ယူရီးယားဓာတ်မြေသြဇာကို ဈေးနှုန်းနှစ်ဆပေး၍ တင်သွင်းရန် အိန္ဒိယ သဘောတူ

NoahJune222

News Image

  • ယူရီးယားဓာတ်မြေသြဇာကို ဈေးနှုန်းနှစ်ဆပေး၍ တင်သွင်းရန် အိန္ဒိယ သဘောတူ

အရှေ့အလယ်ပိုင်းတွင် ဖြစ်ပွားနေသည့် စစ်ရေးပဋိပက္ခကြောင့် ထောက်ပံ့မှုကွင်းဆက်များ ပြတ်တောက်နေစဉ် အိန္ဒိယနိုင်ငံအနေဖြင့် ယူရီးယားဓာတ်မြေသြဇာကို ယခုနှစ်အစောပိုင်းက ပေးချေခဲ့သည့် ဈေးနှုန်းထက် နှစ်ဆပေး၍ တင်သွင်းရန် သဘောတူညီခဲ့ကြောင်း သိရသည်။

အိန္ဒိယအစိုးရသည် နိုက်ထရိုဂျင်ဓာတ်မြေသြဇာ တန်ချိန် ၂ ဒသမ ၅ သန်းကို တင်ဒါတစ်ရပ်တည်းဖြင့် စံချိန်တင် တင်သွင်းတော့မည်ဖြစ်ကြောင်း အစိုးရသတင်းရင်းမြစ်များကို ကိုးကား၍ ရိုက်တာသတင်းဌာနက ဧပြီ ၂၂ ရက်တွင် သတင်းထုတ်ပြန်ထားသည်။

ထို့ပြင် သတင်းထုတ်ပြန်ချက်အရ အိန္ဒိယနိုင်ငံရှိ ကုမ္ပဏီတစ်ခုဖြစ်သည့် Indian Potash Ltd. သည် နိုင်ငံအနောက်ဘက်ကမ်းခြေသို့ ပို့ဆောင်ရန်အတွက် ယူရီးယားတန်ချိန် ၁ ဒသမ ၅ သန်းကို တစ်တန်လျှင် ၉၃၅ ဒေါ်လာနှုန်းဖြင့်လည်းကောင်း၊ အရှေ့ဘက်ကမ်းခြေသို့ ပို့ဆောင်ရန်အတွက် နောက်ထပ် တန်ချိန် ၁ သန်းကို တစ်တန်လျှင် ၉၅၉ ဒေါ်လာနှုန်းဖြင့်လည်းကောင်း ဝယ်ယူရန် သဘောတူညီခဲ့ကြောင်း သိရသည်။

အိန္ဒိယနိုင်ငံသည် ကမ္ဘာပေါ်တွင် ယူရီးယားဓာတ်မြေသြဇာ အများဆုံး တင်သွင်းသည့်နိုင်ငံဖြစ်ပြီး ၎င်း၏ ယူရီးယားထုတ်လုပ်မှုမှာ အဓိကအားဖြင့် အရှေ့အလယ်ပိုင်းမှ တင်သွင်းရသော သဘာဝဓာတ်ငွေ့ပေါ်တွင် များစွာ မှီခိုနေသည်။ ယခုကဲ့သို့ ဈေးနှုန်းနှစ်ဆပေး၍ ဝယ်ယူမှုသည် ယူရီးယားထုတ်လုပ်ရန်အတွက် အဓိကကုန်ကြမ်းဖြစ်သော သဘာဝဓာတ်ငွေ့ရည် ပြတ်လပ်နေချိန်တွင် ထွက်ပေါ်လာခြင်းဖြစ်ကြောင်း သိရသည်။

Ref: RT

MWD

MM-News-Category
စီးပွားရေးကဏ္ဍသတင်း
စီးပွားရေး-နိုင်ငံတကာသတင်း

ဆက်စပ်သတင်းများ

ဝါးမှ ချည်ချောထုတ်လုပ်ရာတွင် အသေးစား၊ အငယ်စားနှင့် အလတ်စားအလိုက် ဆောင်ရွက်နိုင်မည့်အခြေအနေများဆွေးနွေး
ဝါးမှ ချည်ချောထုတ်လုပ်ရာတွင် အသေးစား၊ အငယ်စားနှင့် အလတ်စားအလိုက် ဆောင်ရွက်နိုင်မည့်အခြေအနေများဆွေးနွေး
