အမေရိကန်၏ အဆိုပြုချက်အပေါ် အီရန်က အချက် ၁၄ ချက်ပါဝင်သော တုံ့ပြန်ချက်တစ်ရပ် တင်သွင်း

KookieSpace97

News Image

  • အမေရိကန်၏ အဆိုပြုချက်အပေါ် အီရန်က အချက် ၁၄ ချက်ပါဝင်သော တုံ့ပြန်ချက်တစ်ရပ် တင်သွင်း

အီရန်တော်လှန်ရေး အစောင့်တပ်ဖွဲ့ (IRGC) နှင့် ဆက်နွှယ်နေသော Tasnim သတင်းဌာန၏ စနေနေ့ (မေ ၂) ဖော်ပြချက်အရ အီရန်နိုင်ငံ သည် အမေရိကန်က ကမ်းလှမ်းထားသော အဆိုပြုချက်အပေါ် အချက် ၁၄ ချက် ပါဝင်သည့် တုံ့ပြန်ချက်တစ်ရပ်ကို တင်သွင်းခဲ့ကြောင်း သိရှိရသည်။ အီရန်၏ အဆိုပြုလွှာကို ပါကစ္စတန်နိုင်ငံမှတစ်ဆင့် ကြားခံပေးပို့ခဲ့ခြင်းဖြစ်ပြီး ထိုအဆိုပြုချက်တွင် "လက်ဘနွန်အပါအဝင် စစ်မျက်နှာအားလုံးတွင် စစ်ပွဲများရပ်စဲရန်" တောင်းဆိုထားကြောင်း Tasnim က ဖော်ပြခဲ့သည်။

အမေရိကန်ဘက်မှ နှစ်လကြာ အပစ်အခတ်ရပ်စဲရေးကို အဆိုပြုခဲ့သော်လည်း အီရန်ဘက်ကမူ ကိစ္စရပ်များကို ရက်ပေါင်း ၃၀ အတွင်း အပြီးသတ်ဖြေရှင်းသင့်သည်ဟု ယုံကြည်နေပြီး ဆွေးနွေးမှုများသည် အပစ်အခတ်ရပ်စဲရေးကို သက်တမ်းတိုးရန်ထက် စစ်ပွဲကို အပြီးတိုင် အဆုံးသတ်ရေးအပေါ်တွင်သာ အာရုံစိုက်သင့်ကြောင်း ဖော်ပြထားသည်။

အီရန်အရာရှိများကမူ ထိုတုံ့ပြန်ချက်နှင့်ပတ်သက်၍ လူသိရှင်ကြား အသေးစိတ်ထုတ်ဖော်ပြောဆိုခြင်း မရှိသေးပေ။ အမေရိကန်သမ္မတ ဒေါ်နယ်ထရမ့်က စနေနေ့ (မေ ၂) တွင် ပြောကြားရာ၌ ၎င်းအနေဖြင့် အဆိုပါ စီမံချက်ကို မကြာမီ ပြန်လည်သုံးသပ်မည်ဖြစ်သော်လည်း "လက်ခံနိုင်စရာဖြစ်လိမ့်မည်ဟု မထင်မိကြောင်း" ပြောဆိုခဲ့သည်။

ယခုတုံ့ပြန်ချက်သည် အမေရိကန်၏ အချက် ၉ ချက်ပါ အဆိုပြုချက်အပြီးတွင် ပေါ်ထွက်လာခြင်းဖြစ်ပြီး စစ်ရေးအရ ကျူးကျော်မှုများမပြုလုပ်ရန် အာမခံချက်ပေးရေးနှင့် အီရန်နိုင်ငံပတ်ဝန်းကျင်ရှိ ဒေသများမှ အမေရိကန်တပ်ဖွဲ့များ ရုပ်သိမ်းရေး စသည့်အချက်များ ပါဝင်ကြောင်း Tasnim က ဆိုသည်။

ထို့အပြင် အဆိုပါတုံ့ပြန်ချက်၌ ထိန်းချုပ်ပိတ်ဆို့ခံထားရသော အီရန်ပိုင် ပိုင်ဆိုင်မှုများကို ပြန်လည်ပေးအပ်ရန်၊ ပိတ်ဆို့အရေးယူမှုများကို ဖယ်ရှားရန် နှင့် ဟော်မုဇ်ရေလက်ကြားအတွက် ယန္တရားအသစ်တစ်ခုဖော်ဆောင်ရန် တောင်းဆိုချက်များလည်း ပါဝင်သည်။

