ဂျပန်နိုင်ငံ အရှေ့မြောက်ပိုင်း အီဝါတေးစီရင်စုတွင် လောင်ကျွမ်းနေသော တောမီးသည် ယခုအချိန်အထိ ထိန်းချုပ်နိုင်ခြင်းမရှိသေးဘဲ ဧပြီ ၂၄ ရက် နံနက်ပိုင်းအထိ ဟက်တာပေါင်း ၁၂၀၀ နီးပါးကို ကူးစက်လောင်ကျွမ်းလျက်ရှိကြောင်းနှင့် ပြည်သူ၂၆၀၀ ခန့်မှာ ဘေးလွတ်ရာသို့ထွက်ပြေးတိမ်းရှောင်နေရကြောင်း သိရသည်။

ထိုတောမီးသည်  ဧပြီ ၂၂ ရက်တွင် အိုဆူချီမြို့ရှိ တောင်တန်းဒေသ၌ စတင်ခြင်းဖြစ်ပြီး ယနေ့အထိ လူနေအိမ်များအပါအဝင် အဆောက်အအုံရှစ်လုံးကို ဖျက်ဆီးထားပြီးဖြစ်သည်။ တောမီးကြောင့် အိုဆူချီမြို့လူဦးရေ လေးပုံတစ်ပုံခန့်ကို ဘေးလွတ်ရာသို့ရွှေ့ပြောင်းရန် တာဝန်ရှိသူများက အမိန့်ထုတ်ပြန်ထားသည်။ 

တောမီးငြှိမ်းသတ်ရန် အီဝါတေးစီရင်စု အစိုးရနှင့် ကာကွယ်ရေးတပ်ဖွဲ့မှ ရဟတ်ယာဉ်များဖြင့် ရေပက်ဖျန်းခြင်းများလုပ်ဆောင်နေသည့်အပြင် အိမ်နီးချင်းစီရင်စုငါးခုမှ မီးသတ်တပ်ဖွဲ့ဝင်များကိုလည်း အကူအညီတောင်းထားရသည်။ ထို့ပြင်  ဧပြီ၂၀ ရက်တွင် ဂျပန်အရှေ့မြောက်ပိုင်း ကမ်းလွန်ပင်လယ်ပြင်၌လှုပ်ခတ်သည့် အင်အားပြင်းငလျင်ကြောင့် အီဝါတေးအပါအဝင်စီရင်စုခုနစ်ခုရှိ မြို့နယ်ပေါင်း ၁၈၂ ခုကို ငလျင်အန္တရာယ် သတိပေးချက်ထုတ်ပြန်ထားသည်။ ထို့ကြောင့် တောမီးငြှိမ်းသတ်နေစဉ် ငလျင်အန္တရာယ်ကိုပါ ထပ်မံသတိပြုရန် လိုအပ်နေကြောင်း ဂျပန်မိုးလေဝသဌာနက သတိပေးထားသည်။

MWD

     ဂျပန်နိုင်ငံတွင်ဖြစ်ပွားခဲ့သည့် ပြင်းအား ၇ ဒသမ ၇ အဆင့်ရှိ ငလျင်လှုပ်ခတ်မှုကြောင့် လူခြောက်ဦးဒဏ်ရာရရှိသွားကြောင်း ဒေသတွင်းသတင်းစာတစ်စောင်က ဧပြီ ၂၁ ရက်တွင် ဖော်ပြသည်။

ငလျင်လှုပ်ခတ်မှုသည် ဧပြီလ ၂၀ ရက်တွင် ဖြစ်ပွားခြင်းဖြစ်ပြီး ဒဏ်ရာရရှိသူများအနက် နှစ်ဦးမှာ စိုးရိမ်ရသည့် အခြေအနေရှိပြီး အခြားလေးဦးမှာ အနည်းငယ်သာဒဏ်ရာ ရရှိခဲ့ကြောင်း   သဘာဝဘေးအန္တရာယ် ကာကွယ်တားဆီးရေးဝန်ကြီး ဂျီရိုအာကာမာက ပြောသည်။ 

ငလျင်လှုပ်ခတ်မှုအပြီးတွင် အာဏာပိုင်များက ကမ်းခြေဒေသများ၌ ဆူနာမီသတိပေးချက်များ ထုတ်ပြန်ခဲ့ရကြောင်း နစ်ပိုသတင်းစာက ဖော်ပြသည်။

