စက်သုံးဆီနှင့် ဓာတ်မြေဩဇာများ ဖူလုံစွာရရှိရေး

     ယခုလက်ရှိအချိန်တွင် ဖြစ်ပွားလျက်ရှိသည့်  အရှေ့အလယ်ပိုင်းဒေသ ပဋိပက္ခများကြောင့် စက်သုံးဆီများရှားပါးမှုကို   ကမ္ဘာတစ်ဝန်းတွင်ကြုံတွေ့နေရသည်။   မြန်မာနိုင်ငံအနေဖြင့်လည်း အဆိုပါ အခက်အခဲကို ကျော်လွှားဖြေရှင်းနိုင်ရေး ကြိုးပမ်းဆောင်ရွက်လျက်ရှိရာ ပြည်တွင်းစက်သုံးဆီသုံးစွဲမှု များကိုလျှော့ချနိုင်ရန်အတွက် မကြာမီကာလက   မော်တော်ယာဉ်များ၊ မော်တော်ဆိုင်ကယ်များသုံးစွဲမှု နှင့် ဆီဖြည့်သွင်းမှုကို စုံ/မ အလှည့်ကျစနစ်ဖြင့်ဆောင်ရွက်ခြင်း၊ QR Code များအသုံးပြု၍ ဆီဖြည့်ခြင်းစနစ်များကို  ဆောင်ရွက်လျက်ရှိသည်။  ထို့ပြင် စက်သုံးဆီသုံးစွဲမှုကိုလျှော့ချနိုင်ရေးအတွက် အပတ်စဉ်ဗုဒ္ဓဟူးနေ့တိုင်း  အစိုးရရုံးဌာနများ၏ ရုံးလုပ်ငန်းများကို  နေအိမ်မှသာဆောင်ရွက်ကြရန် ထုတ်ပြန်ကြေညာထားသည်။ ထိုသို့ဆောင်ရွက်ခြင်းကြောင့် စက်သုံးဆီသုံးစွဲမှုကို တတ်နိုင်သမျှ လျှော့ချလာနိုင်ပြီဖြစ်သည်။စက်သုံးဆီဈေးနှုန်းများမြင့်တက်လာသည်နှင့်အမျှ ကုန်စည်စီးဆင်းမှုများအလိုက် ကုန်ဈေးနှုန်းများလည်း မြင့်တက်လာနိုင်သည်။ နိုင်ငံတော်အစိုးရအနေဖြင့်   ဤသည်ကိုတွက်ဆ၍ အများပြည်သူသုံး သယ်ယူပို့ဆောင်ရေးအတွက် အဓိကလိုအပ်သည့် ဒီဇယ်ဆီများကို သက်သာသောဈေးနှုန်းများဖြင့် ဝယ်ယူရရှိနိုင်ရေး ဆောင်ရွက်ပေးလျက်ရှိသည်။ သယ်ယူပို့ဆောင်မှုများကြောင့် ကုန်ဈေးနှုန်းများ မြင့်တက်လာမှုမရှိစေရေးအတွက်  အများပြည်သူသုံးသယ်ယူ ပို့ဆောင်ရေးလုပ်ငန်းတစ်ခုဖြစ်သည့် မီးရထားဖြင့် ပို့ဆောင်မှုများကို အဓိကထားအသုံးပြု၍ ကုန်စည်များကို သယ်ယူပို့ဆောင်သွားကြရမည်ဖြစ်သည်။ပြည်ထောင်စုသမ္မတမြန်မာနိုင်ငံတော် ယာယီသမ္မတ  နိုင်ငံတော်လုံခြုံရေးနှင့် အေးချမ်းသာယာရေး ကော်မရှင်ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်သည် ဧပြီလ ၁ ရက်ကကျင်းပသည့် စက်သုံးဆီများဖူလုံစွာ ရရှိရေးနှင့်  စိုက်ပျိုးရေးလုပ်ငန်းများအတွက် လိုအပ်သည့်ဓာတ်မြေဩဇာများ လုံလောက်စွာ ရရှိရေးအစည်းအဝေးတွင် အမှာစကားပြောကြားစဉ် “ယခုကာလအတွင်း စက်သုံးဆီဈေးနှုန်းများ မြင့်တက်လာသည်နှင့်အတူ ဒေါ်လာဈေးနှုန်းများလည်း အနည်းငယ်မြင့်တက်လာသည်ကို တွေ့ရှိရကြောင်း၊ ထိုသို့ဒေါ်လာဈေးများမြင့်တက်လာခြင်းမှာ စက်သုံးဆီများအပါအဝင်   အခြားပြည်ပသွင်းကုန် တန်ဖိုးများမြင့်မားလာခြင်းကြောင့် ငွေကြေးပမာဏ ပိုမိုသုံးစွဲရပြီး ဒေါ်လာဈေးများမြင့်မားလာခြင်း ဖြစ်ကြောင်း၊ အဓိကအားဖြင့်  ပြည်တွင်းကုန်ဈေးနှုန်းများ မြင့်တက်လာမှုမရှိစေရေးအတွက်   ဝင်ငွေနည်းပါးသည့် ပြည်သူများနှင့်ဝန်ထမ်းများအတွက်  အဓိကထား ဆောင်ရွက်ပေးရမည်ဖြစ်ကြောင်း၊   စက်သုံးဆီ ဈေးများမြင့်တက်မှုမရှိစေရေးအတွက် ပြည်ပမှစက်သုံးဆီများ တင်သွင်းရာတွင် ကောက်ခံလျက်ရှိ သည့် အခွန်အခများလျှော့ပေါ့ ပေးနိုင်ရေးအတွက် စဉ်းစားဆောင်ရွက်သွားရန် လိုကြောင်း” ထည့်သွင်းပြောကြားခဲ့သည်။နိုင်ငံတော်အကြီးအကဲ၏ လမ်းညွှန်ချက်အရ ဘဏ္ဍာရေးနှင့်အခွန်ဝန်ကြီးဌာနအနေဖြင့်  ၂၀၂၆ ခုနှစ်ဧပြီလ ၁ ရက်မှ ၃၀ ရက်နေ့အထိ ဒီဇယ်ဆီHSD (500ppm)တင်သွင်းမှုအပေါ်ကောက်ခံသော အကောက်ခွန်၊ အထူးကုန်စည်ခွန်၊ ကုန်သွယ်လုပ်ငန်းခွန်နှင့် ကြိုတင်ကောက်ခံသည့်ဝင်ငွေခွန်(၂ ရာခိုင်နှုန်း)တို့ကို ကင်းလွတ်ခွင့်ပြုခြင်း၊ ဓာတ်မြေဩဇာများ တင်သွင်းမှုအပေါ်ကောက်ခံသည့် ကြိုတင်ဝင်ငွေခွန်  ၂  ရာခိုင်နှုန်းကိုကင်းလွတ်ခွင့်ပြုခြင်းများနှင့် ပတ်သက်၍ အများပြည်သူသို့  အသိပေးကြေညာချက်များ ထုတ်ပြန်ကြေညာပေးထားသည်။စိုက်ပျိုးရေးလုပ်ငန်းများအတွက် သွင်းအားစုများဖြစ်သည့် ရေနှင့်ဓာတ်မြေဩဇာများလိုအပ် သကဲ့သို့ လယ်ထွန်စက်များနှင့် ရေတင်စက်များအတွက်လည်း စက်သုံးဆီများလိုအပ်မည်ဖြစ်သည်။ ထို့ကြောင့် ရေတင်ခြင်းလုပ်ငန်းများ ဆောင်ရွက်ရာတွင် စက်သုံးဆီသုံးစွဲမှုကို လျှော့ချနိုင်ရန်အတွက် နေရောင်ခြည်စွမ်းအင်သုံး လျှပ်စစ်မြစ်ရေတင်လုပ်ငန်းများကို ဆောင်ရွက်သွားကြရမည်ဖြစ်သည်။  လောင်စာဆီဈေးနှုန်းမြင့်တက်လာမှုနှင့်အတူ  ဓာတ်မြေဩဇာဈေးနှုန်းများ မြင့်တက်လာမှုကြောင့် ဓာတ်မြေဩဇာသုံးစွဲမှုများလျှော့ချပြီး  သဘာဝဓာတ်မြေဩဇာများကို ပိုမိုသုံးစွဲကြရမည်ဖြစ်သည်။      နိုင်ငံတော်အစိုးရအနေဖြင့် ပြည်သူများ၏ စားရေရိက္ခာဖူလုံရေးအတွက် အဓိကထားကြိုးပမ်း ဆောင်ရွက်လျက်ရှိရာ  စိုက်ပျိုးရေး လုပ်ငန်းများအတွက် မဖြစ်မနေလိုအပ်သည့် ဓာတ်မြေဩဇာများကို စိုက်ပျိုးရေးတောင်သူများလက်ဝယ်သို့  ဈေးနှုန်းသက်သာစွာဖြင့်ရောက်ရှိစေရေးအတွက် ထောက်ပံ့ပေးခြင်းနှင့် အခွန်အခကောက်ခံခြင်းများကို   တတ်နိုင်သမျှလျှော့ချပေးခြင်းများကို ဆောင်ရွက်ပေးလျက်ရှိသည်။ ထို့ပြင်  ပြည်တွင်းစားသုံးဆီ လိုအပ်ချက်အရ ပြည်ပမှနှစ်စဉ် တင်သွင်းနေရသဖြင့် နိုင်ငံခြားငွေများစွာသုံးစွဲလျက်ရှိရာ မြန်မာနိုင်ငံအတွင်း စိုက်ပျိုးဖြစ်ထွန်းလျက်ရှိသည့် ဆီထွက်သီးနှံများဖြစ်သော နေကြာ၊ ပဲပုပ်နှင့် နှမ်းတို့ကို ပိုမိုတိုးချဲ့စိုက်ပျိုးကြရမည်ဖြစ်သည်။ အဓိကအားဖြင့် နေကြာစိုက်ပျိုး ထုတ်လုပ်ခြင်းကို ပိုမိုတိုးတက်အောင် ဆောင်ရွက်နိုင်မည်ဆိုပါက ပြည်ပမှ စားသုံးဆီများ တင်သွင်းနေရမှုကိုလျှော့ချနိုင်သလို နိုင်ငံခြားငွေသုံးစွဲမှုများကိုလည်း လျှော့ချနိုင်မည်ဖြစ်သည်။  နိုင်ငံတော်အနေဖြင့်   စိုက်ပျိုးရေးတောင်သူများအတွက် လိုအပ်လျက်ရှိသည့် ဓာတ်မြေဩဇာများကိုလည်း  ဈေးနှုန်းသက်သာစွာဖြင့်တောင်သူများ လက်ဝယ်အရောက် ဖြန့်ဖြူးပေးမည်ဖြစ်ပေရာ တောင်သူများဘက်မှလည်း အတတ်နိုင်ဆုံး ကုန်ထုတ်လုပ်မှုများ ပြုလုပ်ကြရန်ဖြစ်သည်။ ပြည်သူများအနေဖြင့်လည်း စက်သုံးဆီသုံးစွဲမှုကို လျှော့ချနိုင်ပါက တစ်ဖက်မှလည်း နိုင်ငံခြားငွေသုံးစွဲမှုများကို လျှော့ချသွားနိုင်မည်ဖြစ်ပါကြောင်း ရေးသားလိုက်ရပေသည်။   ။MWD   

အရှေ့အလယ်ပိုင်းဒေသ၏ ပဋိပက္ခများကြောင့် ကမ္ဘာ့စီးပွားရေးအပေါ် ရိုက်ခတ်မှုများ ဆက်လက်ဖြစ်ပေါ်နေပြီး ကမ္ဘာ့အရေးအပါဆုံး ရေကြောင်းလမ်းတစ်ခုဖြစ်သည့် ဟော်မုဇ်ရေလက်ကြား (Strait of Hormuz) ပိတ်ဆို့မှုကြောင့် ကုန်သွယ်မှုကွင်းဆက်များ သိသိသာသာ ထိခိုက်လျက်ရှိသည်။အဆိုပါရေလက်ကြားသည် ရေနံကြွယ်ဝသော ပါရှန်ပင်လယ်ကွေ့နှင့် ကမ္ဘာ့အခြားဒေသများကို ချိတ်ဆက်ပေးထားသည့် အဓိက အချက်အချာ ဖြစ်ပြီး ကမ္ဘာ့ရေနံထုတ်လုပ်မှု စုစုပေါင်း၏ ၂၀ ရာခိုင်နှုန်းခန့်သည် ၎င်းလမ်းကြောင်းမှတစ်ဆင့် စီးဆင်းလျက်ရှိသည်။ သို့သော် လက်ရှိတွင် သင်္ဘောအများအပြားမှာ အဆိုပါရေလက်ကြားကို ဖြတ်သန်းခြင်းမပြုဘဲ ရှောင်ကွင်းနေကြခြင်း သို့မဟုတ် ကျောက်ချရပ်နားထားရခြင်းတို့ကြောင့် ရေကြောင်းကုန်သွယ်မှုမှာ ရပ်တန့်လုနီးပါး အခြေအနေသို့ ရောက်ရှိနေပြီဖြစ်သည်။အာရှဒေသရှိ တောင်ကိုရီးယားနှင့် ဂျပန်နိုင်ငံတို့သည် အရှေ့အလယ်ပိုင်းမှ တင်သွင်းသော သဘာဝဓာတ်ငွေ့ရည် (LNG) အပေါ် အဓိကမှီခို နေရသဖြင့် ၎င်းတို့၏ ပြည်တွင်းစီးပွားရေးနှင့် ဈေးကွက်များမှာ များစွာ စိုးရိမ်ရသည့်အခြေအနေသို့ ဆိုက်ရောက်နေသည်။ တောင်ကိုရီးယား နိုင်ငံအတွက် အရေးပါသောကုန်ပစ္စည်းများ တင်ဆောင်လာသည့် ရေနံတင်သင်္ဘော အနည်းဆုံး (၇) စီးခန့်မှာ ဟော်မုဇ်ရေလက်ကြားကို ဖြတ်သန်းနိုင်ခြင်းမရှိဘဲ ပိတ်မိနေကြောင်း တောင်ကိုရီးယား လွှတ်တော်အမတ်တစ်ဦးက ပြောကြားခဲ့သည်။အမေရိကန်တွင် ယခုသီတင်းပတ်အစောပိုင်းက