ပြစ်ဒဏ်လွတ်ငြိမ်းခွင့်အမိန့်(၅၁/၂၀၂၆)
News Image
MM-News-Category
ဆက်စပ်သတင်းများ
Thu, 30-Apr-2026
Thu, 30-Apr-2026
ဆိုးလ် ဧပြီ ၂၉ ကိုရီးယားသမ္မတနိုင်ငံ ဂယောင်းဂီပြည်နယ် ဟွာဆောင်းမြို့ရှိ သံမဏိပုံသွင်း စက်ရုံတစ်ရုံ၌ တရားဝင် အလုပ်လုပ်ကိုင်လျက်ရှိသော မြန်မာနိုင်ငံသား မောင်စန်းယုသည် မတ် ၂၄ ရက်တွင် လုပ်ငန်းခွင် အတွင်း အလုပ်လုပ်ကိုင်နေစဉ် ထိခိုက်မှုဖြစ်ပွားခဲ့ပြီး ဆေးရုံတက်ရောက်ကုသစဉ် သေဆုံး သွားခဲ့သည်။ မြန်မာသံရုံး ဆိုးလ်မြို့က ကျန်ရစ်သူမိသားစု ကိုရီးယားနိုင်ငံသို့ လာရောက်ပြီး ဈာပနကျင်းပနိုင်ရေး အတွက် ဗီဇာရရှိရေး အချိန်မီကူညီဆောင်ရွက်ပေးကာ ရသင့်ရထိုက်သည့်အခွင့်အရေးများ အပြည့်အဝ ရရှိစေရန် အလုပ်သမားသံအရာရှိ၊ အလုပ်သမားဝန်ကြီးဌာနနှင့် တရားဝင်ပူးပေါင်းဆောင်ရွက်ရေး လက်မှတ် ရေးထိုးထားသော E9 Friends Law Firm ကုမ္ပဏီတို့နှင့်အတူ လုပ်ဆောင်ပေးခဲ့ကြောင်း၊ ဈာပနအခမ်းအနားကိုလည်း မြန်မာသံရုံး၊ စစ်သံရုံးတို့မှဝန်ထမ်းများက လိုက်ပါပို့ဆောင်ပြီး လိုအပ်သည်များ ကူညီဆောင်ရွက်ပေးခဲ့ကြောင်း သိရသည်။ ကျန်ရစ်သူမိသားစု ကိုရီးယားနိုင်ငံ၌ နေထိုင်စဉ်ကာလအတွင်း သွားလာနေထိုင်ရေးကိစ္စများ အဆင်ပြေစေရေး၊ ယာယီဘဏ်အကောင့်ဖွင့်လှစ်နိုင်ရေး၊ လိုအပ်သည့် စာရွက်စာတမ်းကိစ္စရပ်များ ပံ့ပိုးကူညီခြင်းနှင့် သက်ဆိုင်ရာအဖွဲ့အစည်းများထံမှ ရသင့်ရထိုက်သည်များရရှိရန် ညှိနှိုင်းခြင်းတို့ကို မြန်မာသံရုံး ဆိုးလ်မြို့မှ အလုပ်သမားသံအရာရှိက လိုက်ပါဆောင်ရွက်ပေးခဲ့ကြောင်း သိရသည်။ ထို့သို့ဆောင်ရွက်ပေးမှုများကြောင့် ကွယ်လွန်သူမောင်စန်းယု၏ဇနီးမှာ လုပ်သက်ဆုကြေးများ၊ လုပ်ခ လစာကျန်ငွေများ၊ အချိန်ပိုကြေးနှင့်ခွင့်ဆုကြေးများ၊ လုပ်ငန်းခွင်ထိခိုက်မှု အာမခံငွေများ၊ အသုဘ စရိတ်ထောက်ပံ့ငွေများ၊ အလုပ်ရှင်မှပေးအပ်သည့် နစ်နာကြေးများ စသည့်ခံစားပိုင်ခွင့် ရှိသည်တို့ကို ပြည့်ပြည့်ဝဝ တိုက်ရိုက်ရရှိခဲ့သည့်အပြင် ရှေ့နေခကိုလည်း အနည်းဆုံးနှုန်းထားဖြင့် ရရှိအောင် ညှိနှိုင်းပေးနိုင်ခဲ့ကြောင်း သိရသည်။ မြန်မာသံရုံး ဆိုးလ်မြို့က ကိုရီးယားသမ္မတနိုင်ငံ၌ ရောက်ရှိနေသည့် တရားဝင်လာရောက်လုပ်ကိုင် နေသူများအပါအဝင် မြန်မာနိုင်ငံသားများ၏ အကျိုးစီးပွားများကို နှစ်နိုင်ငံတည်ဆဲဥပဒေများနှင့်အညီ ကူညီဆောင်ရွက်ပေးလျက်ရှိကြောင်း သိရသည်။ သတင်းစဉ်MDN
Thu, 30-Apr-2026
နေပြည်တော် ဧပြီ ၂၉ အာဆီယံ အလှည့်ကျဥက္ကဋ္ဌ တာဝန်ယူဆောင်ရွက်နေသည့် ဖိလစ်ပိုင်နိုင်ငံက ဦးဆောင်၍ အွန်လိုင်း စနစ်ဖြင့် ယနေ့တွင်ကျင်းပသည့် အရှေ့အလယ်ပိုင်းဒေသ၏ နောက်ဆုံးအခြေအနေများနှင့် ပတ်သက်သည့် အာဆီယံ လယ်ယာစိုက်ပျိုးရေးနှင့် သစ်တောဆိုင်ရာဝန်ကြီးများ အထူး အစည်းအဝေးသို့ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ပြည်ထောင်စုဝန်ကြီး ဦးမင်းနောင် ဦးဆောင်သည့် မြန်မာကိုယ်စားလှယ်အဖွဲ့ ပါဝင်တက်ရောက်ကြသည်။ အစည်းအဝေးသို့ အာဆီယံလယ်ယာစိုက်ပျိုးရေးနှင့် သစ်တောဆိုင်ရာဝန်ကြီးများ၊ အဆင့်မြင့် အရာရှိများ၊ အာဆီယံစားရေရိက္ခာ ဖူလုံရေး သတင်းအချက်အလက်စနစ်အတွင်းရေးမှူးရုံးနှင့် အာဆီယံ အပေါင်းသုံး အရေးပေါ်ဆန်အရန်ရိက္ခာထားရှိရေး အတွင်းရေးမှူးရုံးတို့မှ ကိုယ်စားလှယ်များ၊ အာဆီယံအတွင်းရေးမှူးချုပ်ရုံးမှ ဒုတိယအထွေထွေအတွင်းရေးမှူးချုပ် ဦးဆောင်သော ကိုယ်စားလှယ်များ၊ တာဝန်ရှိသူများနှင့် ဘာသာရပ်ဆိုင်ရာ ကိုယ်စားလှယ်များ ပါဝင်တက်ရောက် ကြသည်။ အစည်းအဝေးတွင် ပြည်ထောင်စုဝန်ကြီးက အရှေ့အလယ်ပိုင်းဒေသ၏ လက်ရှိပဋိပက္ခများကြောင့် ဖြစ်ပေါ်လာနိုင်သည့် စားရေရိက္ခာဖူလုံမှုနှင့် စွမ်းအင်လုံခြုံမှုဆိုင်ရာ စိန်ခေါ်မှုများကို ရင်ဆိုင် ကျော်လွှားနိုင်ရေး အာဆီယံအဖွဲ့ဝင်နိုင်ငံများအကြား နီးကပ်စွာ ပူးပေါင်းဆောင်ရွက်ရန်၊ မြန်မာနိုင်ငံ အနေဖြင့် လက်ရှိနွေရာသီ စိုက်ပျိုးထုတ်လုပ်မှုတွင် ယခင်လက်ကျန် စက်သုံးဆီနှင့် ဓာတ်မြေဩဇာများ အသုံးပြုဆောင်ရွက်လျက်ရှိရာ ထုတ်လုပ်မှုကို များစွာ မထိခိုက်နိုင်သေးသော်လည်း လာမည့်မိုးရာသီ စိုက်ပျိုးထုတ်လုပ်မှုတွင် စက်သုံးဆီနှင့် ဓာတ်မြေဩဇာ အခက်အခဲများ ဖြစ်ပေါ်လာနိုင်ကြောင်း၊ အဆိုပါ စိန်ခေါ်မှုများကို ကျော်လွှားနိုင်ရန် မြန်မာနိုင်ငံ အနေဖြင့် စက်မှုလယ်ယာသုံးဆီများကို အရန်အဖြစ်ထားရှိကာ အမှန်စိုက်တောင်သူများကို