သို့ရာတွင် အဆိုပါငလျင်လှုပ်ခတ်မှုအတွင်း နိုင်ငံအတွင်းရှိ နျူကလီးယားစက်ရုံများ၌ ပျက်စီးမှု တစ်စုံတစ်ရာဖြစ်ပွားခဲ့ခြင်း မရှိကြောင်း နိုင်ငံတကာအဏုမြူ စွမ်းအင်အေဂျင်စီအဖွဲ့က ထုတ်ပြန်ထား ကြောင်းသိရသည်။       

MWD

ပန်ဆောင် ဧပြီ ၂၂

စစ်ကိုင်းတိုင်းဒေသကြီး နာဂကိုယ်ပိုင်အုပ်ချုပ်ခွင့်ရဒေသ  ပန်ဆောင်မြို့ ရပ်ကွက်/ကျေးရွာများတွင် ဧပြီ ၂၁ ရက် ညနေ ၆ နာရီ၌ အချိန် အခါမဟုတ် မိုးသီးများကြွေကျပြီး မိုးများရွာသွန်းခဲ့သည်။

အဆိုပါ မိုးသီးများကြွေကျပြီး မိုးရွာသွန်းမှုကြောင့် ပန်ဆောင်မြို့ ရပ်ကွက်/ကျေးရွာများရှိ လူနေအိမ်များ၊ ဌာနဆိုင်ရာ အဆောက်အအုံများ၊ ဘာသာရေးအဆောက်အအုံများ ထိခိုက်ပျက်စီးခဲ့ကြောင်း သိရသည်။

ပန်ဆောင်(ပြန်/ဆက်)

MDN

တိုကျို  ဧပြီ  ၂၀

ဧပြီ   ၂၀  ရက် မွန်းလွဲပိုင်းက  ဂျပန်နိုင်ငံ   အရှေ့မြောက်ပိုင်းနှင့် မြောက်ပိုင်းဒေသတို့၌ လှုပ်ခတ်ခဲ့သော ငလျင်၏ ပြင်းအားကို ၇ ဒသမ ၅ အဆင့်မှ ၇ ဒသမ ၇ အဆင့်အထိ ပြင်ဆင်သတ်မှတ်လိုက်ကြောင်း   ဂျပန်မိုးလေဝသအေဂျင်စီ  (JMA) ၏ ထုတ်ပြန်ချက်အရ သိရသည်။

ဟော့ကိုင်းဒိုး၊ အအိုမိုရီနှင့် အီဝါတေးခရိုင်များ၏ ပစိဖိတ်ကမ်းလွန်၌ ဆူနာမီလှိုင်းများကို တွေ့ရှိခဲ့ပြီး  အထူးသဖြင့် အီဝါတေးခရိုင်  ကူဂျီဆိပ်ကမ်းတွင် ၈၀ စင်တီမီတာရှိသော ဆူနာမီလှိုင်းများ  ရိုက်ခတ်ခဲ့ကြောင်း၊ မီယာကိုဆိပ်ကမ်းတွင်လည်း ၄၀  စင်တီမီတာရှိသော ဆူနာမီလှိုင်းများ ရိုက်ခတ်ခဲ့ ကြောင်း သိရသည်။            

ပြည်ထဲရေးနှင့် ဆက်သွယ်ရေးဝန်ကြီးဌာန၏ ထုတ်ပြန်ချက်အရ ဟော့ကိုင်းဒိုး၊ အအိုမိုရီ၊ အီဝါတေး၊ မီယာဂီနှင့် ဖူကူရှီးမားခရိုင်များရှိ လူပေါင်း ၁၇၀၀၀၀ ကျော်ကို  ဘေးလွတ်ရာသို့  ရွှေ့ပြောင်းရန် အမိန့်များ ထုတ်ပြန်ထားသည်။ ထို့ပြင် ဘေးဒဏ်သင့်ဒေသများမှ ဒေသခံများကိုလည်း ကုန်းမြင့်ပိုင်း   သို့မဟုတ်  ပိုမိုမြင့်မားသော နေရာများသို့  ရွှေ့ပြောင်းကြရန် တိုက်တွန်းထားသည်။