အီရန်နိုင်ငံခြားရေးဒုဝန်ကြီး ကာဇင် ဂါရီဘာဘာဒီ (Kazem Gharibabadi) က အီရန်၏ အဆိုပြုချက်သည် စစ်ပွဲကို အပြီးတိုင်အဆုံးသတ်ရန် ရည်ရွယ်ခြင်းဖြစ်ကြောင်း အီရန်နိုင်ငံပိုင် ရုပ်သံလိုင်း IRIB သို့ ပြောကြား ခဲ့သည်။ ၎င်းက "အခုအချိန်မှာတော့ ရွေးချယ်ခွင့်ဟာ အမေရိကန်ဘက် ကို ရောက်နေပါပြီ ၊ ဒီပလိုမေစီလမ်းစဉ်ကို ရွေးမလား ဒါမှမဟုတ် ထိပ်တိုက်တွေ့တဲ့လမ်းစဉ်ကို ဆက်သွားမလားဆိုတာ သူတို့အပေါ်မှာပဲ မူတည် ပါတယ်" ဟု ပြောဆိုခဲ့သည်။

ကိုးကား- CNN

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး

MM-News-Category
နိုင်ငံရေးကဏ္ဍသတင်းများ
နိုင်ငံရေး-နိုင်ငံတကာသတင်း

ဆက်စပ်သတင်းများ

ပြည်သူ့လွှတ်တော် ဒုတိယဥက္ကဋ္ဌ ဦးမောင်မောင်အုန်း မန္တလေးတိုင်းဒေသကြီးလွှတ်တော်ဥက္ကဋ္ဌ၊ ဒုတိယဥက္ကဋ္ဌ၊ ပြည်သူ့လွှတ်တော်၊ အမျိုးသားလွှတ်တော်၊ တိုင်းဒေသကြီးလွှတ်တော်ကိုယ်စားလှယ်များနှင့် တွေ့ဆုံ
ပြည်သူ့လွှတ်တော် ဒုတိယဥက္ကဋ္ဌ ဦးမောင်မောင်အုန်း မန္တလေးတိုင်းဒေသကြီးလွှတ်တော်ဥက္ကဋ္ဌ၊ ဒုတိယဥက္ကဋ္ဌ၊ ပြည်သူ့လွှတ်တော်၊ အမျိုးသားလွှတ်တော်၊ တိုင်းဒေသကြီးလွှတ်တော်ကိုယ်စားလှယ်များနှင့် တွေ့ဆုံ
မန္တလေး မေ ၆ ပြည်သူ့လွှတ်တော် ဒုတိယဥက္ကဋ္ဌ ဦးမောင်မောင်အုန်းသည် မန္တလေးတိုင်းဒေသကြီးလွှတ်တော်ဥက္ကဋ္ဌ၊ ဒုတိယဥက္ကဋ္ဌ၊ ပြည်သူ့လွှတ်တော်၊ အမျိုးသားလွှတ်တော်၊ တိုင်းဒေသကြီး လွှတ်တော်ကိုယ်စားလှယ်များအား ယနေ့ မွန်းလွဲ ၁ နာရီ တွင် မန္တလေးမြို့ အောင်မြေသာစံမြို့နယ်ရှိ တိုင်းဒေသကြီးလွှတ်တော်ရုံး သဘင်ဆောင်၌ တွေ့ဆုံသည်။ အခမ်းအနားသို့ မန္တလေးတိုင်းဒေသကြီးဝန်ကြီးချုပ် ဦးမျိုးအောင်၊ မန္တလေးတိုင်းဒေသကြီး တိုင်းဒေသကြီး ဝန်ကြီးများ၊ တာဝန်ရှိသူများ တက်ရောက်ကြသည်။ ဦးစွာ နိုင်ငံရေးအခင်းအကျင်းအသစ်နှင့် ထွန်းလင်းတောက်ပလာမည့်  မြန်မာ့အနာဂတ် Video Clip ကို ဖွင့်လှစ်ပြသသည်။ ထို့နောက် ပြည်သူ့လွှတ်တော် ဒုတိယဥက္ကဋ္ဌ ဦးမောင်မောင်အုန်းက အဖွင့်အမှာစကား ပြောကြားပြီး တိုင်းဒေသကြီးလွှတ်တော်ဥက္ကဋ္ဌ ဦးအောင်ကျော်မိုးက ရှင်းလင်းတင်ပြသည်။ ဆက်လက်၍ လွှတ်တော်ကိုယ်စားလှယ်များက ဆွေးနွေးတင်ပြကြရာ ပြည်သူ့လွှတ်တော် ဒုတိယဥက္ကဋ္ဌက နိုင်ငံရေးအခင်းအကျင်းသစ်နှင့် နိုင်ငံတော်ဖွံ့ဖြိုးတိုးတက်ရေး ဆောင်ရွက်နေချိန်အတွင်း အုပ်ချုပ်ရေးမဏ္ဍိုင်၊ ဥပဒေပြုရေးမဏ္ဍိုင်နှင့် တရားစီရင်ရေးမဏ္ဍိုင်၊ မဏ္ဍိုင်ကြီး (၃) ရပ် ညှိနှိုင်းပေါင်းစပ်ဆောင်ရွက်ပြီး နိုင်ငံတော်၊ လွှတ်တော်များနှင့် ပြည်သူလူထုပူးပေါင်း၍ နိုင်ငံတော် ဖွံ့ဖြိုးတိုးတက်ရေးအတွက် ကြိုးစားဆောင်ရွက်သွားရေး၊ ယခုဖြစ်ပေါ်နေသည့် နိုင်ငံရေးအခြေ အနေများ၏ အားသာချက်၊ အားနည်းချက်များကို ဖော်ထုတ်ပြီး နိုင်ငံတော်နှင့်အစိုးရ၊ ပြည်သူတို့၏ အကျိုးစီးပွားဖြစ်ထွန်းစေရန်အတွက် ကိုယ်စွမ်းဉာဏ်စွမ်းရှိသမျှ မဲဆန္ဒရှင်ပြည်သူတို့၏ လိုအပ်ချက်များကို ဖြည့်ဆည်းဆောင်ရွက်သွားရေးတို့နှင့် စပ်လျဉ်း၍ ပြန်လည်ရှင်းလင်းဆွေးနွေးသည်။ ယင်းနောက် ပြည်သူ့လွှတ်တော် ဒုတိယဥက္ကဋ္ဌ ဦးမောင်မောင်အုန်းသည် တိုင်းဒေသကြီးလွှတ်တော်အစည်းအဝေးခန်းမအား လှည့်လည်ကြည့်ရှုကာ အခမ်းအနားသို့ တက်ရောက်လာကြသူများအား ရင်းရင်းနှီးနှီးနှုတ်ဆက်ခဲ့ကြောင်း သိရသည်။ မြင့်မော်ထွန်း(ပြန်/ဆက်)MDN
Thu, 7-May-2026
ဟန်တာဗိုင်းရပ်စ် (Hantavirus) ကူးစက်မှုဖြစ်ပွားခဲ့သည့် အပျော်စီးသင်္ဘောအား အာဖရိက ရေပိုင်နက်အတွင်းမှ ထွက်ခွာခွင့်ပြု
ဟန်တာဗိုင်းရပ်စ် (Hantavirus) ကူးစက်မှုဖြစ်ပွားခဲ့သည့် အပျော်စီးသင်္ဘောအား အာဖရိက ရေပိုင်နက်အတွင်းမှ ထွက်ခွာခွင့်ပြု
သံသယဖြစ်ဖွယ် ဟန်တာဗိုင်းရပ်စ် (Hantavirus) ကူးစက်မှုကြောင့် လူ ၃ ဦး သေဆုံးခဲ့သည့် အပျော်စီးသင်္ဘောအား ဆိပ်ကမ်းကပ်ခွင့်ပြုလိုက်ပြီ ဖြစ်ရာ စပိန်နိုင်ငံ၊ ကနေရီကျွန်းစု (Canary Islands) သို့ ဦးတည် ထွက်ခွာတော့မည်ဖြစ်ကြောင်း စပိန်အစိုးရက အတည်ပြု ပြောကြားခဲ့သည်။အင်္ဂါနေ့ (မေ ၅) က ထုတ်ပြန်ခဲ့သည့် မက်ဒရစ်အစိုးရ၏  ထုတ်ပြန်ချက်အရ ထိုလုပ်ဆောင်ချက်သည် ကမ္ဘာ့ကျန်းမာရေးအဖွဲ့ (WHO) ၏ တောင်းဆိုချက်အရ ဥရောပသမဂ္ဂ (EU) နှင့် ညှိနှိုင်းဆောင်ရွက်ခြင်းဖြစ်ပြီး နိုင်ငံတကာဥပဒေနှင့် လူသားချင်းစာနာထောက်ထားမှုဆိုင်ရာ မူဝါဒများနှင့်အညီ ဆောင်ရွက်ခြင်းဖြစ်ကြောင်း သိရှိရသည်။ အဆိုပါ သင်္ဘောသည် လက်ရှိတွင် ကိပ်ဗာဒီ (Cape Verde) ကျွန်းစုအနီးတွင် ရောက်ရှိနေသော်လည်း ကိပ်ဗာဒီနိုင်ငံအနေဖြင့် ထိုကဲ့သို့သော အခြေအနေကို ကိုင်တွယ်ဖြေရှင်းနိုင်စွမ်းမရှိသည့်အတွက် ကနေရီကျွန်းစုသည် လိုအပ်သော စွမ်းဆောင်ရည်ရှိသည့် အနီးဆုံးနေရာဖြစ်ကြောင်း စပိန် အစိုးရက ဆိုသည်။ဒတ်ချ်အလံလွှင့်ထူထားသော MV Hondius သင်္ဘောသည် မတ်လအတွင်းက အာဂျင်တီးနားနိုင်ငံ၊ အူရူဝါယာ (Ushuaia) မြို့မှ စတင်ထွက်ခွာလာခြင်းဖြစ်ပြီး အန္တာတိတ်ဒေသ၊ ဖော့ကလန်ကျွန်းစု (Falkland Islands) နှင့် အခြားနေရာများသို့ ဝင်ရောက်ခဲ့သည်။ ထိုခရီးစဉ်အတွင်း လူအများအပြား နေမကောင်းဖြစ်ပွားခဲ့ပြီးနောက် ကိပ်ဗာဒီကျွန်းစုအနီးတွင် ကျောက်ချရပ်နားထားခဲ့ခြင်းဖြစ်သည်။ကျန်းမာရေးတာဝန်ရှိသူများ၏ ပြောကြားချက်အရ သင်္ဘောပေါ်တွင် နိုင်ငံပေါင်း ၂၃ နိုင်ငံမှ ခရီးသည်နှင့် သင်္ဘောသား စုစုပေါင်း ၁၄၇ ဦး လိုက်ပါလာကြောင်း သိရှိရသည်။“ဧပြီလ ၁ ရက်နေ့ သင်္ဘောစတင်ထွက်ခွာချိန်ကစပြီး လူပေါင်း ၁၄၇ ဦး အနက် ၇ ဦး နေမကောင်းဖြစ်ခဲ့ပါတယ်၊ အဲဒီအထဲမှာ ၃ ဦး သေဆုံးခဲ့ပြီး ၁ ဦးက စိုးရိမ်ရတဲ့အခြေအနေမှာရှိနေကာ ကျန်တဲ့ ၃ ဦးကတော့ ရောဂါလက္ခဏာအနည်းငယ်ပဲ ပြသနေပါတယ်” ဟု WHO က ပြောကြားခဲ့သည်။ဟန်တာဗိုင်းရပ်စ် ပျံ့နှံ့ပုံနှင့်ပတ်သက်သော လက်ရှိသတင်းအချက်အလက်များအရ ထိုကူးစက်မှုသည် ကမ္ဘာလုံးဆိုင်ရာလူဦးရေအပေါ် ရိုက်ခတ်နိုင်ခြေ အန္တရာယ်နည်းပါးကြောင်း ကုလသမဂ္ဂကျန်းမာရေးအဖွဲ့က ဆိုပါသည်။ကိုးကား- RTဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး
Wed, 6-May-2026
Project Freedom စစ်ဆင်ရေးကို ရပ်တန့်ထားစဉ် အီရန်က ဟော်မုဇ် ရေလက်ကြားအတွက် စည်းမျဉ်းသစ်များ ထုတ်ပြန်လိုက်ကြောင်း မီဒီယာ များ ဖော်ပြ
Project Freedom စစ်ဆင်ရေးကို ရပ်တန့်ထားစဉ် အီရန်က ဟော်မုဇ်ရေလက်ကြားအတွက် စည်းမျဉ်းသစ်များ ထုတ်ပြန်လိုက်ကြောင်း မီဒီယာများ ဖော်ပြ
မဟာဗျူဟာမြောက် အချက်အချာကျသော ရေလမ်းကြောင်းနှင့်ပတ်သက်၍ အမေရိကန်နှင့် တင်းမာမှုများ ဆက်ရှိနေစဉ်အတွင်း ဟော်မုဇ်ရေလက်ကြား ကို ဖြတ်သန်းသွားလာနေသည့် ရေကြောင်းသွားလာမှုများကို ကြီးကြပ်ကွပ်ကဲရန် ယန္တရားသစ်တစ်ခုကို အီရန်က တရားဝင် စတင် လိုက်ကြောင်း နိုင်ငံပိုင် Press TV က အင်္ဂါနေ့ (မေ ၅) တွင် သတင်းထုတ်ပြန်ခဲ့သည်။အနောက်နိုင်ငံအလံတင် သင်္ဘောများကို ရေလက်ကြားအတွင်း စစ်တပ်က လိုက်ပါစောင့်ရှောက်ပေးသည့် ‘Project Freedom’ စစ်ဆင်ရေးကို အမေရိကန်သမ္မတ ဒေါ်နယ်ထရမ့်က စတင်ပြီးနှစ်ရက်အကြာတွင် မမျှော်လင့်ဘဲ ပြန်လည်ရပ်တန့်လိုက်ပြီးနောက် နာရီပိုင်းအတွင်း အီရန်၏ ယခု ခြေလှမ်းထွက်ပေါ်လာခြင်းဖြစ်သည်။ကမ္ဘာ့ရေကြောင်းရေနံနှင့် သဘာဝဓာတ်ငွေ့ရည် (LNG) ကုန်သွယ်မှု ငါးပုံတစ်ပုံခန့် စီးဆင်းရာ ၎င်းရေလက်ကြားသည် ဖေဖော်ဝါရီလ နှောင်းပိုင်း