမှုသည်  ကြီးမားသော ခြားနားချက်ကိုဖြစ်စေနိုင်သည်။    အစာရှောင်သော သွေးတွင်းသကြားဓာတ်၊ အစာစားပြီး နှစ်နာရီအကြာ သွေးတွင်းသကြားဓာတ်နှင့် HbA1c ကဲ့သို့သော ပုံမှန် သွေးစစ်ဆေးမှုများသည် သွေးချိုဆီးချိုရောဂါကို အစောပိုင်းအဆင့်တွင်ရှာဖွေရန် ကူညီပေးနိုင်သည်။ ကိုယ်အလေးချိန်၊ ခါးအရွယ်အစား၊ သွေးပေါင်ချိန်နှင့် သွေးတွင်းကိုလက်စထရောများကို စောင့်ကြည့် စစ်ဆေးခြင်းသည်  အရေးကြီးသောစုံစမ်းစစ်ဆေး မှုများဖြစ်သည်။

အန္တရာယ်များသောအုပ်စုများအတွက် အကြံပြုထားသော ပုံမှန်စစ်ဆေးမှုများ

       ခြောက်လမှ ၁၂ လတစ်ကြိမ် အစာရှောင်သော သွေးတွင်းသကြားဓာတ်ကိုစစ်ဆေးခြင်း၊ သုံးလကြာ ပျမ်းမျှသကြားဓာတ်   HbA1c  နှင့်  သွေးတွင်းအဆီ စစ်ဆေးခြင်း၊ ကိုယ်အလေးချိန်သာမက ခါးလုံးပတ် အတိုင်းအတာနှင့် သွေးပေါင်ချိန်တိုင်းခြင်း၊   နေ့စဉ် စွမ်းအင်သုံးစွဲမှုနှင့်အိပ်စက်မှုပုံစံများကို  ကျန်းမာရေး နှင့်ညီညွတ်စေရန်  တစ်သက်တာသတိပြုခြင်းတို့  လိုအပ်သည်။

ကာကွယ်ခြင်းသည် ကုသခြင်းထက် ပိုမိုအစွမ်းထက်သည်သွေးချိုဆီးချိုရောဂါသည် မိသားစုများတွင်ဖြစ် ပွားနိုင်သော်လည်း အချိန်မီစောင့်ကြည့်စစ်ဆေး ရှာဖွေခြင်းသည် ရောဂါကိုနှောင့်နှေးစေရန် သို့မဟုတ် ကာကွယ်ရန်အထောက်အကူပေးနိုင်သည်။ အဓိက အချက်မှာ သွေးချိုဆီးချိုရောဂါကို ကာကွယ်နိုင်သည့် ရိုးရှင်းသောလူနေမှုပုံစံအလေ့အထများကို ပြောင်းလဲ မှုများသည် တစ်သမတ်တည်း ပုံမှန်ဖြစ်ရန်လိုအပ်သည်။

ဟင်းသီးဟင်းရွက်များ၊ ပဲအမျိုးမျိုးနှင့် ကောက်နှံ စေ့များကဲ့သို့သော အမျှင်ဓာတ်ကြွယ်ဝသည့် အစား အစာများကိုပိုမိုစားသုံးခြင်း၊ သွေးတွင်းသကြားဓာတ် တည်ငြိမ်စေရန် အစားအစာတိုင်းတွင် ပရိုတင်းဓာတ် နှင့် သင့်လျော်သောအာဟာရများကို ထည့်သွင်းခြင်း၊   ပုံမှန် ၇-၈ နာရီ   အိပ်စက်ခြင်း၊  ကြာမြင့်စွာထိုင်ချိန် ကိုလျှော့ချခြင်း၊ ရက်အများစုတွင် အနည်းဆုံး မိနစ် ၃၀ လမ်းလျှောက်ခြင်းနှင့် သွေးတွင်းသကြားဓာတ်ကို တိုက်ရိုက်သက်ရောက်မှုရှိသော   စိတ်ဖိစီးမှုကိုစီမံခန့်ခွဲခြင်းကဲ့သို့   ရိုးရှင်းသောအလေ့အထများက  သွေးချိုဆီးချိုရောဂါကိုကာကွယ်ရန် များစွာအထောက် အကူပြုနိုင်သည်။

