ကြိုးစားကြလေ မောင်တို့မယ်တို့တစ်တွေ
Posted_Date
Image
Body
နိုင်ငံတော်ဖွံ့ဖြိုး တိုးတက်ရေးအတွက် ပညာရည်မြင့်မားသော လူ့စွမ်းအားအရင်းအမြစ်များ ပေါ်ထွန်းရေးသည် အဓိက အခြေခံအချက်ပင်ဖြစ်သည်။ လူ့စွမ်းအားအရင်းအမြစ်များဟု ဆိုရာဝယ် အတတ်ပညာသာမက အသိပညာပါပြည့်စုံသည့် လူ့စွမ်းအားအရင်းအမြစ်များပေါ်ထွန်းစေဖို့ လွန်စွာအရေးကြီးသည်။
ထိုမှသာ မိမိလူမှုအသိုက်အဝန်းနှင့် မိမိနိုင်ငံတော်ကို အတတ်ပညာဖြင့် တည်ဆောက်နိုင်သလို အသိပညာဖြင့် ကာကွယ်စောင့်ရှောက်နိုင်မည်ဖြစ်၏။ ယနေ့မျိုးဆက်သစ်လူငယ်များအနေဖြင့် ပညာအသိ၊ ဉာဏ်သတိနှင့်ပြည့်စုံသော သူများဖြစ်စေရေး မလွဲမသွေကြိုးစားကြရမည်သာဖြစ်သည်။
ဉာဏ်ပညာကြီးမားသူများထံ ဆည်းကပ်ပါ
ယနေ့မျိုးဆက်သစ်လူငယ်များကို ဉာဏ်ပညာနှင့် ပြည့်စုံစေချင်သည်။ ဉာဏ်ပညာချို့တဲ့သည်နှင့် ပျက်စီးမှုများနှင့်သာ ကြုံတွေ့ရစမြဲဖြစ်၏။ ယနေ့ခေတ်အခြေအနေများတွင် ဉာဏ်ပညာချို့တဲ့မှုကြောင့် တိုင်းရင်းသားစည်းလုံးညီညွတ်မှု အားနည်းချက်များဖြစ်ပေါ်ပြီး မိမိမွေးဖွားရာဇာတိဖြစ်သည့် မြို့၊ ရွာမှအစ အမိနိုင်ငံတော်ကို စိတ်လိုလက်ရ ဖျက်ဆီးနေကြသလိုဖြစ်နေသည်။
ဉာဏ်ပညာချို့တဲ့မှုအကြောင်းနှင့်စပ်လျဉ်း၍ ဂေါတမမြတ်စွာဘုရားက “ရုက္ခမဓမ္မ”ဇာတ်ကို ဟောတော်မူခဲ့၏။ မြတ်စွာဘုရားရှင်သည် ဘုရား အလောင်းတော်တစ်ဘဝ၌ ရုက္ခစိုးနတ်မင်းဖြစ်တော်မူခဲ့၏။ တစ်နေ့တွင် ဝေဿဝဏ်နတ်မင်းကြီးသည် ဘုမ္မစိုးနတ်အပေါင်းအား သစ်ပင်ကြီး၊ သစ်ပင်ငယ်၊ချုံနွယ်တို့၌ ဗိမာန်များအား နှစ်သက်ရာအရပ်၌ယူစေဟုမိန့်ခဲ့၏။ ထိုအခါ ဘုရားအလောင်းရုက္ခစိုးနတ်မင်းသည် ဟိမဝန္တာတောရှိ အင်ကြင်းတောတွင် ဗိမာန်ပြု၍ နေတော်မူလေသည်။ ဆွေမျိုးနတ်အပေါင်းကိုလည်း လွင်ပြင်၌ရှိသောသစ်ပင်များ၌ ဗိမာန်မပြုကြဖို့၊ အင်ကြင်းတောရှိ ၎င်းနေသော ဗိမာန်ကိုသာခြံရံပြီး ဗိမာန်ယူကြဖို့ တိုက်တွန်းလေ၏။
