ပြည်ထောင်စုသမ္မတမြန်မာနိုင်ငံတော်   ရွေးကောက်တင်မြှောက်ခြင်း ခံရသောသမ္မတ    နိုင်ငံတော်လုံခြုံရေးနှင့် အေးချမ်းသာယာရေး ကော်မရှင်ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်ထံသို့ နိုင်ငံအသီးသီးမှ နိုင်ငံ့ခေါင်းဆောင်များနှင့်  ပြည်တွင်းပြည်ပရှိ အသင်းအဖွဲ့များက  အထူးဂုဏ်ယူဝမ်းမြောက်ကြောင်း သဝဏ်လွှာများပေးပို့လျက်ရှိသည်။    မြန်မာနိုင်ငံဆိုင်ရာ  တရုတ်ပြည်သူ့သမ္မတနိုင်ငံ သံအမတ်ကြီး H.E.Ms. Ma Jia ကလည်း ဧပြီလ  ၆ ရက်တွင် လူကိုယ်တိုင်လာရောက်ဂါရဝပြုတွေ့ဆုံခဲ့ပြီး  တရုတ်ပြည်သူ့သမ္မတနိုင်ငံ သမ္မတကြီး မစ္စတာရှီကျင့်ဖျင်ကပေးပို့သည့် ဝမ်းမြောက်ကြောင်း သဝဏ်လွှာကို လက်ရောက် ပေးအပ်ခဲ့သည်။

မြန်မာနိုင်ငံဆိုင်ရာ  တရုတ်ပြည်သူ့သမ္မတ နိုင်ငံသံအမတ်ကြီးက  “အဆွေတော်အား  နိုင်ငံတော် သမ္မတကြီးအဖြစ်ရွေးချယ် တင်မြှောက်ခြင်းခံရမှုအပေါ်  မိမိအနေဖြင့်ဝမ်းမြောက်ဂုဏ်ယူပါကြောင်း၊ အဆွေတော်အနေဖြင့်  မြန်မာ-တရုတ် နှစ်နိုင်ငံအကြား ဆက်ဆံရေးကောင်းမွန်အောင် ဆောင်ရွက်ခဲ့မှုများအပေါ်တွင်လည်း ကျေးဇူးတင်ရှိပါကြောင်း၊  အဆွေတော်၏ စွမ်းဆောင်မှုများအောက်တွင် မြန်မာ နိုင်ငံအနေဖြင့်   တည်ငြိမ်အေးချမ်းပြီး    ဖွံ့ဖြိုးတိုးတက်သည့် နိုင်ငံတစ်ခုဖြစ်လာမည်ဟုယုံကြည်ပါ ကြောင်းနှင့် နှစ်နိုင်ငံအကြား ပူးပေါင်းဆောင်ရွက်မှုများ ယခုထက်ပိုမိုတိုးတက် လာမည်ဟုယုံကြည်ပါကြောင်း”ဖြင့် ထည့်သွင်း ပြောကြားခဲ့သည်။

နိုင်ငံတော်လုံခြုံရေးနှင့်အေးချမ်း သာယာရေးကော်မရှင်ဥက္ကဋ္ဌ  ဗိုလ်ချုပ်မှူးကြီးမင်းအောင်လှိုင်အားနိုင်ငံတော်သမ္မတအဖြစ် ရွေးချယ်တင်မြှောက်ကြောင်း ကြေညာပြီးနောက်ပိုင်း  ပြည်ပနိုင်ငံသံတမန်များအနက် မြန်မာနိုင်ငံဆိုင်ရာ တရုတ်ပြည်သူ့သမ္မတနိုင်ငံ သံအမတ်ကြီးသည်  ပထမဆုံး လာရောက်တွေ့ဆုံသည့် သံအမတ်ဖြစ်သည်။  ထို့အတူ တရုတ်ပြည်သူ့သမ္မတနိုင်ငံ သမ္မတကြီး မစ္စတာရှီကျင့်ဖျင်အနေဖြင့်လည်း ဗိုလ်ချုပ်မှူးကြီးမင်းအောင်လှိုင်ကို နိုင်ငံတော်သမ္မတအဖြစ် ရွေးချယ်တင်မြှောက်ပြီးနာရီပိုင်းအတွင်းဝမ်းမြောက်ကြောင်း သဝဏ်လွှာပေးပို့ခဲ့သည်။  အိမ်နီးနားချင်း မိတ်ဆွေကောင်းနိုင်ငံတစ်ခုအနေဖြင့် မြန်မာနိုင်ငံ၏နိုင်ငံရေး ပြုပြင်ပြောင်းလဲမှုအပေါ် ထောက်ခံမှုပြသခြင်းပင်ဖြစ်သည်။

နိုင်ငံတော်၏ဖွဲ့စည်းပုံ အခြေခံဥပဒေ(၂၀၀၈ ခုနှစ်)   ပုဒ်မ ၄၁ တွင် “နိုင်ငံတော်သည်  လွတ်လပ်၍တက်ကြွပြီး ဘက်မလိုက်သောနိုင်ငံခြားရေး ဝါဒကိုကျင့်သုံးသည်။  ကမ္ဘာ့ငြိမ်းချမ်းရေးနှင့်  နိုင်ငံအချင်းချင်း မိတ်ဝတ်မပျက် ပေါင်းဖက်ဆက်ဆံရေးကို ရှေးရှုသည်။  နိုင်ငံအချင်းချင်းငြိမ်းချမ်းစွာ အတူယှဉ်တွဲနေထိုင်ရေးမူများကို စောင့်ထိန်းသည်” ဟူ၍ပြဋ္ဌာန်းထားသည်နှင့်အညီ  မြန်မာနိုင်ငံသည် အိမ်နီးချင်းနိုင်ငံများ အပါအဝင် ကမ္ဘာ့နိုင်ငံအားလုံးနှင့် ချစ်ကြည်ရင်းနှီးစွာ ဆက်ဆံလျက်ရှိသောနိုင်ငံဖြစ်သည်။ ချစ်စကိုရှည်စေမုန်းစကို တိုစေဆိုသည့်အတိုင်း နိုင်ငံအားလုံးအပေါ်တွင်  မိတ်ကောင်းဆွေကောင်းနိုင်ငံအဖြစ်  ကောင်းမွန်သော ဆက်ဆံရေးကို တည်ဆောက်ထားရှိသည်။ 

နိုင်ငံအားလုံးနှင့်ချစ်ကြည်ရင်းနှီးစွာ ဆက်ဆံနေသည့်အတွက် နိုင်ငံပေါင်းများစွာကလည်း ပြည်ထောင်စုသမ္မတ မြန်မာနိုင်ငံတော် ရွေးကောက်တင်မြှောက်ခြင်း ခံရသောသမ္မတ  နိုင်ငံတော်လုံခြုံရေးနှင့်အေးချမ်းသာယာရေး ကော်မရှင်ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်ထံသို့ ဝမ်းမြောက်ကြောင်း သဝဏ်လွှာများပေးပို့လျက်ရှိရာ ဧပြီလ ၃ ရက်တွင် ရုရှားဖက်ဒရေးရှင်းနိုင်ငံ၊ သမ္မတ မစ္စတာ ဗလာဒီမာပူတင်ထံမှ လည်းကောင်း၊ တရုတ်ပြည်သူ့သမ္မတနိုင်ငံ၊ သမ္မတ မစ္စတာ ရှီကျင့်ဖျင်ထံမှလည်းကောင်း၊ ဘယ်လာရုစ်သမ္မတနိုင်ငံ၊  သမ္မတ မစ္စတာ အလက်ဇန္ဒား  လူကာရှန်ကိုထံမှလည်းကောင်း၊  ရုရှားဖက်ဒရေးရှင်းနိုင်ငံ၊  နိုဗိုစီဗစ်ဒေသ အုပ်ချုပ်ရေးမှူး  မစ္စတာ တာရာ့နီကော့ဗ် အန်ဒရေ အလက်ဇန်ဒရိုဗစ်ချ်ထံမှလည်းကောင်း၊  ဧပြီလ ၄ ရက်တွင် နီကာရာဂွါသမ္မတနိုင်ငံ ပူးတွဲသမ္မတများဖြစ်ကြသည့် မစ္စတာ ဒန်နီရယ် အော်တီဂါ ဆာဗေဒရာနှင့် မစ္စစ် ရိုဆာရီယို မူရီလိုတို့ထံမှလည်းကောင်း၊ ဧပြီလ ၅ ရက်တွင် ထိုင်းနိုင်ငံဒုတိယဝန်ကြီးချုပ်နှင့် နိုင်ငံခြားရေးဝန်ကြီး Sihasak Phuangketkeowထံမှလည်းကောင်း၊ ဘူရားတီးရားပြည်နယ်အကြီးအကဲနှင့် အစိုးရအဖွဲ့ဥက္ကဋ္ဌ  မစ္စတာ အလက်စီ ဆမ်ဘူယဲဗစ် စီဂျယ်နော့ဗ်ထံမှလည်းကောင်း၊ နီကာရာဂွါသမ္မတနိုင်ငံ အမျိုးသားလွှတ်တော်ဥက္ကဋ္ဌ ဒေါက်တာ ဂူစတာဗို ပေါရပ်စ်ထံမှလည်းကောင်း၊ ဧပြီလ ၆ ရက်တွင် ကာဇက်စတန်သမ္မတနိုင်ငံ သမ္မတ မစ္စတာ ကာစင် ဂျိုမတ် တိုခါယက်ဗ်ထံမှလည်းကောင်း၊ ကမ္ဘောဒီးယားနိုင်ငံ ဘုရင်မင်းမြတ် ပရယ်ဘတ် ဆမ်ဒက် ပရယ် ဘိုရိုနစ် နိုရိုဒွန် သီဟာမိုနီထံမှလည်းကောင်း၊  ရုရှားဖက်ဒရေးရှင်းနိုင်ငံ  စိန့်ပီတာစဘတ်အုပ်ချုပ်ရေးမှူး   မစ္စတာ အလက်ဇန်းဒါး ဘယ်ဂ်လော့ထံမှလည်းကောင်း၊ ဂျပန်-မြန်မာ ပါလီမန်ချစ်ကြည်ရေးအသင်း ဒုတိယဥက္ကဋ္ဌ ဂျပန်နိုင်ငံအောက်လွှတ်တော်အမတ် မစ္စတာ ဟီရိုမီချိ ဝါတာနာဘေးထံမှလည်းကောင်း၊ဂျပန်-မြန်မာ ယဉ်ကျေးမှုမြှင့်တင်ရေးအသင်းဥက္ကဋ္ဌ  မစ္စတာ ဖူမီအို အူဆုအိနှင့် ညွှန်ကြားရေးမှူး မစ္စတာနာအိုဟိခို တာကခုတို့ထံမှ လည်းကောင်း ဝမ်းမြောက်ကြောင်း သဝဏ်လွှာများကို အသီးသီးပေးပို့ကြသည်။

  ပြည်ထောင်စုသမ္မတမြန်မာနိုင်ငံတော်  ရွေးကောက်တင်မြှောက်ခြင်း ခံရသောသမ္မတ နိုင်ငံတော်လုံခြုံရေးနှင့် အေးချမ်းသာယာရေး ကော်မရှင်ဥက္ကဋ္ဌ     ဗိုလ်ချုပ်မှူးကြီးမင်းအောင်လှိုင်၏နိုင်ငံတော်နှင့်ပြည်သူအပေါ် စေတနာမေတ္တာအပြည့်ဖြင့် ဆောင်ရွက်ချက်များကြောင့် ရွေးကောက် တင်မြှောက်ခံရခြင်းဖြစ်သည်။     မြန်မာနိုင်ငံ၏ အနာဂတ်ကိုပိုမိုကောင်းမွန်စွာ ဦးဆောင်နိုင်သူအဖြစ်ပြည်သူလူထုက ယုံကြည်သလို ပြည်ပနိုင်ငံခေါင်းဆောင်များကလည်း အပြည့်အဝ ယုံကြည်ကြသည်။

ထို့ကြောင့်    အထူးဂုဏ်ယူဝမ်းမြောက်ကြောင်း သဝဏ်လွှာများ ပေးပို့နေခြင်းဖြစ်ပါကြောင်း ရေးသားလိုက်ရပေသည်။          ။

MWD

အီရန်စစ်ပွဲသည် သီတင်းပတ်နှစ်ပတ်မှ သုံးပတ်အတွင်း အဆုံးသတ်နိုင်ခြေရှိကြောင်း အမေရိကန်သမ္မတ ဒေါ်နယ်ထရမ့် က ပြောကြားလိုက်သည်ဟု အယ်လ်ဂျာဇီးယားမှ ဖော်ပြခဲ့သည်။

စွမ်းအင်ထောက်ပံ့မှုများကို အနှောင့်အယှက်ဖြစ်စေပြီး ကမ္ဘာ့စီးပွားရေးကို တုန်လှုပ်စေခဲ့သည့် အီရန်စစ်ပွဲကို အဆုံးသတ်ရန်အတွက် သဘောတူညီချက်တစ်ရပ် ရရှိရန်မလိုကြောင်း ၎င်းက ပြောသည်။

