ဆောင်းတစ်ဝက် နွေတစ်ဝက် တပေါင်းလလွန်သော် နွေရာသီသို့ မကြာမီရောက်တော့မည်ဖြစ်သည်။ နွေကြိုကာလ၊ နွေကာလနှင့် မိုးကြိုကာလတို့မှာ သတိထားကြရမည့် သဘာဝဘေးတစ်ခုမှာ လေပြင်းဘေးအန္တရာယ်ဖြစ်သည်။ နွေကြိုကာလနှင့် နွေကာလတို့တွင် နေ့အပူချိန်များ တဖြည်းဖြည်းမြင့်တက်လာရာမှ အပူပျံတက်တိမ်များ ဖြစ်ထွန်းပြီး မွန်းလွဲပိုင်းနှင့် ညနေပိုင်းတို့တွင် မိုးတိမ်တောင်များ ဖြစ်ပေါ်နိုင်သည်။ အဆိုပါ မိုးတိမ်တောင်များ ရွေ့လျားရာနေရာ တစ်လျှောက်တွင် စိုက်ဆင်းလေပြင်းများတိုက်ခတ်ခြင်း၊ လေပြင်းနှင့်အတူ မိုးထစ်ချုန်းခြင်း၊ မိုးကြိုးပစ်ခြင်း၊ လျှပ်စီးလက်ခြင်း၊ မိုးသီးကြွေခြင်းနှင့် နေရာကွက်ကျား မိုးထစ်ချုန်းရွာခြင်းစသည့် မိုးလေဝသဖြစ်စဉ်များ ဖြစ်ပေါ်နိုင်သည်ကို သတိပြုကြရန် လိုသည်။

ပြီးခဲ့သည့်ရက်ပိုင်းအတွင်း နေပြည်တော်ကောင်စီနယ်မြေ လယ်ဝေးမြို့နယ်နှင့် ဒက္ခိဏသီရိမြို့နယ်တို့အတွင်းရှိ ကျေးရွာများတွင် လေပြင်းတိုက်ခတ်မှုကြောင့် နေအိမ်များ ပြိုကျခြင်း၊ အမိုးလန်ခြင်းတို့ ဖြစ်ပွားခဲ့ကြောင်း သတင်းများအရ သိရှိရသည်။ နွေကြို၊ နွေနှင့် မိုးကြိုကာလ လေပြင်းတိုက်ခတ်မှုများကြောင့် နိုင်ငံတစ်ဝန်းတွင် လူနေအိမ်များ အမိုးလန်၊ ယိုင်လဲ၊ ပြိုကျခြင်းတို့ နှစ်စဉ်ဖြစ်ပေါ်လေ့ရှိရာ လေပြင်းဘေး ကြိုတင်ကာကွယ်ရေး အလေးဂရုပြု ကြရန်လိုသည်။ လေပြင်းတိုက်ခတ်မှုများကြောင့် ၂၀၂၂-၂၀၂၃ ဘဏ္ဍာရေးနှစ်တွင် နေအိမ် ၁၄ဝဝဝ ကျော်၊ ၂၀၂၃-၂၀၂၄ ဘဏ္ဍာရေးနှစ်တွင် နေအိမ် ၂၀၀၀၀ ကျော်၊ ၂၀၂၄-၂၀၂၅ ဘဏ္ဍာရေးနှစ် ( ၂၀၁၄ ခုနှစ် ဧပြီလမှ နိုဝင်ဘာလအထိ) နေအိမ် ၇၉၀၀ ကျော် ထိခိုက်ပျက်စီးခဲ့ပြီး လူ သေဆုံး၊ ထိခိုက်၊ ဒဏ်ရာရမှုများလည်း ရှိခဲ့သည်။ လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာနသည် လေပြင်းတိုက်ခတ်မှုများကြောင့် ရပ်ရွာလူထု၏နေအိမ်များ ထိခိုက်ပျက်စီးမှု လျော့နည်းသက်သာစေရန် လေပြင်းဒဏ် ပိုမိုခံနိုင်ရည်ရှိ သော အိုးအိမ်များဖြစ်စေရေး အားဖြည့်၊ မွမ်းမံ၊ ပြင်ဆင်ခြင်းတို့ကို ဒေသအလိုက် အုပ်ချုပ်ရေးအဖွဲ့အစည်းများ၊ ဒေသခံပြည်သူများ ပူးပေါင်းပါဝင်မှုတို့ဖြင့် ဆောင်ရွက်လျက်ရှိရာ ၂၀၂၆ ခုနှစ် နွေကြိုကာလ တစ်နိုင်ငံလုံးအတိုင်းအတာဖြင့် တိုင်းဒေသကြီး၊ ပြည်နယ် ကိုးခုတို့တွင် နေအိမ်များ အားဖြည့်မွမ်းမံပြင်ဆင်ခြင်း လုပ်ငန်းစီမံချက်ကို ပြီးခဲ့သည့် ဖေဖော်ဝါရီ ၂၃ ရက်တွင် စတင်ဆောင်ရွက်နေပြီဖြစ်သည်။

ပြည်သူများ မိမိတို့၏ နေအိမ်များ လေပြင်းဒဏ်ခံနိုင်စေရန်အတွက် အိမ်၏ကြံ့ခိုင်မှုကို ပုံမှန်စစ်ဆေးပြီး တောင့်တင်းခိုင်မာအောင် ပြုလုပ်ထားရန်၊ အိမ်နံရံများတွင် လေဒဏ်ခံနိုင်ရန် ချုပ်တန်းများနှင့် လိုအပ်သည့်နေရာများတွင် ထောက်တန်းများ/ ထောက်တိုင်များ ထပ်မံအားဖြည့်တပ်ဆင်ရန်၊ သွပ်အမိုးဖြစ်ပါက အစွန်ကျသောနေရာ များတွင် သွပ်သံစိပ်စိပ်ရိုက်ရန်၊ ဓနိ / သက်ကယ်အမိုးဖြစ်ပါက ဝါးကြက်နင်း ခိုင်ခံ့စွာအုပ်ပြီး သွပ်နန်းကြိုး ခိုင်မြဲစွာ ချည်နှောင်ရန်၊ အိမ်အနီးရှိ ကျိုးကျနိုင်သည့် သစ်ပင်/သစ်ကိုင်းများကို ခုတ်ထွင်ရှင်းလင်းထားရန် အသိပေးနှိုးဆော်ထားသည်။

လေပြင်းတိုက်ခတ်နေစဉ်အတွင်း အန္တရာယ်ရှိခြင်းကြောင့် မလိုအပ်ဘဲ အပြင်သို့မထွက်ရန်၊တံခါးများနှင့်ပြတင်းပေါက်များကို မြဲမြံစွာ ပိတ်ထားရန်၊ မှန်ပြတင်းများကို တိပ်ပြားကြီးများဖြင့် ကန့်လန့်ဖြတ် ကပ်ထားရန်၊ မှန်ပြတင်းပေါက်များနှင့် ဝေးရာတွင် နေထိုင်ရန်၊ လေတိုက်ခတ်မှု အလွန်ပြင်းထန်ပါက ခိုင်ခံ့သောစားပွဲ သို့မဟုတ် ခိုင်ခံ့သောအရာဝတ္ထု တစ်ခုခုအောက်တွင် အကာအကွယ်ယူနေရန်၊ လျှပ်စစ်နှင့်ဆိုင်သော ပစ္စည်းများကို ခလုတ်ပိတ်၍ ပလပ်ဖြုတ်ထားရန်ဟူသောအချက်များမှာ လေပြင်းတိုက်ခတ်နေစဉ် လိုက်နာကြရမည့် အချက်များဖြစ်သည်။

လေပြင်းတိုက်ခတ်ပြီးနောက် ကူညီကယ်ဆယ်ရေးနှင့် အပျက်အစီးရှင်းလင်းရေးတို့တွင် ပူးပေါင်းပါဝင်ကြရန်လိုသည်။ ကျိုးကျ၊ ယိုင်လဲနေသည့် ဓာတ်တိုင်၊ ဓာတ်ကြိုးများ၊ သစ်ပင်သစ်ကိုင်းများ၊ အဆောက်အအုံများနှင့်ဝေးရာတွင် နေကြရမည်လည်းဖြစ်သည်။ ထိခိုက်ဒဏ်ရာရသူများ နီးစပ်ရာကျန်းမာရေးဌာနများတွင် ကုသမှုခံယူရန်၊ ကာကွယ်စောင့်ရှောက်မှုပေးရန်လိုအပ်သည့် ကလေးသူငယ်များ၊ ကိုယ်ဝန်ဆောင်နှင့် သားသည်မိခင်များ၊ မသန်စွမ်းသူများ၊ သက်ကြီးရွယ်အိုများစသည့် အကူအညီလိုအပ်သူများကို တတ်စွမ်းသရွေ့ ပေါင်းစပ်ကူညီပေးရန်တို့ကိုလည်း ဆောင်ရွက်ကြရန်သတိပြု ကြဖို့လိုသည်။

ဆိုခဲ့ပါအတိုင်း နေအိမ်များ အားဖြည့်မွမ်းမံပြင်ဆင်ခြင်း၊ လေပြင်းဘေးအန္တရာယ်နှင့်စပ်လျဉ်း၍ လိုက်နာဆောင်ရွက်ကြရမည့် အချက်များကို အလေးထားဆောင်ရွက်ကြခြင်းအားဖြင့် ရာသီကာလအလိုက် ကျရောက်လာဖွယ်ရှိသည့် လေပြင်းဘေးအန္တရာယ်ကြောင့် ထိခိုက်ပျက်စီးဆုံးရှုံးမှုများမှ လျော့ပါးသက်သာကြမည်ဖြစ်သည့်အကြောင်း။ ။

moi

ကုလသမဂ္ဂအတွင်းရေးမှူးချုပ်၏ ပဋိပက္ခအတွင်း လိင်အကြမ်းဖက်မှုဆိုင်ရာ အထူးကိုယ်စားလှယ်ရုံးက ဖေဖော်ဝါရီ ၂ ရက်တွင် ထုတ်ပြန်ခဲ့သည့် ထုတ်ပြန်ချက်သည် နိုင်ငံတော်၏ ဂုဏ်သိက္ခာနှင့်ပုံရိပ်ကို ထိခိုက်စေရန်ရည်ရွယ်သည့် နိုင်ငံရေးဖိအားပေးမှု သက်သက်သာဖြစ်သဖြင့် အဆိုပါထုတ်ပြန်ချက်ကို မြန်မာနိုင်ငံက ပြင်းထန်စွာ ကန့်ကွက်လိုက်သကဲ့သို့ ကန့်ကွက်ပယ်ချမှုလည်း ပြုလိုက်သည်။

ပဋိပက္ခအတွင်း လိင်အကြမ်းဖက်မှုဆိုသည်မှာ စစ်ဆင်တိုက်ခိုက်မှုများ၊ ညှဉ်းပန်းနှိပ်စက်မှုများ၊ အကြမ်းဖက်တိုက်ခိုက်မှုများစသည့် ပဋိပက္ခများဖြစ်ပေါ်စဉ်အတွင်း အဓမ္မပြုကျင့်မှု၊ လိင်ကျွန်ပြုမှု၊ အတင်းအကျပ်လက်ထပ်မှု စသည့်လုပ်ရပ်များကို နည်းဗျူဟာတစ်ရပ်အနေဖြင့် အသုံးပြုခြင်းကို ဆိုခြင်းဖြစ်သည်။ ပဋိပက္ခအတွင်း လိင်အကြမ်းဖက်မှုသည် နိုင်ငံတကာဥပဒေအရ စစ်ရာဇဝတ်မှု၊ လူသားမျိုးနွယ်အပေါ် ကျူးလွန်သောရာဇဝတ်မှု၊ လူမျိုးတုံးသတ်ဖြတ်မှုအဖြစ် သတ်မှတ်ထားသည်။ ကုလသမဂ္ဂအစီရင်ခံစာများအရ ၂၀၂၄ ခုနှစ်တွင် ဖြစ်ရပ်ပေါင်း ၄၆၀၀ ကျော်ကို အတည်ပြုထားကာ ၂၅ ရာခိုင်နှုန်းတိုးလာကြောင်း ဖော်ပြထားပြီး ကွန်ဂိုဒီမိုကရက်တစ်သမ္မတနိုင်ငံ၊ ဗဟိုအာဖရိကသမ္မတနိုင်ငံ၊ ဟေတီနိုင်ငံ၊ ဆိုမာလီယာနိုင်ငံနှင့် တောင်ဆူဒန်နိုင်ငံတို့တွင် ၎င်းအမှုများစွာကို မှတ်တမ်းတင်ခဲ့သည်ဟု သိရသည်။