နောက်မျိုးဆက်အတွက် မိသားစုရာဇဝင်ကို ပြောင်းလဲခြင်း

       မိသားစုရာဇဝင်သည်   အမွေဆက်ခံထားသော အရာကဲ့သို့   ရွေးချယ်ခွင့်မရှိဘဲ   မကြာခဏခံစားရ လေ့ရှိသည်။  သို့သော်  သတိရှိရှိစောင့်ကြည့်ရှာဖွေ စစ်ဆေးခြင်း၊ ကျန်းမာသောကိုယ်အလေးချိန်နှင့် BMI ထိန်းသိမ်းခြင်း၊ ဝမ်းဗိုက်အဆီများကိုရှောင်ကြဉ်ရန်တက်ကြွစွာနေထိုင်ခြင်း၊  ကျန်းမာရေးနှင့်ညီညွတ်စေ ရန်      တစ်သက်တာသတိပြု စားသောက်ခြင်းတို့ကို  လိုက်နာသောအခါ အချိန်ကြာလာသည်နှင့်အမျှ ထိုပြောင်းလဲမှုသည်  အမြဲတမ်းဖြစ်နိုင်သည်ဟုထင် ရသောပုံစံများကို ပြောင်းလဲနိုင်ကြောင်း တွေ့ရသည်။

အချုပ်အားဖြင့်ဆိုရသော် မိသားစုရာဇဝင်သည် အနာဂတ်  သွေးချိုဆီးချိုရောဂါအန္တရာယ်အတွက်   အစောပိုင်း သတိပေးစနစ်တစ်ခုဖြစ်ပြီး   ကြိုတင် ကာကွယ်နိုင်သော အခွင့်အရေး တစ်ခုလည်းဖြစ်သည်။ ဆင်ခြင်တုံတရားနှင့်  စောစီးစွာ စဉ်ဆက်မပြတ်ကြိုတင် ကာကွယ်မှုများ လုပ်ဆောင်နိုင်ခြင်းကြောင့် အန္တရာယ် ရှိသောအချက်များကို လျှော့ချနိုင်သည်။  မျိုးရိုးဗီဇ သည် သွေးချိုဆီးချိုရောဂါ လမ်းကြောင်းကို  ဖန်တီး နိုင်သော်လည်း  နေ့စဉ်အလေ့အကျင့်များက  ရောဂါ အဖြစ်ပြောင်းလဲသွားမည်လား  သို့မဟုတ် ကာကွယ်နိုင်မည်လားဆိုသည်ကို  ဆုံးဖြတ်ပေးနိုင်ခြင်းကြောင့် ရေရှည်သွေးချိုဆီးချို ရောဂါဖြစ်နိုင်ခြေကို   သိသိ သာသာ လျှော့ချပေးနိုင်ကြောင်း   ရေးသား တင်ပြ လိုက်ရပါသည်။

MWD

      အစားအစာများသည်  ဗိုက်ပြည့်ရုံအတွက်သာမက  စွမ်းအင်ရရှိရန်  များစွာအကျိုးရှိသည်။   အစားအစာတိုင်းသည်   ခန္ဓာကိုယ်အစိတ် အပိုင်းအားလုံးနှင့်  ဦးနှောက်အတွက် တစ်မျိုးစီအကျိုးသက်ရောက်မှု ရှိကြသည်။ အပင်ထွက်ပစ္စည်း သို့မဟုတ် တိရစ္ဆာန်ထုတ်ကုန်အများစု သည် ဦးနှောက်အပေါ် အကျိုးသက်ရောက်မှုရှိရန် အစားအစာတစ်မျိုးတည်းတွင် လုံလောက်သောဓာတုပစ္စည်းများ မပါဝင်သော်လည်း အဆိုပါအစားအစာတွင်ပါဝင်သည့်ပစ္စည်းများက ဦးနှောက်၏လုပ်ငန်း ဆောင်တာများကို   ပြောင်းလဲပစ်နိုင်သည်။   အဆိုပါအစားအစာများ သည် ဆေးဝါးကဲ့သို့အသုံးပြုနိုင်သော အစားအစာများဖြစ်သည်။

