အမေရိကန်နှင့် အီရန်တို့ကြား ဆွေးနွေးပွဲများ ပါကစ္စတန်၌ စတင် အသေးစိတ်ညှိနှိုင်းမှုများ ပြုလုပ်နေ

NoahJune222

News Image

  • အမေရိကန်နှင့် အီရန်တို့ကြား ဆွေးနွေးပွဲများ ပါကစ္စတန်၌ စတင် အသေးစိတ်ညှိနှိုင်းမှုများ ပြုလုပ်နေ

 

အမေရိကန်နိုင်ငံနှင့် အီရန်နိုင်ငံတို့ကြား ဆွေးနွေးပွဲများကို ပါကစ္စတန်နိုင်ငံ အစ္စလာမ်မာဘတ်မြို့တွင် ဧပြီလ ၁၁ ရက်နေ့၌ စတင်ပြုလုပ်ခဲ့ပြီး လက်ရှိတွင် အသေးစိတ်ဆွေးနွေးမှုများသို့ ရောက်ရှိလာပြီဖြစ်သောကြောင့် ဆွေးနွေးပွဲကာလကို တစ်ရက် ထပ်မံတိုးမြှင့်ဖွယ်ရှိကြောင်း သိရသည်။

ဆွေးနွေးပွဲများ မစတင်မီ ပါကစ္စတန်ဝန်ကြီးချုပ်က အမေရိကန်ဒုတိယသမ္မတ ဂျေဒီဗန့်နှင့် အီရန်ကိုယ်စားလှယ်အဖွဲ့တို့ကို သီးခြားစီ တွေ့ဆုံဆွေးနွေးခဲ့သည်။ တစ်ချိန်တည်းတွင် အမေရိကန်ဘက်မှ ထိန်းချုပ်ထားသော အီရန်၏ ပိုင်ဆိုင်မှုများကို ပြန်လည်ပေးအပ်ရန်နှင့် လက်ဘနွန်နိုင်ငံတွင် ပစ်ခတ်မှု ရပ်စဲရန် သဘောတူခဲ့ကြောင်း အီရန်နိုင်ငံပိုင် ရုပ်သံဌာနက ထုတ်လွှင့်ခဲ့သော်လည်း အမေရိကန်တာဝန်ရှိသူတစ်ဦးက ထိုသို့ သဘောတူညီထားခြင်း မရှိကြောင်း ငြင်းဆိုထားသည်။

လက်ရှိတွင် နှစ်ဖက်ကိုယ်စားလှယ်များသည် အရေးကြီးသော အချက်အလက်များကို အသေးစိတ်ညှိနှိုင်းဆွေးနွေးနေပြီး ဆွေးနွေးပွဲရလဒ်နှင့် ပတ်သက်၍ အပြုသဘောဆောင်သော အရိပ်အယောင်များ ရှိနေကြောင်း သိရသည်။ ယခုဆွေးနွေးပွဲတွင် အဓိကအားဖြင့် နျူကလီးယားဆိုင်ရာ ကိစ္စရပ်များနှင့် ပိတ်ဆို့အရေးယူမှုများကို မည်သို့ လက်တွေ့အကောင်အထည်ဖော်မည်နှင့် ပတ်သက်၍ ဆွေးနွေးနေခြင်း ဖြစ်သည်။ အိမ်ဖြူတော်နှင့် အီရန်နိုင်ငံခြားရေးဝန်ကြီးဌာနတို့ကလည်း ယခုဆွေးနွေးပွဲမှတစ်ဆင့် နှစ်ဖက်သဘောတူညီချက်များ ရရှိရန် မျှော်လင့်ထားသည်။

Ref: Xinhua

MWD

MM-News-Category
နိုင်ငံရေးကဏ္ဍသတင်းများ
နိုင်ငံရေး-နိုင်ငံတကာသတင်း

ဆက်စပ်သတင်းများ

ဆီးရီးယားနှင့် ဂျော်ဒန် ပူးပေါင်းဆောင်ရွက်ရေးမြှင့်တင်မည့် သဘောတူညီချက်များ လက်မှတ်ရေးထိုး
ဆီးရီးယားနှင့် ဂျော်ဒန် ပူးပေါင်းဆောင်ရွက်ရေးမြှင့်တင်မည့် သဘောတူညီချက်များ လက်မှတ်ရေးထိုး
