ပုပ်ရဟန်းမင်းကြီး လီယို (၁၄) နှင့် သမ္မတ ဒေါ်နယ်ထရမ့်တို့အကြား တင်းမာမှုများ မြင့်တက်လာ

KookieSpace97

News Image

  • ပုပ်ရဟန်းမင်းကြီး လီယို (၁၄) နှင့် သမ္မတ ဒေါ်နယ်ထရမ့်တို့အကြား တင်းမာမှုများ မြင့်တက်လာ

အမေရိကန်သမ္မတ ဒေါ်နယ်ထရမ့်နှင့် ဗာတီကန်ပုပ်ရဟန်းမင်းကြီး လီယို (၁၄) တို့အကြား နိုင်ငံခြားရေးမူဝါဒနှင့် ပြည်တွင်းရေးရာကိစ္စရပ်များ အပေါ် အမြင်မတူညီမှုများကြောင့် စကားစစ်ထိုးပွဲများ ပြင်းထန်လျက် ရှိသည်။ 

ဖေဖော်ဝါရီလနှောင်းပိုင်းတွင်စတင်ခဲ့သော အီရန်အပေါ် အမေရိကန်-အစ္စရေးတို့၏ စစ်ဆင်ရေးကို ပုပ်ရဟန်းမင်းကြီးက "လူမျိုးတစ်စုလုံး အပေါ် ခြိမ်းခြောက်မှု" ဟုဆိုကာ ပြင်းပြင်းထန်ထန် ဝေဖန်ခဲ့ခြင်းက တင်းမာမှု၏ အဓိကအကြောင်းရင်း ဖြစ်လာခဲ့သည်။ ထို့အပြင် ပုပ် ရဟန်းမင်းကြီးသည် အမေရိကန်၏ ရွှေ့ပြောင်းနေထိုင်သူများအပေါ် ကိုင်တွယ်ပုံကိုလည်း ပြန်လည်သုံးသပ်ရန် တိုက်တွန်းခဲ့သည်။

အဆိုပါ ဝေဖန်မှုများအပေါ် သမ္မတထရမ့်က Truth Social မှတစ်ဆင့်တုံ့ပြန်ရာတွင် ပုပ်ရဟန်းမင်းကြီးအား "အားနည်းသူ"၊ "ရာဇဝတ်မှုနှင့် နိုင်ငံခြားရေးမူဝါဒတွင် ညံ့ဖျင်းသူ" ဟု တိုက်ခိုက်ပြောဆိုခဲ့သည်။ 

ထရမ့်က ၎င်းအနေဖြင့် မဲအပြတ်အသတ်ဖြင့် ရွေးကောက်ခံထားရသည့်အတိုင်း စီးပွားရေးနှင့် တရားဥပဒေစိုးမိုးရေးကို အောင်မြင်စွာ လုပ်ဆောင် နေကြောင်း ခုခံပြောဆိုခဲ့ပြီး ပုပ်ရဟန်းမင်းကြီးသည် အမေရိကန် လူမျိုး ဖြစ်နေ၍သာ ရွေးချယ်ခံရခြင်းဖြစ်ကာ ၎င်းအား ရင်ဆိုင်ရန်အတွက်တမင်ရွေးချယ်ခံရသူဖြစ်ကြောင်း စွပ်စွဲခဲ့သည်။ Air Force One လေယာဉ် ပေါ်၌ သတင်းထောက်များနှင့် ပြောဆိုရာတွင်လည်း ထရမ့်က ပုပ်ရဟန်း မင်းကြီးအား "လစ်ဘရယ်သမားတစ်ဦး" ဟု သမုတ်ကာ ၎င်း၏ လုပ်ဆောင်ချက်များအပေါ် အားမလိုအားမရ ဖြစ်ကြောင်း ထုတ်ဖော် ပြောကြားခဲ့သည်။

အခြားတစ်ဖက်တွင်လည်း ပုပ်ရဟန်းမင်းကြီးသည် ငြိမ်းချမ်းရေး အတွက် သံတမန်ရေးလမ်းကြောင်းသို့ ပြန်လည်ဦးတည်ရန် တောင်းဆိုမှု များကို အရှိန်မြှင့်လုပ်ဆောင်နေသည်။ အမေရိကန် စစ်မက်ရေးရာ ဝန်ကြီး ပိဟက်ဆက်၏ ဘာသာရေးအမည်ခံကာ အောင်ပွဲအတွက် ဆုတောင်းရန် တိုက်တွန်းမှုကိုလည်း "ဘုရားသခင်သည် စစ်မက်ဖြစ်ပွားစေသူတို့၏ ဆုတောင်းသံကို နားညောင်းမည်မဟုတ်" ဟု တုံ့ပြန်ခဲ့သည်။