ရေနံဈေးနှုန်းများမြင့်တက်ခဲ့ပြီး ပြည်သူများ၏ လူနေမှုစရိတ်အပေါ် ရိုက်ခတ်မှုများရှိနေသည့် စက်သုံးဆီဈေးနှုန်းများကိုလည်း စတင်မြင့်တက်စေခဲ့ပါသည်။ သို့သော် ဗုဒ္ဓဟူးနေ့ (မတ် ၄) တွင် ရေနံဈေးနှုန်း မြင့်တက်မှုမှာ ခေတ္တရပ်တန့် သွားခဲ့ပြီး အမေရိကန်နှင့် ဥရောပစတော့ရှယ်ယာဈေးကွက်များ ပြန်လည် ဦးမော့လာခဲ့သည်ကို တွေ့ရှိရသည်။ကမ္ဘာ့အကြီးဆုံး ရေကြောင်းကုန်စည်ပို့ဆောင်ရေးလုပ်ငန်းကြီးများ ဖြစ်ကြသည့် Maersk နှင့် Hapag-Lloyd တို့က အရှေ့အလယ်ပိုင်းဒေသရှိ တိုက်ပွဲများကြောင့် ပါရှန်ပင်လယ်ကွေ့ဆိပ်ကမ်းများသို့ ဦးတည်မည့်ကုန်စည်အများစုကို လက်ခံတော့မည်မဟုတ်ကြောင်း ၎င်းတို့၏ ဖောက်သည်များထံ အကြောင်းကြားထားပြီး ဖြစ်သည်။အဆိုပါ ရေကြောင်းလမ်းပိတ်ဆို့မှုသည် ရေနံနှင့်အခြား ကုန်စည်များသာမက စားနပ်ရိက္ခာလုံခြုံမှုကိုပါ ခြိမ်းခြောက်လျက်ရှိသည်။ အိုမန်၊ ဆော်ဒီ အာရေဗျ၊ အာရပ်စော်ဘွားများပြည်ထောင်စု၊ ကာတာ၊ ဘာရိန်းနှင့် ကူဝိတ်စသည့် ပင်လယ်ကွေ့ အာရပ်ခြောက်နိုင်ငံသည် ၎င်းတို့၏ ရာသီဥတုမှာ စိုက်ပျိုးရေးအတွက်ခက်ခဲသောကြောင့် စားနပ်ရိက္ခာ၏ ၈၅ ရာခိုင်နှုန်းခန့်ကို ပြည်ပမှ တင်သွင်းနေရခြင်း ဖြစ်သည်။အဆိုပါနိုင်ငံများအနေဖြင့် ပင်လယ်ရေကြောင်းမှတစ်ဆင့် စားနပ်ရိက္ခာတင်သွင်းရာတွင် ဟော်မုဇ်ရေလက်ကြားကို မဖြစ်မနေဖြတ်သန်းရမည် ဖြစ်သဖြင့် အစားထိုးလမ်းကြောင်း အနည်းငယ်သာရှိသည်။ သို့သော်လည်း အဆိုပါပင်လယ်ကွေ့နိုင်ငံအများစုတွင် လအတန်ကြာ အသုံးပြုနိုင်သည့် ကြီးမားသော အရေးပေါ်ရိက္ခာနှင့် ကောက်ပဲသီးနှံ သိုလှောင်ရုံများ ရှိနေကြသည်။ကိုးကား- CNNဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ ဝန်ကြီး-၂

ဝါသည် သဘာဝချည်မျှင် အခြေခံ MSME စက်မှုလုပ်ငန်းများ ဖွံ့ဖြိုးတိုးတက်ရေးအတွက် အဓိကအကျဆုံးသော စက်မှုကုန်ကြမ်းသီးနှံဖြစ်သည်။ မြန်မာနိုင်ငံသည် ဝါကို ရှေးကာလများကတည်းကပင် ပြည်တွင်း၌ စိုက်ပျိုးခဲ့ကြပြီး ရက်ကန်းလုပ်ငန်းများတွင် သုံးစွဲခဲ့ကြသလို ဝါကုန်ကြမ်းကို ပြည်ပသို့တင်ပို့ခဲ့သည့် သမိုင်းကြောင်းလည်းရှိခဲ့သည်။ ယခုအခါ ဝါစိုက်ပျိုးထုတ်လုပ်မှုကို အားပေးမြှင့်တင်၍ ပြည်တွင်းဖူလုံမှုမှသည် ပြည်ပသို့တင်ပို့နိုင်ရန်အထိ ရည်မှန်းချက်ထား၍ ကြိုးပမ်းဆောင်ရွက်လျက်ရှိသည်။မြန်မာနိုင်ငံအတွက် အရေးပါသော စက်မှုကုန်ကြမ်းသီးနှံဖြစ်သည့် ဝါကို နှစ်အလိုက် တိုးချဲ့စိုက်ပျိုးရန်ကြိုးပမ်းလျက်ရှိပြီး ၂၀၂၂-၂၀၂၃ ခုနှစ်မှ ၂၀၂၅-၂၀၂၆ ခုနှစ်အထိ စစ်ကိုင်းတိုင်းဒေသကြီး၊ မကွေးတိုင်းဒေသကြီး၊ မန္တလေးတိုင်းဒေသကြီးနှင့် ပဲခူးတိုင်းဒေသကြီး၊ ရှမ်းပြည်နယ်နှင့် နေပြည်တော်ကောင်စီနယ်မြေတို့ကို စီမံကိန်းဒေသများအဖြစ် သတ်မှတ်ဆောင်ရွက်ခဲ့သည်။ ဝါစိုက်ပျိုးမှုအများ ဆုံးဒေသသည် မကွေးတိုင်းဒေသကြီးဖြစ်ပြီး စိုက်ဧရိယာစုစုပေါင်း၏ ၄၅ ဒသမ ၃၇ ရာခိုင်နှုန်း၊ ဒုတိယအများဆုံးသည် မန္တလေးတိုင်းဒေသကြီးဖြစ်ပြီး ၃၆ ဒသမ ၂၈ ရာခိုင်နှုန်းဖြစ်သည်ဟုသိရသည်။ ဝါအမျိုးအစားအနေဖြင့် ချည်မျှင်ရှည်ဝါ စိုက်ပျိုးမှုသည် ၉၄ ဒသမ ၃၃ ရာခိုင်နှုန်းရှိပြီး ချည်မျှင်တိုဝါ စိုက်ပျိုးမှုသည် ၅ ဒသမ ၆၇ ရာခိုင်နှုန်းရှိသည်။ တိုးတက်လျက်ရှိသည့် နိုင်ငံ့လူဦးရေနှင့်အညီ ဝတ်ရေးလိုအပ်ချက်အတွက် ဝါကို တိုးချဲ့စိုက်ပျိုးသွားရမည်ဖြစ်သည်နှင့်အညီ ဝါစိုက်ပျိုးရေးစီမံကိန်းကာလ ပြီးဆုံးပြီးနောက် ၂၀၂၇- ၂၀၂၈ ခုနှစ်တွင် ဝါစိုက်ပျိုးရေးဧရိယာ ဧက ၇၄၇၀၀၀ အထိ စိုက်ပျိုးသွားနိုင်ရေးနှင့် ဝါအထွက်နှုန်း တစ်ဧကလျှင် ပိဿာ ၇၀၀ ထွက်ရှိရေးတို့ကို ဝါသီးနှံစိုက်ပျိုးရေးဇုန်အလိုက် တာဝန်ပေးအပ်ဆောင်ရွက်သွားမည်ဖြစ်သည်ဟု သတင်းများအရ သိရသည်။စိုက်ပျိုးရေးဦးစီးဌာနသည် ဝါစိုက်တောင်သူများအတွက် အရည်အသွေးကောင်း၊ အထွက်နှုန်းလည်းကောင်းမွန်ပြီး ပိုးမွှားဒဏ် ခံနိုင်ရည်ရှိသော ဝါမျိုးများကို စဉ်ဆက်မပြတ် သုတေသနပြု ထုတ်လုပ်ဖြန့်ဖြူးပေးခြင်း၊ ဝါအထွက်တိုး စိုက်ပျိုးနည်းစနစ်များကို သုတေသနပြုလုပ်၍ ရရှိလာသည့် ရလဒ်ကောင်းများကို ဝါစိုက် တောင်သူများထံ နည်းပညာဖြန့်ဝေပေးခြင်းတို့ ဆောင်ရွက်လျက်ရှိသည်။ ဝါသီးနှံ ပန်းတိုင်အထွက်နှုန်း တစ်ဧက ပိဿာ ၇၀၀ ထွက်ရှိ ရေးအတွက်လည်းဆောင်ရွက်ရန် လမ်းညွှန်ချက်များနှင့်အညီ စီမံ ချက်များ ရေးဆွဲချမှတ်ဆောင်ရွက်လျက်ရှိရာ အရည်အသွေးကောင်း ဝါများ အထွက်နှုန်းကောင်းမွန်စွာရရှိပြီး ဈေးကောင်းရရှိမည်ဆိုပါက တောင်သူတို့ ဝင်ငွေများတိုးတက်ရရှိနိုင်ကြမည်ဖြစ်သည်။ ဝါစိုက်ပျိုးမှုကို သတ်မှတ်ပန်းတိုင်ရည်မှန်းချက်များအတိုင်း စိုက်ပျိုးထုတ်လုပ် နိုင်မည်ဆိုပါက ပြည်တွင်းချည်သုံးစွဲမှုကို ဖူလုံစေမည်ဖြစ်သဖြင့် နိုင်ငံ့ဝင်ငွေရရှိရေးကို ကြီးမားစွာ အထောက်အကူပြုနိုင်မည် ဖြစ်သည်။ သီးနှံများပန်းတိုင်အထွက်နှုန်း သတ်မှတ်ပေးထားသည်များနှင့်အညီ ထွက်ရှိအောင် အားထုတ်ကြိုးပမ်းဆောင်ရွက်နိုင်ကြ သည်နှင့်အမျှ တောင်သူတို့တစ်ဦးချင်း ဝင်ငွေများ တိုးတက်ရရှိကြပြီး လူနေမှုအဆင့်အတန်းလည်း များစွာမြင့်မားလာကြမည်ဖြစ်သည်။ “ပြည်တွင်းမှထွက်ရှိသည့် ဝါဂွမ်းများကို ပြည်တွင်းစျေးကွက်တွင် ရောင်းချနိုင်ရေးနှင့် ချည်ကုန်ချောများ၊ အဆင့်မြင့်ချည်ထည်များ ထုတ်လုပ်နိုင်ရေး ဆောင်ရွက်ပေးရန်လိုကြောင်း၊ ဝါသီးနှံစိုက်ပျိုးထုတ်လုပ်မှုနှင့် ချည်မျှင်နှင့်အထည်ချုပ်လုပ်ငန်းများ ဖွံ့ဖြိုးတိုးတက်ရေးအတွက် ဦးစွာအရည်အသွေးကောင်းသော (A)အဆင့်ရှိဝါများ ပြောင်းလဲစိုက်ပျိုးနိုင်ရန်လိုကြောင်း၊ ထိုမှတစ်ဆင့်ထွက်ရှိလာသည့် ဝါကုန်ကြမ်းများကို ချည်မျှင်ထုတ်လုပ်နိုင်ရေးနှင့် ပိတ်အဖြစ် ပြောင်းလဲထုတ်လုပ်နိုင်ရေး စက်ကိရိယာများလိုအပ်ကြောင်း” နိုင်ငံတော်အကြီးအကဲက ၂၀၂၄ ခုနှစ် မတ်လအတွင်း ကျင်းပခဲ့ သည့် ဝါသီးနှံစိုက်ပျိုးထုတ်လုပ်မှုနှင့် ချည်မျှင်နှင့်အထည်အလိပ် လုပ်ငန်းများဖွံ့ဖြိုးတိုးတက်ရေး ညှိနှိုင်းဆွေးနွေးပွဲသို့ တက်ရောက်ဆွေးနွေးရာတွင် ထည့်သွင်းပြောကြားခဲ့သည်။ သို့ဖြစ်ရာ ဝါကို စိုက်ဧကနှင့် အထွက်နှုန်းတိုးတက်ကောင်းမွန်အောင် ဆောင်ရွက်ခြင်းနှင့်အတူ အရည်အသွေးလည်း (A) အဆင့်ရှိ ကောင်းမွန်ရန် လိုအပ်သည်။စက်မှုကုန်ကြမ်းသီးနှံဖြစ်သော ဝါစိုက်ပျိုးထုတ်လုပ်မှု မြင့်မား တိုးတက်လာသည်နှင့်အမျှ ဝါစက်မှုလုပ်ငန်းများဖြစ်သည့် ဝါကြိတ်စက်များ၊ ချည်မျှင်နှင့်အထည်စက်များ၊ အထည်ချုပ်လုပ်ငန်းများ စသည်တို့လည်း ဖွံ့ဖြိုးတိုးတက်လာကြမည်ဖြစ်သည်။ ဝါကြိတ်စက်မှထွက်လာသည့် ဝါစေ့သည် ဝါစေ့ဆီနှင့် တိရစ္ဆာန်အစာ ဝါကြိတ်ဖတ်တို့ ဆက်လက်ထုတ်လုပ်နိုင်သည်။ သို့ဖြစ်ရာ ဝါသီးနှံသည် MSME စက်မှုလုပ်ငန်းများနှင့် ဆက်နွှယ်ကာ အလုပ်အကိုင်အခွင့်အလမ်းများ ပိုမိုတိုးတက်လာစေရေးအတွက်လည်း များစွာအကျိုးပြုလျက်ရှိရာ အရည်အသွေးကောင်း ဝါမျိုးများကို စိုက်ဧကပြည့်မီ ကျော်လွန်ရေးနှင့် ပန်းတိုင်အထွက်နှုန်းရရှိရေး အားသွန်ကြိုးပမ်း ဆောင်ရွက်ကြရပါမည့်အကြောင်း။ ။moi

မြန်မာနိုင်ငံတွင် စိုက်ပျိုးမွေးမြူရေးလုပ်ငန်းများကို အခြေခံသည့် ကုန်ထုတ်လုပ်ငန်းများ တိုးတက်အောင် ကြိုးပမ်းဆောင်ရွက်ပြီး နိုင်ငံ့စီးပွားရေးမြင့်မားလာအောင် ကြိုးပမ်းဆောင်ရွက်လျက်ရှိသည်။ နိုင်ငံ့စီးပွားရေးမြင့်မားလာမှ နိုင်ငံဖွံ့ဖြိုးတိုးတက်ပြီး လူမှုစီးပွားဘဝများကို မြှင့်တင်ပေးနိုင်မည်ဖြစ်သည်။ စီးပွားရေးတိုးတက်အောင် ဆောင်ရွက်ပြီး သူတစ်ပါးအမှီအခိုကင်းစွာဖြင့် ကိုယ့်ခြေထောက်ပေါ်ကိုယ်ရပ်တည်နိုင်အောင်၊ နိုင်ငံ၏ GDP မြင့်မားတိုးတက်ပြီး နိုင်ငံဖွံ့ဖြိုးတိုးတက်လာအောင် မဖြစ်မနေ ကြိုးပမ်းဆောင်ရွက်ကြရမည်ဖြစ်သည်။နိုင်ငံတော်ယာယီသမ္မတ နိုင်ငံတော်လုံခြုံရေးနှင့်အေးချမ်းသာယာရေးကော်မရှင်ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်သည် ဖေဖော်ဝါရီ ၉ ရက်က ရွေးကောက်ပွဲကော်မရှင်ဥက္ကဋ္ဌ၊ နေပြည်တော်ကောင်စီဥက္ကဋ္ဌ၊ တိုင်းဒေသကြီးနှင့် ပြည်နယ်ဝန်ကြီးချုပ်များအား တွေ့ဆုံစဉ် “နိုင်ငံတစ်ခု ဖွံ့ဖြိုးတိုးတက်ရေးအတွက် စီးပွားရေးမောင်းနှင်အားသည် အဓိကကျကြောင်း၊ ထို့ကြောင့် မိမိတို့အစိုးရအဖွဲ့အနေဖြင့် ကျန်ရှိနေသည့်အချိန်အတွင်း နိုင်ငံစီးပွားရေးတိုးတက်အောင် ဆောင်ရွက်ပေးသွားရမည်ဖြစ်ကြောင်း၊ စီးပွားရေးဖွံ့ဖြိုးတိုးတက်မှသာ နိုင်ငံဖွံ့ဖြိုး တိုးတက်လာမည်ဖြစ်သဖြင့် ရသမျှအချိန်အတွင်း နိုင်ငံ့စီးပွားရေး ဖွံ့ဖြိုးတိုးတက်အောင် ဝိုင်းဝန်းဆောင်ရွက်သွားကြစေလိုကြောင်း၊ ထိုသို့ဆောင်ရွက်ရာတွင် စိုက်ပျိုးမွေးမြူရေးထုတ်ကုန်လုပ်ငန်းများကို အခြေခံ၍ ဆောင်ရွက်သွားကြရမည်ဖြစ်ကြောင်း” ပြောကြားခဲ့သည်။မြန်မာနိုင်ငံသည် စိုက်ပျိုးရေးကို အခြေခံသောနိုင်ငံဖြစ်၍ ပန်းတိုင်ရည်မှန်းချက်များ ပြည့်မီအောင် စိုက်ပျိုးထုတ်လုပ်နိုင်ခြင်းဖြင့် ပြည်ပပို့ကုန်များ ပိုမိုရရှိလာကာ နိုင်ငံ၏ GDP တိုးတက်လာမည်ဖြစ်သည်။ စိုက်ပျိုးရေးလုပ်ငန်းများကို တစ်ဧကအထွက်နှုန်းတိုးတက်ရေး ဆောင်ရွက်သွားရန်လိုပြီး သီးထပ်စိုက်ပျိုးခြင်းလုပ်ငန်းများကိုလည်း ဆောင်ရွက်နိုင်ရေး တွန်းအားပေးဆောင်ရွက်သွားကြရန်လိုသည်။ နိုင်ငံတော်အကြီးအကဲအနေဖြင့် ပြည်တွင်းစားသုံးဆီဖူလုံရေးအတွက် နိုင်ငံ့တာဝန်စတင်ယူချိန်မှစ၍ ကြိုးပမ်းဆောင်ရွက်ခဲ့သော်လည်း ထိုက်သင့်သလောက်သာ အောင်မြင်မှုရရှိခဲ့သည်။ ထို့ကြောင့် ဆီထွက်သီးနှံစိုက်ပျိုးမှုများ အောင်မြင်ဖြစ်ထွန်းစေရေး ဆက်လက်ကြိုးပမ်း ဆောင်ရွက်ကြရမည်ဖြစ်သည်။ ဆီထွက်သီးနှံများကို ကုန်ကြမ်းအဖြစ် ပြည်ပတင်ပို့ခြင်းထက် ပြည်တွင်းဆီထုတ်လုပ်မှုကို အထောက်အကူပြုမည့် ဆီထွက်သီးနှံများ စိုက်ပျိုးထုတ်လုပ်ရန်လိုသည်။ သို့မှသာ ပြည်တွင်းဆီဖူလုံမှု တိုးတက်လာပြီး နိုင်ငံခြားငွေသုံးစွဲမှု လျှော့ချနိုင်မည်ဖြစ်သည်။နိုင်ငံ့စီးပွားဖွံ့ဖြိုးတိုးတက်ရေးအတွက် MSME လုပ်ငန်းများသည် အဓိကကျသည့်အခန်းကဏ္ဍမှ ပါဝင်နေပြီး များစွာတိုးတက်မှုရှိနေသည်ကိုလည်း တွေ့ရသည်။ MSME လုပ်ငန်းများကို လက်ရှိဆောင်ရွက်နေသည်ထက် ပိုမိုကောင်းမွန်သည့် ထုတ်လုပ်မှုများကို တိုးမြှင့်ဆောင်ရွက်သွားကြရန်လိုသည်။ ပြည်ပသွင်းကုန်အစားထိုးထုတ်ကုန်များနှင့် ပြည်ပပို့ကုန်များရရှိလာအောင် တီထွင်ကြံဆလုပ်ကိုင်ကြရမည်ဖြစ်သည်။ နည်းပညာအရသော်လည်းကောင်း၊ ထုတ်လုပ်မှုအရသော်လည်းကောင်း အရည်အသွေးနှင့် အဆင့်အတန်းမြင့်မားလာစေရေး ယခုထက်ပိုမိုကြိုးပမ်းထုတ်လုပ်ကြရန်လိုသည်။ လက်ရှိထုတ်လုပ်နေသည့် အရည်အသွေးများ၊ အမျိုးအမည်များ၊ အရေအတွက်များထက်ကျော်လွန်ပြီး ထုတ်လုပ်မည်ဆိုပါက နိုင်ငံ့စီးပွားရေး တိုးတက်ကောင်းမွန်လာမည်ဖြစ်သည်။စိုက်ပျိုးရေးတွင် ပန်းတိုင်ရည်မှန်းချက်မပြည့်မီမှုကြောင့် နိုင်ငံခြားဝင်ငွေများ နှစ်စဉ်လျော့နည်းလျက်ရှိသည်။ ထို့ကြောင့် ဝင်ငွေများတိုးတက်ရရှိလာစေရေး တစ်ဧကပန်းတိုင်ရည်မှန်းချက်အတိုင်း ထွက်ရှိလာအောင် ကြိုးပမ်းဆောင်ရွက်ကြ ရမည်ဖြစ်သည်။ ထိုသို့ဆောင်ရွက်ခြင်းဖြင့် ပြည်ပဝင်ငွေများ ပိုမိုရရှိလာပြီး ပြည်တွင်းစီးပွားရေးတိုးတက်မှုကို များစွာအထောက်အကူပြုမည်ဖြစ်သည်။ နိုင်ငံ့စီးပွားရေး တိုးတက်အောင်ဆောင်ရွက်ခြင်းသည် အနာဂတ်တွင် နိုင်ငံ့တာဝန်ယူမည့်အစိုးရအတွက် အထောက်အကူဖြစ်စေရေး