အမေရိကန်နှင့် အစ္စရေးတို့က အီရန်နိုင်ငံအပေါ် စစ်ရေးအရတိုက်ခိုက်မှုများ စတင်ပြုလုပ်ခဲ့ပြီးနောက်ပိုင်း အီရန်၏ နျူကလီးယား အဆောက်အအုံ များ ပျက်စီးသွားကြောင်း ကုလသမဂ္ဂ၏ နျူကလီးယား စောင့်ကြည့်ရေးအဖွဲ့က ပထမဆုံးအကြိမ်အဖြစ် အတည်ပြုလိုက်သည်။

အပြည်ပြည်ဆိုင်ရာအနုမြူစွမ်းအင်အေဂျင်စီ (IAEA) က လတ်တလော ရရှိထားသော ဂြိုဟ်တုဓာတ်ပုံများကိုကိုးကား၍ ပြောကြားရာတွင် အီရန်၏ အထိခိုက်မခံဆုံး နျူကလီးယား အဆောက်အအုံများထဲမှ တစ်ခုဖြစ်သည့် Natanz လောင်စာသန့်စင်စက်ရုံ၏ အပြင်ဘက်အဆောက်အအုံများ ပျက်စီးသွားသည်ဟု ဆိုသည်။

နျူကလီးယား ရောင်ခြည်ဖြာထွက်မှုဆိုင်ရာ နောက်ဆက်တွဲဆိုးကျိုးများမရှိကြောင်းနှင့် စက်ရုံအတွင်းပိုင်း၌လည်း ထပ်မံထိခိုက်မှုတစ်စုံတစ်ရာ မတွေ့ရှိရကြောင်း IAEA က ဖြည့်စွက်ပြောကြားသည်။ ပြီးခဲ့သည့် တနင်္လာနေ့ (မတ် ၂) က IAEA အကြီးအကဲ ရာဖေးလ် ဂရော့စီက အီရန်ရှိ နျူကလီးယား အဆောက်အအုံများ တိုက်ခိုက်ခံရသည့် အရိပ်အယောင် မရှိသေးဟု ပြောကြားခဲ့ခြင်းဖြစ်သည်။

အာကာသထောက်လှမ်းရေး ကုမ္ပဏီတစ်ခုဖြစ်သည့် Vantor မှ ရရှိသော ဓာတ်ပုံများကို CNN က လေ့လာသုံးသပ်ချက်အရ အင်္ဂါနေ့ (မတ် ၃) အစောပိုင်းတွင် ဂိုဒေါင်ကြီးတစ်ခုနှင့် နှစ်ထပ်အဆောက်အအုံငယ်နှစ်ခုတို့ ထိမှန်ခဲ့သည်ကို ဂြိုဟ်တုဓာတ်ပုံများတွင် တွေ့ရှိရသည်။

အကျိုးအမြတ်မယူသော နျူကလီးယားခြိမ်းခြောက်မှု လျှော့ချရေးအဖွဲ့ (NTI) ၏ အဆိုအရ ပြီးခဲ့သည့် ဇွန်လက အမေရိကန်၏ ဗုံးကြဲမှုကြောင့် အလွန်ခိုင်ခံ့အောင် တည်ဆောက်ထားသော အဆိုပါ စက်ရုံ၏ အစိတ်အပိုင်းအချို့တွင် လျှပ်စစ်ဓာတ်အား ပြတ်တောက်မှုများ ဖြစ်ပေါ်ခဲ့ဖူးသည်။ အဆိုပါ စက်ရုံတွင် မြေပေါ်အဆောက်အအုံ ၆ ခုနှင့် မြေအောက်အဆောက်အအုံ ၃ ခု ရှိပြီး ယင်းတို့အနက်နှစ်ခုမှာ သန့်စင်စက် (Centrifuges) အလုံးရေ ၅၀,၀၀၀ ခန့်အထိ ထားရှိနိုင်ကြောင်း သိရှိရသည်။

ကိုးကား- CNN

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ ဝန်ကြီး-၂

အရှေ့အလယ်ပိုင်းဒေသ မတည်ငြိမ်မှုများမြင့်တက်လာပြီး အမေရိကန်နှင့် အစ္စရေးတို့က အီရန်ကို တိုက်ခိုက်မှုများပြုလုပ်နေစဉ်အတွင်း ရော်နယ်ဒို ၏ ကိုယ်ပိုင်လေယာဉ်သည် ဆော်ဒီအာရေဗျနိုင်ငံမှ ထွက်ခွာသွားခဲ့သည်။ ယနေ့ (မတ် ၃) နံနက်အစောပိုင်းတွင် ရီယာ့ဒ်မြို့ရှိ အမေရိကန် သံရုံးသည် ဒရုန်းနှစ်စင်းဖြင့် တိုက်ခိုက်ခံရသဖြင့် အဆောက်အအုံ မီးလောင်ကျွမ်းမှုနှင့် ပျက်စီးမှုအနည်းငယ်ရှိခဲ့ကြောင်း ဆော်ဒီအာရေဗျ ကာကွယ်ရေး ဝန်ကြီးဌာနက အတည်ပြုခဲ့သည်။

Flightradar24 ၏ အချက်အလက်များအရ ရော်နယ်ဒို၏ Bombardier Global Express 6500 လေယာဉ်သည် ရီယာ့ဒ်မြို့ရှိ King Khalid အပြည်ပြည်ဆိုင်ရာလေဆိပ်မှ မက်ဒရစ်မြို့သို့ ဗဟိုဥရောပစံတော်ချိန် နံနက် ၁:၃၂ နာရီ တွင် ထွက်ခွာသွားခဲ့ခြင်းဖြစ်သည်။ လေယာဉ်သည် အီဂျစ်နိုင်ငံနှင့် မြေထဲပင်လယ်ကို ဖြတ်ကျော်ကာ အနောက်ဘက်သို့ ပျံသန်းပြီးနောက် စပိန်နိုင်ငံသို့ ဆိုက်ရောက်ခဲ့သည်။ သို့သော် အသက် ၄၁ နှစ်အရွယ် စူပါစတား ရော်နယ်ဒိုနှင့် ၎င်း၏ မိသားစုဝင်များ ထိုလေယာဉ်ပေါ်တွင် ပါဝင်ခြင်း ရှိ၊ မရှိကိုမူ ရှင်းရှင်းလင်းလင်း မသိရှိရသေးပေ။

