အမေရိကန် အထူးစစ်ဆင်ရေးတပ်ဖွဲ့ဝင်ဟောင်းတစ်ဦး လျှို့ဝှက်ချက်ပေါက်ကြားမှုဖြင့် တရားစွဲဆိုခံရ

KookieSpace97

News Image

  • အမေရိကန် အထူးစစ်ဆင်ရေးတပ်ဖွဲ့ဝင်ဟောင်းတစ်ဦး လျှို့ဝှက်ချက် ပေါက်ကြားမှုဖြင့် တရားစွဲဆိုခံရ

အမေရိကန်နိုင်ငံ၏ ထိပ်တန်းအထူးစစ်ဆင်ရေးတပ်ဖွဲ့ (Delta Force) နှင့်အတူ တာဝန်ဖမ်းဆောင်ခဲ့ဖူးသည့် ကြည်းတပ်စစ်မှုထမ်းဟောင်း တစ်ဦးဖြစ်သူ အသက် ၄၀ အရွယ် ကော့တ်နေ ဝီလျံ (Courtney Williams) သည် နိုင်ငံတော်ကာကွယ်ရေးဆိုင်ရာ လျှို့ဝှက်အချက်အလက်များကို သတင်းထောက်တစ်ဦးထံပေးပို့ခဲ့မှုဖြင့် ဖက်ဒရယ်ဂျူရီအဖွဲ့၏ စွဲချက် တင်ခြင်းကိုခံခဲ့ရကြောင်း အမေရိကန်တရားရေးဝန်ဌာန (DOJ) က ထုတ်ပြန်ခဲ့သည်။

မြောက်ကာရိုလိုင်းနားပြည်နယ်၊ ဝါဂရမ်မြို့တွင် နေထိုင်သည့် ဝီလျံသည် ၂၀၁၀ မှ ၂၀၁၆ ခုနှစ်အတွင်း အထူးတပ်ဖွဲ့ဝင်များ ပြည်ပသို့ လျှို့ဝှက်စွာ တာဝန်သွားရောက်ထမ်းဆောင်နိုင်ရန် စာရွက်စာတမ်းလုပ်ငန်းစဉ်များ ကိုင်တွယ်ရသည့်ရာထူးဖြင့် တာဝန်ထမ်းဆောင်ခဲ့သူဖြစ်ပြီး အဆင့်မြင့် လုံခြုံရေးခွင့်ပြုချက် (Security Clearance) ရရှိထားသူလည်း ဖြစ်သည်။

တရားရုံးမှတ်တမ်းများတွင် သတင်းထောက်အမည်ကို တရားဝင် ဖော်ပြ ထားခြင်း မရှိသော်လည်း ၎င်းမှာ ‘The Fort Bragg Cartel’ စာအုပ်ကို ရေးသားသူ ဆတ် ဟာ့ပ် (Seth Harp) ဖြစ်ကြောင်း သတင်းဌာနများက ဖော်ပြခဲ့ကြသည်။ ဝီလျံသည် အဆိုပါစာအုပ်တွင် သတင်းရင်းမြစ်အဖြစ် အကြိမ်ကြိမ် ပါဝင်ခဲ့သည်။ 

ဟာ့ပ်၏ ပြောကြားချက်အရ ဝီလျံသည် စစ်မှုထမ်းစဉ်အတွင်း ဖို့တ် ဘရက်ဂ်စစ်စခန်း၌ ပြင်းထန်သော လိင်ပိုင်းဆိုင်ရာ ထိပါး နှောင့်ယှက်မှု များကို နှစ်ရှည်လများ ကြုံတွေ့ခဲ့ရသည်ဟု ဆိုသည်။ သို့သော်လည်း DOJ ကမူ ဝီလျံသည် ၎င်း၏လျှို့ဝှက်ချက်ထိန်းသိမ်းခြင်းဆိုင်ရာ ကတိကဝတ် များကို ချိုးဖောက်ခဲ့သည်ဟု စွပ်စွဲထားပြီး အပြစ်ရှိကြောင်းတွေ့ရှိပါက ထောင်ဒဏ် ၁၀ နှစ်အထိ ကျခံရဖွယ် ရှိနေသည်။

FBI ညွှန်ကြားရေးမှူး ကတ်ရှ် ပါတေးလ်က အဆိုပါဖမ်းဆီးမှုသည် နိုင်ငံတော်ကို သစ္စာဖောက်ကာ အမေရိကန်ပြည်သူများကို အန္တရာယ် ဖြစ်စေသူများအတွက် ပြင်းထန်သော သတိပေးချက်ဖြစ်ကြောင်း ပြောကြား ခဲ့သည်။ အခြားတစ်ဖက်တွင်လည်း စာရေးဆရာ ဆတ် ဟာ့ပ်က ထိုတရားစွဲဆိုမှုမှာ ဒေါသထွက်စရာကောင်းပြီး သမ္မတ ထရမ့်၏ တရားရေး ဝန်ကြီးဌာနအနေဖြင့် မည်သည့်အချက်အလက်များ ပေါက်ကြားသည် ကိုပင် တိကျစွာ ထုတ်ပြန်ခြင်း မရှိကြောင်း ဝေဖန်ပြောဆိုခဲ့သည်။ 

လက်ရှိတွင် ဝီလျံကို ထိန်းသိမ်းထားဆဲဖြစ်ပြီး သူမကို တရားခွင်မတိုင်မီ ဆက်လက်ချုပ်နှောင်ထားမည်လားဆိုသည်ကို လာမည့်တနင်္လာနေ့ (ဧပြီ ၁၃) တွင် တရားရုံးက ဆုံးဖြတ်သွားမည် ဖြစ်သည်။

