တရုတ်နှင့် တောင်အာဖရိကတို့ စီးပွားရေးပူးပေါင်းဆောင်ရွက်မှု သဘောတူညီချက်အသစ် လက်မှတ်ရေးထိုး

စီးပွားရေးဆက်ဆံမှုများ ပိုမိုနက်ရှိုင်းစေရန်၊ တောင်အာဖရိက ပို့ကုန်များကို တရုတ်ဈေးကွက်အတွင်းသို့ အကောက်ခွန်မဲ့ ဝင်ရောက်ခွင့်ပြုရန်နှင့် ရင်းနှီးမြှုပ်နှံမှု စီးဆင်းမှုများကိုချဲ့ထွင်ရန်အတွက် ပရီတိုးရီးယားနှင့် ပေကျင်းတို့သည် ကုန်သွယ်ရေးသဘောတူညီချက်အသစ်တစ်ရပ်ကို လက်မှတ်ရေးထိုးခဲ့ကြသည်။

တရုတ်-အာဖရိက စီးပွားရေးမိတ်ဖက်ဆက်ဆံမှု သဘောတူညီချက် (CAEPA) ကို တောင်အာဖရိက ကုန်သွယ်ရေး၊ စက်မှုနှင့် ပြိုင်ဆိုင်မှုဆိုင်ရာဝန်ကြီး Parks Tau နှင့် တရုတ် စီးပွားကူးသန်းရောင်းဝယ်ရေးဝန်ကြီး Wang Wentao တို့က လက်မှတ်ရေးထိုးခဲ့ကြသည်။

ဝန်ကြီး Tau သည် ပူးတွဲစီးပွားရေးနှင့် ကုန်သွယ်ရေးကော်မရှင် (JETC) အစည်းအဝေးသို့ တောင်အာဖရိက ကိုယ်စားလှယ်အဖွဲ့ကို ဦးဆောင်သွားရောက်ခဲ့သည့် ပေကျင်းမြို့တွင် အဆိုပါသဘောတူညီချက်ကို လက်မှတ်ရေးထိုးခဲ့ခြင်းဖြစ်ပြီး ၎င်းမှာ တရုတ်စီးပွားကူးသန်းရောင်းဝယ်ရေးဝန်ကြီးဌာန၌ ဝန်ကြီး Wang ၏ တရားဝင်ဖိတ်ခေါ်မှုကို ရရှိပြီးနောက် ဖြစ်ပေါ်လာခြင်းဖြစ်သည်။

"ဘုံသာယာဝပြောရေးအတွက် စီးပွားရေးမိတ်ဖက်ဆက်ဆံမှုဆိုင်ရာ မူဘောင်သဘောတူညီချက်" ဟု တရားဝင်အမည်ပေးထားသော CAEPA ကို ၂၀၂၆ ခုနှစ် မတ်လကုန်တွင် Early Harvest Agreement ဆိုင်ရာ ညှိနှိုင်းမှုများက ဆက်လက်လုပ်ဆောင်သွားမည်ဖြစ်ပြီး ၎င်းသည် တောင် အာဖရိက ပို့ကုန်ထုတ်ကုန်များအတွက် အကောက်ခွန်မဲ့ ဝင်ရောက်ခွင့်ကို ရရှိစေမည်ဖြစ်ကာ တောင်အာဖရိကအတွင်းသို့ တရုတ်နိုင်ငံ၏ ရင်းနှီးမြှုပ်နှံမှုများကို ပိုမိုအားကောင်းလာစေမည်ဖြစ်သည်။

ကုန်သွယ်ရေး၊ စက်မှုနှင့် ပြိုင်ဆိုင်မှုဆိုင်ရာဝန်ကြီးဌာနက အဆိုပါ မူဘောင်သဘောတူညီချက်သည် ကုန်သွယ်ရေး၊ ရင်းနှီးမြှုပ်နှံမှု၊ စွမ်းအင်နှင့် ဘက်ပေါင်းစုံ ပူးပေါင်းဆောင်ရွက်မှုများကို လွှမ်းခြုံထားကြောင်းနှင့် ကမ္ဘာ့ကုန်သွယ်ရေးအဖွဲ့ (WTO) ၏ မူဝါဒများ၊ နှစ်နိုင်ငံလုံး၏ ဖွံ့ဖြိုးတိုးတက်ရေး ရည်မှန်းချက်များနှင့် ကိုက်ညီနေစေလျက် စီးပွားရေးပူးပေါင်းဆောင်ရွက်မှုအတွက် တည်ငြိမ်ပြီး ခန့်မှန်းရလွယ်ကူသော ပတ်ဝန်းကျင်တစ်ခု ဖန်တီးပေးရန် ရည်ရွယ်ကြောင်း ပြောကြားခဲ့သည်။

ကိုးကား- RT

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ ဝန်ကြီး -၂