ထိုင်းနိုင်ငံသို့ အချိန်တိုခရီးစဉ်လာရောက်လည်ပတ်သူ ၈ ဒသမ ၂၄ သန်းရှိ

ဘန်ကောက် မေ ၂၁

ထိုင်းနိုင်ငံသည် ယခုနှစ် မေလ ၁၆ ရက်အထိ အနီးဝန်းကျင်ဒေသများမှ အချိန်တိုခရီးစဉ်ဖြင့် လာရောက်လည်ပတ်သည့် နိုင်ငံခြားခရီးသွား ၈ ဒသမ ၂၄ သန်း ကို ကြိုဆိုလက်ခံခဲ့ပြီး တရုတ်ခရီးသွားအများဆုံးဖြင့် ဦးဆောင်လျက်ရှိသည်။

နိုင်ငံခြားခရီးသွား ပြန်လည်ဝင်ရောက်မှုတွင် အရှေ့အာရှက ၃ ဒသမ ၇၃ သန်း၊ ဒေသတွင်းနိုင်ငံများ၊ တောင်အာရှနှင့် တောင်ပစိဖိတ်နိုင်ငံများက ၄ ဒသမ ၅ သန်းဖြစ်ကြောင်း ထိုင်းခရီးသွားလုပ်ငန်း အာဏာပိုင်အဖွဲ့က ဖော်ပြထားသည်။

ယခုကဲ့သို့ နိုင်ငံတကာခရီးသွား ဝင်ရောက်မှုတိုးတက်လာခြင်းသည် အရည်အသွေးမြင့်ခရီးသွား လုပ်ငန်းများနှင့် အထူးစိတ်ဝင်စားမှုရှိသည့် ခရီးသွားအုပ်စုများကို ရည်ရွယ်သည့်စည်းရုံးရေး အစီအစဉ်များကြောင့်ဟု ထိုင်းခရီးသွားလုပ်ငန်း အာဏာပိုင်အဖွဲ့၏ ထုတ်ပြန်ချက်တစ်ခုတွင် ဖော်ပြထားသည်။ ထို့ပြင် ထိုင်းနွေရာသီခရီးသွားမြှင့်တင်ရေး အစီအစဉ်ဖြစ်သည့် Thailand Summer Blast အစီအစဉ်ကလည်း စင်းလုံးငှားလေယာဉ်များနှင့် အွန်လိုင်းကြော်ငြာများမှတစ်ဆင့် လေကြောင်းခရီးစဉ်များ ပိုမိုချိတ်ဆက်နိုင်ရန် ကူညီပေးခဲ့သည်ဟု ယင်းထုတ်ပြန်ချက်တွင် ဆက်လက်ဖော်ပြထားသည်။

တတိယသုံးလပတ်ကာလကို ကြည့်မည်ဆိုပါက ဒေသတွင်း နိုင်ငံများတွင် မေလမှ ဩဂုတ်လအထိ ကျောင်းပိတ်ရက်ရာသီများနှင့် နွေရာသီအားလပ်ရက်များကြောင့် ထိုင်းနိုင်ငံသို့ အချိန်တိုခရီးစဉ်ဖြင့် လာရောက်လည်ပတ်မည့် နိုင်ငံတကာခရီးသွား ဝင်ရောက်မှုမှာ ဆက်လက်တည်ငြိမ်မှုရှိမည် သို့မဟုတ် အနည်းငယ်တိုးတက်လာမည်ဟု ထိုင်းခရီးသွားလုပ်ငန်းအာဏာပိုင်အဖွဲ့၏ ထုတ်ပြန်ချက်တွင် ထပ်လောင်းဖော်ပြထားသည်။

လေယာဉ်လက်မှတ်ဈေးနှုန်းကြီးမြင့်မှုများက ခရီးသွားများကို ပိုမိုတိုတောင်းသည့် ဒေသတွင်း ခရီးစဉ်များကို သွားလာစေရန် တွန်းအားတစ်ခုဖြစ်စေခဲ့သည်ဟု ပတ်ထရာနွန်က မှတ်ချက်ပြု ပြောကြားခဲ့သည်။

ဆင်ဟွာ

MDN