နိုင်ငံရေးတင်းမာမှုများကြောင့် ဂျပန်သို့ တရုတ်ခရီးသွားဝင်ရောက်မှု ထိုးဆင်းသွားပြီး (၄) နှစ်အတွင်း ပထမဆုံးအကြိမ် ခရီးသွားဦးရေ လျော့ကျ

KookieSpace97

News Image

  • နိုင်ငံရေးတင်းမာမှုများကြောင့် ဂျပန်သို့ တရုတ်ခရီးသွားဝင်ရောက်မှု ထိုးဆင်းသွားပြီး (၄) နှစ်အတွင်း ပထမဆုံးအကြိမ် ခရီးသွားဦးရေ လျော့ကျ

ဂျပန်နိုင်ငံသို့ နိုင်ငံခြားသားခရီးသွားဝင်ရောက်မှုသည် ယခုနှစ် ဇန်နဝါရီလအတွင်း ယခင်နှစ်ကာလတူထက် ၄.၉ ရာခိုင်နှုန်းလျော့ကျသွားပြီး ၂၀၂၂ ခုနှစ်နောက်ပိုင်း (၄) နှစ်အတွင်း ပထမဆုံးအကြိမ်အဖြစ် ကျဆင်းမှုကို ကြုံတွေ့ခဲ့ရသည်။ ဂျပန်အမျိုးသားခရီးသွားလုပ်ငန်းအဖွဲ့ (JNTO) ၏ ထုတ်ပြန်ချက်အရ ပြီးခဲ့သည့်လက ဝင်ရောက်သူစုစုပေါင်း ၃.၆ သန်း ရှိခဲ့သည်။ ထိုကဲ့သို့ ကျဆင်းရခြင်း၏ အဓိကအကြောင်းရင်းမှာ အာရှ အင်အားကြီးနှစ်နိုင်ငံကြား နိုင်ငံရေးတင်းမာမှုများကြောင့် တရုတ် ခရီးသွား ဝင်ရောက်မှု ၆၁ ရာခိုင်နှုန်း (၃၈၅,၃၀၀ ဦး) အထိ သိသိသာသာ ထိုးဆင်းသွားခြင်းကြောင့် ဖြစ်သည်။

အဆိုပါ တင်းမာမှုမှာ ထိုင်ဝမ်အရေးနှင့်ပတ်သက်၍ ဂျပန်ဝန်ကြီးချုပ် ဆာနာအဲ တာကာအီချီ၏ မှတ်ချက်စကားများအပေါ် တရုတ်အစိုးရက မကျေနပ်ရာမှ စတင်ခဲ့ခြင်းဖြစ်သည်။ ဝန်ကြီးချုပ်က ထိုင်ဝမ်အပေါ် တရုတ်၏တိုက်ခိုက်မှုသည် ဂျပန်အတွက် ‘တည်ရှိမှုကို ခြိမ်းခြောက်သည့် အခြေအနေ’ ဖြစ်လာနိုင်ကြောင်း ပြောကြားခဲ့ပြီးနောက်၊ ပေကျင်း အစိုးရက ၎င်း၏နိုင်ငံသားများကို ဂျပန်သို့မသွားရောက်ရန် တိုက်တွန်း ခဲ့သည်။ ထို့အပြင် ယခင်နှစ်က ဇန်နဝါရီလတွင်ကျရောက်ခဲ့သော တရုတ် နှစ်သစ်ကူးအားလပ်ရက်သည် ယခုနှစ်တွင် ဖေဖော်ဝါရီလလယ်သို့ ပြောင်းလဲသွားခြင်းကလည်း ခရီးသွားဦးရေလျော့ကျရခြင်း၏ အကြောင်းရင်း တစ်ခု ဖြစ်ခဲ့သည်။

သို့သော်လည်း အခြားတစ်ဖက်တွင်မူ တောင်ကိုရီးယားနိုင်ငံမှ ခရီးသွား ဝင်ရောက်မှုမှာ ၂၂ ရာခိုင်နှုန်း တိုးတက်လာပြီး ၁.၁၈ သန်းအထိ ရှိခဲ့ရာ ၎င်းသည် တစ်လအတွင်း နိုင်ငံတစ်ခုတည်းမှ ခရီးသွား ၁.၁ သန်း ကျော် လွန်သည့် ပထမဆုံးသောစံချိန်သစ်တစ်ခု ဖြစ်လာခဲ့သည်။ ထို့အတူ ထိုင်ဝမ်၊ အမေရိကန်၊ ထိုင်းနှင့် စင်ကာပူနိုင်ငံတို့မှ ခရီးသွားများလည်း ဆက်လက်တိုးတက်လျက်ရှိရာ တရုတ်ခရီးသွား လျော့နည်းမှုကြောင့်ဖြစ်ပေါ်လာသည့် လစ်ဟာမှုကို အတိုင်းအတာတစ်ခုအထိ ပြန်လည် ဖြည့်ဆည်းပေးနိုင်ခဲ့သည်။