မြန်မာ့လူ့အဖွဲ့အစည်းသည် လိင်အကြမ်းဖက်မှုကို ရိုးရာယဉ်ကျေးမှုအရ ဆန့်ကျင်သော သမိုင်းကြောင်း အစဉ်အလာရှိသည့် လူ့အဖွဲ့အစည်းဖြစ်သည်။ ယင်းဓလေ့ကိုအခြေခံ၍ နိုင်ငံတော်အစိုးရသည် အမျိုးသမီး၊ အမျိုးသား၊ လိင်စိတ်ခံယူမှု ကွဲပြားသူအပါအဝင် မည်သူတစ်ဦးတစ်ယောက်ကိုမျှ လိင်ပိုင်းဆိုင်ရာ အကြမ်းဖက်မှုမှ တားဆီးကာကွယ်ရန် ဥပဒေနှင့်အညီ ပြတ်သားစွာဆောင်ရွက်လျက်ရှိသည်။ အထူးသဖြင့် တပ်မတော်နှင့် လုံခြုံရေးတပ်ဖွဲ့ဝင်များက လိင်ပိုင်းဆိုင်ရာအကြမ်းဖက်မှုအပါအဝင် မည်သည့်ပြစ်မှုကိုမဆို အသေးအဖွဲပင် ဖြစ်လင့်ကစားလုံးဝခွင့်မလွှတ်ဘဲ အရေးယူအပြစ်ပေးသည့် (zero - tolerance policy)ကို ချမှတ်ထားပြီး ကျူးလွန်ပါက ဥပဒေအရ အရေးယူခံရမည်ဖြစ်ကြောင်း အတိအလင်းပြဋ္ဌာန်းထားသည်။ အသိပညာပေးမှုအားဖြင့်လည်း လိင်ပိုင်းဆိုင်ရာ အကြမ်းဖက်မှုအပါအဝင် ဂျီနီဗာကွန်ဗင်းရှင်း ၄ ရပ်ပါ စစ်ပွဲဆိုင်ရာ ဥပဒေသများနှင့် အရပ်သားများအပေါ် အကာအကွယ်ပေးရေးပြဋ္ဌာန်းချက်များနှင့် လိင်အကြမ်းဖက်မှု တားဆီးကာကွယ်ရေးတို့ကို တပ်မတော်၊ ရဲတပ်ဖွဲ့နှင့် ဝန်ကြီးဌာနများမှ တာဝန်ရှိသူများအား ဟောပြောပွဲများ၊ အသိပညာပေးစကားဝိုင်းများ ကျင်းပပေးလျက်ရှိသည်။ အမျိုးသားအဆင့်တိုင်ကြားမှုယန္တရားအဖြစ် 4 Digits (1566) ၂၄ နာရီ Helpline ဝန်ဆောင်မှုကို ၂၀၂၂ ခုနှစ် အောက်တိုဘာလ ၂၅ ရက်တွင် စတင်ခဲ့ပြီး ၂၀၁၇ ခုနှစ်မှ ယခုနှစ် ဇန်နဝါရီလအထိ လက်နက်ကိုင်ပဋိပက္ခအတွင်း မဟုတ်သော်လည်း ပြည်သူလူထုက တိုင်ကြားလာသည့် လိင်ပိုင်းဆိုင်ရာအကြမ်းဖက်ဖြစ်စဉ်ပေါင်း ၂၃၀၀ ကျော်ကို လက်ခံစစ်ဆေးကာ ဥပဒေအရဆောင်ရွက်လျက်ရှိသည်။

မြန်မာနိုင်ငံနှင့်ပတ်သက်၍ ကုလသမဂ္ဂအဖွဲ့အစည်းများ၊ ယန္တရားများ၊ လူပုဂ္ဂိုလ်များ စသည်တို့က သတင်းအချက်အလက်များရယူကြရာတွင် မြန်မာနိုင်ငံတွင်ဖြစ်ပေါ်နေသည့် ပကတိအခြေအနေများကို သတိပြုကြရန်လိုသည်။ နိုင်ငံကို ဆန့်ကျင်ပုန်ကန်နေသည့် လက်နက်ကိုင်သောင်းကျန်းသူများ၊ အကြမ်းဖက်အဖွဲ့များ၊ ယင်းတို့နှင့်ဆက်နွှယ်နေသည့် အဖွဲ့အစည်းများ၊ ပြည်ပြေးအဖွဲ့အစည်းများနှင့် လူပုဂ္ဂိုလ်များစသည်တို့ထံမှ သတင်းအချက်အလက်များ ရယူမည်ဆိုပါက သတင်းအချက်အလက်မှန်ကို ရရှိနိုင်မည်မဟုတ်ဘဲ ၎င်းတို့၏ နိုင်ငံရေးရည်မှန်းချက်ကို အကောင်အထည်ဖော်ရန် ရည်ရွယ်ထားသည့် စွပ်စွဲချက်များ၊ လုပ်ကြံဖန်တီးထားသည့် ဇာတ်လမ်းများ၊ အတည်မပြုနိုင်သည့် သတင်းများကိုသာ ရရှိကြမည်ဖြစ်သည်။ ယင်းကဲ့သို့သော သတင်းအချက်အလက်များကိုအခြေခံ၍ ထုတ်ပြန်သည့် ထုတ်ပြန်ချက်မျိုးမှာ အခြေအနေမှန်နှင့် ကင်းကွာနေမည်ဖြစ်သည့်အလျောက် ယုံကြည်လက်ခံဖွယ်ရာ ထုတ်ပြန်ချက်လည်း ဖြစ်လာမည်မဟုတ်သည့်အပြင် မြန်မာနိုင်ငံကို ဆန့်ကျင်နေကြသည့် အကြမ်းဖက်များ၊ ပြည်ပြေးများ၊ သောင်းကျန်းသူများ၏ အလိုကျ ထုတ်ပြန်ချက်မျိုးသာလျှင် ဖြစ်နေမည်ဖြစ်သည်။

ကိုးကွယ်ယုံကြည်ရာ ဘာသာတရားတို့၏ အဆုံးအမနှင့် ယဉ်ကျေးမှုအစဉ်အလာကြီးမားသည့် မြန်မာနိုင်ငံတွင် လိင်အကြမ်းဖက်မှုမှာ ကြီးလေးသည့်ပြစ်မှုဖြစ်သည့်အပြင် လူ့အဖွဲ့အစည်းတစ်ရပ်လုံးက ဆန့်ကျင်ရှုတ်ချသည့် ယုတ်ညံ့နိမ့်ကျသော အပြုအမူလည်းဖြစ်သည်။ သို့ဖြစ်ရာ အတည်မပြုနိုင်သော သတင်းအချက်အလက်များနှင့် မမှန်ကန်သော စွပ်စွဲချက်များကို အခြေခံ၍ မြန်မာ နိုင်ငံ၏ဂုဏ်သိက္ခာနှင့် ပုံရိပ်ကို ထိခိုက်စေရန်ရည်ရွယ်သည့် နိုင်ငံရေးဖိအားပေးမှု သက်သက်သာဖြစ်သော ထုတ်ပြန်ချက်မျိုးကို မြန်မာတစ်မျိုးသားလုံးက ပြင်းထန်စွာ ကန့်ကွက်ရှုတ်ချကြရမည်သာဖြစ်သည့်အကြောင်း။ ။

moi

လျှပ်စစ်စွမ်းအားသည် လူ့ဘောင်လောက ဖွံ့ဖြိုးတိုးတက်ရေးအတွက် အရေးပါသောကဏ္ဍဖြစ်သည်။ နိုင်ငံဖွံ့ဖြိုးတိုးတက်ရေးအတွက် အရေးကြီးသော လျှပ်စစ်ဓာတ်အားများ အပြည့်အဝရရှိစေရန် နိုင်ငံတိုင်း နိုင်ငံတိုင်းအနေဖြင့် မိမိတို့ပိုင်ဆိုင်ထားသည့် စွမ်းအင်အရင်းအမြစ်များကို ရှာဖွေဖော်ထုတ်၍ လျှပ်စစ်ဓာတ်အားများ ကြိုးပမ်းထုတ်လုပ်နေကြသည်။ နှစ်စဉ်တိုးပွားနေသော လူဦးရေနှင့် တိုးတက်လာသော လူမှုစီးပွားအခြေအနေများအရ လျှပ်စစ်ဓာတ်အားကို လုံလောက်ပိုလျှံအောင် ထုတ်လုပ်နေရမည်ဖြစ်သည်။

နိုင်ငံဖွံ့ဖြိုးတိုးတက်ရေးအတွက် အဓိကမောင်းနှင်အားဖြစ်သည့် စီးပွားရေးကဏ္ဍ ဖွံ့ဖြိုးတိုးတက်လာစေရန် ကြိုးပမ်းဆောင်ရွက်ကြရာတွင် လျှပ်စစ်ဓာတ်အားသည် အဓိကကျသဖြင့် သက်ဆိုင်ရာအဖွဲ့အစည်းများက မည်သို့ဖြည့်ဆည်းပေးရမည်ကို အစဉ်အမြဲ ကြိုးပမ်းကြံဆနေကြသည်။ မြန်မာနိုင်ငံတွင် လိုအပ်သည့် လျှပ်စစ်ဓာတ်အားကို ရေအားလျှပ်စစ်မှအများဆုံးရယူသုံးစွဲလျက်ရှိရာတွင် ထုတ်လုပ်နိုင်မှုနှင့် သုံးစွဲမှုမမျှတသဖြင့် လျှပ်စစ်ဓာတ်အားလိုအပ်ချက်များရှိနေသည်။

မြန်မာနိုင်ငံတွင် ရေအားလျှပ်စစ်မှ ထပ်မံထုတ်လုပ်နိုင်မည့် ရေအရင်းအမြစ်များ များစွာကျန်ရှိနေသေးသည်။ ရေအရင်းအမြစ် ရှားပါးသောနိုင်ငံများတွင် နိုင်ငံဖွံ့ဖြိုးရေးအတွက် ရေအရင်းအမြစ်များကို နည်းလမ်းမျိုးစုံဖြင့် ရှာဖွေအသုံးပြုနေရသည်။ မြန်မာနိုင်ငံတွင် ရေအရင်းအမြစ်များ ပေါများကြွယ်ဝစွာရှိနေပါသော်လည်း ထိရောက်စွာအသုံးမချနိုင်သဖြင့် နိုင်ငံဖွံ့ဖြိုးတိုးတက်ရေး၌ လိုအပ်ချက်များရှိနေသည်ကို တွေ့ရမည်ဖြစ်သည်။ နိုင်ငံတော်၏ အခြေခံလိုအပ်ချက်ဖြစ်သည့် လျှပ်စစ်နှင့် စွမ်းအင်ကို ဖြည့်ဆည်းဆောင်ရွက်နိုင်မှသာ စိုက်ပျိုးရေး၊ မွေးမြူရေးနှင့် စက်မှုကဏ္ဍများ ဖွံ့ဖြိုးတိုးတက်ရေးအတွက် ထိရောက်စွာ အကောင်အထည်ဖော်နိုင်မည်ဖြစ်သည်။

ရေအားလျှပ်စစ်စီမံကိန်းကို ကာလကြာရှည်တည်ဆောက်ရသည့်အတွက် ယခုအချိန် စတင်တည်ဆောက်လျှင် ငါးနှစ်မှဆယ်နှစ်ခန့်အထိ ကြာမြင့်မည်ဖြစ်၍ အနာဂတ်နိုင်ငံတော်နှင့် မျိုးဆက်များအတွက် လိုအပ်သည့်စွမ်းအင်ကို ဖြည့်ဆည်းပေးနိုင်မည်။ ရေအားလျှပ်စစ်ဓာတ်အားပေးစက်ရုံများသည် ကနဦးတည်ဆောက်စကာလ၌ ကုန်ကျစရိတ် အတန်အသင့်ရှိသော်လည်း နောက်ပိုင်းတွင် လည်ပတ်မှုစရိတ်နှင့် လောင်စာဖိုးကုန်ကျမှုစရိတ်မရှိသဖြင့် လေအား၊ နေအား၊ ဓာတ်ငွေ့အား၊ ကျောက်မီးသွေးအားစီမံကိန်းများထက် ကုန်ကျစရိတ်သက်သာသည်။ ထို့ကြောင့် နိုင်ငံအတွင်းကြွယ်ဝသည့် ရေအရင်းအမြစ်များအပေါ်အခြေပြု၍ ရေအားလျှပ်စစ်စီမံကိန်းများကို နိုင်ငံများက ရနိုင်သမျှတည်ဆောက်နေသည်ကို တွေ့ရမည်ဖြစ်သည်။

