ဆီးရီးယားနှင့် ဂျော်ဒန် ပူးပေါင်းဆောင်ရွက်ရေးမြှင့်တင်မည့် သဘောတူညီချက်များ လက်မှတ်ရေးထိုး

NoahJune222

News Image

  • ဆီးရီးယားနှင့် ဂျော်ဒန် ပူးပေါင်းဆောင်ရွက်ရေးမြှင့်တင်မည့် သဘောတူညီချက်များ လက်မှတ်ရေးထိုး

ဒမတ်စကပ်စ် ဧပြီ ၁၃

 

ဆီးရီးယားနှင့် ဂျော်ဒန်နိုင်ငံတို့သည် အဓိကအခန်းကဏ္ဍများတွင် နှစ်နိုင်ငံပူးပေါင်းဆောင်ရွက်ရေး တိုးမြှင့်ရန်ရည်ရွယ်သည့် သဘောတူညီချက်များစွာကို သဘောတူလက်မှတ်ရေးထိုးလိုက်ပြီ ဖြစ်ကြောင်း ဧပြီ ၁၂ ရက် က ထုတ်ပြန်သော တရားဝင်ကြေညာချက် တစ်ရပ်အရ သိရသည်။

 

ဧပြီ ၁၂ ရက်က ဂျော်ဒန်နိုင်ငံ၏မြို့တော်တွင် ကျင်းပခဲ့သော ဆီးရီးယား-ဂျော်ဒန် အဆင့်မြင့် ပူးပေါင်းဆောင်ရွက်ရေး ကောင်စီ၏ ဒုတိယအကြိမ် အစည်းအဝေးတွင် ယင်းသဘောတူညီချက် များစွာကို ရရှိခဲ့ခြင်းဖြစ်သည်၊။ အဆိုပါ အစည်းအဝေးကို နှစ်နိုင်ငံစလုံးမှ အဆင့်မြင့်အရာရှိများက ပူးတွဲ သဘာပတိအဖြစ် ဆောင်ရွက်ခဲ့ကြသည်။

 

ဆီးရီးယား နိုင်ငံခြားရေးတာဝန်ရှိသူများ၏ ထုတ်ပြန်ချက်တွင် ဇန်နဝါရီ ၂၆ ရက်က လက်မှတ် ရေးထိုးခဲ့သည့် သဘောတူညီချက်အရ ဆီးရီးယားနိုင်ငံသို့ သဘာဝဓာတ်ငွေ့များ ပြန်လည်ပို့ဆောင်ရန် နှစ်ဖက်စလုံးက သဘောတူခဲ့ကြပြီး နည်းပညာပိုင်းဆိုင်ရာ လုပ်ငန်းစဉ်များပြီးဆုံးပြီးနောက် နှစ်ရက် အတွင်း ပြန်လည်ပို့ဆောင်နိုင်ရန် မျှော်မှန်းထား ကြောင်း ဖော်ပြထားသည်။

 

သယ်ယူပို့ဆောင်ရေးကဏ္ဍတွင် ကုန်းကြောင်း၊ လေကြောင်းနှင့် ရေကြောင်းနယ်ပယ်များ၌ ပူးပေါင်း ဆောင်ရွက်မှုအားကောင်းစေရေး ကတိကဝတ်ကို နှစ်ဖက်စလုံးက ထပ်လောင်းအတည်ပြုခဲ့ကြသည်။ သယ်ယူပို့ဆောင်ရေးလုပ်ငန်းစဉ်များ လွယ်ကူရိုးရှင်းစေရန်နှင့် လုပ်ငန်းလည်ပတ်ရာတွင် ပိုမို သွက်လက် မြန်ဆန်စေရန်အတွက်လည်း အတူတကွပူးပေါင်း အဖြေရှာကြမည်ဖြစ်ကြောင်း သိရသည်။

 

ဆီးရီးယားနှင့် ဂျော်ဒန်နိုင်ငံတို့သည် ပညာရေး၊ ကျန်းမာရေးစောင့်ရှောက်မှု၊ စိုက်ပျိုးရေး၊ ခရီးသွား လုပ်ငန်းနှင့် အဖွဲ့အစည်းဆိုင်ရာ ဖွံ့ဖြိုးတိုးတက်မှုများအပြင် ပြည်သူ့စွမ်းဆောင်ရည်ကို မြှင့်တင်မည့် စွမ်းဆောင်ရည်မြှင့်တင်ရေး အစီအစဉ်များတွင်လည်း အရှိန်မြှင့်ပူးပေါင်းဆောင်ရွက်ကြရန်လည်း ဆွေးနွေးခဲ့ကြသည်။

 