ငလျင်လှုပ်ခတ်မှုကြောင့် တိုကျိုနှင့် ရှင်-အအိုမိုရီဘူတာတို့အကြားရှိ တိုဟိုကူရှင်ကန်ဆန်  ကျည်ဆန်ရထားဝန်ဆောင်မှုများ ရပ်ဆိုင်းခြင်းအပါအဝင် သယ်ယူပို့ဆောင်ရေးကဏ္ဍများ၌ အခက်အခဲများနှင့် ကြုံတွေ့ခဲ့ရကြောင်း သိရသည်။

အဆိုပါ အင်အားပြင်းငလျင်မှာ  ဆန်ရီကုကမ်းလွန်၌  ဧပြီ ၂၀ ရက်က   ဒေသစံတော်ချိန်   ညနေ  ၄  နာရီ  ၅၃  မိနစ်တွင် အနက် ကီလိုမီတာ ၂၀  ကို ဗဟိုပြု၍ လှုပ်ခတ်ခဲ့ခြင်းဖြစ်ကြောင်းနှင့် လာမည့်သီတင်းပတ်အတွင်း အလားတူအားကောင်းသော ငလျင်များ ထပ်မံလှုပ်ခတ်နိုင်ကြောင်း မိုးလေဝသအေဂျင်စီက သတိပေးထားသည်။                                              

ဆင်ဟွာ

MDN

သဲကုန်း ဧပြီ ၂၁

ပဲခူးတိုင်းဒေသကြီး၊ နတ်တလင်းခရိုင်၊ သဲကုန်းမြို့နယ်တွင် ဧပြီ ၂၀ ရက်က မိုးရွာသွန်း၍ လေပြင်းတိုက်ခတ်မှုကြောင့် နေအိမ်(၁၅)လုံး အမိုးလန်ပျက်စီးခဲ့ကြောင်း သိရသည်။

လေပြင်းတိုက်ခတ်မှုကြောင့် ကျွဲခေါင်းကျေးရွာ၊ သီးကုန်းကျေးရွာ၊ သာပေါင်းကျေးရွာ၊ ရပ်သာကျေးရွာ၊ ကြို့ကုန်းကျေးရွာများမှ နေအိမ်(၁၅)လုံး အမိုးလန်ပျက်စီးခဲ့ပြီး လူနှင့်တိရစ္ဆာန်များ ထိခိုက်သေဆုံးမှု မရှိခဲ့ကြောင်း၊ လေဘေးသင့်အိမ်ထောင်စု (၁၅)စုမှ ကျား(၁၆)ဦး၊ မ(၂၀)ဦး စုစုပေါင်း (၃၆)ဦးတို့အား မြို့နယ်သဘာဝဘေးအန္တရာယ် စီမံခန့်ခွဲမှုကော်မတီ၏ ကြီးကြပ်ဆောင်ရွက်မှုဖြင့် တာဝန်ရှိများနှင့် ရပ်ကွက်၊ ကျေးရွာအုပ်စုအုပ်ချုပ်ရေးမှူးများက လေပြင်းတိုက်ခတ်မှုကြောင့် ထိခိုက်ပျက်စီးခဲ့သော နေအိမ်များ ပြန်လည်ပြုပြင်နိုင်ရေး စီစဥ်ဆောင်ရွက်လျက်ရှိကြောင်း သိရသည်။

ကိုကျော် (သဲကုန်း)

MDN

ပုသိမ် ဧပြီ ၂၀

ဧရာဝတီတိုင်းဒေသကြီးအတွင်း ၂၀၂၆-၂၀၂၇ ဘဏ္ဍာနှစ် မိုးမကျမီကာလအတွင်း သဘာဝဘေး ကြိုတင်ကာကွယ်ရေးလုပ်ငန်းများ ကြိုတင်ဆောင်ရွက်နိုင်ရေး လုပ်ငန်းညှိနှိုင်းအစည်းအဝေးကို ယနေ့ညနေပိုင်းက တိုင်းဒေသကြီးအစိုးရအဖွဲ့ရုံး အစည်းအဝေးခန်းမ(၁)၌ ပြုလုပ်ရာ တိုင်းဒေသကြီးဝန်ကြီးချုပ် ဦးအေးကျော်၊ တိုင်းဒေသကြီးဝန်ကြီးများနှင့် သက်ဆိုင်ရာဌာနဆိုင်ရာများ တက်ရောက်ကြသည်။