ဘုရားအလောင်းရုက္ခစိုးနတ်မင်း၏စကားအား ပညာရှိနတ်များကနားထောင်ပြီး အင်ကြင်းတောအတွင်း ဗိမာန်ယူကြ၏။ ပညာမရှိသောနတ်များမှာ ရွာ၊ မြို့တို့နှင့်နီးသော လွင်ပြင်များရှိ သစ်ပင်များတွင် ဗိမာန်ယူကြသည်။ ပညာမရှိသောနတ်တို့၏အတွေးမှာ မြို့၊ ရွာများနှင့်နီးစပ်မှသာ လူတို့၏ပူဇော်ခံရမှုများကိုရရှိမည်ဖြစ်ပြီး တော၌နေပါက လူတို့၏ပူဇော်မှုနှင့်ဝေးပြီး လာဘ်လာဘမရနိုင်ဟု တွေးကြခြင်းပင်ဖြစ်သည်။ သည်လိုနှင့်အင်ကြင်းတောကို အမှီပြု၍ ဗိမာန်ယူကြသော နတ်များနှင့် လွင်ပြင်များရှိ သစ်ပင်များကို ဗိမာန်ယူကြသောနတ်များဟူ၍ နှစ်ပိုင်းကွဲခဲ့လေ၏။ ပညာရှိသူနှင့် ပညာမဲ့သူသည် မည်သို့မျှပေါင်းစပ်၍မရ။ ပညာမဲ့သူများကြောင့် စည်းလုံးမှုပြိုကွဲရခြင်းကို ဤဇာတ်တွင် မျက်ဝါးထင်ထင်တွေ့မြင်ရမည်သာဖြစ်သည်။
သည်နောက် တစ်ရက်တွင် မိုးကြီးလေကြီးကျလာကုန်၏။ ထိုအင်အားပြင်းသော လေစိုင်ကြီးသည် လွင်ပြင်များရှိ သစ်ပင်ကြီးများမှာ အမြစ်မှစ၍လဲကုန်ကြ၏။ အင်ကြင်းတောရှိ သစ်ပင်များကား တစ်ပင်ယှက်တစ်ပင်နွယ်ကဲ့သို့ပမာဖြစ်နေ၍ မလဲပြိုခဲ့ကြပေ။
ထိုအခါ လွင်ပြင်များရှိသစ်ပင်များကို ဗိမာန်ယူခဲ့သောနတ်များသည် နေစရာကိုးကွယ်စရာမရှိ၍ ကလေးများကိုလက်ဆွဲကာ ဘုရားအလောင်းရုက္ခစိုးနတ်မင်းရှိရာ ဟိမဝန္တာရှိ အင်ကြင်းတောဆီသို့ပြန်လာခဲ့ကြလေသည်။ ထိုအခါ ဘုရားအလောင်းနတ်မင်းသည် ပညာရှိတို့စကားကို မှတ်ယူမှုမရှိကြသူတို့မှာ ဤသို့သောသဘောနှင့်ကြုံရလေ၏ဟု မိန့်တော်မူခဲ့၏။
ဤဇာတ်ကိုပမာပြု၍ ထင်ရှားသည့်အချက်သုံးချက်ကို တွေ့မြင်ရမည်သာဖြစ်သည်။ ပထမအချက်မှာ ပညာ၊ ဒုတိယအချက်မှာ ညီညွတ်မှုအား၊ တတိယအချက်မှာ ပညာရှိတို့၏ဆိုဆုံးမစကားကို နာယူမှတ်သားမှုတို့ပင်ဖြစ်၏။ ယနေ့မျိုးဆက်သစ် လူငယ်များအပါအဝင် တိုင်းရင်းသားပြည်သူအားလုံး ယနေ့ဤဇာတ်တော်ကိုသိမြင်ပြီး ပျက်စီးခြင်း အကြောင်းတရားများအပေါ် သင်ခန်းစာယူတတ်ကြဖို့လိုသည်။
အတတ်ပညာမှသည် အသိပညာသို့
လူငယ်များ၏စိတ်သည် တက်ကြွသည်၊ တုံ့ပြန်မှုမြန်ဆန်သည်၊ စွန့်စားဖန်တီးချင်သော စိတ်ရှိကြသည်။ ၎င်းတို့၏စွန့်စားဖန်တီးလုပ်ကိုင်လိုမှုများသည် တစ်ခါတစ်ရံ ရှေးရိုးရာ၊ မိရိုးဖလာဟူသည့် ရှုထောင့်ကိုပင် ဥပေက္ခာပြုလိုသည့်သဘောကို တွေ့ရတတ်သေး၏။ နည်းပညာတတ်ကျွမ်းမှု၊ နည်းပညာတစ်ခုသင်ကြားရေးတွင် နှောင်းလူကြီးများထက် သာလွန်သည်ကားအမှန်ပင်။ ယနေ့လူငယ်မျိုးဆက်သစ်များတွင် အသိပညာအားနည်းချက်များကို အထင်းသားတွေ့မြင်နေရသည်။
