နိုင်ငံတစ်ခု ရေရှည်တည်တံ့ခိုင်မြဲရေးနှင့် ဖွံ့ဖြိုးတိုးတက်ရေးအတွက် ပညာရေးကဏ္ဍသည် အရေးကြီးပါသည်။ ထို့ကြောင့် ပညာရေးနှင့်ပတ်သက်ပြီး ကျောင်းနေအရွယ်ကလေးအားလုံး ပညာ သင်ကြားနိုင်ရေး၊ KG+9 အထိ မသင်မနေရသင်ကြားနိုင်ရေးတို့အတွက် သတ်မှတ်ဆောင်ရွက်လျက် ရှိပါသည်။ KG+9 ပြီးမြောက်ပါက KG+10 မှ KG+12 အထိ ၃ နှစ်တာ စိုက်ပျိုးရေး၊ မွေးမြူရေး၊ စက်မှုဘာသာရပ်များ ဆက်လက်သင်ကြားနိုင်ပါက အခြေခံအလုပ်အကိုင်ကို ရရှိစေမည်ဖြစ်သကဲ့သို့ ဆက်လက်ပညာသင်နိုင်ရင်ကိုက်ညီသည့် ဒီပလိုမာ/ဘွဲ့များ ရရှိမည်ဖြစ်သည့်အတွက် ကုန်ထုတ်လုပ်မှု ကျွမ်းကျင်သော လူသားအရင်းအမြစ်များ ရမည်ဖြစ်ပါသည်။ စနစ်သစ်ပညာရေးအရ KG+12 အတန်းကို ရောက်ပါက အသက်အရွယ်အားဖြင့် အသက် ၁၇ နှစ်၊ ၁၈ နှစ်ဝန်းကျင်ရောက်ရှိသည့် အရွယ်ဖြစ်ပါသည်။ ၁၈ နှစ်ဆိုပါက ဆန္ဒမဲပေးပိုင်ခွင့်ရှိသည့် အရွယ်ဖြစ်ပါသည်။ ဒီမိုကရေစီနိုင်ငံတော်ကို ထူထောင်မည် ဆိုပါက ဥပဒေကိုနားလည်ရန်လိုပါသည်။ ထို့ကြောင့်အဆိုပါအတန်း၊ အဆိုပါအရွယ်ကတည်းက ဥပဒေ ဗဟုသုတများကြွယ်ဝနေအောင် ဆွေးနွေးသင်ကြားဆောင်ရွက်ရန်လိုပါသည်။

ယခုပညာသင်နှစ်တွင် နိုင်ငံတစ်ဝန်းရှိ အခြေခံပညာကျောင်းများကို တစ်နိုင်ငံလုံးအတိုင်းအတာ ဖြင့် ပျမ်းမျှ ၇၀ ရာခိုင်နှုန်းခန့် ဖွင့်လှစ်နိုင်ခဲ့ပါသည်။အခြေခံပညာအဆင့် ကျောင်းတက်ရောက်မှုအနေဖြင့် မူလစာရင်းသွင်းထားသူများအနက်မှ ၉၂ ရာခိုင်နှုန်းကျော်ရှိသည့်အတွက် ရာနှုန်းပြည့်ကျောင်းတက် နိုင်ရေးနှင့် ကျောင်းများဖွင့်လှစ်နိုင်ရေး တာဝန်ရှိသူများနှင့်လက်တွဲပြီး ဆက်လက်ကြိုးပမ်းဆောင်ရွက် သွားမည်ဖြစ်ပါသည်။ မိမိတို့နိုင်ငံ၏ လူဦးရေအသက်ပိုင်းခြားအရ ယခုထက်ပိုပြီး ကျောင်းတက်ရောက် သူဦးရေများရန် လိုအပ်မှုများရှိနေသေးပါသည်။ စာသင်ကျောင်းများဖွင့်လှစ်သည့် ဒေသများအားလုံးတွင် ကျောင်းနေအရွယ်ကလေးများ ကျောင်းတက်နိုင်ရေးနှင့် ပညာရေးလမ်းကြောင်းပေါ်ကိုရောက်ရှိရေး ဦးစားပေးဆောင်ရွက်သွားရန် လိုအပ်ပါသည်။

၂၀၂၃ ခုနှစ်မှစပြီး ပညာရေးညီလာခံကိုကျင်းပခဲ့ကြောင်း၊ ယခုနှစ်တွင်လည်း ပြီးခဲ့သည့်လက ကျင်းပခဲ့ပြီးဖြစ်ပါသည်။ ပညာရေးညီလာခံများမှရရှိသည့် ဖော်ထုတ်ချက်များကို မြန်မာနိုင်ငံပညာရေး ကဏ္ဍမြင့်မားရေးအတွက် အလေးထားဆောင်ရွက်သွားမည်ဖြစ်ပါသည်။ နိုင်ငံတစ်နိုင်ငံ၏ အနာဂတ်သည် ပညာရေးအပေါ်တွင်အခြေခံခြင်းကြောင့် ပညာရေးအဆင့်တိုးတက်လာရန် ပညာရေးဝန်ထမ်းများအပြင် ကျောင်းသား/ ကျောင်းသူများ၊ မိဘများနှင့်အုပ်ချုပ်သူအဖွဲ့အစည်းများကပါ ဝိုင်းဝန်းပူးပေါင်းဆောင်ရွက် ကြရန်လိုပါသည်။ “အမျိုးသားစည်းကမ်းအစ စာသင်ကျောင်းက” လို့ဆိုသည့်အတိုင်း ကျောင်းစည်း ကမ်းလိုက်နာခြင်းမှစပြီး ဥပဒေစည်းမျဉ်းစည်းကမ်းများကို လေးစားလိုက်နာတတ်သည့်၊ နိုင်ငံကြီးသား ကောင်းပီသသည့် အလေ့အကျင့်ကောင်းများ ကိန်းအောင်းလာအောင် သင်ကြားလေ့ကျင့်ပေးရန် လိုပါသည်။

၂၀၂၄ ခုနှစ်အတွင်း ကွန်ဂိုဒီမိုကရက်တစ် သမ္မတနိုင်ငံနှင့် အာဖရိကတိုက်ရှိ နိုင်ငံများ ၌ Mpox (မျောက်ကျောက်ရောဂါ) ကူးစက်ဖြစ်ပွားမှု အရှိန်မြင့်တက်လာပြီး ကွန်ဂိုဒီမိုကရက်တစ်သမ္မတနိုင်ငံ   အရှေ့ပိုင်းတွင် ရောဂါမျိုးကွဲအသစ် (clade Ib) လျင်မြန်စွာကူးစက်လာခဲ့သည်။ နယ်စပ်ဖြတ် ကျော်နှင့်  နိုင်ငံတကာကူးစက်ပျံ့နှံ့မှုများ ရှိနေခြင်းကြောင့် ကမ္ဘာ့ကျန်းမာရေးအဖွဲ့မှ ၂၀၂၄ ခုနှစ်  ဩဂုတ်လ  ၁၄  ရက်တွင် မျောက်ကျောက်ရောဂါကူးစက်မှုအား နိုင်ငံတကာပြည်သူ့ကျန်းမာရေး အရေးပေါ်အခြေ အနေအဖြစ်  ကြေညာခဲ့ပါသည်။ မြန်မာနိုင်ငံအနေဖြင့် ကူးစက်ဖြစ်ပွားနိုင်ခြေနည်းပါးသော်လည်း အိမ်နီးချင်းနှင့် ဒေသတွင်းနိုင်ငံများတွင် ကူးစက်ဖြစ်ပွားမှုများရှိနေသဖြင့် ကျန်းမာရေးဝန်ကြီးဌာနမှ မျောက်ကျောက်ရောဂါ ကာကွယ်ရေးအတွက် အပြည်ပြည်ဆိုင်ရာလေဆိပ်၊ ဆိပ်ကမ်းနှင့်    နယ်စပ် ဝင်/ထွက်ပေါက်များတွင် ရောဂါစောင့်ကြပ်ကြည့်ရှုမှုအား နှီးနွှယ်ဝန်ကြီးဌာနများနှင့်    ပူးပေါင်းဆောင် ရွက်လျက်ရှိသည်။ ထို့ပြင် လူနာတွေ့ရှိပါက ရောဂါကာကွယ်ထိန်းချုပ် ကုသရေးအတွက် သီးခြားလူနာ ဆောင်များထားရှိရန်၊ လိုအပ်သောဆေးနှင့် ဆေးပစ္စည်းများ အသင့်ပြင်ဆင်ထားရှိရန်နှင့် ပြည်သူ လူထုအတွင်း ရောဂါကာကွယ်ရေးနည်းလမ်းများ ကျန်းမာရေးအသိပညာပေးခြင်းတို့အား အရှိန်အဟုန် မြှင့်တင်ဆောင်ရွက်လျက်ရှိသည်။

မျောက်ကျောက်ရောဂါသည် Mon-key pox virus ဗိုင်းရပ်စ်ပိုးကြောင့် ဖြစ်ပွား သောရောဂါဖြစ်ပြီး ကျောက်ကြီး small pox   ဗိုင်းရပ်စ်မိသားစုအတွင်း  ပါဝင်ပါသည်။ ကလေးသူငယ်များနှင့် လူငယ်များ တွင်   မကြာခဏဖြစ်တတ်သော   ရေကျောက်  (chicken   pox)    နှင့်မတူပါ။ တိရစ္ဆာန်မှ  ကူးစက်သော ရောဂါဖြစ်ပြီး နို့တိုက်သတ္တဝါများ၊ မျောက်များ၊ ကြွက် များမှတစ်ဆင့် ကူးစက်ဖြစ်ပွားရပါသည်။ မူလက    မျောက်များတွင်ဖြစ်ပွားသော ရောဂါဖြစ်သောကြောင့် မျောက်ကျောက် ရောဂါဟု သတ်မှတ်ကြ ခြင်းဖြစ်သည်။ အမှန်အားဖြင့် မျောက်ကျောက်ဗိုင်းရပ်စ် ပိုးကို  ၁၉၅၈ ခုနှစ်တွင်  စတင်တွေ့ရှိခဲ့ပြီး ၁၉၇၀ ပြည့်နှစ်တွင်  ကွန်ဂိုဒီမိုကရက်တစ် သမ္မတနိုင်ငံ၌    မျောက်ကျောက်ရောဂါဝေဒနာရှင်တစ်ဦးကို     စတင်သတိပြုမိခဲ့ကြသည်။  ၂၀၂၂  ခုနှစ်တွင် အာဖရိက အလယ်ပိုင်းနှင့် အနောက်ပိုင်းနိုင်ငံများ၌ ရောဂါ ပြန့်ပွားခဲ့ပြီး ကမ္ဘာ့နိုင်ငံတချို့၌ပါ  ကူးစက်ခံစားခဲ့ရသည်။ ယခု ၂၀၂၄ ခုနှစ်အထိ နိုင်ငံပေါင်း ၁၀၆ နိုင်ငံသို့  ပျံ့နှံ့ဖြစ်ပွားခဲ့ပြီး  ရောဂါဖြစ်ပွားသူ တစ်သိန်းနီးပါးရှိကာ သေဆုံးသူ  ၂၀၀  ကျော်ရှိခဲ့သည်။

ဗိုင်းရပ်စ်အမျိုးအစား နှစ်မျိုးရှိပြီး အာဖရိကအလယ်ပိုင်းတွင် ပျံ့နှံ့ဖြစ်ပွား နေသည့် clade I အမျိုးအစား မှာ ရောဂါ ဝေဒနာပြင်းထန်၍ သေဆုံးမှုနှုန်းလည်း၁၀ ရာခိုင်နှုန်းခန့်အထိရှိသည်။  cladeII အမျိုးအစား မှာ     အနောက်အာဖရိကတွင်   ပျံ့နှံ့ဖြစ်ပွားခဲ့ပြီး   ၂၀၂၂  ခုနှစ်တွင် ကမ္ဘာ့နိုင်ငံများသို့ပါ      ပျံ့နှံ့ခဲ့သည်။   ရောဂါဝေဒနာ မပြင်းထန်ဘဲ ၉၉ ရာခိုင်နှုန်း သက်သာပျောက်ကင်းကြပါသည်။ မျောက်ကျောက် ရောဂါကို  ကလေးငယ်များ၊   ကိုယ်ဝန်ဆောင်မိခင်များ၊ HIV ရောဂါနှင့် ကိုယ်ခံစွမ်းအား လျော့နည်းသည့် သူများတွင် ရောဂါဝေဒနာပိုမိုပြင်းထန်စွာ ခံစားရနိုင်သည်။

မျောက်ကျောက်ရောဂါသည် ရောဂါပိုး ကူးစက်ခံရသော တောရိုင်းတိရစ္ဆာန်များနှင့် တိုက်ရိုက် ထိတွေ့ခြင်း၊ ရောဂါပိုး ရှိသူနှင့် လိင်ဆက်ဆံခြင်း၊ အရေပြားချင်း ထိတွေ့ခြင်း၊ မျက်နှာချင်းဆိုင် အနီးကပ် အချိန်အတော်ကြာတွေ့ဆုံခြင်း၊ လူ၏ အနာများ၊ အညစ်အကြေးများနှင့် တိုက်ရိုက်ထိတွေ့ခြင်း၊  ရောဂါပိုး ကပ်ငြိနေသော အရာဝတ္ထုများ၊ အသုံးအဆောင် ပစ္စည်းများကို လက်ဖြင့်ကိုင်တွယ်မိရာမှ တစ်ဆင့်   ရောဂါပိုး ကူးစက်ခံစားရနိုင်ပါသည်။ ရောဂါပိုးစတင်ဝင်ရောက်ပြီး ၁ ရက်မှ  ၂၁ ရက်အတွင်း ရောဂါလက္ခဏာ များ  စတင်ဖြစ်ပွားနိုင်သည်။ ရောဂါ လက္ခဏာများအနေဖြင့် ဖျား၍ မျက်နှာ၊ လက်၊ ခြေထောက်၊ ပါးစပ်နှင့် လိင်အင်္ဂါ များတွင် အနီကွက်များနှင့်အတူ အရည် ကြည်ဖုများပေါက်ခြင်း၊     ပြန်ရည်အိတ် (lymph node) များ ရောင်ရမ်းခြင်း၊ ခေါင်းကိုက်ခြင်း၊ ကြွက်သားများ နာကျင် ကိုက်ခဲခြင်း၊       မောပန်းနွမ်းနယ်ခြင်း၊ အားအင်ကုန်ခန်းခြင်း စသောလက္ခဏာ များ ခံစားရတတ်သည်။

ရောဂါဝေဒနာ ခံစားနေရသူများတွင် အများစုမှာ ဝေဒနာသက်သာစေသော အဖျားကျဆေး၊     အကိုက်အခဲပျောက် ဆေးများနှင့်ကုသခြင်း၊ ရေများများ သောက်ခြင်းဖြင့် အပြည့်အဝ ပြန်လည် ကျန်းမာနိုင်သည်။    တချို့လူများတွင် ပြင်းထန်သောဝေဒနာ    ခံစားရသဖြင့် ဗက်တီးရီးယား၊   ဗိုင်းရပ်စ် ပိုးသတ်ဆေး များပေး၍ကုသရသည်။ ဦးနှောက်ရောင်၊ မျက်ကြည်လွှာရောင်၊ အဆုတ်ရောင်နှင့် အရေပြားအနာများ ပိုးဝင်ခြင်းတို့ပါ ခံစားရတတ်သည့်အပြင် အမာရွတ်များကျန်ခဲ့ သဖြင့် ကြည့်ရ ဆိုးခြင်း၊ မျက်ကြည်လွှာ ပျက်စီးသွားခြင်းများ တွေ့ကြုံရနိုင်သည်။ ရောဂါရှိ၊ မရှိကို ရောဂါလက္ခဏာ များသာမက အရည်ကြည်များမှ  PCR နည်းပညာသုံး၍ ဗိုင်းရပ်စ်   DNA  ကို ရှာဖွေရသည်။

