ပြင်သစ်က အရှေ့အလယ်ပိုင်းဒေသသို့ စစ်သင်္ဘော ၁၀ စီး ထပ်မံစေလွှတ်မည်

ပြင်သစ်နိုင်ငံသည် အရှေ့အလယ်ပိုင်းဒေသတွင် ဟော်မုဇ်ရေလက်ကြား၌ လုံခြုံရေးတာဝန်များ ထမ်းဆောင်ရန်အတွက် စစ်သင်္ဘော ၁၀ စီးကို အရေးပေါ်စေလွှတ်သွားမည်ဖြစ်ကြောင်း ကြေညာခဲ့သည်။ မတ်လ ၉ ရက်နေ့က ပြင်သစ်သမ္မတ အီမန်နျူရယ် မက်ခရွန်သည် ဆိုက်ပရပ်စ် ကျွန်းရှိ စစ်အခြေစိုက်စခန်းတစ်ခု၌ သတင်းစာ ရှင်းလင်းပွဲပြုလုပ်ကာ အရှေ့မြေထဲပင်လယ်၊ ပင်လယ်နီနှင့် ဟော်မုဇ်ရေလက်ကြားတို့တွင် ဖရီးဂိတ်စစ်သင်္ဘော (၈) စီးနှင့် ရဟတ်ယာဉ်တင်သင်္ဘော (၂) စီးတို့ကို ၄၈ နာရီအတွင်းနေရာချထားသွားမည်ဖြစ်ကြောင်း ပြောကြားခဲ့သည်။

အဆိုပါ ရေတပ်အင်အားစုသည် လက်ရှိ မြေထဲပင်လယ်တွင် တာဝန်ယူထားသည့် နျူကလီးယားစွမ်းအင်သုံး လေယာဉ်တင်သင်္ဘော Charles de Gaulle နှင့် ဆိုက်ပရပ်စ်တွင် အခြေစိုက်ထားသော လေကြောင်းရန်ကာကွယ်ရေးစနစ်တို့နှင့် ပူးပေါင်း၍ အင်အားဖြည့်တင်းသွားမည် ဖြစ်သည်။ အဆိုပါလှုပ်ရှားမှုသည် ပြင်သစ်ရေတပ်သမိုင်းတွင် မကြုံစဖူးသော စုစည်းမှုတစ်ခုဖြစ်ကြောင်း သမ္မတ မက်ခရွန်က ဆိုသည်။

လေယာဉ်တင်သင်္ဘော Charles de Gaulle ပေါ်သို့ တက်ရောက်စဉ် သမ္မတ မက်ခရွန်က ရှင်းလင်းပြောကြားရာတွင် အဆိုပါ ရေတပ်အင်အား ဖြည့်တင်းမှု၏ အဓိကရည်ရွယ်ချက်မှာ ဒေသတွင်းရှိ ပြင်သစ်နိုင်ငံသား ၄၀၀,၀၀၀ ခန့်အား အကာအကွယ်ပေးရန်၊ မဟာမိတ်နိုင်ငံများအား ပစ်မှတ်ထားတိုက်ခိုက်မှုများမှ ကာကွယ်ရန်နှင့် ဟော်မုဇ်ရေလက်ကြားကို ဖြတ်သန်းသွားလာမည့် ကုန်တင်သင်္ဘောများအား လုံခြုံစွာလိုက်ပါ စောင့်ရှောက်ရန် (Escort duties) ဖြစ်ကြောင်း ဖော်ပြခဲ့သည်။

အီရန်အစ္စလာမ်မစ် တော်လှန်ရေးအစောင့်တပ်ဖွဲ့ (IRGC) က ဟော်မုဇ် ရေလက်ကြားကို ပိတ်ဆို့ထားကြောင်းနှင့် အဆိုပါ ရေလမ်းကြောင်းကို ဖြတ်သန်းသည့် မည်သည့်သင်္ဘောကိုမဆို တိုက်ခိုက်မည်ဖြစ်ကြောင်း မတ်လ ၃ ရက်နေ့တွင် ကြေညာခဲ့သည်။ ယင်းအခြေအနေကြောင့် အရေး ပါသော ရေနံတင်သင်္ဘောများနှင့် ကုန်တင်သင်္ဘောများ ပုံမှန်အတိုင်း ပြန်လည်ဖြတ်သန်းနိုင်စေရန်အတွက် နိုင်ငံတကာအစောင့်လိုက်ပါရေး ရေတပ်ဖွဲ့ (International Escort Force) တစ်ခုကို ဖွဲ့စည်းရန် ပြင်သစ်သမ္မတ အီမန်နျူရယ် မက်ခရွန်က ကြိုးပမ်းနေသည်။ မက်ခရွန် ၏ ပြောကြားချက်အရ အာရှနိုင်ငံများဖြစ်သည့် အိန္ဒိယနှင့် အခြား အာရှနိုင်ငံများအပြင် ဥရောပနိုင်ငံအချို့သည်လည်း ပြင်သစ်နှင့်အတူ ပူးပေါင်း ဆောင်ရွက်ရန် အသင့်ရှိနေပြီဖြစ်သည်။