စီးပွားရေးပညာရှင်များကမူ တရုတ်ခရီးသွားများ ပြန်လည်ဝင်ရောက်ရန် အချိန်ယူရဦးမည်ဖြစ်ပြီး၊ အဆိုပါ အခြေအနေ ရှည်ကြာသွားပါက ၂၀၂၅ ခုနှစ် ခရီးသွားများ၏သုံးစွဲမှု ၂၁.၂ ရာခိုင်နှုန်း ကို ပံ့ပိုးပေးထားသည့် တရုတ်ခရီးသွားများမရှိခြင်းကြောင့် ဂျပန်စီးပွားရေးအပေါ် ထိခိုက်မှု ကြီးမားနိုင်ကြောင်း သတိပေးထားသည်။ သို့သော် လတ်တလောတွင် အာဆာကူဆာကဲ့သို့သော ကမ္ဘာလှည့်ခရီးသွားနယ်မြေများရှိ လုပ်ငန်းရှင်များမှာမူ အခြားနိုင်ငံစုံမှ ဧည့်သည်များကြောင့် လုပ်ငန်းလည်ပတ်မှု ပုံမှန်ရှိနေဆဲဖြစ်ကြောင်း သိရှိရသည်။

ကိုးကား- Bangkok Post 

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ ဝန်ကြီး - ၂

MM-News-Category
စီးပွားရေးကဏ္ဍသတင်း
စီးပွားရေး-နိုင်ငံတကာသတင်း

ဆက်စပ်သတင်းများ

သာပေါင်းမြို့နယ်၌ ဆောင်းသီးနှံ စိုက်ပျိုးရာသီက စိုက်ပျိုးခဲ့သော မတ်ပဲ ဧက ၄၇၀၀ ကျော် ရိတ်သိမ်းပြီးစီး
သာပေါင်းမြို့နယ်၌ ဆောင်းသီးနှံ စိုက်ပျိုးရာသီက စိုက်ပျိုးခဲ့သော မတ်ပဲ ဧက ၄၇၀၀ ကျော် ရိတ်သိမ်းပြီးစီး
သာပေါင်း  ဧပြီ   ၂     ဧရာဝတီတိုင်းဒေသကြီး ပုသိမ်ခရိုင်  သာပေါင်း မြို့နယ်၌ ဆောင်းသီးနှံစိုက်ပျိုးရာသီက  စိုက်ပျိုးခဲ့ သော  မတ်ပဲ  ဧက ၄၇၀၀ ကျော် ရိတ်သိမ်းပြီးစီးပြီ ဖြစ်ကြောင်း သိရသည်။သာပေါင်းမြို့နယ်၌  ဆောင်းသီးနှံစိုက်ပျိုးရာသီက  မတ်ပဲ ၁၆၅၇၁ ဧက စိုက်ပျိုးနိုင်ခဲ့ကြောင်း၊  အဆိုပါ စိုက်ပျိုးခဲ့သောမတ်ပဲများကို ပြီးခဲ့သည့် ဖေဖော်ဝါရီလ ဒုတိယပတ်က   စတင်ရိတ်သိမ်းခဲ့ရာ  လက်ရှိတွင် ၄၇၁၅ ဧက  ရိတ်သိမ်းပြီးစီးပြီဖြစ်ကြောင်း သိရသည်။''သာပေါင်းမြို့နယ်မှာ   ဆောင်းသီးနှံစိုက်ပျိုးရာသီ က  မတ်ပဲ ၁၆၅၇၁ ဧက  စိုက်ပျိုးနိုင်ခဲ့ပါတယ်။ မတ်ပဲတွေကို ရိတ်သိမ်းနေတာ လက်ရှိမှာ    ၄၇၁၅  ဧက ရိတ်သိမ်းပြီးစီးပြီဖြစ်ပါတယ်။  စိုက်ပျိုးတဲ့သီးနှံ တွေကောင်းမွန်စေဖို့  စိုက်ပျိုးနည်းစနစ်နဲ့    တခြား လိုအပ်တာတွေကို  မြို့နယ်စိုက်ပျိုးရေး ဦးစီးဌာန အနေနဲ့ စိုက်ပျိုးရာသီအမီ ဆောင်ရွက်ပေးခဲ့ပါတယ်။  မတ်ပဲတွေ လျာထားချက်ပြည့်မီအောင်စိုက်ပျိုးနိုင်ဖို့    ဒေသခံတောင်သူတွေနဲ့     မြို့နယ်စိုက်ပျိုးရေးဦးစီး ဌာန၊     စက်မှုလယ်ယာဦးစီးဌာန၊  စီမံခန့်ခွဲရေးနှင့် အုပ်ချုပ်ရေးကော်မတီတို့   ပူးပေါင်းဆောင်ရွက်ခဲ့တာ ပါ'' ဟု  ပုသိမ်ခရိုင် စိုက်ပျိုးရေးဦးစီးဌာန  ဦးစီးမှူး ဒေါ်အေးအေးမူကပြောသည်။သာပေါင်းမြို့နယ်၌  ရိတ်သိမ်းပြီးဖြစ်သော မတ်ပဲ  တစ်ဧကလျှင် ၂၂ ဒသမ ၇၃ တင်းခန့် ထွက်ရှိကြောင်း၊   အဆိုပါမတ်ပဲများအပါအဝင်     ဆောင်းသီးနှံများ အထွက်နှုန်းကောင်းမွန်ကာ အရည်အသွေးကောင်းမွန်ကြောင်း သိရသည်။                 MWD
Fri, 3-Apr-2026
ရုရှားနိုင်ငံမှ ရေနံဝယ်ယူရေး ဂျပန်ကိုယ်စားလှယ်အဖွဲ့ ဆွေးနွေးဖွယ်ရှိ
ရုရှားနိုင်ငံမှ ရေနံဝယ်ယူရေး ဂျပန်ကိုယ်စားလှယ်အဖွဲ့ ဆွေးနွေးဖွယ်ရှိ
  တိုကျို၊ စီးပွားရေးနှင့် စွမ်းအင်ဖူလုံမှု ဂျပန်ကိုယ်စားလှယ်အဖွဲ့သည် ရုရှားနိုင်ငံမှ ရေနံဝယ်ယူရေးနှင့် စပ်လျဉ်း၍ ဆွေးနွေးနိုင်ဖွယ်ရှိကြောင်း Ryukyu Shimpo သတင်းစာက ဧပြီလ ၂ ရက်နေ့တွင် ဖော်ပြသည်။ဂျပန်ကိုယ်စားလှယ်အဖွဲ့သည် ယခုနှစ်မေလတွင် ရုရှားနိုင်ငံသို့သွားရောက်မည့် ခရီးစဉ်အတွင်း ရုရှားရေနံကို ဂျပန်သို့တင်ပို့ရောင်းချရေး ကိစ္စနှင့်စပ်လျဉ်း၍ ဆွေးနွေးရန်စီစဉ်ထားပြီး ယူကရိန်းပဋိပက္ခဖြစ်ပွား ပြီးနောက်ပိုင်းတွင် ဂျပန်ကုမ္ပဏီများအနေဖြင့် ရုရှားနိုင်ငံအတွင်း၌ ၎င်းတို့၏လုပ်ငန်းများကို အပြည့်အဝပြန်လည် စတင်နိုင်ရန်အတွက် ဂျပန်အစိုးရက စီးပွားရေး ကိုယ်စားလှယ်အဖွဲ့တစ်ဖွဲ့ကို ရုရှားနိုင်ငံသို့ စေလွှတ်ရန်  စီစဉ်နေခြင်းဖြစ်သည်ဟု အဆိုပါသတင်းစာတွင် ဖော်ပြထားသည်။ထို့ပြင် ဂျပန်ကုမ္ပဏီကြီးများဖြစ်သည့် Mitsubishi Corporation၊ Mitsui & Co. နှင့် Mitsui O.S.K. Lines အပါအဝင် အခြားဂျပန်ကုမ္ပဏီကြီးများမှ   ထိပ်တန်းအမှုဆောင် အရာရှိများကိုလည်း အဆိုပါခရီးစဉ်တွင်   ပါဝင်ရန် ဖိတ်ကြားထားကြောင်း သတင်းစာတွင် ရေးသားထားသည်။သို့သော် ရုရှားနိုင်ငံအနေဖြင့်   ရေနံစျေးနှုန်းအပေါ် ကန့်သတ်ချက် ချမှတ်ထားမှုကို ထောက်ခံအားပေးသော ဂျပန်နှင့်အခြားနိုင်ငံများသို့ ရေနံတင်ပို့ရောင်းချမည် မဟုတ်ကြောင်း ရုရှားနိုင်ငံခြားရေး ဝန်ကြီးဌာနမှ ဒုတိယဝန်ကြီး အန်ဒရေရူဒင်ကိုက မတ်လ ၃၁ ရက်နေ့တွင် ပြောကြားထားကြောင်းသိရသည်။       MWD
Fri, 3-Apr-2026
အရှေ့အလယ်ပိုင်း ပဋိပက္ခများကြောင့် ဥရောပရှိပျမ်းမျှ သဘာဝဓာတ်ငွေ့စျေးနှုန်း ၁ ဆခွဲမြင့်တက်