နေပြည်တော် ဧပြီ ၂၃ နိုင်ငံတော်သမ္မတ၏ လမ်းညွှန်ချက်အရ ဝါးမှ ချည်ချောထုတ်လုပ်နိုင်ရေးနှင့် စပ်လျဉ်းသည့် အလုပ်ရုံဆွေးနွေးပွဲကို ယနေ့နံနက်ပိုင်းတွင် စက်မှုနှင့် အသေးစား၊ အငယ်စား၊ အလတ်စားနှင့် စီးပွားရေးလုပ်ငန်းများ ဖွံ့ဖြိုးတိုးတက်ရေးဝန်ကြီးဌာန ရုံးအမှတ်(၃၀) အစည်းအဝေးခန်းမ၌ ကျင်းပသည်။ အစည်းအဝေးသို့ စက်မှုနှင့် အသေးစား၊ အငယ်စား၊ အလတ်စားနှင့် စီးပွားရေးလုပ်ငန်းများ ဖွံ့ဖြိုးတိုးတက်ရေးဝန်ကြီးဌာန ပြည်ထောင်စုဝန်ကြီး ဒေါက်တာ ချာလီသန်း၊ ဒုတိယဝန်ကြီး ဦးသွင်အောင် နှင့် ဒေါက်တာအောင်ဇေယျ၊ ဆက်စပ်ဝန်ကြီးဌာနများမှ ညွှန်ကြားရေးမှူးချုပ်များ၊ ဦးဆောင်ညွှန်ကြားရေးမှူးများ၊ ပုဂ္ဂလိကအသင်းအဖွဲ့များမှ ကိုယ်စားလှယ်များနှင့် တာဝန်ရှိသူများ တက်ရောက်ကြသည်။ ဦးစွာ ပြည်ထောင်စုဝန်ကြီးက အလုပ်ရုံဆွေးနွေးပွဲကို သက်ဆိုင်ရာဌာနများမှ ပညာရှင်များက ဝါးမှ ချည်မျှင်ထုတ်လုပ်သည့် ကဏ္ဍအလိုက် တင်ပြခြင်းများ၊ အဖွဲ့လိုက်ဆွေးနွေးခြင်းတို့ဖြင့် ကျင်းပပြုလုပ် သွားမည်ဖြစ်ကြောင်း၊ အဖွဲ့လိုက်ဆွေးနွေးရာတွင် ဝါးမှ ချည်ချောထုတ်လုပ်မှု လုပ်ငန်းစဉ်တစ်လျှောက် ဆက်စပ်ဆောင်ရွက်ရမည့် လုပ်ငန်းကဏ္ဍများနှင့် စပ်လျဉ်း၍ ဝါးကုန်ကြမ်းကွင်းဆက်နှင့် စိုက်ပျိုးထုတ် လုပ်မှုကဏ္ဍ၊ နည်းပညာနှင့် ထုတ်လုပ်မှုနည်းစဉ် ကဏ္ဍ၊ စက်ပစ္စည်းနှင့် ချည်ချောထုတ်လုပ်မှုကဏ္ဍ၊ ရင်းနှီးမြှုပ်နှံမှုနှင့် မူဝါဒရေးရာကဏ္ဍ စသည့် အုပ်စု လေးစုဖြင့် ခွဲခြားဆွေးနွေးသွားမည်ဖြစ်ကြောင်း။ အုပ်စုများတွင် သက်ဆိုင်ရာဌာနအသီးသီးမှ ကိုယ်စားလှယ်များ ပါဝင်ဆွေးနွေးသွားမည်ဖြစ်ကြောင်း၊ အုပ်စု(၁)အနေဖြင့် ဝါးကုန်ကြမ်း ကွင်းဆက်နှင့် စိုက်ပျိုးထုတ်လုပ်မှုကဏ္ဍနှင့် ပတ်သက်ပြီး ကုန်ကြမ်းအရည်အသွေးနှင့် မျိုးရွေးချယ်မှု၊ စိုက်ပျိုးမှုစနစ်နှင့် ရေရှည်တည်တံ့မှု၊ ကုန်ကြမ်း စုဆောင်းမှုနှင့် သယ်ယူပို့ဆောင်ရေး စသည့် အချက်များကိုလည်းကောင်း၊ အုပ်စု(၂)အနေဖြင့် နည်းပညာနှင့် ထုတ်လုပ်မှုနည်းစဉ်များနှင့် ပတ်သက်၍ ဝါးမှ Textile – Grade Fiber ဖြစ်အောင် ဆောင်ရွက်မည့်နည်းလမ်းများ၊ မြန်မာနိုင်ငံအတွက် အဆင်ပြေသင့်တော်မည့် နည်းလမ်း၊ အဆိုပါနည်းလမ်း၏ ထုတ်လုပ်မှု နည်းစဉ်၊ အသုံးပြုရမည့် စက်ကိရိယာများ၊ စက်များရရှိနိုင်မှုအခြေအနေနှင့် အဆင့်မြှင့်တင်ဆောင်ရွက်ရမည့် နည်းလမ်းများ၊ အရည်အသွေးထိန်းကျောင်း စစ်ဆေးသင့်သည့် အချက်များ၊ သဘာဝပတ်ဝန်းကျင်ထိခိုက်မှု မရှိစေရေး စီမံဆောင်ရွက်သင့်သည့် အချက်များ၊ မြန်မာနိုင်ငံရှိ MSME