တွင် အမေရိကန်နှင့် အစ္စရေးတို့က အီရန် အပေါ် တိုက်ခိုက်မှုများ ပြုလုပ်ခဲ့ပြီးကတည်းက လက်တွေ့တွင် ပိတ်ဆို့ခြင်းခံထားရသည်။အီရန်တပ်ဖွဲ့များသည် အမေရိကန်နှင့် အစ္စရေးတို့နှင့် ဆက်နွှယ်နေသောသင်္ဘောများအပြင် တီဟီရန်အပေါ် အရေးယူမှုများကို ထောက်ခံသည့် အနောက်နိုင်ငံများမှ သင်္ဘောများကိုလည်း ဖြတ်သန်းခွင့် ပိတ်ပင်ထားသည်။ တစ်ဖက်တွင်လည်း အမေရိကန်က အီရန်ဆိပ်ကမ်းများကို ဝိုင်းရံပိတ်ဆို့ထားသဖြင့် ရေနံတင်သင်္ဘောများမှာ နှစ်လကျော်ကြာ သောင်တင်နေခဲ့သည်။ဝါရှင်တန်နှင့် တီဟီရန်တို့သည် ရေလက်ကြား၏ အနာဂတ် အခြေအနေနှင့်ပတ်သက်၍ သဘောထားကွဲလွဲနေဆဲဖြစ်ပြီး ငြိမ်းချမ်းရေးဆွေးနွေးပွဲ များတွင် အီရန်က နောက်ဆုံးတင်ပြခဲ့သည့် အုပ်ချုပ်မှုယန္တရားဆိုင်ရာ အဆိုပြုချက်ကို အမေရိကန်က ပယ်ချခဲ့ကြောင်း သတင်းများတွင် ဖော်ပြ ထားသည်။သတင်းဖော်ပြချက်များအရ အီရန်၏ စီမံချက်အသစ်အောက်တွင် ရေလက်ကြားကို ဖြတ်သန်းလိုသည့် သင်္ဘောများသည် အသစ်ဖွဲ့စည်းလိုက်သော "ပါရှန်ပင်လယ်ကွေ့ ရေလက်ကြားအာဏာပိုင်အဖွဲ့" (Persian Gulf Strait Authority) ထံမှ ဖြတ်သန်းခွင့်ဆိုင်ရာ စည်းမျဉ်းစည်းကမ်းများကို အီးမေးလ်မှတစ်ဆင့် လက်ခံရရှိမည်ဖြစ်သည်။ သင်္ဘောများအနေဖြင့် ဖြတ်သန်းခွင့်လက်မှတ် (Permit) ရရှိရန်အတွက် အီးမေးလ်တွင် တောင်းဆိုထားသည့်အတိုင်း လုပ်ငန်းဆောင်ရွက်မှုများကို ပြုပြင်ပြောင်းလဲရမည်ဖြစ်သည်။ သို့သော် ခွင့်ပြုချက်ရရှိရန် လိုအပ်ချက်များမှာ မည်သည်တို့ ဖြစ်သည်ကိုမူ သတင်းတွင် ဖော်ပြထားခြင်း မရှိပေ။တီဟီရန်အစိုးရက ထိုအသေးစိတ်အချက်အလက်များကို တရားဝင် အတည်ပြုခြင်းမရှိသေးသော်လည်း လွှတ်တော်ဥက္ကဋ္ဌ မိုဟာမက် ဘာဂါ ဂါလီဘတ်ဖ် (Mohammad Bagher Ghalibaf) က "ဟော်မုဇ် ရေလက်ကြားအတွက် စနစ်သစ်သည် ခိုင်မာလာသည့်အဆင့်တွင် ရှိနေသည်" ဟု ၎င်း၏ X အကောင့်တွင် ရေးသားထားသည်။အီရန်လွှတ်တော်အတွင်း တင်သွင်းမည့်ဥပဒေမူကြမ်းတွင်မူ အစ္စရေးနှင့် ဆက်နွှယ်သည့် သင်္ဘောများကို ရေလက်ကြားမှဖြတ်သန်းခွင့် လုံးဝ ပိတ်ပင်ရန်၊ အမေရိကန်နှင့်ဆက်နွှယ်သည့် သင်္ဘောများကို တင်းကျပ်စွာ ကန့်သတ်ရန်နှင့် အီရန်အပေါ် ရန်လိုခြင်းမရှိသည့်နိုင်ငံများမှ သင်္ဘော များထံမှ ဖြတ်သန်းခ (Transit Fees) ကောက်ခံရန် စသည့်အချက်များ ပါဝင်နေကြောင်း သတင်းများက ဆိုသည်။ကိုးကား- RTဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး
Wed, 6-May-2026
အစ္စရေး၏ နျူကလီးယား လျှို့ဝှက်ချက်များကို ထုတ်ဖော်ရန် ဒီမိုကရက်များက ထရမ့်အား တိုက်တွန်း
အစ္စရေး၏ နျူကလီးယား လျှို့ဝှက်ချက်များကို ထုတ်ဖော်ရန် ဒီမိုကရက်များက ထရမ့်အား တိုက်တွန်း
အမေရိကန် အောက်လွှတ်တော်မှ ဒီမိုကရက်တစ် အမတ် ၃၀ ပါဝင်သော အဖွဲ့တစ်ဖွဲ့သည် သမ္မတ ဒေါ်နယ်ထရမ့်၏ အစိုးရအနေဖြင့် အစ္စရေး၏ နျူကလီးယားလက်နက်တိုက်နှင့် သက်ဆိုင်ရာမူဝါဒများကို ထုတ်ဖော်ကြေညာရန် တောင်းဆိုလိုက်ကြသည်။ ပွင့်လင်းမြင်သာမှုမရှိခြင်းသည် အရှေ့အလယ်ပိုင်း ဒေသတစ်ခုလုံးကို ခြိမ်းခြောက်နေကြောင်း အဆိုပါ အမတ်များက အကြောင်းပြချက်ပေးထားသည်။အစ္စရေးနိုင်ငံသည် ၎င်းတို့တွင် နျူကလီးယားလက်နက် ရှိသည်၊ မရှိသည် ကို အတည်ပြုခြင်း သို့မဟုတ် ငြင်းဆိုခြင်း တစ်စုံတစ်ရာ ပြုလုပ်ခြင်းမရှိ သကဲ့သို့ အဆိုပါလက်နက်များကို အသုံးပြုလာနိုင်သည့်အခြေအနေ သို့မဟုတ် နောက်ဆုံးသတ်မှတ်ချက် (Red lines) များနှင့်ပတ်သက်သော မူဝါဒများကိုလည်း လူသိရှင်ကြားတင်ပြထားခြင်း မရှိပေ။ အမေရိကန် သည် ၁၉၆၀ ပြည့်နှစ်များ အစောပိုင်းကတည်းက အစ္စရေး၏ နျူကလီးယား အစီအစဉ်ကို သိရှိထားသော်လည်း ထိုကိစ္စနှင့်ပတ်သက်၍ ယနေ့ထက်တိုင် နှုတ်ဆိတ်နေခဲ့သည်။ဒီမိုကရက်တစ် ကိုယ်စားလှယ် ဂျိုအာကင် ကက်စထရို (Joaquin Castro) ဦးဆောင်သော ကွန်ဂရက်လွှတ်တော် အမတ်များသည် နိုင်ငံခြားရေးဝန်ကြီး မာကို ရူဘီယို (Marco Rubio) ထံသို့ ပေးပို့သောစာတွင်"အမေရိကန် အစိုးရအနေဖြင့် တရားဝင်အသိအမှတ်ပြုရန် ငြင်းဆိုထားသော နျူကလီးယားလက်နက် အစီအစဉ်ရှိသည့် နိုင်ငံတစ်နိုင်ငံနှင့်ယှဉ်တွဲကာ တိုက်ပွဲဝင်နေရသည်" ဟု ဖော်ပြထားသည်။ထို့အပြင် ၎င်းတို့၏စာတွင် "ယခုကဲ့သို့သော ပတ်ဝန်းကျင်တွင် အခြေအနေကို မှားယွင်းတွက်ချက်မိခြင်း၊ ပဋိပက္ခများ ပိုမိုပြင်းထန်လာခြင်းနှင့် နျူကလီးယား အသုံးပြုမိနိုင်သည့် အန္တရာယ်များသည် စာအုပ်ကြီးထဲက သီအိုရီသက်သက် မဟုတ်တော့ပါ" ဟု သတိပေးရေးသားထားသည်။ကိုးကား- RTဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး
Wed, 6-May-2026
ဂျာမနီနိုင်ငံတွင် နာဇီဝါဒကင်းစင်ရေးလုပ်ငန်းစဉ် အောင်မြင်မှုမရှိခဲ့ကြောင်း ရုရှား လုံခြုံရေးကောင်စီအကြီးအကဲ ဝေဖန်