အီရန်နိုင်ငံခြားရေးဝန်ကြီး အာဘက် အာရက်ချီ (Abbas Araghchi)က အမေရိကန်နှင့် တိုက်ရိုက်ဖြစ်စေ၊ သွယ်ဝိုက်၍ဖြစ်စေ သတင်းစကားများ အပြန်အလှန်ဖလှယ်မှုများရှိနေသော်လည်း မည်သည့်ညှိနှိုင်း ဆွေးနွေးမှု မျိုးမျှ ပြုလုပ်နေခြင်းမရှိကြောင်း ပြောဆိုခဲ့ပြီးနောက် ထရမ့်၏ မှတ်ချက်စကားထွက်ပေါ်လာ ခြင်းဖြစ်သည်။

ယခင်က အီရန်သည် ညှိနှိုင်းဆွေးနွေးမှုများ ပြုလုပ်နေပြီး သဘောတူညီချက်ရရန် တောင်းပန်နေသည်ဟု ထရမ့်က ပြောကြားခဲ့ဖူးသော်လည်း မတ်လ ၃၁ ရက်တွင်မူ ၎င်း၏ လေသံကို ပြောင်းလဲခဲ့သည်။

ပဋိပက္ခများကို ရပ်တန့်ရန်အတွက် အမေရိကန်အနေဖြင့် အောင်မြင်သော သံတမန်ရေးရာ ရလဒ်တစ်ခုရှိရန် လိုအပ် မလိုအပ် သတင်းထောက်များက အိမ်ဖြူတော်တွင် မေးမြန်းရာ ထရမ့်က “ အီရန်အနေနဲ့ သဘောတူညီချက်တစ်ခု လုပ်စရာမလိုပါဘူး၊ မလိုအပ်ပါဘူး။ မကြာခင် အချိန်မှာပဲ... ဖြစ်နိုင်ရင် နှစ်ပတ် ဒါမှမဟုတ် သုံးပတ်အတွင်းမှာပဲ အမေရိကန်က တိုက်ခိုက်မှုတွေ အဆုံးသတ်သွားမှာပါ”ဟု ပြောကြားခဲ့သည်။

“သူတို့ ကျောက်ခေတ်ကို ပြန်ရောက်သွားပြီလို့ ကျွန်တော်တို့ ယူဆနိုင်မယ့်အချိန်၊ သူတို့အနေနဲ့ နျူကလီးယား လက်နက် ထုတ်လုပ်နိုင်စွမ်း မရှိတော့မယ့် အချိန်မျိုးကျရင် ကျွန်တော်တို့ တိုက်ခိုက်မှုတွေကို အဆုံးသတ် သွားမှာပါ” ဟု ၎င်းက ပြောကြားခဲ့သည်။

အီရန်နိုင်ငံကမူ ၎င်းတို့၏ နျူကလီးယားဆိုင်ရာ လုပ်ဆောင်ချက်များသည် ငြိမ်းချမ်းသော ရည်ရွယ်ချက် အတွက်သာဖြစ်ပြီး နျူကလီးယားလက်နက် ထုတ်လုပ်ရန် မည်သည့်အခါကမျှ ကြိုးပမ်းခဲ့ခြင်းမရှိကြောင်း အစဉ်တစိုက် တုန့်ပြန်ပြောဆိုထားသည်။

လက်ရှိတွင် ဒေသတွင်း ကူးစက်ပျံ့နှံ့နေပြီး လူပေါင်းထောင်ချီ သေဆုံးခဲ့သည့် အရှေ့အလယ်ပိုင်းပဋိပက္ခ အတွင်းမှ ထရမ့် အနေဖြင့် အလွယ်တကူ ခေါင်းရှောင်ပြီး ထွက်ခွာသွားရန် မလွယ်ကူကြောင်း ကွင်စီ အင်စတီကျု (Quincy Institute)မှ အီရန် နိုင်ငံခြားရေးမူဝါဒဆိုင်ရာ ကျွမ်းကျင်သူ ထရီတာ ပါစီ (Trita Parsi) က ပြောကြားခဲ့သည်။

ထို့ပြင်ထရမ့်သည် ဟော်မုဇ်ရေလက်ကြား(Strait of Hormuz)အတွင်း ရေကြောင်းသွားလာမှု လွတ်လပ်ခွင့် ရရှိရေးအတွက် စစ်ရေးအရ ကူညီပေးရန် တောင်းဆိုချက်ကို ငြင်းပယ်ခဲ့ကြသည့် မဟာမိတ်နိုင်ငံများအား ပြစ်တင်ဝေဖန်ခဲ့သည်။

“ခင်ဗျားတို့ဟာ ကိုယ့်ဘာသာကိုယ် ဘယ်လိုတိုက်ပွဲ ဝင်ရမလဲဆိုတာကို စတင်သင်ယူရတော့မယ်။ ခင်ဗျားတို့က ကျွန်တော်တို့ဘက်မှာ မရှိခဲ့သလိုမျိုးပဲ၊ အမေရိကန်ကလည်း ခင်ဗျားတို့ကို ကူညီဖို့ နောက်ထပ် ရှိနေတော့မှာ မဟုတ်ဘူး။ အီရန်ကတော့ အခြေခံအားဖြင့် ပျက်စီးသွားပါပြီ။ ခက်ခဲတဲ့အပိုင်းက ပြီးသွားပြီ။ ကိုယ့်ဘာသာကိုယ်ပဲ ရေနံတွေကို ရှာကြပေတော့” ဟု ထရမ့်က Truth Social လူမှုမီဒီယာတွင် ရေးသားခဲ့သည်။

ကိုးကား - CNI International News

အမေရိကန်နှင့် အစ္စရေးတို့ ပူးပေါင်းပြီး အီရန်ကို တိုက်ခိုက်ခဲ့သည့် စစ်ပွဲတစ်လပြည့်ချိန်တွင် အမေရိကန်နိုင်ငံ တစ်ဝန်းရှိ မြို့ကြီးများတွင် သမ္မတ ဒေါ်နယ်ထရမ့် (Donald Trump) ၏ အုပ်ချုပ်မှုကို ဆန့်ကျင်သည့် “No Kings” (ဘုရင် မရှိစေရ) ဆန္ဒပြပွဲများသည် တစ်ကျော့ပြန် ဖြစ်ပွားလာခဲ့သည်ဟု အယ်လ်ဂျာဇီးယားမှ ဖော်ပြခဲ့သည်။

ထိုကဲ့သို့ လမ်းလျှောက်ချီတက်ဆန္ဒပြပွဲများသည် သမ္မတထရမ့် ဒုတိယသက်တမ်း စတင်ပြီးနောက်ပိုင်း တစ်နိုင်ငံလုံးအတိုင်းအတာဖြင့် တတိယမြောက် ပြုလုပ်သည့် ဆန္ဒပြပွဲများဖြစ်ပြီး ယခုတစ်ကြိမ်တွင် အီရန်စစ်ပွဲ ကို ဆန့်ကျင်သည့် အသံများ ပိုမိုကျယ်လောင်လာခဲ့သည်။

အာဏာရှင်နှင့် သက်ဦးဆံပိုင် ဘုရင်စနစ်တို့ကို ဆန့်ကျင်ရန် ရည်ရွယ်လှုပ်ရှားခဲ့သည့် “No Kings” ဝက်ဘ်ဆိုက်၏ ဖော်ပြချက်အရ အမေရိကန်ပြည်ထောင်စုရှိ ပြည်နယ် ၅၀ လုံးတွင် ဆန္ဒပြပွဲ စုစုပေါင်း ၃၃၀၀ ကျော်ကို ကျင်းပရန် စီစဉ်ထားသည်။

ထိုဆန္ဒပြပွဲများအနက် နယူးယောက် (New York) ၊ လော့စ်အိန်ဂျလိစ် (Los Angeles) နှင့် ဝါရှင်တန်ဒီစီ (Washington, DC) ကဲ့သို့သော မြို့ကြီးများတွင် လူအင်အား အမြောက်အမြား တက်ရောက်ကြမည်ဟု မျှော်လင့် ရသည်။

ထို့ပြင် ရောမ (Rome) ၊ ပဲရစ် (Paris)နှင့် ဘာလင်(Berlin)ကဲ့သို့သော ဥရောပမှ မြို့ကြီးများတွင်လည်း တစ်ပြိုင်နက်တည်း ဆန္ဒပြပွဲများ ပြုလုပ်လျက်ရှိသည်။

ပွဲစီစဉ်သူများသည် ကွန်ဆာဗေးတစ်ဝါဒီများ အားကောင်းသည့် အမေရိကန်မြို့ကြီးများ၏ ပြင်ပဒေသများတွင် နေထိုင်သူများကို စည်းရုံးရန် ရည်ရွယ်ထားကြသည်။

ဆန္ဒပြပွဲများတွင် ပါဝင်ဆင်နွှဲသူ စုစုပေါင်း၏ သုံးပုံနှစ်ပုံခန့်မှာ မြို့လယ်ခေါင်နေရာများတွင် မဟုတ်သော ပြင်ပ ဒေသများရှိ ဆန္ဒပြပွဲများတွင် ပါဝင်ကြလိမ့်မည်ဟု ပွဲစီစဉ်သူများကဆိုသည်။

“ဒီစနေနေ့ လူထုလှုပ်ရှားမှုရဲ့ ထူးခြားတဲ့အချက်က လူဘယ်လောက်များများ ဆန္ဒပြနေကြတာလဲ ဆိုတာတင် မဟုတ်ဘဲ ဘယ်နေရာတွေမှာ ဆန္ဒပြနေကြတာလဲ ဆိုတာပါပဲ” ဟု ပြီးခဲ့သည့်နှစ်က No Kings လှုပ်ရှားမှုကို စတင်ခဲ့သည့် Indivisible အမည်ရှိ အကျိုးအမြတ် မယူသည့်အဖွဲ့၏ ပူးတွဲ တည်ထောင်သူ လီယာဂရင်းဘာ့ချ် (Leah Greenberg) က ပြောကြားခဲ့သည်။

သို့သော် အဓိက ဆန္ဒပြပွဲကို မင်နီဆိုးတား (Minnesota) ပြည်နယ်ရှိ Twin Cities ဟု လူသိများသော မင်နီယာ ပိုလစ် - စိန့်ပေါလ် (Minneapolis-St Paul) ဒေသတွင် ကျင်းပရန် စီစဉ်ထားသည်။

အမေရိကန် အလယ်ပိုင်းတွင်ရှိသည့် မင်နီဆိုးတားပြည်နယ်သည် ပြီးခဲ့သည့် ဒီဇင်ဘာလအတွင်း သမ္မတ ထရမ့်၏ ရွှေ့ပြောင်းများနှိမ်နင်းသည့် Operation Metro Surge စစ်ဆင်ရေး၏ အချက်အခြာကျသည့် နေရာတစ်ခု ဖြစ်လာ ခဲ့သည်။

အဆိုပါ စစ်ဆင်ရေးအတွင်း ဖက်ဒရယ်လူဝင်မှုကြီးကြပ်ရေး (ICE) အေးဂျင့်ပေါင်း ၃၀၀၀ ကျော်သည် Twin Cities ဒေသသို့ ဝင်ရောက်စီးနင်းခဲ့ကြပြီး လူပေါင်းများစွာကို အင်အားအလွန်အကျွံ အသုံးပြုပြီး ဖမ်းဆီးခဲ့ကြောင်းဟု စွပ်စွဲခံခဲ့ရသည်။ 

ကိုးကား - CNI International News

ယနေ့ကျင်းပတဲ့ တတိယအကြိမ် ပြည်ထောင်စုလွှတ်တော် ပထမပုံမှန် အစည်းအဝေးပထမနေ့ကို တက်ရောက်လာကြတဲ့ ပြည်ထောင်စုလွှတ်တော် ကိုယ်စားလှယ်များနဲ့ ဧည့်သည်တော်များအားလုံး ကိုယ်၏ကျန်းမာခြင်း၊ စိတ်၏ ချမ်းသာခြင်းနဲ့ ပြည့်စုံပါစေကြောင်း ဆုမွန်ကောင်းတောင်းရင်း မင်္ဂလာပါလို့ ဦးစွာနှုတ်ခွန်းဆက်သအပ်ပါတယ်။

ကျွန်တော့်ကို တတိယအကြိမ် အမျိုးသားလွှတ်တော်ရဲ့ဥက္ကဋ္ဌအဖြစ် ရွေးကောက်တင်မြှောက်ခဲ့တဲ့အတွက် ဖွဲ့စည်းပုံအခြေခံဥပဒေပုဒ်မ ၇၆၊ ပုဒ်မခွဲ(က)အရ ပြည်ထောင်စုလွှတ်တော်နာယကတာဝန်ကို လွှတ်တော်သက်တမ်းကာလ ၂ နှစ်ခွဲ၊ လပေါင်း ၃၀ ပူးတွဲတာဝန်ထမ်းဆောင်ရမှာဖြစ်လို့ များစွာဂုဏ်ယူဝမ်းမြောက်မိကြောင်း ပြောကြားလိုပါတယ်။