ပုပ်ရဟန်းမင်းကြီးက မည်သည့်ပဋိပက္ခသည်မျှ ဘုရားသခင်၏ ကောင်းချီးကို မခံစားရကြောင်းနှင့် အပြစ်မဲ့သူတို့၏ သွေးမြေကျမှုကိုရပ်တန့်ကာ မကောင်းမှုသံသရာကို ဖြတ်တောက်ကြရန် ဗာတီကန်မှနေ၍ ကမ္ဘာသို့ ဆက်လက်တိုက်တွန်းလျက် ရှိသည်။

ကိုးကား- RT

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး

MM-News-Category
နိုင်ငံရေးကဏ္ဍသတင်းများ
နိုင်ငံရေး-နိုင်ငံတကာသတင်း

ဆက်စပ်သတင်းများ

ဆီးရီးယားနှင့် ဂျော်ဒန် ပူးပေါင်းဆောင်ရွက်ရေးမြှင့်တင်မည့် သဘောတူညီချက်များ လက်မှတ်ရေးထိုး
ဆီးရီးယားနှင့် ဂျော်ဒန် ပူးပေါင်းဆောင်ရွက်ရေးမြှင့်တင်မည့် သဘောတူညီချက်များ လက်မှတ်ရေးထိုး
ဒမတ်စကပ်စ် ဧပြီ ၁၃ ဆီးရီးယားနှင့် ဂျော်ဒန်နိုင်ငံတို့သည် အဓိကအခန်းကဏ္ဍများတွင် နှစ်နိုင်ငံပူးပေါင်းဆောင်ရွက်ရေး တိုးမြှင့်ရန်ရည်ရွယ်သည့် သဘောတူညီချက်များစွာကို သဘောတူလက်မှတ်ရေးထိုးလိုက်ပြီ ဖြစ်ကြောင်း ဧပြီ ၁၂ ရက် က ထုတ်ပြန်သော တရားဝင်ကြေညာချက် တစ်ရပ်အရ သိရသည်။ ဧပြီ ၁၂ ရက်က ဂျော်ဒန်နိုင်ငံ၏မြို့တော်တွင် ကျင်းပခဲ့သော ဆီးရီးယား-ဂျော်ဒန် အဆင့်မြင့် ပူးပေါင်းဆောင်ရွက်ရေး ကောင်စီ၏ ဒုတိယအကြိမ် အစည်းအဝေးတွင် ယင်းသဘောတူညီချက် များစွာကို ရရှိခဲ့ခြင်းဖြစ်သည်၊။ အဆိုပါ အစည်းအဝေးကို နှစ်နိုင်ငံစလုံးမှ အဆင့်မြင့်အရာရှိများက ပူးတွဲ သဘာပတိအဖြစ် ဆောင်ရွက်ခဲ့ကြသည်။ ဆီးရီးယား နိုင်ငံခြားရေးတာဝန်ရှိသူများ၏ ထုတ်ပြန်ချက်တွင် ဇန်နဝါရီ ၂၆ ရက်က လက်မှတ် ရေးထိုးခဲ့သည့် သဘောတူညီချက်အရ ဆီးရီးယားနိုင်ငံသို့ သဘာဝဓာတ်ငွေ့များ ပြန်လည်ပို့ဆောင်ရန် နှစ်ဖက်စလုံးက သဘောတူခဲ့ကြပြီး နည်းပညာပိုင်းဆိုင်ရာ လုပ်ငန်းစဉ်များပြီးဆုံးပြီးနောက် နှစ်ရက် အတွင်း ပြန်လည်ပို့ဆောင်နိုင်ရန် မျှော်မှန်းထား ကြောင်း ဖော်ပြထားသည်။ သယ်ယူပို့ဆောင်ရေးကဏ္ဍတွင် ကုန်းကြောင်း၊ လေကြောင်းနှင့် ရေကြောင်းနယ်ပယ်များ၌ ပူးပေါင်း ဆောင်ရွက်မှုအားကောင်းစေရေး ကတိကဝတ်ကို နှစ်ဖက်စလုံးက ထပ်လောင်းအတည်ပြုခဲ့ကြသည်။ သယ်ယူပို့ဆောင်ရေးလုပ်ငန်းစဉ်များ လွယ်ကူရိုးရှင်းစေရန်နှင့် လုပ်ငန်းလည်ပတ်ရာတွင် ပိုမို သွက်လက် မြန်ဆန်စေရန်အတွက်လည်း အတူတကွပူးပေါင်း အဖြေရှာကြမည်ဖြစ်ကြောင်း သိရသည်။ ဆီးရီးယားနှင့် ဂျော်ဒန်နိုင်ငံတို့သည် ပညာရေး၊ ကျန်းမာရေးစောင့်ရှောက်မှု၊ စိုက်ပျိုးရေး၊ ခရီးသွား လုပ်ငန်းနှင့် အဖွဲ့အစည်းဆိုင်ရာ ဖွံ့ဖြိုးတိုးတက်မှုများအပြင် ပြည်သူ့စွမ်းဆောင်ရည်ကို မြှင့်တင်မည့် စွမ်းဆောင်ရည်မြှင့်တင်ရေး အစီအစဉ်များတွင်လည်း အရှိန်မြှင့်ပူးပေါင်းဆောင်ရွက်ကြရန်လည်း ဆွေးနွေးခဲ့ကြသည်။ ဆင်ဟွာMDN