အဆိုပါ Bombardier Global Express 6500 လေယာဉ်သည် အတွင်းပိုင်းပြင်ဆင်မှုအပေါ် မူတည်၍ ကန်ဒေါ်လာ သန်း ၈၀ ခန့် တန်ကြေး ရှိပြီး ခရီးသည် ၁၇ ဦးအထိ လိုက်ပါနိုင်သည်။ ၎င်းတွင် ခေတ်မီ ထိုင်ခုံများ၊ ဇိမ်ခံဆိုဖာများ၊ သီးသန့်အခန်းများ၊ အလုပ်လုပ်ရန်နေရာနှင့် ထမင်းစားခန်းများ ပါဝင်သည်။ အဆိုပါလေယာဉ်ကို မဝယ်ယူမီက ရော်နယ်ဒိုသည် ၂၀၁၅ ခုနှစ်တွင် ဒေါ်လာ ၂၂ သန်းဖြင့် ဝယ်ယူခဲ့သော ၎င်း၏ Gulfstream G200 လေယာဉ်ဟောင်းကို ပြန်လည် ရောင်းချခဲ့သည်။

ဒေသတွင်းပဋိပက္ခများမှာ ပြင်းထန်နေဆဲဖြစ်ပြီး တင်းမာမှုများကြောင့် ဘောလုံးပွဲစဉ်များကိုလည်း အနှောင့်အယှက်ဖြစ်စေခဲ့ခြင်းကြောင့် အာရှ ဘောလုံးအဖွဲ့ချုပ် (AFC) က အနောက်အာရှဒေသတွင်းရှိ ကလပ်အသင်း ပြိုင်ပွဲအားလုံးကို ရွှေ့ဆိုင်းလိုက်ရာ မတ်လ ၄ ရက်နေ့တွင် ကစားရန် ရှိသည့် Al Nassr အသင်း၏ အဝေးကွင်းပွဲစဉ်လည်း ပါဝင်ခဲ့သည်။ ရော်နယ်ဒိုသည် ဖေဖော်ဝါရီ ၂၈ ရက်က Al Fahya ကို ၃-၁ ဖြင့် အနိုင်ရခဲ့သည့်ပွဲတွင် ပါဝင်ကစားခဲ့သော်လည်း ဒဏ်ရာကြောင့် ပွဲမပြီးခင် လူစားလဲခဲ့ရသည်။

ကိုးကား- VN Express

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ ဝန်ကြီး-၂

အဓိက စွမ်းအင်ထုတ်လုပ်ရာဒေသဖြစ်သော အရှေ့အလယ်ပိုင်းတွင် ဖြစ်ပွားနေသည့် လက်ရှိပဋိပက္ခများသည် ကမ္ဘာ့လောင်စာဆီထောက်ပံ့မှုကို ခြိမ်းခြောက်လာနိုင်သည်ဟူသော စိုးရိမ်မှုများကြောင့် အင်္ဂါနေ့ (မတ် ၃)တွင် ရေနံနှင့်သဘာဝဓာတ်ငွေ့စျေးနှုန်းများ ဆက်လက်မြင့်တက်ခဲ့သည်။

ကမ္ဘာ့ရေနံစံညွှန်းဖြစ်သော Brent ရေနံကြိုပွိုင့်စျေးနှုန်းမှာ ၆ ရာခိုင်နှုန်းခုန်တက်သွားပြီး တစ်စည်လျှင် ၈၂ ဒေါ်လာသို့ ရောက်ရှိခဲ့ကြောင်း FactSet အချက်အလက်များအရ သိရှိရသည်။ ယင်းစျေးနှုန်းမှာ ၂၀၂၅ ခုနှစ်၊ ဇွန်လနောက်ပိုင်း အမြင့်ဆုံးအဆင့်သို့ ရောက်ရှိခဲ့သည့် ယမန်နေ့ကထက် ပိုမိုမြင့်တက်လာခြင်းဖြစ်သည်။ အမေရိကန် ရေနံစံညွှန်းဖြစ်သော WTI သည်လည်း အင်္ဂါနေ့ (မတ် ၃) တွင် ၆ ရာခိုင်နှုန်းမြင့်တက်ကာ တစ်စည်လျှင် ၇၅.၆ ဒေါ်လာသို့ ရောက်ရှိခဲ့သည်။

တစ်ချိန်တည်းမှာပင် ဥရောပစံညွှန်း သဘာဝဓာတ်ငွေ့ ကြိုပွိုင့် စျေးနှုန်းမှာ ၃၄ ရာခိုင်နှုန်းအထိ ထိုးတက်သွားပြီး တစ်မီဂါဝပ်နာရီလျှင် ၅၉ ယူရို (၆၈ ဒေါ်လာ) ခန့် ဖြစ်လာခဲ့သည်။ ပါရှန်ပင်လယ်ကွေ့အတွင်းရှိ စွမ်းအင်အခြေခံအဆောက်အအုံများကို အီရန်က ပစ်မှတ်ထားတိုက်ခိုက်ခဲ့ပြီးနောက် ကာတာနိုင်ငံ၏ အကြီးဆုံးဓာတ်ငွေ့ထုတ်လုပ်သူက ထုတ်လုပ်မှုရပ်ဆိုင်းရန် ဆုံးဖြတ်လိုက်ခြင်းကြောင့် ယခုကဲ့သို့ စျေးနှုန်းများ မြင့်တက်လာခြင်းဖြစ်သည်။

ယခုအခါ လေးရက်မြောက်နေ့သို့ ရောက်ရှိလာပြီဖြစ်သော အီရန်နှင့် အမေရိကန်-အစ္စရေးတို့အကြားပဋိပက္ခကြောင့် အရှေ့အလယ်ပိုင်း ဒေသမှ ရေနံနှင့်သဘာဝဓာတ်ငွေ့ တင်ပို့မှုများ ပြတ်တောက်သွားမည်ကို စိုးရိမ်ပူပန်မှုများက ထင်ဟပ်နေသည်။ အီရန်နိုင်ငံကို ရှောင်ကွင်းသွားရသည့် အလွန်အရေးပါသော ဟော်မုဇ်ရေလက်ကြား (Strait of Hormuz) သင်္ဘောလမ်းကြောင်းမှာလည်း လက်တွေ့တွင် ပိတ်ဆို့ခံထားရသဖြင့် ကမ္ဘာ့စျေးကွက်သို့ အရေးကြီးကုန်စည်များပို့ဆောင်ရန် အခြားရွေးချယ်စရာ နည်းပါးသွားပြီဖြစ်သည်။