မြန်မာနိုင်ငံတွင် အခြေခံအရင်းအမြစ်များ ကြွယ်ဝစွာရှိနေသော်လည်း အကောင်အထည်မဖော်သေးသည့် ဧရာဝတီမြစ်ဆုံ-မြစ်ညာမြစ်ဝှမ်း ရေအားလျှပ်စစ် စီမံကိန်းသည် နိုင်ငံ၏ လျှပ်စစ်ဓာတ်အားလိုအပ်ချက်ကို အပြည့်အဝပေးနိုင်သည်။ ဒေသခံပြည်သူများအတွက် အလုပ်အကိုင်အခွင့်အလမ်းများရရှိလာပြီး လူမှုစီးပွားဘဝ ပိုမိုဖွံ့ဖြိုးတိုးတက်မည့် အကျိုးကျေးဇူးများရရှိနိုင်သည်။ အကောင်အထည်ဖော် ဆောင်ရွက်မည့် မြစ်ဆုံစီမံကိန်းမှ ထုတ်လုပ်ရရှိသည့် လျှပ်စစ်ဓာတ်အားကို ပြည်တွင်းသုံးစွဲမှုဖူလုံစေရန် ဦးစားပေးဆောင်ရွက်မည်ဖြစ်သည်။ ထွက်ရှိသည့်ဓာတ်အားကို ပြည်နယ်အတွင်း လုံလောက်အောင်သုံးစွဲပြီး ပိုလျှံသည်များကို ပြည်မနှင့်အခြားပြည်နယ်များအား မျှဝေသုံးစွဲသွားမည်ဖြစ်သည်။ ဆည်တမံတည်ဆောက်နိုင်မှုကြောင့် မြစ်ရေကြီးမှုဘေးအန္တရာယ်မှ ကာကွယ်နိုင်သလို စိုက်ပျိုးရေရရှိရေးအတွက်လည်း အထောက်အကူပြုမည်ဖြစ်သည်။

မြစ်ဆုံရေအားလျှပ်စစ်စီမံကိန်းကဲ့သို့ တည်ဆောက်ထားသော စီမံကိန်းများကို ဖွံ့ဖြိုးတိုးတက်ပြီးနိုင်ငံများတွင် တွေ့နိုင်သည်။ တရုတ်၊ ဂျပန်၊ အမေရိကန်၊ ရုရှား၊ အီဂျစ်၊ ဆွစ်ဇာလန်နိုင်ငံများတွင် အလွန်ကြီးမားသော ရေအားလျှပ်စစ်တမံကြီးများကို တွေ့နိုင်သည်။ ၎င်းနိုင်ငံ၊ ၎င်းဒေသအတွက် အန္တရာယ်မရှိသည့်အပြင် အကျိုးကျေးဇူးများ များစွာရရှိနေသည်။ ဒေသခံပြည်သူများ စိုးရိမ်ပူပန်မှုမဖြစ်စေရန် ပညာရှင်များက ငလျင်နှင့်ပတ်သက်၍ အသေးစိတ်တွက်ချက်ပြီး စီမံဆောင်ရွက် ထားသည်။ ယခုဆည်တမံကို ၈ မဂ္ဂနီကျုဒဏ်ခံနိုင်ရည်ရှိသည့် ဒီဇိုင်းများဖြင့် တည်ဆောက်မည်ဖြစ်သည်။ ဧရာဝတီမြစ်ဝှမ်းဒေသတွင် ရင်ဆိုင်ကြုံတွေ့ရလေ့ရှိသော သဘာဝဘေးအန္တရာယ်အမျိုးမျိုးကို ကျော်လွှားပြီး ပိုမိုကောင်းမွန်သည့် ပတ်ဝန်းကျင်ကို တည်ဆောက်နိုင်ကာ ဒေသခံပြည်သူများ၏ လူမှုစီးပွားဘဝများ မြင့်မားတိုးတက်လာမည်ဖြစ်သည်။

သို့ဖြစ်ရာ နိုင်ငံတော်အစိုးရအနေဖြင့် နိုင်ငံဖွံ့ဖြိုးတိုးတက်ရေး၊ ပြည်သူများ လူမှုစီးပွားဘဝမြင့်မားတိုးတက်ရေးကို အထောက်အကူပြုမည့် ဧရာဝတီမြစ်ဆုံ-မြစ်ညာ မြစ်ဝှမ်းစီမံကိန်းကို အကောင်အထည်ဖော်ဆောင်ရွက်မည်ဖြစ်ရာ စီမံကိန်းအောင်မြင်ရေးသည် ဒေသခံမိဘပြည်သူများ၏ ထောက်ခံအားပေးမှု၊ ပူးပေါင်းဆောင်ရွက်မှုတို့အပေါ်တွင် များစွာမူတည်သဖြင့် မိမိဒေသအကျိုး၊ မိမိတိုင်းပြည်အကျိုးအတွက် လက်တွဲပူးပေါင်းဆောင်ရွက်ကြပါရန် တိုက်တွန်းအပ်ပါကြောင်း။ ။

moi

နိုင်ငံတော်က ရည်မှန်းတည်ဆောက် အကောင်အထည်ဖော်နေသော ဒီမိုကရေစီနှင့် ဖက်ဒရယ်စနစ်ကိုအခြေခံသည့် ပြည်ထောင်စုတည်ဆောက်ရေးနှင့် ပြည်သူတို့၏ လူမှုစီးပွားဘဝဖွံ့ဖြိုးတိုးတက်ရေးအတွက် အားလုံးပူးပေါင်းပါဝင် လက်တွဲဆောင်ရွက်ကြရမည်ဖြစ်သည်။ ရည်မှန်းချက်ကို အကောင်အထည်ဖော်နိုင်ရန် အမျိုးသားကာကွယ်ရေးနှင့် လုံခြုံရေးကောင်စီအနေဖြင့် နိုင်ငံတော်၏ အန္တိမရည်မှန်းချက်ဖြစ်သည့် လွတ်လပ်၍ တရားမျှတမှုအပြည့်ရှိသော ၂၀၂၅ ခုနှစ် ပါတီစုံဒီမိုကရေစီ အထွေထွေရွေးကောက်ပွဲကို အပိုင်း (၃) ပိုင်းခွဲ၍ အောင်မြင်စွာကျင်းပပေးခဲ့ပြီးဖြစ်သည်။

ရွေးကောက်ပွဲရလဒ်များအရ လွှတ်တော်အစည်းအဝေးများကို ၂၀၂၆ ခုနှစ် မတ်လအတွင်း ကျင်းပပြုလုပ်မည်ဖြစ်ပြီး ပေါ်ထွက်လာမည့်အစိုးရအား ဒီမိုကရေစီစံနှုန်းများနှင့်အညီ နိုင်ငံတော်တာဝန်များကို လွှဲအပ်ကာ ရည်မှန်းချက်များကို ဆက်လက်အကောင်အထည်ဖော်မည်ဖြစ်သည်။ ထို့ကြောင့် စစ်မှန်စည်းကမ်းပြည့်ဝသည့် ပါတီစုံဒီမိုကရေစီစနစ်ကို အကောင်အထည်ဖော် တည်ဆောက်ရေးအတွက် ဆက်လက်ဆောင်ရွက်ရမည့် လုပ်ငန်းစဉ်များတွင် ပြည်သူလူထုအားလုံးပူးပေါင်း ပါဝင်ဆောင်ရွက်ကြရမည်ဖြစ်သည်။ လွတ်လပ်မှုနှင့်တရားမျှတမှုကို ဥပဒေ၊ စည်းမျဉ်း၊ စည်းကမ်း၊ လုပ်ထုံးလုပ်နည်းများနှင့်အညီ ရယူအသုံးချလျက် အပြည့်အဝအကောင်အထည်ဖော်နိုင်အောင် ကြိုးပမ်းဆောင်ရွက်ကြရမည်ဖြစ်သည်။

ဒီမိုကရေစီနှင့်ဖက်ဒရယ်စနစ်ကိုအခြေခံသည့် ပြည်ထောင်စုတည်ဆောက်ရေးနှင့် ပြည်သူတို့၏ လူမှုစီးပွားဘဝဖွံ့ဖြိုးတိုးတက်ရေးအတွက် ပြည်သူအားလုံးကျန်းမာကြံ့ခိုင်ပြီး အသိပညာ၊ အတတ်ပညာ ပြည့်စုံရန်လိုအပ်ပါသည်။ ထို့ကြောင့် နိုင်ငံတော်အနေဖြင့် ပညာရေးနှင့် ကျန်းမာရေးအပါအဝင် ကဏ္ဍအားလုံး တစ်ပြေးညီ ဖွံ့ဖြိုးတိုးတက်စေရန် ကြိုးစားဆောင်ရွက်လျက်ရှိသည်။ နိုင်ငံတော်ဖွံ့ဖြိုးတိုးတက်စေရန်အတွက် အသိပညာ၊ အတတ်ပညာရှိသူများဖြင့်သာ တည်ဆောက်နိုင်မည်ဖြစ်သဖြင့် နိုင်ငံသားတိုင်း အနည်းဆုံး KG+9 ပြီးမြောက်အောင်မြင်သည်အထိ ပညာသင်ယူခွင့်ရရှိရေးအတွက် အခမဲ့ပညာရေးစနစ်နှင့် ဘက်စုံပညာရေးစနစ်ကို ကျင့်သုံးလျက်ရှိသည်။ KG+9 ပြီးမြောက်အောင်မြင်သူများ အသက်မွေးဝမ်းကျောင်းမှု ပညာများသင်ယူနိုင်ရန် အခြေခံပညာနှင့်စက်မှု၊ စိုက်ပျိုး၊ မွေးမြူရေးအထက်တန်းကျောင်း ၈၉ ကျောင်းဖွင့်လှစ်ပေးထားပြီး လူသားအရင်းအမြစ်များ နှစ်စဉ်မွေး ထုတ်ပေးလျက်ရှိသည်။

အခြေခံနှင့်အဆင့်မြင့်ပညာများကို လက်လှမ်းတမီသင်ယူနိုင်ရေးကျောင်းများနှင့် တက္ကသိုလ်၊ ကောလိပ်များကို ဒေသအလိုက် တိုးချဲ့ဖွင့်လှစ်ပေးလျက်ရှိသည်။ ကျောင်းနေအရွယ်လူငယ်တိုင်း ကျောင်းနေရေး၊ အချိန်မတိုင်မီ ကျောင်းထွက်မှုမရှိစေရေး၊ ပညာရေးကို ဆုံးခန်းတိုင်သင်ယူပြီး ကျွမ်းကျင်သူများ၊ ပညာရှင်များဖြစ်အောင် သင်ကြားသင်ယူမွေးထုတ်ကြရမည်ဖြစ်သည်။ လူသားအားလုံးအတွက် ပညာရေးနည်းတူ ကျန်းမာရေးသည်လည်း အဓိကကျသဖြင့် နိုင်ငံတော်က ကျန်းမာရေးစောင့်ရှောက်မှု၊ ကုသမှု၊ အသိပညာပေးမှု၊ ဝေးလံသည့်ဒေသများတွင် ဆရာဝန်လိုအပ်မှုတို့ကို မြှင့်တင်ဖြည့်ဆည်းဆောင်ရွက်ပေးလျက်ရှိရာ တိုင်းရင်းသားပြည်သူများကလည်း အသက်ရှည်ကျန်းမာအောင် ကိုယ်တိုင်ကျင့်ကြံနေထိုင်ကြရန် လိုအပ်သည်။

လူမှုစီးပွားဘဝ ဖွံ့ဖြိုးတိုးတက်စေရန်အတွက် ဒေသအလိုက် စိုက်ပျိုးရေးထုတ်ကုန်များ ပိုမိုတိုးတက်ထုတ်လုပ်နိုင်ပြီး ဒေသနှင့်ကိုက်ညီသည့် စနစ်ကျသော မွေးမြူရေးလုပ်ငန်းများကိုလည်း ဦးစားပေးအကောင်အထည်ဖော်ကြရမည်ဖြစ်သည်။ ဒေသတွင်းမှထွက်ရှိသည့် စိုက်ပျိုးရေးနှင့် မွေးမြူရေးပစ္စည်းများကို အခြေခံ၍ အသေးစား၊ အငယ်စားနှင့် အလတ်စား ကုန်ထုတ်လုပ်ငန်းများဖြင့် အရည်အသွေးပြည့်မီသော MSME ထုတ်ကုန်များ ပိုမိုတိုးမြှင့်ထုတ်လုပ်ကြပြီး ဒေသတွင်း စားသုံးမှုဖူလုံရေး၊ ပြည်တွင်းလိုအပ်ချက်ကို ဖြည့်ဆည်းပေးနိုင်ရေးနှင့် ပြည်ပပို့ကုန် တိုးမြှင့်နိုင်ရေးအတွက်ပါ ကြိုးစားဆောင်ရွက်ကြရန်လိုသည်။ လိုအပ်သည့် နည်းပညာ၊ အရင်းအနှီးနှင့် ကုန်ထုတ်သွင်းအားစုတို့ကိုလည်း နိုင်ငံတော်က ပံ့ပိုးပေးလျက်ရှိသကဲ့သို့ ဆက်လက်၍လည်း အားပေးကူညီဆောင်ရွက်ပေးသွားမည်ဖြစ်သည်။