ရှင်းလင်းတင်ပြ

ဦးစွာ တိုင်းဒေသကြီး ဆည်မြောင်းနှင့် ရေအသုံးချမှုစီမံခန့်ခွဲရေးဦးစီးဌာန ညွှန်ကြားရေးမှူးက ၂၀၂၆-၂၀၂၇ ဘဏ္ဍာနှစ် မိုးမကျမီကာလအတွင်း ဆောင်ရွက်ရမည့်လုပ်ငန်းများနှင့် ပတ်သက်၍ လုပ်ငန်းများဆောင်ရွက်ထားရှိမှုများနှင့် တက်ရောက်လာသည့်ဌာနများမှ သက်ဆိုင်ရာဌာနအလိုက် လုပ်ငန်းဆောင်ရွက်ထားရှိများကို ရှင်းလင်းတင်ပြသည်။

ထိုကဲ့သို့ သက်ဆိုင်ရာဌာနများ၏ ရှင်းလင်းတင်ပြချက်များအပေါ် တိုင်းဒေသကြီးဝန်ကြီးချုပ်က မိမိတို့တိုင်းဒေသကြီးသည် သဘာဝဘေးအန္တရာယ်များကို နှစ်စဉ်ရင်ဆိုင်နေရသည့် တိုင်းဒေသကြီး ဖြစ်ပါကြောင်း၊ ဆည်၊ မြောင်း၊ တာတမံများ၊ ရေငံတားတာများလည်း များပြားသည့်အတွက် ဆည်၊ တာတမံများ၏ ကြံ့ခိုင်ရေး၊ ယိုစိမ့်မှုများ၊ ကျိုးပေါက်မှုများ မဖြစ်စေရေးကိုလည်း စစ်ဆေး ဆောင်ရွက်ရန်လိုပါကြောင်း၊ ဧရာဝတီမြစ်၊ ငဝန်မြစ် စသည့်မြစ်ကြီးမြစ်ငယ်အသွယ်သွယ် စီးဆင်းသည့်အတွက် ကမ်းပြိုမှုများဖြစ်ပေါ်လျက်ရှိရာ ကာကွယ်ရေးလုပ်ငန်းများကိုလည်း ကြိုတင်ပြင်ဆင် ဆောင်ရွက်ထားရှိရန်လိုကြောင်း၊ တည်ဆောက်ရေး လုပ်ငန်းများအနေဖြင့်လည်း အရည်အသွေးပြည့်မီရေးနှင့် သတ်မှတ်ကာလအတွင်း အချိန်မီပြီးစီးစေရေး အလေးထားဆောင်ရွက်ရန်လိုကြောင်း၊ သက်ဆိုင်ရာ မြို့နယ်၊ ခရိုင်၊ ဒေသအလိုက် လုပ်ငန်းဆောင်ရွက်မှုများနှင့် သဘာဝဘေးကြိုတင်ကာကွယ်ရေးလုပ်ငန်းများ ဆောင်ရွက်မည့်အစီအမံများ စီစဉ်ဆောင်ရွက် ထားရှိရန်လိုကြောင်း၊ မိုးရာသီသစ်ပင်စိုက်ပျိုးနိုင်ရေးအတွက် ပျိုးပင်များစုဆောင်းထားရှိမှုနှင့် အချိန်မီစိုက်ပျိုးနိုင်ရေး၊ လမ်းဘေးဝဲ/ယာ တစ်အုပ် တစ်မသစ်ပင်များစိုက်ပျိုးနိုင်ရေး၊ လမ်းပန်းဆက်သွယ်ရေးများ ကောင်းမွန်စေရေး၊ မိုးရာသီကာလအတွင်း စိုက်ပျိုးရေးလုပ်ငန်းများ အချိန်မီဆောင်ရွက်နိုင်ရေး၊ စက်သုံးဆီအချိန်မီရရှိစေရေး၊ သွင်းအားစုများ အချိန်မီရရှိစေရေး၊ စာရင်းဇယားများ တိကျမှန်ကန်မှု ရှိစေရေး အလေးထားဆောင်ရွက်ကြရန် မှာကြားခဲ့ပြီး လိုအပ်သည်များ ပေါင်းစပ်ဆောင်ရွက်ပေးခဲ့ကြောင်း သိရသည်။

တိုင်းဒေသကြီး(ပြန်/ဆက်)

