အီရန်နှင့် ညှိနှိုင်းနေစဉ်အတွင်း လူသိရှင်ကြား ဝေဖန်မှုများက အစိုးရ၏ လုပ်ဆောင်ချက်များကို ထိခိုက်စေနိုင်ကြောင်း သမ္မတ ထရမ့် သတိပေး

KookieSpace97

News Image

  • အီရန်နှင့် ညှိနှိုင်းနေစဉ်အတွင်း လူသိရှင်ကြား ဝေဖန်မှုများက အစိုးရ၏ လုပ်ဆောင်ချက်များကို ထိခိုက်စေနိုင်ကြောင်း သမ္မတ ထရမ့် သတိပေး

အီရန်နိုင်ငံနှင့် ဖြစ်ပွားနေသော စစ်ရေးပဋိပက္ခအပေါ် လူသိရှင်ကြား ဝေဖန်ကန့်ကွက်မှုများသည် လက်ရှိဆောင်ရွက်နေသည့် ညှိနှိုင်းဆွေးနွေးမှုများကို အဟန့်အတားဖြစ်စေကြောင်း သမ္မတ ဒေါ်နယ်ထရမ့်က ပြောကြားလိုက်သည်။

သမ္မတ ထရမ့်သည် CNBC သတင်းဌာနနှင့် ဖုန်းဖြင့် ဆက်သွယ်မေးမြန်းခန်းတစ်ခုတွင် ဒီမိုကရက်တစ်ပါတီဝင်များ၏ ဝေဖန်မှုများကို ရည်ညွှန်း၍ ယခုကဲ့သို့ ထည့်သွင်းပြောကြားခဲ့ခြင်းဖြစ်သည်။ အထူးသဖြင့် အောက်လွှတ်တော် လူနည်းစုခေါင်းဆောင် ဟာကင်း ဂျက်ဖရီ (Hakeem Jeffries) ၏ ဝေဖန်ချက်များကို အလေးပေး ထောက်ပြခဲ့သည်။

"ကျွန်တော်တို့ ညှိနှိုင်းမှုတွေ အပြင်းအထန် လုပ်ဆောင်နေတဲ့အချိန်မျိုးမှာ အခုလို ဝေဖန်ပြောဆိုတာမျိုးတွေ မလုပ်သင့်ပါဘူး၊ ဒီလိုလုပ်ရပ်တွေက ကျွန်တော်တို့ရဲ့ အားထုတ်မှုတွေကို တစ်စုံတစ်ရာ ထိခိုက်စေပါတယ်" ဟု သမ္မတက ဆိုသည်။ ထို့ပြင် ယင်းသို့ ဝေဖန်မှုများသည် တစ်ဖက်နိုင်ငံအတွက် မျှော်လင့်ချက်ဖြစ်စေနိုင်ပြီး မိမိအနေဖြင့် တစ်ဖက်နိုင်ငံကို ထိုသို့သောမျှော်လင့်ချက်မျိုး မရရှိစေလိုကြောင်းလည်း ၎င်းက ဆက်လက် ပြောကြားခဲ့သည်။

သတင်းရင်းမြစ်များ၏ အဆိုအရ ဒုတိယသမ္မတ ဂျေဒီဗန့်စ် (JD Vance) နှင့် ထိပ်တန်းညှိနှိုင်းရေးမှူးအဖွဲ့သည် အီရန် နိုင်ငံနှင့် ဒုတိယအကျော့ ဆွေးနွေးပွဲများ ပြုလုပ်ရန်အတွက် ဧပြီ ၂၁ ရက်နေ့တွင် ပါကစ္စတန်နိုင်ငံ သို့ သွားရောက်ခဲ့ကြောင်း သိရှိရသည်။ သမ္မတ ထရမ့်၏ မှတ်ချက်သည် အဆိုပါ အရေးကြီးခရီးစဉ်မတိုင်မီ ထွက်ပေါ်လာခြင်းဖြစ်သည်။