သို့ဖြစ်ရာ နိုင်ငံတော်အနေဖြင့် ချမှတ်ထားသော ဦးတည်ချက်များကို ဆက်လက်အကောင်အထည်ဖော်ဆောင်ရွက်သွားမည်ဖြစ်ပြီး နိုင်ငံတော်အကျိုး၊ ပြည်သူလူထုအကျိုးအတွက် လက်နက်ကိုင်ပဋိပက္ခချုပ်ငြိမ်းပြီး တည်ငြိမ်အေးချမ်းသော ပတ်ဝန်းကျင်ကောင်းကို ဆက်လက်အကောင်အထည်ဖော်လျက်ရှိရာ နိုင်ငံ့စီးပွားရေး ကောင်းမွန်လာပါက နိုင်ငံရေး၊ လူမှုရေး၊ ပညာရေး၊ ကျန်းမာရေးစသည့် ကဏ္ဍအသီးသီး တိုးတက်ကောင်းမွန်လာမည်ဖြစ်၍ ပြည်သူများ၏ လူမှုစီးပွားဘဝများ တိုးတက်မြင့်မားလာရေးအတွက် ဖွံ့ဖြိုးတိုးတက်ပြီး စည်းကမ်းပြည့်ဝသည့် ပါတီစုံဒီမိုကရေစီစနစ်ကို ဝိုင်းဝန်းအကောင်အထည်ဖော် ဆောင်ရွက်ကြရမည်ဖြစ်ပါကြောင်း။ ။

moi

စစ်ရေးနှင့်မသက်ဆိုင်သည့် အများပြည်သူဆိုင်ရာနေရာများကို အကြမ်းဖက်သောင်းကျန်းသူများက နေရာဒေသအနှံ့အပြားတို့တွင် မကြာခဏပစ်ခတ်တိုက်ခိုက်နေကြရာ ဖေဖော်ဝါရီ ၂၀ ရက် တစ်ရက်တည်းမှာပင် ချင်းပြည်နယ်၊ ကယားပြည်နယ်၊ ကချင်ပြည်နယ်တို့အတွင်း တိုက်ခိုက်မှုတို့မှာ ပြည်သူကို အဓိကရည်ရွယ်၍ ပစ်မှတ်ထားတိုက်ခိုက်ခဲ့ကြခြင်းဖြစ်သည်။ ၂၀၂၁ ခုနှစ် နိုင်ငံရေးအပြောင်းအလဲတွင် ပြည်သူအတွက်ဟုဆိုကာ ပြည်တွင်းဒေသအများအပြားတို့တွင် လက်နက်ကိုင်သောင်းကျန်းသူအဖွဲ့ပေါင်းများစွာ ပေါ်ပေါက်လာခဲ့ကြရာ ငါးနှစ်ကျော်မျှကြာမြင့်လာပြီဖြစ်သည့် ယနေ့အချိန်တွင် ၎င်းအဖွဲ့များမှာ စစ်ရေးအရအောင်မြင်မှု မရကြသည့်အပြင် ဒေသခံပြည်သူများအတွက် ဝန်ထုပ်ဝန်ပိုးများ၊ အန္တရာယ်ပေးသူများ ဖြစ်လာကြသည်။

ပြီးခဲ့သည့် ဖေဖော်ဝါရီ ၂၀ ရက်နေ့ နံနက်ပိုင်းတွင် (၇၈) နှစ်မြောက် ချင်းအမျိုးသားနေ့အခမ်းအနား ကျင်းပနေသည့် ချင်းပြည်နယ် ဟားခါးမြို့ စုပေါင်းရုံးနေရာကို CDF (ဟားခါး)နှင့် PDF အမည်ခံ အကြမ်းဖက်သောင်းကျန်းသူပူးပေါင်းအဖွဲ့များက အခမ်းအနားကျင်းပနေမှုပျက်စီးစေရန်နှင့် အခမ်းအနားသို့ တက်ရောက်လာကြသည့် ပြည်သူများ ထိခိုက်သေကျေစေရန်ရည်ရွယ်၍ FPV Suicide Drone များ ပစ်ချတိုက်ခိုက်ခဲ့ကြသည်။  ယင်းနေ့ ညနေ ၄ နာရီခွဲခန့်တွင် ကယားပြည်နယ် ဖားဆောင်းမြို့၏ အရှေ့မြောက်ဘက်မီတာ ၁၈၀၀ ခန့်အကွာ ဝမ်အောင်း - ချိကွဲ့- စောင်းလော့လမ်းကြောင်းပေါ်ရှိ အများပြည်သူ အားထားအသုံးပြုနေကြရသော ပွန်ချောင်းတံတားကို KNPP ၊ KNDF အဖွဲ့များနှင့် PDF အမည်ခံအကြမ်းဖက်သောင်းကျန်းသူများက မိုင်းထောင် ဖောက်ခွဲဖျက်ဆီးခဲ့ကြသည်။ ၎င်းအဖွဲ့တို့ကပင် ဖားဆောင်းမြို့အနီးရှိ သံလွင်တံတား (ဖားဆောင်း)ကို ဖေဖော်ဝါရီ ၁၇ ရက်နေ့က မိုင်းထောင်ဖောက်ခွဲဖျက်ဆီးခဲ့ကြခြင်းကြောင့် ဒေသခံပြည်သူများ ခရီးသွားလာရေးတွင် အခက်အခဲများစွာ တွေ့ကြုံနေကြရပြီး ဖြစ်ရာ ပွန်ချောင်းတံတားကိုပါ ထပ်မံဖျက်ဆီးလိုက်ခြင်းအားဖြင့် နောက်တစ်မျိုး ဒုက္ခထပ်ပိုးပေးလိုက်ကြခြင်းဖြစ်သည်။

ဖေဖော်ဝါရီ ၂၀ ရက်နေ့ ညပိုင်းတွင် KIA နှင့် PDF အမည်ခံ အကြမ်းဖက်သောင်းကျန်းသူအဖွဲ့တို့ ပူးပေါင်းကျူးလွန်ခဲ့ကြသည့် အကြမ်းဖက်မှုကမူ ရက်စက်မှုအပေါင်းသရဖူဆောင်းသည်ဟု ဆိုရမည်ဖြစ်သည်။ ယင်းနေ့ ည ၈ နာရီ ၁၂ မိနစ်ခန့်တွင် မြန်မာအမျိုးသားလေကြောင်းလိုင်း (MNA) မှ ATR-72- 600 အမျိုးအစား ခရီးသည်တင်လေယာဉ်တစ်စင်းသည် ခရီးသည်များတင်ဆောင်၍ မြစ်ကြီးနားလေဆိပ်မှ မန္တလေးသို့ ပြန်လည်ထွက်ခွာရန် ပြင်ဆင်နေစဉ် KIA နှင့် PDF ပူးပေါင်းအဖွဲ့က FPV Suicide Drone များဖြင့် တိုက်ခိုက်ခဲ့ကြခြင်းဖြစ်သည်။ အရပ်ဘက်လေဆိပ်မှ ခရီးသည် တင်လေယာဉ်ကို ခရီးသည်များတင်ဆောင်ပြီးစီး၍ ပြန်လည်ထွက်ခွာမည့်အချိန်တွင် ယခုကဲ့သို့ တိုက်ခိုက်ခြင်းမှာ ခရီးသွားပြည်သူကို ထိခိုက်သေကျေပျက်စီးစေလိုခြင်းမှတစ်ပါး အခြား မရှိနိုင်။ ၎င်းအဖွဲ့တို့ကပင် ဖေဖော်ဝါရီ ၁၂ ရက်တွင် မြစ်ကြီးနားလေဆိပ်ကို အဆိုပါ drone မျိုးဖြင့် တစ်ကြိမ်တိုက်ခိုက်ခဲ့ကြပြီးဖြစ်သည်။ စစ်ရေးနှင့်မသက်ဆိုင်သော အများပြည်သူသွားလာရေးနှင့် ကုန်စည်စီးဆင်းမှုတို့အတွက် အားကိုးအားထားပြုနေကြရသော အရပ်ဘက်လေကြောင်းလိုင်းကို ယခုလိုရည်ရွယ်ချက်ရှိရှိ တိုက်ခိုက်ခြင်းက ဂျီနီဗာကွန်ဗင်းရှင်းများနှင့် အပြည်ပြည်ဆိုင်ရာ ဥပဒေတို့ အရ စစ်ရာဇဝတ်မှု (war crime) ကို ကျူးလွန်ခြင်းဖြစ်သည်။

အကြမ်းဖက်သောင်းကျန်းသူအဖျက်သမားတို့၏ လုပ်ရပ်များက ၎င်းတို့၏ကျရှုံးမှုများကို ထင်ဟပ်ဖော်ပြနေသည်။ လွန်ခဲ့သည့်နှစ်အနည်းငယ်အတွင်း လက်နက်ကိုင်အကြမ်းဖက်ဆူပူသောင်းကျန်းမှု စစ်မျက်နှာအများအပြား ပြည်တွင်းဒေသများစွာမှာ ဖြစ်ပေါ်လာချိန်တွင် ၎င်းတို့အနေဖြင့် အရေးသာမှုအချို့ကို အခိုက်အတန့်အားဖြင့် ရရှိခဲ့ကြသည်။ သို့ရာတွင် အချိန်ကြာလာသည်နှင့်အမျှ တစ်ဗိုလ်တစ်မင်း လက်နက်ကိုင်ထားကြသူများက အာဏာ ပြလာသည်။ ဒေသခံပြည်သူများအပေါ် ဖိစီးနှိပ်စက်မှုများ ဖြစ်လာသည်။ ထိုအခါ ပြည်သူများက လက်နက်ကိုင်သောင်းကျန်းသူများကို ဆန့်ကျင်မှုများ ဖြစ်ပေါ်လာသည်။ ၎င်းတို့ရှိနေခြင်းကြောင့် ဒေသအတွင်း တည်ငြိမ်အေးချမ်းမှုကင်းမဲ့ကာ လူမှုစီးပွားဘဝများ နိမ့်ကျမှုဖြစ်ရသည့်အခြေအနေကိုလည်း ပြည်သူလူထုက နားလည်သိရှိလာကြသည်။ ထို့အပြင် ၎င်းလက်နက်ကိုင်အကြမ်းဖက်သောင်းကျန်းသူအဖွဲ့များ၏ လက်နက်အားကိုးဥပဒေမဲ့ပြုကျင့်မှုများကို ဒေသခံပြည်သူများက မုန်းတီးစက်ဆုပ်လာကြသည်။ ဤအခြေအနေများသည် အကြမ်းဖက်သောင်းကျန်းသူတို့၏ နေဝင်ချိန်မကြာမီရောက်ရှိလာတော့မည့် နိမိတ်ပုံများပင်ဖြစ်ရာ ၎င်းအကြမ်းဖက်အဖျက်သမားများကို တိုက်ခိုက်နှိမ်နင်းရှင်းလင်းမှုများတွင် ဒေသခံပြည်သူများ ပိုမိုပူးပေါင်းပါဝင်လာသည်နှင့်အမျှ အမြန်ဆုံးတည်ငြိမ်အေးချမ်းမှုများ ရရှိလာနိုင်ပါမည့် အကြောင်း။ ။

moi

၂၀၂၆ ခုနှစ် (၇၈) နှစ်မြောက် ချင်းအမျိုးသားနေ့အခမ်းအနားသို့ ပြည်ထောင်စုသမ္မတမြန်မာနိုင်ငံတော်ယာယီသမ္မတ နိုင်ငံတော်လုံခြုံရေးနှင့်အေးချမ်းသာယာရေးကော်မရှင်ဥက္ကဋ္ဌ ဗိုလ်ချုပ်မှူးကြီး သတိုးမဟာသရေစည်သူ သတိုးသီရိသုဓမ္မ မင်းအောင်လှိုင်ထံမှ ပေးပို့သည့်သဝဏ်လွှာတွင် “ပြည်ထောင်စုဖွားတိုင်းရင်းသားညီအစ်ကိုမောင်နှမများအကြား နှစ်ပေါင်းထောင်ချီ၍ ဖြစ်တည်လာခဲ့သည့် သံယောဇဉ်နှင့် ချစ်ကြည်ရင်းနှီးမှုတို့ကို ဖြိုခွဲဖျက်ဆီးလျက်ရှိကြသည့် ပြည်တွင်း၊ ပြည်ပအဖျက်အင်အားစုတို့၏ အချင်းချင်းမုန်းတီးစေရန် သွေးခွဲရန်တိုက်ပေးမှုများ၊ ကျဉ်းမြောင်းသော လူမျိုးရေးအယူဝါဒ သွတ်သွင်းနေမှုများကို အထူးသတိပြုကာကွယ်ကြရန် လိုအပ်ပါသည်” ဟု ဖော်ပြထားသည်။