ရောဂါလက္ခဏာ ခံစားနေရသူများအနေဖြင့် တခြားသူများအား မကူးစက် စေရန်  အရေပြားအနာများ  ကောင်းစွာ မကျက်ခင်အထိ မိမိတစ်ယောက်တည်း သီးသန့်နေထိုင်ခြင်း၊ အစားအသောက်၊ အသုံး အဆောင်များ သီးသန့်သုံးစွဲခြင်း၊ ကိုယ်ခံစွမ်းအား ကျနေသောသူများနှင့် ထိတွေ့မှုရှောင်ကြဉ်ခြင်း၊    အပြင်ခဏ ထွက်ရန်လိုအပ်ပါက ပါးစပ်နှင့်နှာခေါင်း စည်းတပ်ဆင်ခြင်း၊ ခြေလက်များကို အဝတ်များဖြင့် ဖုံးထားရန် လက်ရှည်၊ ဘောင်းဘီရှည်ဝတ်ဆင်ခြင်း၊ နှာစေး၊ ချောင်းဆိုးခြင်းကို အကာအကွယ်မဲ့ မပြုလုပ်ခြင်း၊ လိင်ဆက်ဆံခြင်းမှ ရှောင် ကြဉ်ခြင်းတို့   လိုက်နာဆောင်ရွက်သင့်သည်။ အထူးသဖြင့် ရောဂါပိုးတွေ့ရှိရာ နိုင်ငံများမှ လွန်ခဲ့သော ၂၁ ရက်အတွင်း ပြန်လာသူများ၊ ရောဂါလက္ခဏာခံစား နေရသူများ၊ ထိုသူများနှင့် ထိတွေ့မိသူများ အနေဖြင့် နိုင်ငံတကာနှင့် ပြည်တွင်းသွား လာမှုများ ရှောင်ကြဉ်သင့်သည်။ နီးစပ်ရာ ကျန်းမာရေးဌာနသို့ အမြန်ဆုံးသတင်းပို့ ကုသမှုခံယူသင့်သည်။

 မျောက်ကျောက်ရောဂါခံစားရခြင်းမှ ကာကွယ်နိုင်ရန် သံသယလက္ခဏာခံစား ရသူများနှင့် အနီးကပ် တွေ့ဆုံမှုကို ရှောင်ကြဉ်သင့်သည်။ လိင်ဆက်ဆံထိတွေ့ခြင်းအပါအဝင်၊ အရေပြားချင်း ထိတွေ့ခြင်း၊ မျက်နှာချင်းဆိုင် အနီးကပ် တွေ့ဆုံခြင်းနှင့် ပါးစပ်မှတစ်ဆင့် အရေပြားသို့ထိတွေ့ခြင်းများကို ရှောင်ကြဉ် ရပါမည်။ အနီးကပ်ထိတွေ့မှုကို ရှောင်လွှဲ၍ မရပါက လက်အိတ်ဝတ်ဆင်ခြင်း၊ ပါးစပ်နှင့် နှာခေါင်းစည်း  (mask)   တပ်ဆင်ခြင်း၊   လက်ကို ဆပ်ပြာနှင့်ရေ သို့မဟုတ် လက်သန့်ဆေးရည်အသုံးပြု၍     စနစ်တကျ ဆေးကြောသင့်သည်။ သံသယရောဂါ လက္ခဏာခံစားနေရသူ၏ အသုံးအဆောင်ပစ္စည်းများကို ကိုင်တွယ်ရာတွင် လက်အိတ်ဝတ်ဆင်ခြင်း၊ ပါးစပ်နှင့်နှာခေါင်းစည်း တပ်ဆင်ခြင်းတို့ဖြင့် ရောဂါ ကူးစက်မှုမှ ကာကွယ်နိုင်မည် ဖြစ်သည်။ ထို့ပြင် ပြည်သူလူထုအနေဖြင့် တစ်ဦးနှင့်တစ်ဦး ခပ်ခွာခွာ နေထိုင်ခြင်း၊ နှာချေ၊ ချောင်းဆိုးသည့်အခါတွင် လက်ကိုင်ပဝါ သို့မဟုတ် တံတောင်ကွေးဖြင့်   လုံခြုံစွာ ဖုံးအုပ်ခြင်း၊    ပါးစပ်နှင့်နှာခေါင်းစည်းကို    စနစ်တကျတပ်ဆင်ခြင်း၊   လက်ကိုဆပ်ပြာနှင့်ရေ သို့မဟုတ် ရေမလို လက်သန့်ဆေးရည်အသုံးပြု၍ စနစ်တကျဆေးကြောခြင်း၊ လက်မဆေးဘဲ ပါးစပ်၊    နှာခေါင်းနှင့် မျက်လုံးများ ကိုင်တွယ်ခြင်းမှ ရှောင်ကြဉ်ခြင်းများကို လိုက်နာဆောင်ရွက်သင့်သည်။

အသားစိမ်းများကို ကျက်အောင်ချက် စားရမည်ဖြစ်သကဲ့သို့ အရာဝတ္ထု၊ အိပ်ရာ ခင်း၊ မျက်နှာသုတ်ပဝါ၊ အဝတ်အစားများကို သန့်ရှင်းရေးပုံမှန်ပြုလုပ်ရမည်။ လိင်ဆက်ဆံချိန်တွင် ကွန်ဒုံးအသုံးပြုခြင်းသည်   မျောက်ကျောက်ရောဂါ  ကူးစက်ပြန့်ပွားမှုကို မကာကွယ်နိုင်သော်လည်း လိင်မှတစ်ဆင့် ကူးစက်သော ရောဂါတချို့ကို  ကာကွယ်နိုင်သည်။  တစ်ကိုယ်‌ရေသန့်ရှင်းရေးနှင့် မိမိ၏ပတ်ဝန်းကျင် သန့်ရှင်းရေး    ကောင်းမွန်စေရန်လည်း ဆောင်ရွက်ကြရမည်ဖြစ်သည်။  မျောက်ကျောက်ရောဂါကာကွယ်ဆေး (JYNN-EOS) သည် ကျောက်ကြီးကာကွယ်ဆေး အမျိုးအစားမှ ဆင့်ပွားဖြစ်လာသည့် ကာကွယ်ဆေးဖြစ်ပြီး လေးပတ်ခြားကာ နှစ်ကြိမ်ထိုးရန်လိုအပ်သည်။ ဒုတိယဆေးထိုးပြီး နှစ်ပတ်အကြာတွင် ကာကွယ် မှုရနိုင်သည်။ အထူးသဖြင့် ရောဂါ ဖြစ်ပွားနိုင်ခြေရှိသူများ၊ လိင်ဆက်ဆံဖက်များသူများ၊ ရောဂါရှိသူ များနှင့် ထိတွေ့ခဲ့သူများ၊ ကျန်းမာရေးဝန်ထမ်းများ၊ ဓာတ်ခွဲခန်းဝန်ထမ်းများကို ဦးစားပေး ထိုးနှံရန် လိုအပ်သည်။

မည်သူမဆို မျောက်ကျောက်ရောဂါဖြစ်ပွားနိုင်သကဲ့သို့ တခြားသူကိုလည်း ကူးစက်နိုင်သဖြင့် ကျန်းမာရေး သတိဖြင့် ကာကွယ်ရေးနည်းလမ်းများကို စနစ်တကျ လိုက်နာဆောင်ရွက်ရမည်ဖြစ်သည်။    ရောဂါဝေဒနာများခံစားရပါက သက်ဆိုင်ရာကျန်းမာရေးဌာနသို့ သတင်းပို့ ကုသမှုခံယူပြီး တခြား သူများကို  မိမိထံမှတစ်ဆင့် မကူးစက်စေရန်  သတိထား ဆောင်ရွက်ကြရမည်။ မြန်မာနိုင်ငံအနေ ဖြင့်လည်း    ကျန်းမာရေးဝန်ကြီးဌာန၏   ဦးဆောင်မှုအောက်တွင်     ပြည်သူလူထု တစ်ရပ်လုံး ပူးပေါင်း လိုက်နာဆောင်ရွက်မှုများဖြင့် မျောက်ကျောက်ရောဂါဖြစ်ပွားမှုကို ကာကွယ်တားဆီးတိုက်ထုတ်ကြရ မည်ဖြစ်ကြောင်း ရေးသားတင်ပြလိုက် ရပါသည်။    ။

ဒေါက်တာ ဥမ္မာစော

မြန်မာတို့သည် ရှေးပဝေသဏီဘိုးဘေးဘီဘင်လက်ထက် ကတည်းက ကိုယ့်ထီး၊ ကိုယ့်နန်း၊ ကိုယ့်ကြငှန်း၊ ကိုယ့်အမျိုး၊ ကိုယ့်ဘာသာ၊ ကိုယ့်စာပေ၊ ကိုယ့်ယဉ်ကျေးမှု၊ ကိုယ့်အနုပညာနှင့် အမှီအခိုကင်းစွာ ရပ်တည်လာနိုင်ခဲ့ကြလေသည်။ ဘိုးတော်ဘုရားတောင်းဆိုမှုကြောင့် မြဝတီမင်းကြီးဦးစက စောင်းကြိုးကို ခုနစ်ကြိုးမှ ၁၃ ကြိုးအထိ တီထွင်နိုင်ခဲ့သည်။ ဗုံ ၂၁ လုံးကို ကြီးစဉ်ငယ်လိုက်စီကာ ပတ်စာဖြင့်အသံညှိ၍တီးရသော မြန်မာ့ဆိုင်းဝိုင်းသည် မြဝတီမင်းကြီး ဦးစလက်ထက်မှ အစပြုခဲ့သည်ဟု ရှေးပညာရှိများက ယူဆခဲ့ကြလေသည်။ ထိုကဲ့သို့ ဘိုးဘေးများ ခက်ခက်ခဲခဲတီထွင်ဖန်တီးခဲ့ရသော ရိုးရာယဉ်ကျေးမှုအနုပညာအမွေများကို ထာဝစဉ်ထိန်းသိမ်း စောင့်ရှောက်သွားကြရန် နိုင်ငံသားတိုင်းတွင် တာဝန်ရှိပါသည်။

ခေတ်မီနည်းပညာများ တိုးတက်နေသောကမ္ဘာကြီးတွင် တိုးတက်မှုမြန်သကဲ့သို့ ဆုတ်ယုတ်မှုလည်း မြန်ဆန်လွန်းလှပါသည်။ နိုင်ငံတော်၏ သယံဇာတနှင့် ပထဝီအနေအထားကို မျက်စိကျနေသော အနောက်နိုင်ငံများ၏ သွေးထိုးလှုံ့ဆော်မှုများကြောင့် ဒေါ်လာကိုသာ ချစ်သော ပြည်ဖျက်မီဒီယာများသည် နိုင်ငံ၏စည်းလုံးညီညွတ်မှု ပြိုကွဲစေရန် နည်းမျိုးစုံသုံးပြီး လုပ်ကြံဖန်တီးနေသည်ကို အများသိရှိပြီးဖြစ်ပါသည်။ ဆူလွယ်နပ်လွယ် ယုံလွယ်သော ဆယ်ကျော်သက် လူငယ်လေးများကို နိုင်ငံရေးလုပ်ဇာတ်ခင်းကာ PDF (ပြည်သူ့ ကာကွယ်ရေးတပ်ဖွဲ့) ဟူ၍ အမည်နာမပေးပြီး ဗီလိန်ဇာတ်ရုပ်မှ ကခိုင်းနေကြသည်။ ဗီလိန်ဇာတ်ကောင်များကလည်း တည်ငြိမ်အေးချမ်းမှုပြိုကွဲစေရန် ဖျက်ဆီးမှုနည်းမျိုးစုံကို ပြုလုပ်ကြလေသည်။ ယဉ်ကျေးမှုပွဲတော်များ မဖြစ်မြောက်စေရန် အွန်လိုင်းပေါ်မှ ခြောက်လှန့်ကြသည်။ ဘုရားပွဲတော်များသို့ လူအများ စည်စည်ကားကားမသွားနိုင်ရန် အနှောင့်အယှက်ပြုကြလေသည်။ ယဉ်ကျေးမှုပွဲတော်များကို မကျင်းပနိုင်ရန် တားဆီးခြင်းသည် ယဉ်ကျေးမှုအမွေ အနှစ်၏တန်ဖိုးကို မသိခြင်းကြောင့်ပင်ဖြစ်ပေသည်။ ကိုယ့်ယဉ်ကျေးမှုကို လေးစားတန်ဖိုးထားခြင်းမရှိဘဲ ဖျက်ဆီးနေသောသူများသည် တိုင်းပြည်ကိုဖျက်ဆီးနေခြင်းနှင့် အတူတူပင်ဖြစ်ပါသည်။

တန်ဖိုးသိမှ တန်ဖိုးရှိမည်ဖြစ်သည်။ သီတင်းကျွတ်မီးထွန်းပွဲတော်သို့ သွားသောသူသည် သီတင်းကျွတ်မီးထွန်းပွဲပြုလုပ်ရခြင်း၏ ရည်ရွယ်ချက်ကိုသိရန်လိုအပ်ပါသည်။ ကထိန်ပွဲဆင်နွှဲသောသူသည် ကထိန်ခင်းရခြင်း၏ရည်ရွယ်ချက်ကို သိရန်လိုပါသည်။ ရရှိနိုင်သော ကောင်းကျိုးချမ်းသာများကိုလည်း သိရန်လိုပါသည်။ ထိုသို့သိမြင် တန်ဖိုးထားတတ်စေရန် မိဘနှင့် ဆရာသမားများက သွန်သင်ဆုံးမ ပြောပြရန်လိုအပ်ပါသည်။ အခြေခံအုတ်မြစ် ကောင်းကောင်းချနိုင်မှသာ ရာသီဥတုဒဏ်ခံနိုင်သော အဆောက်အအုံကောင်းဖြစ်နိုင်သလို မိမိတို့ရင်သွေးငယ်များ၏ နှလုံးသားထဲတွင် ဘာသာတရားနှင့် အမျိုးသားယဉ်ကျေးမှုအမွေကို တန်ဖိုးထားသောစိတ်ဓာတ်များ အုတ်မြစ်ချပေးကြရန်အတွက် မိဘနှင့်ဆရာသမားများတွင် အထူးတာဝန်ရှိသည်ဟု ထင်မှတ်မိပါသည်။

လူမျိုးရှိလျှင် ကိုးကွယ်ယုံကြည်သော ဘာသာတရားရှိကြလေ သည်။ ဘာသာပျောက်လျှင် လူမျိုးပါပျောက်ကွယ်နိုင်သဖြင့် ဗုဒ္ဓဘာသာ ထာဝစဉ်တည်တံ့စေရန် မိမိတို့၏ရင်သွေးငယ်များကို ဘာသာရေးနှင့် ဆက်နွှယ်သောအဆုံးအမများ၊ ငါးရာ့ငါးဆယ်နိပါတ်တော်လာပုံပြင် များဖြင့် အခြေခံအုတ်မြစ်ကောင်းအောင် တည်ဆောက်ပေးသင့်ပါသည်။ နိုင်ငံတော်အစိုးရကလည်း ယဉ်ကျေးလိမ္မာသောလူငယ်များဖြစ်လာ စေရန်ရည်ရွယ်၍ နွေရာသီကျောင်းပိတ်ရက်တွင် ယဉ်ကျေးလိမ္မာ သင်တန်းများကို ဖွင့်လှစ်ပေးလျက်ရှိပါသည်။ နိုင်ငံတော်၏စေတနာကို လေးစားသောအားဖြင့် နွေရာသီကျောင်းပိတ်ရက်များတွင် မိမိတို့၏ ရင်သွေးငယ်များကို ယဉ်ကျေးလိမ္မာသင်တန်းများသို့ ပို့ဆောင်ပေးခြင်းဖြင့် ဘာသာတရားအခြေခံအုတ်မြစ် ခိုင်မာစေခြင်းအကျိုးထူးများ ရရှိနိုင်ပါလိမ့်မည်။ ယဉ်ကျေးသောလူ့စွမ်းအားအရင်းအမြစ်များဖြင့် ဖွဲ့စည်း ထားသော နိုင်ငံ၏အနာဂတ်လမ်းသည်လည်း ဖြောင့်ဖြူးသာယာစွာရှိနေပေလိမ့်မည်။

လမင်းဟံသာ(ပဲခူး)

အားကစားမြှင့်တင်ဆောင်ရွက်ပေးခြင်းသည် နိုင်ငံတော်ကိုကာကွယ်စောင့်ရှောက်နေခြင်းနှင့်လူငယ်များ၏စိတ်ဓာတ် (Mind Set) ကို ပြုပြင်ပေးခြင်းပင်ဖြစ်သည်။

လူငယ်ဆိုတာ နိုင်ငံတော်အတွက် အလွန်တန်ဖိုးကြီးမားတဲ့ လူသားအရင်းအမြစ်ပါ။ မြန်မာနိုင်ငံမှာလူငယ်အရေအတွက် အလွန်ပဲ များပြားလှပါတယ်။ ဒီလိုများပြားလှတဲ့ လူငယ်တွေဟာ စွမ်းရည်အပြည့်အဝ ထုတ်သုံးနိုင်တဲ့ အင်အားရှိသူတွေပဲ ဖြစ်ပါတယ်။ ဒီလူငယ်တစ်ဦးစီရဲ့ ကြိုးစားအားထုတ်မှုတွေဟာ သူ့အတွက်သာ အကျိုးရှိတာမဟုတ်ဘဲ သူ့မိသားစုအသိုင်းအဝိုင်းနဲ့ နိုင်ငံတော်အထိ အကျိုးရှိစေနိုင်ပါတယ်။ လူငယ်တွေကြိုးစားမှုကြောင့်  မြင့်မားတဲ့အနာဂတ်ကိုရရှိပိုင်ဆိုင်နိုင်ရင် ရေမြင့်တော့ကြာမြင့်လာသလို  နိုင်ငံတော်လည်း  တိုးတက်လာမှာပါပဲ။ ဒါ့ကြောင့် လူငယ်တွေရဲ့ အနာဂတ်ကောင်းမွန်ဖို့ အထူးပဲ ကြိုးစားကြဖို့ အရေးကြီးကြောင်း အသိပေးချင်ပါတယ်။