ကိုးကား- CNN

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး

MM-News-Category
နိုင်ငံရေးကဏ္ဍသတင်းများ
နိုင်ငံရေး-နိုင်ငံတကာသတင်း

ဆက်စပ်သတင်းများ

အီရန်နိုင်ငံခြားရေးဝန်ကြီး၏ ပါကစ္စတန်ခရီးစဉ်ကြောင့် အမေရိကန်နှင့် ဆွေးနွေးပွဲ ပြန်လည်စတင်နိုင်ဖွယ်ရှိ
အီရန်နိုင်ငံခြားရေးဝန်ကြီး၏ ပါကစ္စတန်ခရီးစဉ်ကြောင့် အမေရိကန်နှင့် ဆွေးနွေးပွဲ ပြန်လည်စတင်နိုင်ဖွယ်ရှိ
     အီရန်နိုင်ငံခြားရေးဝန်ကြီး အဘတ်အာရတ်ချီ၏ ဧပြီ ၂၄ ရက် ပါကစ္စတန်နိုင်ငံ ခရီးစဉ်ကြောင့် ယခုသီတင်းပတ်အစောပိုင်းက ပျက်ပြယ်သွားသည့် အမေရိကန်နှင့် ငြိမ်းချမ်းရေးဆွေးနွေးပွဲများ ပြန်လည်စတင်နိုင်ဖွယ်ရှိသည့် မျှော်လင့်ချက်များ ထွက်ပေါ်လာနေကြောင်းသိရသည်။ အဆိုပါခရီးစဉ်တွင် အမေရိကန်နှင့် ဆွေးနွေးမှုလုပ်မည့်အကြောင်းကို အီရန်နိုင်ငံပိုင်မီဒီယာများက ထည့်သွင်းဖော်ပြထားခြင်း မရှိသော်လည်း ပါကစ္စတန်အစိုးရ သတင်းရင်းမြစ်များကမူ ၎င်းခရီးစဉ်သည် ဆွေးနွေးပွဲများ ပြန်စမည့် အချက်ပြမှုဖြစ်နိုင်ကြောင်း ပြောဆိုလျက်ရှိသည်။အလားအလာရှိသော ဆွေးနွေးပွဲများအတွက် အမေရိကန်ဘက်မှ လုံခြုံရေးနှင့် ထောက်ပံ့ပို့ဆောင်ရေး အဖွဲ့တစ်ခုသည်လည်း ပါကစ္စတန်သို့ ကြိုတင်ရောက်ရှိနေပြီဖြစ်သည်။ သမ္မတရုံး၏အတည်ပြုချက်ကို စောင့်ဆိုင်းနေရဆဲဖြစ်သော်လည်း အမေရိကန်ကာကွယ်ရေးဝန်ကြီး ပိဟက်ဆက်က အီရန်အနေဖြင့် အမေရိကန်နှင့် ကောင်းမွန်သော သဘောတူညီချက်တစ်ရပ် ရယူနိုင်မည့် အခွင့်အရေးရှိကြောင်း သတင်းစာရှင်းလင်းပွဲတွင် ပြောသည်။အမေရိကန်အစိုးရက အီရန်နှင့်အပစ်အခတ်ရပ်စဲရေးကို အချိန်ထပ်မံတိုးမြှင့်ပေးထားပြီး ငြိမ်းချမ်းရေးဆွေးနွေးပွဲ ပြန်စတင်နိုင်မည့်မျှော်လင့်ချက်ကြောင့် ကမ္ဘာ့ရေနံဈေးနှုန်း ပြန်လည်ကျဆင်း လာကြောင်း သိရသည်။       MWD
Sat, 25-Apr-2026
ဥရောပသမဂ္ဂအဖွဲ့က ယူကရိန်းသို့ ချေးငွေ ယူရို ၉၀ ဘီလီယံပေးရန် သဘောတူ
ဥရောပသမဂ္ဂအဖွဲ့က ယူကရိန်းသို့ ချေးငွေ ယူရို ၉၀ ဘီလီယံပေးရန် သဘောတူ