များအနေဖြင့် ဝါးမှ ချည်ချောထုတ်လုပ်ရာတွင် အသေးစား၊ အငယ်စားနှင့် အလတ်စားအလိုက် ဆောင်ရွက်နိုင်မည့် အခြေအနေများ စသည့်အချက်များကိုလည်းကောင်း၊ အုပ်စု(၃) အနေဖြင့် စက်ပစ္စည်းနှင့် ချည်ချောထုတ်လုပ်မှုကဏ္ဍနှင့် ပတ်သက်၍ ကုန်ကြမ်းပြင်ဆင်ခြင်း၊ စက်ကိရိယာနှင့် နည်းပညာ၊ ထုတ်လုပ်မှုလုပ်ငန်းစဉ်၊ ကုန်ကျစရိတ်၊ စိန်ခေါ်မှုနှင့် ဖြေရှင်းမည့်နည်းလမ်းများ စသည့် အချက်များကိုလည်းကောင်း၊ အုပ်စု(၄) အနေဖြင့် ရင်းနှီးမြှုပ်နှံမှုနှင့် မူဝါဒရေးရာကဏ္ဍနှင့် ပတ်သက်၍ မူဝါဒရေးရာ၊ ဌာနအချင်းချင်း ပူးပေါင်းဆောင်ရွက်မှု၊ ရင်းနှီးမြှုပ်နှံမှု အခွင့်အလမ်း၊ ဘဏ္ဍာရေးဆိုင်ရာ အထောက်အပံ့များ၊ သက်ရောက်မှုများလျှော့ချရေး နှင့် စီမံချက် (Action Plan) အကောင်အထည်ဖော်ရေး စသည့် အချက်များကိုလည်းကောင်း ဆွေးနွေးသွားမည်ဖြစ်ကြောင်း၊ နိုင်ငံတော်၏ စီးပွားရေးဖွံ့ဖြိုး တိုးတက်မှုကိုဖော်ဆောင်ရာတွင် အစိုးရ - ပုဂ္ဂလိက ပူးပေါင်းဆောင်ရွက်မှုသည် အရေးကြီးကြောင်း၊ ဝါးမှ ချည်ချောထုတ်လုပ်သည့်လုပ်ငန်းကို အစိုးရ၏ ရက် ၁၀၀ စီမံကိန်းအတွင်း ပြီးစီးအောင် အထူးကိစ္စရပ် တစ်ခုအနေဖြင့် ဆောင်ရွက်သွားမည်ဖြစ်ကြောင်း၊ ယနေ့ တက်ရောက်လာကြသူများအနေဖြင့် နိုင်ငံတော်သမ္မတ၏ လမ်းညွှန်ချက်နှင့်အညီ ဝါးမှ ချည်ချောထုတ်လုပ်ခြင်းဆိုင်ရာ အလုပ်ရုံဆွေးနွေးပွဲတွင် မိမိတို့၏ ကဏ္ဍအလိုက် ပါဝင်ဆွေးနွေးခြင်းဖြင့် အနာဂတ်နိုင်ငံတော်၏ စီးပွားရေးဖွံ့ဖြိုးတိုးတက်မှုကို ပူးပေါင်းဆောင်ရွက်ကြရန် ဆန္ဒပြုတိုက်တွန်းပါကြောင်း ပြောကြားသည်။ ထို့နောက် သိပ္ပံနှင့် နည်းပညာဝန်ကြီးဌာန သုတေသနနှင့် တီထွင်ဆန်းသစ်မှုဦးစီးဌာန ညွှန်ကြားရေးမှူးချုပ်၊ သယံဇာတနှင့် သဘာဝပတ်ဝန်းကျင် ထိန်းသိမ်းရေးဝန်ကြီးဌာန၊ သစ်တောဦးစီးဌာနမှ သုတေသနအရာရှိ၊ ရန်ကုန်နည်းပညာ တက္ကသိုလ် ချည်မျှင်နှင့် အထည်အင်ဂျင်နီယာဌာန ပါမောက္ခ၊ ဌာနမှူး၊ အမှတ်(၃) အကြီးစားစက်မှု လုပ်ငန်း အထွေထွေမန်နေဂျာ၊ တပ်မတော် ချည်မျှင်နှင့် အထည်စက်ရုံ(သမိုင်း) ဒုတိယစက်ရုံမှူးတို့က သက်ဆိုင်ရာကဏ္ဍအလိုက် အသီးသီးရှင်းလင်း ဆွေးနွေးတင်ပြပြီး ဆွေးနွေးပွဲ တက်ရောက်လာကြသူများက အထွေထွေဆွေးနွေးခြင်းများ ဆောင်ရွက်သည်။ မွန်းလွဲပိုင်းတွင် အုပ်စုအလိုက် သတ်မှတ်ထားသည့် ကဏ္ဍအသီးသီးတို့ကိုဆွေးနွေး၍ အုပ်စုအလိုက် ဆွေးနွေးရရှိသည့်ရလဒ်များကို ပြန်လည်ရှင်းလင်း တင်ပြသည်။ ထို့နောက် အမှတ်(၃) အကြီးစားစက်မှု လုပ်ငန်း ဦးဆောင်ညွှန်ကြားရေးမှူးက အုပ်စုအလိုက် ဆွေးနွေးပွဲရလဒ်များအပေါ် သုံးသပ်တင်ပြခြင်း၊ ယခုဆွေးနွေးပွဲမှရရှိသည့် ရလဒ်များကို အခြေခံ၍ စာတမ်းတစ်စောင်ပြုစုပြီး နိုင်ငံတော် သမ္မတရုံးသို့ တင်ပြဆောင်ရွက်သွားမည့် အခြေအနေတို့ကို ရှင်းလင်းတင်ပြခြင်းများ ဆောင်ရွက်ခဲ့ကြောင်း သိရသည်။ သတင်းစဉ်MDN
Fri, 24-Apr-2026
(၂၄.၄.၂၀၂၆) ရက်နေ့ ဓာတ်သတ္တု(ရွှေ)ရည်ညွှန်းဈေး (Market Rate)
(၂၄.၄.၂၀၂၆) ရက်နေ့ ဓာတ်သတ္တု(ရွှေ)ရည်ညွှန်းဈေး (Market Rate)
သိပ်သည်းဆ ၁၉.၂၅ ဂရမ်/ကုဗစင်တီမီတာနှင့်အထက်ရှိ စံချိန်မီရွှေ ၁ ကျပ်သား (၁၆.၃၂၉၃၂၅ ဂရမ်)၏ ဈေးနှုန်း (၇,၁၀၀,၀၀၀) ကျပ် ဓာတ်သတ္တု(ရွှေ)ရည်ညွှန်းဈေးသတ်မှတ်ရေးကော်မတီ
Fri, 24-Apr-2026
ပဲခူးတိုင်းဒေသကြီး သမဝါယမကဏ္ဍက ငါးများ မွေးမြူထုတ်လုပ်
ပဲခူးတိုင်းဒေသကြီး သမဝါယမကဏ္ဍက ငါးများ မွေးမြူထုတ်လုပ်
ပဲခူး ဧပြီ ၂၃သမဝါယမကဏ္ဍက ရေထွက်ကုန်ပစ္စည်းများကို စားသုံးသူပြည်သူများ ဈေးနှုန်းချိုသာစွာဖြင့် လွယ်လင့်တကူ ဝယ်ယူစားသုံးနိုင်ရေးအတွက် ဖြန့်ဖြူးရောင်းချပေးလျက်ရှိရာ ပဲခူးတိုင်းဒေသကြီးအတွင်းရှိ ပဲခူး၊ တောင်ငူ၊ ကျောက်တံခါး၊ လက်ပံတန်းနှင့် သဲကုန်းမြို့နယ်များရှိ ငါးကုန်ထုတ်သမဝါယမအသင်းတို့၏ အသင်းပိုင်ငါးကန်များ၌ ငါးမျိုးစုံ မွေးမြူထားရှိသည်။အဆိုပါ အသင်းပိုင်ငါးကန်များအနက် တောင်ငူမြို့နယ် ကေတုမတီ ငါးကုန်ထုတ်သမဝါယမအသင်းနှင့် သဲကုန်းမြို့နယ် ချမ်းမြေ့ငါးမွေးမြူရေး ကုန်ထုတ်သမဝါယမအသင်းတို့၏ ငါးမွေးမြူရေးကန်များမှ ငါးမြစ်ချင်း၊ ငါးမုတ်၊ ငါးတန်၊ မြက်စား၊ တီလားဗီးယား၊ ငါးခေါင်းပွနှင့် ငါးကြင်း ပိဿာချိန် ၁၄၄၁၆ ဒသမ ၂၀၀ ပိဿာကို စားသုံးသူပြည်သူများ ဝယ်ယူစားသုံးနိုင်ရန်အတွက် လက်လီလက်ကား ဖြန့်ဖြူးရောင်းချပေး ခဲ့ကြောင်း သိရသည်။သတင်းစဉ်Photo Crd - doca
Fri, 24-Apr-2026
မွန်ပြည်နယ်ဝန်ကြီးချုပ် ရေဆင်းပေါ်ဆန်း(၁)၊ (၂)စပါးမျိုးသစ်များ ဒေသနှင့်ကိုက်ညီမှု ရှိ၊ မရှိ စမ်းသပ်စိုက်ပျိုးထားရှိမှု ကွင်းသရုပ်ပြပွဲနှင့် အသားတိုးဝက်မွေးမြူရေးခြံသို့ သွားရောက်ကြည့်ရှု