ဒမတ်စကပ်စ် ဧပြီ ၁၃ ဆီးရီးယားနှင့် ဂျော်ဒန်နိုင်ငံတို့သည် အဓိကအခန်းကဏ္ဍများတွင် နှစ်နိုင်ငံပူးပေါင်းဆောင်ရွက်ရေး တိုးမြှင့်ရန်ရည်ရွယ်သည့် သဘောတူညီချက်များစွာကို သဘောတူလက်မှတ်ရေးထိုးလိုက်ပြီ ဖြစ်ကြောင်း ဧပြီ ၁၂ ရက် က ထုတ်ပြန်သော တရားဝင်ကြေညာချက် တစ်ရပ်အရ သိရသည်။ ဧပြီ ၁၂ ရက်က ဂျော်ဒန်နိုင်ငံ၏မြို့တော်တွင် ကျင်းပခဲ့သော ဆီးရီးယား-ဂျော်ဒန် အဆင့်မြင့် ပူးပေါင်းဆောင်ရွက်ရေး ကောင်စီ၏ ဒုတိယအကြိမ် အစည်းအဝေးတွင် ယင်းသဘောတူညီချက် များစွာကို ရရှိခဲ့ခြင်းဖြစ်သည်၊။ အဆိုပါ အစည်းအဝေးကို နှစ်နိုင်ငံစလုံးမှ အဆင့်မြင့်အရာရှိများက ပူးတွဲ သဘာပတိအဖြစ် ဆောင်ရွက်ခဲ့ကြသည်။ ဆီးရီးယား နိုင်ငံခြားရေးတာဝန်ရှိသူများ၏ ထုတ်ပြန်ချက်တွင် ဇန်နဝါရီ ၂၆ ရက်က လက်မှတ် ရေးထိုးခဲ့သည့် သဘောတူညီချက်အရ ဆီးရီးယားနိုင်ငံသို့ သဘာဝဓာတ်ငွေ့များ ပြန်လည်ပို့ဆောင်ရန် နှစ်ဖက်စလုံးက သဘောတူခဲ့ကြပြီး နည်းပညာပိုင်းဆိုင်ရာ လုပ်ငန်းစဉ်များပြီးဆုံးပြီးနောက် နှစ်ရက် အတွင်း ပြန်လည်ပို့ဆောင်နိုင်ရန် မျှော်မှန်းထား ကြောင်း ဖော်ပြထားသည်။ သယ်ယူပို့ဆောင်ရေးကဏ္ဍတွင် ကုန်းကြောင်း၊ လေကြောင်းနှင့် ရေကြောင်းနယ်ပယ်များ၌ ပူးပေါင်း ဆောင်ရွက်မှုအားကောင်းစေရေး ကတိကဝတ်ကို နှစ်ဖက်စလုံးက ထပ်လောင်းအတည်ပြုခဲ့ကြသည်။ သယ်ယူပို့ဆောင်ရေးလုပ်ငန်းစဉ်များ လွယ်ကူရိုးရှင်းစေရန်နှင့် လုပ်ငန်းလည်ပတ်ရာတွင် ပိုမို သွက်လက် မြန်ဆန်စေရန်အတွက်လည်း အတူတကွပူးပေါင်း အဖြေရှာကြမည်ဖြစ်ကြောင်း သိရသည်။ ဆီးရီးယားနှင့် ဂျော်ဒန်နိုင်ငံတို့သည် ပညာရေး၊ ကျန်းမာရေးစောင့်ရှောက်မှု၊ စိုက်ပျိုးရေး၊ ခရီးသွား လုပ်ငန်းနှင့် အဖွဲ့အစည်းဆိုင်ရာ ဖွံ့ဖြိုးတိုးတက်မှုများအပြင် ပြည်သူ့စွမ်းဆောင်ရည်ကို မြှင့်တင်မည့် စွမ်းဆောင်ရည်မြှင့်တင်ရေး အစီအစဉ်များတွင်လည်း အရှိန်မြှင့်ပူးပေါင်းဆောင်ရွက်ကြရန်လည်း ဆွေးနွေးခဲ့ကြသည်။ ဆင်ဟွာMDN
Tue, 14-Apr-2026
အီရန်နိုင်ငံက အာရပ်နိုင်ငံများထံမှ လျော်ကြေးငွေ တောင်းဆို
အီရန်နိုင်ငံက အာရပ်နိုင်ငံများထံမှ လျော်ကြေးငွေ တောင်းဆို