ဂျာမနီနိုင်ငံတွင် နာဇီဝါဒကင်းစင်ရေးလုပ်ငန်းစဉ် အောင်မြင်မှုမရှိခဲ့ကြောင်း ရုရှား လုံခြုံရေးကောင်စီအကြီးအကဲ ဝေဖန်
ဒုတိယကမ္ဘာစစ်အပြီး ဂျာမနီနိုင်ငံတွင် နာဇီဝါဒအမြစ်ပြတ်စေရေး ရှင်းလင်းသည့်လုပ်ငန်းစဉ် (Denazification) မှာ တစ်ခါမျှ ပြီးဆုံးအောင်မြင်ခဲ့ခြင်း မရှိကြောင်း ရုရှားလုံခြုံရေးကောင်စီအကြီးအကဲ ဒီမီထရီ မက်ဗီဒက်ဗ်က ပြင်းပြင်းထန်ထန် ဝေဖန်လိုက်သည်။နာဇီဂျာမနီကို အောင်နိုင်ခြင်း ၈၁ နှစ်ပြည့် အထိမ်းအမှတ်အဖြစ်ရေးသားသည့် ၎င်း၏ဆောင်းပါးတွင် အနောက်အင်အားကြီး နိုင်ငံများသည် နာဇီစစ်ရာဇဝတ်မှုကျူးလွန်သူများကို အပြစ်ပေးမည့်အစား ၎င်းတို့ကို အကာအကွယ်ပေးကာ အသုံးချခဲ့ကြကြောင်း၊ အထူးသဖြင့် စစ်ဘက် စီးပွားရေးခေါင်းဆောင်များနှင့် နာဇီထိပ်သီးပိုင်းများကို လွှတ်ပေးပြီးအောက်ခြေအဆင့်များကိုသာ အရေးယူပြသည့် ဟန်ပြလုပ်ရပ်များသာ လုပ်ဆောင်ခဲ့ကြောင်း ဖော်ပြထားသည်။ရုရှားနိုင်ငံခြားရေးဝန်ကြီးဌာန ပြောရေးဆိုခွင့်ရှိသူ မာရီယာ ဇာခါရိုဗာ ကလည်း အနောက်နိုင်ငံအချို့သည် ဒုတိယကမ္ဘာစစ်၏ ရလဒ်များနှင့် နျူရင်ဘတ်ခုံရုံး၏ ဆုံးဖြတ်ချက်များကို လက်ခံရန်ငြင်းဆန်နေကြပြီး ဆိုဗီယက်ယူနီယံ၏ အောင်ပွဲကို ပြင်ဆင်ရမည့် အမှားတစ်ခုအဖြစ် ရှုမြင်နေကြသည်ဟု ဆိုသည်။ ထို့ပြင် ရုရှားနိုင်ငံခြားထောက်လှမ်းရေးဌာန (SVR) ကလည်း လက်ရှိ ဂျာမနီ အစိုးရအတွင်း၌ပင် နာဇီခေတ် နာကျည်းချက်များအပေါ်အခြေခံ၍ ရုရှား အပေါ် လက်စားချေလိုသည့် စိတ်ဓာတ်များရှိနေကြောင်း ထောက်ပြထားသည်။အနောက်အုပ်စုအနေဖြင့် သမိုင်းကိုပုံဖျက်ရန် ကြိုးပမ်းနေကြောင်းနှင့် ဇီဝါဒအကြွင်းအကျန်များကို ဆက်လက်ရှင်သန်ခွင့်ပေးထားခြင်းကြောင့် မျိုးဆက်သစ်များအထိ အန္တရာယ်ရှိနေကြောင်း မော်စကိုက သတိပေးစွပ်စွဲထားသည်။ကိုးကား- RTဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး
Wed, 6-May-2026
ဟော်မုဇ်ရေလက်ကြား စစ်ဆင်ရေးကို ထရမ့် ခေတ္တရပ်နားသော်လည်း အီရန် အပေါ် ပိတ်ဆို့မှုများ ဆက်လက်ထားရှိမည်
ဟော်မုဇ်ရေလက်ကြား စစ်ဆင်ရေးကို ထရမ့် ခေတ္တရပ်နားသော်လည်း အီရန် အပေါ် ပိတ်ဆို့မှုများ ဆက်လက်ထားရှိမည်