ချောကလက်

    ချောကလက်တွင် စွမ်းအင်မြှင့်တင်ပေးနိုင်သော ကဖင်း၊ စိတ်အာရုံ ပြောင်းနိုင်သော  ဓာတုပစ္စည်းအမျိုးပေါင်း  ၃၅၀  ကျော်ပါဝင်သည်။ ထို့ကြောင့် ချောကလက်တစ်ခုတွင်ပါဝင်သော ဓာတုပစ္စည်းများပေါင်းစပ် မိလျှင် အလွန်အစွမ်းထက်မည်ဖြစ်သည်။ ချောကလက်စားသုံးခြင်းဖြင့် သွေးဖိအားနှင့်    သွေးတွင်းသကြားဓာတ်များ   မြင့်တက်လာနိုင်ပြီး တက်ကြွမှုရှိသော စိတ်ခံစားမှုကိုရရှိစေသည်။ ချောကလက်တွင်ပါဝင် သော သီအိုဘရိုမင်းက စိတ်ကျရောဂါပျောက်ကင်းစေရန် လုပ်ဆောင် ပေးနိုင်သည်။

အညိုရောင်ချောကလက်အတုံးသေးတစ်တုံးတွင် စွမ်းအင်ထုတ်လုပ် ပေးနိုင်သည့် ကဖင်းဓာတ် ၂၀ ဂရမ်ပါဝင်သည့်အပြင်  စိတ်ခံစားမှုကိုထိန်းချုပ်ခြင်း၊  အစာစားချင်စိတ်နှင့် နာကျင်မှုဝေဒနာသက်သာစေနိုင် သည့် ဓာတုပစ္စည်းလည်း ပါဝင်သည်။

သကြား

     လူတို့သည် စွမ်းအင်ရရှိရန် ဂလူးကို့စ်လိုအပ်သည်။  နံနက်အိပ်ရာထ ခါစတွင် အစာကြေလွယ်သော သကြားကဲ့သို့အစာကိုစားပါက ခန္ဓာကိုယ် တွင်း ဒိုပါမင်းနှင့် စိတ်ငြိမ်နိုင်သည့်ဟော်မုန်းများထွက်ရှိပြီး ဦးနှောက်မှ စိတ်အာရုံခံစားမှုကောင်းစေသောရလဒ်များ ရရှိနိုင်သည်ဟု ကျွမ်းကျင် သူများကပြောသည်။  သကြားသည် မိမိအတွက်  ဦးနှောက်မှလိုအပ် သည့်  နိုးကြားမှုနှင့်  မှတ်ဉာဏ်စုဆောင်းမှုနှစ်မျိုးအတွက်  အသုံးဝင် သည်ဟု ဆိုနိုင်သည်။

လူသားတို့အသက်ကြီးလာသော် ကျဆင်းနိုင်သည့် မှတ်ဉာဏ်နှင့် သင်ယူမှုများသို့မဟုတ် ဆီးချိုဖြစ်ခြင်းနှင့်သူငယ်ပြန်ခြင်းဖြစ်လာ သော် ဦးနှောက်၏လုပ်ငန်းဆောင်တာများအတွက် ဂလူးကို့စ်ကို အသုံးပြုနိုင်စွမ်း လျော့နည်းသွားတတ်သည်။ လေ့လာမှုတစ်ခုတွင် သူငယ်ပြန် သည့်လူနာများအား သကြား ၅၀၀ ဂရမ်ပါဝင်သော ဖျော်ရည်တိုက်ကြည့် ရာ ဖျော်ရည်တိုက်ပြီး နှစ်နာရီအတွင်း မှတ်ဉာဏ်များ  သိသိသာသာတိုးတက်ကောင်းမွန်လာသည်ကို တွေ့ရှိခဲ့ကြသည်။ သကြားကို ပမာဏ များစွာသုံးစွဲခြင်းက  ကျန်းမာရေးကို  ထိခိုက်စေနိုင်သည်။  သကြားဓာတ်ပမာဏအနည်းငယ်ကို ကာဗိုဟိုက်ဒြိတ်မှတစ်ဆင့် ရရှိနိုင်သဖြင့် တစ်ခါတစ်ရံ    အချိုတည်းသည့်အနေဖြင့်    သုံးရုံဆိုလျှင်   လုံလောက်သည်။