ကနဦးမီးမောင်းထိုးပြရလျှင် ယနေ့အကြမ်းဖက်ဖြစ်စဉ်များကိုကြည့်ပါက တွေ့မြင်နိုင်သည်။ လူငယ်များ၏တက်ကြွမှု၊ စွန့်စားလိုမှုများကို ပြည်တွင်းပြည်ပအဖျက်သမားများက အံဝင်ခွင်ကျအသုံးချသွားနိုင်ခြင်းပင်ဖြစ်သည်။ ယနေ့လူငယ်များ၏အသိပညာအားနည်းချက်ကို သိမ်းသွင်းပြီး အတတ်ပညာတတ်ကျွမ်းမှု၊ အတတ်ပညာသင်ကြား တတ်မြောက်လွယ်ကူနိုင်မှုတို့ကို သိမ်းပိုက်သွားခြင်းပင်ဖြစ်သည်။
ထိုသည်မှာ နိုင်ငံတော်၏ ဆုံးရှုံးမှုတစ်ရပ်ပင်ဖြစ်သည်။ ဤဆုံးရှုံးမှုကိုသင်ခန်းစာယူ၍ ယနေ့နိုင်ငံတော်သည် လူငယ်များ၏ အတတ်ပညာ၊ အသိပညာကဏ္ဍနှင့်ဗလငါးတန်ဖွံ့ဖြိုးရေးအတွက် ဦးတည်ချက်များချမှတ်ကာ အကောင်အထည်ဖော်ဆောင်ရွက်နေသည်ကိုတွေ့မြင်နေရသည်။ အတတ်ပညာသည် လူတော်ကိုဖြစ်စေသည်၊ အသိပညာကား လူကောင်းကို ဖြစ်စေသည်။ အဖွဲ့အစည်းတစ်ခုချင်းမှသည် နိုင်ငံတော်တစ်ရပ် ဖွံ့ဖြိုးတိုးတက်စေရန် လူတော်၊ လူကောင်းများ လိုအပ်သည်။ ထို့အတွက် နိုင်ငံတော်မှ ယနေ့မျိုးဆက်သစ်များအတွက် အတတ်ပညာအတွက် အတန်းပညာ တတ်မြောက်ရေးကို ကြိုးပမ်းဆောင်ရွက်ပေးလျက်ရှိသည်။ တစ်ဖန် နိုင်ငံတော်၏အခြေခံစီးပွားရေးဖြစ်သည့် စိုက်ပျိုးမွေးမြူရေးတွင် လူသားအရင်းအမြစ်ကောင်းများ ပေါ်ထွန်းစေရေး စက်မှုလက်မှုနှင့် စိုက်ပျိုးမွေးမြူရေး အထက်တန်းကျောင်းများ၊ စိုက်ပျိုးရေးနှင့်မွေးမြူရေး တက္ကသိုလ်များကိုပါ တိုးချဲ့ဖွင့်လှစ်၍ အတတ်ပညာကဏ္ဍကို ကြိုးပမ်း အကောင်အထည်ဖော်ပေးလျက်ရှိ၏။
ထို့အတူ လူငယ်အားကစားကဏ္ဍကိုလည်း အားပေး အကောင်အထည်ဖော် ဆောင်ရွက်ပေးနေသည်။
ဆိုရလျှင် ယနေ့မျိုးဆက်သစ် လူငယ်များအတွက် အတတ်ပညာသင်ကြားရေးအတွက် အခွင့်အလမ်းများ အနီးဆုံးတွင်ရှိနေသည်ကို တွေ့ရမည်ဖြစ်သည်။ အသိပညာ ထွန်းကားရေးအတွက်မူ လူငယ်ဖိုရမ်၊ လူငယ်စာပေပွဲတော်၊ ပြည်ပလေ့လာရေးခရီးများ၊ ရေကြောင်းလူငယ်၊ လေကြောင်းလူငယ်၊ ကင်းထောက်လူငယ် စသည့်အစီအစဉ်များဖြင့် ဆောင်ရွက်ပေးနေသည်ကိုတွေ့ရသည်။ စာရေးသူကိုယ်ပိုင် အတွေးနှင့်ဆိုလျှင် အသိပညာ ထွန်းကားရေးအတွက် စာဖတ်အားကောင်းသည့် လူငယ်မျိုးဆက်တစ်ခုဖြစ်စေချင်သည်။ အသက်ဝင်သည့် စာပေစကားဝိုင်းများ၊ လူငယ်ဆွေးနွေးပွဲများကို ဒေသအလိုက် ထိထိရောက်ရောက်ဆောင်ရွက်စေလိုသည်။
