လက်ဘနွန်တွင် စစ်မီးပြန်လည်တောက်လောင်လာပြီး အပစ်အခတ်ရပ်စဲရေး ပျက်ပြားမည့်အရေး ကြုံတွေ့နေရ

KookieSpace97

News Image

  • လက်ဘနွန်တွင် စစ်မီးပြန်လည်တောက်လောင်လာပြီး အပစ်အခတ် ရပ်စဲရေး ပျက်ပြားမည့်အရေး ကြုံတွေ့နေရ

အီရန်နှင့် အစ္စရေးအကြား တိုက်ပွဲများငြိမ်သက်သွားသော်လည်း လက်ဘနွန် တောင်ပိုင်းတွင်မူ အခြေအနေများမှာ တစ်နေ့ထက်တစ်နေ့ ပိုမိုဆိုးရွား လာနေသည်။ အမေရိကန်က ဦးဆောင်၍ ဧပြီလ ၁၆ ရက်နေ့တွင် ကြေညာခဲ့သော အပစ်အခတ်ရပ်စဲရေးကာလကို သုံးပတ်ထပ်မံ တိုးမြှင့်ထားသော်လည်း တနင်္ဂနွေနေ့ (ဧပြီ ၂၆) က အစ္စရေး၏ လေကြောင်းတိုက်ခိုက်မှုများကြောင့် ကလေးငယ်နှစ်ဦး အပါအဝင် လူပေါင်း (၁၄) ဦး သေဆုံးခဲ့ရပြီး ယင်းသည် အပစ်အခတ်ရပ်စဲရေးကာလအတွင်း အသေအပျောက်အများဆုံးနေ့ ဖြစ်ခဲ့ရသည်။ 

အစ္စရေးစစ်တပ်၏ စစ်ဆင်ရေးများသည် ဂါဇာတွင် အသုံးပြုခဲ့သည့် နည်းဗျူဟာများအတိုင်း ကျန်းမာရေးဌာနများနှင့် အခြေခံအဆောက်အအုံများကို ပစ်မှတ်ထားကာ စိတ်ဓာတ်စစ်ဆင်ရေးများပါ လုပ်ဆောင်လာနေကြောင်း လူ့အခွင့်အရေးအဖွဲ့များက ထောက်ပြလျက်ရှိသည်။

တစ်ဖက်တွင်လည်း လက်ဘနွန်နိုင်ငံရေးလောကအတွင်း ဟစ်ဇဘိုလာအဖွဲ့၏ လုပ်ရပ်များအပေါ် ပြင်းထန်သောဝေဖန်မှုများ ထွက်ပေါ်လာ နေသည်။ လက်ဘနွန်သမ္မတ ဂျိုးဇက်အောင်းက ဟစ်ဇဘိုလာအဖွဲ့အနေဖြင့် အစ္စရေးနှင့် ငြိမ်းချမ်းရေးဆွေးနွေးရန် ငြင်းဆန်နေခြင်းသည် မိမိနိုင်ငံ၏ အကျိုးစီးပွားထက် အီရန်နှင့်ဂါဇာအတွက် ရှေ့တန်းတင်နေခြင်းဖြစ်ပြီး နိုင်ငံကိုစစ်ပွဲအတွင်းသို့ အတင်းအကျပ်ဆွဲသွင်းနေခြင်းမှာ "သစ္စာဖောက်မှု" ပင်ဖြစ်သည်ဟု ပြစ်တင်ရှုတ်ချခဲ့သည်။ 

သို့သော်လည်း ဟစ်ဇဘိုလာအဖွဲ့ကမူ ၎င်းတို့၏ရပ်တည်ချက်ကို လျှော့ချခြင်းမရှိဘဲ အစ္စရေး၏ ကျူးကျော်မှုကိုဟန့်တားရန် ၁၉၈၀ ပြည့်လွန်နှစ်များက အသုံးပြုခဲ့သည့် "အသေခံတပ်ဖွဲ့" ဗျူဟာများကို ပြန်လည်အသက်သွင်းကာ ခုခံသွားမည်ဟု တုံ့ပြန်ထားသဖြင့် ဒေသတွင်း ပဋိပက္ခမှာ ပိုမိုနက်ရှိုင်းလာမည့် အခြေအနေတွင် ရှိနေသည်။