ဥရောပသမဂ္ဂအဖွဲ့သည် ယူကရိန်းနိုင်ငံသို့ ယူရို ၉၀ ဘီလီယံ (ဒေါ်လာ ၁၀၆ ဘီလီယံ) တန်ဖိုးရှိ ချေးငွေများပေးအပ်ရန် သဘောတူညီလိုက်ပြီဖြစ်ကြောင်း ဥရောပကောင်စီဥက္ကဋ္ဌ အန်တိုနီယို ကော့စတာက ဧပြီ ၂၃ ရက်တွင် ပြောကြားခဲ့သည်။ဥရောပသမဂ္ဂအဖွဲ့သည် အဆိုပါချေးငွေများကို ယူကရိန်းသို့ပေးအပ်နိုင်ရန်အတွက် ဟန်ဂေရီနိုင်ငံနှင့် လပေါင်းများစွာ အချေအတင်ဖြစ်ပွားပြီးနောက် ဧပြီ ၂၂ ရက်တွင် အတည်ပြုနိုင်ခဲ့ခြင်းဖြစ်သည်။ဟန်ဂေရီနိုင်ငံတွင် ၁၆ နှစ်ကြာ အုပ်ချုပ်ခဲ့သော ဝန်ကြီးချုပ် ဗစ်တာ အော်ဘန်သည် ၂၀၂၆ ခုနှစ် ဧပြီ ၁၂ ရက် ရွေးကောက်ပွဲတွင် ရှုံးနိမ့်ခဲ့ပြီးနောက် ဝန်ကြီးချုပ်အသစ်အဖြစ် တာဝန်ယူမည့် ပီတာ မေဂျာက တောင်းဆိုထားသည့်အတိုင်း ဆိုဗီယက်ခေတ်အတွင်းက တည်ဆောက်ခဲ့သော ဒရူဇဘာ ရေနံပိုက်လိုင်းမှတစ်ဆင့် ရေနံပြန်လည်ပေးပို့မှုကို ယူကရိန်းနိုင်ငံဘက်က ပြန်လည်စတင်လိုက်ပြီးနောက်တွင် ယခုကဲ့သို့ ချေးငွေအတွက် ဟန်ဂေရီနိုင်ငံက သဘောတူညီလိုက်ခြင်းဖြစ်ကြောင်း သိရသည်။ထို့ပြင် ဥရောပသမဂ္ဂအဖွဲ့သည် ဆလိုဗက်ကီးယားနှင့် ဟန်ဂေရီနိုင်ငံတို့နှင့်အတူ ရုရှားနိုင်ငံအပေါ် အကြိမ် ၂၀ မြောက် ပိတ်ဆို့မှုများ ထပ်မံချမှတ်ရန် စီစဉ်လျက်ရှိသည်။Ref: RTMWD
Fri, 24-Apr-2026
ငြိမ်းချမ်းရေးအတွက်ဖိတ်ခေါ်ချက်နှင့် ဥပဒေဘောင်အတွင်းဝင်ရောက်ရေး တိုက်တွန်းနှိုးဆော်ချက်တို့နှင့် စပ်လျဉ်း၍ ဆက်သွယ်ဆောင်ရွက်နိုင်
ငြိမ်းချမ်းရေးအတွက်ဖိတ်ခေါ်ချက်နှင့် ဥပဒေဘောင်အတွင်းဝင်ရောက်ရေး တိုက်တွန်းနှိုးဆော်ချက်တို့နှင့် စပ်လျဉ်း၍ ဆက်သွယ်ဆောင်ရွက်နိုင်
Fri, 24-Apr-2026
ဟော်မုဇ်ရေလက်ကြား ပြန်လည်ဖွင့်လှစ်နိုင်ရေး လက်တွေ့ကျသော စစ်ရေးရွေးချယ်မှုများ လိုအပ်ကြောင်း ဗြိတိန်နှင့် ပြင်သစ် တိုက်တွန်း
ဟော်မုဇ်ရေလက်ကြား ပြန်လည်ဖွင့်လှစ်နိုင်ရေး လက်တွေ့ကျသောစစ်ရေးရွေးချယ်မှုများ လိုအပ်ကြောင်း ဗြိတိန်နှင့် ပြင်သစ် တိုက်တွန်း
ကမ္ဘာ့စီးပွားရေးအတွက် အရေးပါသော ဟော်မုဇ်ရေလက်ကြားအတွင်း လွတ်လပ်စွာ ရေကြောင်းသွားလာခွင့် သေချာစေရန်အတွက် ‘လက်တွေ့ ကျသော စစ်ရေးဆိုင်ရာ ရွေးချယ်မှုများ’ လိုအပ်နေပြီဖြစ်ကြောင်း ဗြိတိန် နှင့် ပြင်သစ်နိုင်ငံတို့က တရားဝင် ပြောကြားလိုက်သည်။ လန်ဒန်မြို့မြောက်ပိုင်း၊ နော့သ်ဝုဒ်ရှိ ဗြိတိန်ပူးတွဲစစ်ဌာနချုပ်တွင် ကျင်းပလျက်ရှိသည့် နှစ်ရက်ကြာ စစ်ဘက်ဆိုင်ရာ မဟာဗျူဟာရေးဆွဲသူများ၏ ညီလာခံတွင် ဗြိတိန်ကာကွယ်ရေးဝန်ကြီး John Healey နှင့် ပြင်သစ် ကာကွယ်ရေးဝန်ကြီး Catherine Vautrin တို့က ပူးတွဲသဝဏ်လွှာ တစ်ရပ်ပေးပို့၍ အသိပေးခဲ့ခြင်း ဖြစ်သည်။ ၎င်းတို့က နိုင်ငံပေါင်းစုံမှ စစ်ဘက်ကျွမ်းကျင်သူများအနေဖြင့် ခေါင်းဆောင်များအကြား ရရှိထားသည့် သံတမန်ရေးရာသဘောတူညီချက်များကို လက်တွေ့ကျသော စစ်ရေးလုပ်ငန်းစဉ်များအဖြစ်ပြောင်းလဲကာ ပူးပေါင်းဆောင်ရွက်မည့် စီမံကိန်းတစ်ရပ်ကို အမြန်ဆုံး ရေးဆွဲကြရန် တိုက်တွန်းထားသည်။အဆိုပါ ညီလာခံသို့ နိုင်ငံများစွာမှ စစ်ဘက်ဆိုင်ရာ မဟာဗျူဟာရေးဆွဲသူများ တက်ရောက်လျက်ရှိပြီး ရေကြောင်းလမ်းပြန်လည်ဖွင့်လှစ်နိုင်ရေး အတွက် ပွင့်လင်းရိုးသားသော ဆွေးနွေးမှုများနှင့် မဟာမိတ်နိုင်ငံများ၏ ခိုင်မာသော ကတိကဝတ်များရရှိရန် မျှော်လင့်ထားကြသည်။ ဝန်ကြီးနှစ်ဦး၏အဆိုအရ ထိုသို့ စစ်ရေးအရပြင်ဆင်မှုများသည် ကမ္ဘာ့စီးပွားရေးတည်ငြိမ်စေရန်နှင့် ပြည်သူများကို အကာအကွယ်ပေးရန် အတွက် အရေးကြီးသော တိုးတက်မှုများ ဖြစ်လာမည်ဟု ယုံကြည်နေကြသည်။ သို့သော်လည်း ဗြိတိန်ကာကွယ်ရေးဝန်ကြီးဌာနက အဆိုပါ စစ်ရေးစီမံချက်များကို ရေရှည်တည်တံ့သော အပစ်အခတ်ရပ်စဲရေးသဘောတူညီချက်တစ်ရပ်ရရှိပြီးနောက် အခြေအနေပေးသည်နှင့် တစ်ပြိုင်နက်သာ လက်တွေ့အကောင်အထည်ဖော်သွားမည် ဖြစ်ကြောင်း အသိပေး ထုတ်ပြန်ထားသည်။ကိုးကား- CNNဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး
Thu, 23-Apr-2026
ကမ္ဘောဒီးယားနှင့်ချုပ်ဆိုထားသည့် MoU 44 ကို ဖျက်သိမ်းရန် ထိုင်းအမျိုးသားလုံခြုံရေးကောင်စီ ဆုံးဖြတ်
ကမ္ဘောဒီးယားနှင့်ချုပ်ဆိုထားသည့် MoU 44 ကို ဖျက်သိမ်းရန် ထိုင်းအမျိုးသားလုံခြုံရေးကောင်စီ ဆုံးဖြတ်
ထိုင်းအမျိုးသားလုံခြုံရေးကောင်စီ (NSC) သည် ၂၀၀၁ ခုနှစ်က ကမ္ဘောဒီးယားနိုင်ငံနှင့် ချုပ်ဆိုခဲ့သည့် ရေပိုင်နက်အငြင်းပွားမှုဆိုင်ရာ နားလည်မှုစာချွန်လွှာ (MoU 44) ကို ဖျက်သိမ်းရန် ၂၀၂၆ ခုနှစ်၊ ဧပြီလအတွင်း ကျင်းပသော အစည်းအဝေး၌ မူအားဖြင့် သဘောတူဆုံးဖြတ်လိုက်သည်။ ဝန်ကြီးချုပ်နှင့် ပြည်ထဲရေးဝန်ကြီး အနူတင် ချန်ဗီရကူးလ် ဦးဆောင်သည့် အဆိုပါ ဆုံးဖြတ်ချက်မှာ ၂၅ နှစ်တာ ကာလအတွင်း ညှိနှိုင်းမှုပေါင်း (၅) ကြိမ်သာ ပြုလုပ်နိုင်ခဲ့ပြီး သိသာထင်ရှားသည့် ရလဒ်တစ်စုံတစ်ရာ မထွက်ပေါ်ခြင်းကြောင့် ဖြစ်သည်။ အစိုးရပြောရေးဆိုခွင့်ရှိသူ ရာချာဒါ၏ အဆိုအရ ယင်းစာချွန်လွှာသည် ပူးတွဲဖွံ့ဖြိုးရေးထက် နှစ်နိုင်ငံကြား မယုံကြည်မှုနှင့်တင်းမာမှုများကိုသာ ပိုမိုဖြစ်ပေါ်စေခဲ့ကြောင်း သိရှိရသည်။အဆိုပါ MoU ကို ဖျက်သိမ်းရခြင်းတွင် အဓိကအကြောင်းရင်း သုံးချက်ရှိပြီး ၎င်းတို့မှာ နှစ်ပေါင်းများစွာအတွင်း အကောင်အထည်မဖော်နိုင်ခြင်း၊ အချုပ်အခြာအာဏာဆိုင်ရာ အငြင်းပွားမှုများကို ရှောင်ရှားနိုင်မည့် ပိုမိုလက်တွေ့ကျသော မူဘောင်အသစ်တစ်ရပ် လိုအပ်နေခြင်းနှင့် ရှင်းလင်းသော နယ်နိမိတ်သတ်မှတ်ချက်ကို သဘောတူညီမှု ဦးစွာ ရယူလိုခြင်းတို့ ဖြစ်သည်။ထိုင်းအစိုးရအနေဖြင့် ယခုဆုံးဖြတ်ချက်ကို အစိုးရအဖွဲ့ထံ တင်ပြအတည်ပြုချက်ရယူပြီးပါက နိုင်ငံခြားရေးဝန်ကြီးဌာနမှတစ်ဆင့် တရားဝင် ရပ်စဲရေးလုပ်ငန်းစဉ်များကို ဆောင်ရွက်သွားမည်ဖြစ်သည်။ ဝန်ကြီးချုပ် အနူတင်ကမူ ကမ္ဘောဒီးယားနှင့် ပြဿနာများကို ငြိမ်းချမ်းစွာ ဖြေရှင်းလိုသော်လည်း နှစ်နိုင်ငံအကျိုးစီးပွားအတွက် ပိုမိုမျှတသော ပူးပေါင်းဆောင်ရွက်မှုပုံစံသစ်တစ်ရပ်ကိုသာ ဖော်ဆောင်သွားရန် ရည်ရွယ်ထားကြောင်း အတည်ပြုပြောကြားခဲ့သည်။ကိုးကား- Bangkok Postဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး
Thu, 23-Apr-2026
အစ္စရေးက 'ခုခံကာကွယ်ပိုင်ခွင့်' အကန့်အသတ်ကို စမ်းသပ်နေစဉ် လက်ဘနွန်အပစ်အခတ်ရပ်စဲရေးအတွက် ထရမ့်က အဓိကသော့ချက် ဖြစ်သည်ဟု ကျွမ်းကျင်သူက ဆို
အစ္စရေးက 'ခုခံကာကွယ်ပိုင်ခွင့်' အကန့်အသတ်ကို စမ်းသပ်နေစဉ် လက်ဘနွန်အပစ်အခတ်ရပ်စဲရေးအတွက် ထရမ့်က အဓိကသော့ချက် ဖြစ်သည်ဟု ကျွမ်းကျင်သူက ဆို