လူငယ်တွေအနာဂတ်အတွက် ဗလငါးတန်ပြည့်စုံအောင် ကြိုးစားသင့်ပါတယ်။ ဗလငါးတန်ရဲ့အခြေခံက “စာရိတ္တဗလ” ဆိုတဲ့ ကိုယ်ကျင့်သီလနဲ့ ပြည့်စုံခြင်းပါ။ စာရိတ္တဗလဆိုတဲ့ ကိုယ်ကျင့်သီလနဲ့ ပြည့်စုံတဲ့သူကို လူတွေက ချစ်ခင်လေးစားကြပါတယ်။ ဒါ့ကြောင့် “မိတ္တဗလ” ဆိုတဲ့ မိတ်ဆွေသင်္ဂဟကောင်းတွေနဲ့ ပြည့်စုံခြင်းကိုရပါမယ်။ မိတ်ကောင်းဆွေကောင်းတွေနဲ့ ပြည့်စုံတဲ့သူ တွေမှာ စီးပွားဥစ္စာရှာဖွေရလွယ်ကူတဲ့အတွက် “ဘောဂဗလ” ဆိုတဲ့  စီးပွားဥစ္စာနဲ့ပြည့်စုံခြင်းကိုရရှိပါမယ်။ စီးပွားရေးနဲ့ပြည့်စုံရင် ပညာသင်တာပဲဖြစ်ဖြစ်၊ စာအုပ်စာစောင်တွေ ဝယ်ဖတ်တာပဲဖြစ်ဖြစ် လုပ်နိုင်သွားပြီဆိုတော့ “ဉာဏဗလ” ဉာဏ်ပညာနဲ့ ပြည့်စုံခြင်း ကိုရပြီပေါ့။ ဉာဏ်ပညာနဲ့ယှဉ်ပြီး နေထိုင်စားသောက်နိုင်ပြီဆိုရင် “ကာယဗလ” ကိုယ်ခန္ဓာကျန်းမာကြံ့ခိုင်ခြင်းနဲ့ ပြည့်စုံပါပြီ။ အဲဒီလို ဗလငါးတန်နဲ့ပြည့်စုံပြီဆိုရင် လောကမှာ အောင်မြင်တဲ့သူဖြစ်နိုင်ပါပြီ။

လူငယ်တွေ ဘဝနှောင့်နှေးရတဲ့ပြဿနာတစ်ခုကတော့ ငွေရေးကြေးရေးပါပဲ။ တချို့က ငွေကြေးမတတ်နိုင်တဲ့အတွက် ပညာတစ်ပိုင်း တစ်စနဲ့ရပ်တန့်ရတယ်။ တချို့ကတော့ ငွေကြေးကိုအလျှံပယ်သုံးပြီး ပျက်စီးကြတယ်။ မိဘကပေးတဲ့ငွေကို စနစ်တကျမသုံးဘဲ အကြွေးတင်ကြတယ်။ လောင်းကစားလုပ်ပြီး ကြွေးတင်နေတဲ့ လူငယ်တွေလည်းရှိတယ်။ ငွေကြေးကိစ္စဟာ လူတစ်ယောက်ရဲ့ ဂုဏ်သိက္ခာကို ကြီးကြီးမားမား ထိခိုက်နိုင်တာကြောင့် လူငယ်တွေသတိထား ထိန်းသိမ်းသင့်ပါတယ်။  ကိုယ်မသုံးသင့်တဲ့ငွေကို မသုံးပါနဲ့။ ဘာကြောင့်မှ ကြွေးတင်မခံပါနဲ့။ ခြိုးခြံချွေတာပါ။ ငွေကြေးအရှုပ်အရှင်းကင်းတာဟာ စိတ်ဓာတ်ခွန်အားကို တိုးပွားစေ တာမို့ အနာဂတ်မှာအောင်မြင်ချင်တဲ့ လူငယ်တစ်ယောက်ဖြစ်ချင်ရင် ငွေကြေးကို အမြဲသတိထားဆင်ခြင်သုံးစွဲရမှာဖြစ်ပါတယ်။

အချိန်ဆိုတာ ငွေနဲ့ဆက်ပြီးဝယ်ရတာမဟုတ်တဲ့အတွက် အချိန်ကိုတန်ဖိုးမထားမိကြပါဘူး။ ကိုယ့်အချိန်ကိုပဲဖြစ်ဖြစ်၊ သူများအချိန် ကိုပဲဖြစ်ဖြစ် အလွယ်တကူဖြုန်းတီးလေ့ရှိကြပါတယ်။ “အချိန်နဲ့ဒီရေသည် လူကိုမစောင့်” လို့ အချိန်ကိုမဖြုန်းဖို့ ပြောတတ်ကြသလို၊ “လသာတုန်းဗိုင်းငင်” ဆိုပြီးလည်း အချိန်ကိုအကျိုးရှိရှိ သုံးတတ်အောင် သတိပေးလေ့ရှိကြပါတယ်။ တကယ်တော့ ငွေရှိရင်ရွှေကို ကြိုက်သလောက် ဝယ်လို့ရနိုင်ပေမယ့် ကုန်သွားတဲ့အချိန်တွေကိုတော့ ဘယ်တော့မှ ပြန်ဝယ်လို့မရနိုင်တာ လူငယ်တွေ သိစေချင် ပါတယ်။ ဘဝအတွက်တန်ဖိုးရှိတဲ့ အချိန်တွေကို ဖြုန်းတီးရင်း ကုန်ဆုံးစေမယ့်အစား တန်ဖိုးရှိရှိသုံးစွဲစေချင်ပါတယ်။

အိပ်ချိန်၊ စားချိန်၊ စာဖတ်ချိန်၊ အလုပ်လုပ်ချိန်၊ စာသင်ချိန်ဆိုပြီး ၂၄ နာရီကို သေချာစနစ်ချပြီး သုံးစေချင်ပါတယ်။ ကိုယ်ပိုင်အချိန်ကို စနစ်တကျ သုံးစွဲတတ်မှ အလုပ်လုပ်တဲ့အခါ စနစ်ကျပြီးအောင်မြင်မှုရနိုင်မှာပါ။ အချိန်ကိုတန်ဖိုးမထားတဲ့သူက ဘယ်တော့မှ မအောင်မြင်နိုင်ပါဘူး။

အလုပ်ကိုနောက်ကျမှသွားတာ၊ အချိန်မတန်ခင်စောပြန်တာတွေက အချိန်ကိုခိုးတာဖြစ်တဲ့အတွက် အဒိန္နဒါန ကံမြောက်တယ်လို့  ဆရာတော်ကြီးတွေ ဟောကြပါတယ်။ အကြီးအကဲက အရေးယူ၊ မယူထက် အကုသိုလ်ကံကိုတော့ ကျူးလွန်ပြီးသားဖြစ်ပါတယ်။ ဒါကြောင့် အချိန်သူခိုးမဖြစ်စေဖို့လည်း သတိထားသင့်ပါတယ်။

လူငယ်တွေအနာဂတ်မှာ အောင်မြင်စေဖို့ ပြောပြချင်တဲ့ နောက်တစ်ချက်ကတော့ မိမိကိုယ်ကိုစီမံခန့်ခွဲဖို့ပါ။ မနက်ဘယ်နှနာရီ အိပ်ရာထမယ်။ ရေဘယ်အချိန်ချိုးမယ်။ မနက်စာဘယ်လိုစားမယ်။ ကျောင်းကိုဘယ်အချိန်တက်ရမယ်။ အိမ်က ဘယ်အချိန်ထွက် မယ်။ ဘယ်အချိန်အိမ်ပြန်မယ်။ သူငယ်ချင်းနဲ့ ဘယ်အချိန်တွေ့မယ်ကစပြီး စနစ်ချရပါမယ်။ အိပ်ချင်တဲ့အချိန်အိပ်ပြီး ထချင်တဲ့ အချိန်ထ၊ သွားချင်မှသွားဆိုရင်တော့ အောင်မြင်မှုနဲ့ဝေးကွာနေဦးမှာပါပဲ။

စီမံခန့်ခွဲမှုတွေဆိုတာ အလုပ်ခွင်ရောက်မှသင်ရမှာမဟုတ်ဘဲ ကိုယ့်ကိုယ်ကိုယ် စီမံခန့်ခွဲတာနဲ့စကြရမှာပါပဲ။ ကိုယ့်ဘာသာကိုယ် တောင် စနစ်တကျ စီမံချက်ချပြီး  အလုပ်မလုပ်တတ်ရင်  လူငယ်တစ်ယောက်ရဲ့အနာဂတ်အောင်မြင်မှုဆိုတာ ဝေးကွာနေဦးမှာပါလို့ ပြောပြချင်ပါတယ်။

လူငယ်တွေအနေနဲ့ နိုင်ငံ့သမိုင်းနဲ့ဆိုင်တဲ့ အကြောင်းအရာတွေကို သိရပါမယ်။ ကိုယ့်အမျိုးသားအကျိုးစီးပွားကို ထိပါးနှောင့်ယှက် နိုင်တဲ့အကြောင်းအရာတွေကိုလည်း သိထားရပါမယ်။ ကိုယ့်နိုင်ငံရဲ့ရေမြေတောတောင် ပထဝီဝင်ကိုလည်း သိရပါမယ်။ နိုင်ငံအတွက် အကျိုးဖြစ်ထွန်းစေဖို့ ဘာတွေလုပ်ဆောင်ရမလဲ။ ဘာတွေလုပ်ရင် နိုင်ငံအတွက်အကျိုးမဲ့သလဲ။ ဒါတွေကို သိထားမှသာ နိုင်ငံ တည်ဆောက်ရေးမှာ  ပါဝင်ဆောင်ရွက်တဲ့အခါ အထောက်အကူပြုပါမယ်။ ဗဟုသုတနည်းရင် တစ်ကိုယ်ကောင်းဆန်ပြီး နိုင်ငံအကျိုး ဖျက်ဆီးသူဖြစ်သွားတတ်ပါတယ်။

ကိုယ်ဘယ်နေရာမှာရပ်တည်သင့်တယ်ဆိုတာကို သေသေချာချာသိနေစေဖို့ စီးပွားရေး၊ လူမှုရေး၊ နိုင်ငံရေး၊ ယဉ်ကျေးမှု၊ ပညာရေး၊ ကျန်းမာရေးတွေ အားလုံးကို သိရှိနေသင့်ပါတယ်။ အနာဂတ်မှာ ခေါင်းဆောင်ရမယ့်လူငယ်တစ်ယောက်အနေနဲ့ ရှိထားတဲ့ ဗဟုသုတ တွေကို အခြေခံစဉ်းစားမှလုပ်သင့်တာ၊ မလုပ်သင့်တာတွေကို ခွဲခြားဆုံးဖြတ်နိုင်ပါမယ်။ ကိုယ်ပြုလုပ်လိုက်တဲ့အပြုအမူက အပြုသဘော ဆောင်သလား၊  အပျက်သဘော ဆောင်သလားဆိုတာကို သေသေချာချာသုံးသပ်နိုင်ဖို့ ပညာဗဟုသုတနဲ့ ပြည့်စုံမှသာ ဖြစ်နိုင်ပါမယ်။

ဗဟုသုတတွေကို ဘယ်လိုရှာမှီးကြမလဲ။ အကောင်းဆုံးကတော့စာဖတ်ခြင်းနဲ့ရှာနိုင်ပါတယ်။  တစ်အုပ်ထဲဖတ်ပြီး   တရားသေမှတ်လို့ တော့မရဘူးနော်။ ဘယ်ဆရာက ဘယ်လိုရေးခဲ့သလဲဆိုတာကို နှိုင်းယှဉ်ပြီးဖတ်ရပါမယ်။ ပြီးရင် မှန်မမှန်ပြန်သုံးသပ်ပြီး ဆုံးဖြတ် ရပါမယ်။ စာစုံဖတ်ရမယ်။ ခရီးထွက်ရမယ်။ ခရီးတွေသွားရင် ဖုန်းသုံးရင်းသွားတာထက် ပတ်ဝန်းကျင်ကိုလေ့လာရမယ်။ ရေမြေတော တောင်၊ ရာသီဥတု၊ မြေပြင်အနေအထား၊ စိုက်ပျိုးတဲ့သီးနှံ၊ ပြောလေ့ရှိတဲ့စကား၊ လေယူလေသိမ်းနဲ့ စားသောက်တဲ့ဓလေ့ထုံးစံတွေက သိပ်စိတ်ဝင်စားဖို့ကောင်းပါတယ်။ တစ်နိုင်ငံတည်းနေကြတဲ့ တိုင်းရင်းသားတွေအကြောင်းကိုလည်း သိဖို့လိုပါတယ်။ ဒါတွေသိ ထားရင် တစ်နေရာရာမှာတော့ အထောက်အကူပြုမှာပါပဲ။

ပညာဗဟုသုတမပြည့်ဝဘဲ ခံစားချက်ကိုရှေ့တန်းတင်ပြီး ဆုံးဖြတ်ချက်ချရင် မှားတတ်တယ်ဆိုတာ လက်ရှိအခြေအနေတွေက သာဓကပြနေပါတယ်။ လူငယ်တစ်ယောက်ချင်းစီ ကိုယ့်ကိုယ်ကိုယ် အရေးပါတယ်လို့ တွေးစေချင်ပါတယ်။ တစ်ယောက်ချင်းစီ လွဲမှားမှုတွေကနေ နိုင်ငံနဲ့ချီတဲ့ ဆုံးရှုံးမှုတွေဖြစ်တတ်တယ်လို့သတိထားစေချင်ပါတယ်။

လူငယ်တွေရဲ့ အနာဂတ်ရည်မှန်းချက်တွေ ပျက်စီးစေနိုင်တဲ့ မူးယစ်ဆေးဝါးဆိုတဲ့အရာကို လုံးဝရှောင်ရှားကြဖို့လည်း အလေးအနက် ထားပြီးပြောချင်ပါတယ်။

ဒီနှစ်တွေအတွင်းမှာ ဆေးလိပ်သောက်တဲ့လူငယ်တွေ ပိုများလာတာတွေ့ရပါတယ်။ “မူးယစ်ဆေးဝါးအစ ဆေးလိပ်က” မို့ ဆေးလိပ်ကို လုံးဝရှောင်ကြဉ်ရပါမယ်။ ဆေးလိပ်ကတစ်ဆင့် မူးယစ်ထုံထိုင်းစေတဲ့ ဆေးဝါးတွေသုံးစွဲကြရင် လူငယ်ဘဝ အညွန့်ကျိုး တာပါပဲ။ မူးယစ်သားကောင်ဖြစ်သွားရင် ရုန်းထွက်ဖို့အလွန်ခက်ပါတယ်။ စိတ်ကိုနိုင်နင်းလို့ ဆေးဖြတ်နိုင်ရင်တောင် “ဆေးသမား” ဆိုတဲ့ဂုဏ်ပုဒ်က ကျန်နေခဲ့တာကြောင့် လူ့အသိုင်းအဝိုင်းထဲ  ပြန်လည်ဝင်ဆံ့ဖို့ခက်ပါတယ်။

“အာရောဂျံ ပရမံလာဘံ” ကျန်းမာရေး ဟာလာဘ်ကြီးတစ်ပါးလို့ ပြောကြပါတယ်။ ကျန်းမာရင် ဘယ်သွားသွား ဘာလုပ်လုပ် အဆင်ပြေပါတယ်။ လူငယ်တွေ ကျန်းမာရေးကောင်းမွန်အောင် ဂရုစိုက်နေထိုင်မယ်ဆိုရင် စိတ်သွားတိုင်းကိုယ်ပါပြီး လိုရာဆန္ဒတွေနဲ့ ပြည့်စုံမှာပါပဲ။ ကျန်းမာရေးထိခိုက်စေတဲ့ ညအိပ်ချိန်မမှန်တာ၊ အစားမမှန်တာတွေ မဖြစ်သင့်ပါဘူး။ ကိုယ်လက်လှုပ်ရှား အားကစားကို လည်း ဝါသနာပါရာရွေးချယ်ပြီး လုပ်သင့်ပါတယ်။ ဒီခေတ်လူငယ်တွေ တယ်လီဖုန်းအသုံးများတဲ့အတွက် အမြင်အာရုံ ထိခိုက်တာကလည်း ကျန်းမာရေး ပြဿနာတစ်ခုပါပဲ။