ကိုးကား- CNN

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး

MM-News-Category
လုံခြုံရေးကဏ္ဍသတင်းများ
လုံခြုံရေး-နိုင်ငံတကာသတင်း

ဆက်စပ်သတင်းများ

လက်ဘနွန်တောင်ပိုင်းတွင် အစ္စရေး၏တိုက်ခိုက်မှုကြောင့် ညီအစ်ကို နှစ်ဦး သေဆုံး
လက်ဘနွန် တောင်ပိုင်းတွင် အစ္စရေး၏ တိုက်ခိုက်မှုကြောင့် ညီအစ်ကို နှစ်ဦး သေဆုံး
လက်ဘနွန်တောင်ပိုင်းတွင် အစ္စရေး၏ တိုက်ခိုက်မှုကြောင့် တာဝန်ချိန် ပြင်ပရောက် လက်ဘနွန်စစ်သားတစ်ဦးနှင့် ၎င်း၏ညီဖြစ်သူတို့ သေဆုံးခဲ့ကြောင်း လက်ဘနွန်စစ်တပ်က ပြောကြားခဲ့သည်။အပစ်အခတ်ရပ်စဲရေး သဘောတူညီချက်ရှိထားသော်လည်း အစ္စရေး သည် လက်ဘနွန်နိုင်ငံအတွင်း ဆက်လက်တိုက်ခိုက်နေဆဲဖြစ်သည်။ အီရန်ကျောထောက်နောက်ခံပြု ဟစ်ဇဘိုလာလက်နက်ကိုင်အဖွဲ့ကို ပစ်မှတ်ထားရာတွင် အစ္စရေးအနေဖြင့် လက်ဘနွန်နိုင်ငံအနှံ့ ဗုံးကြဲတိုက်ခိုက်ခွင့် ရှိကြောင်း အပစ်ရပ်စဲရေးစည်းကမ်းချက်များတွင် ပါဝင်သည်ဟု အစ္စရေး ဝန်ကြီးချုပ် ဘင်ဂျမင် နေတန်ယာဟုက ဆိုသည်။" Bint Jbeil ခရိုင်ရှိ Khirbet Selm မြို့မှာ ဆိုင်ကယ်နဲ့သွားလာနေတဲ့ စစ်သားတစ်ဦးနဲ့ သူရဲ့ညီဖြစ်သူတို့ကို အစ္စရေးရဲ့တိုက်ခိုက်မှုက ပစ်မှတ် ထားခဲ့တာကြောင့် သေဆုံးသွားခဲ့ပါတယ်" ဟု လက်ဘနွန်စစ်တပ်က လူမှုကွန်ရက်စာမျက်နှာတွင် ဖော်ပြထားသည်။ကိုးကား- CNNဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး
Wed, 29-Apr-2026
အမေရိကန်ကာကွယ်ရေးဝန်ကြီးနှင့် စစ်ဘက်အရာရှိချုပ် ကာကွယ်ရေး အသုံးစရိတ်ကိစ္စ ကွန်ဂရက်တွင် ကြားနာစစ်ဆေးခံရမည်
အမေရိကန်ကာကွယ်ရေးဝန်ကြီးနှင့် စစ်ဘက်အရာရှိချုပ် ကာကွယ်ရေးအသုံးစရိတ်ကိစ္စ ကွန်ဂရက်တွင် ကြားနာစစ်ဆေးခံရမည်