ပြင်သစ်သမ္မတသည် မတ်လ ၈ ရက်နေ့က အီရန်သမ္မတ မာဆွတ် ပီဇက်ရှ်ခီယန်နှင့် အဆိုပါကိစ္စရပ်နှင့်ပတ်သက်၍ ဆွေးနွေးခဲ့ကြောင်း ဖော်ပြခဲ့သည်။ "ဒါဟာ ထိုးစစ်ဆင်ဖို့အတွက် ရည်ရွယ်တာမဟုတ်ပါဘူး ၊ သင်္ဘောတွေကို လုံခြုံစွာ အစောင့်အရှောက်ပေးဖို့နဲ့ ထောက်ပံ့ဖို့အတွက်သာ ဖြစ်ပါတယ်" ဟု မက်ခရွန်က ပြောကြားခဲ့သည်။ ထို့အပြင် အရှေ့အလယ်ပိုင်း ပဋိပက္ခသည် ပြင်းထန်သောအဆင့်တွင် နောက်ထပ်ရက် အနည်းငယ် သို့မဟုတ် ရက်သတ္တပတ်အနည်းငယ်ခန့် ဆက်လက်တည်ရှိ နေနိုင်ကြောင်း ၎င်းက သုံးသပ်ပြောဆိုခဲ့သည်။

ပြီးခဲ့သည့် ဖေဖော်ဝါရီ ၂၈ ရက်နေ့တွင် အမေရိကန်နှင့် အစ္စရေးတို့က အီရန်နိုင်ငံအား လေကြောင်းမှတိုက်ခိုက်မှုများ ပြုလုပ်ခဲ့ပြီးနောက်ပိုင်း အရှေ့အလယ်ပိုင်းဒေသသည် ပဋိပက္ခများအတွင်း နစ်မွန်းလျက်ရှိသည်။ အဆိုပါ တိုက်ခိုက်မှုများကို တုံ့ပြန်သည့်အနေဖြင့် အီရန်အစ္စလာမ်မစ် တော်လှန်ရေးအစောင့်တပ်ဖွဲ့ (IRGC) က အစ္စရေးနှင့် ဒေသတွင်းရှိ အာရပ်နိုင်ငံများတွင် အခြေစိုက်ထားသော အမေရိကန် စစ်စခန်းများ ဆီသို့ ဒုံးကျည်များ၊ အသေခံဒရုန်းများဖြင့် ပြန်လည်တုံ့ပြန် တိုက်ခိုက် ခဲ့သည်။

ဥရောပအရာရှိများ၏ စွပ်စွဲချက်အရ အီရန်၏ ဒုံးကျည်နှင့် ဒရုန်းများ သည် တူရကီနိုင်ငံနှင့် ဆိုက်ပရပ်စ်ကျွန်းရှိ ဗြိတိသျှစစ်စခန်းများကိုပါ ပစ်မှတ်ထား တိုက်ခိုက်ခဲ့ကြောင်း သိရှိရသည်။ ထိုအခြေအနေကြောင့် ဥရောပတိုက်ကြီးမှာလည်း အဆိုပါပဋိပက္ခအတွင်းသို့ ဆွဲသွင်းခံရမည့် အန္တရာယ်ရှိနေသည်။

အီရန်ဘက်ကမူ ၎င်းတို့အနေဖြင့် ဒေသတွင်းနိုင်ငံများကို စစ်မကြေညာထားကြောင်းနှင့် တူရကီနိုင်ငံကို တိုက်ရိုက်ပစ်မှတ်ထားခြင်းမရှိကြောင်း အကြိမ်ကြိမ် ငြင်းဆိုထားသည်။ ထို့အပြင် ဆိုက်ပရပ်စ်ကျွန်းကို ဦးတည်တိုက်ခိုက်ခဲ့သည့်ဒရုန်းများသည် လက်ဘနွန်နယ်မြေအတွင်းမှ ပစ်လွှတ်လိုက်ခြင်းဖြစ်နိုင်ကြောင်း သုံးသပ်မှုများလည်း ထွက်ပေါ်လျက်ရှိသည်။

ကိုးကား- VN Express

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ ဝန်ကြီး-၂