ထိုင်းနိုင်ငံက ပင်လယ်ပြင်နယ်နိမိတ် MoU ကို ဖျက်သိမ်းပါက ဝမ်းနည်းရမည်ဟု ကမ္ဘောဒီးယားဆို

NoahJune222

News Image

  • ထိုင်းနိုင်ငံက ပင်လယ်ပြင်နယ်နိမိတ် MoU ကို ဖျက်သိမ်းပါက ဝမ်းနည်းရမည်ဟု ကမ္ဘောဒီးယားဆို

နှစ်နိုင်ငံကြား ချုပ်ဆိုထားသည့် ပင်လယ်ပြင်နယ်နိမိတ်ဆိုင်ရာ နားလည်မှုစာချွန်လွှာ (MoU) ကို ထိုင်းနိုင်ငံအနေဖြင့် တစ်ဖက်သတ်ဖျက်သိမ်းရန် ဆုံးဖြတ်ပါက အလွန်အမင်း ဝမ်းနည်းရမည်ဖြစ်ကြောင်း ကမ္ဘောဒီးယားအစိုးရက ဧပြီ ၂၅ ရက်တွင် ပြောကြားသည်။

၂၀၀၁ ခုနှစ်တွင် လက်မှတ်ရေးထိုးခဲ့သည့် MoU-2001 သည် လုပ်ထုံးလုပ်နည်းဆိုင်ရာ သဘောတူညီချက်တစ်ခုသာမကဘဲ နှစ်နိုင်ငံအကြား သယံဇာတပူးပေါင်းထုတ်ယူရေးနှင့် နယ်နိမိတ်သတ်မှတ်ရေးကို နိုင်ငံတကာဥပဒေနှင့်အညီ ဆောင်ရွက်ရန် ရည်ရွယ်ထားသော စာချုပ်တစ်ခုဖြစ်ကြောင်း ကမ္ဘောဒီးယားနိုင်ငံခြားရေးနှင့် နိုင်ငံတကာပူးပေါင်းဆောင်ရွက်ရေး ဝန်ကြီးဌာနက ထုတ်ပြန်ထားသည်။

ထိုင်းနိုင်ငံအနေဖြင့် MoU-2001 ကို တစ်ဖက်သတ်ဖျက်သိမ်းခြင်းသည် စာချုပ်ချုပ်ဆိုစဉ်က အခြေခံထားသည့် ပူးပေါင်းဆောင်ရွက်ရေးစိတ်ဓာတ်မှ သွေဖည်သွားခြင်းဖြစ်ကြောင်း ကမ္ဘောဒီးယားဘက်က ဝေဖန်ထားသည်။

ကမ္ဘောဒီးယားနိုင်ငံအနေဖြင့် MoU ပါအချက်အလက်များနှင့် ပူးပေါင်းဆောင်ရွက်ရေးစိတ်ဓာတ်ကို ဆက်လက်ထိန်းသိမ်းကာ တည်တည်ကြည်ကြည် လိုက်နာဆောင်ရွက်သွားမည်ဖြစ်ကြောင်းလည်း အတည်ပြုထားသည်။

MWD

MM-News-Category
နိုင်ငံရေးကဏ္ဍသတင်းများ
နိုင်ငံရေး-နိုင်ငံတကာသတင်း

ဆက်စပ်သတင်းများ

ဒေသတွင်း ငြိမ်းချမ်းရေးနှင့် လုံခြုံရေးအတွက် ခိုင်မာစွာရပ်တည်ဆောင်ရွက်မည်ဟု ပါကစ္စတန် ဝန်ကြီးချုပ် ပြောကြား
ဒေသတွင်း ငြိမ်းချမ်းရေးနှင့် လုံခြုံရေးအတွက် ခိုင်မာစွာရပ်တည်ဆောင်ရွက်မည်ဟု ပါကစ္စတန် ဝန်ကြီးချုပ် ပြောကြား
အစ္စလာမ္မာဘတ် ဧပြီ ၂၆ ပါကစ္စတန်နိုင်ငံအနေဖြင့် ဒေသတွင်း ငြိမ်းချမ်းရေးနှင့် လုံခြုံရေးအတွက် ခိုင်မာစွာ ရပ်တည်ဆောင်ရွက်မည်ဖြစ်ကြောင်း ပါကစ္စတန်ဝန်ကြီးချုပ် ရှာဗတ်ရှာရစ်က အီရန်သမ္မတ မာဆော့ ပါဇက်ကီရှန် အား ဖုန်းဖြင့်ဆွေးနွေးပြောကြားခဲ့ကြောင်း ပါကစ္စတန်ဝန်ကြီးချုပ်ရုံး၏ ထုတ်ပြန်ချက်အရ သိရသည်။ ခေါင်းဆောင်နှစ်ဦးသည် ဆွေးနွေးမှုတွင် လက်ရှိဒေသတွင်း