အီရန်နိုင်ငံနှင့် စစ်ပွဲဖြစ်ပွားနေသည့်ကာလအတွင်း အမေရိကန် ကာကွယ်ရေးဝန်ကြီး Pete Hegseth နှင့် ပူးတွဲစစ်ဦးစီးချုပ်များအဖွဲ့ ဥက္ကဋ္ဌ ဗိုလ်ချုပ်ကြီး Dan Caine တို့သည် ၎င်းတို့ဌာန၏ ဘတ်ဂျက်တောင်းခံမှုနှင့်ပတ်သက်၍ ဧပြီ ၂၉ ရက်နေ့တွင် ကွန်ဂရက်လွှတ်တော်၌ ပထမဆုံးအကြိမ်အဖြစ် ကြားနာစစ်ဆေးခံကြရမည်ဖြစ်သည်။ အဆိုပါကြားနာပွဲကို အောက်လွှတ်တော် လက်နက်ကိုင်တပ်ဖွဲ့များကော်မတီက အရှေ့ဘက်စံတော်ချိန် နံနက် ၁၀ နာရီတွင် ကျင်းပသွားရန်စီစဉ်ထားပြီး စစ်ပွဲစတင်ကတည်းက လွှတ်တော်အမတ်များအနေဖြင့် ထိပ်တန်းအရာရှိကြီးများကို တိုက်ရိုက်မေးမြန်းခွင့်ရသည့် ပထမဆုံးသော အခွင့်အရေးလည်းဖြစ်သည်။အိမ်ဖြူတော်သည် ၂၀၂၇ ဘဏ္ဍာနှစ်အတွက် ကာကွယ်ရေးအသုံးစရိတ်အဖြစ် အမေရိကန်ဒေါ်လာ ၁.၅ ထရီလီယံအထိ တောင်းခံထားကြောင်း CNN သတင်းဌာနက ဖော်ပြခဲ့သည်။ ထိုပမာဏသည် ပြီးခဲ့သည့်နှစ်ထက် ၄၀ ရာခိုင်နှုန်းကျော် ပိုမိုများပြားလာခြင်းဖြစ်ပြီး အမေရိကန်၏ ခေတ်သစ်သမိုင်းတစ်လျှောက် စစ်အသုံးစရိတ် အမြင့်မားဆုံးအမှတ်သို့ ရောက်ရှိလာခြင်းလည်း ဖြစ်သည်။ အဆိုပါ ဘတ်ဂျက်တောင်းခံမှုအပေါ် ကာကွယ်ရေးဝန်ကြီး Hegseth က ကြိုဆိုထောက်ခံထားပြီး နိုင်ငံ၏ နှစ်ပေါင်း ၂၅၀ သမိုင်းတစ်လျှောက် အရှုပ်ထွေးဆုံးသော ခြိမ်းခြောက်မှုများကို ရင်ဆိုင်နေရချိန်တွင် ဝေဟင်၊ ရေပြင်၊ မြေပြင်၊ အာကာသနှင့် ဆိုက်ဘာနယ်ပယ်များ၌ ရန်သူများကို ထိရောက်စွာတုံ့ပြန်နိုင်ရန်အတွက် ထိုသမိုင်းဝင်ဘတ်ဂျက်သည် မရှိမဖြစ်လိုအပ်ကြောင်း ထုတ်ဖော်ပြောကြားထားသည်။ သို့ဖြစ်ရာ ဧပြီ ၂၉ တွင်နေ့ကျင်းပမည့် ကြားနာပွဲသည် စစ်ပွဲကာလအတွင်း အစိုးရ၏ စစ်ရေးဗျူဟာနှင့် ငွေကြေးသုံးစွဲမှုအပေါ် လွှတ်တော်တွင်းအချေအတင်ဆွေးနွေးမှုများ ပြင်းထန်လာမည့်အခြေအနေတစ်ရပ် ဖြစ်နေသည်။ကိုးကား- CNNဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး
Wed, 29-Apr-2026
စစ်ကိုင်းတိုင်းဒေသကြီး၊ ပုလဲမြို့နယ်၌ PDF အမည်ခံ အကြမ်းဖက်သမားများက လက်နက်ကြီးဖြင့် ပစ်ခတ်ခဲ့မှုကြောင့် အပြစ်မဲ့ အရပ်သားပြည်သူ တစ်ဦး ထိခိုက်ဒဏ်ရာရရှိ
စစ်ကိုင်းတိုင်းဒေသကြီး၊ ပုလဲမြို့နယ်၌ PDF အမည်ခံ အကြမ်းဖက်သမားများက လက်နက်ကြီးဖြင့် ပစ်ခတ်ခဲ့မှုကြောင့် အပြစ်မဲ့ အရပ်သားပြည်သူ တစ်ဦး ထိခိုက်ဒဏ်ရာရရှိ