နနွင်း

     နနွင်းကို  အိန္ဒိယနိုင်ငံ၌  တိုင်းရင်းဆေးအဖြစ်  အသုံးပြုသည်မှာ ကြာမြင့်ခဲ့ပြီဖြစ်သည်။ နနွင်းကို လိပ်ခေါင်းရောဂါမှစ၍ သွေးလွှတ်ကြော မာကြောသည့်ရောဂါအထိ ရောဂါမျိုးစုံအတွက် အသုံးပြုခဲ့ကြသည်။ ထို့ကြောင့် သုတေသီများက နနွင်းကို လေ့လာမှုများပြုလုပ်ခဲ့ရာ  အိန္ဒိယ နိုင်ငံနှင့် နနွင်းအသုံးပြုသောနိုင်ငံများ၌ အယ်ဇိုင်းမားရောဂါဖြစ်ပွားမှု နည်းပါးသည်ကိုတွေ့ရသည်။

လေ့လာမှုတစ်ခုတွင် အယ်ဇိုင်းမားရောဂါရှိသူများက နနွင်းတွင်ပါဝင်သည့် ကာကူမင်ဓာတ်တိုး ဆန့်ကျင်ပစ္စည်းများကို မှီဝဲပြီးနောက်ပိုင်း သိသိသာသာ တိုးတက်ကောင်းမွန်လာသည်ကို တွေ့ရှိရသည်။ နနွင်းသည် ရောင်ရမ်းမှုကိုလျော့ကျစေသည့် ဂုဏ်သတ္တိလည်းရှိသည်။ အယ် ဇိုင်းမားရောဂါဖြစ်စေသော ဦးနှောက်တွင် အမိုင်းရွိုက်ပရိုတင်းစုဆောင်း မှုကိုလည်း လျှော့ချပေးနိုင်သည်။

ငှက်ပျောသီး

     ငှက်ပျောသီးတွင်  ပိုတက်ဆီယမ်ကြွယ်ဝစွာ ပါဝင်သောကြောင့် ပဋိဇီဝဆေးများနှင့် တွဲ၍မစားသင့်ပါ။   ခန္ဓာကိုယ်တွင်    ပိုတက်ဆီယမ် ပမာဏအလွန်များပြားသောအခါ နှလုံးခုန်မမှန်ခြင်းကြောင့်  ရင်တုန် ခြင်းခံစားရနိုင်သည်။ အထူးသဖြင့်  သွေးတိုးရောဂါကြောင့်  သောက်သုံး ရသည့်ဆေးဝါးများကို ငှက်ပျောသီးနှင့်တွဲဖက်စားသုံးခြင်းမျိုး မပြုလုပ် သင့်ပါ။

အချဉ်ဓာတ်ရှိသောအစားအစာများ

     သံပရာသီး၊ သံပရိုသီး၊ လိမ္မော်သီး၊ ဂရိတ်ဖရုသီးကဲ့သို့ အချဉ်ဓာတ်ရှိ သောအသီးများ၊ အချဉ်ဓာတ်ထည့်သွင်းထုတ်လုပ်ထားသည့် သောက် စရာများ၊ ခရမ်းချဉ်သီးဆော့စ်ကဲ့သို့ အချဉ်ဓာတ်ပါဝင်သောအစားအစာ များကို ဆေးဝါးနှင့်တွဲဖက်၍မစားသင့်ပါ။   

နွားနို့နှင့်နို့ထွက်ပစ္စည်း(ဒိန်ချဉ်မှလွဲ၍)