ဒီနေ့ဟာဆိုရင် ၂၀၂၅ ခုနှစ်၊ ပါတီစုံဒီမိုကရေစီအထွေထွေရွေးကောက်ပွဲကြီးကနေ နိုင်ငံသူ နိုင်ငံသားများရဲ့ ဆန္ဒနဲ့အညီ ရွေးကောက်တင်မြှောက်ခံထားရတဲ့ ပြည်သူ့ကိုယ်စားပြု လွှတ်တော်ကိုယ်စားလှယ်ကြီးများနဲ့ တပ်မတော်သားလွှတ်တော်ကိုယ်စားလှယ်များ စုံစုံလင်လင် စုစည်းတက်ရောက်လာကြတဲ့ တတိယအကြိမ် ပြည်ထောင်စုလွှတ်တော် ပထမပုံမှန်အစည်းအဝေး ပထမဦးဆုံးနေ့ဖြစ်ပါတယ်။

ပြည်ထောင်စုလွှတ်တော် ကိုယ်စားလှယ်များခင်ဗျား-

ကျွန်တော်တို့နိုင်ငံရဲ့ သမိုင်းကြောင်းဖြစ်စဉ်နဲ့ ခေတ်ကာလရဲ့ တောင်းဆိုချက်အရ နိုင်ငံတော်နဲ့ ပြည်သူအများစုရဲ့ လိုအင်ဆန္ဒပန်းတိုင်ဟာ စစ်မှန်စည်းကမ်းပြည့်ဝတဲ့ ဒီမိုကရေစီနဲ့ ဖက်ဒရယ်စနစ်ကိုအခြေခံတဲ့ ပြည်ထောင်စုကြီး ပေါ်ထွန်းရေးဖြစ်ပါတယ်။ အဲ့ဒီပန်းတိုင်ကို အမြန်ဆုံးရောက်ရှိဖို့ ပါတီစုံဒီမိုကရေစီစနစ်ရှင်သန်ရေးဟာ အလွန် အရေးကြီးပါတယ်။ ဒီမိုကရေစီခရီးလမ်းလျှောက် လှမ်းနိုင်ဖို့အတွက် အခက်အခဲတွေ၊ စိန်ခေါ်မှုတွေကြားကပင် လက်ရှိနိုင်ငံတော်အစိုးရက မဆုတ်မနစ်တဲ့ ဇွဲလုံ့လတို့နဲ့ ပါတီစုံဒီမိုကရေစီအထွေထွေ ရွေးကောက်ပွဲကြီးကို လွတ်လပ်သန့်ရှင်းစွာ၊ တရားမျှတပြီး သိက္ခာရှိစွာနဲ့ နိုင်ငံတကာလေ့လာသူများ ရှေ့မှောက်မှာ အောင်မြင်စွာကျင်းပပေးခဲ့တာဖြစ်ပါတယ်။ ပြည်သူက ရွေးကောက်တင်မြှောက်လိုက်တဲ့ ပြည်သူ့ကိုယ်စားလှယ်တော်ကြီးများဟာလည်း ဥပဒေပြုရေးတာဝန်ကို ထမ်းဆောင်နိုင်ဖို့ အခုလို လွှတ်တော်အစည်းအဝေးတွေကို ကျင်းပပြုလုပ် နိုင်ခဲ့တာဖြစ်ပါတယ်။   

တတိယအကြိမ် လွှတ်တော်အသီးသီးရဲ့ ပထမပုံမှန်အစည်အဝေးမှာ နိုင်ငံတော်နဲ့ နိုင်ငံသားများအတွက် အရေးကြီးကိစ္စရပ်များဖြစ်တဲ့ နိုင်ငံတော်သမ္မတနဲ့ ဒုတိယသမ္မတများ ရွေးချယ်တင်မြှောက်တဲ့ကိစ္စရပ်တွေ၊ လွှတ်တော်ဥက္ကဋ္ဌ / ဒုဥက္ကဋ္ဌများ ရွေးကောက်တင်မြှောက်တာတွေ၊ ပြည်ထောင်စု အစိုးရဖွဲ့စည်းတာ၊ ပြည်ထောင်စုအဆင့် အဖွဲ့ အစည်းဝင်တွေကို ခန့်အပ်တာဝန်ပေးအပ်ခြင်း ဆိုင်ရာကိစ္စရပ်တွေ၊ သက်ဆိုင်ရာတိုင်းဒေသကြီးနဲ့ ပြည်နယ်အလိုက်ဝန်ကြီးချုပ်နဲ့အစိုးရအဖွဲ့ ဖွဲ့စည်းတာတွေ၊ လွှတ်တော်ရေးရာကော်မတီ၊ ပူးပေါင်း ကော်မတီဖွဲ့စည်းတာတွေနဲ့စပ်လျဉ်းပြီး လွှတ်တော်တွေရဲ့ အဆုံးအဖြတ်ရယူကာ အတည်ပြုရေးလုပ်ငန်းတွေကို ဆောင်ရွက်ကြရမှာဖြစ်ပါတယ်။

ပြည်ထောင်စုလွှတ်တော် ကိုယ်စားလှယ်များခင်ဗျား-

 ၂၀၂၅ ခုနှစ်၊ မတ်လ ၂၈ ရက်နေ့မှာဖြစ်ပွားခဲ့တဲ့ မန္တလေးငလျင်ကြီးရဲ့ လှုပ်ခတ်မှုကြောင့် ထိခိုက်ပျက်စီးမှုတွေကို အချိန်နှင့်တစ်ပြေးညီ ပြန်လည်ပြုပြင်ဆောင်ရွက်ပေးခဲ့လို့ ယခုလို လွှတ်တော်အစည်းအဝေးတွေကို အောင်မြင်စွာကျင်းပနိုင်တာဖြစ်ပါတယ်။ နိုင်ငံတော်ရဲ့အခြေအနေနဲ့ လိုက်လျောညီထွေစွာ၊ နိုင်ငံသားတွေရဲ့ဂုဏ်တွေနဲ့ လိုက်လျော ညီထွေစွာ ဒီလိုခံ့ညားထည်ဝါတဲ့ လွှတ်တော်အဆောက်အအုံကြီးတွေကို ပြုပြင်တည်ဆောက်ပေးတာ၊ လွှတ်တော်ကိုယ်စားလှယ်များ ရောက်ရှိလာတဲ့အခါမှာ အစစအရာရာ လိုလေသေးမရှိအောင် ကြိုတင်မြော်တွေးပြီး ဆောင်ရွက်ပေးခဲ့တာတွေအတွက် ပြည်ထောင်စုလွှတ်တော်က နိုင်ငံတော်အစိုးရ၊ အမျိုးသားကာကွယ်ရေးနှင့် လုံခြုံရေးကောင်စီကို ကျေးဇူးဥပကာရ အထူးတင်ရှိပါကြောင်း လေးစားစွာပြောကြားလိုပါတယ်။

ပြည်ထောင်စုလွှတ်တော်ကြီးဟာ ပြည်သူ့လွှတ်တော်နဲ့ အမျိုးသားလွှတ်တော်တို့မှာ တင်သွင်းဆွေးနွေးကြတဲ့ ဥပဒေကြမ်းတွေကို အတည်ပြုပေးရတဲ့ လွှတ်တော်ကြီးဖြစ်တဲ့အပြင် နိုင်ငံတော်အတွက် အရေးကြီးတဲ့ကိစ္စရပ်တွေကို အဆုံးအဖြတ်ပေးရတဲ့ လွှတ်တော်ကြီးဖြစ်တဲ့အတွက် ပြည်ထောင်စုလွှတ်တော်ရဲ့ အခန်းကဏ္ဍဂုဏ်ဒြပ်ဟာ မြင့်မားပါ တယ်။ ပြည်ထောင်စုလွှတ်တော်ကိုယ်စားလှယ်တွေရဲ့ အခန်းကဏ္ဍဟာလည်း အရေးပါပါတယ်။

ဒါကြောင့် လွှတ်တော်ကိုယ်စားလှယ်တွေအနေနဲ့ သတ်မှတ်ထားတဲ့ ဥပဒေ၊ နည်းဥပဒေတွေကို လေးစားလိုက်နာပြီးစံပြဖြစ်အောင် နေထိုင်ကြဖို့လိုပါတယ်။ ဒါ့အပြင် ပုဂ္ဂိုလ်စွဲ၊ ပါတီစွဲမထားဘဲ နိုင်ငံတော်ရဲ့ အမျိုးသားအကျိုးစီးပွား၊ နိုင်ငံတော်နဲ့ နိုင်ငံသားတို့ရဲ့ အကျိုးစီးပွားကိုသာ ဦးထိပ်ထားပြီး မတူကွဲပြားခြားနားတဲ့ အမြင်တွေအပေါ်မှာ ပိုမို ကောင်းမွန်တဲ့ဆုံးဖြတ်ချက်တွေ ထွက်ပေါ်လာစေဖို့ အပြန်အလှန်လေးစားမှုနဲ့ ဆွေးနွေးညှိနှိုင်းကြရမှာဖြစ်ပါတယ်။

တစ်ခါတစ်ရံ ပြည်သူ့လွှတ်တော်နဲ့ အမျိုးသားလွှတ်တော်တို့ သဘောထားကွဲလွဲတဲ့ ဥပဒေကြမ်းတွေကို ပြည်ထောင်စုလွှတ်တော်မှာ ဆွေးနွေးဆုံးဖြတ်ကြတဲ့အခါမှာလည်း လွှတ်တော်စွဲ၊ ဝါဒစွဲ၊ ပါတီစွဲ စတာတွေမထားရှိဘဲ ပိုမိုကောင်းမွန်တဲ့ ဥပဒေပြဋ္ဌာန်းချက်များ ဖြစ်ပေါ်လာစေရေးကိုသာဦးတည်ပြီး နားလည်မှု၊ စည်းလုံးညီညွတ်မှုတို့ကို အခြေခံပြီး ဆွေးနွေးသွားကြဖို့ဖြစ်ပါတယ်။

နိုင်ငံတော်တည်ငြိမ်အေးချမ်းပြီး ဖွံ့ဖြိုးတိုးတက်စေချင်တာ၊ ထာဝရငြိမ်းချမ်းရေးရရှိပြီး စစ်မှန်စည်းကမ်းပြည့်ဝတဲ့ ဒီမိုကရေစီနဲ့ ဖက်ဒရယ်စနစ်ကိုအခြေခံတဲ့ ပြည်ထောင်စုကြီးကို တည်ဆောက်လိုတာ ကျွန်တော်တို့ လွှတ်တော်ကိုယ်စားလှယ်အားလုံးရဲ့ တူညီတဲ့ဆန္ဒဖြစ်ပြီး ဘုံရည်မှန်းချက်လည်းဖြစ်ပါတယ်။ ဒါကြောင့် နိုင်ငံတော်နဲ့ နိုင်ငံသားများ အကျိုးဖြစ်ထွန်းစေမယ့်ကိစ္စရပ်တွေ ကို အပြန်အလှန်နားလည်မှုနဲ့ စည်းစည်းလုံးလုံး ညီညီညွတ်ညွတ် ညှိနှိုင်းတိုင်ပင်ဆွေးနွေးကြရမှာဖြစ်ပါတယ်။

ပြည်ထောင်စုလွှတ်တော်ရဲ့ အဓိက တာဝန်ကတော့ ဖွဲ့စည်းပုံအခြေခံဥပဒေနဲ့အညီ နိုင်ငံတော် အချုပ်အခြာအာဏာရဲ့ ခက်မသုံးဖြာဖြစ်တဲ့ ဥပဒေပြုရေးအာဏာ၊ အုပ်ချုပ်ရေးအာဏာနဲ့ တရားစီရင် ရေးအာဏာတွေကို တတ်နိုင်သမျှ ပိုင်းခြားသုံးစွဲခြင်းနဲ့ အချင်းချင်းအပြန်အလှန်ထိန်းကျောင်းခြင်းတို့ကိုပြုရာမှာ ဥပဒေပြုခြင်းနဲ့ ထိန်းကျောင်းဆောင် ရွက်ခြင်းပဲဖြစ်ပါတယ်။