ဆင်ဟွာ

MDN

MM-News-Category
နိုင်ငံရေးကဏ္ဍသတင်းများ
နိုင်ငံရေး-နိုင်ငံတကာသတင်း

ဆက်စပ်သတင်းများ

စစ်မီးတောက်များ ပိုမိုပြင်းထန်လာသည်နှင့်အမျှ တရုတ်နိုင်ငံသည် မိမိကိုယ်ကိုယ် တာဝန်သိ ခေါင်းဆောင်တစ်ဦးအဖြစ် ရပ်တည်လာ
စစ်မီးတောက်များ ပိုမိုပြင်းထန်လာသည်နှင့်အမျှ တရုတ်နိုင်ငံသည် မိမိကိုယ်ကိုယ် တာဝန်သိ ခေါင်းဆောင်တစ်ဦးအဖြစ် ရပ်တည်လာ
အီရန်စစ်ပွဲ၏ နောက်ဆက်တွဲဆိုးကျိုးများ ပိုမိုနက်ရှိုင်းလာသည်နှင့်အမျှ တရုတ်နိုင်ငံသည် သမ္မတ ဒေါ်နယ်ထရမ့်၏ ခန့်မှန်းရခက်သော နိုင်ငံခြားရေးမူဝါဒနှင့် ဆန့်ကျင်ဘက်ဖြစ်သော "တာဝန်သိသည့် ကမ္ဘာ့ ခေါင်းဆောင်" တစ်ဦးအဖြစ် မိမိကိုယ်ကိုယ် ပုံဖော်လာနေသည်။တရုတ်နိုင်ငံခြားရေးဝန်ကြီးဌာန၏ ထုတ်ပြန်ချက်အရ တရုတ် ခေါင်းဆောင် ရှီကျင့်ဖျင်က အင်္ဂါနေ့ (ဧပြီ ၁၄) တွင် စပိန်ဝန်ကြီးချုပ် ပီဒရို ဆန်းချက်ဇ် နှင့် တွေ့ဆုံစဉ် "ယနေ့ကမ္ဘာကြီးသည် တရားမျှတမှုနှင့် အာဏာစက်တို့အကြား ထိပ်တိုက်တွေ့မှုများနှင့် ရင်ဆိုင်နေရပြီး ရှုပ်ထွေးမှုများဖြင့် ပြည့်နှက်နေသည်" ဟု ပြောကြားခဲ့သည်။ ရှီကျင့်ဖျင်က “နိုင်ငံတစ်နိုင်ငံအနေနဲ့ နိုင်ငံတကာဥပဒေနဲ့ နိုင်ငံတကာအမိန့်အာဏာအပေါ် ဘယ်လို သဘောထားတယ်ဆိုတာဟာ အဲဒီနိုင်ငံရဲ့ ကမ္ဘာ့အမြင်၊ စနစ်တကျရှိမှု ဆိုင်ရာ အယူအဆ၊ တန်ဖိုးထားမှုတွေနဲ့ တာဝန်သိစိတ်တို့ကို ထင်ဟပ် နေတာ ဖြစ်တယ်” ဟု ဆိုသည်။ထိုနေ့တွင်ပြုလုပ်ခဲ့သည့် အခြားဆွေးနွေးပွဲတစ်ခုတွင်လည်း ရှီကျင့်ဖျင် က ကမ္ဘာကြီးကို "တောရိုင်းဥပဒေ" (အင်အားကြီးသူနိုင်စတမ်း) ထံသို့ ပြန်မရောက်သွားစေရန်နှင့် နိုင်ငံတကာဥပဒေစိုးမိုးရေးကို မိမိအကျိုးရှိမည့် နေရာတွင်သာ ရွေးချယ်ပြီးကျင့်သုံးခြင်းမျိုး မလုပ်ဆောင်ရန် တိုက်တွန်း ခဲ့သည်။ ထိုစကားရပ်နှစ်ခုလုံးသည် အမေရိကန်ကို ဝေဖန်ရန်အတွက် တရုတ်ခေါင်းဆောင်များ ယခင်ကတည်းက အသုံးပြုခဲ့သော စကားလုံး များဖြစ်သည်။တရုတ်နိုင်ငံခြားရေးဝန်ကြီးဌာနကမူ ပိုမို၍တိုက်ရိုက်ကျစွာ ပြောဆိုခဲ့ပြီး ပြောရေးဆိုခွင့်ရှိသူတစ်ဦးက အမေရိကန်၏ အီရန်ဆိပ်ကမ်းများကို ပိတ်ဆို့မှုသည် အန္တရာယ်ရှိပြီး တာဝန်မဲ့သော လုပ်ရပ်ဖြစ်သည်ဟု ပြောဆို ခဲ့သည်။တရုတ်အရာရှိများသည် စစ်ပွဲအတွင်း ငြိမ်းချမ်းရေးရရှိရန် ရက်သတ္တပတ် ပေါင်းများစွာ သံတမန်ရေးအရ ကြိုးပမ်းခဲ့ကြသည်။ ၎င်းတို့၏ ရင်းနှီးသော သံတမန်မိတ်ဖက်ဖြစ်သည့် အီရန်နိုင်ငံအား ဆွေးနွေးပွဲစားပွဲဝိုင်းသို့ရောက်ရှိလာစေရန် တရုတ်နိုင်ငံက ကူညီပေးခဲ့သည်ဟု ထရမ့် ကိုယ်တိုင် ပင် မကြာသေးမီ သီတင်းပတ်များအတွင်းက အရိပ်အမြွက် ပြောကြားခဲ့ ဖူးသည်။ပြီးခဲ့သည့်သီတင်းပတ်ကုန်က