တိုးပွားလာသော အဆိုပါစိုးရိမ်မှုများသည် ကမ္ဘာတစ်ဝှမ်းရှိ စတော့ ရှယ်ယာစျေးကွက်များသို့လည်း ကူးစက်ခဲ့သည်။ အာရှစျေးကွက်တွင် တောင်ကိုရီးယား၏ Kospi အညွှန်းကိန်းမှာ ဈေးပိတ်ချိန်တွင် ၇ ရာခိုင်နှုန်းကျော်အထိ ကျဆင်းခဲ့ပြီး အကျဆုံးဖြစ်ခဲ့သည်။ ဂျပန်နှင့် ဟောင်ကောင်ရှိ စတော့အညွှန်းကိန်းများမှာလည်း ကျဆင်းခဲ့သည်။

ဥရောပစျေးကွက်တွင် လန်ဒန်၏ FTSE 100 အညွှန်းကိန်းမှာ နံနက်ပိုင်း အရောင်းအဝယ်ပြုလုပ်ချိန်၌ ၂.၇ ရာခိုင်နှုန်း ကျဆင်းခဲ့သည်။ ဂျာမနီ၏ Dax မှာ ၃.၄ ရာခိုင်နှုန်းနှင့် ပြင်သစ်၏ CAC အညွှန်းကိန်းမှာ ၂.၈ ရာခိုင်နှုန်း အသီးသီး ကျဆင်းခဲ့သည်။ အမေရိကန် စတော့ကြိုပွိုင့် စျေးကွက်မှာလည်း စျေးဖွင့်ချိန်တွင် သိသိသာသာ ကျဆင်းမည့် အလားအလာများကို ပြသနေသည်။

ကိုးကား- CNN

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ ဝန်ကြီး-၂

အမေရိကန်နိုင်ငံခြားရေးဝန်ကြီးဌာနသည် လုံခြုံရေးဆိုင်ရာ စိုးရိမ်ရမှုများကြောင့် ဂျော်ဒန်၊ ဘာရိန်း၊ အီရတ်၊ ကာတာနှင့် ကူဝိတ်နိုင်ငံများရှိ အရေးပေါ်မဟုတ်သော အစိုးရဝန်ထမ်းများနှင့် ၎င်းတို့၏ မိသားစုဝင်များ မဖြစ်မနေထွက်ခွာကြရန် တနင်္လာနေ့ (မတ် ၂) တွင် အမိန့်ထုတ်ပြန်ခဲ့သည်။

ဂျော်ဒန်၊ ဘာရိန်း၊ ကာတာနှင့် ကူဝိတ်ရှိ ဝန်ထမ်းများသည် အီရန်ထံမှ ဒရုန်းနှင့် ဒုံးကျည်ဖြင့် တိုက်ခိုက်ခံရနိုင်သည့်ခြိမ်းခြောက်မှုများနှင့် ရင်ဆိုင်နေရပြီး လေကြောင်းလိုင်းများလည်း ကြီးကြီးမားမား အနှောင့်အယှက်ဖြစ်နိုင်သည်ဟု နိုင်ငံခြားရေးဝန်ကြီးဌာနက မှတ်ချက်ပြုထားသည်။ ထို့အပြင် ဂျော်ဒန်နှင့် ဘာရိန်းတို့တွင် အကြမ်းဖက် တိုက်ခိုက်မှုများ ဖြစ်ပွားနိုင်ခြေရှိကြောင်းနှင့် အီရတ်တွင် အကြမ်းဖက်မှုနှင့် ပြန်ပေး ဆွဲခံရမှု အန္တရာယ်မြင့်မားနေကြောင်း သတိပေးထားသည်။

အမေရိကန်နှင့် အစ္စရေးတို့က အီရန်အပေါ် စစ်ရေးအရ စတင် တိုက်ခိုက်ပြီးနောက်ပိုင်း ယခုကဲ့သို့ သံရုံး (၅) ခုမှ ဝန်ထမ်းများအား မဖြစ်မနေထွက်ခွာခိုင်းခြင်းမှာ ပထမဆုံးအကြိမ် ဖြစ်သည်။ အီရန်၏ လက်တုံ့ပြန်မှုများကြောင့် ဒေသတွင်းလုံခြုံရေးအန္တရာယ် မြင့်တက်လာခြင်းကို ပြသနေပြီး အထူးသဖြင့် အမေရိကန် စစ်ရေးနှင့် သံတမန်ရေးရာ အဆောက်အအုံများကို ပစ်မှတ်ထားလာခြင်း ဖြစ်သည်။

အင်္ဂါနေ့ (မတ် ၃) ညပိုင်း၌ ဆော်ဒီအာရေဗျရှိ အမေရိကန်သံရုံးသည် အီရန်ဒရုန်းဟုယူဆရသော ဒရုန်းနှစ်စင်းဖြင့် တိုက်ခိုက်ခံခဲ့ရပြီး ရီယာဒ် (Riyadh) ရှိ သံရုံးဝင်းအတွင်း သို့မဟုတ် အနီးအနားသို့ နောက်ထပ် ဒရုန်းနှစ်စင်း ကျရောက်ခဲ့သည်။ ကူဝိတ်ရှိ အမေရိကန်သံရုံးလည်း တိုက်ခိုက်ခံခဲ့ရသည်။ စစ်ပွဲစတင်ကတည်းက ဒေသတွင်းရှိ အမေရိကန် သံရုံး အများအပြားသည် ဝန်ထမ်းများအား ဘေးကင်းရာ၌သာ နေထိုင် ကြရန် (Shelter in place) အမိန့်ထုတ်ပြန်ထားပြီး အမေရိကန် နိုင်ငံသားများကိုလည်း ထိုသို့လုပ်ဆောင်ရန် တိုက်တွန်းထားသည်။ ဝန်ထမ်းများ ထွက်ခွာရန် အမိန့်ထုတ်ထားသော်လည်း သံရုံးများကို ပိတ်သိမ်းလိုက်ခြင်း မဟုတ်ပေ။ သို့သော် ကူဝိတ်ရှိ အမေရိကန်သံရုံးကမူ ထပ်မံ အကြောင်း မကြားမချင်း ပိတ်ထားမည်ဖြစ်ကြောင်း အင်္ဂါနေ့ (မတ် ၃) တွင် ကြေညာခဲ့သည်။