ကိုးကား- RT

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး

MM-News-Category
လုံခြုံရေးကဏ္ဍသတင်းများ
လုံခြုံရေး-နိုင်ငံတကာသတင်း

ဆက်စပ်သတင်းများ

အိုင်ယာလန်နိုင်ငံတွင် ပုဆိန်ကိုင်ဆောင်ထားသူတစ်ဦးက အမေရိကန် စစ်ဘက်သုံး လေယာဉ်တစ်စင်းကို ဖျက်ဆီး
အိုင်ယာလန်နိုင်ငံတွင် ပုဆိန်ကိုင်ဆောင်ထားသူတစ်ဦးက အမေရိကန် စစ်ဘက်သုံး လေယာဉ်တစ်စင်းကို ဖျက်ဆီး
အိုင်ယာလန်နိုင်ငံ၊ ရှန်နွန်လေဆိပ် (Shannon Airport) ၏ လုံခြုံရေးကို ဖောက်ထွင်းဝင်ရောက်ပြီး အမေရိကန် စစ်ဘက်သုံးလေယာဉ်တစ်စင်း ကို ဖျက်ဆီးခဲ့သည့် အမျိုးသားတစ်ဦး ဖမ်းဆီးခံခဲ့ရသည်။ ထိုဖြစ်စဉ်ကြောင့် လေဆိပ်လုပ်ငန်းစဉ်များ ခေတ္တရပ်နားခဲ့ရပြီး အဆိုပါလေဆိပ်ကို အမေရိကန်က ရေရှည်အသုံးပြုနေမှုအပေါ် ဝေဖန်ဆန့်ကျင်မှုများလည်း ပြန်လည်မြင့်တက်လာခဲ့သည်။အွန်လိုင်းတွင် ပျံ့နှံ့နေသော ဗီဒီယိုမှတ်တမ်းများအရ သံသယရှိသူသည် ကောင်တီကလဲယား (County Clare) လေဆိပ်၏ တားမြစ်နယ်မြေ အတွင်းရှိ အမေရိကန်လေတပ်ပိုင် C-130 Hercules လေယာဉ်ပေါ်သို့ တက်ရောက်သွားသည်ကို တွေ့ရှိရသည်။ အစီရင်ခံစာအချို့တွင် ၎င်းသည် ပုဆိန် သို့မဟုတ် တူတစ်ချောင်းကို ကိုင်ဆောင်၍ လေယာဉ်ကို ထုရိုက်ခဲ့သည်ဟု ဆိုသော်လည်း ရဲတပ်ဖွဲ့ကမူ ရာဇဝတ်မှုမြောက်သည့် ဖျက်ဆီးမှု ဖြင့် ဖမ်းဆီးထားကြောင်းသာ ယခုအချိန်အထိ အတည်ပြုထားသည်။ရဲတပ်ဖွဲ့၏ ပြောကြားချက်အရ အသက် ၄၀ ကျော်အရွယ်ရှိ သံသယရှိသူအမျိုးသားသည် စနေနေ့ (ဧပြီ ၁၁) နံနက်ပိုင်းတွင် လေဆိပ်၏ တားမြစ် နယ်မြေအတွင်းသို့ ဝင်ရောက်ခဲ့ခြင်းဖြစ်ပြီး ရာဇဝတ်မှုဆိုင်ရာတရားစီရင်ရေး အက်ဥပဒေ ပုဒ်မ ၄ အရ ဖမ်းဆီးခံခဲ့ရသည်။ အဆိုပါဖြစ်စဉ်ကို လေဆိပ် ရဲတပ်ဖွဲ့၊ ရှန်နွန်လေဆိပ် မီးသတ်နှင့် ကယ်ဆယ်ရေးအဖွဲ့၊ လေဆိပ်တွင် တပ်စွဲထားသော အိုင်ယာလန် ကာကွယ်ရေးတပ်ဖွဲ့ဝင်များက ပူးပေါင်း ကိုင်တွယ်ခဲ့ကြသည်။ လုံခြုံရေးဖောက်ဖျက်မှုကြောင့် ရှန်နွန်လေဆိပ်၏ လုပ်ငန်းစဉ်များကို ရပ်ဆိုင်းထားခဲ့ရသဖြင့် ထွက်ခွာမည့် လေယာဉ်နှစ်စင်း ကြန့်ကြာခဲ့ပြီး ပြင်သစ်နိုင်ငံ လူးဒက်စ် (Lourdes) မှ ဆိုက်ရောက်မည့် လေယာဉ်တစ်စင်းမှာလည်း လေဆိပ်လုပ်ငန်းများ ပုံမှန်အတိုင်း ပြန်လည်မစတင်မီအထိ ကောင်းကင်တွင် ဝဲပျံစောင့်ဆိုင်းခဲ့ရသည်။အဆိုပါတိုက်ခိုက်မှုသည် အီရန်အပေါ် အမေရိကန်၏ စစ်ရေးလှုပ်ရှားမှုများကြောင့်ဆိုသည်ကိုမူ ရှင်းရှင်းလင်းလင်း မရှိသေးသော်လည်း ရှန်နွန် လေဆိပ်သည် အမေရိကန်စစ်တပ်အတွက် လောင်စာဆီဖြည့်ရာနှင့် ဖြတ်သန်းသွားလာရာ စခန်းတစ်ခုအဖြစ် အသုံးပြုနေမှုအပေါ် ဆန့်ကျင် သည့် ကျူးကျော်ဝင်ရောက်မှုများကို ထပ်တလဲလဲ ကြုံတွေ့နေရခြင်း ဖြစ်သည်။၂၀၀၃ ခုနှစ်၊ ဇန်နဝါရီလအတွင်းကလည်း စစ်ဆန့်ကျင်ရေး တက်ကြွလှုပ်ရှားသူ မေရီကယ်လီ (Mary Kelly) သည် အီရတ်ကို ကျူးကျော်ဝင်ရောက်တော့မည့် အခြေအနေကို ဆန့်ကျင်သည့်အနေဖြင့် လေဆိပ်ရှိ အမေရိကန်စစ်လေယာဉ်ကို ပုဆိန်ဖြင့် ဖျက်ဆီးခဲ့ဖူးသည်။ ထိုစဉ်ကတိုက်ခိုက်မှုအပြီးတွင် လုံခြုံရေးကို ချက်ချင်းတင်းကျပ်ခဲ့သော်လည်းရက်ပိုင်းအကြာ ၂၀၀၃ ခုနှစ်၊ ဖေဖော်ဝါရီ ၃ ရက်နေ့တွင် Pitstop Ploughshares အဖွဲ့က ရှန်နွန်လေဆိပ်သို့ ဝင်ရောက်ပြီး အမေရိကန်ရေတပ် လေယာဉ် တစ်စင်းကို ထပ်မံဖျက်ဆီးကာ စစ်ဆန့်ကျင်ရေး လှုပ်ရှားမှုကို ပြုလုပ် ခဲ့ကြသည်။မကြာသေးမီက ဖြစ်စဉ်တစ်ခုဖြစ်သည့် ၂၀၂၅ ခုနှစ် နိုဝင်ဘာလတွင် လည်း တက်ကြွလှုပ်ရှားသူ သုံးဦးသည် ဗန်ကားတစ်စင်းကို ကန့်သတ် နယ်မြေအတွင်းသို့ မောင်းနှင်ဝင်ရောက်ကာ အမေရိကန် ရေတပ် အရန် တပ်ဖွဲ့ပိုင် Boeing 737-700 လေယာဉ်ကို ဆေးမှုတ်ဖျက်ဆီးခဲ့သဖြင့် လေဆိပ်ကို တစ်ကြိမ်ပိတ်ခဲ့ရသည်။ ထိုဖြစ်စဉ်မတိုင်မီ လအနည်းငယ်ကလည်း အမျိုးသမီးသုံးဦးသည် လေဆိပ်နယ်နိမိတ်ကို ဖောက်ထွင်း ဝင်ရောက်ပြီး အမေရိကန်နှင့် ဆက်နွှယ်သော လေယာဉ်တစ်စင်းပေါ်သို့ ဆေးနီများဖြင့် ပက်၍ဖျက်ဆီးခဲ့မှုကြောင့် ဖမ်းဆီးခံခဲ့ရဖူးသည်။ကိုးကား- RTPhoto: Malay Mailဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး
Sun, 12-Apr-2026
ဟစ်ဇဘိုလာအဖွဲ့က အစ္စရေးနယ်စပ်မြို့တစ်မြို့နှင့် လက်ဘနွန် နိုင်ငံ အတွင်းရှိ အစ္စရေးစစ်သားများကို တိုက်ခိုက်ခဲ့ကြောင်း ထုတ်ဖော် ပြောကြား
ဟစ်ဇဘိုလာအဖွဲ့က အစ္စရေးနယ်စပ်မြို့တစ်မြို့နှင့် လက်ဘနွန် နိုင်ငံ အတွင်းရှိ အစ္စရေးစစ်သားများကို တိုက်ခိုက်ခဲ့ကြောင်း ထုတ်ဖော် ပြောကြား