အခြေအနေများနှင့် ငြိမ်းချမ်းရေးနှင့် လုံခြုံရေးမြှင့်တင်ရန် အကြောင်းအရာများကို အမြင်ချင်းဖလှယ်ဆွေးနွေးခဲ့ကြောင်း သိရသည်။ ပါကစ္စတန်နိုင်ငံအနေဖြင့် ဒေသတွင်း ငြိမ်းချမ်းရေးနှင့် လုံခြုံရေး မြှင့်တင်ရန် ဆက်လက်ကြိုးပမ်း ဆောင်ရွက်မည်ဟု ပါကစ္စတန်ဝန်ကြီးချုပ်က ပြောကြားခဲ့သည်။ အစ္စလာမ္မာဘတ်၌ ကျင်းပခဲ့သည့် ငြိမ်းချမ်းရေးဆွေးနွေးပွဲတွင် အီရန်အဆင့်မြင့် ကိုယ်စားလှယ်အဖွဲ့ပါဝင်တက်ရောက်ခဲ့ခြင်းအပေါ် အသိအမှတ်ပြုကြောင်း ၎င်းကပြောကြားသည်။ မိမိအနေဖြင့် ကမ္ဘာ့နိုင်ငံများမှ ခေါင်းဆောင်များနှင့် ထိတွေ့ဆက်ဆံမှုများဆောင်ရွက်ခဲ့ပြီး ၎င်းထိတွေ့ဆက်ဆံမှုများမှတစ်ဆင့် သဘောတူညီချက်များ ရရှိမည်ဖြစ်ကာ ဒေသတွင်း ငြိမ်းချမ်းရေးကို ဖော်ဆောင်နိုင်မည်ဟု ၎င်းကပြောကြားသည်။ ပါကစ္စတန်နိုင်ငံ၏ ငြိမ်းချမ်းရေးဆိုင်ရာ ကြိုးပမ်းဆောင်ရွက်မှုများကို အသိအမှတ်ပြုကြောင်း အီရန်သမ္မတ မာဆော့ ပါဇက်ကီရှန်ကပြောကြားသည်။ ကိုးကား- ဆင်ဟွာ ဘာသာပြန်-စိုးသူရMDN
Mon, 27-Apr-2026
‘Golden Fleet’ စီမံကိန်း အကောင်အထည်မဖော်နိုင်မှုကြောင့် အမေရိကန် ရေတပ်ဝန်ကြီး (Navy Secretary) ကို ထရမ့် ရာထူးမှ ထုတ်ပယ်ခဲ့ခြင်း ဖြစ်ကြောင်း NYT ဖော်ပြ
‘Golden Fleet’ စီမံကိန်း အကောင်အထည်မဖော်နိုင်မှုကြောင့် အမေရိကန် ရေတပ်ဝန်ကြီး (Navy Secretary) ကို ထရမ့် ရာထူးမှ ထုတ်ပယ်ခဲ့ခြင်းဖြစ်ကြောင်း NYT ဖော်ပြ
အမေရိကန်သမ္မတ ဒေါ်နယ်ထရမ့်သည် ၎င်းစိတ်ကူးယဉ်ထားသည့် အနာဂတ်မျိုးဆက်သစ် စစ်သင်္ဘောကြီးများ တည်ဆောက်ရေးစီမံကိန်းကို သတ်မှတ်ချိန်အတွင်း အကောင်အထည်မဖော်နိုင်ခြင်းကြောင့် ရေတပ် ဝန်ကြီး (Navy Secretary) ဂျွန်ဖီလန် (John Phelan) ကို ရာထူးမှ ထုတ်ပယ်လိုက်ခြင်းဖြစ်ကြောင်း နယူးယောက်တိုင်းမ် သတင်းစာက ဖော်ပြခဲ့သည်။ပြီးခဲ့သည့် ဒီဇင်ဘာလက သမ္မတထရမ့်သည် လေဆာတိုက်ခိုက်ရေးစနစ်နှင့် ဟိုက်ပါဆောနစ်ဒုံးကျည်များကဲ့သို့ ခေတ်မီလက်နက်များ တပ်ဆင်ထားမည့် “Trump-class” စစ်သင်္ဘောသစ်များကိုထုတ်ဖော်ပြသခဲ့ပြီး ယင်းကို Golden Fleet ဟု အမည်ပေးခဲ့သည်။ ရေတပ်ဝန်ကြီး ဖီလန် သည် ကုန်ကျစရိတ် ဒေါ်လာ ၁၇ ဘီလီယံရှိမည့် အဆိုပါစစ်သင်္ဘောကို ၂၀၂၈ ခုနှစ်တွင် အပြီးသတ်ရန်ကတိပြုခဲ့သော်လည်း သမ္မတ၏ ခက်ခဲသော