အမေရိကန်နှင့် အစ္စရေးတို့က မိမိတို့၏ နယ်မြေအတွင်းသို့ လေကြောင်းမှ တိုက်ခိုက်မှုများ ပြုလုပ်ခဲ့ခြင်းနှင့်ပတ်သက်၍ အမေရိကန် စစ်အခြေစိုက် စခန်းများလက်ခံထားသည့် အာရပ်ငါးနိုင်ငံအနေဖြင့် လျော်ကြေးပေးရန် အီရန်နိုင်ငံက တောင်းဆိုလိုက်သည်။တနင်္လာနေ့ (ဧပြီ ၁၃) တွင် ကုလသမဂ္ဂ အထွေထွေအတွင်းရေးမှူးချုပ် အန်တိုနီယို ဂူတာရက်စ်ထံသို့ပေးပို့သည့် စာတစ်စောင်၌ အီရန် သံအမတ် အာမီရ် ဆာအိဒ် အီရာဗာနီက ဆော်ဒီအာရေဗျ၊ ဘာရိန်း၊ ကာတာ၊ ယူအေအီးနှင့် ဂျော်ဒန်နိုင်ငံတို့သည် အမေရိကန်အား ၎င်းတို့၏ နယ်မြေကို အသုံးပြု၍ အီရန်ကိုတိုက်ခိုက်ရန် ခွင့်ပြုခဲ့ကြောင်းနှင့် အချို့သော ဖြစ်စဉ်များတွင် အရပ်ဘက်ဆိုင်ရာနေရာများကို ပစ်မှတ်ထားသည့် တိုက်ခိုက်မှုများ၌ တိုက်ရိုက် ပါဝင်ပတ်သက်ခဲ့ကြောင်း စွပ်စွဲ ပြောကြား ခဲ့သည်။ထို့ပြင် အဆိုပါ အာရပ်နိုင်ငံများသည် ၎င်းတို့၏ နိုင်ငံတကာ ဥပဒေချိုးဖောက်သည့် လုပ်ရပ်များကြောင့် ဖြစ်ပေါ်ခဲ့သော ရုပ်ဝတ္ထုပစ္စည်း ဆိုင်ရာနှင့် စိတ်ပိုင်းဆိုင်ရာ ထိခိုက်နစ်နာမှုများ အားလုံးအတွက် အီရန် အစ္စလာမ်မစ် သမ္မတနိုင်ငံသို့ အပြည့်အဝ လျော်ကြေးပေးသင့်ကြောင်း အီရာဗာနီက ဆက်လက်ပြောကြားခဲ့သည်။ပင်လယ်ကွေ့နိုင်ငံများကလည်း စစ်ပွဲကြောင့်ဖြစ်ပေါ်ခဲ့သော ပျက်စီးဆုံးရှုံးမှုများအတွက် အီရန်တွင်တာဝန်ရှိကြောင်း ယခင်က တောင်းဆိုခဲ့ကြသော်လည်း ယင်းတောင်းဆိုချက်သည် ဥပဒေကြောင်းအရ ခိုင်လုံမှုမရှိသည့်အပြင် ဖြစ်ရပ်မှန်နှင့် ဥပဒေရေးရာ လက်တွေ့ အခြေအနေများနှင့်လည်း အခြေခံအားဖြင့်ကွဲလွဲနေသည်ဟု အီရာဗာနီက ပယ်ချခဲ့သည်။အမေရိကန်နှင့် အစ္စရေးတို့သည် အီရန်၏ နျူကလီးယားနှင့် ပဲ့ထိန်းဒုံးကျည် အစီအစဉ်များကို ဖျက်သိမ်းရန် ရည်ရွယ်သည်ဟုဆိုကာ ဖေဖော်ဝါရီ ၂၈ ရက်တွင် အီရန်နိုင်ငံအတွင်းသို့ တိုက်ခိုက်မှုများ ပြုလုပ်ခဲ့ကြသည်။ အဆိုပါတိုက်ခိုက်မှုများကြောင့် အီရန်၏ ကာလရှည် အဓိပတိ အလီ ခါမေနီ အပါအဝင် အဆင့်မြင့်အရာရှိကြီး ဒါဇင်နှင့်ချီ၍ သေဆုံးခဲ့ရသလို အရပ်သား ၁,၃၀၀ ကျော်လည်း အသက်ဆုံးရှုံးခဲ့ရသည်။ ထို့ပြင် အမေရိကန်နှင့် အစ္စရေးတို့သည် စစ်ရေးပစ်မှတ်များသာမက စွမ်းအင်ဆိုင်ရာ အခြေခံအဆောက်အအုံများ၊ တံတားများ၊ တက္ကသိုလ်များနှင့် စာသင်ကျောင်းများကိုလည်း ပစ်မှတ်ထား တိုက်ခိုက်ခဲ့ကြသည်။အီရန်ကလည်း ဒေသတွင်းရှိ အမေရိကန်စစ်စခန်းများနှင့် ပင်လယ်ကွေ့နိုင်ငံများရှိ ရေနံနှင့် သဘာဝဓာတ်ငွေ့ဆိုင်ရာအဆောက်အအုံများ၊ လေဆိပ်များနှင့် ဆိပ်ကမ်းများ အပါအဝင် အရပ်ဘက်အခြေခံအဆောက်အအုံများကို ပြန်လည်တိုက်ခိုက်ခြင်းဖြင့် တုံ့ပြန်ခဲ့သည်။ ယင်းတိုက်ခိုက်မှုများသည် မိမိကိုယ်ကို ခုခံပိုင်ခွင့်ကို ကျင့်သုံးခြင်းသာဖြစ်ကြောင်း တီဟီရန်က ပြောကြားခဲ့သည်။ကိုးကား- RTဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး
Tue, 14-Apr-2026
ဟန်ဂေရီအစိုးရသစ်နှင့် လက်တွေ့ကျသော ဆက်ဆံရေး တည်ဆောက်ရန် အသင့်ရှိကြောင်း ရုရှားထုတ်ဖော်ပြောကြား
ဟန်ဂေရီအစိုးရသစ်နှင့် လက်တွေ့ကျသောဆက်ဆံရေး တည်ဆောက်ရန် အသင့်ရှိကြောင်း ရုရှား ထုတ်ဖော်ပြောကြား
ဟန်ဂေရီနိုင်ငံတွင် မကြာသေးမီက ကျင်းပပြီးစီးခဲ့သော အထွေထွေရွေးကောက်ပွဲတွင် ဝန်ကြီးချုပ် ဗစ်တာ အော်ဘန်၏ Fidesz ပါတီသည် အတိုက်အခံ ပီတာ မက်ဂျာ ဦးဆောင်သည့် Tisza ပါတီကို အရေးနိမ့်သွားခဲ့သည်။ Tisza ပါတီသည် မဲအရေအတွက် ၅၃ ရာခိုင်နှုန်းကျော် ရရှိကာ ပါလီမန်တွင် အပြတ်အသတ်အနိုင်ရရှိခဲ့ခြင်း ဖြစ်သည်။ ယင်းအပြောင်းအလဲနှင့် ပတ်သက်၍ ကရင်မလင်ပြောရေးဆိုခွင့်ရှိသူ ဒမီထရီ ပက်စကော့ဗ်က ရုရှားအနေဖြင့် ဟန်ဂေရီအစိုးရသစ်နှင့် လက်တွေ့ ကျသောဆက်ဆံရေးကို ဆက်လက်ထိန်းသိမ်းသွားရန်မျှော်လင့်ကြောင်း တနင်္လာနေ့ (ဧပြီ ၁၃) တွင် ထုတ်ဖော်ပြောဆိုလိုက်သည်။ရှုံးနိမ့်သွားသည့် ဝန်ကြီးချုပ် အော်ဘန်သည် ၎င်း၏ ရာထူးသက်တမ်းတစ်လျှောက် ရုရှားအပေါ် ဥရောပသမဂ္ဂ၏ ပိတ်ဆို့အရေးယူမှုများကို ဆန့်ကျင်ခြင်း၊ ယူကရိန်းသို့ စစ်ရေးအကူအညီပေးမှုကို ဟန့်တားခြင်းနှင့် စွမ်းအင်ကဏ္ဍတွင် မော်စကိုနှင့် နီးကပ်စွာပူးပေါင်းဆောင်ရွက်ခြင်း စသည့် သီးခြားလွတ်လပ်သောလမ်းစဉ်ကို လျှောက်လှမ်းခဲ့သူဖြစ်သည်။ ထို့ပြင် ၎င်းသည် ရွှေ့ပြောင်းအခြေချမှုနှင့် LGBTQ အခွင့်အရေးဆိုင်ရာ EU မူဝါဒ များကိုလည်း ပြင်းထန်စွာ ဆန့်ကျင်ခဲ့သဖြင့် ဘရပ်ဆဲလ်ရှိ ခေါင်းဆောင်များနှင့် မကြာခဏ သဘောထားကွဲလွဲမှုများ ရှိခဲ့သည်။လက်ရှိတွင် ရုရှားသမ္မတ ပူတင်နှင့် အနိုင်ရပါတီခေါင်းဆောင် မက်ဂျာတို့ အကြား တိုက်ရိုက်ဆက်သွယ်ရန် အစီအစဉ် မရှိသေးသော်လည်း မော်စကို နှင့် ဘူဒါပတ်စ်တို့အကြား အတူတကွ အပြီးသတ်ရန် လိုအပ်သည့် ပူးတွဲစီမံကိန်းများစွာရှိနေကြောင်း ပက်စကော့ဗ်က ထောက်ပြခဲ့သည်။ ရုရှား အစိုးရအနေဖြင့် ဟန်ဂေရီခေါင်းဆောင်သစ်နှင့် ချစ်ကြည်ရင်းနှီးပြီး နှစ်ဦးနှစ်ဖက် အကျိုးရှိမည့်ဆက်ဆံရေးမျိုး တည်ဆောက်ရန် ဆွေးနွေးမှု များအတွက် အမြဲတမ်း လမ်းဖွင့်ထားကြောင်း အလေးပေး ပြောကြားခဲ့သည်။ သို့သော် နှစ်နိုင်ငံဆက်ဆံရေး အနာဂတ်မှာ မက်ဂျာ ဦးဆောင်မည့် အစိုးရသစ်၏ ရှေ့ဆက်မည့်သဘောထားအပေါ်တွင်သာ အဓိက မူတည်နေကြောင်း သိရှိရသည်။ကိုးကား- RTဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး
Tue, 14-Apr-2026
အမေရိကန် လွှတ်တော်အမတ်နှစ်ဦး လိင်ပိုင်းဆိုင်ရာအရှုပ်တော်ပုံများကြောင့် ရာထူးမှ နုတ်ထွက်မည်
အမေရိကန် လွှတ်တော်အမတ်နှစ်ဦး လိင်ပိုင်းဆိုင်ရာအရှုပ်တော်ပုံများကြောင့် ရာထူးမှ နုတ်ထွက်မည်
ဒီမိုကရက်တစ်လွှတ်တော်အမတ် Eric Swalwell နှင့် ရီပတ်ဘလီကန် လွှတ်တော်အမတ် Tony Gonzalez တို့သည် လိင်ပိုင်းဆိုင်ရာ အလွဲသုံးစားမှု စွပ်စွဲချက်များကြောင့် အမေရိကန် အောက်လွှတ်တော် အမတ် အဖြစ်မှ နုတ်ထွက်မည်ဟု ပြောကြားခဲ့သည်။၂၀၁၃ ခုနှစ်တွင် လွှတ်တော်အမတ်အဖြစ် စတင်ရွေးချယ်ခံခဲ့ရသည့် Swalwell က အဆိုပါစွပ်စွဲချက်များကိုငြင်းဆိုခဲ့ပြီး ၎င်း၏ဇာတိ ကာလီ ဖိုးနီးယားပြည်နယ် အုပ်ချုပ်ရေးမှူး ရွေးကောက်ပွဲဝင်မည့် အစီအစဉ်ကို ဟန့်တားရန် ကြိုးပမ်းမှုတစ်ခုဖြစ်ကြောင်း ပြောကြားခဲ့သည်။ ၎င်းသည် ပြည်နယ်အုပ်ချုပ်ရေးမှူးလောင်းအဖြစ် ထိပ်ဆုံးမှပြေးနေသူတစ်ဦးလည်း ဖြစ်သည်။ Swalwell သည် တနင်္ဂနွေနေ့ (ဧပြီ ၁၂) တွင် ၎င်း၏ မဲဆွယ် စည်းရုံးမှုကို ရပ်နားခဲ့ပြီး နောက်တစ်နေ့တွင် လွှတ်တော်မှ နုတ်ထွက်မည့် အစီအစဉ်ကို ကြေညာခဲ့သည်။"ကျွန်တော့်ရဲ့ အတိတ်ကဆုံးဖြတ်ချက်အမှားတွေအတွက် ကျွန်တော့်ရဲ့ မိသားစု၊ ဝန်ထမ်းတွေနဲ့ မဲဆန္ဒရှင်တွေကို အလေးအနက် တောင်းပန်ပါတယ်" ဟု Swalwell က X လူမှုကွန်ရက်ပေါ်ရှိ ထုတ်ပြန်ချက်တစ်ခုတွင် ပြောကြား ခဲ့သည်။ ၎င်းအား ရာထူးမှထုတ်ပယ်ရေး မဲခွဲဆုံးဖြတ်ရန် တောင်းဆိုမှု များကို ဝေဖန်ခဲ့သော်လည်း "ကျွန်တော် အာရုံပျံ့လွင့်နေတာကြောင့် ကျွန်တော့်ရဲ့ မဲဆန္ဒရှင်တွေအတွက်တာဝန်တွေကို မကျေပွန်ဘဲ ဖြစ်နေ ရပါတယ်" ဟု ဖြည့်စွက်ပြောကြားခဲ့သည်။CNN သတင်းဌာန၏ ဖော်ပြချက်အရ အမျိုးသမီး လေးဦးသည် Swalwell ကို လိင်အလွဲသုံးစားပြုမှုများဖြင့် စွပ်စွဲထားကြောင်း သိရှိရသည်။ ထို စွပ်စွဲချက်များတွင် ဝန်ထမ်းဟောင်းတစ်ဦးက သူမ အလွန်အမင်း မူးယစ် နေစဉ် ၂၀၁၉ နှင့် ၂၀၂၄ ခုနှစ်တို့၌ Swalwell က သူမကို မုဒိမ်းကျင့် ခဲ့သည် ဟူသော စွပ်စွဲချက်လည်း ပါဝင်သည်။ အခြားအမျိုးသမီးများ ကလည်း Swalwell သည် ၎င်းတို့အား ခန္ဓာကိုယ်ကို ကိုင်တွယ် နှောင့်ယှက်ခြင်း၊ ရိုင်းစိုင်းသော စာတိုများနှင့် အဝတ်အစားမပါသော ဓာတ်ပုံများပေးပို့ခြင်းတို့ ပြုလုပ်ခဲ့သည်ဟု စွပ်စွဲထားကြသည်။၂၀၂၃ ခုနှစ်တွင် Swalwell သည် တရုတ်ထောက်လှမ်းရေးဟု သံသယရှိသူတစ်ဦးနှင့် အဆက်အသွယ်ရှိခဲ့ကြောင်း Axios ၏ အစီရင်ခံစာ ထွက်ပေါ်လာပြီးနောက် အောက်လွှတ်တော် ထောက်လှမ်းရေး ကော်မတီ မှ ဖယ်ရှားခြင်း ခံခဲ့ရသည်။တက္ကဆက်ပြည်နယ်မှ ရီပတ်ဘလီကန်အမတ် Gonzalez သည် ၂၀၂၅ ခုနှစ်တွင် မိမိကိုယ်ကိုယ် သေကြောင်းကြံစည်သွားသည့် လက်ထောက် ဝန်ထမ်းတစ်ဦးနှင့် ပတ်သက်မှုရှိခဲ့ကြောင်း ပေါ်ပေါက်လာပြီးနောက် ပြီးခဲ့သည့်လတွင် ၎င်း၏ ပြန်လည်ရွေးကောက်ခံမည့် မဲဆွယ်စည်းရုံးမှုကို ရပ်နားခဲ့သည်။ ၂၀၂၁ ခုနှစ်တွင် လွှတ်တော်ထဲသို့ စတင် ရောက်ရှိ လာသည့် Gonzalez က ထိုပတ်သက်မှုကို ‘ဆုံးဖြတ်ချက် မှားယွင်းမှုတစ်ခု’ ဟု ဆိုကာ ဝန်ခံခဲ့သည်။ လွှတ်တော်အစည်းအဝေးများ ပြန်လည် စတင်မည့် အင်္ဂါနေ့ (ဧပြီ ၁၄) တွင် ၎င်း၏ နုတ်ထွက်စာကို တရားဝင်တင်ပြသွားမည်ဖြစ်ကြောင်း ၎င်းက တနင်္လာနေ့ (ဧပြီ ၁၃) တွင် ပြောကြားခဲ့သည်။ကိုးကား- RTဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး
Tue, 14-Apr-2026
နေတန်ယာဟုက ဟိုလိုကော့စ် (ဂျူးလူမျိုးတုံးသတ်ဖြတ်မှု) အောက်မေ့ဖွယ်နေ့တွင် ဥရောပသည် ‘ကိုယ်ကျင့်တရားပိုင်းဆိုင်ရာ အားနည်းနေသည်’ ဟု ပြင်းထန်စွာ ဝေဖန်
နေတန်ယာဟုက ဟိုလိုကော့စ် (ဂျူးလူမျိုးတုံးသတ်ဖြတ်မှု) အောက်မေ့ဖွယ်နေ့တွင် ဥရောပသည် ‘ကိုယ်ကျင့်တရားပိုင်းဆိုင်ရာ အားနည်းနေသည်’ ဟု ပြင်းထန်စွာ ဝေဖန်