အစ္စလာမ်မာဘတ်တွင် ပြုလုပ်ခဲ့သည့် အမေရိကန်-အီရန် ငြိမ်းချမ်းရေးဆွေးနွေးပွဲပျက်ပြားသွားပြီးနောက် တရုတ်နိုင်ငံ၏ ထိပ်တန်းသံတမန်သည် တနင်္လာနေ့ (ဧပြီ ၁၃) တွင် ပါကစ္စတန်နိုင်ငံခြားရေးဝန်ကြီးနှင့် စကားပြောဆိုခဲ့ပြီး ပေကျင်း အနေဖြင့် ငြိမ်းချမ်းရေးအတွက် ဆက်လက်လုပ်ဆောင်သွားရန် ဆန္ဒရှိကြောင်း အလေးပေး ပြောကြားခဲ့သည်။ကိုးကား- CNNဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး
Wed, 15-Apr-2026
အီရန်၏ သန့်စင်ပြီး ယူရေနီယံ လက်ကျန်များကို ဖြေရှင်းပေးရန် ရုရှား ထပ်မံကမ်းလှမ်း
အီရန်၏ သန့်စင်ပြီး ယူရေနီယံ လက်ကျန်များကို ဖြေရှင်းပေးရန် ရုရှား ထပ်မံကမ်းလှမ်း
လာမည့်ရက်ပိုင်းအတွင်း အမေရိကန်နှင့် အီရန်တို့အကြား ငြိမ်းချမ်းရေးဆွေးနွေးပွဲ အသစ်တစ်ရပ် ဖြစ်ပေါ်လာနိုင်ခြေရှိသည်ဟု ခန့်မှန်းချက်များ ထွက်ပေါ်နေစဉ် အီရန်၏ သန့်စင်ပြီးယူရေနီယံ လက်ကျန်ပြဿနာကို ဖြေရှင်းပေးရန် ရုရှား ကကမ်းလှမ်းချက်ကို ထပ်မံအတည်ပြုလိုက်ကြောင်း ဗုဒ္ဓဟူးနေ့ (ဧပြီ ၁၅) တွင် နိုင်ငံပိုင်မီဒီယာက ဖော်ပြခဲ့သည်။ရုရှားနိုင်ငံခြားရေးဝန်ကြီး Sergey Lavrov က အီရန်၏ အဆင့်မြင့်သန့်စင်ထားသော ယူရေနီယံများကို လောင်စာအဆင့်သို့ ပြောင်းလဲရာတွင်ဖြစ်စေ၊ သိုလှောင်ရာတွင်ဖြစ်စေ ရုရှားက ကူညီပေးနိုင်ကြောင်း ပြောကြားခဲ့သည်။ ထိုသို့ဆောင်ရွက်ရာတွင် "အီရန်၏ ငြိမ်းချမ်းစွာ ယူရေနီယံ သန့်စင်ခွင့်ကိုမထိခိုက်စေဘဲ အီရန်နိုင်ငံကလက်ခံနိုင်မည့် နည်းလမ်းများဖြင့် ကူညီပေးမည်" ဖြစ်ကြောင်း TASS သတင်းဌာနက ဖော်ပြခဲ့သည်။နျူကလီးယားလက်နက် ထုတ်လုပ်နိုင်မှု၏ ရှေ့ပြေးနိမိတ်အဖြစ် ရှုမြင်ခံထားရသော အီရန်၏ အဆင့်မြင့်သန့်စင်ပြီး ယူရေနီယံ လက်ကျန်ပမာဏ သည် အမေရိကန်နှင့် အီရန်တို့အကြား စစ်ပွဲကိုအဆုံးသတ်ရန် ကြိုးပမ်းနေသည့် ဆွေးနွေးပွဲများတွင် အဓိကအငြင်းပွားဖွယ်ရာ အချက်တစ်ချက် ဖြစ်နေသည်။အီရန်အနေဖြင့် ၎င်းတို့၏ ယူရေနီယံ သန့်စင်မှုအစီအစဉ်ကို ရပ်တန့်ရန်နှင့် မြေအောက်တွင် မြှုပ်နှံထားသည်ဟုယူဆရသော အဆင့်မြင့် သန့်စင်ပြီး ယူရေနီယံ ခန့်မှန်းခြေ ၄၆၀ ကီလိုဂရမ်ကို ပြန်လည်ထုတ်ယူရန် အမေရိကန်က တောင်းဆိုထားကြောင်း အိမ်ဖြူတော် အရာရှိတစ်ဦးက CNN သို့ ပြောကြားခဲ့သည်။ပြီးခဲ့သည့် သီတင်းပတ်ကုန်က အစ္စလာမ်မာဘတ်တွင် ပြုလုပ်ခဲ့သော ဆွေးနွေးပွဲများ၌ နှစ်ဖက်စလုံးက ယူရေနီယံသန့်စင်မှုကို ခေတ္တရပ်ဆိုင်း ထားရန် အဆိုပြုခဲ့ကြသော်လည်း အမေရိကန်သမ္မတ Donald Trump ကမူ ခေတ္တရပ်ဆိုင်းသည့် အယူအဆကို မနှစ်သက်ဘဲ လုံးဝ ရပ်တန့်သွားသည်ကိုသာ လိုလားကြောင်း ပြောကြားခဲ့သည်။ယခင်ကလည်း