Tue, 14-Apr-2026
ဟန်ဂေရီနိုင်ငံ၌ အထွေထွေရွေးကောက်ပွဲ စတင်
ဟန်ဂေရီနိုင်ငံ၌ အထွေထွေရွေးကောက်ပွဲ စတင်
ဘူဒါပက်စ် ဧပြီ ၁၂ ဟန်ဂေရီနိုင်ငံ၏ ပါလီမန်ရွေးကောက်ပွဲအတွက် မဲပေးမှုများ စတင်လုပ်ဆောင်နေပြီဖြစ်သည်။ စစ်တမ်း ကောက်ယူမှုများအရ ဝန်ကြီးချုပ် ဗစ်တာအော်ဘန်ဦးဆောင်သည့် အာဏာရ ဖီဒက်ဇ် ပါတီသည် ပါတီအသစ်တစ်ခု၏နောက်တွင် ရောက်ရှိနေသည်ဟု ဖော်ပြထားသည်။ ဧပြီ ၁၂ ရက် ညပိုင်း မဲရုံများပိတ်ပြီးနောက် မဲရေတွက်မှုများ စတင်မည်ဖြစ်သည်။  ဗစ်တာ အော်ဘန်သည်  ဟန်ဂေရီကို ဦးစားပေးသည့်ဝါဒကို နှစ်ခြိုက်သူဖြစ်ပြီး အမေရိကန်သမ္မတ ဒေါ်နယ်ထရမ့်နှင့်လည်း အဆင်ပြေသည့်ဆက်ဆံရေးကို ထိန်းသိမ်းထားနိုင်သူဖြစ်သည်။ ဟန်ဂေရီ ဝန်ကြီးချုပ် ပြန်လည်ရွေးကောက်ခံရရေး အမေရိကန်သမ္မတ ထရမ့်က ခိုင်ခိုင်မာမာ ထောက်ခံပေးလျက် ရှိပြီး ဒုတိယသမ္မတ ဂျေဒီဗန်စ်ကိုလည်း ဟန်ဂေရီသို့ စေလွှတ်ခဲ့သည်။ လွတ်လပ်သည့် သုတေသနအုပ်စု၏ စစ်တမ်းကောက်ယူမှုတစ်ခုအရ အော်ဘန်၏ ပါတီသည် တစ်ဇာပါတီ၏ နောက်တွင် ၁၀ ရာခိုင်နှုန်း နောက်ကျနေသည်ဟု  ဖော်ပြထားသည်။ တစ်ဇာပါတီသည်  ဥရောပသမဂ္ဂနှင့် ပူးပေါင်းဆောင်ရွက်ရေးနှင့် အကျင့်ပျက်ခြစားမှု တိုက်ဖျက်ရေးကို ထောက်ခံသည်။ လက်ရှိအာဏာရပါတီကို ထောက်ခံသူတစ်ဦးက အော်ဘန်သည် တိုင်းပြည်ကို ၁၆ နှစ် အုပ်ချုပ်ခဲ့ပြီး အုပ်ချုပ်မှုများ အောင်မြင်ခဲ့ကာ  ပြည်သူများ၏ဘဝတည်ငြိမ်စေခဲ့သည်ဟု ပြောသည်။ တစ်ဇာ ပါတီကို ထောက်ခံသူတစ်ဦးကလည်း ဟန်ဂေရီနိုင်ငံသည်  လူကြီးရော လူငယ်ပါနေထိုင်နိုင်သည့် နိုင်ငံအဖြစ် ပြန်လည်ဖြစ်ပေါ်လာမည်ဟု မျှော်လင့်ကြောင်း  ပြောကြားခဲ့သည်။ အင်န်အိတ်ချ်ကေ
Mon, 13-Apr-2026
ပုပ်ရဟန်းမင်းကြီး လီယို (၁၄) နှင့် သမ္မတ ဒေါ်နယ်ထရမ့်တို့အကြား တင်းမာမှုများ မြင့်တက်လာ
ပုပ်ရဟန်းမင်းကြီး လီယို (၁၄) နှင့် သမ္မတ ဒေါ်နယ်ထရမ့်တို့အကြား တင်းမာမှုများ မြင့်တက်လာ