မျက်မှောက်ကာလတွင် မြန်မာနိုင်ငံ၏ နေရာဒေသအချို့အပါအဝင် နိုင်ငံတော်အတွင်း ဆူပူအကြမ်းဖက်မှုများ၊ တရားဥပဒေကို ဖောက်ဖျက်ကျူးလွန်မှုများနှင့် နိုင်ငံတော်ကိုပြိုကွဲပျက်စီးစေမည့် အဖျက်လုပ်ရပ်များစွာရှိနေခြင်းသည် နိုင်ငံတော်အတွက် အလွန်အန္တရာယ်ကြီးမားလှသည်ကို သတိပြုဖို့လိုသည်။ ယနေ့ကြုံတွေ့နေရသော အကြမ်းဖက်လုပ်ရပ်များသည် ၂၀၂၀ ပြည့်နှစ် ပါတီစုံဒီမိုကရေစီအထွေထွေရွေးကောက်ပွဲတွင် ဖြစ်ပေါ်ခဲ့သည့် မဲမသမာမှုရလဒ် ပယ်ဖျက်ခံရသည့်အပေါ်တွင် အမှန်ကိုအမှန်အတိုင်း သုံးသပ်ရှုမြင်မှုမရှိဘဲ အာဏာကို အဓမ္မနည်းဖြင့် လိုချင်တပ်မက်သည့်ဆန္ဒကြောင့် ဖြစ်ပေါ်လာသည့် သွေးထိုးလှုံ့ဆော်မှုများမှ စတင်လာခဲ့ခြင်းဖြစ်သည်။ နိုင်ငံတော်နှင့် ပြည်သူတို့အပေါ် သဘောထားမမှန်ကန်သည့် တိုင်းရင်းသားလက်နက်ကိုင်အဖွဲ့အချို့ကလည်း ဖြစ်ပေါ်လာသည့် မတည်မငြိမ်ဖြစ်မှုကို အခွင့်ကောင်းယူကာ တည်ငြိမ်အေးချမ်းလျက်ရှိသောဒေသများကို အကြမ်းဖက် တိုက်ခိုက်ဖျက်ဆီးပြီး နယ်မြေနှင့်အာဏာချဲ့ထွင်ရန် လုပ်ဆောင်လာခဲ့သည်။

ထိုဖြစ်စဉ်များကြောင့် နယ်မြေဒေသအချို့၌ အပြစ်မဲ့ပြည်သူများ၏ အသက်၊ အိုးအိမ်၊ စည်းစိမ်များသာမက ပြည်သူပိုင်အဆောက်အအုံများစွာ ပျက်စီးဆုံးရှုံးကာ နိုင်ငံတော်ဖွံ့ဖြိုးတိုးတက်မှု ထိခိုက်ဆုံးရှုံးနစ်နာခဲ့ရသကဲ့သို့ တိုင်းရင်းသားပြည်သူများ ဆင်းရဲဒုက္ခမျိုးစုံ ကြုံတွေ့လျက်ရှိသည်ကို အားလုံးမြင်တွေ့ကြားသိနေရသည်။ ထိခိုက်ပျက်စီးဆုံးရှုံးမှုမှန်သမျှသည် နိုင်ငံတော်၏ တန်ဖိုးမဖြတ်နိုင်သောအရင်းအမြစ်များနှင့် အခြေခံအဆောက်အအုံများဖြစ်သည်။ အကြမ်းဖက်ဖြစ်စဉ်များကြောင့် ယာယီနေရပ်စွန့်ခွာနေကြရသည့် ဝန်ထမ်းများနှင့် ပြည်သူများ၏ ဒုက္ခအခက်အခဲများမှာ စိတ်မချမ်းမြေ့ဖွယ်ဖြစ်သည်။

နိုင်ငံတော်ဖွံ့ဖြိုးတိုးတက်မှုအရှိန်အဟုန်ရရှိနေသည့်အချိန်တွင် ယခုကဲ့သို့ မဆင်မခြင်လုပ်ရပ်များကြောင့် ထိခိုက်ပျက်စီးဆုံးရှုံးကာ နိုင်ငံတော်၏အင်အားကို လျော့ပါးစေပြီး ရှေ့သို့မတက်နိုင်သည့်အပြင် မူလအခြေအနေသို့ ပြန်လည်ရောက်ရှိအောင် အကုန်အကျများစွာနှင့် အချိန်များစွာရယူတည်ဆောက်အကောင်အထည်ဖော်ရဦးမည်ဖြစ်သည်။ ထို့ကြောင့် နိုင်ငံတော်နှင့် ပြည်သူအတွက် ဆိုးကျိုးများ ဖြစ်ပေါ်စေသည့် အကြမ်းဖက်သောင်းကျန်းမှုများပပျောက်ပြီး ဒေသအားလုံး တည်ငြိမ်အေးချမ်းမှုရရှိစေရေးအတွက် တိုင်းရင်းသားပြည်သူအချင်းချင်း စိတ်ဝမ်း မကွဲပြားဘဲ နိုင်ငံတော်နှင့် ပြည်သူအကျိုးကို ဦးစားပေးဆောင်ရွက်ကြရမည် ဖြစ်သည်။ အကြမ်းဖက်သောင်းကျန်းမှုများ ချုပ်ငြိမ်းရေးအတွက် နိုင်ငံတော်အစိုးရ၊ တပ်မတော်၊ လုံခြုံရေးတပ်ဖွဲ့များနှင့် ပူးပေါင်းပါဝင်လက်တွဲဆောင်ရွက်ကြပါရန် တိုက်တွန်းအပ်ပါသည်။

အရေးပေါ်အခြေအနေကြေညာပြီး နိုင်ငံတော်တာဝန်ကို တပ်မတော်က ခေတ္တထိန်းသိမ်းရယူသည့်အချိန်မှစ၍ ပြည်ထောင်စုတည်ငြိမ်အေးချမ်းရေး၊ တရားဥပဒေစိုးမိုးရေး၊ စီးပွားရေး၊ လူမှုရေး၊ ပညာရေး၊ ကျန်းမာရေးနှင့် ကဏ္ဍအသီးသီး ဖွံ့ဖြိုးတိုးတက်မှုရှိစေရေး ဦးတည်ချက်များနှင့် ရှေ့လုပ်ငန်းစဉ်များကို ချမှတ်အကောင်အထည်ဖော်ခဲ့သည်။ ပြည်သူအားလုံးလိုလားသည့် ပါတီစုံဒီမိုကရေစီအထွေထွေရွေးကောက်ပွဲကို ကျင်းပပေးခဲ့သည်။ အမျိုးသားကာကွယ်ရေးနှင့် လုံခြုံရေးကောင်စီသည် ဦးတည်ချက်(၄)ရပ်ကို ချမှတ်အကောင်အထည်ဖော်ပြီး နိုင်ငံတော်အကျိုး၊ တိုင်းရင်းသားပြည်သူလူထုအကျိုးအတွက် လက်နက်ကိုင်ပဋိပက္ခများချုပ်ငြိမ်း၍ တည်ငြိမ်အေးချမ်းသော ပတ်ဝန်းကျင်ကောင်းကို ဆက်လက်အကောင်အထည်ဖော်လျက်ရှိသည်။ လက်နက်ကိုင်ပဋိပက္ခများ ချုပ်ငြိမ်းရေးအတွက် NCA ပါသဘောတူညီချက်များအတိုင်း အကောင်အထည်ဖော်လျက်ရှိသည်။ PDF အပါအဝင် လက်နက်ကိုင်အဖွဲ့အမျိုးမျိုးကို ဥပဒေဘောင်အတွင်းဝင်ရောက်လာရန် တံခါးဖွင့်ပေးထား သည်။

သို့ဖြစ်ရာ နိုင်ငံတော်တည်ငြိမ်အေးချမ်းရေးနှင့် တရားဥပဒေစိုးမိုးရေးသည် နိုင်ငံတော်ဖွံ့ဖြိုးတိုးတက်ရေး၊ နိုင်ငံတော်တည်ဆောက်ရေးနှင့် တိုင်းရင်းသားပြည်သူများ လုံခြုံစိတ်ချစေရေးအတွက် အရေးကြီးသည့်အလျောက် လက်နက်ကိုင်ပဋိပက္ခများ ချုပ်ငြိမ်းရေးကို တိုင်းရင်းသားပြည်သူအားလုံးက နိုင်ငံတော်အစိုးရ၊ တပ်မတော်နှင့်အတူ လက်တွဲကြိုးပမ်းဖော်ဆောင်ကြပါရန် အလေးအနက်တိုက်တွန်းအပ်ပါကြောင်း။ ။

moi

၂၀၂၀ ပြည့်နှစ် ပါတီစုံဒီမိုကရေစီအထွေထွေရွေးကောက်ပွဲတွင် မဲမသမာမှုများပြုလုပ်ပြီး နိုင်ငံတော်၏အာဏာကို အဓမ္မရယူရန် ဆောင်ရွက်ခဲ့ခြင်းကြောင့် တပ်မတော်အနေဖြင့် ဖွဲ့စည်းပုံအခြေခံဥပဒေ(၂၀၀၈ ခုနှစ်) နှင့်အညီ နိုင်ငံတော်တာဝန်များကို ထမ်းဆောင်ခဲ့ခြင်းဖြစ်သည်။ တပ်မတော်အနေဖြင့် နိုင်ငံ့တာဝန်ကို စတင်ထမ်းဆောင်ချိန်မှစ၍ ဦးတည်ချက်များချမှတ်ပြီး အရေးပေါ်ကာလဆိုင်ရာလုပ်ငန်းစဉ်များ ပြီးဆုံးချိန်တွင် ရွေးကောက်ပွဲကျင်းပပြီး အနိုင်ရသည့်ပါတီအား နိုင်ငံတော်၏တာဝန်ကို လွှဲပြောင်းပေးအပ်မည်ဟု အသိပေးထားသည်။

နိုင်ငံတော်၏တာဝန်ကို စတင်တာဝန်ယူခဲ့ရသည့်အချိန်တွင် ဆူပူဆန္ဒပြမှုများမှတစ်ဆင့် လက်နက်ကိုင်အကြမ်းဖက်တိုက်ခိုက်မှုများအထိ ဖြစ်ပေါ်ခဲ့သည်။ တပ်မတော်အနေဖြင့် ဆူပူဆန္ဒပြမှုများကို ထိန်းထိန်းသိမ်းသိမ်းဖြေရှင်းနိုင်ခဲ့ပြီးနောက်ပိုင်းတွင် ဆူပူဆန္ဒပြမှုများလျော့ပါးသွားသော်လည်း လက်နက်ကိုင်ပဋိပက္ခများ ဆက်လက်ဖြစ်ပေါ်နေသဖြင့် နိုင်ငံ့တာဝန်ယူထားသည့် နှစ်နှစ်တာကာလအတွင်း ရွေးကောက်ပွဲကျင်းပခြင်း မပြုလုပ်နိုင်ခဲ့ပေ။ အလားတူ ၂၀၂၃ ခုနှစ်တွင် ရခိုင်ပြည်နယ်အတွင်း ထိခိုက်မှုဖြစ်ပေါ်ခဲ့သည့် မိုခါမုန်တိုင်း၊ ၂၀၂၄ ခုနှစ်တွင် မြန်မာနိုင်ငံအလယ်ပိုင်း၌ ဆိုးရွားသည့် ရေကြီးရေလျှံဖြစ်ပေါ်ခဲ့ခြင်းနှင့် မန္တလေးငလျင်ကြီးလှုပ်ခတ်ခြင်း စသည့်သဘာဝဘေးအန္တရာယ်များဖြစ်ပေါ်ခဲ့ခြင်းကြောင့် ပြန်လည်ထူထောင်ရေးလုပ်ငန်းများကို ခြောက်လခန့်ကာလအတွင်း အလျင်အမြန်ဆောင်ရွက်ခဲ့သည်။