သက်သာသောဈေးနှုန်းဖြင့် ဖြန့်ဖြူးပေးရေးနှင့် အာဆီယံဒေသတွင်းနိုင်ငံများမှ စက်သုံးဆီ ကူညီပံ့ပိုးမှု ရယူ၍ ရိတ်သိမ်းခြွေလှေ့စက်များ အသုံးချနိုင်ရေး စီမံဆောင်ရွက်သွားမည်ဖြစ်ကြောင်း၊ ဓာတ်မြေဩဇာ လိုအပ်ချက်အတွက် အာဆီယံနိုင်ငံများအကြား မျှတစွာခွဲဝေပံ့ပိုးနိုင်ရေးနှင့် အော်ဂဲနစ် သဘာဝမြေဩဇာများ အစားထိုးအသုံးပြုနိုင်ရေး နည်းပညာဖြန့်ဖြူးမှုများကို အရှိန်အဟုန်မြှင့် ဆောင်ရွက်လျက်ရှိကြောင်း။ ဒေသတွင်း စားရေရိက္ခာဖူလုံမှုကို ပိုမိုခိုင်မာစေရေး အာဆီယံအပေါင်းသုံး အရေးပေါ်ဆန် အရန် ရိက္ခာ စနစ်ကို မြှင့်တင်ရန်၊ သတင်းအချက်အလက်စနစ်မှတစ်ဆင့် အချက်အလက်မျှဝေရန်နှင့် အာဆီယံ ကုန်စည်ကုန်သွယ်ရေး သဘောတူညီချက်အရ ပွင့်လင်းသော ကုန်သွယ်မှုကို ဖော်ဆောင်ရန် အချက်များကို မြန်မာနိုင်ငံက ထောက်ခံပါကြောင်း၊ မိမိတစ်နိုင်ငံတည်းအတွက်သာမက အာဆီယံအသိုက်အဝန်းတစ်ခုလုံး စားရေရိက္ခာဖူလုံစေရေးအတွက် အဖွဲ့ဝင်နိုင်ငံများ အားလုံးနှင့် လက်တွဲပူးပေါင်းဆောင်ရွက်ပြီး အာဆီယံနိုင်ငံများအနေဖြင့် အာဆီယံစိတ်ဓာတ်ဖြင့် အပြန်အလှန် ပူးပေါင်းကူညီဆောင်ရွက်ကြရန် လိုအပ်ကြောင်း အလေးအနက်ထား ပြောကြားသည်။ အစည်းအဝေးတွင် အရှေ့အလယ်ပိုင်းဒေသ၌ ဖြစ်ပွားနေသည့် ပဋိပက္ခများနှင့်စပ်လျဉ်း၍ ဧပြီ ၂၃ ရက်တွင် ကျင်းပခဲ့သည့် အဆင့်မြင့်အရာရှိများ အထူးအစည်းအဝေး၏ အစီရင်ခံစာကို တင်ပြ ဆွေးနွေးခြင်း၊ အာဆီယံလယ်ယာစိုက်ပျိုးရေးနှင့် သစ်တောဆိုင်ရာ ဝန်ကြီးများ အထူးအစည်းအဝေး၏ ပူးတွဲ သတင်းထုတ်ပြန်ချက်ကို အတည်ပြုခြင်းများ ဆောင်ရွက်ကြပြီး ဖိလစ်ပိုင်နိုင်ငံမှ သဘာပတိက နိဂုံးချုပ်အမှာစကားပြောကြား၍ အစည်းအဝေးကို အောင်မြင်စွာ ရုပ်သိမ်းခဲ့သည်။ အာဆီယံ စားရေရိက္ခာဖူလုံမှု၊ မြေဩဇာရရှိရေး ပူးပေါင်းဆောင်ရွက်မှု၊ ညှိနှိုင်းတုံ့ပြန်မှုများ နှင့်စပ်လျဉ်း၍ တိုးမြှင့်ဆောင်ရွက်နိုင်ရန် ဝန်ကြီးများက အမြင်ချင်းဖလှယ်ဆွေးနွေးခြင်း၊ လက်ရှိ စားရေရိက္ခာ ဖူလုံမှုအခြေအနေ၊ ကြိုတင်ပြင်ဆင်ထားရှိမှု၊ လက်ရှိဆောင်ရွက်နေသော နည်းလမ်း များ၊ မူဝါဒ လုပ်ငန်းစဉ်များနှင့် မဟာဗျူဟာကျသော တုံ့ပြန်မှုများကို ဆွေးနွေးရန် ရည်ရွယ်၍ အစည်းအဝေး ကျင်းပခြင်းဖြစ်ကြောင်း သိရသည်။ သတင်းစဉ်MDN