အချိန်ဇယားကို အမှီလိုက်ရန် ရုန်းကန်ခဲ့ရသည်။စစ်ဘက်အရာရှိများ၏အဆိုအရ အမေရိကန် သင်္ဘောကျင်းလုပ်ငန်းတွင် ထိုသို့သော နည်းပညာမြင့်သင်္ဘောမျိုးကို နှစ်အနည်းငယ်အတွင်း တည်ဆောက်နိုင်သည့် စွမ်းဆောင်ရည်မရှိကြောင်း သိရှိရသည်။ ဖီလန် က ဥရောပသင်္ဘောကျင်းများထံမှ အကူအညီယူရန် အကြံပြုခဲ့သော်လည်း သမ္မတထရမ့်က အမေရိကန်သံမဏိဖြင့် ပြည်တွင်း၌သာ တည်ဆောက်ရမည်ဟုဆိုကာ ပယ်ချခဲ့သည်။ဖီလန် ရာထူးမှဖယ်ရှားခံရမှုတွင် စစ်မက်ရေးရာဝန်ကြီး ပိဟက်ဆက် အပါအဝင် ပင်တဂွန်စစ်ဌာနချုပ်အတွင်းရှိ ပြိုင်ဘက်များနှင့် သဘောထား တင်းမာမှုများကလည်း အရှိန်အဟုန်မြှင့်ပေးခဲ့ကြောင်း သိရှိရသည်။ ထို့ပြင် အမေရိကန်၏ ယခင် Zumwalt-class စီမံကိန်းသည်လည်း ကုန်ကျစရိတ်ကြီးမြင့်မှုနှင့် နည်းပညာပိုင်းဆိုင်ရာပြဿနာများကြောင့် ကျရှုံးခဲ့ဖူးပြီး ပြီးခဲ့သည့်သီတင်းပတ်ကပင် USS Zumwalt သင်္ဘောပေါ်၌ မီးလောင်မှုဖြစ်ပွားကာ ရေတပ်သားများ ဒဏ်ရာရရှိခဲ့သည့်ဖြစ်စဉ်ကလည်း အမေရိကန် ရေတပ်တည်ဆောက်ရေးကဏ္ဍ၏ စိန်ခေါ်မှုများကို မီးမောင်း ထိုးပြနေသည်။ကိုးကား- RTဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး
Sun, 26-Apr-2026
ဟန်ဂေရီဝန်ကြီးချုပ်ဟောင်း ဗစ်တာအော်ဘန် လွှတ်တော်ကိုယ်စားလှယ် အဖြစ်မှ နုတ်ထွက်ပြီး ပါတီပြန်လည်ဖွဲ့စည်းရေးကို အာရုံစိုက်မည်
ဟန်ဂေရီဝန်ကြီးချုပ်ဟောင်း ဗစ်တာအော်ဘန် လွှတ်တော်ကိုယ်စားလှယ်အဖြစ်မှ နုတ်ထွက်ပြီး ပါတီပြန်လည်ဖွဲ့စည်းရေးကို အာရုံစိုက်မည်
ဟန်ဂေရီဝန်ကြီးချုပ်ဟောင်း ဗစ်တာအော်ဘန် (Viktor Orban) က ၎င်း၏ ဖီဒက်စ် (Fidesz) ပါတီ ရွေးကောက်ပွဲတွင်ရှုံးနိမ့်ခဲ့ပြီးနောက် လွှတ်တော်အသစ်တွင် အမတ်နေရာ ရယူတော့မည်မဟုတ်ကြောင်း ပြောကြားလိုက်ပြီး နိုင်ငံ၏ မျိုးချစ်လှုပ်ရှားမှု (Patriotic Movement) ကို ပြန်လည်ဖွဲ့စည်းရန် အာရုံစိုက်သွားမည်ဖြစ်ကြောင်း ကြေညာခဲ့သည်။အော်ဘန်က စနေနေ့ (ဧပြီ ၂၅) တွင် ထုတ်ပြန်ခဲ့သည့် ဗီဒီယိုမိန့်ခွန်း၌ ပြောကြားရာတွင် Fidesz-KDNP မဟာမိတ်အဖွဲ့၏ ခေါင်းဆောင်အဖြစ် ၎င်းရရှိထားသော လွှတ်တော်ကိုယ်စားလှယ်နေရာသည် အမှန်စင်စစ် အားဖြင့် ဖီဒက်စ်ပါတီ၏ ကိုယ်စားလှယ်နေရာသာဖြစ်ကြောင်းနှင့် ၎င်းအနေ ဖြင့် ထိုနေရာကို