တပ်မတော်အနေဖြင့် နိုင်ငံအတွင်း လှိုင်းကြီးလေထန်မုန်တိုင်းထန်သကဲ့သို့ ခက်ခဲကြမ်းတမ်းသောအခြေအနေများကို ယခုမှကြုံတွေ့ခြင်းမဟုတ်ပေ။ မြန်မာနိုင်ငံ လွတ်လပ်ရေးရပြီးကာလမှစ၍ သမိုင်းကြောင်းတစ်လျှောက်၌ ပြည်တွင်းလက်နက်ကိုင်ပဋိပက္ခများ၊ နိုင်ငံရေးမတည်ငြိမ်မှုများ၊ တိုင်းပြည်ပြိုကွဲမည့်အခြေအနေများ၊ သဘာဝဘေးအန္တရာယ်များ စသည့် နိုင်ငံတော်နှင့်ပြည်သူကို ထိခိုက်မည့်အခြေအနေများမှ ကာကွယ်စောင့်ရှောက်ပေးပြီး နိုင်ငံတော်ကို ပြန်လည်တည့်မတ်တည်ဆောက်ပေးခဲ့သည်။ တည်ငြိမ်အေးချမ်းရေးနှင့်တရားဥပဒေစိုးမိုးရေးကို ထိန်းသိမ်းရမည်မှာ မြန်မာနိုင်ငံရဲတပ်ဖွဲ့၏ တာဝန်ဖြစ်သော်လည်း၊ နိုင်ငံတော်ဖွံ့ဖြိုးတိုးတက်ရေးနှင့် တည်ဆောက်ရေးကို ဆောင်ရွက်ရမည်မှာ အစိုးရ၏တာဝန်ဖြစ်သော်လည်း နိုင်ငံ၏လိုအပ်ချက်အရ တပ်မတော်အနေဖြင့် ပါဝင်ဆောင်ရွက်နေရခြင်းဖြစ်သည်။

လက်ရှိကာလတွင် တိုင်းပြည်အခြေအနေ သိသာတိုးတက်ကောင်းမွန်လာသည့်အလျောက် ပါတီစုံဒီမိုကရေစီအထွေထွေရွေးကောက်ပွဲလုပ်ငန်းစဉ်များကို စဉ်ဆက်မပြတ်ဆောင်ရွက်ခဲ့သည်။ ၂၀၂၅ ခုနှစ် ဒီဇင်ဘာလ ၂၈ ရက်နေ့တွင် ရွေးကောက်ပွဲကိုစတင်ကျင်းပပြီး အပိုင်းသုံးပိုင်းခွဲကာပြုလုပ်ခဲ့သည်။ ရွေးကောက်ပွဲပြုလုပ်ရာတွင် တရားမျှတသည့်ရွေးကောက်ပွဲ၊ သိက္ခာရှိသည့် ရွေးကောက်ပွဲဖြစ်စေရေးအတွက် ကြိုတင်ပြင်ဆင်ဆောင်ရွက်ခဲ့သည်။ ရွေးကောက်ပွဲတွင် မဲစာရင်းများမှန်ကန်ရေး၊ ဆန္ဒမဲပေးရာတွင် မဲမသမာမှုများမရှိစေရေး၊ အဆင်ပြေချောမွေ့ရေး စသည့် အဘက်ဘက်မှလိုအပ်သည်များကို ဖြည့်ဆည်းဆောင်ရွက်ပေးခဲ့သဖြင့် ရွေးကောက်ပွဲတွင် ပြည်သူများ အဆင်ပြေချောမွေ့ပြီး တက်တက်ကြွကြွပါဝင်မဲပေးခဲ့ကြသည်။

မကြာမီကာလတွင် လွှတ်တော်အခင်းအကျင်းများ စတင်ဆောင်ရွက်ကာ လွှတ်တော်လုပ်ငန်းစဉ်များနှင့်အညီ အစိုးရသစ်ပေါ်ထွန်းပြီး ဒီမိုကရေစီနိုင်ငံသစ်ကို တည်ဆောက်တော့မည်ဖြစ်သည်။ တပ်မတော်အနေဖြင့် အစိုးရများ မည်သို့ပင်ပြောင်းလဲပေါ်ထွန်းလာသည်ဖြစ်စေ ပြည်ထောင်စုမပြိုကွဲရေး၊ တိုင်းရင်းသား စည်းလုံးညီညွတ်မှုမပြိုကွဲရေး၊ အချုပ်အခြာအာဏာတည်တံ့ခိုင်မြဲရေးအတွက် နိုင်ငံတော်လုံခြုံရေးနှင့် ကာကွယ်ရေးတာဝန်များကို သမိုင်းအစဉ်အလာမပျက် ဆက်လက်ကျေပွန်စွာထမ်းဆောင်နေမည်ဖြစ်သည်။

နိုင်ငံအတွင်း ထာဝရငြိမ်းချမ်းရေးရရှိရေးအတွက် တပ်မတော်အနေဖြင့် ငြိမ်းချမ်းရေးဖိတ်ခေါ်မှုများကို ဆက်လက်လုပ်ဆောင်သွားမည်ဖြစ်သည်။ ဒေသတည်ငြိမ်အေးချမ်းရေးကို ပျက်စီးအောင်ပြုလုပ်နေသည့် အကြမ်းဖက်အဖျက်သမားများ ချုပ်ငြိမ်းရေးအတွက် တပ်မတော်၊ နိုင်ငံတော်အစိုးရနှင့်အတူ အားလုံးဝိုင်းဝန်းဆန့်ကျင်ဆောင်ရွက်ကြရမည်ဖြစ်သည်။ နိုင်ငံရေးအရ သဘောထားကွဲလွဲမှုများကို နိုင်ငံရေးအရ ဖြေရှင်းရမည်ဖြစ်သော်လည်း အကြမ်းဖက်လုပ်ရပ်လုပ်ကိုင်နေမှုများကို ရပ်တန့်အောင် ပြုလုပ်ကြရမည်ဖြစ်သည်။ လက်နက်အားကိုးဖြင့် ဒေသခံပြည်သူများအား အတိဒုက္ခရောက်အောင်၊ ကိုယ်ကျိုးစီးပွားဖြစ်ထွန်းအောင် လုပ်ဆောင်နေမှုများကြောင့် ပြည်သူများ ဝန်ထုပ်ဝန်ပိုးဖြစ်နေသဖြင့် သက်ဆိုင်ရာအဖွဲ့အစည်းများနှင့် ပူးပေါင်း၍ ဝိုင်းဝန်းတိုက်ဖျက်သွားကြရမည်ဖြစ်သည်။

သို့ဖြစ်ရာ တပ်မတော်အနေဖြင့် ပြည်သူများလိုလားသည့် ပါတီစုံဒီမိုကရေစီအထွေထွေရွေးကောက်ပွဲကို ကျင်းပပေးခဲ့ပြီး ဒီမိုကရေစီလမ်းကြောင်းသစ်ကို ဖော်ဆောင်ပေးခဲ့ပြီးနောက် နိုင်ငံတော်ကာကွယ်ရေး၊ စစ်မှန်စည်းကမ်းပြည့်ဝသည့် ပါတီစုံဒီမိုကရေစီစနစ်ခိုင်မာစေရေး၊ ဒီမိုကရေစီနှင့်ဖက်ဒရယ်စနစ်ကို အခြေခံသည့် ပြည်ထောင်စုတည်ဆောက်ရေးနှင့် ဒီမိုကရေစီနိုင်ငံသစ်ကို အစိုးရနှင့်ပြည်သူ အတူလက်တွဲပြီး ပူးပေါင်းဆောင်ရွက်သွားမည်ဖြစ်ပါကြောင်း။ ။

moi

လူသားတို့ရှင်သန်နေထိုင်ရာ ကမ္ဘာကြီး၏ မျက်နှာပြင် ၇၀ ရာခိုင်နှုန်းကို ရေထုကြီးနှင့် ဖုံးလွှမ်းထားခြင်းဖြစ်ရာ နေစကြ၀ဠာအတွင်းရှိ မိမိတို့၏ ကမ္ဘာကိုရေကမ္ဘာဟုပင်ဆိုနိုင်သည်။ သို့ရာတွင် အဆိုပါ ရေအားလုံး၏ ၃ ရာခိုင်နှုန်းသာလျှင် သောက်သုံးနိုင်ခြင်းဖြစ်ရာ သန့်ရှင်းသောသောက်သုံးရေသည် သုံးဖြုန်း၍မကုန်နိုင်သော အရင်းအမြစ်မဟုတ်ဘဲ အကန့်အသတ်နှင့်သာ ရှိနေခြင်းဖြစ်သည်ဟု နားလည်ထားကြရမည်ဖြစ်သည်။ ရေသည် လူနှင့် သက်ရှိသတ္တဝါများ အားလုံးအတွက်မရှိလျှင်မဖြစ်သော လွန်စွာအဖိုးတန်သည့် အရင်းအမြစ်ဖြစ်သည့်အလျောက် မိမိတို့အားလုံးရေအရင်းအမြစ်များ မပျက်စီးအောင် ထိန်းသိမ်းရေးနှင့် ရေကိုချွေတာသုံးစွဲရေးအတွက် သတိမြဲမြံစွာရှိကြရမည်ဖြစ်သည်။

မိမိတို့နိုင်ငံသည် သဘာဝမြစ်ချောင်းအင်းအိုင်များ ပေါများခြင်းကြောင့် ရေသယံဇာတကြွယ်ဝသည့် နိုင်ငံဖြစ်သည်။ ဧရာဝတီ၊ ချင်းတွင်း၊ စစ်တောင်း၊ သံလွင်ဟူသော အဓိကမြစ်ကြီး လေးသွယ်အပါအဝင် မြစ်ချောင်းများတွင် နှစ်စဉ်ရေချိုဧကပေသန်း ၈၀၀ ကျော် စီးဆင်းနေသည့်အနက် ၎င်းပမာဏ၏ ၅ ရာခိုင်နှုန်းခန့်ကိုသာ စိုက်ပျိုးရေ၊ အိမ်သုံးရေနှင့် စက်မှုသုံးရေအဖြစ် သုံးစွဲနေကြခြင်းဖြစ်သည်။ ရေကောင်းရေသန့်ရရှိနိုင်မှုပမာဏတွင် အာဆီယံနိုင်ငံများအနက် အင်ဒိုနီးရှားနိုင်ငံပြီးလျှင် မြန်မာနိုင်ငံက ဒုတိယအများဆုံးဖြစ်ပြီး အာရှအဆင့်တွင်မူ တရုတ်၊ အိန္ဒိယ၊ အင်ဒိုနီးရှား၊ ဘင်္ဂလားဒေ့ရှ်ပြီးလျှင် ပဉ္စမအဆင့်၌ရှိနေသည်ဟု သိရသည်။ နိုင်ငံ၏ အဓိကစီးပွားရေးသည် စိုက်ပျိုးရေးဖြစ်ရာ စိုက်ပျိုးရန်နှင့် သောက်သုံးရန်မရှိမဖြစ်သော ရေချိုအရင်းအမြစ်များကို စနစ်တကျစီမံခန့်ခွဲရန်၊ စဉ်ဆက်မပြတ်ဖွံ့ဖြိုးနေစေရန်၊ ရေဝေရေလဲဒေသ သစ်တောများထိန်းသိမ်းရန်၊ ရေထုညစ်ညမ်းမှုမရှိစေရန်တို့အတွက် ထိရောက်စွာဆောင်ရွက်သွားရန်လိုသည်။