အမေရိကန်သမ္မတ ဒေါ်နယ်ထရမ့်နှင့် ဗာတီကန်ပုပ်ရဟန်းမင်းကြီး လီယို (၁၄) တို့အကြား နိုင်ငံခြားရေးမူဝါဒနှင့် ပြည်တွင်းရေးရာကိစ္စရပ်များ အပေါ် အမြင်မတူညီမှုများကြောင့် စကားစစ်ထိုးပွဲများ ပြင်းထန်လျက် ရှိသည်။ ဖေဖော်ဝါရီလနှောင်းပိုင်းတွင်စတင်ခဲ့သော အီရန်အပေါ် အမေရိကန်-အစ္စရေးတို့၏ စစ်ဆင်ရေးကို ပုပ်ရဟန်းမင်းကြီးက "လူမျိုးတစ်စုလုံး အပေါ် ခြိမ်းခြောက်မှု" ဟုဆိုကာ ပြင်းပြင်းထန်ထန် ဝေဖန်ခဲ့ခြင်းက တင်းမာမှု၏ အဓိကအကြောင်းရင်း ဖြစ်လာခဲ့သည်။ ထို့အပြင် ပုပ် ရဟန်းမင်းကြီးသည် အမေရိကန်၏ ရွှေ့ပြောင်းနေထိုင်သူများအပေါ် ကိုင်တွယ်ပုံကိုလည်း ပြန်လည်သုံးသပ်ရန် တိုက်တွန်းခဲ့သည်။အဆိုပါ ဝေဖန်မှုများအပေါ် သမ္မတထရမ့်က Truth Social မှတစ်ဆင့်တုံ့ပြန်ရာတွင် ပုပ်ရဟန်းမင်းကြီးအား "အားနည်းသူ"၊ "ရာဇဝတ်မှုနှင့် နိုင်ငံခြားရေးမူဝါဒတွင် ညံ့ဖျင်းသူ" ဟု တိုက်ခိုက်ပြောဆိုခဲ့သည်။ ထရမ့်က ၎င်းအနေဖြင့် မဲအပြတ်အသတ်ဖြင့် ရွေးကောက်ခံထားရသည့်အတိုင်း စီးပွားရေးနှင့် တရားဥပဒေစိုးမိုးရေးကို အောင်မြင်စွာ လုပ်ဆောင် နေကြောင်း ခုခံပြောဆိုခဲ့ပြီး ပုပ်ရဟန်းမင်းကြီးသည် အမေရိကန် လူမျိုး ဖြစ်နေ၍သာ ရွေးချယ်ခံရခြင်းဖြစ်ကာ ၎င်းအား ရင်ဆိုင်ရန်အတွက်တမင်ရွေးချယ်ခံရသူဖြစ်ကြောင်း စွပ်စွဲခဲ့သည်။ Air Force One လေယာဉ် ပေါ်၌ သတင်းထောက်များနှင့် ပြောဆိုရာတွင်လည်း ထရမ့်က ပုပ်ရဟန်း မင်းကြီးအား "လစ်ဘရယ်သမားတစ်ဦး" ဟု သမုတ်ကာ ၎င်း၏ လုပ်ဆောင်ချက်များအပေါ် အားမလိုအားမရ ဖြစ်ကြောင်း ထုတ်ဖော် ပြောကြားခဲ့သည်။အခြားတစ်ဖက်တွင်လည်း ပုပ်ရဟန်းမင်းကြီးသည် ငြိမ်းချမ်းရေး အတွက် သံတမန်ရေးလမ်းကြောင်းသို့ ပြန်လည်ဦးတည်ရန် တောင်းဆိုမှု များကို အရှိန်မြှင့်လုပ်ဆောင်နေသည်။ အမေရိကန် စစ်မက်ရေးရာ ဝန်ကြီး ပိဟက်ဆက်၏ ဘာသာရေးအမည်ခံကာ အောင်ပွဲအတွက် ဆုတောင်းရန် တိုက်တွန်းမှုကိုလည်း "ဘုရားသခင်သည် စစ်မက်ဖြစ်ပွားစေသူတို့၏ ဆုတောင်းသံကို နားညောင်းမည်မဟုတ်" ဟု တုံ့ပြန်ခဲ့သည်။ပုပ်ရဟန်းမင်းကြီးက မည်သည့်ပဋိပက္ခသည်မျှ ဘုရားသခင်၏ ကောင်းချီးကို မခံစားရကြောင်းနှင့် အပြစ်မဲ့သူတို့၏ သွေးမြေကျမှုကိုရပ်တန့်ကာ မကောင်းမှုသံသရာကို ဖြတ်တောက်ကြရန် ဗာတီကန်မှနေ၍ ကမ္ဘာသို့ ဆက်လက်တိုက်တွန်းလျက် ရှိသည်။ကိုးကား- RTဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး
Mon, 13-Apr-2026
ဆိုးရော့စ်က ဟန်ဂေရီနိုင်ငံကို သိမ်းပိုက်လိုက်ပြီဟု Musk က ပြောကြား
ဆိုးရော့စ်က ဟန်ဂေရီနိုင်ငံကို သိမ်းပိုက်လိုက်ပြီဟု Musk က ပြောကြား