အိုဘားမားလက်ထက် နျူကလီးယားသဘောတူညီချက် (JCPOA) စတင်စဉ်အခါက အီရန်၏ သန့်စင်ပြီးယူရေနီယံများကို ကိုင်တွယ် ဖြေရှင်းရာတွင် မော်စကိုက ကူညီပေးခဲ့ဖူးသည်။ငြိမ်းချမ်းရေးဆွေးနွေးပွဲတွင် သန့်စင်ပြီး ယူရေနီယံနှင့်ပတ်သက်၍ အီရန်၏ မည်သည့်ဆုံးဖြတ်ချက်ကိုမဆို ရုရှားက လက်ခံမည်ဟု Lavrov က ဆိုသည်။ သို့သော် ‘ငြိမ်းချမ်းစွာ ယူရေနီယံသန့်စင်ခွင့်ရှိသည်’ ဟူသော သူ၏ ပြောကြားချက်မှာ အီရန် အစိုးရ၏ ရပ်တည်ချက်နှင့် တစ်ထပ်တည်း ကျနေသည်။ အီရန်သည် ၎င်းတို့၏ ယူရေနီယံသန့်စင်မှုကို လျှပ်စစ်ဓာတ်အားပေးစက်ရုံများနှင့် ငြိမ်းချမ်းသောရည်ရွယ်ချက်များ အတွက်သာ အသုံးပြုရန်ဖြစ်သည်ဟု ကာလရှည်ကြာ ပြောဆိုလာခဲ့ခြင်းဖြစ်သည်။တရုတ်သမ္မတ ရှီကျင့်ဖျင်နှင့် တွေ့ဆုံရန် တရုတ်နိုင်ငံသို့ သွားရောက်ပြီးနောက် Lavrov က ဆက်လက်ပြောကြားရာတွင် ဟော်မုဇ် ရေလက်ကြား ပိတ်ဆို့မှုကြောင့် စွမ်းအင်လိုအပ်ချက် မြင့်မားနေသော တရုတ်နှင့် အခြားနိုင်ငံများကိုလည်း ရုရှားက စွမ်းအင်ပေးပို့မှုများ ကမ်းလှမ်းလျက်ရှိကြောင်း TASS သတင်းက ဖော်ပြထားသည်။ကိုးကား- CNNဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး
Wed, 15-Apr-2026
အီရန်နှင့်စစ်ဖြစ်ခြင်းက နေတန်ယာဟုအတွက် နိုင်ငံရေးအရှုံးဖြစ်နိုင်ဟု အစ္စရေး ယာယီသမ္မတဟောင်း သတိပေး
အီရန်နှင့်စစ်ဖြစ်ခြင်းက နေတန်ယာဟုအတွက် နိုင်ငံရေးအရှုံးဖြစ်နိုင်ဟု အစ္စရေး ယာယီသမ္မတဟောင်း သတိပေး
အီရန်အပေါ် ဆင်နွှဲခဲ့သည့် အမေရိကန်-အစ္စရေး စစ်ပွဲနှင့် မကြာသေးမီက ကြေညာခဲ့သော အပစ်အခတ်ရပ်စဲရေးတို့သည် အမေရိကန်သမ္မတ ဒေါ်နယ်ထရမ့်နှင့် အစ္စရေးဝန်ကြီးချုပ် ဘင်ဂျမင် နေတန်ယာဟုတို့ကြားရှိ နိုင်ငံရေးအကျိုးစီးပွား ပဋိပက္ခကို မီးမောင်းထိုးပြလိုက်ခြင်း ဖြစ်ကြောင်း အစ္စရေး ယာယီသမ္မတဟောင်းနှင့် လွှတ်တော်ဥက္ကဋ္ဌ ဟောင်း အာဗရာဟမ် ဘာ့ဂ် (Avraham Burg) က ဝေဖန်ပြောကြားလိုက်သည်။RT သတင်းဌာနနှင့် ပြုလုပ်သည့် သီးသန့်တွေ့ဆုံမေးမြန်းခန်းတွင် ဘာ့ဂ် က ရှင်းလင်းရာ၌ သမ္မတထရမ့်အနေဖြင့် အမေရိကန်ပြည်ထောင်စု၏ သက်တမ်းဝက်ရွေးကောက်ပွဲများကို မထိခိုက်စေရန် စစ်ပွဲကို အမြန်ဆုံးအဆုံးသတ်လိုသော်လည်း နေတန်ယာဟုမှာမူ လာမည့် အောက်တိုဘာလ ရွေးကောက်ပွဲတွင် ပြည်သူများ၏ မျိုးချစ်စိတ်ကို အသုံးချကာ အာဏာတည်မြဲရေးအတွက် စစ်ပွဲကို တတ်နိုင်သမျှ အချိန်ဆွဲလိုခဲ့ကြောင်း ထောက်ပြခဲ့သည်။ သို့သော် ဝန်ကြီးချုပ်၏ အဆိုပါ လောင်းကြေးထပ်မှုမှာ အလုပ်မဖြစ်ခဲ့ဘဲ ၎င်းအတွက် နိုင်ငံရေးအရ အမြတ်မထွက်သည့် အပြင် များစွာဆုံးရှုံးနိုင်ခြေရှိနေကြောင်း ၎င်းက