မျက်မှောက်ကာလ ကမ္ဘာကြီးတွင် ရာသီဥတုပြောင်းလဲမှုသည် သိသာထင်ရှားစွာ ဖြစ်ပေါ်လာလျက်ရှိပြီး အစွန်းရောက် မိုးလေဝသဖြစ်စဉ်များ၊ သဘာဝဘေးအန္တရာယ်များနှင့် လူသားတို့ပိုမိုရင်ဆိုင်နေကြရသည်။ ကမ္ဘာတစ်ဝန်း မိုးသည်းထန်စွာရွာသွန်းခြင်းကြောင့် ရေကြီးရေလျှံမှုများကို ကြုံတွေ့ကြရသလို အပူချိန်လွန်ကဲမှုနှင့် မိုးခေါင်မှုတို့ကြောင့် ရေရှားပါးခြင်းနှင့်လည်း ကြုံတွေ့ကြရသည်။ ကမ္ဘာ့ကျန်းမာရေးအဖွဲ့၏ အဆိုအရ နှစ်စဉ် လူပေါင်း ၁ ဒသမ ၄ သန်းသည် မသန့်ရှင်းသောရေကြောင့် ဖြစ်ပေါ်သည့် ရောဂါများနှင့် မိလ္လာမသန့်ရှင်းမှုများကြောင့် သေဆုံးနေကြရပြီး လူဦးရေ ၇၄ သန်းမှာ တဖြည်းဖြည်းသက်တမ်းတိုလာကြောင်း၊ ကမ္ဘာ့နေရာအနှံ့အပြားရှိ လူဦးရေသန်း ၂၀၀၀ ခန့်သည် လုံခြုံဘေးကင်းသည့် သောက်သုံးရေကိုမရရှိသေးကြောင်း၊ ကမ္ဘာ့လူဦးရေ၏ ထက်ဝက်နီးပါးခန့်မှာ သန့်ရှင်းသည့် မိလ္လာစနစ်မရှိသေးကြောင်း သိရသည်။ သို့ဖြစ်ရာ လူတို့၏ သက်ရှည်ကျန်းမာရေးအတွက် သောက်သုံးရေးနှင့် သန့်ရှင်းရေးတွင် အရေးပါသည့်ရေကို အလေအလွင့်မဖြစ်စေဘဲ သုံးစွဲကြရမည်ဖြစ်သည်။

ဂရုပြုရမည့်အချက်မှာ ကမ္ဘာ့ရာသီဥတုပြောင်းလဲလာမှုနှင့် လူတို့၏ပယောဂတို့ကြောင့် အဖိုးတန်သည့် ရေချိုအရင်းအမြစ်များ ပျက်စီးပျောက်ဆုံးပြီး လျော့နည်းလာနေခြင်းဖြစ်သည်။ ရေအရင်းအမြစ်များ လျော့နည်းလာခြင်းသည် လူသားများနှင့် သက်ရှိသတ္တဝါအားလုံးအတွက် အသက်ရှင်သန်နိုင်ရေးနှင့် ကျန်းမာရေးတို့ကို ထိခိုက်စေသည့်အပြင် စားဝတ်နေရေးနှင့် စိုက်ပျိုးရေး၊ မွေးမြူရေးလုပ်ငန်းများ၊ လူမှုစီးပွားဘဝများကို ဆိုးကျိုးသက်ရောက်စေမည်ဖြစ်သည်။ ရေအရင်းအမြစ်များ ပျက်စီးပျောက်ဆုံးလာခြင်းသည် သဘာဝပတ်ဝန်းကျင်ပျက်စီးဆုံးရှုံးမှုနှင့် ရာသီဥတုပြောင်းလဲမှုတို့ကိုအခြေခံ၍ ဖြစ်ပေါ်ခြင်းဖြစ်ရာ သစ်ပင်သစ်တောများ ထိန်းသိမ်းရေး၊ သဘာဝပတ်ဝန်းကျင်မပျက်စီးအောင် ကာကွယ်စောင့်ရှောက်ရေးတို့ကို ရေရှည်ဆောင်ရွက်သွားကြရန်လိုသည်။

ယခုအခါ ခြောက်သွေ့သည့်ကာလသို့ ရောက်ရှိလာပြီဖြစ်ပြီး မကြာမီပူပြင်းသည့်နွေကာလကို ဖြတ်သန်းကြရတော့မည်ဖြစ်သည်။ မိမိတို့နိုင်ငံသည် ရေအရင်းအမြစ်ကြွယ်ဝသည်ဟု ဆိုစေကာမူ ဒေသကိုလိုက်၍ ရေရှားပါးသည့်နေရာများရှိနေပြီး ခြောက်သွေ့ရာသီဝင်ရောက်သည်နှင့် ရေအခက်တွေ့ကြရသည်။ သို့ဖြစ်ရာ နိုင်ငံ၏ အဖိုးတန်ရေအရင်းအမြစ်များ မပျက်စီးစေရေးအတွက် သစ်တောများထိန်းသိမ်းရေး၊ မြစ်ချောင်းအင်းအိုင်များ မပျက်စီးစေရန် ကာကွယ်စောင့်ရှောက်ရေး၊ မြစ်ချောင်းများအတွင်း အမှိုက်များမစွန့်ပစ်ရန်နှင့် စွန့်ပစ်ရေဆိုးများ စီးဝင်မှုမရှိစေရန် ကြပ်မတ်ဆောင်ရွက်ရေး၊ မြေအောက်ရေများ အလွန်အကျွံထုတ်ယူမှုမရှိစေရန်နှင့် မြေအောက်ရေ ပြန်လည်ဖြည့်တင်းရန် အစီအမံများ ဆောင်ရွက်ရေးတို့ကို ပြုလုပ်ကြရမည့်အပြင် လူတစ်ဦးချင်းအနေဖြင့်လည်း မိမိတို့နေ့စဉ်သုံးစွဲနေကြသည့် ရေကို အကျိုးရှိထိရောက်စွာ သုံးစွဲခြင်းမှတစ်ပါး အဟောသိကံ၊ အလဟဿမဖြုန်းတီးကြရန် နှိုးဆော်တိုက်တွန်းအပ်ပါကြောင်း။ ။

moi

မူးယစ်ဆေးပြဿနာသည် ရှေးကတည်းကပင်ရှိခဲ့ပြီး ခေတ်ကာလပြောင်းလဲသည်နှင့်အမျှ မူးယစ်ဆေးတို့ကလည်း ပုံသဏ္ဌာန်အမျိုးမျိုး လိုက်ပါပြောင်းလဲလာသည်။ မည်သို့ပင် ပြောင်းလဲ သည်ဖြစ်စေကာမူ မူးယစ်ဆေးဝါးသုံးစွဲမှုကြောင့် ဖြစ်ပေါ်လာသည့် လူမှုရေး၊ စီးပွားရေး၊ ကျန်းမာရေးနှင့် ကိုယ်ကျင့်သိက္ခာအရ ထိခိုက်ဆုံးရှုံးမှုများအပြင် အလွန်အကျွံသုံးစွဲမိခြင်းနှင့် အခြားသော အကြောင်းအမျိုးမျိုးတို့ကြောင့် ရုတ်တရက်သေဆုံးမှုမျိုးအထိ အန္တရာယ်ရှိခြင်းတို့မှာမူ ခေတ်တိုင်းတွင် အတူတူသာလျှင်ဖြစ်သည်။

မျက်မှောက်ကာလတွင် လူငယ်လူရွယ်များအတွင်း ခေတ်ရေစီးကြောင်းအရ အပြောင်းအလဲများကို လက်ခံကျင့်သုံး လာကြသည်။ ပါတီများ၊ ဘားများ၊ နေ့/ညကလပ်များ၊ ကေတီဗွီများ၊ အုပ်စုလိုက်ချိန်းဆိုတွေ့ဆုံပွဲများ စသည်ဖြင့် မိန်းကလေးရော ယောက်ျားလေးပါ စိတ်ပျော်ရွှင်ရာ ရှာဖွေကြခြင်းဖြစ်သည်။ ယင်းနှင့်အတူအများအားဖြင့် တွဲလျက်ပါရှိတတ်သည်မှာ မူးယစ်သောက်စားမှုဖြစ်ပြီး သာမန်အားဖြင့် အရက်အပြင်း၊ အပျော့တို့မျှသာမက အီး၊ ကေ၊ ဟက်ပီးဝါးတား စသည့် ပုံပြောင်းမူးယစ်ဆေးဝါးများပါ သုံးစွဲကြခြင်းဖြစ်သည်။ ဆူညံမြူးကြွသည့် တေးသီချင်းများနှင့်အတူ နေ့လုံးပေါက်၊ ညလုံးပေါက် မနားတမ်းကခုန်မြူးထူးနိုင်ရန် ၎င်းမူးယစ်ဆေးများက အထောက်အကူပေးသည်။ မိတ်ဆွေအပေါင်းအသင်းများ၊ သူငယ်ချင်းများတွေ့ဆုံကြချိန်တွင် အတုမြင်အတတ်သင်ဆိုသလို စမ်းသပ်သုံးစွဲခြင်း၊ ဆွဲဆောင်စည်းရုံးမှုကြောင့် သုံးစွဲခြင်းတို့မှအစပြုကာ တစ်စတစ်စနှင့် စွဲလမ်းသည့်ဘဝသို့ ရောက်သွားကြခြင်းဖြစ်သည်။

အီး ခေါ် Ecstasy သည် စိတ်ကြွဆေးတစ်မျိုးဖြစ်ပြီး အချို့သော စိတ်ရောဂါများကုသခြင်း၊ စိတ်ပိုင်းဆိုင်ရာစစ်ဆေးခြင်းတို့၌ အသုံးပြုသည်။ ပါကင်ဆန်ရောဂါနှင့် အဆစ်အမျက်နာကျင်မှုတို့ကို သက်သာစေနိုင်သည်။ သို့ရာတွင် Ecstasy ကို လိုအပ်သည့် ပမာဏထက်ပိုမိုသုံးစွဲပါက နှလုံး၊ ကျောက်ကပ်၊ အသည်း၊ ဦးနှောက်တို့ကို ထိခိုက်စေနိုင်ပြီး အခန့်မသင့်ပါက သေဆုံးစေနိုင်သည်။ ဆေးဝါးအဖြစ်အသုံးပြုသည့် အီးကို အလွန်အကျွံသုံးစွဲပြီး အလွဲသုံးစားပြုလုပ်ခြင်းမှာ အန္တရာယ်မကင်းသည့် အပြုအမူဖြစ်သည်။

ကေ ခေါ် Ketamine မှာ ဆေးကုသမှုအချို့တွင် မေ့ဆေးအဖြစ်လည်းကောင်း၊ တိရစ္ဆာန်ဆေးကုရာတွင် အသုံးပြုခြင်း ဖြစ်သော်လည်း မူးယစ်ဆေးဝါးအဖြစ် တလွဲအသုံးပြုသည့်အခါ အန္တရာယ်ရှိလာသည်။ ကေကိုအသုံးပြုခြင်းကြောင့် မျောလွင့်နေသည့် ခံစားမှုမျိုးကို စွဲလမ်းမိပြီး ပမာဏများစွာသုံးစွဲပါက အသက်ရှူနှေးခြင်း၊ ကြွက်သားများအားနည်းခြင်း၊ မူးဝေခြင်း၊ ပျို့အန်ခြင်း၊ အမြင်အာရုံပျက်ယွင်းခြင်း၊ အာရုံရှုပ်ထွေးမှုများဖြစ်ပေါ်ခြင်း စသည်တို့ဖြစ်စေနိုင်ပြီး အခြားမူးယစ်ဆေးများနှင့် တွဲ၍သုံးစွဲမိပါက ပို၍အန္တရာယ်ကြီးမားစေသည်ဟု သိရသည်။

Happy water မှာ အက်စ်တာစီ၊ ကတ်တမင်း၊ မက်သာ ဖက်တမင်း၊ ထရာမဒေါလ်၊ ဒိုင်ယာဇီပင်၊ ကဖင်းစသည်တို့ ရောနှောပေါင်းစပ်ထားပြီး အရောင်မရှိ၊ အနံ့မရှိသောအရည် သို့မဟုတ် အမှုန့်ပုံစံဖြင့် ထုတ်လုပ်ရောင်းချသည်။ မူးယစ်ဆေးပေါင်းစုံကို ပေါင်းစပ်ထားခြင်းဖြစ်ရာ အာနိသင်ပေါင်းစုံ ပါဝင်နေပြီး ဆေးသုံးစွဲထားချိန်တွင် ပင်ပန်းမှုမသိ၊ နာကျင်ကိုက်ခဲမှုမသိဘဲ အချိန်ကြာမြင့်စွာ ကနိုင်ခုန်နိုင်ကြသည်။ ဆေးကို အချိန်ကြာမြင့်စွာနှင့် ပမာဏများစွာသုံးစွဲပါက ထင်ယောင်ထင်မှား အကြားအမြင်များ ဖြစ်လာခြင်း၊ အိပ်မပျော်ခြင်း၊ ထိမှုနာကျင်မှုတို့ကို မခံစားရခြင်း၊ မိမိဖြစ်ခဲ့သမျှတို့ကို မမှတ်မိခြင်းတို့ ဖြစ်နိုင်သည့်အတွက် အမျိုးသမီးများ၏ အရှက်နှင့်သိက္ခာအတွက် အန္တရာယ်ကြီးသည့် မူးယစ်ဆေးဖြစ်သည်။

