ငဖဲမြို့တွင် ကိုရီးယားဂျူး၊ အိုဆာမရမ်းနှင့် ကြယ်တာယာ ဂန္ဓမာပန်းမျိုးများ အောင်မြင်ဖြစ်ထွန်း

ငဖဲ ဧပြီ ၂၄

မကွေးတိုင်းဒေသကြီး ငဖဲမြို့တွင် မြေအောက်ရေကို အသုံးပြု၍ ဂန္ဓမာပန်းများစိုက်ပျိုးထားရာ ပန်းခင်းများ အောင်မြင်ဖြစ်ထွန်းပြီး နေ့စဉ်ရောင်းချနေရကြောင်း ပန်းစိုက်တောင်သူထံမှ သိရသည်။

စိုက်ပျိုးထားသည့်ပန်းမျိုးများမှာ ကိုရီးယားဂျူး၊ အိုဆာမရမ်းနှင့် ကြယ်တာယာ ဂန္ဓမာပန်းမျိုးဖြစ်ပြီး ပျိုးပင်ပေါက်များကို ပြင်ဦးလွင်မြို့မှဝယ်ယူကြောင်း၊ ပန်းစိုက်ပျိုးမည့် မြေနေရာအား ထယ်နှစ် စပ်ထိုး၍ စိုက်ပေါင်များပြုလုပ်ကာ သဘာဝနွားချေးဆွေးများကို ထည့်သွင်းပြီး ပျိုးပင်များကို တန်းကြား ၂၄ လက်မ၊ ပင်ကြား ၁၂ လက်မထား၍ နေ့စဉ်ရေသွင်း ပေးရသည်။

စိုက်ပျိုးပြီး ပထမတစ်လအတွင်း တစ်ပတ်နှစ်ကြိမ် ရေဝအောင် သွင်းပေးရမည်ဖြစ်သော်လည်း တစ်လကျော်ပါက တစ်ပတ်တစ်ကြိမ် နွေရာသီတွင် စိုက်ပျိုးရောင်းချသည့်ပန်းဖြစ်၍ တစ်ပတ်လျှင် သုံးကြိမ်ခန့် ရေသွင်းပေးရကြောင်း၊ ဖေဖော်ဝါရီလတွင် စတင်စိုက်ပျိုးပြီး ဧပြီလ သင်္ကြန်အကျော် နှစ်လခွဲခန့်ဆိုလျှင် ပန်းများခူးချိုး၍ရကြောင်း၊ လယ်မြေတွင် ပန်းပင်ပေါင်း ၂၀၀၀၀ ခန့် စိုက်ပျိုး ထားကြောင်းနှင့် ပန်းခင်းများ အောင်မြင်ဖြစ်ထွန်း၍ နေ့စဉ်ဝင်ငွေရရှိကြောင်း ပန်းစိုက်တောင်သူ ဦးဝင်းမင်းထွန်းက ပြောသည်။

ငဖဲမြို့နယ်၌ နွေသီးနှံများစိုက်ပျိုးရာသီတွင် မန်းချောင်းရေလှောင် တမံဆည်ရေ၊ မြေအောက်ရေ တို့ဖြင့် စပါး၊ နှမ်း၊ ပန်း၊ ဖူးစားပြောင်းများ နှင့် ဂန္ဓမာပန်းများကို အများဆုံး စိုက်ပျိုးကြကြောင်း သိရသည်။

မယု(ငဖဲ)

MDN