ပြည်ထောင်စုလွှတ်တော်က အတည်ပြုပြဋ္ဌာန်းလိုက်တဲ့ ဥပဒေတိုင်းဟာ အဖွဲ့အစည်းတစ်ခုရဲ့ အကျိုးစီးပွား၊ ပုဂ္ဂလိကအကျိုးစီးပွားထက် နိုင်ငံတော်ရဲ့အကျိုးစီးပွား၊ နိုင်ငံသူ နိုင်ငံသားများရဲ့ အကျိုးစီးပွားကို အဓိကဖော်ဆောင်ပေးတဲ့ ဥပဒေများဖြစ်ရပါမယ်။ လက်ရှိမျက်မှောက်ကာလမှာ ခေတ်စနစ်နဲ့မကိုက်ညီတော့တဲ့ ဥပဒေများကို ပြန်လည်လေ့လာဆန်းစစ်ပြီး လိုအပ်သလိုပယ်ဖျက်ခြင်း၊ ပြင်ဆင်ခြင်း၊ နိုင်ငံတော်နဲ့ နိုင်ငံသူနိုင်ငံသားများအတွက် အကျိုးဖြစ်ထွန်းစေတဲ့ ဥပဒေအသစ်များတင်သွင်းခြင်း၊ ဆွေးနွေးအတည်ပြုခြင်းများအပြင် လက်ရှိတည်ဆဲဥပဒေများရဲ့ အာဏာ သက်ရောက်မှုရှိ မရှိ ပြန်လည်ဆန်းစစ်ပြီး လိုအပ်ပါက ပြင်ဆင်ကြရမှာဖြစ်ပါတယ်။

ကျွန်တော်တို့ လွှတ်တော်ကိုယ်စားလှယ်များဟာ ပြည်ထောင်စုသမ္မတ မြန်မာနိုင်ငံတော် ဖွဲ့စည်းပုံအခြေခံဥပဒေ၊ လွှတ်တော်ဆိုင်ရာဥပဒေ၊ နည်းဥပဒေများမှာပါဝင်တဲ့ ဥပဒေပြုရေးဆိုင်ရာ ပြဋ္ဌာန်းချက်တွေကို ကြေညက်အောင် လေ့လာထား ပြီး တိတိကျကျ လိုက်နာဆောင်ရွက်သွားကြရမှာဖြစ်ပါတယ်။ ဥပဒေပြုလွှတ်တော်ကြီးအတွင်းကို ရောက်ရှိလာတဲ့ လွှတ်တော်ကိုယ်စားလှယ်များအနေနဲ့ နိုင်ငံတော်နဲ့ ပြည်သူများရဲ့အကျိုးကို အုပ်ချုပ်ရေးမဏ္ဍိုင်၊ တရားစီရင်ရေးမဏ္ဍိုင်များပူးပေါင်းပြီး လွှတ်တော်အတွင်းမှာ ဝိုင်းဝန်းဆွေးနွေး ဆုံးဖြတ်မှာဖြစ်လို့ ပြည်ထောင်စုစိတ်ဓာတ်အရင်းခံနဲ့ ပူးပေါင်းဆွေးနွေး လုပ်ဆောင်ကြရမှာ ဖြစ်ပါတယ်။

ပြည်ထောင်စုလွှတ်တော် ကိုယ်စားလှယ်များခင်ဗျား-

နိဂုံးချုပ်အနေနဲ့ ပြောကြားလိုတာကတော့ ကျွန်တော့်အနေနဲ့ ပြည်ထောင်စုလွှတ်တော်နာယကအဖြစ် တာဝန်ထမ်းဆောင်ခွင့်ရတဲ့ ကာလအတွင်း ဖြောင့်မတ်မှန်ကန်ပြီး သစ္စာရှိစွာနဲ့ နိုင်ငံသူနိုင်ငံသားများ လိုလားတဲ့၊ စစ်မှန်စည်းကမ်းပြည့်ဝတဲ့ ဒီမိုကရေစီနဲ့ ဖက်ဒရယ်စနစ်ကို အခြေခံတဲ့ ပြည်ထောင်စုကြီးပေါ်ထွန်းလာရေးကို အလေးထားကြိုးစားဆောင်ရွက်သွားမှာ ဖြစ်ပါတယ်။ ဒီမိုကရေစီ အလေ့အထများနဲ့အညီ ကျင်းပတဲ့ လွှတ်တော်မှာ ကျွန်တော်တို့အားလုံး လိုက်နာကျင့်သုံးရမယ့် ဥပဒေ၊ နည်းဥပဒေ၊ ဓလေ့ထုံးတမ်းတွေဟာ နောင်လာ နောက်သားတွေအတွက် စံနမူနာပြစရာ အစဉ်အလာကောင်းတွေဖြစ်အောင် အားလုံးညီညီညွတ်ညွတ်နဲ့ ပူးပေါင်းဆောင်ရွက်ကြပါရန် တိုက်တွန်းပါကြောင်း နဲ့ ပြည်သူများယုံကြည်အားထားရတဲ့ လွှတ်တော် တစ်ရပ် ဖော်ဆောင်နိုင်မယ်လို့ ယုံကြည်ပါကြောင်း ပြောကြားရင်း နိဂုံးချုပ်ပါတယ်ခင်ဗျား။

moi

အယ်ဒီတာ့အာဘော်

(၂ဝ၂၆  ခုနှစ်၊ မတ် ၂၀  ရက်)

      မြန်မာနိုင်ငံအတွင်းရှိ တိုင်းရင်းသားလူမျိုးအပေါင်းသည် ရှေးနှစ်ပေါင်းများစွာကတည်းက အေးအတူပူအမျှ စည်းလုံးညီညွတ်စွာ နေထိုင်လျက်ရှိကြသူများဖြစ်ကြသည်။ ယနေ့အချိန်အခါတွင် နိုင်ငံတော်ဖွဲ့စည်းပုံ အခြေခံဥပဒေ(၂၀၀၈ ခုနှစ်)အရ တိုင်းဒေသကြီးနှင့်ပြည်နယ်များ ပိုင်းခြားသတ်မှတ်ပေးထားရာတွင် လူမျိုးစုအမည်များပါရှိသည့် ပြည်နယ်များလည်းပါဝင်သည်။ မည်သည့်နေရာဒေသတွင်မဆို တိုင်းရင်းသားလူမျိုးအားလုံးသည် မိမိတို့နှစ်သက်မြတ်နိုးရာဒေသတွင် အေးချမ်းစွာ စုပေါင်းနေထိုင်လျက်ရှိကြသည်။ စည်းလုံးညီညွတ်ခြင်းသည် အရာရာကိုအောင်မြင်မှုဖြစ်ပေါ်စေသည်။

ယနေ့အချိန်အခါတွင်မြန်မာနိုင်ငံသည်ပြည်သူများ၏ လိုလားချက်နှင့်အညီ တရားမျှတခြင်း၊ လွတ်လပ်ခြင်း၊ တန်းတူညီမျှခြင်းဟူသည့် လောကပါလတရားများ ထွန်းကားရာ ဒီမိုကရေစီစနစ်ကိုကျင့်သုံးသည့်နိုင်ငံအဖြစ်သို့ လျှောက်လှမ်းနေချိန်ဖြစ်သည်။ ဒီမိုကရေစီနိုင်ငံထူထောင်ရာတွင် နိုင်ငံသားအားလုံးအနေဖြင့် စည်းလုံးညီညွတ်ခြင်း၊ စည်းကမ်းရှိခြင်း၊ တရားဥပဒေကိုလေးစား လိုက်နာခြင်းနှင့် အသိဉာဏ်ပညာပြည့်ဝခြင်းတို့သည် မရှိမဖြစ် လိုအပ်မည်ဖြစ်ပါသည်။ 

အမျိုးသားကာကွယ်ရေးနှင့် လုံခြုံရေးကောင်စီ၏ ဦးတည်ချက်နှင့်အညီ လွတ်လပ်၍ တရားမျှတမှု အပြည့်ရှိသော ၂၀၂၅ ခုနှစ်၊ ပါတီစုံဒီမိုကရေစီအထွေထွေရွေးကောက်ပွဲကို အပိုင်းသုံးပိုင်းခွဲ၍ အောင်မြင်စွာ ကျင်းပပေးခဲ့ပြီးဖြစ်သည်။ ပြည်သူများလိုလားသည့် ဒီမိုကရေစီလမ်းကြောင်းကို လျှောက်လှမ်းနိုင်ရန်အတွက် ၂၀၂၆ ခုနှစ်၊ မတ်လ ၁၆ ရက်နေ့တွင် ပြည်သူ့လွှတ်တော်၊ မတ်လ ၁၈ ရက်နေ့တွင် အမျိုးသားလွှတ်တော်တို့ကို ခေါ်ယူကျင်းပလျက်ရှိပြီး နိုင်ငံတော်သမ္မတ ရွေးချယ်တင်မြှောက်ခြင်းဆိုင်ရာ လုပ်ငန်းများအပါအဝင် လွှတ်တော်အစည်းအဝေးများကို အစီအစဉ်အတိုင်း ဆောင်ရွက်လျက်ရှိသည်။ မကြာမီကာလအတွင်း နိုင်ငံတော်သမ္မတအသစ် ဦးဆောင်သည့် ပြည်ထောင်စု အစိုးရအဖွဲ့တစ်ရပ် ပေါ်ပေါက်လာတော့မည်ဖြစ်သည်။

နိုင်ငံတော်၏လုပ်ငန်းစဉ်များ အချိန်တိုအတွင်း ထိရောက်အောင်မြင်အောင် အကောင်အထည်ဖော် ဆောင်ရွက်နိုင်ရန်အတွက် ကဏ္ဍပေါင်းစုံ၊ ဘက်ပေါင်းစုံမှ အသိပညာရှင် အတတ်ပညာရှင်များ၊ တိုင်းရင်းသားပြည်သူများက ထွက်ပေါ်လာမည့် နိုင်ငံတော်အစိုးရအသစ်နှင့်အတူ စည်းလုံးညီညွတ်စွာဖြင့် တက်တက်ကြွကြွ ပူးပေါင်းဆောင်ရွက်ကြရန်ဖြစ်သည်။

နိုင်ငံတော်စီးပွားရေးဖွံ့ဖြိုးတိုးတက်အောင် ဆောင်ရွက်ရာတွင် ပညာရေး၊ ကျန်းမာရေး၊ တရားဥပဒေစိုးမိုးရေးနှင့် လမ်းပန်းဆက်သွယ်မှု တိုးတက်စေရေးစသည့် အဓိကကျပြီး အခြေခံလိုအပ်ချက်ဖြစ်သောလုပ်ငန်းများကို အကောင်အထည်ဖော်ဆောင်ရွက်လျက်ရှိသည်။ ကုန်ထုတ်လုပ်ငန်းများကို ဆောင်ရွက်ရာတွင် အခြေခံအကျဆုံးဖြစ်သည့် အသေးစား၊ အငယ်စားနှင့် အလတ်စားစီးပွားရေး (MSME) လုပ်ငန်းများကို တိုးတက်အောင်မြင်မှုရရှိစေရန် မဖြစ်မနေဆောင်ရွက်ရမည်ဖြစ်သည်။

ပြည်ထောင်စုသမ္မတမြန်မာနိုင်ငံတော် ယာယီသမ္မတ နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌ ဗိုလ်ချုပ်မှူးကြီး သတိုးမဟာသရေစည်သူ သတိုးသီရိသုဓမ္မမင်းအောင်လှိုင်ထံမှ(၅၂)နှစ်မြောက် မွန်ပြည်နယ်နေ့အခမ်းအနားသို့ ပေးပို့သည့်သဝဏ်လွှာတွင်  “သမိုင်းကြောင်း သင်ခန်းစာများအရ တိုင်းရင်းသားစည်းလုံး ညီညွတ်ရေးသည် ပြည်ထောင်စုမပြိုကွဲရေး၊ တိုင်းပြည်တည်ငြိမ်အေးချမ်း သာယာရေးနှင့် တရားဥပဒေစိုးမိုးရေးတို့အတွက် အလွန်ပင်အရေးကြီးလှပါသည်။ လက်နက်ကိုင်ပဋိပက္ခများနှင့် အကြမ်းဖက်ဆူပူမှုများချုပ်ငြိမ်းပြီး တိုင်းရင်းသားပြည်သူအားလုံးသည် ပြည်ထောင်စုအတွင်း စိတ်ချမ်းသာစွာနေထိုင်နိုင်ရေးအတွက် ငြိမ်းချမ်းရေးနှင့် စည်းလုံးညီညွတ်ရေးမှာ အလွန်အရေးကြီးလှပါသည်”ဟူ၍ ထည့်သွင်းဖော်ပြထားသည်။