ဟန်ဂေရီရွေးကောက်ပွဲတွင် ဝန်ကြီးချုပ် ဗစ်တာ အော်ဘန် (Viktor Orban) ကို အီးယူလိုလားသည့် Tisza ပါတီက အနိုင်ရရှိသွားခြင်းသည် ဟန်ဂေရီနိုင်ငံကို ဆိုးရော့စ် (Soros) ကွန်ရက်က အခြေခံအားဖြင့် သိမ်းပိုက်လိုက်ခြင်းပင်ဖြစ်ကြောင်း အီလွန်မက် (Elon Musk) က ဝေဖန် ပြောကြားလိုက်သည်။ဘီလျံနာ ဂျော့ချ် ဆိုးရော့စ် (George Soros) ၏ သားဖြစ်သူနှင့် Open Society Foundations (OSF) ၏ ဥက္ကဋ္ဌဖြစ်သူ အလက်ဇန်းဒါး ဆိုးရော့စ် (Alexander Soros) က အော်ဘန်၏ ရှုံးနိမ့်မှုအပေါ် “အမြစ်တွယ် နေသော အကျင့်ပျက်ခြစားမှုနှင့် ပြည်ပစွက်ဖက်မှုများကို ပြတ်ပြတ်သားသားငြင်းပယ်လိုက်ခြင်း” ဟု ဂုဏ်ပြုပြောကြားခဲ့မှုအပေါ် မက်က X လူမှုကွန်ရက် မှတစ်ဆင့် တနင်္လာနေ့ (ဧပြီ ၁၃) တွင် တုံ့ပြန်ခဲ့ခြင်းဖြစ်သည်။ SpaceX နှင့် Tesla ကုမ္ပဏီတို့၏ ပိုင်ရှင်ဖြစ်သူ မက် က “ဆိုးရော့စ် အဖွဲ့အစည်း က ဟန်ဂေရီကို သိမ်းပိုက်လိုက်ပြီ” ဟု ရေးသားဖော်ပြခဲ့သည်။ထို့ပြင် အမေရိကန်သမ္မတဟောင်း ဘားရက် အိုဘားမား၊ ဗြိတိန် ဝန်ကြီးချုပ် ကီယာ စတာမာ၊ ယူကရိန်းသမ္မတ ဗလာဒီမာ ဇီလန်စကီးနှင့် အီးယူအရာရှိများ အပါအဝင် အော်ဘန်၏ရှုံးနိမ့်မှုကို ကြိုဆိုခဲ့ကြသူများ ၏စာရင်းကို ဖော်ပြထားသည့်ပို့စ်တစ်ခုတွင်လည်း မက် က ၎င်းတို့၏ သဘောထားမှာ ရှင်းလင်းကြောင်း မှတ်ချက်ပြုခဲ့သည်။ဟန်ဂေရီရွေးကောက်ပွဲတွင် ပီတာ မာဂျာ (Peter Magyar) ဦးဆောင်သည့် ကွန်ဆာဗေးတစ် Tisza ပါတီက မဲအရေအတွက် ၅၃.၆ ရာခိုင်နှုန်းဖြင့် အနိုင်ရရှိခဲ့ပြီး လွှတ်တော်အမတ်နေရာ ၁၉၉ နေရာအနက် ၁၃၈ နေရာ ကို သိမ်းပိုက်နိုင်ခဲ့ခြင်းကြောင့် မက် က ယခုကဲ့သို့ မှတ်ချက်ပြု ခဲ့ခြင်းဖြစ်သည်။ ဝန်ကြီးချုပ် အော်ဘန်၏ လက်ယာယိမ်း Fidesz ပါတီ မှာမူ မဲအရေအတွက် ၃၇.၈ ရာခိုင်နှုန်းဖြင့် အမတ်နေရာ ၅၅ နေရာသာ ရရှိခဲ့ပြီး ယခုရွေးကောက်ပွဲသည် မဲပေးသူဦးရေ ၈၀ ရာခိုင်နှုန်းခန့် အထိ ရှိခဲ့သည့် ထူးခြားသော ရွေးကောက်ပွဲတစ်ခုလည်း ဖြစ်ခဲ့သည်။Tisza ပါတီသည် ကွန်ဆာဗေးတစ်မူဝါဒကို ကျင့်သုံးသည်ဟု ဆိုသော်လည်း အော်ဘန်၏ အဓိကမူဝါဒများကို ဖျက်သိမ်းကာ ဥရောပသမဂ္ဂ (EU) နှင့် နေတိုး (NATO) အဖွဲ့တို့နှင့် ပြန်လည်နီးကပ်စွာ ဆောင်ရွက်သွားမည်ဟု ကတိပြုထားသည်။ဝန်ကြီးချုပ်အဖြစ် ၁၆ နှစ်ကြာ တာဝန်ယူခဲ့မှုမှာ ယခုအခါ အဆုံးသတ် တော့မည်ဖြစ်သည့် အော်ဘန်သည် ဟန်ဂေရီဖွား ဘီလျံနာ ဆိုးရော့စ်နှင့် ကာလရှည်ကြာ ပဋိပက္ခဖြစ်ပွားခဲ့သူဖြစ်သည်။ အော်ဘန်က ဆိုးရော့စ် သည် Woke