အခြားသော သံရုံးများတွင်မူ အရေးကြီးသည့် ဝန်ထမ်းအနည်းငယ်သာ ကျန်ရှိနေမည်ဖြစ်ပြီး အရှေ့အလယ်ပိုင်းရှိ အမေရိကန်နိုင်ငံသားများကိုမူ လေကြောင်းလိုင်းများမှတစ်ဆင့် ချက်ချင်းထွက်ခွာကြရန် နိုင်ငံခြားရေးဝန်ကြီးဌာနက တိုက်တွန်းထားသည်။ လေကြောင်းလိုင်း အများအပြား သည် ဒေသတွင်းသို့ ပျံသန်းမှုများရပ်ဆိုင်းထားသဖြင့် လူအများစုမှာအမြန်ဆုံး ထွက်ခွာနိုင်ရန် ခဲယဉ်းနိုင်သည်။ လက်ရှိအချိန်အထိ အမေရိကန် အစိုးရအနေဖြင့် နိုင်ငံသားများအတွက် ကယ်ဆယ်ရေးလေယာဉ်များ စတင်ပြေးဆွဲပေးခြင်း မရှိသေးပေ။

ကိုးကား- CNN

Photo: Investing.com

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ ဝန်ကြီး-၂

အစ္စရေးဝန်ကြီးချုပ် ဘင်ဂျမင် နေတန်ယာဟုက အရှေ့အလယ်ပိုင်းတွင် အရှိန်မြင့်တက်နေသော ပဋိပက္ခများသည် အဆုံးမရှိသောစစ်ပွဲဖြစ်လာ လိမ့်မည်ဟူသော ဝေဖန်မှုများကိုပယ်ချလိုက်ပြီး ယင်းအစား အဆိုပါ စစ်ပွဲသည် အီရန်နိုင်ငံတွင် ငြိမ်းချမ်းရေးနှင့် ဒီမိုကရေစီကို ဖော်ဆောင်ပေးလိမ့်မည်ဟု အခိုင်အမာ ပြောကြားခဲ့သည်။

တနင်္လာနေ့ (မတ် ၂) က Fox News ရုပ်သံလိုင်းမှ Sean Hannity နှင့် ပြုလုပ်ခဲ့သော အင်တာဗျူးတွင် နေတန်ယာဟုက "ယင်းက အဆုံးမရှိသည့် စစ်ပွဲတစ်ခု မဟုတ်ပါ ၊ ကျွန်တော်တို့ အိပ်မက်တောင် မမက်ဖူးသေးသည့် ငြိမ်းချမ်းရေးခေတ်သစ်တစ်ခုကို ဆောင်ကြဉ်းပေးမည့်အရာပါ" ဟု ပြောဆိုခဲ့သည်။

အစ္စလာမ္မစ်သမ္မတနိုင်ငံ (အီရန်) အနေဖြင့် နျူကလီးယား လက်နက်ပိုင်ဆိုင်ခြင်းမှ တားဆီးရန် ယခုကဲ့သို့ အရေးယူဆောင်ရွက်မှုများ လိုအပ်ကြောင်း ၎င်းက ထပ်လောင်းပြောကြားခဲ့သော်လည်း အီရန်သည် နျူကလီးယားလက်နက်ရရှိရန် နီးစပ်နေပြီဖြစ်ကြောင်း သက်သေ အထောက်အထား တစ်စုံတစ်ရာ ပြသခဲ့ခြင်း မရှိပေ။

အမေရိကန်သမ္မတ ထရမ့်ကလည်း ထိုပြောဆိုချက်များကို ထောက်ခံခဲ့သော်လည်း ၎င်းတို့၏ အဆိုမှာ အမေရိကန် ထောက်လှမ်းရေးအဖွဲ့၏ အကဲဖြတ်ချက်နှင့် ဆန့်ကျင်ဘက်ဖြစ်နေသည်။ ထောက်လှမ်းရေးအဖွဲ့ ၏ အကဲဖြတ်ချက်အရ အီရန်သည် "စစ်ရေးအရ အသုံးပြုနိုင်သော" တိုက်ချင်းပစ် ပဲ့ထိန်းဒုံးကျည်ထုတ်လုပ်နိုင်ရန် ဆယ်စုနှစ်တစ်ခုခန့် လိုအပ်နေသေးကြောင်း သိရှိရသည်။

သမ္မတ ထရမ့်ကမူ အမေရိကန်၏ အီရန်စစ်ဆင်ရေး ကြာမြင့်မည့်ကာလနှင့် အီရန်နိုင်ငံကို မည်သူကဆက်လက်အုပ်ချုပ်မည်ဆိုသည့် နောက်ဆက်တွဲကိစ္စရပ်များနှင့်ပတ်သက်၍ ရှုပ်ထွေးသော ပြောဆိုချက်များကို ပေးခဲ့သည်။ တနင်္လာနေ့ (မတ် ၂) က CNN မှ Jake Tappe r နှင့် အင်တာဗျူးတွင် ထရမ့်က "ထိုစစ်ပွဲကို အကြာကြီး မဖြစ်စေချင်ပါ၊ ကျွန်တော်ကတော့အမြဲတမ်း လေးပတ်လောက်ပဲ ကြာမည်ဟု ထင်ခဲ့တာ၊ ယခုဆိုလျှင် ကျွန်တော်တို့ သတ်မှတ်ထားသည့် အချိန်ဇယားထက်တောင် နည်းနည်း စောနေပါပြီ" ဟု ပြောကြားခဲ့သည်။

အမေရိကန်၏ အီရန်အပေါ် တိုက်ခိုက်မှု အရှိန်အဟုန်အပြင်းဆုံးလှိုင်း (Big Wave) မှာ လာရန် ရှိသေးကြောင်းလည်း ထရမ့်က CNN သို့ ပြောကြားခဲ့သည်။ ၎င်းက သတင်းထောက်များအား စစ်ပွဲရည်မှန်းချက်များကို ရှင်းလင်းပြောကြားရာတွင် အီရန်၏ ဒုံးကျည် စွမ်းဆောင်ရည်များကို ဖျက်ဆီးရန်၊ ရေတပ်ကို ချေမှုန်းရန်၊ နျူကလီးယား ရည်မှန်းချက်များကို ရပ်တန့်ရန်နှင့် လက်နက်ကိုင်အဖွဲ့များကို လက်နက် ထောက်ပံ့နေမှုများကို အဆုံးသတ်ရန်ဖြစ်ကြောင်း ပြောဆိုခဲ့သည်။ ထို့အပြင် မြေပြင်တပ်ဖွဲ့များ စေလွှတ်မည့်ကိစ္စကိုလည်း အပြီးတိုင် ပယ်ချထားခြင်းမရှိကြောင်း New York Post သို့ ပြောကြားခဲ့သည်။