ယနေ့အချိန်တွင် အနာဂတ်အင်အားများဖြစ်သည့် လူငယ်များကို ကိုယ်ရည်ကိုယ်သွေး၊ ကိုယ်စွမ်းကိုယ်စများမြှင့်တင်ကာ ဘက်စုံထူးချွန်ထက်မြက်သည့် လူကောင်းလူတော်များဖြစ်အောင် ပြုစုပျိုးထောင်ပေးရန်လိုအပ်သည်။ ထို့ပြင် လူငယ်လူရွယ်များ၏ အကျင့်စာရိတ္တကောင်းမွန်စေရေး၊ တိုင်းချစ်၊ ပြည်ချစ်စိတ်များရရှိပြီး နိုင်ငံတော်ကိုကာကွယ်စောင့်ရှောက်လိုစိတ်နှင့် တိုင်းပြည်၏ဂုဏ်ကို မြှင့်တင်လိုစိတ်များ ဖြစ်ပေါ်စေရေးအတွက် စနစ်တကျလေ့ကျင့်ပျိုးထောင်ရန်ဖြစ်သည်။ ထို့ပြင် လက်နက်ကိုင်ပဋိပက္ခများချုပ်ငြိမ်းပြီး ဒီမိုကရေစီလမ်းကြောင်းတွင် ပါဝင်လျှောက်လှမ်းရမည်ဖြစ်သည်။  အနှစ်ချုပ်ဆိုရသော် စည်းလုံးညီညွတ်ခြင်းဖြင့်  အနာဂတ်နိုင်ငံတော်ကို အလှဆင်ကြရန်ဖြစ်ပါကြောင်း တိုက်တွန်းရေးသား လိုက်ရပေသည်။   ။

MWD

အယ်ဒီတာ့အာဘော်

(၂ဝ၂၆  ခုနှစ်၊ မတ် ၁၈ ရက်)

    တတိယအကြိမ်ပြည်သူ့လွှတ်တော် ပထမပုံမှန်အစည်းအဝေးကို မတ်လ ၁၆ ရက်တွင် စတင်ကျင်းပနေပြီဖြစ်သည်။ ပထမဆုံးနေ့တွင် လွှတ်တော်သဘာပတိ ရွေးချယ်တင်မြှောက်ခြင်း၊  ပြည်သူ့လွှတ်တော်ဥက္ကဋ္ဌနှင့်ဒုတိယဥက္ကဋ္ဌရွေးချယ်တင်မြှောက်ခြင်းများကိုဆောင်ရွက်ကြသည်။  ပြည်သူ့ လွှတ်တော်သို့တက်ရောက်ခွင့်ရှိသည့် လွှတ်တော်ကိုယ်စားလှယ်များရာခိုင်နှုန်းပြည့်တက်ရောက်လာသည့်အတွက် ပြည်သူ့လွှတ်တော်အစည်းအဝေး အထမြောက်အောင်မြင်ခဲ့သည်။ ရွေးကောက်ခံကိုယ်စားလှယ်များ၏ စုပေါင်းအားနှင့်လျှောက်လှမ်းနေသည့် ပြည်သူ့လွှတ်တော်အခင်းအကျင်းကို မြင်တွေ့ရသည့်အတွက် ပြည်သူအားလုံးက စိတ်ဝင်တစားရှိကြသည်။

နိုင်ငံတော်အတွင်းရှိ နေပြည်တော်ကောင်စီနယ်မြေအပါအဝင် တိုင်းဒေသကြီးနှင့်ပြည်နယ်အသီးသီးရှိပြည်သူများကိုကိုယ်စားပြု တက်ရောက်လာကြသည့်  ပြည်သူ့ကိုယ်စားလှယ်များအနေဖြင့် နိုင်ငံတော်အကျိုး၊ ပြည်သူ့အကျိုးကိုဆတက်ထမ်းပိုး သယ်ပိုးဆောင်ရွက်ကြရတော့မည်ဖြစ်သည်။     ပါတီစုံဒီမိုကရေစီ အထွေထွေရွေးကောက်ပွဲမှ တရားမျှတ၊ မှန်ကန်စွာရွေးချယ် တင်မြှောက်လိုက်သည့် ကိုယ်စားလှယ်များအနေဖြင့် နိုင်ငံတော်တည်ငြိမ်အေးချမ်းရေး၊ ခေတ်မီဖွံ့ဖြိုးတိုးတက်သော နိုင်ငံတော်သစ်ပေါ်ထွန်းရေးတို့ကို   ဦးတည်ဆောင်ရွက်ကြရမည်ဖြစ်သလို ဒို့တာဝန်အရေးသုံးပါးကိုလည်း စောင့်ထိန်းကြရမည်ဖြစ်သည်။

ထို့ပြင် လွှတ်တော်ကိုယ်စားလှယ်များမှာ လွှတ်တော်ကိုယ်စားလှယ်များအဖြစ် ကတိသစ္စာပြုကြရာတွင်နိုင်ငံတော်ဖွဲ့စည်းပုံအခြေခံ ဥပဒေကိုလည်း ထိန်းသိမ်းကာကွယ်စောင့်ရှောက်ပြီး နိုင်ငံတော်၏ ဥပဒေများကို လိုက်နာပါမည်ဟူ၍လည်းကောင်း၊ ထမ်းဆောင်ရမည့်တာဝန် ဝတ္တရားများကို ဖြောင့်မတ်မှန်ကန်စွာဖြင့် ကိုယ်စွမ်းရှိသရွေ့၊ ဉာဏ်စွမ်းရှိသရွေ့ထမ်းဆောင်ပါမည်ဟူ၍ လည်းကောင်း   လေးနက်တည်ကြည်စွာ ကြေညာ၍  ကတိသစ္စာပြုထားကြသူများဖြစ်သည်။

မြန်မာနိုင်ငံတွင် စစ်မှန်၍စည်းကမ်းပြည့်ဝသော ပါတီစုံဒီမိုကရေစီစနစ်ကို ၂၀၁၁ ခုနှစ်မှစ၍ ဥပဒေပြုရေး၊ အုပ်ချုပ်ရေးနှင့်တရားစီရင်ရေးဟူသော မဏ္ဍိုင်ကြီး(၃)ရပ်အတိုင်း ကျင့်သုံးဆောင်ရွက်ခဲ့သည်။ ၂၀၂၀ ပြည့်နှစ်ပါတီစုံဒီမိုကရေစီအထွေထွေ ရွေးကောက်ပွဲတွင် မဲမသမာမှုများ၊ တရားမဲ့ပြုကျင့်မှုများသာမရှိခဲ့လျှင်  သို့မဟုတ် မှန်ကန်သောနည်းလမ်းဖြင့်  ပူးပေါင်းဖြေရှင်းခဲ့လျှင် ယခုကျင်းပသည့်လွှတ်တော်သက်တမ်းမှာ စတုတ္ထအကြိမ်ဖြစ်ပေမည်။

လွှတ်တော်ကိုယ်စားလှယ်များအနေဖြင့် မိမိတို့ကတိသစ္စာ ပြုထားသည့်အတိုင်း ဖွဲ့စည်းပုံအခြေခံဥပဒေကိုထိန်းသိမ်း ကာကွယ်စောင့်ရှောက်ခြင်း၊  နိုင်ငံတော်၏တရားဥပဒေများကို လိုက်နာခြင်းနှင့် ပြည်ထောင်စုမပြိုကွဲရေး၊ တိုင်းရင်းသားစည်းလုံး ညီညွတ်မှုမပြိုကွဲရေး၊ အချုပ်အခြာအာဏာ တည်တံ့ခိုင်မြဲရေးကို ထာဝစဉ်ဦးထိပ်ပန်ဆင်ကြမည်ဆိုပါက စစ်မှန်၍စည်းကမ်းပြည့်ဝသော ပါတီစုံဒီမိုကရေစီစနစ်လမ်းကြောင်းမှာ ဖြောင့်တန်းနေမည်ဖြစ်သည်။ ပြည်သူများအနေဖြင့် ပါတီစုံဒီမိုကရေစီစနစ်ဖြစ်ထွန်းပေါ်ပေါက်လာစေရေးအတွက် ၂၀၂၅ ခုနှစ် ပါတီစုံဒီမိုကရေစီ အထွေထွေရွေးကောက်ပွဲကြီးတွင် မိမိတို့နှစ်သက်သည့် ကိုယ်စားလှယ်များကိုရွေးချယ်၍ မဲပေးခဲ့ကြပြီးဖြစ်သည်။

ကိုယ်စားလှယ်များအနေဖြင့် မိမိတို့အားယုံကြည်စွာ တာဝန်အပ်နှင်းမှုအပေါ် အလေးအနက်ခံယူပြီး ပြည်သူများပေးအပ်ထားသည့် တာဝန်ကိုကျေပွန်စေရန် ဖွဲ့စည်းပုံအခြေခံဥပဒေ၊ သက်ဆိုင်ရာဥပဒေများ၊ နည်းဥပဒေများနှင့်အညီ အကောင်းဆုံးကြိုးပမ်း ဆောင်ရွက်သွားကြရန်ဖြစ်သည်။ နိုင်ငံတော်ဖွဲ့စည်းပုံ အခြေခံဥပဒေအရ နိုင်ငံတော်၏အချုပ်အခြာ မဏ္ဍိုင်ကြီး(၃)ရပ်အနက် ဥပဒေပြုရေးမဏ္ဍိုင်သည် လွှတ်တော်၏ အဓိကတာဝန်ဖြစ်သည်။

မြန်မာနိုင်ငံကဲ့သို့သော ဖွံ့ဖြိုးဆဲနိုင်ငံတစ်နိုင်ငံအနေဖြင့် နိုင်ငံဖွံ့ဖြိုးတိုးတက်ရေး ကြိုးပမ်းဆောင်ရွက်ရာတွင် နိုင်ငံရေးအတွေ့အကြုံ ရင့်ကျက်မှုနှင့် နိုင်ငံရေးပျိုးထောင်မှု (political culture) အခြေအနေတို့ မြင့်မားရန်လိုအပ်သလို  ဖွံ့ဖြိုးတိုးတက်မှုကို ဆောင်ကြဉ်းပေးနိုင်သော နိုင်ငံရေးအယူအဆများနှင့် နိုင်ငံရေးဖွဲ့စည်းမှုများလည်းရှိနေရမည်ဖြစ်သည်။ နိုင်ငံရေးပျိုးထောင်မှုဆိုသည်မှာ လူ့အဖွဲ့အစည်းအတွင်းရှိ လူတို့၏နိုင်ငံရေးဆိုင်ရာ သဘောထားနှင့်  လက်တွေ့လုပ်ရပ်အစုအပေါင်းကို လွှမ်းခြုံခေါ်ဆိုခြင်းဖြစ်သည်။

လွှတ်တော်ကိုယ်စားလှယ်များ အနေဖြင့် တစ်ဦးနှင့်တစ်ဦး  ရင်းရင်းနှီးနှီး၊ ချစ်ချစ်ခင်ခင်၊ ပွင့်ပွင့်လင်းလင်းဖြင့် ဒီမိုကရေစီကျင့်စဉ်အတိုင်း တက်ညီ လက်ညီ  နိုင်ငံတော်နှင့်နိုင်ငံသားများအကျိုးကို ဝိုင်းဝန်းဖော်ဆောင်ကြရမည်ဖြစ်သည်။   ပြည်သူ့ကိုယ်စားလှယ်များ ဖြစ်ကြသည်နှင့်အညီ   ပြည်သူများနှင့်ထိတွေ့ဆွေးနွေးပြီး ပြည်သူ့အသံ၊  ပြည်သူ့ဆန္ဒကို  ပြည်သူ့ကိုယ်စား ဖော်ဆောင်ပေးရန်အတွက်  ကြိုးပမ်းဆောင်ရွက်ကြရမည်ဖြစ်သကဲ့သို့  နိုင်ငံတော်နှင့်ပြည်သူ့ကောင်းကျိုးအတွက်   လွှတ်တော်၏ဆောင်ရွက်ချက်များကိုလည်း  ပြည်သူများနားလည် သဘောပေါက်စေရန်  ပြန်လည်မျှဝေပေးကြရမည်ဖြစ်သည်။

အနှစ်ချုပ်ဆိုရသော်  နိုင်ငံ့အရေးအတွက် လွှတ်တော်ကိုယ်စားလှယ်များ၏ အခန်းကဏ္ဍကို ကြိုဆိုပါကြောင်း ရေးသားလိုက်ရပေသည်။        ။

MWD

အယ်ဒီတာ့အာဘော်

(၂ဝ၂၆  ခုနှစ်၊ မတ် ၁၇  ရက်)

       မြန်မာနိုင်ငံတွင် တတိယအကြိမ်ပြည်သူ့လွှတ်တော် အစည်းအဝေးများကို မတ်လ ၁၆ ရက်တွင်စတင်ကျင်းပလျက်ရှိပြီး မတ်လ ၁၈ ရက်တွင်အမျိုးသားလွှတ်တော်၊ မတ်လ ၂၀ ရက်တွင် တိုင်းဒေသကြီးနှင့်ပြည်နယ် လွှတ်တော်များကို ဆက်လက်ကျင်းပကြမည်ဖြစ်သည်။ ပြည်သူလူထု၏ ဆန္ဒအစစ်အမှန်ဖြင့် ရွေးချယ်တင်မြှောက်လိုက်သော ပြည်သူ့ကိုယ်စားလှယ်များ အဓိကလုပ်ဆောင်ကြရမည်မှာ ပြည်သူ့ဆန္ဒကို အလေးထားခြင်းဖြစ်သည်။ ပြည်သူ့ဆန္ဒအစစ်အမှန်သည် နိုင်ငံတစ်ဝန်းလုံး တည်ငြိမ်အေးချမ်းပြီး တရားဥပဒေစိုးမိုးမှုရှိကာ နိုင်ငံဖွံ့ဖြိုးတိုးတက်ရေး လုပ်ငန်းများကို လုပ်ဆောင်ပေးစေလိုခြင်းဖြစ်သည်။