ရုပ်ပိုင်းဆိုင်ရာ ကျန်းမာရေးကောင်းမွန်အောင် အာဟာရပြည့်ဝတဲ့ အစားအစာတွေ စားရပါမယ်။ ကိုယ်လက်လှုပ်ရှားမှုကိုလည်း ပုံမှန်လုပ်သင့်ပါတယ်။ မခက်ခဲဘဲ လူတိုင်းလုပ်နိုင်တဲ့ အသက်ရှူလေ့ကျင့်ခန်းကိုလည်း မေ့ထားလို့မရပါဘူး။ အသက်ရှူ လေ့ကျင့်ခန်းဟာ ရုပ်ပိုင်းအတွက်ကောင်းမွန်သလို စိတ်ဖိစီးမှုတွေ၊ သောကတွေ၊ ဒေါသတွေကိုလည်း သက်သာစေတာကြောင့် စိတ်ပိုင်းဆိုင်ရာအတွက်လည်း အထူးသင့်တော်ပါတယ်။

စိတ်ပိုင်းဆိုင်ရာ ကျန်းမာရေးကောင်းမွန်နေဖို့ကိုလည်း အထူးဂရုစိုက်ရပါမယ်။ ကိုယ်မတတ်နိုင်တဲ့ ပစ္စည်းတွေကို လိုချင်တာ၊ အကောင်းမြင်စိတ် မရှိတာတွေကလည်း စိတ်ကျန်းမာရေးထိခိုက်စေပါတယ်။ တခြားသူတွေကို တန်ဖိုးထားသလို ကိုယ့်ကိုယ်ကိုယ် လည်း တန်ဖိုးထားရပါမယ်။ ကိုယ့်ကိုယ်ကိုယ်တန်ဖိုးထားတတ်မှ ကိုယ်ကျင့်သိက္ခာထိန်းသိမ်းဖို့ သတိရှိပါမယ်။ မလုပ်သင့်တာကို မလုပ်ဖြစ်အောင် ထိန်းချုပ်နိုင်တာကလည်း ကိုယ့်ကိုယ်ကိုယ် တန်ဖိုးထားလို့ပါပဲ။

အကောင်းမြင်စိတ်ရှိသူကို  လူတွေချစ်ခင်ကြပြီး သူတို့ဟာ ပေါင်းသင်းဆက်ဆံရေး ကောင်းမွန်သူတွေ ဖြစ်ကြပါတယ်။  ပေါင်းသင်း ဆက်ဆံရေးကောင်းတဲ့သူဟာ အများကိုလည်းစိတ်ချမ်းသာစေပြီး ကိုယ်တိုင်လည်း စိတ်ကြည်လင်တော့ လုပ်ကိုင်သမျှအောင်မြင်တဲ့ ဆုကိုရနိုင်ပါတယ်။ လူငယ်များအနေဖြင့် နေ့စဉ်နဲ့အမျှ အတတ်ပညာ၊ အသိပညာတွေကိုသင်ကြားနေတာဟာ လူငယ်တစ်ယောက်ရဲ့ တာဝန်ကို ကျေပွန်စွာထမ်းဆောင်နေတာဖြစ်ပါတယ်။ ကိုယ့်ကိုယ်ကိုယ် အကောင်းဆုံးဖြစ်လာအောင် လေ့ကျင့်ကြိုးစားနေတာ ကလည်း နိုင်ငံတော်ကို ကျေးဇူးပြုနေခြင်းပဲဖြစ်ပါတယ်။  အတွေးမှန်၊ အမြင်မှန်၊ အသိတွေမှန်ပြီး မိမိရဲ့အနာဂတ်အောင်မြင်ရေးဟာ နိုင်ငံတော်အတွက်လည်း အထောက်အကူပြု ရမယ်ဆိုတဲ့စိတ်ထားတွေနဲ့ ကြိုးစားအားထုတ်ကြစေချင်ပါကြောင်း မေတ္တာရှေ့ ထားပြီး တိုက်တွန်းလိုက်ပါရစေ။   ။

သက်သက်နွယ်(ရန်ကုန်တက္ကသိုလ်)

မြန်မာလူမျိုးတို့၏ သီတင်းကျွတ်လပြည့်နေ့သည်  နေ့ထူးနေ့မြတ်ဖြစ်သလို အဘိဓမ္မာအခါတော်နေ့လည်း ဖြစ်ပါသည်။ သီတင်းကျွတ်လပြည့်နေ့တွင် ရဟန်းသံဃာတော်တို့ သည်  ပဝါရဏာပြုပွဲများ  ကျင်းပကြသည်။ မြန်မာဗုဒ္ဓဘာသာဓလေ့အတိုင်း မွန်မြတ်သော စိတ်နေသဘောထားဖြင့်  ဂါရဝေါစ၊ နိဝါတောစ တရားကြီးမားပုံကို ပြသသောအနေဖြင့် ဘိုးဘွား၊ မိဘ၊ ဆရာသမားများကို ပူဇော်ဂါရဝပြုလေ့ရှိကြသည်။