အမေရိကန် နိုင်ငံခြားရေးဝန်ကြီး မာကို ရူဘီယိုကလည်း ထရမ့်၏ ပြောဆိုချက်ကို ထောက်ခံခဲ့ပြီး "အပြင်းထန်ဆုံး တိုက်ခိုက်မှုများလာရန် ရှိပါသေးသည်" ဟု ဆိုသော်လည်း ထရမ့်အစိုးရအဖွဲ့အနေဖြင့် အီရန်အပေါ်ဆောင်ရွက်နေသော စစ်ဆင်ရေးရည်မှန်းချက်များကို "မြေပြင် တပ်ဖွဲ့များမပါဘဲ အောင်မြင်နိုင်လိမ့်မည်" ဟု ယုံကြည်ကြောင်း ပြောကြားခဲ့သည်။

ကိုးကား- CNN

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ ဝန်ကြီး-၂

ရုရှားတွင် ဗုံးခွဲတိုက်ခိုက်မှုပြုလုပ်ရန် ၎င်းတို့စုဆောင်းထားသည့် အမျိုးသားတစ်ဦးအား ဥပဒေစိုးမိုးရေးအဖွဲ့များက ဖမ်းဆီးရန်ကြိုးပမ်းစဉ်အတွင်း ယူကရိန်းထောက်လှမ်းရေးများက ပြန်လည်သတ်ဖြတ်ခဲ့ကြောင်း ရုရှား လုံခြုံရေးဌာန (FSB) က အင်္ဂါနေ့ (မတ် ၃) တွင် သတင်းထုတ်ပြန်ခဲ့သည်။ အဆိုပါ သေဆုံးသွားသူမှာ အသက် ၄၀ ကျော်အရွယ် ရုရှား နိုင်ငံသားတစ်ဦးဖြစ်ပြီး Sverdlovsk ဒေသရှိ ကာကွယ်ရေးစက်ရုံမှ အရာရှိတစ်ဦးအား ပစ်မှတ်ထားတိုက်ခိုက်ရန် ယူကရိန်းဘက်မှ စေခိုင်းထားသူဖြစ်ကြောင်း FSB က ဖော်ထုတ်ခဲ့သည်။

FSB ၏ ဖော်ပြချက်အရ အဆိုပါသံသယရှိသူသည် ကိယက်ဗ်မှ ပေးအပ်ထားသော မှတ်ပုံတင်အတုကိုအသုံးပြု၍ ဒေသတွင်းမြို့တော် Ekaterinburg တွင် တိုက်ခန်းတစ်ခန်း ငှားရမ်းနေထိုင်ခဲ့ပြီး လုပ်ကြံသတ်ဖြတ်မှုအတွက် လက်လုပ်ဗုံး နှစ်လုံးကိုလည်း လက်ဝယ်ထားရှိခဲ့ကြောင်း သိရှိရသည်။

အရာရှိများက ၎င်းအားရင်ဆိုင်ဖမ်းဆီးစဉ်အတွင်း အဆိုပါ အကြံအစည် မှာ ပျက်ပြားသွားခဲ့ကြောင်း ထုတ်ပြန်ချက်တွင်ဖော်ပြထားသည်။ ယူကရိန်းဘက်မှ စေခိုင်းသူများသည် ၎င်းတို့၏ လူမှာ ဖော်ထုတ်ခံလိုက်ရပြီဖြစ်ကြောင်း သိရှိသွားပြီးနောက် ဗုံးတစ်လုံးကို အဝေးထိန်းစနစ်ဖြင့် ဖောက်ခွဲကာ ၎င်းအား သတ်ဖြတ်ခဲ့ခြင်းဖြစ်သည်ဟု FSB က ဆိုသည်။ ဒုတိယမြောက်ဗုံးကိုမူ ဗုံးကျွမ်းကျင်သူများက နောက်ပိုင်းတွင် အောင်မြင်စွာ သက်မဲ့ဖြစ်အောင် ပြုလုပ်နိုင်ခဲ့သည်။

ရုရှားအရာရှိများ၏ အဆိုအရ ယူကရိန်းအထူးဝန်ဆောင်မှုဌာနများသည် ရုရှားမြေပေါ်တွင် တိုက်ခိုက်မှုများပြုလုပ်ရာ၌ ကျူးလွန်သူပါ သေဆုံးစေမည့် နည်းလမ်းများကို ပိုမိုအသုံးပြုလာကြကြောင်း သိရှိရသည်။ ဒေသတွင်း စုဆောင်းခံရသူများကို များသောအားဖြင့် ငွေကြေးကမ်းလှမ်းမှုများဖြင့်ဆွဲဆောင်ခြင်း သို့မဟုတ် ငွေကြေးဆိုင်ရာလိမ်လည်မှုများဖြင့် ခြိမ်းခြောက်အကျပ်ကိုင်ခြင်းမျိုး ပြုလုပ်လေ့ရှိသည်။ ထိုကဲ့သို့ သေကျေ ပျက်စီးစေသည့် ချဉ်းကပ်မှုမှာ သက်သေများကို ဖျောက်ဖျက်ရန်နှင့် ကုန်ကျစရိတ်များကို လျှော့ချရန်အတွက် ရည်ရွယ်ခြင်းဖြစ်သည်ဟု ရုရှား အာဏာပိုင်များက ပြောကြားခဲ့သည်။

ကိုးကား- RT

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ ဝန်ကြီး-၂

ပေကျင်းနှင့် မော်စကိုတို့ ကျောထောက်နောက်ခံပြုထားသော ဒေသတွင်းလုံခြုံရေးအဖွဲ့အစည်းတစ်ခုဖြစ်သည့် ရှန်ဟိုင်းပူးပေါင်းဆောင်ရွက်ရေး အဖွဲ့ (SCO) က အီရန်နိုင်ငံအပေါ် အမေရိကန်နှင့် အစ္စရေးတို့၏ တိုက်ခိုက်မှုများကို ပြစ်တင်ရှုတ်ချလိုက်သည်။