အရှေ့အလယ်ပိုင်း ပဋိပက္ခများကြောင့် ဥရောပရှိပျမ်းမျှ သဘာဝဓာတ်ငွေ့စျေးနှုန်း ၁ ဆခွဲမြင့်တက်
     အရှေ့အလယ်ပိုင်းဒေသတွင် ဖြစ်ပွားနေသည့် ပဋိပက္ခများကြောင့်  ဥရောပရှိပျမ်းမျှ သဘာဝဓာတ်ငွေ့စျေးနှုန်းသည် ယခုနှစ် ဖေဖော်ဝါရီလနှင့် နှိုင်းယှဉ်ပါက မတ်လအတွင်း၌  ၁ ဆခွဲမြင့်တက်လာခဲ့ကြောင်းသိရသည်။ယခုနှစ် ဖေဖော်ဝါရီလ ၂၇ ရက်တွင် သဘာဝဓာတ်ငွေ့ခန့်မှန်းစျေးနှုန်းမှာ ကုဗမီတာ ၁၀၀၀ လျှင် အမေရိကန်ဒေါ်လာ  ၃၈၈ ဒေါ်လာဝန်းကျင်သာ ရှိခဲ့သော်လည်း မတ်လ ၃၁ ရက်    စျေးကွက်ပိတ်ချိန်၌ အမေရိကန် ဒေါ်လာ ၅၉၆ ဒေါ်လာအထိ မြင့်တက်လာခဲ့ရာ ဖေဖော်ဝါရီလကုန်နှင့် နှိုင်းယှဉ်ပါက ၅၄ ရာခိုင်နှုန်းမြင့်တက်လာခြင်းဖြစ်သည်။ထို့ပြင်  ဥရောပဒေသ၏   သဘာဝဓာတ်ငွေ့စျေးနှုန်းများသည် ပြီးခဲ့သည့် ၂၀၂၅ ခုနှစ် မတ်လအတွင်းက ပျမ်းမျှပေါက်စျေးထက် ၃၆ ရာခိုင်နှုန်း ပိုမိုမြင့်မားနေခဲ့ကြောင်းသိရသည်။ယခုနှစ် မတ်လအတွင်း သဘာဝဓာတ်ငွေ့စျေးနှုန်းများ ရုတ်တရက် အဆမတန် မြင့်တက်လာရခြင်းမှာ ဖေဖော်ဝါရီလကုန်ပိုင်းတွင် အမေရိကန်နှင့်အစ္စရေးတို့က အီရန်အပေါ် စတင်ခဲ့သည့် စစ်ပွဲကြောင့်ဖြစ်သည်။ထို့ပြင် အရှေ့အလယ်ပိုင်းပဋိပက္ခအတွင်း ဘာရိန်း၊ ဂျော်ဒန်၊ အီရတ်၊ ကာတာ၊ ကူဝိတ်၊ အာရပ်စော်ဘွားများပြည်ထောင်စုနှင့်ဆော်ဒီအာရေဗျ နိုင်ငံများအတွင်းရှိ အမေရိကန်၏ စစ်ဘက်အဆောက်အအုံများလည်း တိုက်ခိုက်ခံခဲ့ရပြီး ကမ္ဘာ့ရေနံနှင့် သဘာဝဓာတ်ငွေ့ရည် တင်ပို့မှု ငါးပုံတစ်ပုံ ဖြတ်သန်းရာ ဟော်မုရေလက်ကြား ပိတ်သွားခြင်းကလည်း အဆိုပါပဋိပက္ခ၏ နောက်ဆက်တွဲရလဒ်ပင် ဖြစ်ကြောင်း သိရသည်။ MWD
Thu, 2-Apr-2026
စစ်ပွဲအဆုံးသတ်နိုင်ခြေရှိသည့် အလားအလာများကြောင့် အာရှ စတော့စျေးကွက်များ သိသိသာသာ ပြန်လည်မြင့်တက်လာ
စစ်ပွဲအဆုံးသတ်နိုင်ခြေရှိသည့် အလားအလာများကြောင့် အာရှ စတော့စျေးကွက်များ သိသိသာသာ ပြန်လည်မြင့်တက်လာ
အမေရိကန်-အီရန်စစ်ပွဲကို မကြာမီအဆုံးသတ်ရန် ကြိုးပမ်းသွားမည် ဟူသော ထရမ့်အစိုးရအဖွဲ့၏ ပြောကြားချက်များကြောင့် အမေရိကန် စတော့စျေးကွက်တွင် တစ်နှစ်နီးပါးကာလအတွင်း အကောင်းဆုံး အရောင်းအဝယ်အခြေအနေသို့ ရောက်ရှိခဲ့ပြီးနောက် ဗုဒ္ဓဟူးနေ့ (ဧပြီ ၁) တွင် အာရှစတော့စျေးကွက် အညွှန်းကိန်းများလည်း လိုက်ပါ မြင့်တက်လာခဲ့သည်။ဂျပန်နိုင်ငံ၏ Nikkei 225 အညွှန်းကိန်းသည် ဒေသစံတော်ချိန် နံနက် ၁၀ နာရီ ၅၇ မိနစ်တွင် ၄ ရာခိုင်နှုန်းအထိ ထိုးတက်သွားခဲ့သကဲ့သို့ တောင်ကိုရီးယားနိုင်ငံ၏ Kospi အညွှန်းကိန်းသည်လည်း ၆.