သုံးသပ်ထားသည်။ထို့ပြင် အီရန်သည် အစ္စရေးနိုင်ငံ၏ တည်ရှိမှုအတွက် အမှန်တကယ် ခြိမ်းခြောက်မှုမဟုတ်ဘဲ သံတမန်နည်းလမ်းဖြင့် ဖြေရှင်း၍ရသော ကိစ္စ ဖြစ်ကြောင်းနှင့် နေတန်ယာဟုအနေဖြင့် အာဏာအတွက် နျူကလီးယားလက်နက် အသုံးပြုလိမ့်မည်ဟူသော ခန့်မှန်းချက်များကိုလည်း ဘာ့ဂ်က ပယ်ချခဲ့သည်။ ၎င်းက လက်ရှိအပစ်အခတ်ရပ်စဲရေးကို အမေရိကန်က အစ္စရေးအား "လမ်းခွဲလိုက်ခြင်း" ဟု တင်စားခဲ့ပြီး အဆိုပါပဋိပက္ခတွင် အကြီးအကျယ်ထိုးနှက်ခံရသော်လည်း ဆက်လက်ရှင်သန်နိုင်ခဲ့သည့် အီရန်သည်သာ အစစ်အမှန် အနိုင်ရရှိသူဖြစ်ကြောင်း ကောက်ချက်ချခဲ့သည်။နောက်ဆုံးအနေဖြင့် နေတန်ယာဟု၏ လှည့်ကွက်များနှင့် အာဏာဖက်တွယ်မှုများကို အစ္စရေးပြည်သူများ ငြီးငွေ့နေပြီဖြစ်ရာ လာမည့် ရွေးကောက်ပွဲသည် နေတန်ယာဟုအစိုးရ၏ နောက်ဆုံးလပိုင်းများ ဖြစ်လာလိမ့်မည်ဟု ဘာ့ဂ်က ခန့်မှန်းပြောကြားခဲ့သည်။ကိုးကား- RTဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး
Wed, 15-Apr-2026
အမေရိကန်အနေဖြင့် အီရန်နိုင်ငံအပေါ်ထားရှိသည့် ရည်မှန်းချက် များကို အောင်မြင်စွာ လုပ်ဆောင်နိုင်ခဲ့ပြီဟု ဗန့်စ် ပြောကြား
အမေရိကန်အနေဖြင့် အီရန်နိုင်ငံအပေါ်ထားရှိသည့် ရည်မှန်းချက်များကို အောင်မြင်စွာ လုပ်ဆောင်နိုင်ခဲ့ပြီဟု ဗန့်စ် ပြောကြား
အမေရိကန်သည် အီရန်နိုင်ငံအပေါ်ထားရှိသည့် ၎င်း၏ရည်မှန်းချက်များကို အောင်မြင်စွာ အကောင်အထည်ဖော်နိုင်ခဲ့ပြီဖြစ်သဖြင့် အဆိုပါ ဒေသရှိ စစ်ရေးစစ်ဆင်ရေးများကို စတင်လျှော့ချနိုင်ပြီဖြစ်ကြောင်း အမေရိကန်ဒုတိယသမ္မတ ဂျေဒီဗန့်စ် (J.D. Vance) က ပြောကြားလိုက်သည်။ ပါကစ္စတန်နိုင်ငံ၊ အစ္စလာမ်မာဘတ်မြို့တွင် ပြုလုပ်ခဲ့သည့် ဆွေးနွေးပွဲများ၌ နျူကလီးယားပစ္စည်းများ ဖယ်ရှားရေးနှင့် ယူရေနီယံသန့်စင်မှု တားဆီးရေးဆိုင်ရာ ကိစ္စရပ်များတွင် တိုးတက်မှုအချို့ ရှိခဲ့ကြောင်း၊ ဆက်လက်လုပ်ဆောင်ရန် ရှိ၊ မရှိ မှာ အီရန်ဘက်က ဆုံးဖြတ်ရမည့် အခြေအနေဖြစ်ကြောင်း ၎င်းက Fox News နှင့် အင်တာဗျူးတွင် ထည့်သွင်းပြောဆိုခဲ့သည်။အမေရိကန်သမ္မတ ဒေါ်နယ်ထရမ့်ကလည်း ဟော်မုဇ်ရေလက်ကြားရှိ အီရန်ဆိပ်ကမ်းများကို ပိတ်ဆို့မှုများ စတင်ပြုလုပ်ခဲ့ပြီး၊ ယင်းမှာ တီဟီရန် ကို ဆွေးနွေးပွဲစားပွဲဝိုင်းသို့ ပြန်လာစေရန်နှင့် မြင့်တက်နေသော ကမ္ဘာ့စွမ်းအင်စျေးနှုန်းများကိုထိန်းညှိနိုင်ရန် ရေနံလမ်းကြောင်းပြန်ဖွင့်ရန် ရည်ရွယ်ခြင်းဖြစ်ကြောင်း ဆိုသည်။ ဒုတိယသမ္မတ ဗန့်စ်က အမေရိကန် ၏ကန့်သတ်ချက်များကို လိုက်နာပါက နိုင်ငံနှစ်ခုလုံးအတွက် ကောင်းမွန် သည့် သဘောတူညီချက် ရရှိနိုင်မည်ဟု မျှော်လင့်ချက်ပေးထားသည်။သို့သော်လည်း အီရန်ဘက်ကမူ ဝါရှင်တန်၏ ရည်ရွယ်ချက်များအပေါ် လွန်စွာ သံသယရှိနေဆဲဖြစ်သည်။ အီရန် လွှတ်တော်အမျိုးသားလုံခြုံရေးနှင့် နိုင်ငံခြားရေးမူဝါဒကော်မတီ အကြီးအကဲ အီဘရာဟင် အဇီဇီက အမေရိကန်သည် ၎င်းတို့ထက်ပို၍ သဘောတူညီချက်ကို လိုအပ်နေခြင်းဖြစ်ပြီး ဝါရှင်တန်အနေဖြင့် အီရန်၏ စည်းကမ်းချက်များကို လက်ခံရမည်ဖြစ်ကြောင်း တုံ့ပြန်ခဲ့သည်။ အီရန်ပြည်သူအချို့မှာ ဆွေးနွေးပွဲဝင်ခြင်းအပေါ် မကျေမနပ်ဖြစ်နေကြပြီး မောက်မာမှုနှင့် နယ်ချဲ့ဝါဒကို ကျင့်သုံးနေသည့် အမေရိကန်၏ ကတိကဝတ်များကို ယုံကြည်ရန်ခက်ခဲကြောင်း အီရန် ဘက်က တင်းမာစွာတုံ့ပြန်ထားသဖြင့် နှစ်နိုင်ငံကြား ဆွေးနွေးမှုများမှာ ရှေ့မတိုးသာနောက်မဆုတ်သာ အခြေအနေနှင့် ရင်ဆိုင်နေရသည်။ကိုးကား- RTဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး
Wed, 15-Apr-2026
ဥရောပသမဂ္ဂအတွင်း ဗီတိုအာဏာ ကျင့်သုံးခွင့်ကို ပယ်ဖျက်ရန် Ursula von der Leyen က တိုက်တွန်းနှိုးဆော်
ဥရောပသမဂ္ဂအတွင်း ဗီတိုအာဏာ ကျင့်သုံးခွင့်ကို ပယ်ဖျက်ရန် Ursula von der Leyen က တိုက်တွန်းနှိုးဆော်
ဥရောပသမဂ္ဂ (EU) ၏ နိုင်ငံခြားရေးမူဝါဒဆိုင်ရာ ဆုံးဖြတ်ချက်များအပေါ် အဖွဲ့ဝင်နိုင်ငံ တစ်နိုင်ငံချင်းစီ၏ ဗီတိုအာဏာကျင့်သုံးခွင့်ကို ရုပ်သိမ်းရန် အချိန်တန်ပြီဟု ဥရောပကော်မရှင်ဥက္ကဋ္ဌ Ursula von der Leyen က အခိုင်အမာ ပြောကြားလိုက်သည်။Von der Leyen ၏ ယခုတိုက်တွန်းမှုသည် သူမ၏ ကာလရှည် ပြိုင်ဘက် ဖြစ်သူ ဟန်ဂေရီဝန်ကြီးချုပ် Viktor Orban အထွေထွေ ရွေးကောက်ပွဲ တွင် ရှုံးနိမ့်ပြီးနောက် ၂၄ နာရီပင် မပြည့်မီ ထွက်ပေါ်လာခြင်းဖြစ်သည်။ Orban သည် Peter Magyar ဦးဆောင်သော EU လိုလားသည့် Tisza ပါတီကို ရှုံးနိမ့်ကာ အာဏာလက်လွှတ်ခဲ့ရသူ ဖြစ်သည်။ဘရပ်ဆဲလ်ကို ပြင်းပြင်းထန်ထန်ဝေဖန်လေ့ရှိသူ Orban သည် ၎င်း၏ ရာထူးသက်တမ်းအတွင်း တညီတညွတ်တည်း ဆုံးဖြတ်ရမည်ဟူသော စည်းမျဉ်းကို အသုံးပြု၍ EU ၏ မူဝါဒအများအပြားကို ဟန့်တားနှောင့်နှေးစေခဲ့သည်။ မကြာသေးမီ လများအတွင်းကလည်း ယူကရိန်းသို့ ယူရို ၉၀ ဘီလီယံ (ဒေါ်လာ ၁၀၅ ဘီလီယံ) ထောက်ပံ့မည့် အရေးပေါ် ချေးငွေကို ဘူဒါပက်စ်က ဗီတိုအာဏာသုံး၍ ပိတ်ပင်ခဲ့သည်။ ၎င်းမှာ ယူကရိန်းနိုင်ငံမှတစ်ဆင့် Druzhba ပိုက်လိုင်းဖြင့် ရုရှားရေနံတင်သွင်းမှုကို ပြန်လည်စတင်ရန် ယူကရိန်းဘက်က ငြင်းဆန်နေခြင်းကြောင့် ဖြစ်သည်။"နိုင်ငံခြားရေးမူဝါဒမှာ အရည်အချင်းပြည့်မီတဲ့ အများစုမဲ (Qualified Majority Voting) နဲ့ ဆုံးဖြတ်တဲ့စနစ်ကို ပြောင်းလဲတာဟာ အရင်က ကျွန်မတို့ကြုံတွေ့ခဲ့ရသလို စနစ်တကျ ပိတ်ဆို့ဟန့်တားမှုတွေကို