မြန်မာနိုင်ငံအတွင်းမှီတင်းနေထိုင်လျက်ရှိသော တိုင်းရင်းသားပြည်သူ အပေါင်းတို့၏ တူညီသောဆန္ဒမှာ နိုင်ငံဖွံ့ဖြိုးတိုးတက်ရေးကို တားဆီးပိတ်ဆို့လျက်ရှိသည့် အကြမ်းဖက်လက်နက်ကိုင် သောင်းကျန်းသူများ ချုပ်ငြိမ်းရေးဖြစ်သည်။ ၎င်းတို့သည် ပြည်သူများအတွက် ဆူးငြောင့်ခလုတ်တံသင်းများဖြစ်သည်။  မြန်မာနိုင်ငံသည် ကိုလိုနီလက်အောက် ကျရောက်ခဲ့ရပြီး ဒုတိယကမ္ဘာစစ်ကာလတွင် နှစ်ကြိမ်တိုင် စစ်မြေပြင်ဖြစ်ခဲ့ရသည်။ နယ်ချဲ့တို့အုပ်ချုပ်ခဲ့သည့် ကာလအတွင်း သွေးခွဲမှုနည်းပရိယာယ်နှင့် ပြဿနာများစွာတို့ဖန်တီးခဲ့ခြင်းတို့ကြောင့် နိုင်ငံအတွင်းလက်နက်ကိုင် ပဋိပက္ခများဖြစ်ပေါ်ခဲ့သည်။ 

လွတ်လပ်ရေးရပြီးနောက် ၁၀ နှစ်တာကာလသည် ဒုတိယကမ္ဘာစစ်ကြောင့် ပျက်စီးခဲ့ရသည့် နိုင်ငံကိုပြန်လည်ထူထောင်ရမည့် ကာလဖြစ်သော်လည်း နိုင်ငံရေးအကွဲအပြဲများနှင့် လက်နက်ကိုင်အဖွဲ့အစည်းပေါင်းစုံတို့၏ ဆူပူသောင်းကျန်းမှုများကြောင့် နိုင်ငံအတွင်းတည်ငြိမ်မှု ကင်းမဲ့ပြီး စီးပွားရေး၊ လူမှုရေးနိမ့်ကျသွားစေခဲ့ပြန်သည်။ နိုင်ငံတော်အစိုးရအဆက်ဆက်က ပြည်တွင်းငြိမ်းချမ်းရေးကိုရရှိရန် ကြိုးစားခဲ့ကြသည်။ သို့သော် လုံးဝအဆုံးသတ် အောင်မြင်သည်အထိ မဆောင်ရွက်နိုင်သေးဘဲ ပြည်တွင်းပြည်ပသွေးထိုး နှောင့်ယှက်မှုများကြောင့် နှောင့်နှေးကြန့်ကြာမှုများ ရှိနေသည်။ 

ပြည်ထောင်စုသမ္မတမြန်မာနိုင်ငံတော် ယာယီသမ္မတ နိုင်ငံတော်လုံခြုံရေးနှင့် အေးချမ်းသာယာရေး ကော်မရှင်ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်သည် မတ်လ ၁၃ ရက်ကကျင်းပခဲ့သည့် မြန်မာ့မျက်နှာစာသစ်ဖိုရမ်၌ “တကယ်တော့စစ်ပွဲတိုင်း ဒါမှမဟုတ် လက်နက်ကိုင်ပဋိပက္ခတိုင်းဟာ နိုင်ငံရေးနဲ့ကင်းလွတ်တာမဟုတ်တဲ့အတွက် နိုင်ငံရေးနည်းနဲ့ညှိနှိုင်းအဖြေရှာကြရမှာဖြစ်ပါတယ်။ ဒီနေ့ကျွန်တော်တို့နိုင်ငံမှာ နိုင်ငံရေးအရ လွတ်လပ်မှုတွေရှိနေပါပြီ။ ယခင်ကမပြောနိုင်တဲ့ကိစ္စတွေ၊ မပြောရဲတဲ့ကိစ္စတွေကို ပြောရဲဆိုရဲပြောနိုင်ဆိုနိုင်ရှိလာကြပြီဖြစ်ပါတယ်။ ယခင်ကမမျှော်လင့်ရဲတာတွေ မျှော်လင့်နိုင်သလို ယခင်ကမမက်ရဲခဲ့တဲ့ အိပ်မက်တွေကိုတောင်မက်ခွင့်ရနေပါပြီ”ဟူ၍ အမှာစကားတွင် ထည့်သွင်းပြောကြားခဲ့သည်။

အမှန်အားဖြင့် ပြည်တွင်းငြိမ်းချမ်းရေးရရှိဖို့ဆိုသည်မှာ အပစ်အခတ်ရပ်စဲရေး တစ်ခုကိုသာမက လက်နက်ကိုင်ပဋိပက္ခများ၏ ဇာစ်မြစ်ကိုပါ ဖြေရှင်းနိုင်အောင်ကြိုးစားရမည်ဖြစ်သည့်အတွက် နိုင်ငံရေးနည်းလမ်းနှင့်သာဖြေရှင်းပေးရမည်ဖြစ်သည်။   တိုင်းရင်းသားအချင်းချင်း တစ်ဦးနှင့်တစ်ဦး အပြန်အလှန်လေးစားမှု၊ နားလည်မှု၊ စာနာမှုများမွေးမြူပြီး အနာဂတ်နိုင်ငံတော်နှင့် အနာဂတ်မျိုးဆက်သစ်များအတွက် အမျိုးသားစည်းလုံးညီညွတ်ရေး လမ်းကြောင်းပေါ် အတူတကွလျှောက်လှမ်းကြရန်  နိုင်ငံတော်အစိုးရအနေဖြင့် အစဉ်အမြဲဖိတ်ခေါ်ကမ်းလှမ်းခဲ့သလို ယခုလည်းဆက်လက်ပြီး ဖိတ်ခေါ်လျက်ရှိသည်။ 

တစ်နိုင်ငံလုံးပစ်ခတ်တိုက်ခိုက်မှု ရပ်စဲရေးသဘောတူစာချုပ်(NCA)သည် မြန်မာနိုင်ငံအစိုးရနှင့် တိုင်းရင်းသားလက်နက်ကိုင်အဖွဲ့အစည်းများသဘောတူ ချုပ်ဆိုထားသည့်စာချုပ်ဖြစ်သည်။ အဆိုပါစာချုပ်ဖြစ်ပေါ်လာစေဖို့ အဘက်ဘက်ကကြိုးပမ်း ဆောင်ရွက်ခဲ့ရသလို ရက်ပေါင်း ၁၄၅၀ အတွင်း တွေ့ဆုံဆွေးနွေးမှုအကြိမ်ပေါင်း  ၅၀၀၀ ကျော် လုပ်ဆောင်ခဲ့ရသည်။ မြန်မာနိုင်ငံသည် တိုင်းရင်းသားလူမျိုးစုပေါင်း ၁၃၀ ကျော်အတူတကွနေထိုင်ကြသည့် ပြည်ထောင်စုနိုင်ငံကြီးဖြစ်ပြီး နိုင်ငံရေးစနစ်အနေဖြင့် ဒီမိုကရေစီနှင့် ဖက်ဒရယ်စနစ်ကို အခြေခံသည့်ပြည်ထောင်စုနိုင်ငံ တည်ဆောက်လျက်ရှိသည်။ 

လက်ရှိအချိန်တွင် မြို့နယ်ပေါင်း ၂၆၃ မြို့နယ်မှ မဲပေးခွင့်ရှိသူမဲဆန္ဒရှင်စုစုပေါင်း၏ ၅၄ ဒသမ ၂၂ ရာခိုင်နှုန်းသော မဲဆန္ဒရှင်ပြည်သူများက ရွေးကောက်တင်မြှောက်လိုက်သော ကိုယ်စားလှယ်များနှင့် ဖွဲ့စည်းထားသည့်လွှတ်တော်များ စတင်သက်ဝင်လှုပ်ရှားလာပြီဖြစ်ပြီး မကြာမီအစိုးရအဖွဲ့သစ် ပေါ်ပေါက်လာတော့မည်ဖြစ်သည်။ ဒီမိုကရေစီစနစ်ကို ကျင့်သုံးသည့်နိုင်ငံအနေဖြင့် နိုင်ငံရေးဖြစ်စေ၊ နိုင်ငံ့အရေးဖြစ်စေ ဆွေးနွေးအဖြေရှာရန်နေရာအဖြစ် လွှတ်တော်အသီးသီးတို့ရှိနေပြီဖြစ်ရာ လက်နက်ကိုင်သည့်နည်းလမ်းကို စွန့်လွှတ်ရန်အချိန်တန်ပြီဖြစ်သည်။ အနှစ်ချုပ်ဆိုရသော် နိုင်ငံတော်နှင့်နိုင်ငံသား အားလုံး တည်ငြိမ်အေးချမ်း ဖွံ့ဖြိုးတိုးတက်ရေးအတွက် လွှတ်တော်အဆင့်ဆင့်က ဆောင်ရွက်မည်ဟုယုံကြည်ပါကြောင်းနှင့် ပြည်သူလူထုတစ်ရပ်လုံး ကလည်း ပူးပေါင်းပါဝင် ဆောင်ရွက်ကြရန်ဖြစ်ပါကြောင်း ရေးသားလိုက်ရပေသည်။   ။

MWD

ပြည်ထောင်စုသမ္မတမြန်မာနိုင်ငံတော် ဖွဲ့စည်းပုံအခြေခံဥပဒေပုဒ်မ ၄၂၄၊ ပုဒ်မ ၁၂၃၊ ပုဒ်မ ၁၂၄၊ ပုဒ်မခွဲ (ခ)၊ ၂၀၁၂ ခုနှစ် ပြည်သူ့လွှတ်တော်ဆိုင်ရာဥပဒေနှင့် ၂၀၁၃ ခုနှစ် ပြည်သူ့လွှတ်တော်ဆိုင်ရာနည်းဥပဒေများနှင့်အညီ ၂၀၂၆ ခုနှစ် မတ်လ ၁၆ ရက် (ယနေ့) တွင် တတိယအကြိမ် ပြည်သူ့လွှတ်တော်ပထမပုံမှန်အစည်းအဝေးကို နေပြည်တော်တွင် စတင်ကျင်းပနေပြီဖြစ်သည်။ ဆက်လက်၍ မတ်လ ၁၈ ရက်နေ့တွင် အမျိုးသားလွှတ်တော်ကိုလည်းကောင်း၊ မတ်လ ၂၀ ရက်နေ့တွင် သက်ဆိုင်ရာ တိုင်းဒေသကြီး သို့မဟုတ် ပြည်နယ်လွှတ်တော်များကိုလည်းကောင်း အသီးသီးကျင်းပတော့မည်ဖြစ်သည်။

ပြည်ထောင်စုသမ္မတမြန်မာနိုင်ငံတော် ယာယီသမ္မတ နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်သည် မတ်လ ၁၃ ရက်က ကျင်းပပြုလုပ်သည့် မြန်မာ့မျက်နှာစာသစ်ဖိုရမ် (ယုံကြည်မှု၊ တည်ငြိမ်အေးချမ်းမှုနှင့် ဖွံ့ဖြိုးတိုးတက်မှု) တွင် “ယခင်က မမျှော်လင့်ရဲတာတွေ၊ မျှော်လင့်နိုင်သလို ယခင်က မမက်ရဲခဲ့တဲ့ အိပ်မက်တွေကိုတောင် မက်ခွင့်ရနေပါပြီ။ တစ်နည်းအားဖြင့် ပြောရရင် ကမ္ဘာ့နိုင်ငံအားလုံးနီးပါး မျက်နှာမူရာဖြစ်နေတဲ့ ဒီမိုကရေစီစနစ်ကို စနစ်တကျပြောင်းလဲနိုင်ခဲ့ပြီး နိုင်ငံရေးအသစ်၊ ယဉ်ကျေးမှုအသစ်တွေကို ပြောင်းလဲပေးနိုင်ခဲ့ပြီဖြစ်ပါတယ်။ ဘယ်လိုပဲဖြစ်ဖြစ် တပ်မတော်ဟာ နိုင်ငံသားအားလုံးလိုလားတဲ့ ဒီမိုကရေစီစနစ်ကို စတင်အသက်သွင်းနိုင်ခဲ့သလို ယခုတစ်ဖန်အရေးကြီးတဲ့ နိုင်ငံရေးအလှည့်အပြောင်းကြီးတစ်ခုကိုလည်း အောင်အောင်မြင်မြင် ဆောင်ရွက်နိုင်ခဲ့ပြီ”ဟု အလေးအနက် ပြောကြားခဲ့သည်။