 လွန်းပိုးအိမ်

အရိပ်လိုအပင်ပျိုးရသည်။ ရင့်မာအပွေးတက်ဖို့အချိန်ယူရသည်။ ဆိုခဲ့ပါနိယာမနှင့်အညီ အနာဂတ်ကိုပိုင်စိုးမည့်၊ နောင်တစ်ခေတ်တွင် နိုင်ငံတော်နှင့် နိုင်ငံသားတို့၏ ပြည်မှုရေးရာကိစ္စအဝဝကို ပခုံးပြောင်းတာဝန် ထမ်းဆောင်ကြမည့် မျိုးဆက်သစ်လူငယ်ခေါင်းဆောင်လောင်းလျာများကို ကမ္ဘာ့နိုင်ငံအသီးသီးမှ စနစ်တကျပြုစုပျိုးထောင်လေ့ရှိကြသည်။ မြန်မာနိုင်ငံတွင်လည်း နိုင်ငံတော်အကြီးအကဲ၏ လမ်းညွှန်မှုဖြင့် လူငယ်ဖွံ့ဖြိုးရေးစီမံကိန်းများကို အမြော်အမြင်ရှိရှိ စီမံဆောင်ရွက်၍ စနစ်တကျပြုစုပျိုးထောင်ပေးလျက်ရှိသကဲ့သို့ မြန်မာလူငယ်မောင်မယ်များအနေဖြင့်လည်း ဗလငါးတန်ဖွံ့ဖြိုးရုံမက ပြောင်းလဲနေသောကမ္ဘာကြီးတွင် မျိုးဆက်သစ်လူငယ်များ တက်ကြွစွာပါဝင်နိုင်ရေးအတွက် ကြိုတင်ပြင်ဆင်ဖို့လိုသည်။ အဆိုပါ လိုအပ်ချက်နှင့်အညီ ပြန်ကြားရေးဝန်ကြီးဌာန၊ အားကစားနှင့်လူငယ်ရေးရာဝန်ကြီးဌာန၊ ရန်ကုန်တိုင်းဒေသကြီး အစိုးရအဖွဲ့နှင့် မြန်မာ့ပုံရိပ်ဖော်ညွှန်းရေးအဖွဲ့ (Myanmar Narrative Think Tank) တို့ပူးပေါင်း၍ မြန်မာ့အနာဂတ်မျက်နှာစာလူငယ်မဟာဗျူဟာ ဖိုရမ် - ၂၀၂၅ ကို ရန်ကုန်မြို့ရှိ မြန်မာကွန်ဗင်းရှင်းစင်တာ (MCC) ၌ ဩဂုတ် ၃၀ ရက်မှ စက်တင်ဘာ ၁ ရက်အထိ သုံးရက်တိုင်တိုင် ကျင်းပလျက်ရှိသည်။ နိုင်ငံတကာရေးရာ၊ ပထဝီနိုင်ငံရေးနှင့် အမျိုးသားမဟာဗျူဟာနှင့်ပတ်သက်သည့် အခြေခံဗဟုသုတများ ရရှိစေရန်၊ လူငယ်များအကြား ခေါင်းဆောင်မှု၊ စူးစမ်းစဉ်းစားနိုင်မှုနှင့် ဆက်သွယ်ရေး ကျွမ်းကျင်မှုအရည် အချင်းများမြှင့်တင်ရန်၊ အပြန်အလှန်ဆွေးနွေးပြောဆိုမှုများမှတစ်ဆင့် ပူးပေါင်းဆောင်ရွက်မှု၊ ဆွေးနွေးနှီးနှောမှုနှင့် ပြည်သူ့နီတိထိတွေ့ဆက်ဆံမှုများတိုးမြှင့်ရန်၊ လူငယ်များမြန်မာနိုင်ငံဖွံ့ဖြိုးတိုးတက်ရေးအတွက် အနာဂတ်လမ်းကြောင်းများကို ရှုမြင်အဆိုပြုနိုင်စွမ်း မြှင့်တင်ရန်နှင့် အနာဂတ်တွင် အမျိုးသားအဆင့်နှင့် ဒေသဆိုင်ရာအဆင့် လုပ်ငန်းအစီအစဉ်များအတွက် တက်ကြွသည့် လူငယ်ကွန်ရက်ကို ဖန်တီးပေးရန် ရည်ရွယ်၍ ကျင်းပခြင်းဖြစ်ကြောင်း သိရသည်။ မြန်မာ့အနာဂတ် မျက်နှာစာလူငယ်မဟာဗျူဟာဖိုရမ်-၂၀၂၅ က မြန်မာလူငယ်များအတွက် မည်ကဲ့သို့ အကျိုးကျေးဇူးများကို ပေးစွမ်းနိုင်မည်၊ မြန်မာ့အနာဂတ်အတွက် မည်သည့်အကျိုးရလဒ်ကို ဖော်ဆောင်နိုင်မည်၊ တက်ရောက်လာသည့် လူငယ်များက ဖိုရမ်အပေါ် မည်သို့ရှုမြင်သုံးသပ်ကြမည် ဆိုသည်တို့ကို သတင်းအဖွဲ့က တွေ့ဆုံမေးမြန်းမှုများအား ကောက်နုတ်ဖော်ပြအပ်ပါသည်။ ဦးဌေးအောင် ရန်ကုန်တိုင်းဒေသကြီး လူမှုရေးရာဝန်ကြီး ဒီနေ့ ဖိုရမ်ကိုကျင်းပတဲ့ ရည်ရွယ်ချက်က ပြောင်းလဲနေတဲ့ ကမ္ဘာကြီးမှာ မျိုးဆက်သစ်လူငယ်တွေ တက်ကြွစွာပါဝင်နိုင်ရေးကို ကြိုတင်ပြင်ဆင်တဲ့အနေနဲ့ နိုင်ငံတော်အဆင့်ကျင်းပခြင်းဖြစ်ပါတယ်။ ပထဝီနိုင်ငံရေး၊ ပထဝီစီးပွားရေး၊ မီဒီယာအတတ်ပညာ၊ သံတမန်ရေးရာနဲ့ ပြည်သူ့နီတိကျင့်စဉ်တွေကို လူငယ်တွေနဲ့မိတ်ဆက်ပေးပြီး လက်တွေ့ကျတဲ့ဖိုရမ်တစ်ခုအဖြစ် ကျင်းပသွားမှာဖြစ်ပါတယ်။ လူငယ်ဖိုရမ်ကို တိုင်းဒေသကြီးနဲ့ပြည်နယ်တွေက မျိုးဆက်သစ်လူငယ်မောင်မယ်တွေအားလုံးကို ဖိတ်ကြားပြီး ကျင်းပတာဖြစ်ပါတယ်။ မျိုးဆက်သစ်လူငယ်တွေက ပွင့်လင်းမြင်သာတဲ့ အမြင်တွေနဲ့ အနာဂတ်နိုင်ငံတော်ကြီးကို ဘယ်လိုထူထောင်ကြမလဲဆိုတာကို အတွေးသစ်အမြင်သစ်တွေနဲ့ ဆွေးနွေးသွားကြမှာဖြစ်တယ်။ လူငယ်ဖိုရမ်မှာ လူငယ်တွေရဲ့ စိတ်ကူးစိတ်သန်းတွေကို အဓိကထား ဆွေးနွေးသွားကြမှာဖြစ်တယ်။ ပြီးတော့ ဖိုရမ်တက်ရောက်တဲ့ ပြည်ထောင်စုတိုင်းရင်းသား မျိုးဆက်သစ်လူငယ်တွေကို ရန်ကုန်မြို့ရဲ့ အထင်ကရနေရာတွေကို လေ့လာရေးခရီးပို့သွားမယ့် အစီအစဉ်လည်း ရှိပါတယ်။ ဒေါက်တာ နိုင်ဆွေဦး ဒါရိုက်တာ၊ မြန်မာ့ပုံရိပ်ဖော်ညွှန်းရေးအဖွဲ့ အနာဂတ်နိုင်ငံတော်ကို ဦးဆောင်တဲ့နေရာမှာ လူငယ်တွေရဲ့အခန်းကဏ္ဍက အရေးကြီးပါတယ်။ လူငယ်တွေမှာ အတွေးအခေါ်မှန်ဖို့လိုတယ်၊ အယူအဆမှန်ဖို့လိုပါတယ်။ Mindset လည်း မှန်ကန်ဖို့ လိုပါတယ်။ ဒီကနေ့ကမ္ဘာကြီးက အပြောင်းအလဲတွေ မြန်ဆန်တယ်။ ကမ္ဘာပေါ်မှာ အစွန်းရောက်ဝါဒတွေ အများကြီး ကြုံတွေ့နေရတာဖြစ်ပါတယ်။ လူငယ်တွေအနေနဲ့ အစွန်းရောက်ဝါဒတွေ၊ နည်းလမ်းပေါင်းစုံက တိုက်ခိုက်လာမယ့်အန္တရာယ်တွေကို ကြိုတင်ကာကွယ်ရှောင်ရှားနိုင်ဖို့ လိုအပ်ပါတယ်။ ပြီးတော့ အားလုံးသိကြတဲ့အတိုင်း သတင်းစစ်ပွဲလိုမျိုး လူငယ်တွေရဲ့စိတ်ကို ပြောင်းလဲစေနိုင်တဲ့ သတင်းတု၊ သတင်းမှားတွေအများကြီး ကြုံတွေ့နေရတာဖြစ်ပါတယ်။ လူငယ်တွေ အားလုံးအနေနဲ့ အတွေးမှန်၊ အမြင်မှန်နဲ့ Mindset မှန်ကန်စွာနဲ့ နိုင်ငံတော်ကို အနာဂတ်မှာ ဦးဆောင်သွားနိုင်ဖို့ အရေးကြီးပါတယ်။ ဒေသတွင်းကိုပဲကြည့်မလား၊ ကမ္ဘာကိုပဲကြည့်မလား၊ အများကြီး ပြောင်းလဲနေတာ တွေ့ရမှာဖြစ်ပါတယ်။ အနာဂတ်မှာ နိုင်ငံရေးလုပ်သည်ဖြစ်စေ၊ စီးပွားရေးလုပ်သည်ဖြစ်စေ ဘယ်လိုကဏ္ဍမှာမဆို လူငယ်တွေပါဝင်တဲ့အခါ ကမ္ဘာကြီးရဲ့ ပြောင်းလဲနေတဲ့အနေအထားကို သိဖို့လိုပါတယ်။ ပြောင်းလဲနေတဲ့ ပထဝီမဟာဗျူဟာဆိုင်ရာကိစ္စ၊ ပထဝီနိုင်ငံရေးဆိုင်ရာကိစ္စတွေကို လူငယ်တွေ သိရှိထားဖို့လိုပါတယ်။ ဒီနေ့လို လူငယ်ဆိုင်ရာ ဖိုရမ်တွေကျင်းပခြင်းက လူငယ်တွေအတွက် အရေးကြီးတယ်လို့ ယူဆပါတယ်။ လူငယ်ဖိုရမ်တွေကို အရင်ကနဲ့မတူဘဲ ခမ်းခမ်းနားနား ကြီးကြီး ကျယ်ကျယ်လုပ်ဆောင်ပေးနေတာ တွေ့ရပါတယ်။ အနာဂတ်အတွက် ခေတ်ကိုတစ်ဆစ်ချိုးတဲ့ အနေအထားလို့ ပြောလို့ရပါတယ်။ ဗဟုသုတကြွယ်ဝပြီး အတွေးသစ်အမြင်သစ်တွေနဲ့ မှန်ကန်တဲ့အတွေးတွေ ရလာမှာဖြစ်တဲ့အတွက် လူငယ်တွေအတွက် အခွင့်အလမ်းတွေအများကြီး စောင့်ကြိုနေတယ်လို့ ပြောချင်ပါတယ်။ Mr. Atul Aneja အိန္ဒိယနိုင်ငံမှ မဟာဗျူဟာရေးရာ လေ့လာသုံးသပ်သူ ဒီနေ့ ကျင်းပတဲ့ ဖိုရမ်ကမြန်မာနိုင်ငံအတွက်၊ လူငယ်တွေအတွက် အင်မတန်ကောင်းမွန်တဲ့ ဖိုရမ်တစ်ခု ဖြစ်ပါတယ်။ မြန်မာ့အနာဂတ်အတွက် ခေါင်းဆောင်ဖြစ်လာမယ့် လူငယ်တွေအတွက် ကောင်းမွန်တဲ့ အတွေ့အကြုံ၊ အခွင့်အလမ်းတွေဖန်တီးပေးတာလည်း ဖြစ်ပါတယ်။ ဒီနေ့လိုဖိုရမ်မျိုးက တစ်ခါကျင်းပပြီး ရပ်ထားလို့တော့မရဘူး။ စဉ်ဆက်မပြတ်လုပ်ဆောင်သွားပြီး ကောင်းမွန်တဲ့ရလဒ်တွေကနေတစ်ဆင့် ကောင်းမွန်တဲ့အရာတွေကို ဆက်လက်ဖော်ဆောင်သွားရမှာဖြစ်ပါတယ်။ တက်ရောက်လာတဲ့ လူငယ်တွေကလည်း စိတ်ဝင်တစားနဲ့ တက်တက်ကြွကြွပါဝင်တာကို တွေ့မြင်ရပါတယ်။ Mr. Lorenzo Maria Pacini ဆွစ်ဇာလန်နိုင်ငံ SUPDI မှ တွဲဖက်ပါမောက္ခ မြန်မာနိုင်ငံရဲ့ လူငယ်ကဏ္ဍအတွက် ဒီလိုကျင်းပပေးတာကောင်းမွန်ပါတယ်။ ဖိုရမ်မှာ မြန်မာနိုင်ငံနဲ့သက်ဆိုင်တဲ့၊ ဆက်စပ်နေတဲ့ ပထဝီစီးပွားရေး၊ ဗဟုဝင်ရိုးကမ္ဘာစတဲ့ နိုင်ငံရေးအခန်းကဏ္ဍအပေါ် လူငယ်တွေရဲ့အမြင်တွေ၊ သူတို့ရဲ့သဘောထားတွေကို သိရှိရမှာဖြစ်တဲ့အတွက် ကျေနပ်မိပါတယ်။ အခုလိုမျိုးဖိုရမ်မှာ ပါဝင်ခွင့်ရတဲ့အတွက် ဝမ်းသာမိပါတယ်။ မောင်ယိန်းတိန့်(ကချင်ပြည်နယ်) ကျွန်တော်တို့ ရန်ကုန်မြို့ကိုရောက်တော့ တောင်ပေါ်အလှနဲ့မတူတဲ့ မြို့ပြအလှကိုတွေ့ရတဲ့အတွက် ရင်ထဲကြည်နူးမှုဖြစ်ရပါတယ်။ အခုလိုမျိုး လူငယ်ကဏ္ဍကို မြှင့်တင်ပေးတဲ့ဖိုရမ်‌ ဆောင်ရွက်‌ပေးတာကို အထူးကျေးဇူးတင်ပါတယ်။ ဖိုရမ်ကျင်းပတဲ့အတွက် တစ်နိုင်ငံလုံးကလူငယ်‌တွေ တစ်ဦးနဲ့တစ်ဦး‌ တွေ့ဆုံခွင့်ရတယ်။ အမြင်သဘောထားတွေ၊ သိရှိတာတွေကို ဖလှယ်ခွင့်ရတယ်။ နိုင်ငံအတွက် ဘယ်လိုရှေ့ဆက်လျှောက်မယ်၊ ဘယ်လိုဆောင်ရွက် ချင်တယ်ဆိုတဲ့ နည်းလမ်းတွေကို လူငယ်တွေ ကိုယ်တိုင်ပါဝင်ပြီး ဆွေးနွေးခွင့်ရတဲ့ဖိုရမ်တစ်ခုပါ။ ပြီးတော့တစ်နေရာစီနေထိုင်ကြတဲ့ တိုင်းရင်းသားလူငယ်တွေ တစ်စုတစ်စည်းတည်း စုစည်းတွေ့ဆုံခွင့် ရတာဟာဘာနဲ့မှလဲလို့မရတဲ့ ဆုလာဘ်တစ်ခုပါ။ မလုတ်နမ်(ကချင်ပြည်နယ်) ကျွန်မကကချင်ပြည်နယ်က လချိတ်လူမျိုးဖြစ်ပါတယ်။ အခုလိုအခမ်းအနားကို ပထမဆုံး တက်ရောက်ခွင့်ရတာဖြစ်တဲ့အတွက် စိတ်လှုပ်ရှားမိပါတယ်။ တစ်နိုင်ငံလုံးက လူငယ်အားလုံး စုစည်းတွေ့ဆုံခွင့်ရတာဖြစ်တဲ့အတွက် ပျော်ရွှင်မိပါတယ်။ ဖိုရမ်ကြီးတစ်ခုဖြစ်ဖို့ ငွေအင်အား၊ လူအင်အားနဲ့ အချိန်အများကြီး ပေးရတာဖြစ်ပါတယ်။ ဒါကြောင့် ဒီနေ့လိုဖိုရမ်တစ်ခုဖြစ်ဖို့ စွမ်းဆောင်ပေးတဲ့ နိုင်ငံတော်အကြီးအကဲတွေ၊ အတတ်ပညာရှင်၊ အသိပညာရှင် အားလုံးကိုကျေးဇူးတင်ပါတယ်။ မြန်မာနိုင်ငံ မှာ သဘာဝဘေးအန္တရာယ်တွေ့ကြုံထားရတယ်၊ ပြီးတော့ နိုင်ငံရေးပဋိပက္ခတွေ ရှိနေသေးတယ်။ ဒီလို အခြေအနေတွေရှိနေတဲ့အတွက် နိုင်ငံတည်ငြိမ်အေးချမ်းဖွံ့ဖြိုးအောင် ဆောင်ရွက်တဲ့နေရာမှာ လူငယ်တွေအနေနဲ့ နိုင်ငံတော်နဲ့အတူ ပူးပေါင်းပါဝင်ဖို့လိုပါတယ်။ ဒါမှသာ လှပတဲ့ နိုင်ငံတော်ကြီးကို တွေ့မြင်ရမှာ ဖြစ်ပါတယ်။ မောင်ထွန်းအာကာ(ကရင်ပြည်နယ်) မတူညီတဲ့ဒေသတွေက လူငယ်တွေတစ်နေရာတည်းမှာ စုရုံးပြီး အသိပညာတွေဖလှယ်၊ ဆွေးနွေးပြောကြားခွင့်ရတဲ့အတွက်လည်း ကြည်နူးရပါတယ်။ ဒီလိုတွေ့ဆုံဆွေးနွေးမှုတွေကနေ အကျိုးကျေးဇူးတွေ အများကြီးရရှိစေမှာအမှန်ပါ။ အထူးသဖြင့် လူငယ်တွေရဲ့စည်းလုံးမှု ပူးပေါင်းအားနဲ့ နိုင်ငံအတွက်အခွင့်အလမ်းတွေ ပေါ်ထွန်းလာမယ်လို့မြင်မိပါတယ်။ အခုလို ဖိုရမ်တွေများများ ဖော်ဆောင်ပြီး လူငယ်တွေအနေနဲ့ နိုင်ငံအတွက် ဆတက်ထမ်းပိုးအကျိုးပြုနိုင်ပါစေလို့လည်း ဆန္ဒပြုပါတယ်။ မနန်းစန်းလှဦး(ကရင်ပြည်နယ်) နေရာဒေသ အသီးသီးက လူငယ်တွေရဲ့စွမ်းအားကို ပေါင်းစည်းနိုင်ခြင်းအားဖြင့် ဒေသတွေဖွံ့ဖြိုးပြီး တိုင်းပြည်ဖွံ့ဖြိုးတိုးတက်မှုကို အထောက်အပံ့ဖြစ်စေမှာအမှန်ပါ။ အခုဖိုရမ်ဟာ တိုင်းရင်းသားလူငယ်ထုအားလုံးရဲ့ စည်းလုံးညီညွတ်မှုကို ထင်ဟပ်စေပါတယ်။ တိုင်းရင်းသား စည်းလုံးညီညွတ်မှုဆိုတာ မိသားစုတစ်ခုနဲ့တူပါတယ်။ မိသားစုစည်းလုံးမှ စီးပွားတိုးတက်မှုနဲ့ အေးချမ်းသာယာမှုကို ရရှိစေတာကြောင့် မိသားစုဝင်တွေနဲ့တူတဲ့ တိုင်းရင်းသားတွေလည်း တစ်ဦးနဲ့တစ်ဦး စာနာနားလည် ခွင့်လွှတ်ချစ်ကြည်မှုနဲ့အတူ လက်တွဲသွားမယ်ဆိုရင် နိုင်ငံ‌အေးချမ်းသာယာပြီး ခေတ်မီဖွံ့ဖြိုးတိုးတက်မှာပါ။ လူငယ်တွေရဲ့ အသိပညာကို ပေါင်းစည်းဖလှယ်ပေးနိုင်တဲ့ ဖိုရမ်ဖြစ်ပြီးတော့ တိုင်းပြည်ရဲ့အင်အားအတွက် လူငယ်တွေရဲ့အားကို ပေါင်းစုနိုင်တဲ့ဖိုရမ်လို့ မြင်မိပါတယ်။ မောင်ထက်ပိုင်(ဧရာဝတီတိုင်းဒေသကြီး) အခုဖိုရမ်ကိုတက်ဖို့အတွက် ဧရာဝတီတိုင်းဒေသကြီးကနေ ရန်ကုန်ကို ရောက်တဲ့အခါ ရင်ထဲမှာ ဖော်ပြလို့မရတဲ့ ခံစားမှုတစ်ခုကိုရရှိပြီး ဝမ်းသာပီတိလည်း ဖြစ်ရပါတယ်။ နိုင်ငံတော်အနေနဲ့ အခုလို ခမ်းခမ်းနားနား ဖိုရမ်ကျင်းပပေးတာကို ကျွန်တော့်လိုပဲ လူငယ်တွေအားလုံးက ကျေနပ်အားရနေမှာပါ။ ဒီဖိုရမ်ကနေ ခွန်အားတွေပိုပြီး ရရှိတယ်လို့ ခံစားရပါတယ်။ မကြည်မြင့်အေး(ဧရာဝတီတိုင်းဒေသကြီး) ကျွန်မတို့နိုင်ငံမှာရှိတဲ့ တိုင်းရင်းသားတွေ အားလုံးကို ကိုယ်တိုင်မြင်တွေ့ခွင့်ရတာကို ဝမ်းသာပီတိဖြစ်ရပါတယ်။ ပြီးတော့ အားလုံးက ဖိုရမ်မှာသိရှိခဲ့ရတဲ့ မတူညီတဲ့အတွေးအမြင်သစ်တွေကို ကိုယ့်နေရာဒေသတွေမှာ ပြန်လည်အသုံးချမှာဖြစ်တဲ့အတွက် ကောင်းမွန်တဲ့ဖိုရမ် တစ်ခုလည်းဖြစ်ပါတယ်။ ဖိုရမ်မှာ တိုင်းရင်းသားမောင်နှမတွေရဲ့ အတွေးအမြင်၊ ပညာရှင်တွေရဲ့အမြင်တွေကို မြင်တွေ့ရမှာဖြစ်တဲ့အတွက် စိတ်လှုပ်ရှားနေပါတယ်။ ကိုယ်တိုင်လည်း တက်တက်ကြွကြွ ပါဝင်သွားမှာဖြစ်ပါတယ်။ ဒီလို လူငယ်တွေအားလုံး တွေ့ဆုံဆွေးနွေးနိုင်ဖို့ အစစအရာရာ အဆင်ပြေအောင် စီမံဆောင်ရွက်ပေးသူတွေအားလုံးကို အထူးကျေးဇူးတင်ပါတယ်။ သတင်းအဖွဲ့