မွန်ပြည်နယ်ဝန်ကြီးချုပ် ရေဆင်းပေါ်ဆန်း(၁)၊ (၂)စပါးမျိုးသစ်များ ဒေသနှင့်ကိုက်ညီမှု ရှိ၊ မရှိ စမ်းသပ်စိုက်ပျိုးထားရှိမှု ကွင်းသရုပ်ပြပွဲနှင့် အသားတိုးဝက်မွေးမြူရေးခြံသို့ သွားရောက်ကြည့်ရှု
ပေါင် ဧပြီ ၂၃ မွန်ပြည်နယ် စိုက်ပျိုးရေးဦးစီးဌာန ပေါင်မြို့နယ်ရှိ ရေဆင်း ပေါ်ဆန်း(၁)၊ (၂)စပါးမျိုးသစ်များ ဒေသနှင့်ကိုက်ညီမှု ရှိ/မရှိ စမ်းသပ်စိုက်ပျိုးထားရှိမှု ကွင်းသရုပ်ပြပွဲ အခမ်းအနားကို ယနေ့နံနက်ပိုင်းက ပေါင်မြို့နယ် ဖြူဘကျေးရွာ တောင်သူ ဦးသန်းထွန်း၏ လယ်မြေ၌ ကျင်းပရာ မွန်ပြည်နယ်ဝန်ကြီးချုပ် ဦးအောင်ဝင်းသန်း၊ ပြည်နယ်ဝန်ကြီးများနှင့် တာဝန်ရှိသူများ တက်ရောက်ကြသည်။ အခမ်းအနားတွင် စိုက်ပျိုးရေးဦးစီးဌာန ပြည်နယ်ဦးစီးမှူးက စပါးသီးနှံ ပန်းတိုင်အထွက် ရရှိရေးအတွက် ဆောင်ရွက်နေမှု အခြေအနေများကို လည်းကောင်း၊ ပေါင်မြို့နယ်ဦးစီးမှူးက ပေါင်မြို့နယ်၏ သီးနှံစိုက်ပျိုးထုတ်လုပ်မှု အခြေအနေများနှင့် ရေဆင်းပေါ်ဆန်း (၁)၊ (၂) စပါးမျိုးသစ်များ စမ်းသပ်စိုက်ပျိုး ထုတ်လုပ်မှု အတွေ့အကြုံများကို ရှင်းလင်းတင်ပြသည်။ ထို့နောက် ပြည်နယ်ဝန်ကြီးချုပ်က အမှာစကားပြောကြားသည်။ ယင်းနောက် စီမံကိန်း၊ စီးပွားရေးနှင့်ဘဏ္ဍာရေးဝန်ကြီးက လိုအပ်သည်များကို ဖြည့်စွက်ဆွေးနွေးပြီး ပြည်နယ်ဝန်ကြီးချုပ်က တောင်သူများနှင့် တွေ့ဆုံကာ တောင်သူများ၏ လိုအပ်သည်များ ပေါင်းစပ်ညှိနှိုင်းဆောင်ရွက်ပေး၍ ရေဆင်းပေါ်ဆန်း (၁)၊ (၂)စပါးမျိုး များ စမ်းသပ်စိုက်ပျိုးအောင်မြင် ဖြစ်ထွန်းနေမှု အခြေအနေများကို ကွင်းဆင်းကြည့်ရှု အားပေးသည်။ ဆက်လက်၍ ပြည်နယ်ဝန်ကြီးချုပ်နှင့် အဖွဲ့သည် ပေါင်မြို့နယ် ရဲဗြားကုန်းကျေးရွာရှိ ဦးတင်မြင့်၏ အသားတိုးဝက် မွေးမြူရေးခြံသို့ ရောက်ရှိပြီး ရှင်းလင်းဆောင်တွင် မွေးမြူရေးနှင့်ကုသရေးဦးစီးဌာန ပြည်နယ်ဦးစီးမှူးနှင့် ဝက်မွေးမြူရေး ခြံပိုင်ရှင်တို့က ဝက်မွေးမြူရေးဆိုင်ရာ အချက်အလက်များ၊ ဝက်မွေးမြူထားရှိမှု အခြေအနေများကို ရှင်းလင်းတင်ပြသည်။ ထို့နောက် ပြည်နယ်ဝန်ကြီးချုပ်နှင့် တာဝန်ရှိသူများသည် အသားတိုးနှင့် မျိုးဝက်မွေးမြူရေးခြံများအတွင်း လှည့်လည်ကြည့်ရှုပြီး ပြည်နယ်ဝန်ကြီးချုပ်က တာဝန်ရှိသူများအား လိုအပ်သည်များ လမ်းညွှန်မှာကြားခဲ့ကြောင်း သိရသည်။မွန်မလေး (ပြန်/ဆက်)
Fri, 24-Apr-2026
ယူရီးယားဓာတ်မြေသြဇာကို ဈေးနှုန်းနှစ်ဆပေး၍ တင်သွင်းရန် အိန္ဒိယ သဘောတူ