                         ၂၀၂၆ ခုနှစ်၊ ဧပြီလ ၂၀ ရက်နေ့၊ မြန်မာစံတော်ချိန် (၁၄)နာရီ၊ (၂၂)မိနစ်၊ (၅၈) စက္ကန့် အချိန်တွင် နေပြည်တော်မြေငလျင်စခန်းမှ အရှေ့မြောက်ဘက် (၃၁၀၅) မိုင်ခန့် ကွာဝေးသော မြန်မာနိုင်ငံပြည်ပ (Near East Coast of Honshu, Japan)၊ မြောက်လတ္တီတွဒ် (၃၉.၈၈) ဒီဂရီ၊ အရှေ့လောင်ဂျီတွဒ် (၁၄၃.၂၅)ဒီဂရီ၊ အနက် (၁၀)ကီလိုမီတာကို ဗဟိုပြု၍ ပမာဏ ၇.၄ (M)အဆင့်ရှိ အင်အားပြင်းထန်သော မြေငလျင်တစ်ခု လှုပ်ရှားသွားကြောင်း တိုင်းထွာရရှိပါသည်။

DMH

၂၀၂၆ ခုနှစ်၊ ဧပြီလ ၂၀ ရက်နေ့၊ မြန်မာစံတော်ချိန် (၁၁)နာရီ၊ (၀၇)မိနစ်၊ (၃၆)စက္ကန့် အချိန်တွင် ကန့်ဘလူမြေငလျင်စခန်းမှ အနောက်တောင်ဘက် (၆၈) မိုင်ခန့် ကွာဝေးသော မြန်မာနိုင်ငံပြည်တွင်း (မင်းကင်းမြို့၏ တောင်-အရှေ့တောင်ဘက် (၁၅) မိုင်ခန့်အကွာ)၊ မြောက် လတ္တီတွဒ် (၂၂.၆၈) ဒီဂရီ၊ အရှေ့လောင်ဂျီတွဒ် (၉၄.၆၁) ဒီဂရီ၊ အနက် (၄၉) ကီလိုမီတာကို ဗဟိုပြု၍ ပမာဏ ၃.၈(M) အဆင့်ရှိ အင်အားအနည်းငယ်ရှိသော မြေငလျင်တစ်ခု လှုပ်ရှားသွား ကြောင်း တိုင်းထွာရရှိပါသည်။        

DMH

နေပြည်တော် ဧပြီ ၁၉

လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန ပြည်ထောင်စုဝန်ကြီး ဒေါက်တာစိုးဝင်းသည် ယနေ့နံနက်ပိုင်းက ပဲခူးတိုင်းဒေသကြီးဝန်ကြီးချုပ် ဦးမျိုးဆွေဝင်းနှင့်အတူ ပဲခူးတိုင်းဒေသကြီး ကြို့ပင်ကောက်မြို့နယ်၊ ဇီးကုန်းမြို့နယ်အတွင်း ဧပြီ ၁၇ ရက် ညနေပိုင်းက ဖြစ်ပွားခဲ့သော လေပြင်းတိုက်ခတ်မှုကြောင့် ထိခိုက်ပျက်စီးခဲ့သည့် ရပ်ကွက်/ကျေးရွာများသို့ သွားရောက်၍ ထောက်ပံ့ငွေများပေးအပ်သည်။