အစ္စရေးဝန်ကြီးချုပ် ဘင်ဂျမင် နေတန်ယာဟုက ဥရောပနိုင်ငံများသည် ဒုတိယကမ္ဘာစစ်နှင့် ဟိုလိုကော့စ် (ဂျူးလူမျိုးတုံးသတ်ဖြတ်မှု) တို့မှ ရရှိ ခဲ့သည့်သင်ခန်းစာများကို မေ့လျော့နေကြပြီဟု ပြောကြားလိုက်ပြီး အီရန်နှင့်ဖြစ်ပွားနေသောစစ်ပွဲတွင် ဥရောပနိုင်ငံများက ဝိုင်းဝန်းကူညီခြင်း မရှိသည့်အပေါ် ဝေဖန်ပြစ်တင်လိုက်သည်။ဖေဖော်ဝါရီ ၂၈ ရက်နေ့က အမေရိကန်-အစ္စရေး ပူးပေါင်း တိုက်ခိုက်မှုအပြီးတွင် အီရန်က ဟော်မုဇ်ရေလက်ကြားကို ရန်ဘက်နိုင်ငံများ၏ သင်္ဘော များ ဖြတ်သန်းခွင့်မပြုဘဲ ပိတ်ဆို့ထားခဲ့သည်။ ထိုရေလက်ကြားအား ပြန်လည်ဖွင့်လှစ်နိုင်ရေးအတွက် ဝိုင်းဝန်းကူညီရန် အမေရိကန်သမ္မတ ဒေါ်နယ်ထရမ့်၏ တောင်းဆိုချက်ကို ဗြိတိန်၊ ပြင်သစ်နှင့် ဂျာမနီ အပါအဝင် ဥရောပနိုင်ငံများစွာက ငြင်းဆိုခဲ့ကြသည်။တနင်္လာနေ့ (ဧပြီ ၁၃) တွင် ကျရောက်သည့် ဟိုလိုကော့စ် အောက်မေ့ဖွယ်နေ့၌ နေတန်ယာဟုက ပြောကြားရာတွင် ဥရောပသားများသည် ကျေးဇူးကန်း သူများ ဖြစ်သည်ဟုဖော်ပြခဲ့ပြီး အီရန်အပေါ်စစ်မက်ပြုခြင်းဖြင့် အမေရိကန် နှင့်အစ္စရေးတို့သည် ဥရောပကို ကာကွယ်ပေးနေခြင်းဖြစ်သည်ဟု အခိုင် အမာ ပြောဆိုခဲ့သည်။“ဟိုလိုကော့စ်နောက်ပိုင်း အရာများစွာကိုမေ့လျော့နေတဲ့ ဥရောပဟာ မိမိတို့ဆီကနေ သင်ခန်းစာတွေ အများကြီးသင်ယူနိုင်ပါတယ် ၊ အဓိက ကတော့ အကောင်းနဲ့ အဆိုးကြားက ပြတ်သားတဲ့ ခြားနားချက်ပဲဖြစ်ပါတယ် ၊ အမှန်တရားနဲ့ ရင်ဆိုင်ရတဲ့အချိန်မှာ ကောင်းမှုနဲ့ လူသား တွေရဲ့ အသက်ရှင်သန်မှုအတွက် မိမိတို့အနေဖြင့် တိုက်ပွဲဝင်ဖို့ လိုအပ်ပါတယ်” ဟု နေတန်ယာဟုက ပြောကြားခဲ့သည်။၎င်းက ဆက်လက်၍ “ဒုတိယကမ္ဘာစစ်အပြီးမှာ ကောင်းမှုကို ကာကွယ် ပါ့မယ်လို့ ကတိပြုခဲ့တဲ့ ဥရောပဟာ ဒီနေ့မှာတော့ နက်ရှိုင်းတဲ့ ကိုယ်ကျင့် တရားဆိုင်ရာ အားနည်းချက်တွေ ကပ်ငြိနေပါတယ်၊ ဥရောပဟာ သူတို့ရဲ့ မူလလက္ခဏာ၊ တန်ဖိုးထားမှုတွေနဲ့ ယဉ်ကျေးမှု လူ့အဖွဲ့အစည်း ကို ရိုင်းစိုင်းကြမ်းကြုတ်မှုတွေကနေ ကာကွယ်ပေးမယ်ဆိုတဲ့ ကတိကဝတ်တွေကို ထိန်းချုပ်နိုင်စွမ်း မရှိတော့ပါဘူး” ဟု ထပ်လောင်း ပြောဆို ခဲ့သည်။အီရန်နိုင်ငံကမူ အဆိုပါစစ်ပွဲသည် အကြောင်းမဲ့ကျူးကျော်စစ်ဖြစ်ကြောင်း ရှုတ်ချခဲ့ပြီး ငြိမ်းချမ်းစွာ အသုံးပြုရန်အတွက် ယူရေနီယံသန့်စင်ခွင့် ဆိုသည့် ၎င်းတို့၏ အချုပ်အခြာအာဏာပိုင်ဆိုင်ခွင့်ကို ကာကွယ်သွားမည် ဟု ကတိပြုထားသည်။ပါကစ္စတန်က ကြားဝင်စေ့စပ်ပေးခဲ့သည့် အမေရိကန်-အီရန် ငြိမ်းချမ်းရေးဆွေးနွေးပွဲများ ပျက်ပြားသွားခဲ့ပြီးနောက် တနင်္ဂနွေနေ့ (ဧပြီ ၁၂) တွင် သမ္မတထရမ့်က ဟော်မုဇ်ရေလက်ကြားကို ရေတပ်ဖြင့် ပိတ်ဆို့ရန် အမိန့် ပေးခဲ့သည်။ကိုးကား- RTဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး
Tue, 14-Apr-2026
ဟန်ဂေရီနိုင်ငံ၌ အထွေထွေရွေးကောက်ပွဲ စတင်
ဟန်ဂေရီနိုင်ငံ၌ အထွေထွေရွေးကောက်ပွဲ စတင်
ဘူဒါပက်စ် ဧပြီ ၁၂ ဟန်ဂေရီနိုင်ငံ၏ ပါလီမန်ရွေးကောက်ပွဲအတွက် မဲပေးမှုများ စတင်လုပ်ဆောင်နေပြီဖြစ်သည်။ စစ်တမ်း ကောက်ယူမှုများအရ ဝန်ကြီးချုပ် ဗစ်တာအော်ဘန်ဦးဆောင်သည့် အာဏာရ ဖီဒက်ဇ် ပါတီသည် ပါတီအသစ်တစ်ခု၏နောက်တွင် ရောက်ရှိနေသည်ဟု ဖော်ပြထားသည်။ ဧပြီ ၁၂ ရက် ညပိုင်း မဲရုံများပိတ်ပြီးနောက် မဲရေတွက်မှုများ စတင်မည်ဖြစ်သည်။  ဗစ်တာ အော်ဘန်သည်  ဟန်ဂေရီကို ဦးစားပေးသည့်ဝါဒကို နှစ်ခြိုက်သူဖြစ်ပြီး အမေရိကန်သမ္မတ ဒေါ်နယ်ထရမ့်နှင့်လည်း အဆင်ပြေသည့်ဆက်ဆံရေးကို ထိန်းသိမ်းထားနိုင်သူဖြစ်သည်။ ဟန်ဂေရီ ဝန်ကြီးချုပ် ပြန်လည်ရွေးကောက်ခံရရေး အမေရိကန်သမ္မတ ထရမ့်က ခိုင်ခိုင်မာမာ ထောက်ခံပေးလျက် ရှိပြီး ဒုတိယသမ္မတ ဂျေဒီဗန်စ်ကိုလည်း ဟန်ဂေရီသို့ စေလွှတ်ခဲ့သည်။ လွတ်လပ်သည့် သုတေသနအုပ်စု၏ စစ်တမ်းကောက်ယူမှုတစ်ခုအရ အော်ဘန်၏ ပါတီသည် တစ်ဇာပါတီ၏ နောက်တွင် ၁၀ ရာခိုင်နှုန်း နောက်ကျနေသည်ဟု  ဖော်ပြထားသည်။ တစ်ဇာပါတီသည်  ဥရောပသမဂ္ဂနှင့် ပူးပေါင်းဆောင်ရွက်ရေးနှင့် အကျင့်ပျက်ခြစားမှု တိုက်ဖျက်ရေးကို ထောက်ခံသည်။ လက်ရှိအာဏာရပါတီကို ထောက်ခံသူတစ်ဦးက အော်ဘန်သည် တိုင်းပြည်ကို ၁၆ နှစ် အုပ်ချုပ်ခဲ့ပြီး အုပ်ချုပ်မှုများ အောင်မြင်ခဲ့ကာ  ပြည်သူများ၏ဘဝတည်ငြိမ်စေခဲ့သည်ဟု ပြောသည်။ တစ်ဇာ ပါတီကို ထောက်ခံသူတစ်ဦးကလည်း ဟန်ဂေရီနိုင်ငံသည်  လူကြီးရော လူငယ်ပါနေထိုင်နိုင်သည့် နိုင်ငံအဖြစ် ပြန်လည်ဖြစ်ပေါ်လာမည်ဟု မျှော်လင့်ကြောင်း  ပြောကြားခဲ့သည်။ အင်န်အိတ်ချ်ကေ
Mon, 13-Apr-2026
© Copyright 2024 SAC All Rights Reserved.