နိုင်ငံတော်အကြီးအကဲ၏လမ်းညွှန်မှုဖြင့် မြန်မာနိုင်ငံတွင်လူငယ်ဖွံ့ဖြိုးရေးစီမံကိန်းများကို အမြော်အမြင်ရှိရှိ စီမံဆောင်ရွက်၍ စနစ်တကျပြုစုပျိုးထောင်ပေးလျက်ရှိရာ မြန်မာလူငယ်မောင်မယ်များအနေဖြင့် ဗလငါးတန်ဖွံ့ဖြိုးမှုသာမက ပြောင်းလဲနေသောကမ္ဘာကြီးတွင် မျိုးဆက်သစ်လူငယ်များ တက်ကြွစွာ ပါဝင်နိုင်ရေးအတွက် ကြိုတင်ပြင်ဆင်လျက်ရှိသည်။ အဆိုပါလိုအပ်ချက်နှင့်အညီ ပြန်ကြားရေးဝန်ကြီးဌာန၊ အားကစားနှင့်လူငယ်ရေးရာဝန်ကြီးဌာန၊ ရန်ကုန်တိုင်းဒေသကြီးအစိုးရအဖွဲ့နှင့် မြန်မာ့ပုံရိပ်ဖော်ညွှန်းရေးအဖွဲ့ (Myanmar Narrative Think Tank) တို့ပူးပေါင်း၍ မြန်မာ့အနာဂတ်မျက်နှာစာ လူငယ်မဟာဗျူဟာဖိုရမ်-၂၀၂၅ ကို ရန်ကုန်မြို့ရှိ မြန်မာကွန်ဗင်းရှင်းစင်တာ(MCC)၌ ဩဂုတ် ၃၀ ရက်မှ စက်တင်ဘာ ၁ ရက်အထိ သုံးရက်တိုင်တိုင် ကျင်းပလျက်ရှိသည်။ နိုင်ငံတကာရေးရာ၊ ပထဝီနိုင်ငံရေးနှင့် အမျိုးသားမဟာဗျူဟာနှင့်ပတ်သက်သည့် အခြေခံဗဟုသုတများရရှိစေရန်၊ လူငယ်များအကြား ခေါင်းဆောင်မှု၊ စူးစမ်းစဉ်းစားနိုင်မှုနှင့် ဆက်သွယ်ရေးကျွမ်းကျင်မှု အရည်အချင်းများမြှင့်တင်ရန်၊ အပြန်အလှန်ဆွေးနွေးပြောဆိုမှုများမှတစ်ဆင့် ပူးပေါင်းဆောင်ရွက်မှု၊ ဆွေးနွေးနှီးနှောမှုနှင့် ပြည်သူ့နီတိထိတွေ့ဆက်ဆံမှုများ တိုးမြှင့်ရန်၊ လူငယ်များ မြန်မာနိုင်ငံဖွံ့ဖြိုးတိုးတက်ရေးအတွက် အနာဂတ်လမ်းကြောင်းများကို ရှုမြင်အဆိုပြုနိုင်စွမ်းမြှင့်တင်ရန်နှင့် အနာဂတ်တွင် အမျိုးသားအဆင့်နှင့်ဒေသဆိုင်ရာအဆင့်လုပ်ငန်း အစီအစဉ်များအတွက် တက်ကြွသည့် လူငယ်ကွန်ရက်ကို ဖန်တီးပေးရန် ရည်ရွယ်၍ ကျင်းပခြင်းဖြစ်ကြောင်း သိရသည်။ အရိပ်လို အပင်ပျိုးရကြောင်း၊ ရင့်မာအပွေးတက်ဖို့ အချိန်ယူရကြောင်းဆိုခဲ့ပါ နိယာမနှင့်အညီ အနာဂတ်ကို ပိုင်စိုးမည့်၊ နောင်တစ်ခေတ်တွင် နိုင်ငံတော်နှင့် နိုင်ငံသားတို့၏ ပြည်မှုရေးရာကိစ္စအဝဝကို ပခုံးပြောင်းတာဝန် ထမ်းဆောင်ကြမည့် မျိုးဆက်သစ် လူငယ်ခေါင်းဆောင်လောင်းလျာများကို ကမ္ဘာ့နိုင်ငံအသီးသီးက စနစ်တကျ ပြုစုပျိုးထောင်လျက်ရှိသည်။ မြန်မာ့အနာဂတ် မျက်နှာစာလူငယ်မဟာဗျူဟာဖိုရမ်-၂၀၂၅ က မြန်မာလူငယ်များအတွက် မည်ကဲ့သို့ အကျိုးကျေးဇူးများကိုပေးစွမ်းနိုင်မည်၊ မြန်မာ့အနာဂတ်အတွက် မည်သည့်အကျိုးရလဒ်ကို ဖော်ဆောင်နိုင်မည်၊ တက်ရောက်လာသည့် လူငယ်များက ဖိုရမ်အပေါ် မည်သို့ရှုမြင်သုံးသပ်ကြ မည်ဆိုသည်တို့ကို သတင်းအဖွဲ့က တွေ့ဆုံမေးမြန်းမှုများအား ကောက်နုတ်ဖော်ပြအပ်ပါ သည်- မောင်မင်းမင်း (ကယားပြည်နယ်) အခုဖိုရမ်ဟာ ၂၁ ရာစုလူငယ်တွေရဲ့ အသိပညာကိုပေးဝေတဲ့ တွေ့ဆုံမှုဖြစ်ပြီးတော့ တိုင်းရင်းသားလူငယ်တွေရဲ့ အတွေးအခေါ်အယူအဆအားလုံးကို ဖြန့်ဝေပေးနိုင်တဲ့ ဖိုရမ်တစ်ခုလည်း ဖြစ်ပါတယ်။ နိုင်ငံတော်ကလူငယ်ဖိုရမ်ကို ကျင်းပပေးခြင်းဟာ လူငယ်ထုအနေနဲ့ နိုင်ငံနဲ့လူမျိုးအတွက် ပိုကောင်းမွန်တဲ့ အနာဂတ်ကို‌ ခေါ်ဆောင်သွားနိုင်မယ်လို့ ယုံကြည်ပါတယ်။ မနေခြည်ရွှန်းလဲ့ (ကယားပြည်နယ်) ဖိုရမ်မှာ တစ်ဦးနဲ့တစ်ဦး ပူးပေါင်းဆောင်ရွက်မှုကနေ ကိုယ့်ဒေသနဲ့ နိုင်ငံအတွက် ခွန်အားတစ်ခုရရှိစေမယ်လို့ ယုံကြည်ပါတယ်။ ယနေ့လူငယ် နောင်ဝယ်လူကြီး ဆိုစကားအတိုင်း လူငယ်တွေအတွက် အသိပညာဗဟုသုတရရှိစေမယ့်အရာတွေကို စီမံဆောင်ရွက်ပေးခြင်းအားဖြင့် နိုင်ငံအတွက် အကျိုးရှိစေမှာပါ။ နိုင်ငံဖွံ့ဖြိုးတိုးတက်ဖို့ဆိုရင် တိုင်းဒေသကြီးနဲ့ပြည်နယ်တွေငြိမ်းချမ်းသာယာဖို့ လိုပါတယ်။ ငြိမ်းချမ်းရေးအတွက် အားလုံးပူးပေါင်းဆောင်ရွက်ဖို့ လိုအပ်ပါတယ်။ ဒီနေ့လိုပွဲကနေ လူငယ်ထုရဲ့ စွမ်းဆောင်မှုနဲ့ ပြည်နယ်တိုးတက်အောင် ဆောင်ရွက်နိုင်မယ်လို့ ယုံကြည်ပါတယ်။ မောင်ပေါင်ရှင်းဆုမ်(ချင်းပြည်နယ်) ပထမဆုံးတက်ရောက်ခွင့်ရတဲ့ အခုဖိုရမ်ကအင်မတန်ကောင်းမွန်တဲ့ အတွေ့အကြုံတွေရရှိစေပါတယ်။ ဖိုရမ်ကနေအနာဂတ်မှာ လူငယ်တွေနိုင်ငံအတွက် ဘယ်လိုပူးပေါင်းဆောင်ရွက်သွား ရမယ်ဆိုတာ အတွေ့အကြုံရရှိစေတာကြောင့် အခုဖိုရမ်ဟာ အရေးပါပါတယ်။ လူငယ်တွေအတွက် ယုံကြည်မှုတိုးပွားပြီး ကြိုးစားချင်စိတ်ဖြစ်ပေါ်စေပြီးတော့ ရှေ့ဆက်လုပ်ဆောင်ရမယ့် အရာတွေကို နားလည်လာပါလိမ့်မယ်။ နိုင်ငံဖွံ့ဖြိုးတိုးတက်ဖို့ဆိုရင် လူတစ်‌ယောက်ချင်းစီတိုင်းမှာ ယုံကြည်မှု၊ စိတ်တည်ငြိမ်မှုနဲ့ ပူးပေါင်းဆောင်ရွက်မှု စွမ်းရည်လည်းလိုပါတယ်။ မကျိန်လွန်းဒိမ်း(ချင်းပြည်နယ်) ချင်းပြည်နယ် ကိုယ်စားပြု တက်ရောက်လေ့လာခွင့်ရတဲ့အတွက် ဝမ်းမြောက်ဝမ်းသာဖြစ်ရပါတယ်။ နိုင်ငံတော်အနေနဲ့ လူငယ်ထုရဲ့အခန်းကဏ္ဍကို အလေးပေးပြီး ဘယ်လိုကဏ္ဍတွေမှာ ပူးပေါင်းပါဝင်ရမယ်ဆိုတဲ့ အခွင့်အရေးတွေဖန်းတီးပေးတာကြောင့် လူငယ်တွေကို တန်ဖိုးထားတဲ့ဖိုရမ်လို့လည်း မြင်ပါတယ်။ ဖိုရမ်မှာဆွေးနွေးမှုကနေ တစ်ဦးချင်းစီရဲ့အမြင်ကို လေ့လာပေါင်းစည်းခြင်းအားဖြင့် နိုင်ငံတိုးတက်ဖို့ ဘာတွေလိုအပ်နေသေးလဲ၊ ဘယ်လိုကဏ္ဍကနေ ဖြည့်ဆည်းပေးမလဲဆိုတဲ့ အသိအမြင်ဗဟုသုတတွေ ရရှိစေပါတယ်။ နိုင်ငံဖွံ့ဖြိုးတိုးတက်ဖို့ဆိုရင် အရင်ဆုံး ငြိမ်းချမ်းရေးလိုအပ်ပါတယ်။ လူငယ်တွေအနေနဲ့ အခုလိုဆွေးနွေးမှုကနေတစ်ဆင့် နိုင်ငံတော်အတွက် လူငယ်တွေဘယ်လို အခန်းကဏ္ဍကနေ ပါဝင်နိုင်မလဲဆိုတာအပါအဝင် နိုင်ငံတော်အနေနဲ့ ပြန်လည်သုံးသပ်မယ်လို့ မြင်ပါတယ်။ မောင်အောင်ဆက်ပိုင်(ရန်ကုန်တိုင်းဒေသကြီး) ဒီဖိုရမ်ကနေ နိုင်ငံသားတစ်ဦးရဲ့ မျိုးချစ်စိတ်ကိုဖြစ်ပေါ်စေပါတယ်။ ပြီးတော့စည်းလုံးမှုဆိုတဲ့ နက်ရှိုင်း တဲ့ဝိသေသကိုခံစားမိပြီးတော့ လူငယ်အားလုံးထဲထဲဝင်ဝင် လက်တွဲဆောင်ရွက်သွားဖို့ ခွန်အားတွေ ရရှိစေပါတယ်။ နိုင်ငံတော်အဆင့် ဖိုရမ်ကြီးကို အခုလိုအောင်မြင်စွာကျင်းပနေ တာမြင်ရတော့ လူငယ်တစ်ယောက်အနေနဲ့ ဝမ်းသာပီတိ ဖြစ်ရပါတယ်။ ပြီးတော့ ဖိုရမ်မှာ ဝိုင်းဝန်းဆွေးနွေးမှုကနေ လူငယ်တွေအတွက် ဘာတွေလိုအပ်နေလဲ၊ ဘာလုပ်ပေးရမလဲဆိုတာ သိလာစေပါတယ်။ ဖိုရမ်ရဲ့ ဆွေးနွေးမှုကနေ အကောင်းဆုံးရလဒ်တွေရရှိပြီး အနာဂတ်နိုင်ငံတော် ဖွံ့ဖြိုးတိုးတက်ရေးနဲ့ အေးချမ်းသာယာရေးအတွက် အထောက်အပံ့ကောင်းတွေရရှိစေမှာ ဖြစ်ပါတယ်။ မအိအိမိုး (ရန်ကုန်တိုင်းဒေသကြီး) အခုကျင်းပတဲ့ လူငယ်မဟာဗျူဟာဖိုရမ်မှာ လူငယ်တစ်ဦးအနေနဲ့ ပါဝင်ဆွေးနွေးခွင့်ရတဲ့ အတွက် ဝမ်းမြောက်ဝမ်းသာဖြစ်ရပါတယ်။ ပြည်ပပညာရှင်တွေရဲ့ ဆွေးနွေးဝေမျှမှုတွေကလည်း တန်ဖိုးဖြတ်လို့မရတဲ့ ဗဟုသုတတွေရရှိစေပါတယ်။ နိုင်ငံတိုင်းမှာလူငယ်ဆိုတာ တိုင်းပြည်ရဲ့ရေသောက်မြစ်တွေဖြစ်ပါတယ်။ အပင်ကြီးရှင်သန်ဖို့ ရေသောက်မြစ်တွေ ကောင်းမွန်ဖို့လိုပါတယ်။ ဒါကြောင့် အခုလိုဖိုရမ်တွေဟာ နိုင်ငံအတွက် လူကောင်းလူတော်တွေကို များစွာမွေးထုတ်ပေးနိုင်မှာ အမှန်ပါ။ ဦးဇော်ဦး(စီးပွားရေးသုတေသီ) ကမ္ဘာ့နိုင်ငံတွေမှာလည်း လူငယ်ဖိုရမ်တွေလုပ်ကြပါတယ်။ လူငယ်တွေဟာ အနာဂတ်ရဲ့ ခေါင်းဆောင်တွေဖြစ်တဲ့အတွက် နိုင်ငံခေါင်းဆောင်တွေက လူငယ်တွေကို လက်ပြောင်းလက်လွှဲပြီးတော့ ပခုံးထမ်းတာဝန်ယူနိုင်ဖို့အတွက် အနာဂတ်မှာဖြစ်လာနိုင်တဲ့ပညာရေး၊ စီးပွားရေး၊ နိုင်ငံရေး စတဲ့ပညာရပ်တွေကို လူငယ်တွေက အခုလိုပွဲတွေကနေ တွေ့ဆုံဆွေးနွေးဖလှယ်နိုင်ဖို့ ဦးစားပေးလုပ်ကြတာတွေ့ရတယ်။ အခုခေတ်မှာဆိုရင် ကမ္ဘာ့နိုင်ငံတွေကနေ၊ အထူးသဖြင့် ဖွံ့ဖြိုးမှုနောက်ကျနေတဲ့ နိုင်ငံ‌တွေမှာဆိုရင်ရှေ့မှာ ရှိနေတဲ့နိုင်ငံတွေကို လူငယ်တွေရဲ့အားနဲ့ ဘယ်လိုအမီလှမ်းချီနိုင်မလဲဆိုတဲ့ကိစ္စတွေကို များသောအားဖြင့် ဆွေးနွေးကြတာဖြစ်တယ်၊ ဒီကနေ့ ဆွေးနွေးပွဲမှာလည်း လူငယ်တွေပိုပြီးအလေးထားသင်ယူကြရမယ့် သိပ္ပံ၊ နည်းပညာ၊ သင်္ချာ၊ အင်ဂျင်နီယာစတဲ့ အဓိကဘာသာရပ်တွေအပြင် ခုခေတ်စားလာတဲ့ ဉာဏ်ရည်တုနဲ့ပတ်သက်ပြီး ဘယ်လိုပို့ချမလဲဆိုတာရယ်၊ ဘိုးစဉ်ဘောင်ဆက်အားပေးလာတဲ့ လူငယ်တွေနဲ့ အားကစား၊ ကာယ၊ ဉာဏ၊ စာရိတ္တစတဲ့ ဘက်ပေါင်းစုံဖွံ့ဖြိုးတိုးတက်အောင် လုပ်တဲ့နေရာမှာ ဒါတွေကလည်း အရေးကြီးတာကြောင့် ဒါတွေကိုလည်းဆွေးနွေးကြမယ်။ အိန္ဒိယ၊ ဥရောပစတဲ့ နိုင်ငံတကာက ပညာရှင်တွေ ပါဝင်ဆွေးနွေးမှာ ဖြစ်တာကြောင့် နိုင်ငံတကာမှာ လူငယ်တွေရဲ့အခန်းကဏ္ဍ ဘယ်လိုရှိနေသလဲဆိုတာ တကယ်လက်တွေ့ အလုပ်လုပ်နေတဲ့ ပညာရှင်ကြီးတွေကတစ်ဆင့် သိခွင့်ရမှာဖြစ်တဲ့အတွက်ကြောင့် ဒီပွဲကအင်မတန်မှ အကျိုးရှိပါတယ်။ ဦးကိုကို(ဥက္ကဋ္ဌ)မြန်မာ့ပုံရိပ်ဖော်ညွှန်းရေးအဖွဲ့(Myanmar Narrative Think Tank) ဒီဖိုရမ်ကတော့ လူငယ်ဖိုရမ်ဆိုတဲ့အတိုင်း ရှေ့မှာလုပ်ခဲ့တဲ့ဖိုရမ် ထက်ထူးခြားတဲ့အချက်က လူငယ်တွေကိုယ်တိုင် ခေါင်းစဉ်တွေနဲ့ ဆွေးနွေးကြမှာဖြစ်ပါတယ်။ မြန်မာ့ပုံရိပ်ဖော်ညွှန်းရေးအဖွဲ့ ပညာရှင်တွေကိုယ်တိုင် ဝင်ရောက်ဦးဆောင်ကြမှာမဟုတ်ဘဲ လူငယ်တွေရဲ့ လိုအပ်တဲ့အချက်အလက်တွေ လိုချင်တာရှိသလား၊ ဘာသိချင်တာရှိလဲ၊ ဘာတွေထပ်လိုချင်သေးလဲဆိုတာကို အနီးကပ်လိုအပ်တာတွေ ပံ့ပိုး ဖြည့်ဆည်းပေးဖို့ရှိတယ်။ နိုင်ငံခြားသား ပညာရှင်နှစ် ယောက်က ပထဝီနိုင်ငံရေး၊ ပထဝီစီးပွားရေးကို မြန်မာနိုင်ငံနဲ့ ဆက်စပ်တာတွေကို ဆွေးနွေးကြမှာဖြစ်တယ်။ ဖိုရမ်သုံးရက်တာကာလမှာ လူငယ်တွေပြောကြမှာဖြစ်တယ်။ လူငယ်တွေရဲ့ ရင်ထဲကခံစားချက်တွေ၊ လူငယ်တွေရဲ့ တိုင်းပြည်အပေါ်မှာထားရှိတဲ့ တိုင်းချစ်ပြည်ချစ်စိတ်တွေ၊ မိမိတိုင်းပြည်အနာဂတ်ကို ရွေ့အောင်ဘယ်လိုသွားကြမလဲဆိုတာတွေ ထွက်ပေါ်လာမှာ ဖြစ်တယ်။ ထွက်ပေါ်လာတဲ့ရလဒ်တွေကို စနစ်တကျစုစည်းပြီး ဖိုရမ်နောက်ဆုံးနေ့မှာ လူငယ်ဖိုရမ်ကြေညာစာတမ်းတစ်ခု ထွက်မှာဖြစ်ပါတယ်။ မြန်မာတစ်နိုင်ငံလုံးမှာရှိတဲ့ လူငယ်တွေရဲ့အသံတွေကို ကိုယ်စားပြုပြီး တိုင်းပြည်အတွင်း တိုင်းပြုပြည်ပြု အကြံပေးချက်တွေနဲ့ တိုင်းချစ်ပြည်ချစ်စိတ်နဲ့ ပါဝင်လိုတဲ့ဆန္ဒတွေက ဖိုရမ်နောက်ဆုံးရက်မှာ ရလဒ်အဖြစ်နဲ့ ထွက်ပေါ်လာမယ်လို့ ယုံကြည်ပါတယ်။ လူငယ်ဖွံ့ဖြိုးတိုးတက်ရေးက နိုင်ငံတိုင်းအတွက် အရေးကြီးပါတယ်။ အခုဆိုရင် ပိုပြီးအရေးကြီးလာတာက ကမ္ဘာကြီးမှာပြောင်းလဲမှုတွေ အလွန်များတယ်။ သိသာတဲ့ပြောင်းလဲမှုက နည်းပညာပြောင်းလဲမှုတွေ တော်တော်လေးပြောင်းလဲလာပြီ၊ အခုဆိုရင်(AI)လာပြီ၊ ကမ္ဘာ့နိုင်ငံရေးစနစ်ကလည်း ရွေ့လျားပြောင်းလဲလာပြီ အခုတော်တော်များများပြောကြတယ်၊ ဗဟုဝင်ရိုးကမ္ဘာထဲကို ကမ္ဘာကြီးက ရောက်လာပြီ၊ ဒီပြောင်းလဲလာတဲ့ အခြေအနေနဲ့အတူ အနာဂတ်မှာ တိုင်းပြည်ကို တည်ဆောက်ဖို့က အခုဖိုရမ်ကိုတက်ရောက်နေတဲ့ လူငယ်တွေပဲဖြစ်ကြပါတယ်။ လူငယ်ဖွံ့ဖြိုးရေးက နိုင်ငံတစ်နိုင်ငံအတွက် သိပ်ကို အရေးပါပါတယ်။ ဒီဖိုရမ်က လက်ရှိအနေအထားနဲ့ ၂၀၂၅ ခုနှစ် ဒီဇင်ဘာမှာ ရွေးကောက်ပွဲလာမယ်၊ မြန်မာနိုင်ငံက စာမျက်နှာသစ်တစ်ခုတက်လှမ်းမယ်၊ တက်လှမ်းမယ့် စာမျက်နှာသစ်နဲ့ အတူလူငယ်တွေရဲ့ ပူးပေါင်းပါဝင်မှုက အရေးကြီးတယ်။ လူငယ်ဖွံ့ဖြိုးတိုးတက်ရေးက ဒီမှာတင်ရပ်ဖို့မဟုတ်ဘူး။ ဒီမှာတက်လာတဲ့လူငယ်တွေက လူငယ်ကွန်ရက်ဖြစ်ပြီး သူ့ဒေသဖွံ့ဖြိုးတိုးတက်ရေးကို ဆက်လက်ဆောင်ရွက်ကြမှာပါ။ လူငယ်ဖွံ့ဖြိုးတိုးတက်ရေးက ဒီပွဲပြီးတာနဲ့ ပွဲပြီးမီးသေမဟုတ်ဘဲ စဉ်ဆက်မပြတ်သွားလိမ့်မယ်လို့ ယုံကြည်ပါတယ်။ မြန်မာ့ပုံရိပ်ဖော်ညွှန်းရေးအဖွဲ့ကလည်း ပြန်ကြားရေးဝန်ကြီးဌာနနဲ့ ပူးပေါင်းဆောင်ရွက်ပြီး တစိုက်မတ်မတ်သွားနိုင်အောင် ဆောင်ရွက်သွားပါမယ်။ Mr. Atul Aneja အိန္ဒိယနိုင်ငံမှ မဟာဗျူဟာရေးရာ လေ့လာသုံးသပ်သူ ဒီနေ့ ကျင်းပတဲ့ဖိုရမ်က မြန်မာနိုင်ငံအတွက်၊ လူငယ်တွေအတွက် အင်မတန်ကောင်းမွန်တဲ့ ဖိုရမ်တစ်ခုဖြစ်ပါတယ်။ မြန်မာ့အနာဂတ်အတွက် ခေါင်းဆောင်ဖြစ်လာမယ့် လူငယ်တွေအတွက် ကောင်းမွန်တဲ့ အတွေ့အကြုံ၊ အခွင့်အလမ်းတွေ ဖန်တီးပေးတာလည်းဖြစ်ပါတယ်။ ဒီနေ့လို ဖိုရမ် မျိုးက တစ်ခါကျင်းပပြီး ရပ်ထားလို့တော့မရဘူး။ စဉ်ဆက်မပြတ်လုပ်ဆောင်သွားပြီး ကောင်းမွန်တဲ့ ရလဒ်တွေကနေတစ်ဆင့် ကောင်းမွန်တဲ့အရာတွေကို ဆက်လက်ဖော်ဆောင်သွားရမှာဖြစ်ပါတယ်။ တက်ရောက်လာတဲ့ လူငယ်တွေကလည်း စိတ်ဝင်တစားနဲ့ တက်တက်ကြွကြွပါဝင်တာကို တွေ့မြင်ရပါတယ်။ Mr. Lorenzo Maria Pacini ဆွစ်ဇာလန်နိုင်ငံ SUPDI မှ တွဲဖက်ပါမောက္ခ မြန်မာနိုင်ငံရဲ့ လူငယ်ကဏ္ဍအတွက် ဒီလိုကျင်းပပေးတာကောင်းမွန်ပါတယ်။ ဖိုရမ်မှာ မြန်မာနိုင်ငံနဲ့ သက်ဆိုင်တဲ့၊ ဆက်စပ်နေတဲ့ ပထဝီစီးပွားရေး၊ ဗဟုဝင်ရိုးကမ္ဘာစတဲ့ နိုင်ငံရေးအခန်းကဏ္ဍအပေါ် လူငယ်တွေရဲ့အမြင်တွေ၊ သူတို့ရဲ့သဘောထားတွေကို သိရှိရမှာဖြစ်တဲ့အတွက် ကျေနပ်မိပါတယ်။ အခုလိုမျိုး ဖိုရမ်မှာပါဝင်ခွင့်ရတဲ့အတွက် ဝမ်းသာမိပါတယ်။ သတင်းစဉ်(သတင်းအဖွဲ့)