     နွားနို့ပူပူနှင့်ဆေးကို တွဲ၍မသောက်သင့်ပါ။ နွားနို့တွင် ကယ်လ်စီယမ် ပါဝင်သောကြောင့်  အရိုးများကြံ့ခိုင်စေသည်ဆိုသော်လည်း   ပဋိဇီဝဆေးနှင့်  တွဲ၍မသောက်သင့်ပါ။  ဆေးစုပ်ယူနိုင်စွမ်းအပေါ် အဟန့်အတားဖြစ်စေနိုင်သည်။ အကယ်၍ နို့နှင့်နို့ထွက်ပစ္စည်းများ  စားသုံး ထားသည်ဆိုလျှင် အနည်းဆုံး သုံးနာရီခြားပြီးမှသာ ဆေးသောက်သင့် သည်။

ဒိန်ချဉ်က    ခန္ဓာကိုယ်အတွက်   အကျိုးပြုဗက်တီးရီးယားများ ပေါက်ပွားနိုင်ရန် လုပ်ဆောင်ပေးသောကြောင့် ထိခိုက်ဒဏ်ရာများကို မြန်မြန်အနာကျက်စေနိုင်သကဲ့သို့   ကိုယ်ခံအားကောင်းမွန်စေသည်။

ဒိန်ချဉ်က ပရိုဘိုင်အိုတစ်အကျိုးပြုဗက်တီးရီးယားဖြစ်ပြီး ပဋိဇီဝဆေး၏ ဘေးထွက်ဆိုးကျိုးဖြစ်သော ဝမ်းသွားခြင်းကိုသက်သာစေသည်။

အမျှင်ဓာတ်များသောအစားအစာ

    နေမကောင်းသည့်အခါ အမျှင်ဓာတ်များသောအစားအစာများ မစား သင့်ပါ။ အမျှင်ဓာတ်က ခန္ဓာကိုယ်အတွက်လိုအပ်သကဲ့သို့ ကိုယ်အလေးချိန်ကိုကျဆင်းစေသော်လည်း  နေမကောင်း၍ ဆေးများသောက်နေ ချိန်တွင်  စားသုံးမည်ဆိုပါက ဆေးအာနိသင်ကို  လျော့ပါးစေနိုင်သည်။   

ကဖင်းဓာတ်ပါသောအစားအစာ 

     ကဖင်းဓာတ်ပါသောသောက်စရာများနှင့် ဆေးများကို တွဲဖက်သောက် မည်ဆိုလျှင်  ဆေး၏အာနိသင်ကို  ပျက်ပြယ်စေနိုင်သည်။  ထို့ကြောင့် နေမကောင်းသည့်အခါ  ကော်ဖီ၊ လက်ဖက်ရည်၊  ရေနွေးကြမ်းကဲ့သို့ ကဖင်းဓာတ်ပါသောသောက်စရာများနှင့် ဆေးကို တွဲဖက်မသောက် သင့်ပါ။

ပန်းနာ၊ ရင်ကျပ်ဝေဒနာရှင်များ ကော်ဖီသောက်ခြင်းကို ရှောင်ကြဉ် သင့်သည်။ ကော်ဖီတွင်ပါဝင်သော ကဖင်းဓာတ်က အာရုံကြောများ အပေါ်  သက်ရောက်မှုရှိသကဲ့သို့  ရင်တုန်ခြင်းနှင့်  စိတ်အလွန်လှုပ်ရှား ခြင်းမျိုး ဖြစ်စေနိုင်သည်။

နေမကောင်းဖြစ်သည့်အခါ  မြန်မြန်သက်သာလိုပါက  အဆိုပါအစားအစာများကိုရှောင်ကြဉ်ပြီး ဆေးကို အချိန်နှင့်စနစ်တကျပြည့်ပြည့် ဝဝသောက်သုံးသင့်သည်။ အစားအစာကို ဂရုစိုက်ခြင်းကလည်း မြန်မြန် နေကောင်းစေရန် အကောင်းဆုံးနည်းလမ်းတစ်ခုဖြစ်ကြောင်း ရေးသား လိုက်ရပါသည်။

MWD