ယူရီးယားဓာတ်မြေသြဇာကို ဈေးနှုန်းနှစ်ဆပေး၍ တင်သွင်းရန် အိန္ဒိယ သဘောတူ
အရှေ့အလယ်ပိုင်းတွင် ဖြစ်ပွားနေသည့် စစ်ရေးပဋိပက္ခကြောင့် ထောက်ပံ့မှုကွင်းဆက်များ ပြတ်တောက်နေစဉ် အိန္ဒိယနိုင်ငံအနေဖြင့် ယူရီးယားဓာတ်မြေသြဇာကို ယခုနှစ်အစောပိုင်းက ပေးချေခဲ့သည့် ဈေးနှုန်းထက် နှစ်ဆပေး၍ တင်သွင်းရန် သဘောတူညီခဲ့ကြောင်း သိရသည်။အိန္ဒိယအစိုးရသည် နိုက်ထရိုဂျင်ဓာတ်မြေသြဇာ တန်ချိန် ၂ ဒသမ ၅ သန်းကို တင်ဒါတစ်ရပ်တည်းဖြင့် စံချိန်တင် တင်သွင်းတော့မည်ဖြစ်ကြောင်း အစိုးရသတင်းရင်းမြစ်များကို ကိုးကား၍ ရိုက်တာသတင်းဌာနက ဧပြီ ၂၂ ရက်တွင် သတင်းထုတ်ပြန်ထားသည်။ထို့ပြင် သတင်းထုတ်ပြန်ချက်အရ အိန္ဒိယနိုင်ငံရှိ ကုမ္ပဏီတစ်ခုဖြစ်သည့် Indian Potash Ltd. သည် နိုင်ငံအနောက်ဘက်ကမ်းခြေသို့ ပို့ဆောင်ရန်အတွက် ယူရီးယားတန်ချိန် ၁ ဒသမ ၅ သန်းကို တစ်တန်လျှင် ၉၃၅ ဒေါ်လာနှုန်းဖြင့်လည်းကောင်း၊ အရှေ့ဘက်ကမ်းခြေသို့ ပို့ဆောင်ရန်အတွက် နောက်ထပ် တန်ချိန် ၁ သန်းကို တစ်တန်လျှင် ၉၅၉ ဒေါ်လာနှုန်းဖြင့်လည်းကောင်း ဝယ်ယူရန် သဘောတူညီခဲ့ကြောင်း သိရသည်။အိန္ဒိယနိုင်ငံသည် ကမ္ဘာပေါ်တွင် ယူရီးယားဓာတ်မြေသြဇာ အများဆုံး တင်သွင်းသည့်နိုင်ငံဖြစ်ပြီး ၎င်း၏ ယူရီးယားထုတ်လုပ်မှုမှာ အဓိကအားဖြင့် အရှေ့အလယ်ပိုင်းမှ တင်သွင်းရသော သဘာဝဓာတ်ငွေ့ပေါ်တွင် များစွာ မှီခိုနေသည်။ ယခုကဲ့သို့ ဈေးနှုန်းနှစ်ဆပေး၍ ဝယ်ယူမှုသည် ယူရီးယားထုတ်လုပ်ရန်အတွက် အဓိကကုန်ကြမ်းဖြစ်သော သဘာဝဓာတ်ငွေ့ရည် ပြတ်လပ်နေချိန်တွင် ထွက်ပေါ်လာခြင်းဖြစ်ကြောင်း သိရသည်။Ref: RTMWD
Fri, 24-Apr-2026
အမေရိကန်၏ ဟော်မုရေလက်ကြားပိတ်ဆို့မှု၊ အီရန်၏ အကျိုးစီးပွားနှင့် အမေရိကန် စီးပွားရေးအပေါ် ကျရောက်လာသည့် သက်ရောက်မှု
အမေရိကန်၏ ဟော်မုရေလက်ကြားပိတ်ဆို့မှု၊ အီရန်၏ အကျိုးစီးပွားနှင့် အမေရိကန် စီးပွားရေးအပေါ် ကျရောက်လာသည့် သက်ရောက်မှု
    အီရန်နှင့် ဖြစ်ပွားသည့်စစ်ပွဲသည် လက်ရှိတွင် သောင်မတင်၊ ရေမကျအခြေအနေသို့ ရောက်ရှိနေပြီး မပြီးဆုံးနိုင်သေးသည့် လက်နက်ကိုင်ပဋိပက္ခများသည်    အမေရိကန်၏  ပြည်တွင်းစီးပွားရေး အခြေအနေအပေါ် သက်ရောက်လာမှုကြောင့် အမေရိကန်သမ္မတ ဒေါ်နယ်ထရမ့်အပေါ် ပြည်သူလူထု၏ ထောက်ခံမှုမှာလည်း သိသိသာသာ   ကျဆင်းလာခဲ့သည်ကို တွေ့ရသည်။ အီရန်စစ်ပွဲကြောင့် ဖြစ်ပေါ်လာသည့် စွမ်းအင်ပြတ်လပ်မှုများက ကုန်ဈေးနှုန်းများကို   ဆက်လက်မြင့်တက်စေခဲ့ခြင်းကြောင့် ယခုသီတင်းပတ်အစောပိုင်းက ထုတ်ပြန်ခဲ့သည့်   AP-NORC လူထု သဘောထားစစ်တမ်းအရ ထရမ့်၏ စီးပွားရေးဆိုင်ရာထောက်ခံမှုနှုန်းမှာ ၃၀ ရာခိုင်နှုန်းအထိ စံချိန်တင် ကျဆင်းလာခဲ့သည်။လက်ရှိတွင် အီရန်နှင့် အမေရိကန်တို့အကြား အဓိကသဘောထား ကွဲလွဲနေသည့်အချက်မှာ အမေရိကန်က ဟော်မုရေလက်ကြားကို ဆက်လက်ထိန်းချုပ် ထားခြင်းဖြစ်သည်။ ထို့ပြင် ထရမ့်သည် အီရန်နှင့် အပစ်အခတ်ရပ်စဲရေး သဘောတူညီချက်ကို    တစ်ဖက်သတ် သက်တမ်းတိုးထားသော်လည်း အမေရိကန်၏အဆိုပါ လုပ်ဆောင်ချက်ကို အီရန်ကလက်ခံထားခြင်းမရှိပေ။အမေရိကန်အနေဖြင့် ၎င်းတို့လက်ရှိ ထိန်းချုပ်ထားသည့် ရေလက်ကြားပိတ်ဆို့မှုကို    ပြန်လည်ဖွင့်လှစ်ပေးလိုက်ပါက အီရန်နှင့် သဘောတူညီချက်ရယူနိုင်ရန် မဖြစ်နိုင်ဟု ထရမ့်ကယုံကြည်လျက်ရှိသည်။အီရန်အနေဖြင့် ဟော်မုရေလက်ကြားကို ပိတ်ထားရန် လိုလားခြင်းမရှိကြောင်း၊ ၎င်းတို့အနေဖြင့် တစ်ရက်လျှင် ဒေါ်လာသန်း ၅၀၀ ခန့် ဝင်ငွေရရှိနိုင်စေရန်အတွက် အဆိုပါရေလက်ကြားကို ဖွင့်ထားရန်ဆန္ဒရှိနေကြောင်း၊ ရေလက်ကြားအားပိတ်ထားမည်ဟု ပြောဆိုခြင်းသည် အမေရိကန်က အဆိုပါ    ရေကြောင်းဆက်သွယ်ရေးလမ်းကြောင်းအား လက်ရှိတွင် အလုံးစုံ ပိတ်ဆို့ထားခြင်းကြောင့် ၎င်းတို့အတွက် သိက္ခာဆယ်နိုင်စေရန်အတွက် ပြောကြားနေခြင်းသာဖြစ်ကြောင်း ထရမ့်က ၎င်း၏လူမှုကွန်ရက် စာမျက်နှာပေါ်တွင် ရေးသားဖော်ပြထားသည်။သို့သော်    ဟော်မုရေလက်ကြားကို ဖွင့်လှစ်ထားခြင်းအားဖြင့် တစ်ရက်လျှင် အမေရိကန်ဒေါ်လာ သန်း ၅၀၀ ခန့် ရရှိနိုင်သောကြောင့် ရေလက်ကြားအား ဖွင့်လှစ်ထားရန် အီရန်နိုင်ငံက လိုလား နေကြောင်း အမေရိကန်သမ္မတ ဒေါ်နယ်ထရမ့်က ယူဆလျက်ရှိသည်။တစ်ချိန်တည်းမှာပင် ဟော်မုရေလက်ကြားတွင်    အမေရိကန်တို့၏ရေတပ်ပိတ်ဆို့မှု ဆက်လက် ရှိနေသရွေ့ အဆိုပါရေလက်ကြားကို ပြန်လည်ဖွင့်ပေးမည်မဟုတ်ဟု အီရန်က အခိုင်အမာပြောကြားပြီး  ရေလက်ကြားအား ဧပြီ ၂၃ ရက်အထိ ဆက်လက်ပိတ်ထားဆဲဖြစ်သည်။အီရန်နှင့် အမေရိကန်တို့အကြား အပစ်အခတ်ရပ်စဲရေးကို အမေရိကန်သမ္မတ ဒေါ်နယ်ထရမ့်က ထပ်မံသက်တမ်းတိုးထားသော်လည်း လက်ရှိတွင် ရေလက်ကြားကို ဖြတ်သန်းရန်ကြိုးပမ်းသည့်   သင်္ဘောနှစ်စင်းကို