အမေရိကန်သမ္မတ ဒေါ်နယ်ထရမ့်သည် လက်ဘနွန်ရှိ အစ္စရေး၏ ထိုးစစ်ဆင်မှုအပေါ် သိသာထင်ရှားသောလွှမ်းမိုးမှုရှိကြောင်း ဒေသတွင်း ကျွမ်းကျင်သူတစ်ဦးက CNN သို့ ပြောကြားခဲ့သည်။ ယင်းပြောကြားချက်သည် နှစ်နိုင်ငံအကြား ဒုတိယအကျော့ဆွေးနွေးပွဲများကို လက်ခံ ကျင်းပရန် ဝါရှင်တန်က ပြင်ဆင်နေချိန်တွင် ထွက်ပေါ်လာခြင်းဖြစ်သည်။"သူ့ရဲ့ အစ္စရေးမဟာမိတ် ဘင်ဂျမင် နေတန်ယာဟုအပေါ် တကယ်တမ်းဖိအားပေးနိုင်တာဟာ သမ္မတထရမ့် တစ်ဦးတည်းသာ ရှိပါတယ်" ဟု လန်ဒန်စီးပွားရေးတက္ကသိုလ်မှ ပရော်ဖက်ဆာ Fawaz Gerges က ဆိုသည်။ ထို့အပြင် အပစ်အခတ်ရပ်စဲရေးကို ဆိုရှယ်မီဒီယာပို့စ်တစ်ခုမှတစ်ဆင့် ထရမ့်က ကြေညာခဲ့ခြင်းဖြစ်သည်ကိုလည်း ၎င်းက ထောက်ပြခဲ့သည်။ထရမ့်သည် ပြီးခဲ့သည့်သီတင်းပတ်က အစ္စရေးနှင့် အီရန် ကျောထောက်နောက်ခံပြု ဟစ်ဇဘိုလာ ‘၁၀ ရက်ကြာ အပစ်အခတ်ရပ်စဲရေး’ ကို ကြေညာခဲ့ပြီး "အစ္စရေးအနေနဲ့ လက်ဘနွန်ကို ဗုံးကြဲတာတွေ ဆက်လုပ်တော့မှာမဟုတ်ပါဘူး၊ တော်လောက်ပါပြီ" ဟု ပြောကြားခဲ့သည်။သို့သော်လည်း ထိုအချိန်မှစ၍ အစ္စရေး၏ တိုက်ခိုက်မှုများ ဆက်လက်ရှိနေဆဲဖြစ်ပြီး လက်ဘနွန်တွင် အရပ်သားများနှင့် သတင်းထောက်တစ်ဦး သေဆုံးခဲ့ရသည်။ တစ်ဖက်တွင်လည်း ဟစ်ဇဘိုလာအဖွဲ့က အစ္စရေးစစ်တပ်အပေါ် တိုက်ခိုက်မှုများ ပြုလုပ်ခဲ့သည်။အဆိုပါ အပစ်ရပ်စဲရေး သဘောတူညီချက်သည် အမေရိကန် ဦးဆောင်သော မူဘောင်တစ်ခုအပေါ် အခြေခံထားခြင်းဖြစ်သည်။ ယင်းမူဘောင်တွင် အစ္စရေးအနေဖြင့် ‘မိမိကိုယ်ကို ခုခံကာကွယ်ရန်အတွက် လိုအပ်သောအစီအမံအားလုံးကို လုပ်ဆောင်ပိုင်ခွင့်’ ကို ထိန်းသိမ်းထားရှိစေပြီး လက်ဘနွန်အစိုးရကိုမူ ဟစ်ဇဘိုလာအဖွဲ့မှ အစ္စရေးပစ်မှတ်များအပေါ် တိုက်ခိုက်မှုများ သို့မဟုတ် ရန်လိုသောလှုပ်ရှားမှုများ မပြုလုပ်နိုင်စေရေး တားဆီးရန် တောင်းဆိုထားသည်။အစ္စရေးက ၎င်း၏ မိမိကိုယ်ကို ခုခံကာကွယ်ပိုင်ခွင့်ကို မည်သို့အဓိပ္ပာယ်ဖွင့်ဆိုနေသနည်းဟူသည်ကို Gerges က မေးခွန်းထုတ်ခဲ့သည်။"အစ္စရေးဟာ သူတို့ရဲ့ ခုခံကာကွယ်ပိုင်ခွင့်ကိုအသုံးချပြီး လက်ဘနွန် တောင်ပိုင်းမှာ သူတို့သိမ်းပိုက်ထားတဲ့ နယ်မြေတွေနားကို ချဉ်းကပ်လာတဲ့ ဘယ်သူ့ကိုမဆို၊ ဘယ်အရပ်သား ဒါမှမဟုတ် ဘယ်သတင်းထောက်ကိုမဆို တိုက်ခိုက်နေတာ ဖြစ်ပါတယ်" ဟု ၎င်းက CNN မှ Rosemary Church ကို ပြောကြားခဲ့သည်။ကိုးကား- CNNဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး
Thu, 23-Apr-2026
© Copyright 2024 SAC All Rights Reserved.