ရှန်ဟိုင်းပူးပေါင်းဆောင်ရွက်ရေးအဖွဲ့ (SCO) အဖွဲ့ဝင်နိုင်ငံများက “အရှေ့အလယ်ပိုင်းဒေသ ဖြစ်ပေါ်တိုးတက်မှုများနှင့် အီရန်အစ္စလာမ္မစ် သမ္မတ နိုင်ငံအပေါ် လက်နက်ကိုင်တိုက်ခိုက်မှုများအပေါ် အထူးစိုးရိမ်ပူပန်ကြောင်း” တနင်္လာနေ့ (မတ် ၂) တွင် ထုတ်ပြန်သည့်ကြေညာချက်၌ ဖော်ပြထား သည်။ “အင်အားသုံးဖြေရှင်းခြင်းကို လက်မခံနိုင်ပါ ၊ လက်ရှိ ပဋိပက္ခကို ဖြေရှင်းရန် တစ်ခုတည်းသောနည်းလမ်းမှာ ဆွေးနွေးညှိနှိုင်းခြင်း၊ အပြန် အလှန်လေးစားခြင်းနှင့် အဖွဲ့ဝင်တစ်ခုချင်းစီ၏ တရားဝင် အကျိုးစီးပွားများကို ထည့်သွင်းစဉ်းစားခြင်းတို့ပင် ဖြစ်သည်” ဟု SCO က ဆိုသည်။

မော်စကိုနှင့် ပေကျင်းတို့သည် အဆိုပါဒေသတွင်းလုံခြုံရေးအဖွဲ့ကို ၂၀၀၁ ခုနှစ်တွင် စတင်တည်ထောင်ခဲ့ခြင်းဖြစ်သည်။ ယခုအခါ အဖွဲ့ဝင် ၁၀ နိုင်ငံ ရှိပြီး အီရန်နိုင်ငံသည် ၂၀၂၃ ခုနှစ်တွင် အဖွဲ့ဝင်အဖြစ် ဝင်ရောက်ခဲ့သည်။ အနောက်နိုင်ငံများ ဦးဆောင်သည့် ကမ္ဘာလုံးဆိုင်ရာအဖွဲ့အစည်းများ၏ လွှမ်းမိုးမှုကိုစိန်ခေါ်ရန် ရည်မှန်းချက်ထားသော်လည်း SCO သည် အဖွဲ့ဝင်များအကြား (အထူးသဖြင့် ပြီးခဲ့သည့်နှစ်က စစ်မက်အနည်းငယ် ဖြစ်ပွားခဲ့သော အိန္ဒိယနှင့် ပါကစ္စတန်တို့ကြား) ပြင်းထန်သော အားပြိုင်မှုများကြောင့် မကြာခဏဆိုသလို အဟန့်အတားများနှင့် ကြုံတွေ့နေရသည်။

ကိုးကား- CNN

Photo: Reuters

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ ဝန်ကြီး-၂

ပြည်တွင်းသုံးစွဲရန်အတွက် စက်သုံးဆီလက်ကျန် အလုံအလောက်ရှိသော်လည်း ဈေးနှုန်းမြင့်တက်မှုကိုလျှော့ချရန် ထောက်ပံ့ကြေးများ (Subsidies) ပေးထားသည့်တိုင်အောင် ကမ္ဘာ့ဈေးနှုန်း မြင့်တက်လာမှုနှင့်အညီ ပြည်တွင်းဈေးနှုန်းများလည်း လိုက်ပါမြင့်တက်လာမည် ဖြစ်ကြောင်း ထိုင်းအစိုးရက သတိပေးပြောကြားလိုက်သည်။

အင်္ဂါနေ့ (မတ် ၃) က နိုင်ငံခြားရေးဝန်ကြီးဌာနတွင် ပြုလုပ်သည့် အရှေ့ အလယ်ပိုင်းအရေး အစည်းအဝေးအပြီး၌ ဝန်ကြီးချုပ် အနုတင် ချန်ဝီ ရာကူးလ် (Anutin Charnvirakul) က ပြောကြားရာတွင် ထိုင်းနိုင်ငံသည် တစ်ရက်လျှင် စက်သုံးဆီ လီတာ ၁၇၀ သန်း ထုတ်လုပ်သန့်စင်နိုင်ပြီး ပြည်တွင်းသုံးစွဲမှုမှာ တစ်ရက်လျှင် လီတာ ၁၃၀ သန်းသာ ရှိကြောင်း ဆိုသည်။

လတ်တလောတွင် အစိုးရအနေဖြင့် တစ်ရက်လျှင် လီတာ ၇ သန်းခန့် တင်ပို့နေရသော လာအိုနိုင်ငံမှလွဲ၍ ကျန်ရှိသော ပြည်ပသို့ ဆီတင်ပို့မှု အားလုံးကို ရပ်ဆိုင်းထားကြောင်း ၎င်းက ပြောကြားခဲ့သည်။ လာအို နိုင်ငံကို ချွင်းချက်အနေဖြင့် ဆက်လက်တင်ပို့ရခြင်းမှာ ထိုင်းနိုင်ငံသည် လျှပ်စစ်မီးအတွက် လာအိုနိုင်ငံအပေါ် တစ်စိတ်တစ်ပိုင်း မှီခိုနေရသောကြောင့် ဖြစ်သည်ဟု ဆိုသည်။

"လက်ရှိအချိန်မှာ အကျပ်အတည်း မရှိသေးဘူးဆိုသည်ကို မိမိ အတည်ပြုပါသည်၊ မိမိတို့မှာ လုံလောက်သည့် စက်သုံးဆီအရန်အင်အား ရှိပါသည်၊ အရန်ဆီ ရက်ပေါင်း ၆၀ စာပဲရှိသည်ဆိုသည့် အစီရင်ခံစာတွေဟာ ရေနံစိမ်း (Crude Oil) ထပ်မံတင်သွင်းခြင်း မပြုတော့ဘူးဆိုသည့် ယူဆချက် အပေါ် အခြေခံထားတာပါ ၊ တကယ်တော့ ကျွန်တော်တို့အနေဖြင့် အရှေ့အလယ်ပိုင်းကတင်မကဘဲ အခြားအရင်းအမြစ်တွေကနေပါ ဆီတင်သွင်းနေခြင်း ဖြစ်ပါသည်" ဟု အနုတင်က ပြောကြားခဲ့သည်။