ရှောင်ရှားနိုင်ဖို့ အရေးကြီးတဲ့နည်းလမ်းတစ်ခု ဖြစ်ပါတယ်" ဟု Von der Leyen က တနင်္လာနေ့ (ဧပြီ ၁၃) တွင် အလေးအနက် ပြောကြားခဲ့သည်။ဥရောပကော်မရှင် အကြီးအကဲသည် EU ၏ အခြေခံစည်းမျဉ်းများကို ပြောင်းလဲရန် ကာလကြာမြင့်စွာကပင် ကြိုးပမ်းနေခြင်းဖြစ်သည်။ ၎င်းမှာ အဆင့်နှစ်ဆင့်ရှိသော အဖွဲ့အစည်းပုံစံကို ဖော်ဆောင်ရန်ဖြစ်ပြီး ထိုသို့ ပြုလုပ်ခြင်းဖြင့် ယူကရိန်းအနေဖြင့် အဖွဲ့ဝင်နိုင်ငံဖြစ်ရန်လိုအပ်ချက်များ အပြည့်အဝမပြည့်မီသော်လည်း အဖွဲ့အတွင်းသို့ ပေါင်းစည်း ဝင်ရောက် နိုင်မည် ဖြစ်သည်။ယူကရိန်းနိုင်ငံ EU အဖွဲ့ဝင်ဖြစ်ရေးကို ပြင်းပြင်းထန်ထန်ဆန့်ကျင်ခဲ့သူ Orban ရှုံးနိမ့်သွားသည့် အရှိန်အဟုန်ကို အသုံးချပြီး EU ၏ လုပ်ထုံး လုပ်နည်းများကို ပြောင်းလဲရန်နှင့် နိုင်ငံတကာဆက်ဆံရေးတွင် ဗီတို အာဏာသုံးသည့်စနစ်ကို အဆုံးသတ်ရန် Von der Leyen က တိုက်တွန်း ခဲ့သည်။Von der Leyen က Magyar ၏ အောင်ပွဲကို ကြိုဆိုလိုက်ပြီး ဘရပ်ဆဲလ် အနေဖြင့် ၎င်း၏အစိုးရနှင့် ပထမနေ့ကတည်းက လက်တွဲဆောင်ရွက် သွားမည်ဟု ဆိုသည်။ “ဟန်ဂေရီနိုင်ငံအနေနဲ့ ဥရောပလမ်းကြောင်းပေါ် ပြန်တက်လှမ်းလာတဲ့အခါ လုပ်ဆောင်စရာတွေ အများကြီးရှိပါတယ်” ဟုလည်း သူမက သတိပေးပြောကြားခဲ့သည်။Von der Leyen ၏ အဆိုအရ Magyar အပေါ်ထားရှိသည့် ကော်မရှင်၏ သဘောထားမှာ “သူ့အပေါ် နှစ်ဆတိုးပြီး ယုံကြည်အားကိုးကြစို့ ၊ သူတို့ ဘက်က ရလဒ်ကောင်းတွေ ပြနိုင်ရင် ကျွန်မတို့ဘက်ကလည်း ပံ့ပိုး ပေးမယ်” ဟူ၍ ဖြစ်သည်။လက်ရှိတွင် ဘရပ်ဆဲလ်သည် ယူကရိန်းအရေး၊ ရွှေ့ပြောင်းအခြေချမှု၊ LGBTQ အခွင့်အရေးများနှင့် အခြားသောကိစ္စရပ်များတွင် Orban နှင့် သဘောထားကွဲလွဲမှုများရှိခဲ့ခြင်းကြောင့် ဟန်ဂေရီသို့ပေးမည့် ယူရို ၃၅ ဘီလီယံတန်ဖိုးရှိ EU ရန်ပုံငွေများကို ဆိုင်းငံ့ထားသည်။ဘူဒါပက်စ်နှင့် ဘရပ်ဆဲလ်အကြား ဆက်ဆံရေးပြန်လည်ကောင်းမွန်လာစေရန်အတွက် Magyar အနေဖြင့် ယူကရိန်းသို့ပေးမည့် ယူရို ၉၀ ဘီလီယံ ချေးငွေကိုပိတ်ဆို့ထားခြင်းမှ သဘောတူညီပေးရန်နှင့် ၎င်း၏ ရှေ့ဆောင်ဝန်ကြီးချုပ်၏ အဓိကမူဝါဒအချို့ကို ပြောင်းပြန်လှန်ပစ်ရန် EU ဘက်က မျှော်လင့်ထားကြောင်း သံတမန်များက Financial Times သို့ ပြောကြားခဲ့သည်။Tisza ပါတီခေါင်းဆောင်ကမူ ၎င်း၏အစိုးရအနေဖြင့် ယူကရိန်းသို့ ပေးအပ်မည့် ရန်ပုံငွေများကို ဗီတိုအာဏာသုံး၍ ပိတ်ပင်ရန် အစီအစဉ် မရှိကြောင်း တနင်္လာနေ့ (ဧပြီ ၁၃) တွင် ပြောကြားခဲ့သော်လည်း ဘဏ္ဍာရေးဆိုင်ရာ အခက်အခဲများကြောင့် EU ၏ ချေးငွေအစီအစဉ်တွင် ဟန်ဂေရီ အနေဖြင့် ပါဝင်မည်မဟုတ်ကြောင်း ဖြည့်စွက်ပြောကြားခဲ့သည်။ထို့အပြင် Magyar