ယနေ့ တတိယအကြိမ် ပြည်သူ့လွှတ်တော်ပထမပုံမှန်အစည်းအဝေးသို့ တက်ရောက်လာကြသော ပြည်သူ့လွှတ်တော်ကိုယ်စားလှယ်အားလုံးကို ဂုဏ်ယူဝမ်းမြောက်စွာကြိုဆိုရမည်ဖြစ်သည်။ မြန်မာနိုင်ငံအနေဖြင့် ပါတီစုံဒီမိုကရေစီအထွေထွေရွေးကောက်ပွဲကို လွတ်လပ်၍ တရားမျှတစွာဖြင့် စစ်မှန်သည့် ရွေးကောက်ပွဲ၊ သန့်ရှင်းသော ရွေးကောက်ပွဲတစ်ရပ်အဖြစ် ကျင်းပပေးနိုင်ခဲ့သည်။ ရွေးကောက်ပွဲတွင် မဲပေးမှုရာခိုင်နှုန်းအနေဖြင့် ၅၄ ဒသမ ၂၂ ရာခိုင်နှုန်းကျော်ရှိခဲ့ပြီး ပြည်သူများအနေဖြင့် တက်တက်ကြွကြွ မဲပေးကြရာ စစ်မှန်သည့်မဲရလဒ်များဖြင့် ပေါ်ထွက်လာသည့် ရွေးကောက်ခံကိုယ်စားလှယ်များဖြစ်သည်။ ထို့ကြောင့် လွှတ်တော်ကိုယ်စားလှယ်များသည် ပြည်သူများကို စစ်မှန်စွာကိုယ်စားပြုသူများဖြစ်၍ ဝမ်းမြောက်ဝမ်းသာ ကြိုဆိုရမည်ဖြစ်သည်။

လွှတ်တော်ကိုယ်စားလှယ်များအနေဖြင့် နိုင်ငံတော်ကို စီးပွားရေးအရ မည်ကဲ့သို့ ဖွံ့ဖြိုးတိုးတက်လာအောင် ဆောင်ရွက်ရမည်ကို စဉ်းစားသုံးသပ်ဆောင်ရွက်ကြရမည်ဖြစ်သည်။ အူမတောင့်မှ သီလစောင့်မည်ဟူသော စကားနှင့်အညီ ပြည်သူလူထုအားလုံး၏ လူမှုစီးပွားဘဝများ အဆင်ပြေချောမွေ့အောင် ဆောင်ရွက်ပေးကြရန် လိုမည်ဖြစ်သည်။ ကမ္ဘာပေါ်တွင် အုပ်ချုပ်မှုစနစ်အမျိုးမျိုးရှိသည့်အနက် မြန်မာနိုင်ငံအနေဖြင့် ပြည်သူများလိုလားသည့် ပြည်ထောင်စုစနစ်ကို ကျင့်သုံးဆောင်ရွက်နေခြင်းဖြစ်သည်။ ဖက်ဒရယ်စနစ်ကိုကျင့်သုံးရာတွင် လူပုဂ္ဂိုလ်၊ လူမျိုးစုအပေါ် အခြေခံခြင်းမဟုတ်ဘဲ နေရာဒေသကိုအခြေခံ၍ ကျင့်သုံးခြင်းဖြစ်သည်။ လွှတ်တော်ကိုယ်စားလှယ်များအနေဖြင့် ၂၀၂၄ ခုနှစ် လူဦးရေနှင့် အိမ်အကြောင်းအရာသန်းခေါင် စာရင်းအပေါ်တွင်အခြေခံ၍ ဆောင်ရွက်သွားကြရမည်ဖြစ်သည်။

မြန်မာနိုင်ငံတွင် ၂၀၂၀ ပြည့်နှစ် ပါတီစုံဒီမိုကရေစီအထွေထွေရွေးကောက်ပွဲတွင် မဲမသမာမှုများဖြစ်ပွားခဲ့ခြင်းကြောင့် စစ်မှန်၍တရားမျှတသည့် ရွေးကောက်ပွဲကို ပြန်လည်ကျင်းပခဲ့ခြင်းဖြစ်သည်။ ရွေးကောက်ပွဲပြန်လည်ကျင်းပချိန်တွင် မဲစာရင်းများ မှန်ကန်မှုရှိစေရေးနှင့် လွတ်လပ်ပြီး တရားမျှတသည့် ရွေးကောက်ပွဲဖြစ်စေရေးအတွက် ကြိုတင်ပြင်ဆင်ခြင်းလုပ်ငန်းများကို ဆောင်ရွက်ခဲ့ခြင်းကြောင့် သိက္ခာရှိသည့် ရွေးကောက်ပွဲ၊ လွတ်လပ်မျှတသည့်ရွေးကောက်ပွဲကို ကျင်းပနိုင်ခဲ့သည်။ ထို့ကြောင့် သန့်ရှင်းသည့် ဆန္ဒမဲများဖြင့် ရွေးကောက်ခံကိုယ်စားလှယ်များ ပေါ်ထွက်လာပြီး ဒီမိုကရေစီယဉ်ကျေးမှုအသစ်ကို စတင်ဖွင့်လှစ်ဆောင်ရွက်နေပြီဖြစ်သည်။ သန့်ရှင်းသော လွှတ်တော်ကိုယ်စားလှယ်များပါဝင်သည့် ဂုဏ်သိက္ခာရှိသောလွှတ်တော်၊ တိုင်းကျိုးပြည်ပြုဆောင်ရွက်နိုင်သော လွှတ်တော်အဖြစ် ဆက်လက်ဆောင်ရွက်ကြရမည်ဖြစ်သည်။

သို့ဖြစ်ရာ မြန်မာနိုင်ငံ၏ နိုင်ငံရေးယဉ်ကျေးမှုအသစ်ဖြင့် မြန်မာနိုင်ငံ၏ မျက်နှာစာသစ်ကို လှပစွာပုံဖော်ထုဆစ်နိုင်ကြမည်ဟု ယုံကြည်သည်။ မကြာမီကာလတွင် လွှတ်တော်အသစ်၊ အစိုးရအဖွဲ့အသစ်များဖြင့် မြန်မာနိုင်ငံ၏ အရုဏ်ဦးနံနက်ခင်းသစ် လင်းလက်တောက်ပလာတော့မည်ဖြစ်သည်။ မြန်မာနိုင်ငံသားများအားလုံး စည်းလုံးမှု၊ ညီညွတ်မှု၊ ဖွံ့ဖြိုးတိုးတက်မှု၊ ကြွယ်ဝချမ်းသာမှု၊ လွတ်လပ်မှု စသည့်ကောင်းကျိုးရလဒ်များကို ခံစားနိုင်မည့် ဒီမိုကရေစီဖက်ဒရယ်ပြည်ထောင်စုရောင်ခြည် လင်းလက်လာပြီဖြစ်ပါကြောင်း။ ။

MOI

ပြည်တွင်းလက်နက်ကိုင် ပဋိပက္ခများက နိုင်ငံဖွံ့ဖြိုးတိုးတက်ရေးကို တားဆီးပိတ်ဆို့လျက်ရှိရာ နှစ်ကာလရှည်ကြာလာသည်နှင့်အမျှ မိမိတို့နိုင်ငံမှာလည်း ဒေသတွင်းနိုင်ငံများနှင့် နှိုင်းယှဉ်လျှင်ပင် နောက်ကျနေခဲ့ပြီဖြစ်သည်။ မြန်မာနိုင်ငံသည် ကိုလိုနီနိုင်ငံဘဝ ကျရောက်ခဲ့ရခြင်း၊ ဒုတိယကမ္ဘာစစ်ကာလတွင် စစ်မြေပြင်ဖြစ်ခဲ့ရခြင်း၊ လွတ်လပ်ရေးကြိုးပမ်းမှုအတွင်း နိုင်ငံရေးအယူအဆများ ကွဲပြားခဲ့ခြင်း၊ နယ်ချဲ့တို့အုပ်ချုပ်ခဲ့သည့် ကာလအတွင်း သွေးခွဲမှုနည်းပရိယာယ်နှင့် ပြဿနာများစွာတို့ ဖန်တီးခဲ့ခြင်း စသည်တို့က ပြည်တွင်းလက်နက်ကိုင်ပဋိပက္ခများ ဖြစ်ပေါ်မှုအတွက် မြစ်ဖျားခံရာ အကြောင်းအရာများပင်ဖြစ်သည်။ လက်နက်ကိုင်ပဋိပက္ခများ၏ အဦးအစသည် အယူဝါဒရေးကြောင့်၊ လူမျိုးစုရေးကြောင့်၊ ဘာသာရေးကြောင့် စသည်ဖြင့် စတင်ခဲ့သော်လည်း နောက်ပိုင်းတွင် ကိုယ်ကျိုးစီးပွားနှင့် ပြည်ပစွက်ဖက်မှုများ စသည်တို့ ပါဝင်ရှုပ်ထွေးလာခဲ့သည်။

လွတ်လပ်ရေးရပြီးနောက် ၁၀နှစ်တာကာလသည် ဒုတိယကမ္ဘာစစ်ကြောင့် ပျက်စီးခဲ့ရသည့် နိုင်ငံကို ပြန်လည်ထူထောင်ရမည့်ကာလဖြစ်သော်လည်း နိုင်ငံရေးအကွဲအပြဲများနှင့် လက်နက်ကိုင်အဖွဲ့အစည်းပေါင်းစုံတို့ ဆူပူသောင်းကျန်းမှုများကြောင့် နိုင်ငံကို ထပ်မံ၍ နိမ့်ကျသွားစေခဲ့ပြန်သည်။ စစ်ရေးဟူသည် နိုင်ငံရေးကို အခြားနည်းဖြင့် ကျင့်သုံးခြင်းဖြစ်ရာ စစ်ရေးတွင်ကျယ်လာခြင်းက နိုင်ငံရေးနည်းလမ်းကို ပျောက်ကွယ်သွားစေခဲ့သည်။ နိုင်ငံရေးယဉ်ကျေးမှုကိုလည်း နိမ့်ကျသွားစေခဲ့သည်။ မြန်မာနိုင်ငံတွင် နိုင်ငံရေးအပြောင်းအလဲ၊ အစိုးရအပြောင်းအလဲပေါ်လာတိုင်း လက်နက်ကိုင်အဖွဲ့ပေါ်လာသည့် အစဉ်အလာလည်း ဖြစ်လာသည်။

“အစိုးရအဆက်ဆက် ပြည်တွင်းငြိမ်းချမ်းရေးကိုရရှိဖို့ ကြိုးစားခဲ့ကြပေမယ့် လုံးဝအဆုံးသတ်အောင်မြင်တဲ့အထိ မဆောင်ရွက်နိုင်သေးဘဲ ပြည်တွင်း ပြည်ပ သွေးထိုးနှောင့်ယှက်မှုတွေကြောင့် နှောင့်နှေးကြန့်ကြာမှုတွေရှိနေသေးတာ ကျွန်တော်တို့အားလုံး အသိပဲဖြစ်ပါတယ်။ တကယ်တမ်းပြောရရင် ပြည်တွင်းငြိမ်းချမ်းရေးရရှိဖို့ဆိုတာ အပစ်အခတ်ရပ်စဲရေးတစ်ခုကိုသာမက လက်နက်ကိုင်ပဋိပက္ခတွေရဲ့ ဇာစ်မြစ်ကိုပါ ဖြေရှင်းနိုင်အောင် ကြိုးစားရမှာဖြစ်တဲ့အတွက် နိုင်ငံရေးနည်းလမ်းနဲ့သာ ဖြေရှင်းပေးကြရမှာဖြစ်ကြောင်း ထပ်မံအသိပေးပြောကြားလိုပါတယ်။ တိုင်းရင်းသားအချင်းချင်း တစ်ဦးနဲ့တစ်ဦး အပြန်အလှန်လေးစားမှု၊ နားလည်မှု၊ စာနာမှုတွေမွေးမြူပြီး အနာဂတ်နိုင်ငံတော်နဲ့ အနာဂတ်မျိုးဆက်သစ်တွေအတွက် “အမျိုးသားစည်းလုံးညီညွတ်ရေး”လမ်းကြောင်းပေါ် အတူတကွ လျှောက်လှမ်းကြဖို့ အစဉ်အမြဲဖိတ်ခေါ်ကမ်းလှမ်းခဲ့သလို ယခုလည်း ဆက်လက်ပြီးတော့လည်း ဖိတ်ခေါ်ကြောင်း ပြောကြားလိုပါတယ်”ဟု မြန်မာ့မျက်နှာစာသစ်ဖိုရမ် (ယုံကြည်မှု၊ တည်ငြိမ်အေးချမ်းမှုနှင့် ဖွံ့ဖြိုးတိုးတက်မှု) ဖွင့်ပွဲအခမ်းအနားတွင် နိုင်ငံတော်ယာယီသမ္မတ နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က အမှာစကားပြောကြားရာတွင် ထည့်သွင်းပြောကြားခဲ့သည်။