အမေရိကန်သမ္မတ ဒေါ်နယ်ထရမ့်သည် ဟော်မုဇ်ရေလက်ကြားအတွင်း ကုန်တင်သင်္ဘောများကို အမေရိကန်စစ်တပ်က လိုက်ပါစောင့်ရှောက်ပေးသည့် "Project Freedom" စစ်ဆင်ရေးကို ခေတ္တရပ်နားလိုက်ကြောင်း Truth Social မှတစ်ဆင့် ရုတ်တရက်ကြေညာခဲ့သည်။ ယခုကဲ့သို့ ရပ်နားရခြင်းမှာ ပါကစ္စတန်အပါအဝင် အခြားနိုင်ငံများ၏ တောင်းဆိုချက်နှင့် အီရန်ကိုယ်စားလှယ်များနှင့် ဆွေးနွေးမှုတွင် တိုးတက်မှုများရှိနေခြင်းကြောင့် ဖြစ်ကြောင်း သိရှိရသည်။ သို့သော်လည်း အီရန် ဆိပ်ကမ်းများကို ရေတပ်ဖြင့် ပိတ်ဆို့ထားမှုမှာမူ နောက်ဆုံး သဘောတူညီချက် မရရှိမချင်း အရှိန်အဟုန်မပျက် ဆက်လက်ရှိနေမည်ဟု ထရမ့် က အခိုင်အမာ ပြောကြားခဲ့သည်။အဆိုပါ ဆုံးဖြတ်ချက်သည် အမေရိကန် အစိုးရအဖွဲ့အတွင်း၌ပင် အံ့အားသင့်စရာ ဖြစ်ခဲ့ရသည်။ စစ်မက်ရေးရာဝန်ကြီး ပိဟက်ဆက်သည် ကြေညာချက် မထွက်မီ နာရီပိုင်းအလိုအထိ Project Freedom ၏ အောင်မြင်မှုကြောင့် အီရန်မှာအရှက်ရနေပြီး ကမ္ဘာတစ်ဝှမ်းမှ သင်္ဘောရာပေါင်းများစွာသည် အမေရိကန်၏ လမ်းပြစောင့်ရှောက်မှုကိုခံယူရန် တန်းစီနေကြကြောင်း ဂုဏ်ယူဝင့်ကြွားစွာ ပြောဆိုခဲ့သည်။အလားတူ နိုင်ငံခြားရေးဝန်ကြီး မာကိုရူဘီယိုကလည်း မူလစစ်ဆင်ရေး (Epic Fury) ပြီးဆုံးပြီးနောက် အဆိုပါစီမံကိန်းအသစ်သို့ ကူးပြောင်းနေပြီ ဖြစ်ကြောင်း သတင်းထောက်များကို ရှင်းလင်းပြောကြားခဲ့သည်။ဟော်မုဇ်ရေလက်ကြားသည် ဖေဖော်ဝါရီလအတွင်း အမေရိကန်နှင့် အစ္စရေးတို့၏ အီရန်အပေါ် တိုက်ခိုက်မှုများနောက်ပိုင်း တင်းမာမှု၏ ဗဟိုချက် ဖြစ်လာခဲ့သည်။ အမေရိကန်က ၎င်းတို့၏ မစ်ရှင်ကို နှောင့်ယှက်သည့် အီရန်ရေယာဉ်ငယ်များကို ဖျက်ဆီးခဲ့သည်ဟု ဆိုသော်လည်း အီရန် ဘက်ကမူ ယင်းကို ငြင်းဆိုကာ အမေရိကန်သင်္ဘောများအနီး သတိပေးပစ်ခတ်မှုများ ပြုလုပ်ခဲ့ကြောင်း တုံ့ပြန်ပြောကြားခဲ့သည်။ အီရန်နိုင်ငံခြားရေးဝန်ကြီး အဘတ်အာရက်ချီကလည်း Project Freedom သည် အကျပ်အတည်းဆိုက်နေသည့် စီမံကိန်းဖြစ်ကြောင်း လှောင်ပြောင်ခဲ့ပြီး အမေရိကန်အနေဖြင့် နွံအတွင်းပြန်မနစ်စေရန် သတိပေးခဲ့သည်။လက်ရှိတွင် နှစ်ဦးနှစ်ဖက်သဘောတူညီချက်အရ သင်္ဘောစောင့်ရှောက်ရေးလုပ်ငန်းများကို ခေတ္တဆိုင်းငံ့ထားခြင်းမှာ ဆွေးနွေးညှိနှိုင်းသူများအနေဖြင့် ပြီးပြည့်စုံပြီး နောက်ဆုံးသဘောတူညီချက်တစ်ရပ်ရရှိနိုင်ရန် အချိန်ပေးသည့်အနေဖြင့် ရည်ရွယ်ခြင်းဖြစ်ကြောင်း သမ္မတ ထရမ့်က ရှင်းလင်းပြောကြားထားသည်။ကိုးကား- RTဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး
Wed, 6-May-2026
© Copyright 2024 SAC All Rights Reserved.