၂၀၂၆ ကမ္ဘာ့ဖလားပြိုင်ပွဲမှ နုတ်ထွက်ခဲ့သည့် အီရန်အသင်း၏နေရာ၌ အီတလီအသင်းနှင့် အစားထိုးရန် ဖီဖာဆုံးဖြတ်

ရောမ    မတ်    ၁၅

ကမ္ဘာ့ဘောလုံးအဖွဲ့ချုပ် (ဖီဖာ)က    ၂၀၂၆ ကမ္ဘာ့ ဖလားပြိုင်ပွဲမှ     နုတ်ထွက်ခဲ့သည့်    အီရန်အသင်း၏ နေရာ၌ အီတလီအသင်းနှင့် အစားထိုးရန် ဆုံးဖြတ်ခဲ့ကြောင်း သိရသည်။

အီရန်အသင်းသည်  ၂၀၂၆ ကမ္ဘာ့ဖလားပြိုင်ပွဲကို အာရှဇုန်မှ တိုက်ရိုက်ခြေစစ်ပွဲအောင်မြင်ခဲ့ပြီး အုပ်စု (G)တွင် ဘယ်လ်ဂျီယံအသင်း၊ အီဂျစ်အသင်း၊ နယူး ဇီလန်အသင်းတို့နှင့် တစ်အုပ်စုတည်း ကျရောက်နေသော်လည်း    လက်ရှိဖြစ်ပွားနေသည့်   အမေရိကန်၊ အစ္စရေးနှင့် အီရန်နိုင်ငံ စစ်ရေးတင်းမာမှုများကြောင့် ပြိုင်ပွဲမှနုတ်ထွက်ရန် ဆုံးဖြတ်ခဲ့ခြင်းဖြစ်သည်။

အစောပိုင်းက ကမ္ဘာ့ဘောလုံး အဖွဲ့ချုပ်က ကမ္ဘာ့ဖလားပြိုင်ပွဲမှ   နုတ်ထွက်ခဲ့သည့်  အီရန်အသင်း၏နေရာ၌    အာရှဒေသတွင်းမှ    အသင်းတစ်သင်းနှင့် အစားထိုးရန် စီစဉ်ခဲ့သော်လည်း     နောက်ပိုင်းတွင် ကမ္ဘာ့အဆင့်သတ်မှတ်ချက်နှင့်သတ်မှတ်ရန် ဆုံးဖြတ်ခဲ့ပြီးနောက် ဥရောပအဆင့်တွင် ကမ္ဘာ့အဆင့်သတ်မှတ်ချက်(၁၃)နေရာ၌ရပ်တည်နေသည့်      အီတလီအသင်းကို အစားထိုးရန် ဆုံးဖြတ်ခဲ့ခြင်း ဖြစ်သည်။

အီတလီအသင်းသည် ၂၀၂၆ ကမ္ဘာ့ဖလားပြိုင်ပွဲ ခြေစစ်ပွဲအဆင့်တွင် ရလဒ်ကောင်းမွန်ခြင်းမရှိခဲ့သည့် အတွက် ၂၀၂၆ ကမ္ဘာ့ဖလားပြိုင်ပွဲကို တိုက်ရိုက်ဝင်ခွင့် မရရှိဘဲ    မြောက်အိုင်ယာလန်အသင်းနှင့်    Play off ကစားရမည် ဖြစ်သော်လည်း ယခုအခါ ဖီဖာက အီတလီအသင်းကို Play off ကစားစေမည်မဟုတ်ဘဲ တိုက်ရိုက်ဝင်ခွင့်ပေးခဲ့ခြင်း ဖြစ်သည်။

အီတလီအသင်းအနေဖြင့် ၂၀၁၈ ကမ္ဘာ့ဖလားပြိုင်ပွဲနှင့် ၂၀၂၂ ကမ္ဘာ့ဖလားပြိုင်ပွဲတို့ နှစ်ကြိမ်ဆက်လွဲချော်ခဲ့ရပြီး ၂၀၂၆ ကမ္ဘာ့ဖလားပြိုင်ပွဲကို  တိုက်ရိုက်ဝင်ခွင့် သတ်မှတ်ခံခဲ့ရသည့်အတွက် ကမ္ဘာ့ဖလားပြိုင်ပွဲတွင်   သုံးကြိမ်ဆက်လွဲချော်မည့်အရေးမှ    လွတ်မြောက်ခဲ့သည်။

အီတလီအသင်းသည်  ၂၀၀၆ ခုနှစ်က ဂျာမနီနိုင်ငံ၌ ကျင်းပခဲ့သည့် ကမ္ဘာ့ဖလားပြိုင်ပွဲတွင်  ချန်ပီယံဆု ဆွတ်ခူးနိုင်ခဲ့ပြီးနောက်ပိုင်း အောင်မြင်မှုများ ရယူနိုင်ရန်ရုန်းကန်နေရပြီး ကမ္ဘာ့အဆင့် သတ်မှတ်ချက်များတွင် ထိပ်တန်း ၁၀ နေရာမှလည်း ကျဆင်းခဲ့ရကြောင်း သိရသည်။

Ref;Fabrizio Romano

MWD