၄ ရာခိုင်နှုန်းအထိ မြင့်တက်ခဲ့သည်။ ထို့အတူ ဟောင်ကောင်၏ Hang Seng အညွှန်းကိန်းသည်လည်း ၁.၉ ရာခိုင်နှုန်း မြင့်တက်လာကြောင်း တွေ့ရှိရသည်။ဗုဒ္ဓဟူးနေ့ (ဧပြီ ၁) တွင် စျေးနှုန်းများ ခေတ္တ ပြန်လည်မြင့်တက်လာခဲ့သော်လည်း ပြီးခဲ့သည့်လအတွင်း ဖြစ်ပွားခဲ့သောစစ်ပွဲကြောင့် အာရှစျေးကွက်များတွင် မတည်ငြိမ်မှုများစွာဖြစ်ပေါ်ခဲ့ပြီး ငွေကြေးပမာဏ အမြောက်အမြား ဆုံးရှုံးမှုများနှင့် ရင်ဆိုင်ခဲ့ရသည်။ အာရှနိုင်ငံများသည် ပင်လယ်ကွေ့နိုင်ငံများမှ ရေနံနှင့်သဘာဝဓာတ်ငွေ့ တင်သွင်းမှုအပေါ် အဓိကမှီခိုနေရခြင်းကြောင့် ယခုကဲ့သို့ စျေးကွက်ရိုက်ခတ်မှု ပြင်းထန်ခဲ့ခြင်း ဖြစ်သည်။စစ်ပွဲစတင်ချိန်မှစ၍ လက်ရှိအချိန်ထိ တွက်ချက်ကြည့်ပါက ဂျပန် Nikkei 225 အညွှန်းကိန်းသည် ၁၀ ရာခိုင်နှုန်းခန့်၊ တောင်ကိုရီးယား Kospi သည် ၁၄ ရာခိုင်နှုန်းခန့်နှင့် ဟောင်ကောင် Hang Seng သည် ၅ ရာခိုင်နှုန်းခန့် အသီးသီးကျဆင်းခဲ့ကြောင်း သိရှိရသည်။ကိုးကား- CNNPhoto: DZRHဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ ဝန်ကြီး-၂
Wed, 1-Apr-2026
အိန္ဒိယရှိ ဝန်ထမ်းပေါင်း ၁၂,၀၀၀ ကို Oracle အလုပ်ထုတ်ပယ်၊ တစ်ကမ္ဘာလုံးအတိုင်းအတာဖြင့် ဝန်ထမ်း ၃၀,၀၀၀ ခန့် လျှော့ချ
အိန္ဒိယရှိ ဝန်ထမ်းပေါင်း ၁၂,၀၀၀ ကို Oracle အလုပ်ထုတ်ပယ်၊ တစ်ကမ္ဘာလုံးအတိုင်းအတာဖြင့် ဝန်ထမ်း ၃၀,၀၀၀ ခန့် လျှော့ချ
အမေရိကန် နည်းပညာကုမ္ပဏီကြီးဖြစ်သည့် Oracle သည် အိန္ဒိယနိုင်ငံရှိ ဝန်ထမ်းပေါင်း ၁၂,၀၀၀ ကို အလုပ်ထုတ်ပယ်လိုက်ကြောင်း PTI သတင်း ဌာနက ဖော်ပြခဲ့သည်။ မီဒီယာများ၏ ဖော်ပြချက်အရ ကုမ္ပဏီသည် တစ်ကမ္ဘာလုံးအတိုင်းအတာဖြင့် ဝန်ထမ်းပေါင်း ၃၀,၀၀၀ ခန့်ကို လျှော့ချ ခဲ့ခြင်း ဖြစ်သည်။Oracle သည် အိန္ဒိယနိုင်ငံတွင် လက်ရှိအလုပ်ထုတ်ခံရသည့် ဝန်ထမ်းများအပါအဝင် စုစုပေါင်း ဝန်ထမ်း ၃၀,၀၀၀ ခန့်ကို ခန့်အပ်ထားခြင်း ဖြစ်သည်။ အလုပ်ထုတ်ခံရသည့် ဝန်ထမ်းများက နောက်ထပ် အလုပ်အကိုင်လျှော့ချမှုတစ်ရပ်ကို လာမည့်တစ်လအတွင်း ထပ်မံ ပြုလုပ်ဖွယ်ရှိကြောင်း Moneycontrol ဝက်ဘ်ဆိုက်သို့ ပြောကြားခဲ့သည်။ Oracle က သက်ဆိုင်ရာ ဝန်ထမ်းများထံ နံနက် ၆ နာရီတွင် အီးမေးလ်ပေးပို့၍ အဖွဲ့အစည်းဆိုင်ရာ အပြောင်းအလဲများကို အသိပေးခဲ့ရာတွင် “လုပ်ငန်းလည်ပတ်မှုများကို ပိုမိုထိရောက်စေရန် ဆုံးဖြတ်ခဲ့ပြီး ရလဒ်အနေဖြင့် ကံမကောင်းစွာဖြင့် သင်လက်ရှိတာဝန်ယူထားသော ရာထူးမှာ ပိုလျှံနေပြီ ဖြစ်ပါသည်” ဟု ဖော်ပြထားကြောင်း Moneycontrol က ဆိုသည်။ကုမ္ပဏီသည် အလုပ်ထုတ်ခံရသော အိန္ဒိယဝန်ထမ်းများအတွက် လုပ်သက် တစ်နှစ်လျှင် ၁၅ ရက်စာ လစာနှုန်းဖြင့် လျော်ကြေးပေးမည်ဟု သိရှိရသည်။ ထို့အပြင် ခွင့်ရက်များအတွက် ငွေကြေးအဖြစ်လဲလှယ်ပေးခြင်း၊ သတ်မှတ်ချက်နှင့်ကိုက်ညီပါက လုပ်သက်ဆုကြေးပေးခြင်း၊ ကြိုတင်အကြောင်းကြားစာကာလ တစ်လစာပေးခြင်းနှင့် အလုပ်ထုတ်ခံရမှုအတွက် အပိုဆောင်း နှစ်လစာပေးခြင်းတို့ကိုလည်း ကမ်းလှမ်းထားသည်။ယခုကဲ့သို့ အလုပ်ထုတ်မှုများသည် Oracle ကုမ္ပဏီအနေဖြင့် ဉာဏ်ရည်တု (AI) လုပ်ငန်းစဉ်များကို ကိုင်တွယ်နိုင်မည့် ဒေတာစင်တာ အခြေခံ အဆောက်အအုံများ တည်ဆောက်ရန် ရင်းနှီးမြှုပ်နှံမှု အသုံးစရိတ်များ တိုးမြှင့်နေချိန်တွင် ပေါ်ပေါက်လာခြင်းဖြစ်သည်။အိန္ဒိယအစိုးရ၏ အကြံပေးအဖွဲ့ဖြစ်သော NITI Aayog ၏ ၂၀၂၅ ခုနှစ် အစီရင်ခံစာအရ အိန္ဒိယရှိ IT ဝန်ဆောင်မှုနှင့် Call Center အလုပ်အကိုင် များ၏ ၂၀ ရာခိုင်နှုန်းအထိသည် ၂၀၃၁ ခုနှစ်တွင် အလိုအလျောက်စနစ် (Automation) ကြောင့် ထိခိုက်နိုင်ကြောင်း ခန့်မှန်းထားသည်။ Citrini Research ၏ ‘The 2028 Global Intelligence Crisis’ အစီရင်ခံစာ တွင်လည်း ၂၀၂၈ ခုနှစ်၌ အိန္ဒိယ၏ IT ဝန်ဆောင်မှုလုပ်ငန်းမှာ သိသိသာသာ နှေးကွေးသွားနိုင်ကြောင်း၊ အကြောင်းမှာ ဖောက်သည်များသည် စရိတ်သက်သာသော AI coding agents များကို ပြောင်းလဲအသုံးပြုလာခြင်း ကြောင့်ဖြစ်ကြောင်း ဖော်ပြထားသည်။အိန္ဒိယ၏ အကြီးဆုံး IT ဝန်ဆောင်မှုကုမ္ပဏီဖြစ်သော Tata Consultancy Services (TCS) သည်လည်း ၂၀၂၅ ခုနှစ်တွင် ၎င်းတို့၏ တစ်ကမ္ဘာလုံး ဆိုင်ရာ လုပ်သားအင်အား၏ ၂ ရာခိုင်နှုန်းခန့်ရှိသော ဝန်ထမ်း ၁၂,၀၀၀ ခန့်ကို အလုပ်ထုတ်ခဲ့သည်။ အလားတူ အိန္ဒိယရှိ Amazon ဝန်ထမ်း ၇၀၀ နီးပါးသည် ဇန်နဝါရီလအတွင်းက လုပ်ငန်းပြန်လည်ဖွဲ့စည်းမှု၏ အစိတ်အပိုင်းအဖြစ် အလုပ်လက်မဲ့ဖြစ်ခဲ့ရပြီး Microsoft သည်လည်း ၂၀၂၅ ခုနှစ် အတွင်း တစ်ကမ္ဘာလုံး၌ အလုပ်အကိုင်ပေါင်း ၁၅,၀၀၀ ခန့်ကို လျှော့ချခဲ့သည်။ကိုးကား- RTဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ ဝန်ကြီး-၂