မခင်လပြည့်ဝန်း(မန္တလေးတိုင်းဒေသကြီး)

ယနေ့ကမ္ဘာကြီးသည် အရှိန်အဟုန်ဖြင့် တိုးတက်ပြောင်းလဲလျက်ရှိပြီး ပြောင်းလဲမှုများသည် ကမ္ဘာ့နိုင်ငံတို့၏ နိုင်ငံရေး၊ စီးပွားရေး၊ လူမှုရေးနှင့် သဘာဝပတ်ဝန်းကျင်အပါအဝင် ကဏ္ဍအသီးသီးအပေါ် ရိုက်ခတ်လျက်ရှိသည်။

တည်ငြိမ်အေးချမ်းသော ကမ္ဘာကြီးအဖြစ်သို့ ပြန်လည်တည့်မတ် ရောက်ရှိနိုင်ရန် နိုင်ငံတိုင်းက နည်းလမ်းရှာဆောင်ရွက်လျက်ရှိကြရာ အနာဂတ်ကိုပိုင်စိုးမည့် လူငယ်ထု၏ အခန်းကဏ္ဍ၊ လူငယ်တို့၏ စွမ်းပကားကို သတိမူမိလာကြပြီး လူငယ်များကို စနစ်တကျပျိုးထောင်၍ လူငယ်တို့၏ အခန်းကဏ္ဍကို အလေးထားဖော်ဆောင်လာကြသည်။ မြန်မာနိုင်ငံသည်လည်း အခြားကမ္ဘာ့နိုင်ငံများနည်းတူ လူငယ်တို့၏ အတွေးသစ်အမြင်သစ်၊ တီထွင်ဆန်းသစ်လိုစိတ်တို့ဖြင့် ဖွံ့ဖြိုးတိုးတက်မှုဆီသို့ လှမ်းချီနိုင်ရန် လူငယ်ဖိုရမ်များကို ကျင်းပပေးလျက်ရှိသည်။

ယနေ့တွင် မိတ်ဖက်နိုင်ငံများ၏ ပူးပေါင်းဆောင်ရွက်မှုဖြင့် မြန်မာ့အနာဂတ်မျက်နှာစာ လူငယ်မဟာဗျူဟာဖိုရမ် - ၂၀၂၅ ကို ရန်ကုန်မြို့ရှိ မြန်မာကွန်ဗင်းရှင်းစင်တာ (MCC) ၌ ကျင်းပလျက်ရှိရာ တက်ရောက်လာကြသော တာဝန်ရှိသူများ၊ တိုင်းရင်းသားလူငယ်များ၏ နိုင်ငံဖွံ့ဖြိုးတိုးတက်ရေးအတွက် အကြံပြုချက်များကို စုစည်းဖော်ပြလိုက်ပါသည်-

မရွှေဇင်ပြည့်ဖြိုး (ရခိုင်ပြည်နယ်)

ကျွန်မက အခုဖိုရမ်ကို ရခိုင်ပြည်နယ်ကိုယ်စားပြု တက်ရောက်တာဖြစ်ပါတယ်။ ဒီနေ့ကျင်းပတဲ့ ဖိုရမ်ဟာ တိုင်းရင်းသားတွေကြားမှာ ချစ်ကြည်ရင်းနှီးမှုကို ဖြစ်ပေါ်စေပြီး စည်းလုံးညီညွတ်မှုကို ပိုမိုရရှိစေတယ်လို့ မြင်ပါတယ်။ ပြီးတော့ ဒီဖိုရမ်က နိုင်ငံနဲ့ လူမျိုးအတွက် အကျိုးကျေးဇူးတွေ အများကြီးရရှိအောင် အထောက်အပံ့ဖြစ်စေတယ်လို့ ယုံကြည်ပါတယ်။ ကျွန်မတို့လူငယ်တွေဟာ ဖိုရမ်ကရရှိလာတဲ့ အတွေးအမြင်တွေ၊ အသိပညာတွေကို လက်တွေ့အသုံးချပြီးတော့ ကိုယ့်ဒေသကောင်းကျိုး၊ ကိုယ့်နိုင်ငံကောင်းကျိုးကို ဖော်ဆောင်သွားနိုင်မယ်။ ဒီလိုမျိုးလူငယ်တစ်ဦးဖြစ်စေဖို့ အကောင်းဆုံးကြိုးစားသွားပါ့မယ်။

မောင်သန့်ဖြူစင် (ရှမ်းပြည်နယ်)

ဒီဖိုရမ်က ကျွန်တော်တို့ လူငယ်တွေရဲ့ အခန်းကဏ္ဍကိုတစ်ဆင့် မြှင့်တင်ပေးတယ်လို့ ထင်မြင်ပါတယ်။ ပြီးတော့ ပြည်ပပညာရှင်တွေက အသိပညာဗဟုသုတတွေမျှဝေပေးပါတယ်။ မျှဝေပေးတဲ့ အသိပညာတွေက ကျွန်တော်တို့လူငယ်တွေ နိုင်ငံတကာနဲ့ ရင်ပေါင်တန်းပြီး တွေးခေါ်မြော်မြင်လုပ်ဆောင်နိုင်အောင် အဓိကထားတာကို တွေ့ရပါတယ်။ ဒီလိုနိုင်ငံရဲ့ အနာဂတ်မျိုးဆက်သစ်တွေဖြစ်တဲ့ ကျွန်တော်တို့လို လူငယ်တွေအတွက် အတွေးအမြင်သစ်တွေရရှိအောင် ဆောင်ရွက်ပေးတဲ့ သက်ဆိုင်ရာ တာဝန်ရှိသူအားလုံးကို ကျေးဇူးတင်ပါတယ်။ ပြီးတော့ ဖိုရမ်တက်ရောက်တဲ့အခါမှာ အစစအရာရာ အဆင်ပြေချောမွေ့အောင်၊ အခက်အခဲမရှိအောင် ဝိုင်းဝန်းစီမံပေးထားတဲ့အပေါ်မှာလည်း အင်မတန်ကျေးဇူးတင်ဝမ်းသာပီတိဖြစ်ရပါတယ်။

မခင်လပြည့်ဝန်း (မန္တလေးတိုင်းဒေသကြီး)

ဖိုရမ်မှာ ဒေသအစုံက တိုင်းရင်းသား လူငယ်တွေကို တွေ့မြင်ရတော့ ရင်ထဲမှာ ငါတို့ မြန်မာနိုင်ငံဟာ ချစ်စရာကောင်းတဲ့ တိုင်းရင်းသားတွေနဲ့ ဖွဲ့စည်း ထားပါလားလို့ အရင်ဆုံးခံစားရပါတယ်။ ပြီးတော့ လူငယ်တွေအတူ တူလက်တွဲပူးပေါင်းဆွေးနွေးမှုကနေ ချစ်ကြည်ရင်းနှီးမှုရရှိစေပါတယ်။ အားလုံးက ဖိုရမ်ရောက်မှ တွေ့ဆုံကြတာဖြစ်ပေမယ့် ချစ်ခင်ကြင်နာကြတယ်။ ဖိုရမ်ရဲ့ဆွေးနွေးမှုတွေကနေ ကမ္ဘာမှာ ဖြစ်ပျက်နေတဲ့အကြောင်းအရာ၊ ပထဝီနိုင်ငံရေးနဲ့ ဗဟုဝင်ရိုးမှာ မြန်မာနိုင်ငံအနေနဲ့ ဘယ်လိုတွေ ဆောင်ရွက်သွားရမယ်ဆိုတဲ့ အတွေးသစ်၊ အမြင်သစ်တွေကိုလည်း ရရှိစေပါတယ်။ ဒီဖိုရမ်ကနေတစ်ဆင့်လူငယ်တွေ သိရှိတဲ့အသိပညာတွေကို ဒီနေရာမှာတင် ရပ်တန့်မနေဘဲ လူငယ်တိုင်းဆီရောက်အောင် လုပ်ဆောင်နိုင်မယ်ဆိုရင် ပိုပြီးကောင်းမယ်လို့ ခံစားမိပါတယ်။ လူငယ်တွေရဲ့အားနဲ့ နိုင်ငံအတွက် လိုအပ်နေတဲ့ နေရာတွေမှာ ပါဝင်နိုင်ကြဖို့ လက်ဆင့်ကမ်းအသိပေးတဲ့ ဖိုရမ်တစ်ခုပါ။

ကိုကောင်းမြတ်သူ (မွန်ပြည်နယ်)

နိုင်ငံကို ငြိမ်းချမ်းဖို့၊ သာယာဖို့၊ တည်ငြိမ်ဖို့ ဖန်တီးနိုင်မယ့် အတွေးအမြင်တွေ ပါဝင်ဆွေးနွေးနိုင်ဖို့ တက်ရောက်ခြင်းဖြစ်ပါတယ်။ တိုင်းဒေသကြီးနဲ့ပြည်နယ်က လူငယ်ညီအစ်ကို မောင်နှမတွေနဲ့ တွေ့ဆုံခွင့်ရတယ်။ မတူကွဲပြားတဲ့အမြင်တွေကို ဖလှယ်ခွင့်၊ သိရှိနားလည်ခွင့်ရတယ်။ အနာဂတ်နိုင်ငံတော်ကို ပိုမိုကောင်းမွန်အောင် လက်တွဲလုပ်ဆောင်ဖို့ ဗဟုသုတတွေရရှိလာတယ်။ နိုင်ငံတော်အနေနဲ့ လူငယ်တွေကိုအားထားပြီး ဒီလိုဖိုရမ်တွေ ဆောင်ရွက်ပေးတဲ့အတွက် ကောင်းမွန်ပါတယ်။ လူငယ်တွေရဲ့ စွမ်းရည်နဲ့အားကို အလေးအနက်ထားတယ်၊ လူငယ်တွေရဲ့ အခန်းကဏ္ဍကို မြှင့်တင်ပေးတယ်လို့ နားလည်သဘောပေါက်မိပါတယ်။ ကျွန်တော်တို့ရဲ့ အတွေးအခေါ်တွေကို မြှင့်တင်ပေးတာဖြစ်ပြီး အနာဂတ်ကို ပိုမိုကောင်းမွန်အောင် ဒီလိုဖိုရမ်တွေက ပျိုးထောင်ပေးနိုင်ပါတယ်။ ဒီဖိုရမ်က ရရှိလာတဲ့ အတွေးအမြင်တွေနဲ့ ကောင်းမြတ်တဲ့ အနာဂတ်ကို ဖန်တီးနိုင်မယ်လို့ ယုံကြည်ပါတယ်။