Thu, 30-Apr-2026
ရန်ကုန် ဧပြီ ၂၉ ပြည်ပတွင် ရောက်ရှိနေသည့် မြန်မာနိုင်ငံသားများ အခက်အခဲကြုံတွေ့လာပါက နိုင်ငံတော် အစိုးရသည် နိုင်ငံသားများအပေါ် အလေးအနက်ထား၊ တန်ဖိုးထားကာ မည်သို့သော အခြေအနေတွင် ဖြစ်စေ မြန်မာသံရုံးနှင့် မြန်မာကောင်စစ်ဝန်ချုပ်ရုံးတို့မှတစ်ဆင့် သက်ဆိုင်ရာနိုင်ငံသံရုံးများနှင့် ချိတ်ဆက်၍ မြန်မာနိုင်ငံသို့ အေးချမ်းလုံခြုံစွာ အမြန်ဆုံးပြန်လည်ရောက်ရှိနိုင်ရေး စီစဉ် ဆောင်ရွက်ပေးလျက်ရှိသည်။ ထိုသို့ဆောင်ရွက်ပေးလျက်ရှိရာ အီရတ်နိုင်ငံ ဘဂ္ဂဒက်မြို့တွင် အခက်အခဲကြုံတွေ့နေရသည့် မြန်မာနိုင်ငံသူ ခင်စမ်းဌေး၊ သင်းသင်းအေးနှင့် ဖြိုးအိမာတို့ကို အမိနိုင်ငံသို့ အမြန်ဆုံးပြန်လည် ပို့ဆောင်နိုင်ရေး ကိုင်ရိုမြို့ရှိ မြန်မာသံရုံးသည် အီရတ်နိုင်ငံမှ အစိုးရအဖွဲ့အစည်းများ၊ အီရတ်နိုင်ငံ လူကုန်ကူး တားဆီးကာကွယ်ရေးရဲတပ်ဖွဲ့၊ အီရတ်နိုင်ငံရှိ မြန်မာနိုင်ငံသားများ အခက်အခဲ ကြုံတွေ့ရသည့်အခါ မြန်မာသံရုံးက ဆက်သွယ်အကူအညီ တောင်းခံလေ့ရှိသည့် အီရတ် မိတ်ဆွေများနှင့် သက်ဆိုင်ရာအဖွဲ့ အစည်းများ ညှိနှိုင်းချိတ်ဆက်ဆောင်ရွက်မှုဖြင့် ဧပြီ ၂၇ ရက်တွင် ဘဂ္ဂဒက်မြို့မှ ရှာဂျာခရီးစဉ်၊ ဧပြီ ၂၈ ရက်တွင် ရှာဂျာ-ဗန်ကောက်ခရီးစဉ်၊ ဧပြီ၂၉ရက်တွင် ဗန်ကောက်-ရန်ကုန်ခရီးစဉ် ဖြင့် ထွက်ခွာခဲ့ရာ ယနေ့နံနက် ၃ နာရီ ၁၀ မိနစ် တွင် ရန်ကုန်မြို့သို့ ပြန်လည် ရောက်ရှိခဲ့သည်။ နိုင်ငံတော်အစိုးရအနေဖြင့် ပြည်ပတွင် အလုပ်လုပ်ကိုင်စဉ် အခက်အခဲကြုံတွေ့ရသည့် မြန်မာနိုင်ငံသားများအား မြန်မာသံရုံးနှင့် မြန်မာကောင်စစ်ဝန်ချုပ်ရုံးတို့၏ ညှိနှိုင်းကူညီ ဆောင်ရွက်မှုဖြင့် အမိနိုင်ငံသို့ ပြန်လည်ခေါ်ဆောင်ပေးလျက်ရှိပြီး ယခုကဲ့သို့ အမိနိုင်ငံသားများ အတိဒုက္ခ ကြုံတွေ့နေရစဉ် ကူညီကယ်တင်ပေးမှုကို အလုပ်သမားနှင့် မိဘဆွေမျိုးများအနေဖြင့် နိုင်ငံတော်အစိုးရ၊ မြန်မာသံရုံးနှင့် မြန်မာကောင်စစ်ဝန်ချုပ်ရုံးတို့ကို လှိုက်လှဲစွာ အထူးကျေးဇူးတင်လျက်ရှိကြောင်း သိရသည်။ သတင်းနှင့်ဓာတ်ပုံ - သီဟMDN
Thu, 30-Apr-2026