အရှေ့အလယ်ပိုင်း ပဋိပက္ခသည် ဆီဈေးနှုန်းများအပေါ် သက်ရောက်မှုရှိလာမည်ကို ယာယီဝန်ကြီးချုပ်က ဝန်ခံခဲ့သော်လည်း ၎င်း၏ အစိုးရ အနေဖြင့် စက်သုံးဆီ၊ ဂတ်စ် နှင့် အခြားမရှိမဖြစ်လိုအပ်သော ကုန်ပစ္စည်းများ၏ လက်လီဈေးနှုန်းများကို တည်ငြိမ်အောင် အကောင်းဆုံး ကြိုးစား ဆောင်ရွက်သွားမည်ဟု ကတိပြုခဲ့သည်။

စွမ်းအင်ဝန်ကြီးဌာန ဒုတိယအမြဲတမ်းအတွင်းဝန် ဝီရာပတ် ကီယတ် ဖျောင်ဖူး (Veerapat Kiatfuengfoo) က အင်္ဂါနေ့ (မတ် ၃) နံနက်ပိုင်းတွင် အီရန်နိုင်ငံက ဟော်မုဇ်ရေလက်ကြား (Strait of Hormuz) ကို ပိတ်လိုက်ပြီဟု ကြေညာခဲ့ကြောင်း ပြောကြားသည်။ ထို့ကြောင့် ကုန်သည်များအနေဖြင့် အရန်ဆီလုံလောက်မှုရှိစေရန်အတွက် အမေရိက၊ အနောက် အာဖရိကနှင့် မလေးရှားကဲ့သို့သော အခြားအရင်းအမြစ်များမှ ဆီများကို ဝယ်ယူရန် ညွှန်ကြားထားကြောင်း သိရှိရသည်။

စွမ်းအင်ဝန်ကြီးဌာနအနေဖြင့် ဆီဈေးနှုန်းမြင့်တက်မှုကို ထောက်ပံ့ကူညီရန် (Subsidise) 'စက်သုံးဆီရန်ပုံငွေ' (Oil Fuel Fund) ကို အသုံးပြုသွားမည်ဖြစ်သည်။ သို့သော်လည်း ပြည်တွင်း စက်သုံးဆီဆိုင်ဈေးနှုန်းများသည် ကမ္ဘာ့ရေနံဈေးနှုန်းများနှင့်အညီ ဆက်လက်မြင့်တက်နေဦးမည် ဖြစ်ကြောင်း ၎င်းက ဆိုသည်။

"မိဘပြည်သူများအနေဖြင့် စိုးရိမ်တကြီး ဆီများ ဝယ်ယူစုဆောင်းခြင်းမျိုးမပြုလုပ်ကြရန် မေတ္တာရပ်ခံချင်ပါသည် ၊ ဆီအမြောက်အမြားကို စနစ်တကျမဟုတ်ဘဲသိုလှောင်ခြင်းက ဥပဒေနှင့်မကင်းသလို အန္တရာယ်လည်း အလွန်များပါသည် ၊ ထိုင်းနိုင်ငံမှာ ပြည်တွင်းသုံးစွဲရန် အရန်ဆီ အလုံအလောက်ရှိသည်ကို စွမ်းအင်ဝန်ကြီးဌာနအနေဖြင့် ယုံကြည်မှုအပြည့် ရှိပါသည်" ဟု ဝီရာပတ်က ပြောကြားခဲ့သည်။

ကိုးကား- Bangkok Post

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ ဝန်ကြီး-၂

အရှေ့အလယ်ပိုင်းတွင် ဖြစ်ပွားနေသော စစ်ပွဲများကြောင့် စက်သုံးဆီ စျေးနှုန်းများ စတင်မြင့်တက်လာသည့်အတွက် မြန်မာနိုင်ငံသားများသည် တာ့ခ်ခရိုင် (Tak province) ရှိ မဲဆောက်မြို့တွင် ဆီဖြည့်ရန် ထိုင်းနိုင်ငံဘက်သို့ အုပ်စုလိုက်အပြုံလိုက် ဖြတ်ကျော်ဝင်ရောက်လျက်ရှိသည်။

ကရင်ပြည်နယ်၊ မြဝတီမြို့ဘက်မှ ဝင်ရောက်လာသော မော်တော်ယာဉ်အများစုမှာ ခရီးသည်တင် မှန်လုံယာဉ် (Vans) များဖြစ်ကြပြီး သောင်းရင်းမြစ်ကို ဖြတ်ကျော်ထားသည့် ပထမ ထိုင်း-မြန်မာ ချစ်ကြည်ရေးတံတားမှတစ်ဆင့် ဝင်ရောက်လာကြခြင်းဖြစ်သည်။ ဓာတ်ပုံမှတ်တမ်းတစ်ခုတွင် တွေ့ရှိရသည့် ဖြစ်ရပ်တစ်ခု၌ ယာဉ်မောင်းတစ်ဦးသည် ၎င်း၏ယာဉ်အတွင်းရှိ ဆီတိုင်ကီထဲသို့ ဆီပမာဏ အများဆုံးဝင်ဆံ့စေရန်အတွက်ကားကိုလှုပ်ခါပြီး လျှံထွက်လုနီးပါးအထိ ဖြည့်တင်းနေသည်ကို တွေ့ရှိ ခဲ့ရသည်။

အဆိုပါ လာရောက်ဆီဖြည့်သူ များပြားလာမှုကြောင့် မဲဆောက်မြို့ခံများအကြား စက်သုံးဆီ ပြတ်လပ်သွားနိုင်သည်ဟူသော စိုးရိမ်မှုများမြင့်တက်လာပြီး ၎င်းတို့ကိုယ်တိုင်လည်း ဆီဖြည့်ရန် အပြေးအလွှား သွားရောက်ခဲ့ကြသည်။

PTT နှင့် Bangchak ကုမ္ပဏီတို့က ပြည်တွင်းအရန်ဆီ လုံလောက်မှုရှိသဖြင့် လတ်တလောတွင် ဈေးနှုန်းကိုထိန်းထားမည်ဟု ပြောကြား သော်လည်း အခြားပြိုင်ဘက် ကုမ္ပဏီအချို့မှာမူ ဆီဆိုင်များတွင် ဈေးနှုန်းများ စတင်မြှင့်တင်နေပြီဖြစ်သည်။ Shell ကုမ္ပဏီသည် အင်္ဂါနေ့ (မတ် ၃) တွင် ဒီဇယ်ဈေးကို တစ်လီတာလျှင် ၄.၂၀ ဘတ် နှင့် Gasohol ကို ၁.၅၀ ဘတ် မြှင့်တင်ခဲ့သည်။ Caltex ကလည်း ဒီဇယ်ဈေးကို ၁.၈၀ ဘတ် နှင့် Gasohol အများစုကို တစ်လီတာလျှင် ၀.၉၀ ဘတ် အသီးသီး မြှင့်တင်ခဲ့သည်။

