နည်းပညာတက္ကသိုလ် (ကျောက်ဆည်) ၌ ၂၀၂၅-၂၀၂၆ ပညာသင်နှစ် ဆောင်းရာသီ မေဂျာပေါင်းစုံ ဘောလုံးအားကစား ဗိုလ်လုပွဲကျင်းပပြီး အားကစားမျိုးစုံ ဆုပေးပွဲအခမ်းအနားကျင်းပ
News Image
ကျောက်ဆည် ဇန်နဝါရီ ၂၄
မန္တလေးဒေသကြီး၊ နည်းပညာတက္ကသိုလ်(ကျောက်ဆည်)၌ ယမန်နေ့ညနေ ၄ နာရီက ၂၀၂၅-၂၀၂၆ ပညာသင်နှစ် ဆောင်းရာသီ မေဂျာပေါင်းစုံ ဘောလုံးအားကစားဗိုလ်လုပွဲကျင်းပခဲ့ပြီး အားကစားမျိုးစုံ ဆုချီးမြှင့်ပွဲ အခမ်းအနား ကျင်းပပြုလုပ်ခဲ့ကြောင်း သိရသည်။
ဘောလုံးအားကစားပြိုင်ပွဲ ဗိုလ်လုပွဲတွင် လျှပ်စစ်စွမ်းအားမေဂျာအသင်းနှင့် မြို့ပြအင်ဂျင်နီယာ ဘောလုံးအသင်းတို့ ယှဉ်ပြိုင်ကစားခဲ့ရာ လျှပ်စစ်စွမ်းအား မေဂျာအသင်းက ၅ ဂိုး ၄ ဂိုးဖြင့် အနိုင်ရရှိသွားကြောင်း သိရှိရပြီး ပထမဆု ရရှိခဲ့သည့် လျှပ်စွမ်းအား မေဂျာအသင်းအား ရွှေဆွဲပြား၊ ဆုဒိုင်းနှင့် ငွေသားဆုများကို နည်းပညာတက္ကသိုလ် (ကျောက်ဆည်)မှ ပါမောက္ခချုပ် ဒေါက်တာခင်မောင်ချင်းက ဆုများချီးမြှင့်ခဲ့ပြီး ဒုတိယဆု ရရှိခဲ့သော မြို့ပြ အင်ဂျင်နီယာအသင်းအား ငွေဆွဲပြားနှင့် ငွေသားဆုများကို အင်ဂျင်နီယာဌာနမှ ဌာနမှူး ဒေါ်ခင်မျိုးနွဲ့ကဆုများ ချီးမြှင့်ခဲ့ကြောင်းနှင့် ပွဲစဉ်တစ်လျှောက် ရှေ့တန်း၊ အလယ်တန်း၊ နောက်တန်းနှင့် အကောင်းဆုံး ဂိုးသမားဆုများကို တာဝန်ရှိသူများက ဆုများအသီးသီး ဆုချီးမြှင့်ခဲ့ကြသည်။
ထို့နောက် နည်းပညာတက္ကသိုလ်(ကျောက်ဆည်)၏ ဆောင်းရာသီအားကစားပြိုင်ပွဲများဖြစ်သည့် အမျိုးသား ပိုက်ကျော်ခြင်း၊ E-sport၊ အမျိုးသား ဘော်လီဘော၊ အမျိုးသမီးဘော်လီဘော၊ အမျိုးသမီးဖူဆယ် ပြိုင်ပွဲများတွင် အသင်းလိုက်ဆုရရှိသွားသည့် အသင်းများနှင့် တစ်ဦးချင်းဆုရရှိသူများအား နည်းပညာတက္ကသိုလ် (ကျောက်ဆည်)မှ ဌာနမှူး ဆရာကြီး/ ဆရာမကြီးများနှင့် အားကစားကော်မတီအဖွဲ့မှ တာဝန်ရှိသူများက ဆုများ ချီးမြှင့်ခဲ့ကြောင်း သိရသည်။
သက်မောင်(ကျောက်ဆည်)