Wed, 1-Apr-2026
အရှေ့အလယ်ပိုင်းပဋိပက္ခကြောင့် UK သည် ဆယ်စုနှစ်များစွာအတွင်း အဆိုးရွားဆုံး စီးပွားရေးရိုက်ခတ်မှုနှင့် ရင်ဆိုင်နေရဟု IMF သတိပေး
အရှေ့အလယ်ပိုင်းပဋိပက္ခကြောင့် UK သည် ဆယ်စုနှစ်များစွာအတွင်း အဆိုးရွားဆုံး စီးပွားရေးရိုက်ခတ်မှုနှင့် ရင်ဆိုင်နေရဟု IMF သတိပေး
အရှေ့အလယ်ပိုင်းဒေသ ပဋိပက္ခကြောင့်ဖြစ်ပေါ်လာသည့် စီးပွားရေး ရိုက်ခတ်မှုဒဏ်ကို အခြားနိုင်ငံများထက် UK (ဗြိတိန်) က ပိုမို ခံစားနေရကြောင်း အပြည်ပြည်ဆိုင်ရာ ငွေကြေးရန်ပုံငွေအဖွဲ့ (IMF) က သတိပေးလိုက်သည်။ UK သည် သဘာဝဓာတ်ငွေ့သုံး လျှပ်စစ်ထုတ်လုပ်မှုအပေါ် အလွန်အမင်း မှီခိုနေရသောကြောင့် မြင့်တက်လာသော စွမ်းအင်ဈေးနှုန်းများ၏ ဒဏ်ကို အထူးတလည် ခံစားရမည့် အခြေအနေတွင် ရှိနေသည်ဟု ဆိုသည်။ ဖေဖော်ဝါရီလနှောင်းပိုင်းတွင် အီရန်အပေါ် အမေရိကန်-အစ္စရေးတို့၏ တိုက်ခိုက်မှုများနှင့် ယင်းနောက်ပိုင်း ဒေသတွင်း အပြန်အလှန် လက်တုံ့ပြန် တိုက်ခိုက်မှုများကြောင့် စွမ်းအင်ဈေးနှုန်းများ ထိုးတက်သွားပြီးနောက် ဥရောပတစ်လွှားရှိ စွမ်းအင်တင်သွင်းသည့် နိုင်ငံများမှာ အပြင်းထန်ဆုံး ရိုက်ခတ်မှုကို ကြုံတွေ့နေရသည်။ ထိုအကျပ်အတည်းကြောင့် ကမ္ဘာ့ရေနံရောင်းလိုအား ငါးပုံတစ်ပုံခန့်ကို သယ်ယူပို့ဆောင်ပေးနေသည့်အဓိကရေကြောင်းလမ်းဖြစ်သော ဟော်မုဇ်ရေလက်ကြားမှာ ထိရောက်စွာ ပိတ်ဆို့သွားခဲ့ပြီး ရေနံစီးဆင်းမှုများရပ်တန့်ကာ လောင်စာဆီနှင့် ထုတ်လုပ်မှုကုန်ကျစရိတ်များကို မြင့်တက်စေခဲ့သည်။ယခုသီတင်းပတ်အစောပိုင်းက ထုတ်ပြန်ခဲ့သည့် IMF ၏ ဆောင်းပါး တစ်ပုဒ်တွင် အဖွဲ့၏ ထိပ်တန်းစီးပွားရေးပညာရှင် Pierre-Olivier Gourinchas အပါအဝင် တာဝန်ရှိသူများက ပြောကြားရာ၌ အကြွေးတင်နေသော အစိုးရများအနေဖြင့် အဆိုပါဒဏ်ကိုလျှော့ချပေးရန် ငွေကြေးအရင်းအမြစ် အနည်းငယ်သာရှိကြောင်း၊ ထို့ကြောင့် အိမ်ထောင်စုများနှင့် စီးပွားရေးလုပ်ငန်းများမှာ ပိုမိုထိခိုက်နိုင်ကြောင်း ဖော်ပြထားသည်။ ထို့ပြင် အရှေ့ အလယ်ပိုင်းစစ်ပွဲ၏ သက်ရောက်မှုသည် တစ်ကမ္ဘာလုံး အတိုင်းအတာဖြင့် ဖြစ်ပေါ်စေသော်လည်း နိုင်ငံအလိုက် ကွာခြားမှုကြီးမားလိမ့်မည်ဟု