ဖမ်းဆီးလိုက်ကြောင်း အီရန်က ကြေညာထားသည်။ ထို့အတူ အီရန်အစိုးရအနေဖြင့် မိမိနိုင်ငံ၏ အကျိုးစီးပွားကို ကာကွယ်သွားမည်ဟု   ပြောကြားထားသည်။သို့သော် အီရန်က ဖမ်းဆီးလိုက်သည့် သင်္ဘောများသည် အပစ်အခတ်ရပ်စဲရေး သဘောတူညီချက်ကို ချိုးဖောက်ခဲ့ခြင်းမရှိဟု အိမ်ဖြူတော်က တုံ့ပြန်ထားသည်။ အိမ်ဖြူတော်က ထိုသို့ထုတ်ပြန်ခဲ့သော်လည်းအီရန်အနေဖြင့် ထရမ့်က တစ်ဖက်သတ်ချမှတ်ခဲ့သည့်    အပစ်အခတ်ရပ်စဲရေး သဘောတူညီချက်ကို လက်ခံထားခြင်းမရှိသောကြောင့် ရေလက်ကြားကို ဖြတ်သန်းရန် ကြိုးပမ်းသည့် သ‌င်္ဘောများအား ဖမ်းဆီးလိုက်ခြင်းဖြစ်သည်။ထို့ကြောင့် လက်ရှိတွင် ဟော်မုရေလက်ကြားပိတ်ဆို့မှုနှင့်  အီရန်နှင့် အမေရိကန်ကိုယ်စားလှယ်များ အကြား ပါကစ္စတန်နိုင်ငံတွင်  တွေ့ဆုံဆွေးနွေးမည့် အစီအစဉ်သည် အမေရိကန်အတွက် အလွန် အရေးပါသည့် ကိစ္စရပ်များဖြစ်လာသည်။ အမေရိကန်နှင့် အစ္စရေးနိုင်ငံတို့သည် ယခုနှစ် ဖေဖော်ဝါရီ    ၂၈   ရက်မှစ၍ အီရန်အပေါ်    ဗုံးကြဲတိုက်ခိုက်ခဲ့ပြီး သီတင်းပတ်လေးပတ်မှ ငါးပတ်အတွင်း အီရန်စစ်ပွဲအား အဆုံးသတ်မည်ဟု ထရမ့်က အစောပိုင်း၌ ပြောကြားခဲ့သော်လည်း ၎င်း၏ အဆိုပါပြောကြားချက်ကို အမေရိကန်ပြည်သူများက သံသယရှိစပြုလာပြီဖြစ်သည်။အခြားတစ်ဖက်တွင်မူ အီရန်အနေဖြင့် အမေရိကန်နှင့် အစ္စရေးတို့အား လုံးဝအညံ့ခံမည်မဟုတ်ဘဲ အပြီးသတ်အောင်ပွဲရသည်အထိ  ဆက်လက် တိုက်ခိုက်ရန် ဆုံးဖြတ်ထားသည်။ အလားတူပင် ထရမ့်ဦးဆောင်သည့် အမေရိကန်အစိုးရ အနေဖြင့်လည်း အီရန်နှင့် အပစ်အခတ်ရပ်စဲရေးမှသည်   ငြိမ်းချမ်းရေး သဘောတူညီချက် ချမှတ်နိုင်ရန်   ကြိုးပမ်းလျက်ရှိ သည်ဟု ဆိုနိုင်သော်လည်း အီရန်နိုင်ငံမှ ထရမ့်အစိုးရက မျှော်လင့်နေသည့်အရာမှာ လုံးဝလက်နက်ချ အရှုံးပေးခြင်းသာဖြစ်သောကြောင့် ယင်းအချက်သည် အီရန်နှင့် အမေရိကန်တို့အကြား လုံးဝညှိနှိုင်း၍မရနိုင်သည့် အရာအဖြစ် ဆက်လက်တည်ရှိနေသည်။တစ်ချိန်တည်းမှာပင် လွယ်လွယ်နှင့် အဆုံးသတ်နိုင်မည်ဟု ယူဆခဲ့သည့် အီရန်စစ်ပွဲမှာ လက်ရှိအချိန်အထိ အဆုံးမသတ်နိုင်သေးဘဲ အမေရိကန်၏ စီးပွားရေးအပေါ် သက်ရောက်လာမှုကို လည်း ထရမ့်အနေဖြင့် ထည့်သွင်းစဉ်းစားရန်   လိုအပ်လာပြီဖြစ်ကြောင်း  ရေးသား ဖော်ပြလိုက်ရပါသည်။ နိုင်အောင်စုစည်းသည်။MWD
Fri, 24-Apr-2026
© Copyright 2024 SAC All Rights Reserved.