28 April 2026     အကြမ်းဖက်သမားများသည် အေးချမ်းစွာ နေထိုင်လျက်ရှိသော ပြည်သူများ ထိခိုက်ဒဏ်ရာ ရရှိစေရန်နှင့် အကြောက်တရားများ လွှမ်းမိုးစေရန် ရည်ရွယ်ချက်များဖြင့် ဖမ်းဆီးသတ်ဖြတ်ခြင်း၊ ရပ်ကွက်၊ ကျေးရွာများအတွင်းသို့ လက်နက်ကြီး၊ လက်နက်ငယ်များ၊ Drone ဖြင့် Drop Bomb များ ပစ်ချတိုက်ခိုက်ခြင်းများအား ဆင်ခြင်တုံတရားကင်းမဲ့စွာ ပြုလုပ်လျက်ရှိသည်။     ထိုသို့ လုပ်ဆောင်လျက်ရှိရာ ၂၀၂၆ ခုနှစ်၊ ဧပြီ ၂၆ ရက် ညနေ ၅ နာရီ ၂၅ မိနစ်တွင် မန္တလေးတိုင်းဒေသကြီး၊ ချမ်းအေးသာစံမြို့နယ်ရှိ မန္တလေးပြည်သူ့ဆေးရုံကြီး၌ ဗုံးသီးပေါက်ကွဲစ ထိမှန်ဒဏ်ရာများဖြင့် အမျိုးသား တစ်ဦး ရောက်ရှိနေကြောင်း သတင်းအရ လုံခြုံရေးတပ်ဖွဲ့ဝင်များက သွားရောက်စစ်ဆေး၍ ဖြစ်စဉ်အား စိစစ်ခဲ့ရာ ဧပြီ ၂၄ ရက် မွန်းလွဲ ၁ နာရီတွင် စစ်ကိုင်းတိုင်းဒေသကြီး၊ ပုလဲမြို့နယ်၊ ပိတောက်ကုန်းကျေးရွာနေ ဦးမျိုးလှိုင်(၃၈)နှစ်သည် ၎င်း၏နေအိမ်မှ မုံရွာမြို့သို့ ဈေးဝယ်ရန် မော်တော်ယာဉ်ဖြင့် ထွက်ခွာလာရာ နှောရိုးကျေးရွာအနီး ခေတ္တရပ်နားနေစဉ် ၎င်းအနီးသို့ PDF အမည်ခံ အကြမ်းဖက်သမားများက အများပြည်သူထိခိုက်စေရန် ရည်ရွယ်၍ ပစ်ခတ်လိုက်သည့် လက်နက်ကြီးဗုံးသီး တစ်လုံး ကျရောက်ပေါက်ကွဲခဲ့မှုကြောင့် ၎င်းတွင် ထိခိုက်ဒဏ်ရာများ ရရှိခဲ့ခြင်းဖြစ်ကြောင်း သိရသည်။     ထိုသို့ အပြစ်မဲ့ အရပ်သားပြည်သူများ အေးချမ်းစွာ နေထိုင်လျက်ရှိသော ရပ်ကွက်၊ ကျေးရွာများအတွင်းသို့ လက်နက်ကြီး၊ လက်နက်ငယ်၊ Drop Bomb များဖြင့် ပစ်ခတ်တိုက်ခိုက်ခြင်းများအား ဆင်ခြင်တုံတရားကင်းမဲ့စွာ ပြုလုပ်နေမှုများကြောင့် အပြစ်မဲ့ အရပ်သားပြည်သူ တစ်ဦး ထိခိုက်ဒဏ်ရာများ ရရှိခဲ့မှုအပေါ် ဒေသခံပြည်သူများက လုံးဝလက်ခံနိုင်ခြင်းမရှိဘဲ ဆန့်ကျင်ကန့်ကွက်လျက်ရှိကြောင်းနှင့် လုံခြုံရေးတပ်ဖွဲ့ဝင်များက လိုအပ်သော လုံခြုံရေးလုပ်ငန်းများကို ပြည်သူလူထုနှင့်ပူးပေါင်းကာ တိုးမြှင့်လုပ်ဆောင်လျက်ရှိကြောင်း သတင်းရရှိပါသည်။MOHA