အယူဝါဒများ၊ လစ်ဘရယ် နိုင်ငံတကာဝါဒများနှင့် ရွှေ့ပြောင်း အခြေချသူများ ကျူးကျော်ဝင်ရောက်လာစေခြင်းမှတစ်ဆင့် ဥရောပတိုက် သားရင်းမြစ်များကို လူနည်းစုဖြစ်သွားအောင် ကြံစည်နေသူဖြစ်ကြောင်း စွပ်စွဲပြောဆိုလေ့ရှိသည်။ဆိုးရော့စ် တည်ထောင်ခဲ့သည့် Open Society Foundations (OSF) သည် ဟန်ဂေရီနိုင်ငံတွင် ခိုင်မာသော အခြေစိုက်မှုရှိနေသည်။ Fundamental Rights ဆိုင်ရာ လေ့လာရေးဗဟိုဌာန၏ သုတေသနပြုချက်အရ ၂၀၁၆ ခုနှစ်မှ ၂၀၂၃ ခုနှစ်အတွင်း အဆိုပါကွန်ရက်သည် ဟန်ဂေရီအခြေစိုက် အဖွဲ့အစည်းများအတွက် ရန်ပုံငွေ အမေရိကန်ဒေါ်လာ သန်း ၉၀ နီးပါး အသုံးပြုခဲ့ပြီး ၂၀၂၂ ခုနှစ် ပါလီမန်ရွေးကောက်ပွဲ မတိုင်မီ တစ်နှစ်အတွင်း ၌ပင် စံချိန်တင်ပမာဏဖြစ်သည့် ဒေါ်လာ ၁၇ သန်းအထိ ထောက်ပံ့ ခဲ့ကြောင်း သိရှိရသည်။အစီရင်ခံစာအရ ဟန်ဂေရီနိုင်ငံသည် ဥရောပနှင့် ဆိုဗီယက်ဟောင်း ဒေသ များရှိ နိုင်ငံအလိုက် ပျမ်းမျှထောက်ပံ့ငွေ ဒေါ်လာ ၁၉ သန်းထက် နှစ်ဆ နီးပါး ပိုမိုရရှိခဲ့ခြင်းဖြစ်ပြီး ဆိုးရော့စ်၏ ဘဏ္ဍာရေးထောက်ပံ့မှုကို အကျိုး ခံစားခွင့်ရသည့် အဖွဲ့အစည်းပေါင်း အနည်းဆုံး ၁၅၃ ခုအထိ ရှိခဲ့သည်။၂၀၁၈ ခုနှစ်တွင် ဝန်ကြီးချုပ် အော်ဘန်က ‘Stop Soros’ ရွှေ့ပြောင်း အခြေချမှု ဆန့်ကျင်ရေး ဥပဒေကြမ်းကို အတည်ပြုခဲ့ပြီးနောက် OSF သည် ဟန်ဂေရီနိုင်ငံမှ ထွက်ခွာခဲ့ရသည်။ သို့သော်လည်း ဝေဖန်သူများ က OSF သည် အဆိုပါလုပ်ရပ်များကြားမှပင် အခြားသော နည်းလမ်း ပေါင်းစုံဖြင့် ဟန်ဂေရီနိုင်ငံ၏ ပြည်တွင်းနိုင်ငံရေးအခင်းအကျင်းအပေါ် ဆက်လက် သြဇာလွှမ်းမိုးနေဆဲဖြစ်ကြောင်း ထောက်ပြပြောဆိုလျက် ရှိကြသည်။ကိုးကား- RTဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး
Mon, 13-Apr-2026
အစ္စရေးဝန်ကြီးချုပ် နေတန်ယာဟု လက်ဘနွန်တောင်ပိုင်းရှိ သိမ်းပိုက်ထားသော နယ်မြေများသို့ သွားရောက်
အစ္စရေးဝန်ကြီးချုပ် နေတန်ယာဟု လက်ဘနွန်တောင်ပိုင်းရှိ သိမ်းပိုက်ထားသော နယ်မြေများသို့ သွားရောက်
အစ္စရေးဝန်ကြီးချုပ် ဘင်ဂျမင် နေတန်ယာဟုသည် အစ္စရေးနှင့် လက်ဘနွန်တို့ ဝါရှင်တန်ဒီစီတွင် တိုက်ရိုက်ဆွေးနွေးပွဲများ မပြုလုပ်မီ နှစ်ရက်အလိုဖြစ်သော တနင်္ဂနွေနေ့ (ဧပြီ ၁၂) တွင် လက်ဘနွန် တောင်ပိုင်းရှိ အစ္စရေးတို့ သိမ်းပိုက်ထားသော နယ်မြေများသို့ သွားရောက်၍ စစ်မြေပြင်အခြေအနေကို