ပြီးခဲ့သည့် စနေနေ့ (ဖေဖော်ဝါရီ ၂၈) က အီရန်အပေါ် အမေရိကန်နှင့် အစ္စရေးတို့၏ တိုက်ခိုက်မှုများစတင်ခဲ့ပြီးနောက် ကမ္ဘာ့ရေနံစိမ်း ဈေးနှုန်းမှာ ၁၀% မှ ၁၅% ခန့်အထိ မြင့်တက်လာခဲ့ရာ ရှေ့ဆက်၍ ဆီဈေးနှုန်းများထပ်မံမြင့်တက်လာနိုင်ခြေရှိသည်ဟု ကျယ်ကျယ်ပြန့်ပြန့် ခန့်မှန်းနေကြသည်။

မဲဆောက်မြို့ရှိ ဆီဆိုင်များတွင် ယာဉ်မောင်းများတန်းစီစောင့်ဆိုင်းနေကြသဖြင့် လူတန်းရှည်ကြီးများ ဖြစ်ပေါ်နေကြောင်း သိရှိရသည်။ မြန်မာလိုင်စင်ရယာဉ်များသာမက ထိုင်းပုဂ္ဂလိကကားများနှင့် ကုန်တင်ကားများပါ တန်းစီနေကြခြင်းဖြစ်သည်။

တာ့ခ်ခရိုင်အတွင်းရှိ ထိုင်း-မြန်မာနယ်စပ်ဒေသသည် အွန်လိုင်းငွေလိမ်ဂိုဏ်းများက လျှပ်စစ်မီးထုတ်လုပ်ရန် အသုံးပြုခြင်းကိုတားဆီးနိုင်ရန်အတွက် မြန်မာနိုင်ငံသို့ စက်သုံးဆီတင်ပို့မှုကိုပိတ်ပင်ထားသည့် အစိုးရ၏ “ဖြတ်သုံးဖြတ် (Three Cuts)” မူဝါဒအောက်တွင် ရှိနေဆဲဖြစ်သည်။

သို့သော်လည်း မြန်မာနိုင်ငံသားများအနေဖြင့် ပုဂ္ဂလိကယာဉ်များဖြင့် နယ်စပ်ဖြတ်ကျော်ကာ ဆီဖြည့်ခြင်းကိုမူ ခွင့်ပြုထားဆဲဖြစ်သည်။

ကိုးကား- Bangkok Post

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ ဝန်ကြီး-၂

ဆော်ဒီအာရေဗျနိုင်ငံ၊ ရီယတ်မြို့ရှိ အမေရိကန်သံရုံးက အင်္ဂါနေ့ (မတ် ၃) နံနက်ပိုင်းတွင် အီရန်ဒရုန်းများဟု သံသယရှိရသောဒရုန်းများဖြင့် တိုက်ခိုက် ခံရပြီးနောက် “သံရုံးဝန်းအတွင်း တိုက်ခိုက်ခံရမှုကြောင့် အင်္ဂါနေ့အတွက် ကောင်စစ်ဝန်ရုံး ချိန်းဆိုမှုအားလုံးကို ဖျက်သိမ်းလိုက်ကြောင်း” ပြောကြား ခဲ့သည်။

ဆော်ဒီကာကွယ်ရေးဝန်ကြီးဌာနကလည်း အဆိုပါတိုက်ခိုက်မှုကို အတည်ပြု ခဲ့ပြီး “မီးလောင်မှု အနည်းငယ်နှင့် အသေးစား ပစ္စည်းပျက်စီးမှုများ ရှိခဲ့ကြောင်း” ပြောကြားခဲ့သည်။ အခြေအနေကို သိရှိနားလည်သည့် သတင်းရင်းမြစ်တစ်ခုက CNN သို့ ပြောကြားရာတွင် ကနဦးသတင်းများ အရ ထိခိုက်ဒဏ်ရာရသူ မရှိကြောင်း သိရှိရသည်။

သံရုံးက “ပုံမှန်နှင့် အရေးပေါ် အမေရိကန်နိုင်ငံသားဝန်ဆောင်မှု ချိန်းဆိုမှု အားလုံးကို ဖျက်သိမ်းလိုက်သည်။ ဂျက်ဒါ (Jeddah)၊ ရီယတ် (Riyadh) နှင့် ဒါရန် (Dhahran) မြို့များအတွက် ထုတ်ပြန်ထားသည့် ဘေးကင်းရာ တွင် ခိုလှုံနေထိုင်ရန် (Shelter in place) အသိပေးချက်မှာ ဆက်လက် တည်ရှိနေပြီး ဆော်ဒီနိုင်ငံအတွင်းရှိ အမေရိကန်နိုင်ငံသားများ အနေဖြင့် လည်း ဘေးကင်းရာတွင် ဆက်လက်ခိုလှုံနေထိုင်ကြရန် တိုက်တွန်းပါသည်” ဟု X တွင် ရေးသားဖော်ပြထားသည်။

ထို့ပြင် အမေရိကန်နိုင်ငံသားအားလုံး ကိုယ်ပိုင်လုံခြုံရေးအစီအစဉ် ထားရှိရန် နှင့် နောက်ထပ်အကြောင်းမကြားမချင်း သံရုံးဝန်းသို့ လာရောက်ခြင်း မပြုရန်လည်း ထပ်လောင်းပြောကြားထားသည်။

အင်္ဂါနေ့ (မတ် ၃) အစောပိုင်းက ဆော်ဒီအာရေဗျစစ်တပ်သည် ရီယတ် မြို့နှင့် အလယ်ပိုင်း အယ်လ်ခါ့ဂျ် (Al Kharj) မြို့အနီးတွင် ဒရုန်း ၈ စင်းကို ကြားဖြတ်ဟန့်တား ဖျက်ဆီးနိုင်ခဲ့ကြောင်း ကာကွယ်ရေးဝန်ကြီးဌာနက ဆိုသည်။ သို့သော် အဆိုပါထုတ်ပြန်ချက်တွင် ပျက်စီးဆုံးရှုံးမှု သို့မဟုတ် ထိခိုက်သေဆုံးမှု ရှိမရှိကိုမူ ဖော်ပြထားခြင်း မရှိပေ။

ကိုးကား- CNN

Photo: A News

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ ဝန်ကြီး-၂