အီရန်ဒရုန်းကို အမေရိကန် ပုံတူကူးထားသည့် Lucas UAV များတွင် အုပ်စုလိုက်တိုက်ခိုက်နိုင်သော AI နည်းပညာ ထည့်သွင်းမည်

အမေရိကန် ကာကွယ်ရေးဝန်ကြီးဌာနသည် အီရန်နိုင်ငံ၏ Shahed-136 အသေခံဒရုန်းကို Reverse Engineering နည်းပညာဖြင့် ပုံတူကူးယူ ထုတ်လုပ်ထားသော Lucas UAV မောင်းသူမဲ့လေယာဉ်များတွင် အုပ်စုလိုက် ပူးပေါင်းတိုက်ခိုက်နိုင်စွမ်းရှိမည့် AI စနစ်ကို ထည့်သွင်းပေါင်းစပ်ရန် ပြင်ဆင်နေသည်။ 

စစ်ရေးသတင်းဝက်ဘ်ဆိုက်တစ်ခုဖြစ်သည့် War Zone ၏ ဖော်ပြချက် အရ အမေရိကန် ကာကွယ်ရေးဝန်ကြီးဌာနသည် Lucas အသေခံဒရုန်း များတွင် Hivemind ဆော့ဖ်ဝဲလ်ကို ထည့်သွင်းရန်အတွက် Shield AI ကုမ္ပဏီကို ရွေးချယ်လိုက်ကြောင်း သိရှိရသည်။ ထိုနည်းပညာသည် Lucas ဒရုန်းများကို ပစ်မှတ်တစ်ခုတည်းကို လေယာဉ်အမြောက်အမြား တစ်ပြိုင်နက် လွှတ်တင်ရုံသက်သက်မဟုတ်ဘဲ အချင်းချင်း စနစ်တကျချိတ်ဆက်ညှိနှိုင်း၍ အုပ်စုလိုက် (Swarm) တိုက်ခိုက်နိုင်စွမ်းကို ရရှိစေမည် ဖြစ်သည်။

Hivemind ဆော့ဖ်ဝဲလ်သည် ဒရုန်းအုပ်စုများအတွက် AI လေသူရဲတစ်ဦးကဲ့သို့ လုပ်ဆောင်ပေးမည်ဖြစ်ပြီး စစ်မြေပြင်ရှိ ရုတ်တရက် ပြောင်းလဲမှု များကို အချိန်နှင့်တစ်ပြေးညီ တုံ့ပြန်ကာ လမ်းကြောင်းများကို အလိုလျောက်စနစ်ဖြင့် ပြင်ဆင်နိုင်သည်။ ထို့အပြင် အဆိုပါစနစ်ကြောင့် လူတစ်ဦး တည်းကပင် ရှုပ်ထွေးသောစစ်ဆင်ရေးများအတွင်း ဒရုန်းအမြောက်အမြားကို တစ်ပြိုင်နက်တည်း အလွယ်တကူစောင့်ကြည့်ညွှန်ကြားနိုင်မည် ဖြစ်သည်။ 

သို့သော်လည်း အခြေခံလုပ်ငန်းစဉ်များကို AI က အလိုအလျောက် မောင်းနှင်မည်ဖြစ်သော်လည်း ပစ်မှတ်ကို အမှန်တကယ် တိုက်ခိုက်ခြင်း ရှိ၊ မရှိ ဆုံးဖြတ်ပိုင်ခွင့်နှင့် ပစ်မှတ်ပြောင်းလဲခွင့်များကိုမူ လူသားမောင်းနှင်ရေးအဖွဲ့ကသာ အပြည့်အဝ ဆက်လက်ထိန်းချုပ်ထားမည်ဖြစ်သည်။ စစ်ရေးကျွမ်းကျင်သူများ၏ အဆိုအရ ထိုသို့ အလိုအလျောက် စနစ်အသုံးပြုခြင်းက ရန်သူ့ထက် ပိုမိုမြန်ဆန်စွာ တုံ့ပြန်နိုင်ပြီး ရန်သူ့လေကြောင်းရန် ကာကွယ်ရေးနှင့် ဆုံးဖြတ်ချက်ချသည့် လုပ်ငန်းစဉ်များကို ပိုမိုလွှမ်းမိုးနှောင့်ယှက်နိုင်မည်ဟု ဆိုသည်။

အမေရိကန်၏ Lucas UAV သည် ကီလိုမီတာ ၆၅၀ မှ ၈၀၀ ခန့်အထိ ပျံသန်းနိုင်ပြီး ၆ နာရီကြာ စဉ်ဆက်မပြတ်ပျံသန်းကာ အလေးချိန် ၁၈ ကီလိုဂရမ်ရှိသော လက်နက်များကို သယ်ဆောင်နိုင်သည်။ ကုန်ကျစရိတ်အနေဖြင့် တစ်စီးလျှင် ဒေါ်လာ ၃၅,၀၀၀ ခန့်သာ ရှိသောကြောင့် တူညီသောအကွာအဝေးပစ်ခတ်နိုင်သည့် ဒုံးကျည်များနှင့်နှိုင်းယှဉ်ပါက သိသိသာသာသက်သာပြီး အမြောက်အမြား အလွယ်တကူထုတ်လုပ်နိုင်သည်။ 

အဆိုပါ ဒရုန်းများကို အရှေ့အလယ်ပိုင်းပဋိပက္ခအတွင်း အီရန်ရှိပစ်မှတ်များကို တိုက်ခိုက်ရာတွင် ပထမဆုံးအကြိမ် စမ်းသပ်အသုံးပြုခဲ့ပြီးဖြစ်ရာ အမေရိကန် ရေတပ်ဗိုလ်ချုပ်ကြီး Brad Cooper က Lucas UAV သည် အမေရိကန်စစ်တပ်အတွက် မရှိမဖြစ်လိုအပ်သော အရေးပါသည့် လက်နက် တစ်ခုဖြစ်ကြောင်း အတည်ပြုပြောကြားထားသည်။

ကိုးကား- VN Express

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး