တင်းမာမှုများကြားမှ အီရန်နှင့် အမေရိကန် ဆွေးနွေးပွဲအလားအလာနှင့် ဒေသတွင်းစစ်ရေးအခြေအနေ

လက်ရှိတွင် အီရန်နိုင်ငံနှင့်အမေရိကန်နိုင်ငံတို့အကြား စစ်ရေးအရတင်းမာမှုများ အထူးမြင့်တက်နေသော်လည်း နှစ်ဦးနှစ်ဖက် ဆွေးနွေးမှုများအတွက် တိုးတက်မှုအချို့ ရှိနေကြောင်း အီရန် အမျိုးသားလုံခြုံရေးကောင်စီက ထုတ်ဖော်ပြောကြားလိုက်သည်။ အမေရိကန်သမ္မတ ထရမ့် က အီရန်အနေဖြင့် စစ်ရေးအရတိုက်ခိုက်ခံရမည့်အစား ၎င်း၏ နျူကလီးယားနှင့် ဒုံးကျည်အစီအစဉ်များအပေါ် သဘောတူညီချက်တစ်ခုရယူရန် ရွေးချယ်လိမ့်မည်ဟု ယုံကြည်နေသော်လည်း အီရန်ဘက်ကမူ ၎င်းတို့၏ ကာကွယ်ရေးစွမ်းရည်နှင့် ဒုံးကျည်ကိစ္စများကို ဆွေးနွေးပွဲတွင် ထည့်သွင်းမည်မဟုတ်ကြောင်း တင်းမာစွာ တုံ့ပြန်ထားသည်။

စစ်ရေးအရကြည့်လျှင် အမေရိကန်သည် USS Abraham Lincoln လေယာဉ်တင်သင်္ဘောအပါအဝင် အင်အားကြီးရေတပ်စုဖွဲ့မှုကို အီရန် ကမ်းလွန်တွင် နေရာချထားပြီး အီရန်တော်လှန်ရေးအစောင့်တပ် (IRGC) ကလည်း ကမ္ဘာ့စွမ်းအင်သယ်ယူပို့ဆောင်ရေးတွင် အချက်အချာကျသော ဟော်မုဇ်ရေလက်ကြား (Strait of Hormuz) ၌ ကျည်စစ်ကျည်မှန်သုံး စစ်ရေးလေ့ကျင့်မှုများ ပြုလုပ်လျက်ရှိသည်။ အီရန်စစ်တပ်အကြီးအကဲက အကယ်၍ အမေရိကန် သို့မဟုတ် အစ္စရေးဘက်က အမှားအယွင်းပြုလုပ်၍ တိုက်ခိုက်လာပါက ဒေသတွင်းရှိ အမေရိကန်စခန်းများနှင့် မဟာမိတ်များကို ဒုံးကျည်များဖြင့် ပြန်လည်ချေမှုန်းမည်ဟု သတိပေးထားသည်။

တစ်ဖက်တွင်လည်း အီရန်ပြည်တွင်း၌ ကုန်ဈေးနှုန်းကြီးမြင့်မှုမှ အစပြုသော အစိုးရဆန့်ကျင်ရေး ဆန္ဒပြပွဲများကြောင့် လူပေါင်းထောင်ချီ သေဆုံးခဲ့ရပြီး၊ အာဏာပိုင်များ၏ အကြမ်းဖက်နှိမ်နင်းမှုများအပေါ် နိုင်ငံတကာက ဝေဖန်မှုများ မြင့်တက်နေသည်။ အီရန်သမ္မတက ပြည်သူ့ဆန္ဒကို နားထောင်ရန် အစိုးရကို တိုက်တွန်းထားသော်လည်း နယ်စပ်မှတစ်ဆင့် ထွက်ပြေးတိမ်းရှောင်နေကြသည့် ပြည်သူများကမူ လက်ရှိဘာသာရေးအုပ်ချုပ်မှုအောက်တွင် လွတ်လပ်ခွင့်ကင်းမဲ့နေမှုကို ရင်ဖွင့်ပြောဆိုနေကြသည်။ ထို့ကြောင့် လက်ရှိအခြေအနေသည် ပြည်တွင်းဆူပူမှု၊ နိုင်ငံတကာဖိအားနှင့် ဒေသတွင်းစစ်မီးတောက်လုနီးပါး ဖြစ်နေသည့် စစ်ရေးတင်းမာမှုများရောယှက်နေသော အကျပ်အတည်းကာလတစ်ခု ဖြစ်နေသည်။

ကိုးကား- Bangkok Post

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ ဝန်ကြီး-၂