ပြန်လည်ပေးအပ်ရန် ဆုံးဖြတ်ခဲ့ခြင်းဖြစ်ကြောင်း ဆိုသည်။"ကျွန်တော့်ကို အခုလွှတ်တော်ထဲမှာ မလိုအပ်တော့ပါဘူး၊ မျိုးချစ်လှုပ်ရှားမှုကို ပြန်လည်ဖွဲ့စည်းတဲ့နေရာမှာပဲ လိုအပ်တာပါ" ဟု ၎င်းက ဆိုသည်။ဧပြီလ ၁၂ ရက်နေ့က ကျင်းပခဲ့သော ဟန်ဂေရီ ပါလီမန် ရွေးကောက်ပွဲတွင် အော်ဘန်၏ ဖီဒက်စ်ပါတီသည် ပီတာမာဂျာ (Peter Magyar) ဦးဆောင်သော တစ်ဇာ (Tisza) ပါတီ၏ အပြတ်အသတ်အနိုင်ယူခြင်းကို ခံခဲ့ရသည်။ တစ်ဇာပါတီသည် အမတ်နေရာ ၁၉၉ နေရာအနက် ၁၄၁ နေရာအထိ အနိုင်ရရှိခဲ့သည်။အော်ဘန်က ဖီဒက်စ်ပါတီ၏ လွှတ်တော်ကိုယ်စားလှယ်အဖွဲ့ကို အကြီးအကျယ် ပြုပြင်ပြောင်းလဲသွားမည်ဖြစ်ပြီး တနင်္လာနေ့ (ဧပြီ ၂၇) တွင် ဖွဲ့စည်းမည့် အဖွဲ့သစ်ကို ဂါဂလီဂူလီယပ်စ် (Gergely Gulyas) က ဦးဆောင်မည်ဖြစ်ကြောင်း ပြောကြားခဲ့သည်။ ထို့ပြင် ပါတီအနေဖြင့် လာမည့်သီတင်းပတ်တွင် ညီလာခံတစ်ရပ်ကျင်းပမည်ဖြစ်ပြီး ပါတီ၏ "ပြုပြင်ပြောင်းလဲရေးညီလာခံ" ကိုလည်း ဇွန်လသို့ ရှေ့တိုးကျင်းပမည် ဟု ဆိုသည်။လွှတ်တော်မှ နုတ်ထွက်ခဲ့သော်လည်း အော်ဘန်သည် ပါတီ၏ ထိပ်ပိုင်း ခေါင်းဆောင်အဖြစ် ဆက်ရှိနေရန် ရည်ရွယ်ထားသည်ဟု ယူဆရသည်။ ပါတီခေါင်းဆောင်ပိုင်းက ၎င်းအား ဖီဒက်စ်ပါတီ ဥက္ကဋ္ဌအဖြစ် ဆက်လက် တာဝန်ယူရန်အဆိုပြုထားပြီး ပါတီညီလာခံက ၎င်းအပေါ် ယုံကြည်မှု ရှိပါက ဆက်လက်တာဝန်ယူရန်အသင့်ရှိကြောင်း ၎င်းကရှင်းလင်းစွာ ပြောကြားခဲ့သည်။အော်ဘန်၏ ရှုံးနိမ့်မှုသည် ၎င်း၏ နိုင်ငံရေးသက်တမ်းတစ်လျှောက် အကြီးမားဆုံးနောက်ပြန်လှည့်မှုဖြစ်ပြီး ဟန်ဂေရီနှင့် အီးယူ (EU)၊ အမေရိကန်၊ ရုရှား၊ ယူကရိန်းတို့အကြား ဆက်ဆံရေးကို ပြန်လည် ပုံဖော်လာစေမည်ဟု မျှော်လင့်ရသည်။ယခင်က ယူကရိန်းသို့ ရန်ပုံငွေထောက်ပံ့မည့်အစီအစဉ်ကို အော်ဘန်က ဗီတိုအာဏာသုံး တားဆီးထားခဲ့သည်။ ၎င်းသည် ဇန်နဝါရီလအတွင်းက Druzhba ရေနံပိုက်လိုင်းမှ ရေနံတင်ပို့မှုရပ်ဆိုင်းသွားခြင်းအပေါ် လက်တုံ့ပြန်သည့်အနေဖြင့်ပြုလုပ်ခဲ့ခြင်းဖြစ်ပြီး ထိုစဉ်က ရေနံရပ်ဆိုင်းမှုသည် ပီတာမာဂျာ၏ ပါတီကိုထောက်ခံရန် နိုင်ငံရေးအရကြံစည်မှုဖြစ်သည်ဟု အော်ဘန်က စွပ်စွဲခဲ့သည်။သို့သော် ရွေးကောက်ပွဲအပြီး ရက်သတ္တပတ်အနည်းငယ်အကြာတွင် ကိယက်ဗ် သည် ရုရှားရေနံတင်ပို့မှုကို ပြန်လည်စတင်ခဲ့သည်။ ထို့ကြောင့် ဘူဒါပတ်စ် အစိုးရကလည်း ၎င်းတို့၏ ဗီတိုအာဏာကို ပြန်လည်ရုပ်သိမ်းပေးခဲ့သည်။ ရလဒ်အနေဖြင့် အီးယူသည် ၂၀၂၆-၂၇ ခုနှစ်အတွက် ယူကရိန်းသို့ ယူရို ၉၀ ဘီလီယံ (အမေရိကန်ဒေါ်လာ ၁၀၅ ဘီလီယံ) အရေးပေါ် ရန်ပုံငွေထောက်ပံ့မှုကို အတည်ပြုနိုင်ခဲ့ပြီး ရုရှားအပေါ်ချမှတ်သည့် အကြိမ် ၂၀ မြောက် ဒဏ်ခတ်ပိတ်ဆို့မှုများကိုလည်း ယခုသီတင်းပတ်အတွင်း ချမှတ်နိုင်ခဲ့ပြီဖြစ်သည်။ကိုးကား- RTဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး
Sun, 26-Apr-2026
Jeffrey Sachs က နေတန်ယာဟုသည် ‘ကပ်ဘေးဒုက္ခတစ်ရပ်ဖြစ်သည်’ ဟု ပြင်းပြင်းထန်ထန် ဝေဖန်
Jeffrey Sachs က နေတန်ယာဟုသည် ‘ကပ်ဘေးဒုက္ခတစ်ရပ်ဖြစ်သည်’ ဟု ပြင်းပြင်းထန်ထန် ဝေဖန်
အမေရိကန် စီးပွားရေးပညာရှင် ဂျက်ဖရီ ဆာ့ခ်စ် (Jeffrey Sachs) က အစ္စရေးဝန်ကြီးချုပ် ဘင်ဂျမင် နေတန်ယာဟုကို ပြင်းပြင်းထန်ထန် ဝေဖန်လိုက်ပြီး အီရန်ကိုတိုက်ခိုက်ရန် အမေရိကန်သမ္မတ ဒေါ်နယ်ထရမ့်၏ ဆုံးဖြတ်ချက်မှာ နေတန်ယာဟု၏ အစွန်းရောက်ပြီး လမ်းမှားနေသော အစီအစဉ်များကြောင့်ဖြစ်ကြောင်း ပြောကြားခဲ့သည်။ထရမ့်သည် ၎င်း၏ ပထမသက်တမ်းနှင့် ယခုသက်တမ်းနှစ်ခုစလုံးတွင် အစ္စရေး၏ အကျိုးစီးပွားနှင့် နီးကပ်စွာပတ်သက်နေသည့်မူဝါဒများကိုကျင့်သုံးခဲ့သည့်အတွက် ပြည်တွင်းပြည်ပ ဝေဖန်မှုများနှင့် အကြိမ်ကြိမ်ရင်ဆိုင်နေရသည်။ အကဲခတ်သူများနှင့် နိုင်ငံရေး အတိုက်အခံများက အမေရိကန်၏နိုင်ငံခြားရေးမူဝါဒသည် နေတန်ယာဟု ဦးဆောင်သော ဂျူး နိုင်ငံ၏ အစီအစဉ်များဘက်သို့ ယိမ်းယိုင်နေကြောင်း ထောက်ပြလေ့ရှိကြသည်။ဆာ့ခ်စ်က အမေရိကန် ရှေးရိုးစွဲဂျာနယ်လစ် တက်ကာ ကာလ်ဆင် (Tucker Carlson) နှင့် တွေ့ဆုံရာတွင် “ထရမ့်ရဲ့ ဆုံးဖြတ်ချက်ဟာ အခြေခံ အားဖြင့် နေတန်ယာဟုရဲ့ ဦးဆောင်မှုနောက်ကို လိုက်နေတာပါ” ဟု ပြောကြားခဲ့သည်။သောကြာနေ့ (ဧပြီ ၂၄) က ထုတ်လွှင့်ခဲ့သည့် ဗီဒီယိုအင်တာဗျူးတွင် ဆာ့ခ်စ်က နေတန်ယာဟုတွင် ကိုယ်ပိုင်အစီအစဉ်တစ်ခုရှိနေပြီး အမေရိကန် သမ္မတသည် ကမ္ဘာကြီးအပေါ် နေတန်ယာဟု၏ မှားယွင်းသောအမြင်များကို လက်ခံယုံကြည်သွားခြင်းဖြစ်ကြောင်း အလေးပေး ပြောဆိုခဲ့သည်။ “ကျွန်တော့်အမြင်အရတော့ သူ့ရဲ့ အစီအစဉ်တွေဟာ အစွန်းရောက်ပြီး မှားယွင်းနေပါတယ် ၊ ဒါဟာ နှစ်ပေါင်း ၃၀ လုံးလုံး မှားယွင်းခဲ့တာဖြစ်ပြီး