သည် ယူကရိန်းကို EU အဖွဲ့ဝင်အဖြစ် အလျင်အမြန်လက်ခံမည့် အစီအစဉ်အပေါ်ဝေဖန်ခဲ့ပြီး ရုရှားနှင့် စွမ်းအင်ဆိုင်ရာ ပူးပေါင်းဆောင်ရွက်မှုကို ဆက်လက်လုပ်ဆောင်သွားမည်ဟု အခိုင်အမာ ပြောကြားခဲ့သည်။ ဟန်ဂေရီအနေဖြင့် “ရေနံစိမ်းနှင့် သဘာဝ ဓာတ်ငွေ့ ကို အသက်သာဆုံးနှင့် အန္တရာယ်အကင်းဆုံးနည်းလမ်းဖြင့် ဝယ်ယူသွားမည်” ဟု ၎င်းက ရှင်းလင်းပြောဆိုခဲ့သည်။ကိုးကား- RTဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး
Wed, 15-Apr-2026
ဂျာမနီနိုင်ငံရှိ ယူကရိန်းအမျိုးသားများကို ရှေ့တန်းစစ်မျက်နှာပြင်သို့ ပြန်လည်စေလွှတ်ရန် မာ့ဇ် လိုလား
ဂျာမနီနိုင်ငံရှိ ယူကရိန်းအမျိုးသားများကို ရှေ့တန်းစစ်မျက်နှာပြင်သို့ ပြန်လည်စေလွှတ်ရန် မာ့ဇ် လိုလား
ဂျာမနီရောက် စစ်မှုထမ်းအရွယ် ယူကရိန်းအမျိုးသားများကို မိခင်နိုင်ငံသို့ ပြန်လည်စေလွှတ်နိုင်ရေးအတွက် ဂျာမနီ ဝန်ကြီးချုပ် ဖရိုင်းဒရစ် မာ့ဇ်နှင့် ယူကရိန်းသမ္မတ ဇီလန်စကီးတို့ ဘာလင်မြို့တွင် တွေ့ဆုံဆွေးနွေးခဲ့ကြပြီး ပူးပေါင်းဆောင်ရွက်သွားရန် သဘောတူညီခဲ့ကြသည်။ အဆိုပါ ဆုံးဖြတ်ချက်သည် ယူကရိန်းနိုင်ငံ၏ ကာကွယ်ရေးစွမ်းရည်နှင့် ပြန်လည်တည်ဆောက်ရေးလုပ်ငန်းများအတွက် မရှိမဖြစ်လိုအပ်ကြောင်း မာ့ဇ်က အလေးပေးပြောကြားခဲ့သည်။ လက်ရှိတွင် ယူကရိန်းစစ်မျက်နှာပြင်၌ အကျအဆုံးများပြားလာပြီး မိမိသဘောဆန္ဒအလျောက် စစ်မှုထမ်းလိုသူ ရှားပါးလာခြင်းကြောင့် ယူကရိန်း အာဏာပိုင်များသည် အင်အားသုံး၍ စစ်သားစုဆောင်းသည့် နည်းလမ်းများကို ပိုမိုအသုံးပြုလာနေရသည်။ယူကရိန်းလွှတ်တော်၏ ထုတ်ပြန်ချက်များအရ စစ်တပ်အတွင်းသို့ အသစ်ဝင်ရောက်လာသူများ၏ ၁၀ ရာခိုင်နှုန်းဝန်းကျင်ခန့်သာ မိမိသဘောဆန္ဒဖြင့် ဝင်ရောက်လာခြင်းဖြစ်ပြီး ကျန်ရှိသူများမှာ အတင်းအဓမ္မ ဖမ်းဆီးစုဆောင်းခံရသူများဖြစ်နေသဖြင့် ပြည်တွင်း၌ လူထု၏မကျေနပ်မှုများ မြင့်တက်လျက်ရှိသည်။ ၂၀၂၂ ခုနှစ်နောက်ပိုင်း ဂျာမနီနိုင်ငံသည် ယူကရိန်းရွှေ့ပြောင်းနေထိုင်သူ တစ်သန်းကျော်ကို လက်ခံထားရာ ဥရောပတွင် အများဆုံး ဖြစ်လာခဲ့သည်။ ယင်းအခြေအနေအပေါ် ရုရှားနိုင်ငံဘက်ကမူ အနောက်အုပ်စုသည် ယူကရိန်းနိုင်ငံသားများကိုအသုံးချ၍ ၎င်းတို့ကို Proxy စစ်ပွဲဆင်နွှဲ နေသည်ဟု စွပ်စွဲထားသော်လည်း ဂျာမနီနှင့် ယူကရိန်း ခေါင်းဆောင်များကမူ စစ်မှုထမ်းအရွယ် အမျိုးသားများ နေရပ်ပြန်ရေးသည် နိုင်ငံ တည်ငြိမ်ရေးအတွက် လက်တွေ့ကျသော ခြေလှမ်းတစ်ရပ်ဖြစ်ကြောင်း ရှုမြင်နေကြသည်။ကိုးကား- RTဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး
Wed, 15-Apr-2026
© Copyright 2024 SAC All Rights Reserved.