ကြိုးပမ်းဆောင်ရွက်ပေးခဲ့ရမည် ဖြစ်သည်။ နိုင်ငံ့စီးပွားရေးတိုးတက်မှုနှင့်အတူ “နိုင်ငံတော်သာယာဖို့ သဘာဝပတ်ဝန်းကျင် ထိန်းကြစို့” ဆောင်ပုဒ်နှင့်အညီ ပြည်သူများ သာယာလှပသည့် ပတ်ဝန်းကျင်ကောင်းတွင် နေထိုင်နိုင်ရေး ဖန်တီးကြရမည်ဖြစ်သည်။ သစ်တောသစ်ပင်များ စိုက်ပျိုးထိန်းသိမ်းရန်လိုသကဲ့သို့ မြို့ရွာများ သန့်ရှင်းသာယာလှပ စိမ်းလန်းသာယာရေးအတွက်လည်း သက်ဆိုင်ရာ တိုင်းဒေသကြီးနှင့် ပြည်နယ်များအလိုက် ကြိုးပမ်းဆောင်ရွက်ခြင်းဖြင့် ပြည်သူများ အေးချမ်းသာယာမှုကို ပိုမိုရရှိစေမည်ဖြစ်သည်။သို့ဖြစ်ရာ နိုင်ငံ့စီးပွားတိုးတက်ကောင်းမွန်လာစေရန် ဆောင်ရွက်ပေးနေခြင်းသည် အနာဂတ်တွင် နိုင်ငံတော်တာဝန်ကို လက်ဆင့်ကမ်းပြောင်းလဲထမ်းဆောင်မည့် အစိုးရများအနေဖြင့် ပိုမိုတိုးတက်ကောင်းမွန်လာအောင် အခြေခံကောင်းများ အုတ်မြစ်ချပေးနေခြင်းဖြစ်ပြီး အခြေခံကောင်းများနှင့် နိုင်ငံတော်ဖွံ့ဖြိုးတိုးတက်လာကာ ပြည်သူများ၏ လူမှုစီးပွားဘဝများ မြင့်မားတိုးတက်လာအောင် စေတနာကောင်းများဖြင့် ဆောင်ရွက်ပေးနေခြင်းဖြစ်ပါကြောင်း။ ။moi

(၇၉) နှစ်မြောက် ပြည်ထောင်စုနေ့ကို ကြိုဆိုဂုဏ်ပြုသောအားဖြင့် ပြည်ထောင်စုအဆင့် MSME ထုတ်ကုန်ပြပွဲနှင့် ဈေးရောင်းပွဲတော်ကို လာမည့် ဖေဖော်ဝါရီ ၈ ရက်မှ ၁၃ ရက်အထိ နေပြည်တော် ရင်ပြင်၌ ကျင်းပသွားမည်ဖြစ်ရာ ပြင်ဆင်မှုလုပ်ငန်းများ ပြီးပြည့်စုံသွားပြီဖြစ်သည်။ ပြည်ထောင်စုအဆင့်ပွဲတော်ဖြစ်သည်နှင့်အညီ နိုင်ငံတစ်ဝန်းမှ MSME ထုတ်ကုန်များ၊ ဒေသထွက်ကုန် ပစ္စည်းများ၊ စားသောက်ကုန်၊ လူသုံးကုန်၊ လက်မှုထုတ်ကုန်စသည်ဖြင့် အမျိုးအစားစုံလင်စွာ တစ်စုတစ်ဝေး တွေ့မြင်ခွင့်ရကြမည်ဖြစ်သကဲ့သို့ MSME လုပ်ငန်းရှင်များအတွက်လည်း အတွေးသစ်၊ အမြင်သစ်၊ အခွင့်အလမ်းသစ်များ ရရှိနိုင်ကြမည်ဖြစ်သည်။ပြည်ထောင်စုအဆင့် MSME ထုတ်ကုန်ပြပွဲနှင့် ဈေးရောင်းပွဲတော်ကြီးတွင် နေပြည်တော်ကောင်စီအပါအဝင် တိုင်းဒေသကြီးနှင့် ပြည်နယ်ကိုယ်စားပြု ပြခန်း ၁၅ ခန်း၊ ဝန်ကြီးဌာန ပြခန်းများ၊ လုပ်ငန်း/ စီးပွားချိတ်ဆက်မှုများ (Business Matching)၊ နည်းပညာ ပြခန်းများ၊ လယ်ယာသုံးစက်ပစ္စည်းနှင့် ထုတ်ကုန်ပြခန်းများ၊ အသေးစားစက်မှုလက်မှုလုပ်ငန်းနှင့် ကုန်ထုတ်သမဝါယမပြခန်းများ၊ အသင်းအဖွဲ့ပြခန်းများ၊ Solar Farm များ၊ SKD ဦးစားပေး EV ကား၊ မော်တော်ဆိုင်ကယ်၊ သုံးဘီးဆိုင်ကယ်ပြခန်းများ၊ CMP အထည်ချုပ်ပြခန်းများစသည်တို့အပါအဝင် ပြခန်းစုစုပေါင်း ၁၂၄ ခန်း ပါဝင်မည်ဖြစ်သည်ဟု သတင်းများအရ သိရသည်။ဤတွင် ပို့ကုန်/သွင်းကုန်လုပ်ငန်းရှင်ဖြစ်လိုသူများ၊ ပြည်တွင်း MSME လုပ်ငန်းရှင်များ မိမိတို့၏လုပ်ငန်းများ တိုးချဲ့ဆောင်ရွက်နိုင်ရေးအတွက် လေ့လာ၊ ဆွေးနွေးဆောင်ရွက်နိုင်မည့် လုပ်ငန်း/ စီးပွားချိတ်ဆက်မှုပြခန်းမှာ လုပ်ငန်းရှင်များအဖို့ စိတ်ဝင်စားဖွယ်ရာဖြစ်သကဲ့သို့ လက်တွေ့အကျိုးဖြစ်ထွန်းနိုင်ကြမည်လည်းဖြစ်သည်။ စီးပွားရေးနှင့် ကူးသန်းရောင်းဝယ်ရေးဝန်ကြီးဌာနက ဖွင့်လှစ်သည့် အဆိုပါပြခန်းတွင် MSME ထုတ်ကုန်များကို ပြည်တွင်းရှိ စတိုးဆိုင်များ၊ လက်လီလက်ကားဆိုင်ကြီးများနှင့် တိုက်ရိုက်တွေ့ဆုံနိုင်မည့် ပြည်တွင်းစျေးကွက် ချိတ်ဆက်မှုအခွင့်အလမ်းကို ရရှိကြမည်ဖြစ်သည်။ ထို့အပြင် online e.commerce platform မှတစ်ဆင့် မိမိတို့၏ထုတ်ကုန်များကို နိုင်ငံတကာဝယ်လက်များသို့ တိုက်ရိုက်ချိတ်ဆက်နိုင်မည့် ပြည်ပဈေးကွက်အခွင့်အလမ်းကိုလည်း ရရှိနိုင်သည်။အဆိုပါ လုပ်ငန်း/စီးပွားချိတ်ဆက်မှုပြခန်းတွင် ပို့ကုန်သွင်းကုန်လုပ်ငန်းရှင်တစ်ဦးဖြစ်စေမည့် လုပ်ငန်းစဉ်များ၊ သီလဝါအထူးစီးပွားရေးဇုန်၏ Promotion Zone အတွင်း