ဦးစွာ ကြို့ပင်ကောက်မြို့နယ် အထွေထွေအုပ်ချုပ်ရေးဦးစီးဌာန အစည်းအဝေးခန်းမ၌ ဇီးကုန်းမြို့နယ် ရပ်ကွက်(၅)ရပ်ကွက်၊ ကျေးရွာအုပ်စု ၁၈ အုပ်စုမှ ပြိုကျနေအိမ် ၁၀ အိမ်၊ အမိုးလန်နေအိမ် ၃၇၅ အိမ်၊ တစ်စိတ်တစ်ပိုင်း ပျက်စီးဘုန်းတော်ကြီးကျောင်း ငါးကျောင်း တို့အတွက် ထောက်ပံ့ငွေကျပ် ၂၀၂ ဒသမ ၅ သိန်း၊ ဘေးသင့်အိမ်ထောင်စုများမှ လူဦးရေ ၁၅၅၄ ဦးအတွက် ဆန်ရိက္ခာဖိုး ငွေကျပ် ၇၇ဒသမ၇ သိန်း၊ အိမ်ထောင်စု ၃၈၅ စုအတွက် တန်ဖိုးငွေကျပ် ၁၅ ဒသမ ၄ သိန်းရှိ တစ်ကိုယ်ရေသန့်ရှင်းရေးသုံးပစ္စည်း Hygene Kit ၃၈၅ စုံ၊ ကြို့ပင်ကောက်မြို့နယ် ရပ်ကွက်(၅) ရပ်ကွက်၊ ကျေးရွာအုပ်စု ၂၅ အုပ်စုမှ ပြိုကျနေအိမ် ၅၇ အိမ်၊ အမိုးလန်နေအိမ် ၆၃၉ အိမ်၊ တစ်စိတ်တစ်ပိုင်းပျက်စီး ဘုန်းတော်ကြီးကျောင်းရှစ်ကျောင်းတို့အတွက် ထောက်ပံ့ငွေကျပ် ၃၈၄ ဒသမ ၅ သိန်း၊ ဘေးသင့်အိမ်ထောင်စုများမှ လူဦးရေ ၂၂၀၅ ဦးအတွက် ဆန်ရိက္ခာဖိုး ငွေကျပ် ၁၁၀ ဒသမ ၂၅သိန်း၊ အိမ်ထောင်စု ၆၉၆ စုအတွက် တန်ဖိုးငွေကျပ် ၂၇ ဒသမ ၈၄ သိန်းရှိ တစ်ကိုယ်ရေ သန့်ရှင်းရေးသုံးပစ္စည်း Hygene Kit ၆၉၆ စုံတို့ကို ပြည်ထောင်စုဝန်ကြီးနှင့် တိုင်းဒေသကြီးဝန်ကြီးချုပ်တို့က ဘေးသင့်အိမ်ထောင်စုများသို့ ထောက်ပံ့ပေးအပ်သည်။

ဘေးသင့် အိမ်ထောင်စုများနှင့်တွေ့ဆုံရာ၌ ပြည်ထောင်စုဝန်ကြီးက မတ်လနှောင်းပိုင်းမှ ဇွန်လဆန်းအထိ ကာလများသည် မြန်မာနိုင်ငံဒေသအနှံ့အပြားတွင် လေပြင်းများတိုက်ခတ်လေ့ရှိသည့် ရာသီကာလဖြစ်ပြီး ပြည်သူလူထုနေအိမ်များ၊ ဘုန်းတော်ကြီးကျောင်းများ၊ စာသင်ကျောင်းများအမိုးလန်ခြင်း၊ ပြိုလဲခြင်းတို့ဖြစ်ပွားကာ နှစ်စဉ်ငွေကျပ် သန်းပေါင်းများစွာဆုံးရှုံးခဲ့ရကြောင်း၊ အဆိုပါထိခိုက်ဆုံးရှုံးရမှုများကို လျှော့ချနိုင်ရန် လူမှုဝန်ထမ်း၊ ကယ်ဆယ်ရေးနှင့်ပြန်လည်နေရာချထားရေးဝန်ကြီးဌာန၊ ဘေးအန္တရာယ်ဆိုင်ရာ စီမံခန့်ခွဲမှုဦးစီးဌာနအနေဖြင့် ပြန်ကြားရေးဝန်ကြီးဌာန၊ တိုင်းဒေသကြီး/ပြည်နယ်အစိုးရအဖွဲ့များ၊ တိုင်း/ခရိုင်/မြို့နယ်/ရပ်ကွက် ကျေးရွာအဆင့် အုပ်ချုပ်ရေးအဖွဲ့အစည်းများနှင့် ပူးပေါင်းကာ လေပြင်းဘေးအန္တရာယ်ကြောင့် ထိခိုက်ဆုံးရှုံးမှုလျော့နည်းစေရေးအတွက် နေအိမ်/အဆောက်အအုံများ ကြံ့ခိုင်စေရန် ကြိုတင်ပြင်ဆင်ဆောင်ရွက်ရမည့်လုပ်ငန်းများ၊ လေပြင်းတိုက်ခတ်စဉ်နှင့် လေပြင်းတိုက်ခတ်ပြီးနောက် လိုက်နာဆောင်ရွက်ရန်အချက်များကို အများပြည်သူသို့ လှည့်လည်အသိပေးကြေညာခြင်း၊ နိုင်ငံပိုင်မီဒီယာများမှ ထုတ်လွှင့်ခြင်း၊ ဖြစ်ပွားမှုများပြားခဲ့သော ရပ်ကွက်/ကျေးရွာများကိုရွေးချယ်၍ စံနမူနာပြအဖြစ် ကြံ့ခိုင်မှုအားနည်းသော နေအိမ်များကို အားဖြည့်မွမ်းမံမှု လက်တွေ့ဆောင်ရွက်ပြသခြင်းတို့ကို မတ်လဆန်းပိုင်းကပင် မပြတ်ဆောင်ရွက်ပေးလျက်ရှိကြောင်းနှင့် ပြည်သူများအနေဖြင့် အချိန်ရာသီကာလအလိုက်၊ ဒေသအလိုက်ဖြစ်ပေါ်တတ်သည့် သဘာဝဘေးအန္တရာယ်များကို မပြတ်သတိပြု၍ လိုအပ်သည့် ကြိုတင်ပြင်ဆင်မှုများ ဆောင်ရွက်ထားခြင်းဖြင့် သဘာဝဘေးအန္တရာယ်များကြောင့် မိမိတို့၏ အိုးအိမ်စီးပွားဥစ္စာများဆုံးရှုံးရမှုကို ကာကွယ်နိုင်မည်ဖြစ်ပါကြောင်းနှင့် ယခုကာလများသည် ရုတ်တရက် မိုးရွာသွန်းခြင်း လျှပ်စီးလက်ခြင်း၊ မိုးကြိုးပစ်ခြင်း၊ လျှပ်တစ်ပြက်ရေကြီးခြင်း စသည့် သဘာဝဘေးအန္တရာယ်များ ဖြစ်ပေါ်တတ်သည့်အတွက် ပြည်သူများအနေဖြင့် အထူးဂရုပြုနေထိုင်ကြပါရန်တို့ကို ပြောကြားကာ ပြည်ထောင်စုဝန်ကြီးနှင့် တိုင်းဒေသကြီးဝန်ကြီးချုပ်တို့က လိုအပ်သည်များ ပေါင်းစပ်ဖြည့်ဆည်းပေးသည်။