Tue, 28-Apr-2026
မကွေးတိုင်းဒေသကြီး၊ ပွင့်ဖြူမြို့နယ်၌ PDF အမည်ခံ အကြမ်းဖက်သမားများက နိုင်ငံ့ဝန်ထမ်း တစ်ဦး၊ ရာအိမ်မှူး တစ်ဦးနှင့် အပြစ်မဲ့ အရပ်သားပြည်သူ တစ်ဦးတို့အား အကြမ်းဖက်ခြိမ်းခြောက်၍ ဖမ်းဆီးခေါ်ဆောင်
မကွေးတိုင်းဒေသကြီး၊ ပွင့်ဖြူမြို့နယ်၌ PDF အမည်ခံ အကြမ်းဖက်သမားများက နိုင်ငံ့ဝန်ထမ်း တစ်ဦး၊ ရာအိမ်မှူး တစ်ဦးနှင့် အပြစ်မဲ့ အရပ်သားပြည်သူ တစ်ဦးတို့အား အကြမ်းဖက်ခြိမ်းခြောက်၍ ဖမ်းဆီးခေါ်ဆောင်
28 April 2026     လက်နက်ကိုင်အကြမ်းဖက်အဖွဲ့များသည် တိုင်းဒေသကြီးနှင့် ပြည်နယ်များရှိ မြို့၊ ရွာများအတွင်း တိုက်ပွဲများဖော်ဆောင်ခြင်း၊ လက်နက်ကြီးများဖြင့် အဝေးမှပစ်ခတ်ခြင်း၊ Drone ဖြင့် Drop Bomb များပစ်ချတိုက်ခိုက်ခြင်း၊ လက်လုပ်ဗုံး၊ လက်လုပ်မိုင်းများဖြင့် မိုင်းထောင်ဖောက်ခွဲ တိုက်ခိုက်ခြင်းများအား လုပ်ဆောင်လျက်ရှိသည့်အပြင် အုပ်ချုပ်ရေးပိုင်းဆိုင်ရာ တာဝန်ရှိသူများနှင့် အပြစ်မဲ့ အရပ်သားပြည်သူများကို အကြမ်းဖက်ဖမ်းဆီး၍ ခြိမ်းခြောက်ငွေတောင်းခံခြင်း၊ သတ်ဖြတ်ခြင်းများစသော လူသားချင်းမစာနာသည့် လူမဆန်သော အကြမ်းဖက်မှုများနှင့် ရာဇဝတ်မှုများအား ကျူးလွန်လုပ်ဆောင်လျက်ရှိပါသည်။     ထိုသို့ လုပ်ဆောင်လျက်ရှိရာ ၂၀၂၆ ခုနှစ်၊ ဧပြီ ၂၆ ရက် မွန်းလွဲ ၁၂ နာရီ ၁၅ မိနစ်တွင် မကွေးတိုင်းဒေသကြီး၊ ပွင့်ဖြူမြို့နယ်အထွေထွေအုပ်ချုပ်ရေးဦးစီးဌာနမှ အငယ်တန်းစာရေးဖြစ်သူ ရွာသစ်ကုန်းကျေးရွာနေကြသူများဖြစ်ကြသည့် ဦးကြည်စိုးဝင်း(၃၄)နှစ်၊ ရာအိမ်မှူးဖြစ်သူ ဦးသိန်းဇော်(ခ)ဝင်းသိန်း(၄၅)နှစ်နှင့် ၎င်း၏ဇနီးဖြစ်သူ ဒေါ်နွဲ့ရီ(၄၇)နှစ်တို့သည် ၎င်းတို့၏နေအိမ်အသီးသီး၌ ရှိနေစဉ် PDF အမည်ခံ အကြမ်းဖက်သမား ၃၀ ဦးခန့် ရောက်ရှိလာပြီး အကြမ်းဖက်ခြိမ်းခြောက်၍ ဖမ်းဆီးကာ အဆိုပါကျေးရွာရှိ အိုးထိန်းမြေပရဟိတအသင်းအဖွဲ့ပိုင် 8H-XXXX SUPER CUSTOM မော်တော်ယာဉ်အား လုယက်ယူဆောင်သွားခဲ့ကြောင်း သိရသည်။   အထက်ပါဖြစ်စဉ်မှ နိုင်ငံ့ဝန်ထမ်း တစ်ဦး၊ အုပ်ချုပ်ရေးပိုင်းဆိုင်ရာ တာဝန်ရှိသူ တစ်ဦးနှင့် အပြစ်မဲ့ အရပ်သားပြည်သူ တစ်ဦးအား အကြမ်းဖက်ဖမ်းဆီး၍ ခြိမ်းခြောက်ငွေတောင်းခံခြင်း၊ သတ်ဖြတ်ခြင်းများစသော လူသားချင်းမစာနာသည့် လူမဆန်သော ရာဇဝတ်မှုများအား ကျူးလွန်လုပ်ဆောင်လျက်ရှိသည့် အကြမ်းဖက်သမားများအား ဖော်ထုတ်ဖမ်းဆီးအရေးယူနိုင်ရေးနှင့် ဖမ်းဆီးခံရသူများအား ပြန်လည်ကယ်တင်နိုင်ရေး လုံခြုံရေးတပ်ဖွဲ့ဝင်များက လုံခြုံရေးလုပ်ငန်းစဉ်များနှင့်အညီ ဆက်လက်ဆောင်ရွက်လျက်ရှိကြောင်း သတင်းရရှိပါသည်။MOHA
Tue, 28-Apr-2026
ဩစတြေးလျ၏ ကာကွယ်ရေးစွမ်းရည်တိုးမြှင့်မည့် Bushmaster သံချပ်ကာယာဉ်များ ထပ်မံထုတ်လုပ်မည်
ဩစတြေးလျ၏ ကာကွယ်ရေးစွမ်းရည်တိုးမြှင့်မည့် Bushmaster သံချပ်ကာယာဉ်များ ထပ်မံထုတ်လုပ်မည်
 ဩစတြေးလျကာကွယ်ရေးစွမ်းရည်ကို ပိုမိုတိုးမြှင့်နိုင်ရန်အတွက် မျိုးဆက်သစ် Bushmaster သံချပ်ကာယာဉ် အစီးရေ ၂၆၈ စီးကို ထပ်မံထုတ်လုပ်ရန် ဩစတြေးလျအစိုးရက ဒေါ်လာသန်း ၇၅၀ ရင်းနှီးမြှုပ်နှံလိုက်ကြောင်း သိရသည်။အဆိုပါယာဉ်များကို Thales Australia ကုမ္ပဏီက တာဝန်ယူထုတ်လုပ်မည်ဖြစ်ပြီး စစ်မြေပြင်တွင် တပ်မတော်သားများ အန္တရာယ်ကင်းစွာဖြင့် တိုက်ပွဲဝင်နိုင်ရန် ရည်ရွယ်ထားခြင်းဖြစ်သည်။ယာဉ်အသစ်များတွင် ယခင်ထက် ပိုမိုကောင်းမွန်သည့် သံချပ်ကာအကာအကွယ်များ၊ ဒစ်ဂျစ်တယ်နည်းပညာများနှင့် ခေတ်မီဆက်သွယ်ရေးစနစ်များ ပါဝင်လာမည်ဖြစ်သည်။ ထို့အပြင် ယာဉ်အမိုးပေါ်တွင် စွမ်းအားကြီးမားသည့် လက်နက်များ တပ်ဆင်နိုင်သည့်အပြင် အာရုံခံကိရိယာအစုံအလင်နှင့်လည်း ချိတ်ဆက်အသုံးပြုနိုင်မည်ဖြစ်သည်။ယာဉ်အတွင်းခန်းကိုလည်း လိုအပ်သလို ပြောင်းလဲအသုံးပြုနိုင်အောင် ဒီဇိုင်းပြုလုပ်ထားကြောင်း သိရသည်။Bushmaster ယာဉ်များသည် စစ်မြေပြင်တွင် စွမ်းဆောင်ရည်ကောင်းမွန်မှုကြောင့် နာမည်ကျော်ကြားပြီး ဗြိတိန်၊ ဂျပန်နှင့် နယူးဇီလန်အပါအဝင် နိုင်ငံရှစ်နိုင်ငံသို့ တင်ပို့အသုံးပြုထားပြီးဖြစ်သည်။အဆိုပါ မျိုးဆက်သစ် သံချပ်ကာယာဉ်များကို ၂၀၂၇ ခုနှစ်တွင် စတင်ထုတ်လုပ်သွားမည်ဖြစ်ကြောင်း သိရသည်။MWD