ဦးဌေးလင်း တွဲဖက်သဘာပတိ၊ မြန်မာ့အနာဂတ်မျက်နှာ လူငယ်မဟာဗျူဟာဖိုရမ်-၂၀၂၅

တက်ရောက်လာတဲ့ လူငယ်အဖွဲ့ကို အဖွဲ့ငါးဖွဲ့ခွဲပြီး တစ်ဖွဲ့စီမှာ မြန်မာ့ပုံရိပ်ဖော်ညွှန်းရေးအဖွဲ့က သဘာပတိတစ်ယောက်၊ တိုင်းဒေသကြီး လူငယ်ရေးရာကော်မတီက တွဲဖက်သဘာပတိတစ်ယောက်ပါဝင်ပြီး လူငယ်တွေ လွတ်လွတ်လပ်လပ်ဆွေးနွေးနိုင်အောင် ဆောင်ရွက်ပေးတယ်။ ကဏ္ဍပေါင်းစုံမှာ ကျွန်တော်တို့ မတွေးမိတဲ့ ရှုထောင့်တွေ၊ သဘောတရားတွေကို လူငယ်တွေဆီက လေ့လာခွင့်ရတယ်။ ပြည်ပပညာရှင်တွေက ပထဝီနိုင်ငံရေး၊ စီးပွားရေးစတဲ့ အကြောင်းအရာတွေ ဟောပြောဆွေးနွေးချက်ပေါ်မှာ မူတည်ပြီး လူငယ်တွေက သူတို့ရဲ့မတူညီတဲ့ ဒေသအသီးသီးက အခြေအနေပေါ်မှာ ရှုမြင်ပေါင်းစပ်ပြီး ဘယ်လိုကုစားမလဲဆိုတဲ့ တွေးခေါ်နိုင်စွမ်းတွေ ရလာတယ်။ မြန်မာနိုင်ငံတစ်ဝန်းက လာရောက်ကြတာဖြစ်တဲ့အတွက် ဒီဖိုရမ်ကနေ မိတ်ဆွေတွေဖြစ်ပြီး ပေါင်းစည်းလုပ်ကိုင်နိုင်မယ့် အခွင့်အလမ်းတွေရလာမယ်၊ မကြာခင်မှာ ရွေးကောက်ပွဲကျင်းပတော့မယ်၊ နိုင်ငံအတွက် အစိုးရသစ်တစ်ရပ်ထွက်ပေါ်လာမယ်၊ ဒီဖိုရမ်ကထွက်ပေါ်လာမယ့် နေပြည်တော်​ကောင်စီနယ်​မြေနဲ့ တိုင်းဒေသကြီး၊ ပြည်နယ်အနှံ့က လူငယ်တွေရဲ့အတွေးအခေါ် အကြံ ဉာဏ်တွေက အထောက်အပံ့ဖြစ်စေမယ်လို့ ယုံကြည်ပါတယ်။ 

တွေ့ဆုံမေးမြန်း - သတင်းအဖွဲ့

ဓာတ်ပုံ - ကျော်သီဟ

ဆလိုင်းဆိုင်မွန်လင်း (ရခိုင်ပြည်နယ်)

ယနေ့ကမ္ဘာကြီးကို တည်ငြိမ်အေးချမ်းသောကမ္ဘာကြီးအဖြစ် ပြန်လည်တည့်မတ်ရောက်ရှိနိုင်ရန် နိုင်ငံတိုင်းက နည်းလမ်းရှာဆောင်ရွက်လျက်ရှိကြရာ အနာဂတ်ကိုပိုင်စိုးမည့် လူငယ်ထု၏အခန်းကဏ္ဍ၊ လူငယ်တို့၏ စွမ်းပကားကို သတိမူမိလာကြပြီး လူငယ်များကို စနစ်တကျပျိုးထောင်၍ လူငယ်အခန်းကဏ္ဍကို အလေးထားဖော်ဆောင်လာကြသည်။

မြန်မာနိုင်ငံသည်လည်း အခြားကမ္ဘာ့နိုင်ငံများနည်းတူ လူငယ်တို့၏ အတွေးသစ်အမြင်သစ်၊ တီထွင်ဆန်းသစ်လိုစိတ်တို့ဖြင့် ဖွံ့ဖြိုးတိုးတက်မှုဆီသို့လှမ်းချီနိုင်ရန် လူငယ်ဖိုရမ်များကို ကျင်းပပေးလျက်ရှိရာ ယနေ့တွင် မိတ်ဖက်နိုင်ငံများ၏ ပူးပေါင်းဆောင်ရွက်မှုဖြင့် မြန်မာ့အနာဂတ်မျက်နှာစာလူငယ်မဟာဗျူဟာဖိုရမ် (၂၀၂၅) ကို ရန်ကုန်မြို့ရှိ မြန်မာကွန်ဗင်းရှင်းစင်တာ (MCC) ၌ ကျင်းပလျက်ရှိပြီး တက်ရောက်လာကြသော တာဝန်ရှိသူများ၊ တိုင်းရင်းသားလူငယ်များ၏ နိုင်ငံဖွံ့ဖြိုးတိုးတက်ရေးအတွက် အကြံပြုချက်များကို စုစည်းဖော်ပြလိုက်ပါသည်-

မစုယွန်းရွှေရည်(ရှမ်းပြည်နယ်)

တိုင်းဒေသကြီးနဲ့ ပြည်နယ်အားလုံးက လူငယ်တွေအားလုံးဟာ တစ်နေရာတည်းမှာ စုစည်းခွင့်ရတယ်။ ဒီလိုစုစည်းခွင့်ရတဲ့ အချိန်မှာအားလုံးအတွက် အသိပညာဗဟုသုတတွေ၊ အတွေ့အကြုံတွေ အများကြီးရအောင် စီမံပေးထားတာ တွေ့ရပါတယ်။ လူငယ် တစ်ယောက်အနေနဲ့ တိုင်းရင်းသားသူငယ်ချင်း၊ မောင်နှမအားလုံးနဲ့ တွေ့ဆုံခင်မင်ခွင့်ရတာ၊ အသိပညာတွေဖလှယ်ခွင့်ရတာ၊ ပြည်ပပညာရှင်တွေရဲ့ မျှဝေမှုတွေ နားထောင်ရတွေက တန်ဖိုးရှိတဲ့ အတွေ့အကြုံပါ။ နောက်ထပ်ဒီလိုဖိုရမ်မျိုးတွေကို ထပ်မံပြုလုပ်ပေးစေချင်ပါတယ်။ ဖိုရမ်မှာ လူငယ်အားလုံးက တက်တက်ကြွကြွပါဝင်ကြပါတယ်။ အစီအစဉ်အားလုံးကို စေ့စေ့စပ်စပ်စီစဉ်ပေးထားတာမို့ တာဝန်ရှိသူတွေကို လှိုက်လှိုက်လှဲလှဲကျေးဇူးတင်မိပါတယ်။ ဖိုရမ်မှာဆွေးနွေးတာတွေ လူငယ်တွေအသိပညာတွေရှိဖို့ အဓိကထားပါတယ်။ မှန်ကန်တဲ့ အသိပညာရှိမှ မှန်ကန်တဲ့ဆုံးဖြတ်ချက်ချနိုင်မယ်၊ စိန်ခေါ်မှုတွေကို မှန်မှန်ကန်ကန် ဖြေရှင်းနိုင်မယ်ဆိုတဲ့ အသိပညာတွေ ရရှိပါတယ်။

မောင်လွှမ်းနိုင်အောင် (မန္တလေးတိုင်းဒေသကြီး)

ဒီဖိုရမ်ကို ရောက်တဲ့အချိန်မှာ အားလုံးတွေ့ဆုံခွင့်ရတဲ့ ခံစားချက်က အင်မတန်အားရကျေနပ်တဲ့ ခံစားမှုကို ဖြစ်ပေါ်စေပါတယ်။ နိုင်ငံတကာက ပညာရှင်တွေ ကိုယ်တိုင်လူငယ်တွေနဲ့ လက်တွေ့ကျကျ အတူတကွပါဝင်ဆွေးနွေးကြတာကြောင့် ကျွန်တော်တို့ လူငယ်တွေအတွက် တန်ဖိုးရှိတဲ့၊ တန်ဖိုးဖြတ်လို့မရတဲ့ ဖိုရမ်တစ်ခုဖြစ်ပါတယ်။ အခုလို ဖိုရမ်မျိုးနှစ်စဉ်ဆောင်ရွက်ပေးရင် တိုင်းဒေသကြီးနဲ့ ပြည်နယ်အားလုံးက လူငယ်တွေဟာ အမြဲတွေ့ဆုံခွင့်၊ ဆွေးနွေးခွင့်ရမှာ ဖြစ်သလိုယုံကြည်နားလည် မှုတွေလည်းတိုးလာမှာဖြစ်ပါတယ်။

မသံယောဇဉ်မိုး (မွန်ပြည်နယ်)

 ဒီဖိုရမ်တက်ဖို့ MCC ကို ရောက်လာတာနဲ့ တိုင်းဒေသကြီး နဲ့ပြည်နယ်တွေက တိုင်းရင်းသားမောင်နှမတွေရဲ့ မတူကွဲပြားတဲ့ ရိုးရာယဉ်ကျေးမှုတွေကို မြင်တွေ့ခွင့်ရတယ်။ ဒီလိုလူငယ်ဖိုရမ်က လူငယ်တွေကို အခွင့်အလမ်းပေးတယ်။ လက်တွဲခေါ်တယ်။ နိုင်ငံရဲ့ အနာဂတ်အတွက် လူငယ်တွေရဲ့ အသံကို နားထောင်တယ်။ နေရာပေးတယ်လို့ မြင်ပါတယ်။ ဒေသအသီးသီးကလာကြတယ်။ အတွေးအခေါ်တွေ မတူကြဘူး။ အသိပညာတွေ ဖလှယ်ခွင့်ရတယ်။ ကျွန်မတို့ ပြည်နယ်ကိုပြန်တဲ့အခါ ရရှိလာတဲ့ အတွေးအမြင်တွေကို မျှဝေပေးခြင်းအားဖြင့် နိုင်ငံဖွံ့ဖြိုးတိုးတက်ရေးအတွက် အထောက်အကူဖြစ်စေပါတယ်။ စိန်ခေါ်မှုတွေနဲ့အတူ အခွင့်အလမ်းတွေကို သိမြင်နားလည်နိုင်လာတယ်။ ဒီလိုနိုင်ငံတော်အဆင့်ဖိုရမ်မှာ လူငယ်တွေကို ဖိတ်ခေါ်ပြီး ဆောင်ရွက်ပေးတဲ့အတွက် တာဝန်ရှိသူအားလုံးကို ကျေးဇူးတင်ပါတယ်။

ဆလိုင်းဆိုင်မွန်လင်း (ရခိုင်ပြည်နယ်)

ဖိုရမ်မှာ တိုင်းဒေသကြီးနဲ့ ပြည်နယ်တွေက လူငယ်တွေလာရောက်ကြတယ်။ မတူကွဲပြားတဲ့ ယဉ်ကျေးမှုတွေ၊ အတွေးအမြင်တွေကိုကြားသိရတယ်။ အတွေးအမြင်တွေ ဖလှယ်ခွင့်ရရှိတဲ့အတွက် နိုင်ငံအတွက် ကောင်းမွန်တဲ့အနာဂတ်ကို ပုံဖော်ဖန်တီးဖို့ အခွင့်အရေးရလာပြီလို့ ပြောရမှာပါ။ အခုဆိုရင် မြန်မာနိုင်ငံတစ်ဝန်းကလူငယ်တွေ တွေ့ဆုံနေကြပြီ။ အပြန်အလှန်ဆွေးနွေးမှုတွေကနေ ရလဒ်ကောင်းတွေ ထွက်ပေါ်လာမှာဖြစ်တဲ့အတွက် အခုကျင်းပတဲ့ဖိုရမ်က နိုင်ငံအတွက် အရေးပါတဲ့ဖိုရမ်တစ်ခု ဖြစ်ပါတယ်။ နိုင်ငံဖွံ့ဖြိုးဖို့ဆိုရင် ငြိမ်းချမ်းဖို့လိုပါတယ်။ ငြိမ်းချမ်းဖို့ဆိုရင် စည်းလုံးညီညွတ်မှုရှိဖို့လိုတယ်။ နိုင်ငံမငြိမ်းချမ်းရင် တိုင်းပြည် မတိုးတက်နိုင်ပါဘူး။ အခုဖိုရမ်ကနေ လူငယ်တွေရဲ့ မဟာဗျူဟာကျကျ အတွေးအမြင်တွေရရှိမယ်လို့ မျှော်လင့်ပါတယ်။

ဦးဇော်လွင်ဦး ဥက္ကဋ္ဌ၊ ရန်ကုန်တိုင်းဒေသကြီး အားကစားနှင့်လူငယ်ရေးရာ အထောက်အကူပြု လုပ်ငန်းကော်မတီ

ဖိုရမ်ကို တိုင်းပြည်နဲ့လူမျိုးအတွက် လူငယ်တွေတိုးတက်ဖို့ ပြုစုပျိုးထောင်မယ်ဆိုတဲ့ ရည်ရွယ်ချက်နဲ့ ကျင်းပတာဖြစ်ပါတယ်။ လူငယ်တွေဆိုတာ အရာရာကို တတ်သိချင်စိတ်၊ စူးစမ်းလေ့လာလိုစိတ်တွေရှိပြီး ပတ်ဝန်းကျင်မှာ မြင်တွေ့တာ၊ လေ့လာသိရှိတာတွေကို မှတ်သားအတုယူတတ်ကြပါတယ်။ ပြည့်စုံကောင်းမွန်တဲ့ ဗဟုသုတတွေကို ဖန်တီးပေးရမှာက ကျွန်တော်တို့လူကြီးတွေရဲ့ တာဝန်ဖြစ်ပါတယ်။ ဖိုရမ်မှာ လာရောက်ဆွေးနွေးကြတဲ့ ပြည်ပပညာရှင်တွေက မြန်မာနိုင်ငံရဲ့ ပထဝီနိုင်ငံရေး၊ ပထဝီစီးပွားရေးတွေကို လေ့လာသုတေသနပြုချက်တွေနဲ့ လူငယ်တွေမသိမမြင်နိုင်တဲ့ အချက်တွေကို ဆွေးနွေးချပြတာဖြစ်တဲ့အတွက် ဗဟုသုတတွေရမယ်။ ဟောပြောဆွေးနွေးပြီးတဲ့အခါ လူငယ်တွေက သိချင်တဲ့ မေးခွန်းတွေမေးကြတာကို တွေ့ရတယ်။ တိုးတက်လိုစိတ်၊ သိလိုစိတ်တွေနဲ့ စိတ်ဝင်စားကြတာကို တွေ့ရတယ်။ လူငယ်တွေအတွက်၊ နိုင်ငံအတွက် ဘယ်လောက်အကျိုးရှိသလဲဆိုတာ ဒီဖိုရမ်က လက်တွေ့ပါ။ တိုင်းဒေသကြီးနဲ့ ပြည်နယ်အသီးသီးက လူငယ်တွေရော၊ အကြောင်းအမျိုးမျိုးကြောင့် ပြည်ပရောက်နေတဲ့ လူငယ်တွေရော သိရှိနားလည်ခွင့်ရအောင် တယ်လီဂရမ်ကနေ တိုက်ရိုက် Live ထုတ်လွှင့်ပေးနေပါတယ်။ လေ့လာနိုင်ရင် အတော်အကျိုးရှိပါတယ်။ ကျွန်တော်တို့လေ့လာရမှာ တွေရှိသလို လူငယ်တွေလည်း သိနားလည်သင့်တဲ့အကြောင်း အရာတွေဖြစ်ပါတယ်။ တိုင်းဒေသကြီးနဲ့ ပြည်နယ်အသီးသီးကို ပြန်လည်ရောက်ရှိတဲ့အခါ အသိပညာတွေကို ပြန်လည်မျှဝေပေးကြမှာပါ။ ဖိုရမ်ကရရှိလာတဲ့ အတွေးအမြင်တွေကို လက်ဆင့်ကမ်းမျှဝေကြမှာကြောင့် တစ်နိုင်ငံလုံးအတွက် အကျိုးရှိတယ်၊ မှန်ကန်တဲ့ပထဝီနိုင်ငံရေး၊ စီးပွားရေးတွေကို သိရှိနားလည်မှ ရေရှည်ရပ်တည်နိုင်ပြီး အမှားအယွင်းအနည်းဆုံးနဲ့ အကောင်းဆုံးနည်းလမ်းကို အချိန်တိုအတွင်း လျှောက်လှမ်းနိုင်မှာဖြစ်လို့ နိုင်ငံအတွက်အရေးကြီးသလို လူငယ်တွေအတွက်လည်း အရေးကြီးပါတယ်။ နိုင်ငံကောင်းဖို့အတွက် ဘက်ပေါင်းစုံက ဆောင်ရွက်နေတဲ့ အချိန်မှာ လူငယ်တွေက သူတို့ ရင်ထဲက ခံစားချက်တွေ၊ ဆုံးဖြတ်ချက်တွေကို ဒီဖိုရမ်မှာ ပါဝင်ဆွေးနွေးကြတယ်၊ ရလာတဲ့ ဆွေးနွေးအကြံပြုချက်တွေကို ကြေညာစာတမ်း ထွက်လာမှာဖြစ်တာကြောင့် ရေရှည်အောင်မြင်ဖို့အတွက် အင်မတန်အကျိုးရှိတဲ့ ဖိုရမ်ဖြစ်ပါတယ်။

သတင်းစဉ် (သတင်းအဖွဲ့)

MOI