မိမိတို့နိုင်ငံသည် တိုင်းရင်းသားလူမျိုးစုများစွာ အတူတကွနေထိုင်ကြသည့် ပြည်ထောင်စုနိုင်ငံကြီးဖြစ်ပြီး နိုင်ငံရေးစနစ်အနေဖြင့် ဒီမိုကရေစီနှင့် ဖက်ဒရယ်စနစ်ကို အခြေခံသည့် ပြည်ထောင်စုနိုင်ငံတည်ဆောက်ရန် ကြိုးပမ်းနေခြင်းဖြစ်သည်။ လက်ရှိအချိန်တွင် ပြည်တွင်းရှိ မဲပေးခွင့်ရှိသူမဲဆန္ဒရှင်စုစုပေါင်း၏ ၅၅ ရာခိုင်နှုန်းခန့်သော မဲဆန္ဒရှင်ပြည်သူများက ရွေးကောက်တင်မြှောက်လိုက်သည့် ကိုယ်စားလှယ်များနှင့် ဖွဲ့စည်းထားသည့် လွှတ်တော်များ စတင်သက်ဝင်လှုပ်ရှားလာပြီဖြစ်ပြီး မကြာမီအစိုးရအဖွဲ့ ပေါ်ပေါက်လာတော့မည်ဖြစ်သည်။ ဒီမိုကရေစီစနစ်ကို ကျင့်သုံးသည့် နိုင်ငံအနေဖြင့် နိုင်ငံရေးဖြစ်စေ၊ နိုင်ငံ့အရေးဖြစ်စေ ဆွေးနွေးအဖြေရှာရန် နေရာအဖြစ် လွှတ်တော်အသီးသီးတို့ ရှိနေပြီးဖြစ်ရာ လက်နက်ကိုင်သည့် နည်းလမ်းကို စွန့်လွှတ်ရန် အချိန်တန်ပြီဖြစ်သည်။ နိုင်ငံတည်တံ့ခိုင်မြဲရေးအတွက် အပရိဟာနိယတရားတို့နှင့်အညီ အကျေအလည်ဆွေးနွေး၊ အညီအညွတ်ဆုံးဖြတ်၊ အားကြိုးမာန်တက် အတူတကွပူးပေါင်းဆောင်ရွက်ခြင်းဖြင့် နိုင်ငံနှင့်ပြည်သူတို့ အကျိုးအတွက် လက်တွေ့ကြိုးပမ်းဆောင်ရွက်ကြရန် လိုအပ်နေပြီဖြစ်သည်။

လက်ရှိအချိန်တွင် အချို့သော လက်နက်ကိုင်အဖွဲ့အစည်းများတွင် အစွန်းရောက်လူမျိုးရေးတရား သွေးထိုးလှုံ့ဆော်မှုများ၊ လူမျိုး တစ်မျိုးနှင့်တစ်မျိုး အမုန်းတရားများ၊ အာဃာတများ ဖြစ်ပေါ်လာအောင် သွေးခွဲဖန်တီးမှုများ စသည်တို့ ပြုလုပ်နေကြခြင်းမှာ တိုင်းပြည်နှင့်လူမျိုးကို ပျက်စီးရာပျက်စီးကြောင်းဖြစ်စေသည့် ကျူးလွန်မှုများပင်ဖြစ်သည်။ မြန်မာနိုင်ငံသူ နိုင်ငံသား၊ တိုင်းရင်းသူ တိုင်းရင်းသား ညီအစ်ကိုမောင်နှမများ အားလုံးအနေဖြင့် မိမိတို့နိုင်ငံ၏ အတိတ်ကာလနှင့် မျက်မှောက်ကာလ ခေတ်သမိုင်းကို သင်ခန်းစာယူ၍ စည်းလုံးညီညွတ်မှုနှင့် တည်ငြိမ်အေးချမ်းမှုကို ပြည်သူ့အားဖြင့် တည်ဆောက်ကာ နိုင်ငံခေတ်မီဖွံ့ဖြိုးတိုးတက်ရေးတွင်လည်း စည်းလုံးညီညွတ်သည့် အင်အားများဖြင့် အင်တိုက်အားတိုက် ပါဝင်ကြရပါမည့်အကြောင်း။

MOI

အမေရိကန်နှင့်အစ္စရေးတပ်ဖွဲ့များ၏ ကျူးကျော်ဝင်ရောက်လာနိုင်မှုအတွက် အသင့်ပြင်ဆင်ထားဟုဆိုလာသည့်အီရန်

အီရန်အနေဖြင့် လက်ရှိတွင် နိုင်ငံ၏နယ်စပ်များကို ထိန်းချုပ်ထားပြီး အမေရိကန်နှင့် အစ္စရေးတပ်ဖွဲ့များ၏ ကျူးကျော် ဝင်ရောက်လာနိုင်မှုအတွက် အသင့်ပြင်ဆင်ထားကြောင်း     အီရန်အစိုးရ သတင်းပြန်ကြားရေးကောင်စီအကြီးအကဲ အီလီယက်ဟက်ရာတီက မတ်လ ၈ ရက်တွင် ပြောကြားလိုက်သည်။

အီရန်အစိုးရသည် နိုင်ငံ၏နယ်စပ်များကို  ထိန်းချုပ်ထားပြီး ဖြစ်သောကြောင့် အမေရိကန်နှင့် အစ္စရေးမြေပြင်တပ်ဖွဲ့များ၏ ဝင်ရောက်ကျူးကျော်မှုကိုရင်ဆိုင်ရန် အသင့်ရှိနေသည်ဟု    ဟက်ရာတီ၏ ပြောကြားချက်ကို ကိုးကား၍ ရုရှားသတင်းဌာနတစ်ခုက ဖော်ပြထားသည်။

ထို့ပြင် အီရန်နိုင်ငံအနေဖြင့် ဆက်လက်ဖြစ်ပေါ်လာနိုင်သည့်စစ်ပွဲအတွက် ပြင်ဆင်လျက်ရှိပြီး ကာ့ဒ်လက်နက်ကိုင်အဖွဲ့များက စစ်ပွဲအတွင်းပါဝင်လာနိုင်သည့် အလားအလာကိုလည်း ကြိုတင်တွက်ဆလျက်ရှိသည်ကို တွေ့ရသည်။  အကြောင်းမှာ အဆိုပါ  ကာ့ဒ်တပ်ဖွဲ့များသည် စစ်သွေးကြွတိုက်ဖျက်ရေး စစ်ဆင်မှုများအတွင်း အမေရိကန်နှင့် အနီးကပ်ပူးပေါင်းဆောင်ရွက်ခဲ့သည့် လက်နက်ကိုင်တပ်ဖွဲ့များဖြစ်သောကြောင့်ဖြစ်သည်။

ပြီးခဲ့သည့်  ရက်ပိုင်းအတွင်းကလည်း အမေရိကန်တို့နှင့် ဆက်ဆံရေးကောင်းမွန်နေသည့်  အဆိုပါကာ့ဒ်တပ်များသည် အီရန်နိုင်ငံ အတွင်းသို့   ဝင်ရောက်လာပြီဖြစ်သည်ဟူသော  သတင်းများလည်း ထွက်ပေါ်လာချိန်မှစ၍  အီရန်နိုင်ငံက သတိထားလာခြင်းလည်း ဖြစ်သည်ဟု ဆိုနိုင်သည်။

ထိုသို့သော အခြေအနေများအတွင်းမှာပင် အီရန်နိုင်ငံအနေဖြင့် ဆက်လက်ထွက်ပေါ်လာနိုင်သည့် ပြင်းထန်သောစစ်ပွဲများအား အနည်းဆုံးခြောက်လကြာ ဆင်နွှဲနိုင်စွမ်းရှိကြောင်း အီရန်တော်လှန်ရေးအစောင့်တပ်ဖွဲ့၏ ပြောရေးဆိုခွင့်ရှိသူ အလီမိုဟာမက်နာအီနီက ပြောကြားထားသည်။

ထို့အတူ လက်ရှိတွင်  အီရန်နိုင်ငံ၏ လက်နက်သိုလှောင်ရုံများအတွင်း၌ ပဲ့ထိန်းဒုံးကျည်များ၊ ခရုစ်ဒုံးကျည်များနှင့် တာဝေးပစ်ဒုံးကျည်များအပါအဝင်    ဒုံးကျည်အမြောက်အမြားရှိနေသေးကြောင်း နာအီနီက ဆက်လက်ပြောကြားထားသည်။ 

လက်ရှိတွင် အမေရိကန်နှင့်အစ္စရေးနိုင်ငံတို့က အီရန်နိုင်ငံအပေါ် လေကြောင်းမှ အပြင်းအထန်တိုက်ခိုက်လျက်ရှိသော်လည်း     အီရန်တပ်မတော်အနေဖြင့် လက်နက်အဖြစ်ထုတ်လုပ်နိုင်သည့် ယူရေနီယံသတ္တုများကို သန့်စင်နိုင်ခြင်းမပြုမီ အီရန်နိုင်ငံအတွင်းသို့ မြေပြင်တပ်ဖွဲ့များ စေလွှတ်ရန် စီစဉ်နေသည်။ 

အမေရိကန်သတင်းဌာနကြီးတစ်ခု၏ ထုတ်ပြန်ချက်အရ အီရန်နိုင်ငံသည် ၆၀ ရာခိုင်နှုန်း   သန့်စင်ပြီးယူရေနီယံများကို ပိုင်ဆိုင်ထားပြီး ၎င်းတို့အားအသုံးပြုခြင်းအားဖြင့် သီတင်းပတ်အနည်းငယ်အတွင်းမှာပင် နျူကလီးယားဗုံး ၁၁ လုံးထုတ်လုပ်နိုင်သည်ဟုဆိုထားသည်။ 

ထို့ကြောင့်  လက်ရှိအခြေအနေကို ကြည့်မည်ဆိုပါက အမေရိကန်နှင့်အစ္စရေးတို့သည် အီရန်နိုင်ငံအပေါ် လေကြောင်းမှ အပြင်းအထန် တိုက်ခိုက်နေသော်လည်း စိုးရိမ်မကင်းမှုများ ဆက်လက်ဖြစ်ပေါ်လျက်ရှိနေသည်ကို ရှင်းလင်းစွာတွေ့ရမည်ဖြစ်သည်။ တစ်ချိန်တည်းမှာပင် အီရန်၏ အစွမ်းထက်ဒုံးကျည်များက အရှေ့အလယ်ပိုင်းဒေသရှိ အမေရိကန်၏မဟာမိတ်နိုင်ငံ များအတွင်းရှိ အမေရိကန် စစ်အခြေစိုက်စခန်းများကို အဓိကပစ်မှတ်ထားနေခြင်းကြောင့် အီရန်အနေဖြင့် တစ်စိတ်တစ်ပိုင်းသန့်စင်ပြီး ယူရေနီယံများကို   အသုံးမပြုနိုင်ရေးအတွက် အမေရိကန်နှင့် အစ္စရေးတို့က   မြေပြင်တပ်ဖွဲ့များကို အီရန်သို့ စေလွှတ်ရန် ဆန္ဒပြင်းပြနေခြင်းဖြစ်သည်။

သို့သော် အမေရိကန်နှင့် အစ္စရေးတို့အနေဖြင့် ထိုသို့လုပ်ဆောင်မည်ဆိုပါက သတိကြီးစွာထားရှိရန် စစ်ရေးကျွမ်းကျင်သူများက    သတိပေးထားသည့်အပြင် အမေရိကန်စီအိုင်အေမှ အရာရှိဟောင်းတစ်ဦးကလည်း အီရန်အပေါ်တိုက်ခိုက်ခဲ့ခြင်းနှင့်စပ်လျဉ်း၍ အမေရိကန်နှင့်အပေါင်းအပါတို့အား သတိထားပြီးလုပ်ဆောင်ရန် အစောပိုင်းကတည်းက အကြံပြုထားသည်။ 

ထို့ကြောင့်   အီရန်နိုင်ငံအတွင်းသို့ မြေပြင်တပ်ဖွဲ့များ  စေလွှတ်မည်ဆိုပါက မည်သို့မည်ပုံ ဆက်လက်ဖြစ်ပွားမည်ကို အမေရိကန်၏  ဥရောပ မဟာမိတ်နိုင်ငံများအပြင် အရှေ့အလယ်ပိုင်းရှိ မဟာမိတ်အာရပ်နိုင်ငံများက စိတ်ဝင်တစားစောင့်ကြည့်နေမည်ဖြစ်ကြောင်း သုံးသပ်တင်ပြ လိုက်ရပါသည်။

Ref: Iv, Jp

MWD