Tue, 28-Apr-2026
ပဋိပက္ခများကြောင့် ကလေးသူငယ်များ ထိခိုက်ရမှုအပေါ် ယူနီဆက်ဖ်က အထူးစိုးရိမ်မကင်းဖြစ်
ပဋိပက္ခများကြောင့် ကလေးသူငယ်များ ထိခိုက်ရမှုအပေါ် ယူနီဆက်ဖ်က အထူးစိုးရိမ်မကင်းဖြစ်
နယူးယောက်  ဧပြီ  ၂၇ပဋိပက္ခများ၏ ဆိုးကျိုးကို ကလေးသူငယ်များက ခါးစည်းခံစားနေကြရသည်ဟုဆိုလိုက်ပြီး ယင်းအတွက်ကြောင့် အရှေ့အလယ်ပိုင်းဒေသ ပဋိပက္ခဖြစ်ပွားမှုများ အမြန်ဆုံးရပ်တန့်ကာ အမြဲတမ်းအပစ်အခတ်ရပ်စဲရန်အတွက်  ယူနီဆက်ဖ်အကြီးအကဲက တောင်းဆိုလိုက်သည်။ NHK သတင်းဌာန၏ အဆိုအရ ယူနီဆက်ဖ်အမှုဆောင်ဒါရိုက်တာ ကက်သရင်းရပ်ဆဲလ်ကို ဧပြီ ၂၇ ရက်တွင် တိုကျိုမြို့၌ တွေ့ဆုံမေးမြန်းရာတွင် ယင်းကဲ့သို့ ပြောကြားခဲ့ခြင်းဖြစ်သည်။လွန်ခဲ့သည့်   နှစ်လခန့်မှစတင်၍ အရှေ့အလယ်ပိုင်းဒေသတွင် ပဋိပက္ခများ ပြင်းထန်လာပြီးနောက် အီရန်နိုင်ငံတွင် ကလေးငယ် ၂၂၀ ကျော် သေဆုံးခဲ့ပြီး လက်ဘနွန်နိုင်ငံတွင်လည်း ကလေးငယ် ၁၇၇ ဦးထက်မနည်း သေဆုံးခဲ့ကြောင်း သက်ဆိုင်ရာနိုင်ငံများက အေဂျင်စီသို့ တင်သွင်းသော အစီရင်ခံစာ များအရ သိရသည်။ထို့အပြင် ကလေးသူငယ်များနေထိုင်ရာ ဒေသများတွင် ဗုံးကြဲတိုက်ခိုက်မှုများဖြစ်ပွားနေပြီး ဘေးဒုက္ခအမျိုးမျိုးကိုလည်း ကြုံတွေ့နေရသည့်အပြင် စာသင်ကျောင်းများနှင့် ဆေးရုံများပါ ထိခိုက်ပျက်စီးမှုများရှိနေကြောင်း သိရသည်။ ထိုအခြေအနေများက ကလေးငယ်များသည် ပဋိပက္ခ၏ ဆိုးကျိုးများကို အလွန်အမင်းခံစားနေရခြင်းကို ပြသနေခြင်းပင်ဖြစ်ကြောင်း ၎င်းက ဆက်လက် ပြောကြားသည်။ယင်းပဋိပက္ခများကြောင့် စက်သုံးဆီဈေးနှုန်းများ မြင့်တက်လာပြီး ကာကွယ်ဆေးများအပါအဝင် ထောက်ပံ့ပစ္စည်းများကို ကမ္ဘာတစ်ဝန်းရှိ ကလေးများထံပို့ဆောင်ရာ၌ ယူနီဆက်ဖ်၏   လုပ်ဆောင်နိုင်စွမ်းကိုလည်း ထိခိုက်စေကြောင်း မှတ်ချက်ပြုပြောကြားသည်။အင်န်အိတ်ချ်ကေMDN
Tue, 28-Apr-2026
© Copyright 2024 SAC All Rights Reserved.