ကြည့်ရှုစစ်ဆေးခဲ့သည်။အဆိုပါခရီးစဉ်သည် အီရန်နှင့် စစ်ပွဲစတင်ကတည်းက နေတန်ယာဟု အနေဖြင့် လက်ဘနွန်ပိုင်နက်အတွင်းသို့ ပထမဆုံးအကြိမ်အဖြစ် ထူးထူးခြားခြားဝင်ရောက်လာခြင်းဖြစ်ကြောင်း အစ္စရေးအရာရှိများနှင့် ဝန်ကြီးချုပ်ရုံးက အတည်ပြုခဲ့သည်။ခရီးစဉ်အတွင်း ဝန်ကြီးချုပ်သည် ကာကွယ်ရေးဝန်ကြီး အစ္စရေးလ် ကာ့ဇ်၊ စစ်ဦးစီးချုပ် ဒုတိယဗိုလ်ချုပ်ကြီး အီရယ်လ် ဇာမာတို့နှင့်အတူ အစ္စရေး တပ်ဖွဲ့ဝင်များကို တွေ့ဆုံခဲ့ပြီး ရန်သူဖြစ်သော အီရန်နှင့် ၎င်း၏ မဟာမိတ်များသည် လက်ရှိတွင် ရှင်သန်ရပ်တည်ရေးအတွက်သာ ရုန်းကန်နေရပြီ ဖြစ်ကြောင်း ပြောကြားခဲ့သည်။ကာကွယ်ရေးဝန်ကြီး ကာ့ဇ်ကလည်း “Silver Plow” ဟု အမည် ပေးထားသည့် အဆိုပါစစ်ဆင်ရေး၏ ရည်ရွယ်ချက်မှာ အစ္စရေး မြောက်ပိုင်း ဒေသခံများအတွက် လုံခြုံရေးအာမခံချက် အပြည့်အဝရရှိစေရန်နှင့် လီတာနီ မြစ်တောင်ဘက်ရှိ နယ်မြေများကို ထိန်းချုပ်ရန်ဖြစ်ကြောင်း ရှင်းလင်း ပြောဆိုခဲ့သည်။လက်ရှိတွင် အစ္စရေးနှင့် အီရန်ကျောထောက်နောက်ခံပြု ဟစ်ဇဘိုလာ အဖွဲ့တို့အကြား တိုက်ခိုက်မှုများ ပြင်းထန်နေဆဲဖြစ်ပြီး အစ္စရေးဘက်က လက်ဘနွန်အတွင်းရှိ ပစ်မှတ်များကို ဆက်တိုက်ဗုံးကြဲနေသကဲ့သို့ ဟစ်ဇဘိုလာဘက်ကလည်း အစ္စရေးမြောက်ပိုင်းသို့ ဒုံးကျည်များဖြင့် တုံ့ပြန်ပစ်ခတ်လျက်ရှိသည်။ ထိုကဲ့သို့ တင်းမာမှုများ မြင့်တက်နေချိန်တွင် ဝန်ကြီးချုပ်၏ ခရီးစဉ် ပေါ်ပေါက်လာခြင်းဖြစ်သည်။ကိုးကား- CNNဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး
Mon, 13-Apr-2026
တရုတ်နိုင်ငံမှ အီရန်သို့ လက်နက်များ လွှဲပြောင်းပေးပါက ၅၀ ရာခိုင်နှုန်း အကောက်ခွန် စည်းကြပ်မည်ဟု ထရမ့် သတိပေး
တရုတ်နိုင်ငံမှ အီရန်သို့ လက်နက်များလွှဲပြောင်းပေးပါက ၅၀ ရာခိုင်နှုန်း အကောက်ခွန် စည်းကြပ်မည်ဟု ထရမ့် သတိပေး
အကယ်၍ တရုတ်နိုင်ငံမှ အီရန်နိုင်ငံသို့ လက်နက်များ လွှဲပြောင်းပေးအပ်ခြင်းပြုလုပ်ခဲ့ပါက တရုတ်နိုင်ငံအနေဖြင့် ၅၀ ရာခိုင်နှုန်း အကောက်ခွန်စည်းကြပ်မှုနှင့် ရင်ဆိုင်ရမည်ဖြစ်ကြောင်း သမ္မတ ဒေါ်နယ်ထရမ့်က သတိပေးပြောကြားလိုက်သည်။ သို့သော် အမေရိကန် ထောက်လှမ်းရေးသတင်းများတွင် ပေကျင်းသည် ထိုသို့လုပ်ဆောင်ရန် အစီအစဉ်ရှိကြောင်း ညွှန်ပြနေသော်လည်း တရုတ်ဘက်မှ လုပ်ဆောင် လိမ့်မည်ဟု မိမိမထင်ကြောင်း ၎င်းကဆိုသည်။“တရုတ်က ပခုံးထမ်း ဒုံးကျည်တွေ၊ လေယာဉ်ပစ် ဒုံးကျည်တွေပေးနေတယ်ဆိုတဲ့ သတင်းတွေ ကျွန်တော်ကြားပါတယ်” ဟု ၎င်းက ပြောကြား ခဲ့သည်။ ထိုသို့ပြောကြားရာတွင် ပေကျင်းသည် MANPADs ဟု လူသိများသည့် ပခုံးထမ်း လေယာဉ်ပစ် ဒုံးကျည်စနစ်များကို လွှဲပြောင်းပေးရန် ပြင်ဆင်နေကြောင်း CNN ၏ သီးသန့်သတင်းထုတ်ပြန်ချက်ကို ရည်ညွှန်းပြောဆိုခဲ့ခြင်းဖြစ်သည်ဟု ယူဆရသည်။Fox News ၏ Sunday Morning Futures with Maria Bartiromo အစီအစဉ်တွင် ထရမ့်က “သူတို့ (တရုတ်) အဲ့ဒီလို လုပ်လိမ့်မယ်လို့ ကျွန်တော် သံသယရှိပါတယ် ၊ ဘာလို့လဲဆိုတော့ ကျွန်တော့်မှာ သူတို့နဲ့ ဆက်ဆံရေးရှိထားတာကြောင့် သူတို့ ဒါမျိုးလုပ်မှာမဟုတ်ဘူးလို့ ထင်ပါတယ်” ဟု ပြောကြားခဲ့သည်။ထို့ပြင် ၎င်းက “အစောပိုင်းတုန်းကတော့ နည်းနည်းပါးပါး လုပ်ခဲ့ကောင်းလုပ်ခဲ့နိုင်ပေမယ့် နောက်ထပ်တော့လုပ်တော့မှာမဟုတ်ဘူးလို့ ထင်ပါတယ် ၊ ဒါပေမဲ့ သူတို့ ဒါမျိုးလုပ်နေတာကို ကျွန်တော်တို့ တွေ့ခဲ့ရင်တော့ သူတို့ ၅၀ ရာခိုင်နှုန်း အကောက်ခွန် အစည်းခံရပါလိမ့်မယ် ၊ ဒါဟာ တကယ့်ကို တုန်လှုပ်စရာကောင်းတဲ့ ပမာဏပါပဲ” ဟု ဆက်လက် ပြောဆိုခဲ့သည်။လတ်တလော ထောက်လှမ်းရေး ဆန်းစစ်ချက်များအရ တရုတ်နိုင်ငံသည် လာမည့် သီတင်းပတ်အနည်းငယ်အတွင်း အီရန်သို့ လေကြောင်းရန် ကာကွယ်ရေး စနစ်အသစ်များ ပေးပို့ရန်ပြင်ဆင်နေကြောင်း အမေရိကန် ထောက်လှမ်းရေးသတင်းများက ညွှန်ပြနေသည်ဟု CNN က စနေနေ့ (ဧပြီ ၁၁) တွင် သတင်းဖော်ပြခဲ့သည်။ဝါရှင်တန်ရှိ တရုတ်သံရုံး ပြောရေးဆိုခွင့်ရှိသူကမူ “တရုတ်နိုင်ငံဟာ ပဋိပက္ခဖြစ်ပွားနေတဲ့ ဘယ်အဖွဲ့အစည်းကိုမှ လက်နက်တွေ ထောက်ပံ့ပေးခဲ့ခြင်း မရှိပါဘူး၊ အခု ဖော်ပြနေတဲ့ သတင်းတွေဟာ မမှန်ကန် ပါဘူး” ဟု တုံ့ပြန်ခဲ့သည်။ “တာဝန်သိတဲ့ နိုင်ငံကြီးတစ်နိုင်ငံအနေနဲ့ တရုတ် နိုင်ငံဟာ နိုင်ငံတကာ တာဝန်ဝတ္တရားတွေကို အမြဲတမ်း လိုက်နာပါတယ်၊ အမေရိကန်အနေနဲ့ အခြေအမြစ်မရှိတဲ့ စွပ်စွဲချက်တွေလုပ်တာ၊ မရည်ရွယ်ဘဲ ဆက်စပ်မှုတွေရှာတာနဲ့ စိတ်လှုပ်ရှားစရာဖြစ်အောင် လုပ်နေတာတွေကို ရှောင်ကြဉ်ဖို့ တိုက်တွန်းပါတယ် ၊ သက်ဆိုင်ရာ အဖွဲ့အစည်းတွေအနေနဲ့ တင်းမာမှုတွေလျှော့ချနိုင်ဖို့အတွက် ပိုမိုလုပ်ဆောင်ပေးကြလိမ့်မယ်လို့ မျှော်လင့်ပါတယ်” ဟု ၎င်းက ဖြည့်စွက်ပြောကြားခဲ့သည်။ကိုးကား- CNNPhoto: NDTVဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး
Mon, 13-Apr-2026
© Copyright 2024 SAC All Rights Reserved.