ထုတ်လုပ်ရေးလုပ်ငန်း များ၊ ပို့ကုန်သွင်းကုန်လုပ်ငန်းရှင်များ၊ လက်လီလက်ကားရောင်းချသူများ၏ အချင်းချင်းချိတ်ဆက်မှုလုပ်ငန်းစဉ်များ၊ ဘဏ်များနှင့် ချိတ်ဆက်ဆောင်ရွက်ရမည့် လုပ်ငန်းစဉ်များ၊ အကောက်ခွန်ဦးစီးဌာနနှင့် ပို့ကုန်သွင်းကုန်လုပ်ငန်းရှင်များအကြား လုပ်ငန်းစဉ်များ၊ ပို့ကုန်သွင်းကုန်လုပ်ငန်းရှင်များနှင့် နိုင်ငံတကာတွင်ရှိသော မြန်မာနိုင်ငံ၏ စီးပွားရေးသံမှူးများနှင့် အွန်လိုင်းမှ ဆွေးနွေးနိုင်မည့် ဝန်ဆောင်မှုများ၊ မူပိုင်ခွင့်ဆိုင်ရာ သိသင့်သိထိုက်သည်များ၊ ကုန်စည် ပြပွဲနှင့် သက်ဆိုင်သည့် ကိစ္စရပ်များကို ချိတ်ဆက်ဆောင်ရွက်ပေးမည့်အစီအစဉ်များလည်းရှိရာ လုပ်ငန်းရှင်များအားလုံး မဖြစ်မနေ သွားရောက်လေ့လာကြရန်လိုသည်။ထိုမျှပင်မကသေး မိမိတို့ကုန်ပစ္စည်းများ ပြည်ပစျေးကွက်ဝင်ရောက်နိုင်ရန်လိုအပ်သည့် Certificate ရရှိရေးနှင့် မှတ်ပုံတင်ခြင်းကိစ္စများ၊ နိုင်ငံတကာကုန်စည်ပြပွဲများတွင် ပါဝင်ပြသရေး ကိစ္စများ၊ ရင်းနှီးမြှုပ်နှံမှုအတွက် ပုဂ္ဂလိကဘဏ်များမှ ဘဏ်ချေးငွေရရှိရေး၊ ဘဏ်များ၏ ဝန်ဆောင်မှုများဆိုင်ရာ သတင်းအချက်အလက်များရရှိရေး ချိတ်ဆက်မှုတို့ကိုလည်း ဆောင်ရွက်နိုင်ကြမည်ဖြစ်ရာ တစ်နှစ်တစ်ခါ တစ်နေရာတည်းတွင် ရရှိနိုင်ကြမည့် အထူးအခွင့်အရေးများပင်ဖြစ်သည်။မိမိတို့နိုင်ငံ၏ စီးပွားရေးဖွံ့ဖြိုးတိုးတက်မှုမှာ နိုင်ငံ့စီးပွားရေးကို အဓိကမောင်းနှင်နေသော MSME လုပ်ငန်းများ အားကောင်းမောင်းသန် ဖွံ့ဖြိုးတိုးတက်မှုအပေါ်တွင် တည်မှီလျက်ရှိသည်။ သို့ဖြစ်သည့်အလျောက် ကုန်ထုတ်လုပ်မှု၊ ကုန်သွယ်မှု၊ ဝန်ဆောင်မှုကဏ္ဍအသီးသီးတို့တွင်ရှိနေသည့် MSME လုပ်ငန်းများ ဖွံ့ဖြိုးလာစေရန် အဘက်ဘက်မှလိုအပ်ချက်များကို ဖြည့်ဆည်း၍ မြေတောင်မြှောက်ပေးလျက်ရှိသည်။ ပြည်ထောင်စုအဆင့် MSME ထုတ်ကုန်ပြပွဲနှင့် ဈေးရောင်းပွဲတော်ကြီးသည် ပြည်ထောင်စုတစ်ဝန်းလုံးတွင် ရှိနေကြသည့် MSME လုပ်ငန်းများအတွက် ထူးခြားသည့်အခွင့်အလမ်းများ ဖော်ဆောင်ပေးနေခြင်းဖြစ်သည့် အလျောက် ရရှိလာသည့် အခွင့်အလမ်းကို မလွတ်တမ်း ရယူဆုပ်ကိုင်ကာ လုပ်ငန်းများ အောင်မြင်ကြီးပွားတိုးတက်ကြပါစေကြောင်း။ ။moi

နှစ်စဉ်နှစ်တိုင်း ပြည်ထောင်စုနေ့အချိန်ကာလရောက်တိုင်း မြန်မာနိုင်ငံ၏ စုပေါင်းဆောင်ရွက်နိုင်မှုစွမ်းပကားများကို ဖော်ထုတ်ပြသလေ့ရှိသည်။ ပြည်ထောင်စုသားများအားလုံး၏ ညီညွတ်မှုစွမ်းပကားများသာမက ပြည်ထောင်စုသားများ၏ ကာယ၊ ဉာဏဆောင်ရွက်နိုင်မှုစွမ်းပကားများကို ဖော်ထုတ်ပြသကြခြင်းသည် မြန်မာနိုင်ငံ အဓွန့်ရှည်တည်တံ့ခိုင်မြဲရေး၊ ဖွံ့ဖြိုးတိုးတက်ရေးကို အထောက်အကူပြုသည့် စုပေါင်းစွမ်းပကားများပင်ဖြစ်သည်။(၇၉)နှစ်မြောက် ပြည်ထောင်စုနေ့ကို ဂုဏ်ပြုကြိုဆိုသောအားဖြင့် ပြည်ထောင်စုအဆင့် အသေးစား၊ အငယ်စားနှင့်အလတ်စား စီးပွားရေးလုပ်ငန်းများ (MSME) ထုတ်ကုန်ပြပွဲနှင့် ဈေးရောင်းပွဲတော်ကို နေပြည်တော်ရင်ပြင်၌ ဖေဖော်ဝါရီ ၈ ရက်မှ ၁၃ ရက်နေ့အထိ ခြောက်ရက်တာ ကျင်းပသွားမည်ဖြစ်သည်။ MSME ထုတ်ကုန်ပြပွဲနှင့် ဈေးရောင်းပွဲတော်တွင် နေပြည်တော်ကောင်စီနယ်မြေအပါအဝင် တိုင်းဒေသကြီးနှင့် ပြည်နယ်ကိုယ်စားပြု ပြခန်း ၁၅ ခန်း ပါဝင်ပြသသွား မည်ဟု သိရသည်။ ပြခန်းများအပြင် ဝန်ကြီးဌာနပြခန်းများ၊ လုပ်ငန်း/ စီးပွားချိတ်ဆက်မှုများ၊ နည်းပညာပြခန်းများ၊ လယ်ယာသုံးစက်ပစ္စည်းနှင့် ထုတ်ကုန်ပြခန်းများ၊ အသေးစားစက်မှုလက်မှုလုပ်ငန်းနှင့် ကုန်ထုတ်သမဝါယမပြခန်းများ၊ အသင်းအဖွဲ့ပြခန်းများ၊ လျှပ်စစ်နှင့် စက်မှုယာဉ်ပြခန်းများ၊ အထည်ချုပ်ပြခန်းများစသည့် ပြခန်းပေါင်း ၁၂၄ ခန်းတို့ကို ပြသသွားမည်ဖြစ်သည်။MSME ထုတ်ကုန်ပြပွဲနှင့် ဈေးရောင်းပွဲတော်၌ ပါဝင်ပြသမည့်ပြခန်းများတွင် MSME ထုတ်ကုန်များ၊ ဒေသထွက်ကုန်ပစ္စည်းများ၊ လယ်ယာလုပ်ငန်းနှင့်စက်မှုလုပ်ငန်းများကို ပြခန်းအလိုက် အမျိုးအစားစုံလင်စွာ ပါဝင်ပြသနိုင်ရေး စီစဉ်ဆောင်ရွက်လျက်ရှိသည်။ ထို့အပြင် မိုက်ကရိုအသေးစားထုတ်ကုန်များ၊ အငယ်စားထုတ်ကုန်များ၊ အလတ်စားထုတ်ကုန်များ၊ စားသောက်ကုန်၊ လူသုံးကုန်၊ ရက်ကန်း၊ လက်မှုထည်စသည့် အသေးစားစက်မှုလုပ်ငန်းထုတ်ကုန်များ၊ ကုန်ထုတ်သမဝါယမအသင်း၏စွမ်းဆောင်ရည်နှင့် ပြည်နယ်နှင့် တိုင်းဒေသကြီး ၁၅ ခုမှ ဒေသတစ်ခု ထုတ်ကုန်တစ်ခု ထုတ်ကုန်များကိုလည်း ထည့်သွင်းပြသသွားမည်ဖြစ်သည်။ ထို့အတူ ဒေသအလိုက် ထင်ရှားလူကြိုက်များသည့် တိုင်းရင်းသားရိုးရာအစားအစာများလည်း ရောင်းချပေးသည့် အစီအစဉ်လည်းပါဝင်သည်။စိုက်ပျိုးရေးလုပ်ငန်းကို အခြေခံသည့် နည်းပညာရပ်များအား ပြသသွားမည်ဖြစ်ပြီး ဟင်းသီးဟင်းရွက်နှင့် သစ်သီးဝလံများမှ ထုတ်လုပ်ထားသည့် တန်ဖိုးမြှင့် စားသောက်ကုန်များဖြစ်သည့် ဝိုင်၊ ဖျော်ရည်၊ အမှုန့်၊ အနှစ်၊ သစ်သီးခြောက်နှင့်ယိုအမျိုးမျိုး၊ စက်မှုကုန်ကြမ်းနှင့် လူသုံးကုန်ပစ္စည်းများဖြစ်သည့် ဝါဂွမ်းမှထွက်ရှိသည့် ချည်ထည်များအပြင် ပိုးစာမှထုတ်လုပ်သည့် ဆပ်ပြာ၊ ခေါင်းလျှော်ရည်၊ မျက်နှာသစ်ဆေးနှင့် အရေပြားအလှကုန်ပစ္စည်းများ၊ နှစ်ရှည်သီးနှံများဖြစ်သည့် မက္ကဒေးမီးယားဆီကို အခြေခံသည့် လူသုံးကုန်အလှအပပစ္စည်းများ၊ ပျားရည်၊ ရော်ဘာကုန်ချောပစ္စည်းများဖြစ်သည့် လက်အိတ်၊ ဖိနပ်၊ အပိုပစ္စည်းနှင့် ရော်ဘာရွက်ပန်းအလှဆင်ခြင်းစသည့် ပစ္စည်းများစုံလင်စွာ ခင်းကျင်းပြသသွားမည်ဖြစ်သည်။ထို့အပြင် အသားနှင့် အသားထွက်ပစ္စည်းဆိုင်ရာ ထုတ်ကုန်ပစ္စည်းများနှင့် သီးနှံအမျိုးမျိုးမှ ထုတ်ကုန်ပစ္စည်းများ ပြုလုပ်ပုံပြုလုပ်နည်းများ၊ ထုတ်ကုန်များကို တရားဝင်မှတ်ပုံတင်ခြင်းဆိုင်ရာ လုပ်ထုံးလုပ်နည်းများ၊ ဆက်စပ်ပစ္စည်းများ တင်သွင်းနိုင်မည့်လုပ်ငန်းစဉ်များ၊ ဝန်ဆောင်မှုများ၊ ပို့ကုန်/သွင်းကုန်ဆိုင်ရာ လုပ်ငန်းစဉ်များ၊ ဈေးကွက်ချိတ်ဆက်မှုများ၊ ကုန်ထုတ်လုပ်ငန်းဆိုင်ရာ သတင်းအချက်အလက်များစသည့် ကုန်ထုတ်စွမ်းအားမြှင့်တင်ခြင်းဆိုင်ရာလုပ်ငန်း အစီအစဉ်များအားလုံးကို တပေါင်းတစည်းတည်း စုံစုံလင်လင် ဝေဝေဆာဆာ ကျယ်ကျယ်ပြန်ပြန့် ပြသပေးသွားမည်ဖြစ်သည်။ ပြပွဲသို့ လာရောက်ကြည့်ရှုလေ့လာကြသူ ပြည်သူများအနေဖြင့် စိုက်ပျိုးမွေးမြူရေးဆိုင်ရာ အသိပညာ၊ နည်းပညာဗဟုသုတများရရှိမည်ဖြစ်ပြီး အချို့ကုန်ထုတ်လုပ်ငန်းများအတွက် ထုတ်လုပ်မှုအဆင့်ဆင့်နှင့် အရည်အသွေးမြှင့်တင်မှုနည်းစနစ်များကိုပါ သိရှိနိုင်မည်ဖြစ်သည့်အပြင် သက်ဆိုင်ရာပညာရှင်များနှင့် တိုက်ရိုက်ဆွေးနွေးပြီး မိမိနှင့်ဆိုင်ရာကဏ္ဍအလိုက် အကြံဉာဏ်အကူအညီများ ရရှိနိုင်မည်ဖြစ်သည်။သို့ဖြစ်ရာ မြန်မာနိုင်ငံသည် ရေခံမြေခံအခြေခံကောင်းများ ပိုင်ဆိုင်ထားပြီး ပြည်သူများ၏ အခြေခံလိုအပ်ချက်များကို ပြည်တွင်း၌ပင် ဖန်တီးရယူနိုင်သော်လည်း ကျယ်ကျယ်ပြန့်ပြန့် နက်နက်နဲနဲ သိရှိနားလည်ဆောင်ရွက်နိုင်မှု အားနည်းသောကြောင့် လူသုံးကုန်အခြေခံပစ္စည်းများကို ပြည်တွင်း၌ အရည်အသွေးမြှင့်ထုတ်လုပ်မှု၌ လိုအပ်ချက်များ၊ ပြည်ပမှကုန်ပစ္စည်းများကို ဦးစားပေးမှုများရှိနေရာ ပြည်ထောင်စုတစ်ဝန်းလုံးပေါင်းစည်းပြီး ကုန်ထုတ်စွမ်းအားမြှင့်တင်ဖော်ဆောင်မှုကို အထောက်အကူပြုသည့် ပြည်ထောင်စုအဆင့် အသေးစား၊ အငယ်စားနှင့်အလတ်စား စီးပွားရေးလုပ်ငန်းများ (MSME) ထုတ်ကုန်ပြပွဲနှင့် ဈေးရောင်းပွဲတော်သို့ လာရောက်လေ့လာကြည့်ရှုခြင်းဖြင့် လိုအပ်ချက်များကို ဖြည့်ဆည်းပေးနိုင်မည့်အထောက်အပံ့များ တစ်စုံတစ်ရာရရှိနိုင်မည်ဟု ယုံကြည်ပါကြောင်း။       ။moi