အမေရိကန်အတွက် ငွေကြေးအမြောက်အမြား ဆုံးရှုံးစေခဲ့ပါတယ်၊ ဒီလူဟာ ကပ်ဘေးဒုက္ခ (Disaster) တစ်ခုပဲလို့ ကျွန်တော် ထင်ပါတယ်၊ သူဟာ ကမ္ဘာကြီးကို လွဲမှားတဲ့ရှုထောင့်ကနေ မြင်နေတာပါ” ဟု ဆာ့ခ်စ်က ဆိုသည်။အလားတူပင် အမေရိကန် ဒီမိုကရက်တစ်ပါတီ၊ ရီပတ်ဘလစ်ကန်အချို့နှင့် အမေရိကန် အမျိုးသားအကြမ်းဖက်မှုတိုက်ဖျက်ရေးဌာနအကြီးအကဲ ဟောင်း ဂျိုး ကန့် (Joe Kent) တို့ကလည်း အီရန်စစ်ပွဲကို စတင်ရန် ထရမ့်သည် အစ္စရေး၏ဖိအားပေးမှုကိုခံခဲ့ရကြောင်း ပြောဆိုခဲ့ကြသည်။ စစ်ပွဲကို ကန့်ကွက်သည့်အနေဖြင့် ပြီးခဲ့သည့်လက ရာထူးမှ နုတ်ထွက်ခဲ့သူ ဂျိုးကန့်က အီရန်သည် နျူကလီးယားလက်နက်များထုတ်လုပ်ရန် ကြိုးပမ်းနေသည်ဟူသော ထရမ့်၏ စွပ်စွဲချက်များကို ထောက်လှမ်းရေးအေဂျင်စီများက အတည်မပြုနိုင်ကြောင်း ပြောကြားခဲ့သည်။အီရန် နိုင်ငံခြားရေးဝန်ကြီး အဘတ် အာရက်ချီအပါအဝင် အီရန်အရာရှိများကလည်း ယခုပဋိပက္ခသည် ထရမ့်က ၎င်း၏ “အမေရိကန် ဦးစားပေး (America First)” အစီအစဉ်ကို သစ္စာဖောက်ပြီး “အစ္စရေး ဦးစားပေး (Israel First)” အဖြစ် ပြောင်းလဲလုပ်ဆောင်နေခြင်းဖြစ်ကြောင်း ဖော်ပြခဲ့ ကြသည်။ပြီးခဲ့သည့် သီတင်းပတ်ကလည်း ကာလ်ဆင်သည် ထရမ့်၏ အရှေ့ အလယ်ပိုင်းမူဝါဒများကို ပြစ်တင်ရှုတ်ချခဲ့ပြီး သမ္မတ၏ စစ်မှန်သော ကိုးကွယ်ယုံကြည်မှုမှာ ခရစ်ယာန်ဘာသာမဟုတ်ဘဲ ‘အစ္စရေးဝါဒ (Israelism)’ သာ ဖြစ်ကြောင်း စွပ်စွဲပြောဆိုခဲ့သည်။ ထရမ့်၏ ထောက်ခံသူဟောင်း ဖြစ်ခဲ့ဖူးသူ ကာလ်ဆင်က အမေရိကန်သည် အီရန်နှင့်စစ်ပွဲကို ‘အစ္စရေးအတွက်’ နှင့် ‘အစ္စရေး၏ တိုက်တွန်းမှုကြောင့်’ ဆင်နွှဲခဲ့ခြင်း ဖြစ်ကြောင်း ထည့်သွင်း ပြောကြားခဲ့သည်။ကိုးကား- RTဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး
Sun, 26-Apr-2026
အီရန်စစ်ပွဲ အဆုံးသတ်ရေးနှင့် NATO အခြေစိုက်စခန်းများဖယ်ရှားရေး စပိန်ဆန္ဒပြသူများ တောင်းဆို
အီရန်စစ်ပွဲ အဆုံးသတ်ရေးနှင့် NATO အခြေစိုက်စခန်းများဖယ်ရှားရေး စပိန်ဆန္ဒပြသူများ တောင်းဆို