ထပ်လောင်းပြောကြားခဲ့ပြီး UK အပါအဝင် အချို့နိုင်ငံများမှာ နေထိုင်မှု စရိတ်ကျပ်တည်းမှုဒဏ်ကို တစ်ကျော့ပြန် ရင်ဆိုင်ရမည် ဖြစ်သည်။UK နှင့် အီတလီတို့သည် စွမ်းအင်ခများမြင့်တက်မှုကြောင့် နေထိုင်မှုစရိတ်မြင့်တက်မည့် အန္တရာယ်နှင့် အများဆုံးရင်ဆိုင်နေရသော်လည်း ပြင်သစ်နှင့် စပိန်တို့မှာမူ နျူကလီးယားနှင့် ပြန်လည်ပြည့်ဖြိုးမြဲ စွမ်းအင်ကို ပိုမိုအားထားသောကြောင့် ထိခိုက်မှုဒဏ်မှ အသင့်အတင့် ကင်းလွတ်နေကြောင်း IMF က ဆိုသည်။UK ဝန်ကြီးချုပ် Keir Starmer ကမူ လောင်စာဆီရရှိမှုမှာ လုံခြုံစိတ်ချရသည့် အခြေအနေတွင်ရှိကြောင်း အခိုင်အမာပြောကြားထားပြီး ပြည်သူများအနေဖြင့် ပုံမှန်အတိုင်း နေထိုင်ကြရန် တနင်္လာနေ့ (မတ် ၃၀) က တိုက်တွန်းခဲ့သည်။ သို့သော်လည်း စီးပွားရေးပညာရှင်များကမူ UK ၏ စီးပွားရေးသည် ယူကရိန်းပဋိပက္ခကြောင့် ရုရှား၏ ဈေးနှုန်းချိုသာသော ဓာတ်ငွေ့နှင့်ရေနံကို ဖြတ်တောက်ခဲ့သည့် လွန်ခဲ့သော လေးနှစ်ခန့်က ထက်စာလျှင် ပိုမိုအားနည်းသောအခြေအနေသို့ ရောက်ရှိနေပြီဟု သတိပေးနေကြသည်။အင်္ဂလန်ဗဟိုဘဏ် ဒုတိယဥက္ကဋ္ဌဟောင်း Howard Davies က ယခု သီတင်းပတ်အတွင်း ပြောကြားရာ၌ UK သည် ၁၉၇၃ ခုနှစ် အာရပ်-အစ္စရေး စစ်ပွဲအပြီး အာရပ်ထုတ်လုပ်သူများက အနောက်နိုင်ငံများကို ရေနံရောင်းချမှုပိတ်ပင်ခဲ့ခြင်းကြောင့် ရေနံဈေး ၄ ဆ မြင့်တက်ခဲ့ရသည့် ၁၉၇၀ ပြည့်လွန်နှစ်များက စွမ်းအင်အကျပ်အတည်းနှင့်တူညီသည့် အခြေအနေသို့ ဦးတည်နေနိုင်ကြောင်း သတိပေးခဲ့သည်။ ၎င်းက အရှေ့အလယ်ပိုင်း ရေနံရောင်းလိုအားမှာ ဆက်လက် ကန့်သတ်ခံထားရနိုင်ပြီး ရေနံဈေးသည် တစ်စည်လျှင် ဒေါ်လာ ၁၅၀ အထိ မရောက်ရှိခဲ့လျှင်ပင် လက်ရှိ အကျပ်အတည်းမတိုင်မီကရှိခဲ့သည့် ၆၀ ဒေါ်လာဝန်းကျင်ထက် အဆမတန် မြင့်တက်နေဦးမည်ဟု ဆိုသည်။UK ၏ သဘာဝဓာတ်ငွေ့ဈေးနှုန်းမှာ ဒီဇင်ဘာလမှစ၍ ၂ ဆကျော် မြင့်တက်ခဲ့ပြီး ပဋိပက္ခမတိုင်မီက တစ်စည်လျှင် ဒေါ်လာ ၆၀ နီးပါးရှိခဲ့သည့် Brent ရေနံစိမ်းဈေးမှာလည်း ယခုသီတင်းပတ်အစောပိုင်းတွင် ၁၁၆ ဒေါ်လာအထိ ခဏတာ ထိုးတက်သွားခဲ့ပြီးနောက် ဗုဒ္ဓဟူးနေ့ (ဧပြီ ၁) တွင် ၁၀၀ ဒေါ်လာဝန်းကျင်၌ တည်ရှိနေသည်။ကိုးကား- RTဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ ဝန်ကြီး-၂
Wed, 1-Apr-2026
© Copyright 2024 SAC All Rights Reserved.