ပုံစံသစ်နှင့် အသွင်ပြောင်းလာသည့် မူးယစ်ဆေးများမှာ လူငယ်လူရွယ်များ၊ အချို့လူကြီးများသာမက အသက်ငယ်ရွယ်သေးသည့် ကျောင်းသား ကျောင်းသူကလေးများ၏ အနီးဝန်းကျင် သို့ပင် ရောက်ရှိနေတတ်သည်။ ပြောင်းလဲလာနေသည့် ခေတ်ရေစီးကြောင်းနှင့်အတူ လိုက်ပါစီးမျောပျော်ရွှင်မှု ရှာဖွေကြရာတွင် အပျော်မှသည် ပျက်စီးဆုံးရှုံးမှု၊ ထိခိုက်နစ်နာမှုသို့ ရောက်ရှိမသွားစေရန် ထိန်းကျောင်းကြဖို့လိုသည်။ အထူးသဖြင့် စိတ်ပြောင်းမူးယစ်ဆေးများမှာ တရားမဝင် မှောင်ခိုဆေးဝါး များဖြစ်သည့်အလျောက် ၎င်းတို့တွင် မည်သည့်အဆိပ်အတောက်များ၊ မည်သို့ပြင်းထန်သည့် ဓာတုဒြပ်ပေါင်းများ မည်မျှပါဝင်နေမည်ကို မည်သူမျှမသိနိုင်ကြရာ လွန်စွာအန္တရာယ်ကြီးသည်။ မူးယစ်ဆေးသုံးစွဲမှု သဘာဝအရ စိတ်ရောကိုယ်ပါ စွဲလမ်းလာသည့်အခါတွင် ဖြတ်တောက်နိုင်ရန် ခက်ခဲလှပြီး မိမိတို့၏ လူမှု စီးပွားဘဝများကို ပျက်စီးစေနိုင်သည်။ ထို့အပြင် မူးယစ်ဆေးဝါး လက်ဝယ်တွေ့ရှိခြင်း သို့မဟုတ် သုံးစွဲခြင်းတို့မှာ ဥပဒေကြောင်း အရလည်း ပြစ်ဒဏ်များ ကျခံရနိုင်သည်။ သို့ဖြစ်ရာ ပုံစံသစ်နှင့် အသွင်ပြောင်းလာသည့် မူးယစ်ဆေးများအန္တရာယ်မှ ရှောင်ရှားနိုင်ရေး၊ မိမိပတ်ဝန်းကျင်နှင့် မိမိမိသားစုဝင်များ လမ်းမှားသို့ မရောက်ရှိရေး သတိထားနိုင်ကြစေရန် အကျိုးမျှော်၍ နှိုးဆော်လိုက်ရပါကြောင်း။ ။

moi

မြန်မာနိုင်ငံသည် တိုင်းရင်းသားလူမျိုးတစ်ရာကျော် စုစည်းနေထိုင်ကြသည့် ပြည်ထောင်စုနိုင်ငံဖြစ်သည်။ ကချင်၊ ကယား၊ ကရင်၊ ချင်း၊ ဗမာ၊ မွန်၊ ရခိုင်၊ ရှမ်းအနွယ်ဖွား တိုင်းရင်းသားလူမျိုးများသည် ပထဝီအနေအထားအရ မတူကွဲပြား နေထိုင်ကြသော်လည်း တစ်မြေတည်းနေ၊ တစ်ရေတည်းသောက်၍ အတူကြီးပြင်း လာခဲ့ကြသည့် မိသားစုဝင်များဖြစ်သည်။ အနေဝေးသော်လည်း သွေးမဝေးစေဘဲ ချစ်ချစ်ခင်ခင် ရင်းရင်းနှီးနှီး အတူရှင်သန်ဖွံ့ဖြိုးစေနိုင်ရန်အတွက်လည်း နိုင်ငံတော်က ပေါင်းစည်းဆက်နွှယ်ပေးလျက်ရှိသည်။

တိုင်းရင်းသားလူမျိုးအချင်းချင်း ရင်းနှီးဆက်ဆံ အတူရှင်သန်ဖွံ့ဖြိုးတိုးတက်လာစေရန်အတွက် လမ်းပန်းဆက်သွယ်ရေးသည် အရေးအကြီးဆုံး အခြေခံအကျဆုံးအချက်ဖြစ်သည်။ လမ်းပန်းဆက်သွယ်ရေးကောင်းမွန်မှသာ ပညာရေး၊ ကျန်းမာရေး၊ ဒေသဖွံ့ဖြိုးရေးနှင့် လူမှုစီးပွားရေးကဏ္ဍအားလုံး နောက်ကျမကျန်ရစ်ဘဲ တစ်ပြေးညီ ဖွံ့ဖြိုးတိုးတက်လာအောင် ဆောင်ရွက်ပေးနိုင်မည်ဖြစ်သည်။ ထို့ကြောင့် ခေတ်အဆက်ဆက်နိုင်ငံတော်ကို တာဝန်ယူခဲ့ကြသည့် အစိုးရများက မြို့ပြ၊ ကျေးလက်၊ တောင်တန်း၊ မြေပြန့်မကျန်အောင်လမ်း၊ တံတားများကို တစ်နိုင်ငံလုံးဖြန့်ကြက်၍ ကွန်ရက်သဖွယ် တည်ဆောက်ပေးလျက်ရှိသည်။

မြန်မာနိုင်ငံ၏ အနောက်မြောက်ဘက် စစ်ကိုင်းတိုင်းဒေသကြီး ဟုမ္မလင်းမြို့နယ် ထမံသီကျေးရွာအနီးတွင် ဖေဖော်ဝါရီလ ၁၆ ရက်နေ့က ချင်းတွင်းမြစ်ကူး တံတား(ထမံသီ) တည်ဆောက်ဖွင့်လှစ်ပေးလိုက်သည်ကို တွေ့ရသည်။ အဆိုပါတံတားကြီးကို ပြည်ထောင်စုသမ္မတမြန်မာနိုင်ငံတော် ယာယီသမ္မတ နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင် တက်ရောက်ချီးမြှင့်ဖွင့်လှစ်ပေးခဲ့သည်။ တံတားကြီးသည် အရှည် ၂၆၂၈ ပေရှိပြီး ဟုမ္မလင်းခရိုင်နှင့် နာဂကိုယ်ပိုင်အုပ်ချုပ်ခွင့်ရဒေသတို့ရှိ ပြည်သူများ၏ လူမှုစီးပွားဘဝနှင့် ဒေသဖွံ့ဖြိုးတိုးတက်ရေး၊ ဒေသထွက်ကုန်များ လွယ်ကူလျင်မြန်စွာ ပို့ဆောင်ပေးနိုင်ရေးနှင့် ပညာရေး၊ ကျန်းမာရေး၊ စီးပွားရေးဖွံ့ဖြိုးရေးကို များစွာ အထောက်အကူဖြစ်လာမည်ဖြစ်သည်။

ပြည်ထောင်စုသားများဖြင့် ဖွဲ့စည်းတည်ထောင်ထားသည့် တပ်မတော်အနေဖြင့် ပြည်ထောင်စုကြီး ရေရှည်တည်တံ့ခိုင်မြဲရေးနှင့် ဖွံ့ဖြိုးတိုးတက်ရေးအတွက် နိုင်ငံတော်၏ လိုအပ်ချက်မှန်သမျှကို ဖြည့်ဆည်းဆောင်ရွက်ပေးလျက် ရှိသည်။ မြန်မာနိုင်ငံ၏ အနောက်မြောက်ဘက်တွင် နာဂဒေသသည်သွားလာရန် ခက်ခဲသဖြင့် လမ်းပန်းဆက်သွယ်ရေးကောင်းမွန်စေရန် ဆောင်ရွက်ပေးလျက်ရှိသည်။ ပြည်မနှင့် ဆက်သွယ်နိုင်သည့် လမ်းများ၊ တံတားများကောင်းမွန်မှသာ တိုင်းရင်းသားဒေသများ ဖွံ့ဖြိုးတိုးတက်လာမည်ဖြစ်သည်။

နိုင်ငံတော်ယာယီသမ္မတ လေရှီးမြို့ရှိ ဌာနဆိုင်ရာ တာဝန်ရှိသူများ၊ မြို့မိမြို့ဖ များနှင့် ဒေသခံတိုင်းရင်းသားပြည်သူများနှင့် တွေ့ဆုံစဉ် “မိမိတို့ဒေသ ဖွံ့ဖြိုး တိုးတက်ရေးအတွက် ဒေသတွင်နေထိုင်သူများက အမှန်တကယ်ဆောင်ရွက် သွားကြရန်လိုကြောင်း၊ မိမိတို့ဒေသ တည်ငြိမ်အေးချမ်းရေးနှင့် လူမှုစီးပွားဘဝများ ဖွံ့ဖြိုးတိုးတက်ရေးအတွက် ဆောင်ရွက်သွားကြရန်နှင့် ဒီမြေမှာမွေး၊ ဒီရေကို သောက်ကြသူများဖြစ်သဖြင့် ဒေသအကျိုးနှင့် နိုင်ငံတော်အကျိုးအတွက်အားလုံးက ဝိုင်းဝန်းဆောင်ရွက်သွားကြစေလိုကြောင်း၊ ဒီမိုကရေစီလမ်းကြောင်းကို လျှောက်လှမ်းရာတွင် ပြည်ထောင်စုစိတ်ဓာတ်ဖြင့် အားလုံးက တစုတစည်းတည်း လျှောက်လှမ်းရန်လိုအပ်သဖြင့် ပြည်ထောင်စုစိတ်ဓာတ်မွေးမြူ၍ နိုင်ငံတော်အတွက် အကောင်းဆုံးဖြစ်အောင် ဆောင်ရွက်သွားကြရန်” တိုက်တွန်းပြောကြားခဲ့သည်။

စစ်ကိုင်းတိုင်းဒေသကြီး ဟုမ္မလင်းခရိုင် လေရှီးမြို့နယ်နှင့် လဟယ်မြို့နယ် အပါအဝင် နာဂကိုယ်ပိုင်အုပ်ချုပ်ခွင့်ရဒေသသည် မြန်မာနိုင်ငံအနောက်မြောက်ပိုင်း အစွန်အဖျားဒေသဖြစ်ပြီး လမ်းပန်းဆက်သွယ်ရေးခက်ခဲသော ဒေသဖြစ်သည်။ ဝေးလံခေါင်ဖျားသည့် ဒေသဖြစ်သော်လည်း ဒေသတည်ငြိမ်အေးချမ်းပြီး မိမိတို့ဒေသကို မိမိတို့ ကိုယ်တိုင်ထိန်းသိမ်းစောင့်ရှောက်လျက်ရှိသည်။ နိုင်ငံတော်အနေဖြင့် အဆိုပါဒေသ ဖွံ့ဖြိုးတိုးတက်ရေးအတွက် အဓိကကျသည့် ချင်းတွင်းမြစ်ကူး တံတား(ထမံသီ)ကို တည်ဆောက်ဖွင့်လှစ်ပေးခဲ့သည်။ လမ်းပန်းဆက်သွယ်ရေး ကောင်းမွန်လာပြီဖြစ်သောကြောင့် ဒေသအတွင်း၌ ပညာရေး၊ ကျန်းမာရေး၊ စီးပွားရေးကဏ္ဍများ ဖွံ့ဖြိုးတိုးတက်လာအောင် ဆောင်ရွက်ပေးနိုင်မည်ဖြစ်၍ ဒေသခံတိုင်းရင်းသားပြည်သူများ လူမှုစီးပွားဘဝများ မြင့်မားတိုးတက်လာပြီး အေးချမ်းသာယာဝပြောစွာ နေထိုင်နိုင်ကြမည်ဖြစ်သည်။

သို့ဖြစ်ရာ မိမိဒေသကို မိမိတို့ကိုယ်တိုင် ထိန်းသိမ်းစောင့်ရှောက်နိုင်ခြင်းသည် အရေးပါသောအချက်ဖြစ်သလို နိုင်ငံတော်ကလည်း ဒေသဖွံ့ဖြိုးတိုးတက်ရေးအတွက် ဖြည့်ဆည်းပေးနိုင်ခြင်းဖြင့် ဒေသအေးချမ်းသာယာဝပြောရေးနှင့် ဖွံ့ဖြိုးတိုးတက်ရေးကို များစွာအထောက်အကူပြုမည်ဖြစ်ရာ တိုင်းရင်းသားပြည်သူအားလုံး ပြည်ထောင်စုစိတ်ဓာတ်ဖြင့် တစုတစည်းတည်း ဝိုင်းဝန်းလက်တွဲ၍ ဒေသအကျိုး၊ နိုင်ငံတော်အကျိုးအတွက် ပါဝင်ဆောင်ရွက်ကြပါရန် တိုက်တွန်းအပ်ပါကြောင်း။ ။

moi