ကြို့ပင်ကောက်မြို့နယ်နှင့် ဇီးကုန်းမြို့နယ်အတွင်း ဖြစ်ပွားသည့် လေဘေးနှင့်စပ်လျဉ်း၍ လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန၏ ထောက်ပံ့ပေးခဲ့မှုမှာ ယမန်နေ့က ထောက်ပံ့ခဲ့သော လုံးဝပြိုကျပျက်စီးအိမ်များအတွက် ကယ်ဆယ်ရေးထောက်ပံ့ပစ္စည်း အိမ်ထောင်စု ၆၇ စုစာအပါအဝင် ထောက်ပံ့ငွေနှင့်ပစ္စည်းတန်ဖိုး စုစုပေါင်းငွေကျပ် ၉၁၈ ဒသမ ၆၉ သိန်းဖြစ်ကြောင်း သိရသည်။

MDN

၂၀-၄-၂၀၂၆

၂၀၂၆ ခုနှစ်၊ ဧပြီလ ၂၀ ရက်နေ့၊ မြန်မာစံတော်ချိန် (၁၁)နာရီ၊ (၀၇)မိနစ်၊ (၃၆)စက္ကန့် အချိန်တွင် ကန့်ဘလူမြေငလျင်စခန်းမှ အနောက်တောင်ဘက် (၆၈) မိုင်ခန့် ကွာဝေးသော မြန်မာနိုင်ငံပြည်တွင်း (မင်းကင်းမြို့၏ တောင်-အရှေ့တောင်ဘက် (၁၅) မိုင်ခန့်အကွာ)၊ မြောက်လတ္တီတွဒ် (၂၂.၆၈) ဒီဂရီ၊ အရှေ့လောင်ဂျီတွဒ် (၉၄.၆၁) ဒီဂရီ၊ အနက် (၄၉) ကီလိုမီတာကို ဗဟိုပြု၍ ပမာဏ ၃.၈(M) အဆင့်ရှိ အင်အားအနည်းငယ်ရှိသော မြေငလျင်တစ်ခု လှုပ်ရှားသွားကြောင်း တိုင်းထွာရရှိပါသည်။

Crd> မိုး/ဇလ