ဘာသာရေးကို မြတ်နိုးတန်ဖိုးထားစေခြင်းငှာ ဓမ္မပူဇာပွဲများ ဒေသအလိုက် များများလုပ်စေချင်သည်။ ရပ်ကွက်၊ ကျေးရွာအလိုက် စာကြည့်တိုက်လုပ်ငန်းစဉ်များ လက်တွေ့ကျကျအသက်ဝင်စေလိုသည်။ နွေရာသီကျောင်းပိတ်ရက် အခါများ၌ လက်တွေ့ဆန်သော ယဉ်ကျေးလိမ္မာ သင်တန်းများ ဖွင့်စေချင်သည်။ ထို့ကြောင့် လူငယ်များအနေဖြင့် အတတ်ပညာ ထူးချွန်စေရန် အတန်းပညာကို တတ်မြောက်နိုင်ရမည်။
အတန်းပညာမှတစ်ဆင့် မြင့်မားသည့်အတတ်ပညာကို ဆင့်ပွားကူးပြောင်းသင်ယူတတ်မြောက်နိုင်မည်။ ထိုမှတစ်ဖန် အတန်းပညာ၊ အတတ်ပညာကိုအခြေခံ၍ အသိပညာကောင်းများကို ပိုင်ဆိုင်နိုင်အောင်ကြိုးစားခွင့်ရရှိကြမည်။ ထိုမှသာ အတတ်ပညာ၊ အသိပညာပြည့်ဝပြီး လူတော်လူကောင်းများအဖြစ်ဖြင့် အမိနိုင်ငံတော်ကို အဓွန့်ရှည်တည်တံ့အောင် ကာကွယ်စောင့်ရှောက်နိုင်သည့် မျိုးဆက်များဖြစ်လာမည်မှာ မလွဲဧကန်ပင်ဖြစ်သည်။
လူငယ်များစူးစမ်းသင့်သည့် ပညာများနှင့်ယနေ့ကမ္ဘာ
နိုင်ငံ့အရေး၊ ကမ္ဘာ့အရေးဆိုသည်မှာ ယနေ့လူကြီးများအလုပ်ဟု လူငယ်အများစုက ထင်မှတ်ထားကြသည်။ ဘဝကို ပေါ့ပေါ့ပါးပါး လမ်းလျှောက်နေကြသူအများစုကို တွေ့မြင်နေရသည်။ အချို့လူငယ်များကား အတွေးလွန်ဘဝင်လေဟပ်ပြီး နိုင်ငံရေးနှင့်နိုင်ငံ့အရေးကိုမကွဲပြားဘဲ တော်လှန်ရေးဟူသော ဝေါဟာရအောက်တွင် ပျက်စီးသွားကြရသည်။ နိုင်ငံအတွက် ရင်လေးစရာတစ်ခုပင်ဖြစ်သည်။
ယနေ့ကမ္ဘာသည် ပညာကိုအခြေခံသော ကမ္ဘာ ကြီးဖြစ်နေပြီ။ နိုင်ငံအလိုက် အချုပ်အခြာအာဏာနှင့် နယ်နိမိတ်ကို ကာကွယ်ရေးလုပ်ငန်းစဉ်သည် မိမိနိုင်ငံစည်းရိုးထဲတွင် မဟုတ်တော့ပေ။ မိတ်ဖက်နိုင်ငံများ၏ စည်းရိုးများထိပါ ကျယ်ကျယ်ပြန့်ပြန့် ကာကွယ်နေကြပေပြီ။ မိတ်ဖက်နိုင်ငံဟုဆိုရာတွင် နယ်နိမိတ်ထိစပ်မှုကို ကျော်လွန်၍ ပင်လယ်၊ သမုဒ္ဒရာများပင် ခြားနားသည်အထိ ကျယ်ပြန့်နေသည်ကိုတွေ့မြင်ရမည်။
ထိုသို့သော ကာကွယ်ရေးလုပ်ငန်းစဉ်များ၌ ပညာကိုအဓိက အခြေခံပြီး နည်းပညာသာလွန်မှုကိုအားပြုကာ လွှမ်းမိုးနိုင်မှု အဆုံးအဖြတ်ကို မှတ်ကျောက်တင်နေကြသည်။ ပညာစွမ်းအားသည် နိုင်ငံရေး၊ ကာကွယ်ရေး၊ စီးပွားရေးဟူသော ကဏ္ဍများတွင် တွင်တွင်ကျယ်ကျယ် နေရာယူခဲ့ပြီဖြစ်သည်။