အမေရိကန်-အစ္စရေးတို့၏ အီရန်အပေါ် တိုက်ခိုက်မှု၊ ဂါဇာပဋိပက္ခနှင့် စပိန်မြေပေါ်ရှိ နေတိုး (NATO) အခြေစိုက်စခန်းများ တည်ရှိနေမှုကို ဆန့်ကျင်ကန့်ကွက်ရန်အတွက် စပိန်နိုင်ငံသား ရာပေါင်းများစွာသည် စနေနေ့ (ဧပြီ ၂၅) က မက်ဒရစ်မြို့လယ်တွင် စုဝေးခဲ့ကြသည်။ဖေဖော်ဝါရီလနှောင်းပိုင်းက အမေရိကန်နှင့် အစ္စရေးတို့ အီရန်ကို တိုက်ခိုက်ပြီးနောက် စပိန်အစိုးရက ၎င်း၏နယ်မြေအတွင်းရှိ စစ်အခြေစိုက်စခန်း များကို အသုံးပြုခွင့် ပိတ်ပင်ထားသောကြောင့် ဝါရှင်တန်အနေဖြင့် စပိန် နိုင်ငံကို စစ်ဘက်မဟာမိတ်အဖွဲ့ (NATO) မှ ထုတ်ပယ်ရန် စဉ်းစား နေကြောင်း Reuters သတင်းဌာနက ဖော်ပြခဲ့သည်။ သို့သော်လည်း နေတိုး အဖွဲ့တွင် အဖွဲ့ဝင်နိုင်ငံအား ထိုသို့ထုတ်ပယ်ရန် ပြဋ္ဌာန်းချက်မရှိကြောင်း နေတိုးအရာရှိတစ်ဦးက BBC သို့ အတည်ပြုပြောကြားခဲ့သည်။စနေနေ့ (ဧပြီ ၂၅) က ပြုလုပ်ခဲ့သော ဆန္ဒပြပွဲကို စပိန်နိုင်ငံ၏ “Stop the War” အဖွဲ့က ဦးဆောင်ကျင်းပခြင်းဖြစ်ပြီး နိုင်ငံတစ်ဝန်းရှိ နေရာပေါင်း ၂၀၀ ကျော်တွင် တစ်ပြိုင်နက်တည်း ဆန္ဒပြခဲ့ကြခြင်းဖြစ်သည်။ ဆန္ဒပြ သူများ သည် “အရှေ့အလယ်ပိုင်းစစ်ပွဲကို မိမိတို့ ရပ်တန့်ရမည်” ၊ “စစ်ပွဲ တိုင်းတွင် ပြည်သူအားလုံး ရှုံးနိမ့်ကြသည်” နှင့် “ထရမ့်က ဒီမိုကရေစီကို ဖျက်ဆီးနေသည်” ဟူသော ကြွေးကြော်သံများနှင့်အတူ ဆိုင်းဘုတ်များကို ကိုင်ဆောင်ကာ ဆန္ဒပြခဲ့ကြသည်။ထို့အပြင် နိုင်ငံအတွင်းရှိ အမေရိကန်-နေတိုး စစ်အခြေစိုက်စခန်းများကိုလည်း ကန့်ကွက်ခဲ့ကြကြောင်း El Mundo နှင့် AP သတင်းများအရ သိရှိရသည်။ အဆိုပါ ဆန္ဒပြပွဲသို့ ဒေသန္တရအစိုးရ အရာရှိများနှင့် လက်ရှိအာဏာရ ဆိုရှယ်လစ်ပါတီ (PSOE) မှ ဥရောပပါလီမန်အမတ်များလည်း တက်ရောက်ခဲ့ကြပြီး အချို့မှာ ဟောပြောမှုများ ပြုလုပ်ခဲ့ကြသည်။ကိုးကား- RTဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး
Sun, 26-Apr-2026
EU ၏ ယူရို ၉၀ ဘီလီယံသည် ယူကရိန်းအတွက် လုံလောက်မှု မရှိ နိုင်ကြောင်း WSJ ဖော်ပြ
EU ၏ ယူရို ၉၀ ဘီလီယံသည် ယူကရိန်းအတွက် လုံလောက်မှု မရှိနိုင်ကြောင်း WSJ ဖော်ပြ
အီးယူ (EU) အနေဖြင့် အသစ်အတည်ပြုလိုက်သော ယူရို ၉၀ ဘီလီယံ (ဒေါ်လာ ၁၀၅ ဘီလီယံ) အပြင် နောက်နှစ်တွင် ယူကရိန်းအတွက် ငွေကြေး များ ထပ်မံထောက်ပံ့ပေးရဖွယ်ရှိကြောင်း သံတမန်ရေးရာ သတင်းရင်းမြစ်များကို ကိုးကား၍ Wall Street Journal (WSJ) က ဖော်ပြခဲ့သည်။ဘရပ်ဆဲလ်သည် ကိယက်ဗ်သို့ပေးအပ်မည့် အတိုးမဲ့ချေးငွေကို အပြီးသတ်အတည်ပြုလိုက်ပြီဖြစ်ကြောင်းနှင့် ၂၀၂၆ ခုနှစ်၊ ဒုတိယသုံးလပတ်တွင် အမြန်ဆုံး စတင်ထုတ်ပေးသွားမည်ဖြစ်ကြောင်း ကြာသပတေးနေ့ (ဧပြီ ၂၃) က ကြေညာခဲ့သည်။ ဥရောပကော်မရှင်ဥက္ကဋ္ဌ အာဆူလာ ဗွန်ဒါလိုင်ယန် က ထိုဖြစ်ပေါ်တိုးတက်မှုကို ‘ယူကရိန်းနှင့် ဥရောပအတွက် ကောင်းသောနေ့တစ်နေ့’ အဖြစ် ဂုဏ်ပြုပြောကြားခဲ့သည်။ယူကရိန်းနှင့် စွမ်းအင်ဆိုင်ရာ အငြင်းပွားမှုကြောင့် ရန်ပုံငွေလွှဲပြောင်းမှုကို လပေါင်းများစွာ ဗီတိုအာဏာဖြင့် ပိတ်ပင်ထားသည့် ဝန်ကြီးချုပ် ဗစ်တာ အော်ဘန်၏ ပါတီသည် ပါလီမန်ရွေးကောက်ပွဲတွင် ရှုံးနိမ့်ခဲ့ပြီးနောက် နှစ်ပတ်မပြည့်မီအချိန်တွင် ယခုကဲ့သို့ အတည်ပြုချက်ထွက်ပေါ်လာခြင်း ဖြစ်သည်။ယခုငွေလွှဲပြောင်းပေးမှုသည် ရုရှားနှင့်ဖြစ်ပွားနေသော ပဋိပက္ခအတွင်း ၂၀၂၈ ခုနှစ်အထိ ယူကရိန်းကို ထောက်ပံ့ထားနိုင်မည်ဟု EU က မျှော်လင့် ထားသော်လည်း ထိုမျှော်လင့်ချက်မှာ အချည်းနှီးသာဖြစ်နိုင်ကြောင်း WSJ က သောကြာနေ့ (ဧပြီ ၂၄) ဆောင်းပါးတွင် ဖော်ပြခဲ့သည်။ဒီဇင်ဘာလက အစီအစဉ်စတင်ရေးဆွဲစဉ်ကထက် ၂၀၂၇ ခုနှစ်အတွက် ကိယက်ဗ်၏ ဘဏ္ဍာရေးလိုငွေပြမှုမှာ ပိုမိုကြီးမားလာကြောင်း ၎င်းတို့က ဆိုကြသည်။ယူကရိန်းအနေဖြင့် လာမည့်နှစ်တွင် ဘတ်ဂျက်အတွက် ထပ်ဆောင်း ယူရို ၁၉ ဘီလီယံ လိုအပ်နေသောကြောင့် နောက်ထပ် ၁၂ လအတွင်း EU အနေဖြင့် ဘီလီယံနှင့်ချီသော ချေးငွေအသစ်တစ်ခုကို ရှာဖွေပေးရန် ဖိအားပေးခံရနိုင်ကြောင်း သံတမန်များက အလေးပေးပြောကြားခဲ့သည်။ဥရောပကောင်စီအကြီးအကဲ အန်တိုနီယို ကော်စတာကမူ ပဋိပက္ခပြီးဆုံးချိန်တွင် ရုရှားထံမှ စစ်လျော်ကြေးများရရှိပြီးမှသာ ယူကရိန်း အနေဖြင့် ထိုငွေများကို ပြန်လည်ပေးဆပ်ရန် လိုအပ်လိမ့်မည်ဟု ပြောကြားခဲ့သည်။ မော်စကိုဘက်ကမူ ထိုသို့သော အခြေအနေမျိုးမှာ လက်တွေ့နှင့် ကင်းကွာနေသည်ဟု ဆိုကာ အကြိမ်ကြိမ် ငြင်းဆိုထားသည်။နိုင်ငံတကာရေးရာကော်မတီတွင်ပါဝင်သူ ရုရှား လွှတ်တော်အမတ် ဒမီထရီ ဘီလစ်ကမူ ဘရပ်ဆဲလ်အနေဖြင့် ၎င်းတို့၏ ငွေများကို မည်သည့်အခါမျှ ပြန်ရတော့မည်မဟုတ်သည်ကို ကော်စတာကိုယ်တိုင် ကောင်းကောင်းနားလည်ထားပြီးဖြစ်ကြောင်း RIA Novosti သတင်းဌာနသို့ ပြောကြားခဲ့သည်။ကိုးကား- RTဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး
Sun, 26-Apr-2026
© Copyright 2024 SAC All Rights Reserved.