အတတ်ပညာမြင့်မားသော အချို့နိုင်ငံများပင် အသိပညာအားနည်း၍ အင်အားကြီးနိုင်ငံများ၏ ဩဇာလွှမ်းမိုးမှုကို ခံနေရသည်။ အတတ်ပညာ၊ အသိပညာဖွံ့ဖြိုးမှုကိုမဏ္ဍိုင်ပြု၍ ဩဇာခံအဖြစ် လွှမ်းမိုးချုပ်ကိုင်လာမှုများကို ပြန်လည်တုံ့ပြန်ကာကွယ်နေသည့် နိုင်ငံများကိုလည်း တွေ့ရသည်။ ယနေ့ပြည်ထောင်စုဖွား တိုင်းရင်းသားများနှင့် လူငယ်မျိုးဆက်သစ်များအနေဖြင့် မည်သည့်နိုင်ငံမျိုးကို တည်ဆောက်ကြမည်နည်း။ ကိုယ်တိုင်ရွေးချယ်ဆုံးဖြတ်၍ ကြိုးပမ်းရမည်သာဖြစ်သည်။
အတတ်ပညာ၊ အသိပညာနှင့် ခေတ်မီဖွံ့ဖြိုးတိုးတက်သော နိုင်ငံတော်ကို စောင့်ရှောက်ကာကွယ်ရေး
ယနေ့နိုင်ငံတော်သည် စစ်မှန်၍ စည်းကမ်းပြည့်ဝသည့် ပါတီစုံဒီမိုကရေစီစနစ် ခိုင်မာစေရေးနှင့် ဒီမိုကရေစီနှင့်ဖက်ဒရယ်စနစ်ကို အခြေခံသည့် ပြည်ထောင်စုတည်ဆောက်ရေး ဟူသော နိုင်ငံရေးရည်မှန်းချက်တို့ကို ကြိုးပမ်း အကောင်အထည်ဖော် ဆောင်ရွက်လျက်ရှိသည်။ ပြည်သူလူထု၏ လူမှုစီးပွားဘဝမြင့်မားရေးအတွက် နိုင်ငံ့စီးပွားရေး ဖွံ့ဖြိုးတိုးတက်အောင်လည်း ကြိုးပမ်းအကောင်အထည်ဖော် ဆောင်ရွက်နေသည်။ တိုင်းပြည်သာယာ ဝပြောရေး၊ စားရေရိက္ခာ ဖူလုံရေးဆိုသည့် အမျိုးသားရေး လုပ်ငန်းစဉ်နှစ်ရပ်မှာ ပြည်သူ့အကျိုးစီးပွားအတွက်ဖြစ်သည်။ ယင်းလုပ်ငန်းစဉ်များတွင် ပညာတတ်လူသားအရင်းအမြစ်များ၏ စွမ်းအားသည် အဓိကကျ၏။ အတတ်ပညာ၊ အသိပညာပြည့်စုံသည့်လူ့စွမ်းအား အရင်းအမြစ်များကသာ ခေတ်မီဖွံ့ဖြိုးတိုးတက်သော နိုင်ငံတော်ကို တည်ဆောက်နိုင်မည်။ အဓွန့်ရှည်အောင် တည်ဆောက်နိုင်မည်ဖြစ်သည်။
ထို့ကြောင့် ယနေ့လုပ်ငန်းခွင်အသီးသီးတွင် တာဝန်ထမ်းဆောင်နေဆဲ မျိုးဆက်သစ်များ၊ နောင်ဝယ်တာဝန်ယူထမ်းရွက်မည့် လူငယ်မျိုးဆက်သစ်များအနေဖြင့် ခေတ်မီဖွံ့ဖြိုးတိုးတက်သော နိုင်ငံတော်တစ်ရပ်ကိုပိုင်ဆိုင်လိုလျှင် အတတ်ပညာ၊ အသိပညာပြည့်စုံကြွယ်ဝသည့် လူသားအရင်းအမြစ်ကောင်းများဖြစ်အောင်ကြိုးစားကြရမည်။ အတတ်ပညာ၊ အသိပညာတို့ပေါင်းစပ်ပြီး မိမိမွေးဖွားကြီးပြင်းရာ အမိနိုင်ငံတော်ကို ကောင်းမွန်စွာ စောင့်ရှောက်နိုင်ကြဖို့ လိုအပ်ကြောင်း စာပန်းချီခြယ်မှုန်းကာ တိုက်တွန်းလိုက်ရပါသည်။ ။
ထာဝရငြိမ်းချမ်းကြပါစေ….
MWD