ဟစ်ဇဘိုလာအဖွဲ့က သောကြာနေ့ (ဧပြီ ၁၀) နံနက်ပိုင်းတွင် လက်ဘနွန်တောင်ပိုင်းရှိ အစ္စရေးစစ်သားများကို ထပ်မံတိုက်ခိုက်ခဲ့ကြောင်း ပြောကြားခဲ့သည်။ အီရန်ကျောထောက် နောက်ခံပြု လက်နက်ကိုင်အဖွဲ့၏ ထုတ်ပြန်ချက်အရ ဒေသစံတော်ချိန် နံနက် ၆ နာရီ ခန့်တွင် ဝါတာ အယ်လ်-ခီယမ် (Wata Al-Khiam) ရှိ စစ်သည်များကို ဒုံးကျည်များဖြင့် ပစ်ခတ်တိုက်ခိုက်ခဲ့ခြင်းဖြစ်ကြောင်း သိရှိရသည်။ထို့အပြင် ရန်သူဘက်မှ အပစ်အခတ်ရပ်စဲရေး သဘောတူညီချက် ချိုးဖောက်မှုကို တုံ့ပြန်သည့်အနေဖြင့် အစ္စရေးနယ်စပ်ရှိ ကီယပ် ရှမိုနာ (Kiryat Shmona) အခြေစိုက်စခန်းကိုလည်း ပစ်မှတ်ထားတိုက်ခိုက်ခဲ့ကြောင်း ဟစ်ဇဘိုလာက ဆိုသည်။အမေရိကန်နှင့် အီရန်တို့ကြား မရေရာသော အပစ်အခတ်ရပ်စဲရေး စတင်ခဲ့ကတည်းက အစ္စရေးနှင့် ဟစ်ဇဘိုလာတို့သည် အပြန်အလှန် တိုက်ခိုက်မှုများ ဆက်လက်လုပ်ဆောင်နေပြီး တာဝန်ရှိသူများကမူ ၎င်းတို့၏ပဋိပက္ခသည်လည်း အပစ်ရပ်စဲရေးတွင် ပါဝင်လာစေရန် တိုက်တွန်းလျက်ရှိကြသည်။ကိုးကား- CNNဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး
Fri, 10-Apr-2026
ဆော်ဒီအာရေဗျ၏ အရေးပါသော အရှေ့-အနောက် ရေနံပိုက်လိုင်း အပါအဝင် စွမ်းအင်ဆိုင်ရာ အဆောက်အအုံများ တိုက်ခိုက်ခံရ
ဆော်ဒီအာရေဗျ၏ အရေးပါသော အရှေ့-အနောက် ရေနံပိုက်လိုင်း အပါအဝင် စွမ်းအင်ဆိုင်ရာ အဆောက်အအုံများ တိုက်ခိုက်ခံရ
အမည်မဖော်လိုသူ စွမ်းအင်ဝန်ကြီးဌာန အရာရှိတစ်ဦးကို ကိုးကား၍ ဆော်ဒီအစိုးရပိုင် သတင်းဌာန (SPA) က ဖော်ပြချက်အရ အရေးပါသော အရှေ့-အနောက် ရေနံပိုက်လိုင်း (East-West Pipeline) အပါအဝင် ၎င်း၏ ရေနံနှင့်သဘာဝဓာတ်ငွေ့ဆိုင်ရာ အဆောက်အအုံများ တိုက်ခိုက်ခံရမှုကို ဆော်ဒီအာရေဗျနိုင်ငံက အတည်ပြုလိုက်သည်။ကြာသပတေးနေ့ (ဧပြီ ၉) က ထုတ်ပြန်ခဲ့သော အဆိုပါအစီရင်ခံစာတွင် တိုက်ခိုက်မှုများ မည်သည့်အချိန်က ဖြစ်ပွားခဲ့သည်ကို အတိအကျ ဖော်ပြ ထားခြင်းမရှိသော်လည်း တိုက်ခိုက်မှုကြောင့် ဆော်ဒီနိုင်ငံသားတစ်ဦး သေဆုံးကာ အခြားခုနစ်ဦးဒဏ်ရာရရှိခဲ့ကြောင်း ဖော်ပြထားသည်။နိုင်ငံ၏ စွမ်းအင်ဆိုင်ရာ အခြေခံအဆောက်အအုံများအပေါ် မကြာသေးမီကပြုလုပ်ခဲ့သော တိုက်ခိုက်မှုများသည် ရေနံထုတ်လုပ်မှုနှင့် သယ်ယူ ပို့ဆောင်ရေး နှစ်ခုစလုံးအပေါ် သိသာထင်ရှားသော သက်ရောက်မှုရှိခဲ့ပြီး တစ်ရက်လျှင် ရေနံစည်ပေါင်း တစ်သန်းကျော် ထိခိုက်မှုရှိခဲ့ကြောင်း SPA ၏ အစီရင်ခံစာက ညွှန်းဆိုထားသည်။အရှေ့-အနောက် ပိုက်လိုင်း တိုက်ခိုက်ခံရမှုကြောင့် တစ်ရက်လျှင် ရေနံစည်ပေါင်း ၇၀၀,၀၀၀ ခန့် ဆုံးရှုံးခဲ့ရပြီး အခြားအခြေခံအဆောက်အအုံ တိုက်ခိုက်မှုများကြောင့် ထုတ်လုပ်မှုစွမ်းရည်မှာ နောက်ထပ် ရေနံစည် ၆၀၀,၀၀၀ ခန့် ထပ်မံ လျော့နည်းသွားခဲ့ကြောင်း SPA က ဆိုသည်။ဒေတာနှင့် ခွဲခြမ်းစိတ်ဖြာမှု ပလက်ဖောင်းတစ်ခုဖြစ်သည့် Kpler မှ ကျွမ်းကျင်သူ Amena Bakr က "ဒါဟာ ပင်လယ်ကွေ့ ဒေသတစ်ခုလုံးရဲ့ ထောက်ပံ့မှုအပေါ် သက်ရောက်မှုကို ကြည့်မယ်ဆိုရင် တစ်ရက်ကို စည်ပေါင်း ၁၂.၁ သန်းအထိ ရှိသွားမှာ ဖြစ်ပါတယ်" ဟု ပင်လယ်ကွေ့ ဒေသတွင်း အလုံးစုံထိခိုက်မှုကို ရည်ညွှန်း၍ CNN သို့ ပြောကြားခဲ့သည်။အီရန်၏ တိုက်ခိုက်မှုများကြောင့် ၎င်းတို့၏ ရေနံနှင့်သဘာဝဓာတ်ငွေ့ ထုတ်လုပ်ရေးအဆောက်အအုံများ မည်မျှအထိ ပျက်စီးသွားသည် ဆိုသည်ကို ပင်လယ်ကွေ့နိုင်ငံအများစုသည် မကြာသေးမီ သီတင်းပတ်များအတွင်း နှုတ်ဆိတ်နေခဲ့ကြသည်။အရှေ့-အနောက် ပိုက်လိုင်းသည် ပိတ်ဆို့ခံထားရသော ဟော်မုဇ် ရေလက်ကြားကို ရှောင်ကွင်း၍ ရေနံပို့ဆောင်ရန်အတွက် အလွန်အရေးပါသော လမ်းကြောင်းဖြစ်ကြောင်း Bakr က ဆက်လက် ပြောကြားခဲ့သည်။ "ဒါ့အပြင် ဟော်မုဇ် ရေလက်ကြားကတစ်ဆင့် ရေနံစီးဆင်းမှု အခြေအနေဟာလည်း ဘာမှ တိုးတက်လာတာ မတွေ့ရသေးပါဘူး" ဟု သူမက ထပ်လောင်း ပြောဆိုခဲ့သည်။ကိုးကား- CNNဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး
Fri, 10-Apr-2026
အစောပိုင်းတိုက်ခိုက်မှုတစ်ခုအတွင်း ရရှိခဲ့သော ဒဏ်ရာများကြောင့် အီရန်အဓိပတိ၏ အကြံပေးပုဂ္ဂိုလ် ကွယ်လွန်
အစောပိုင်းတိုက်ခိုက်မှုတစ်ခုအတွင်း ရရှိခဲ့သော ဒဏ်ရာများကြောင့် အီရန်အဓိပတိ၏ အကြံပေးပုဂ္ဂိုလ် ကွယ်လွန်
အီရန်အဓိပတိ၏ အကြီးတန်းအကြံပေးပုဂ္ဂိုလ် Kamal Kharazi သည် ယခုလအစောပိုင်းက ၎င်း၏နေအိမ်ကို ပစ်မှတ်ထားသည့် အမေရိကန်-အစ္စရေးတို့၏ တိုက်ခိုက်မှုတစ်ခုအတွင်း ရရှိခဲ့သောဒဏ်ရာများဖြင့် ကွယ်လွန်သွားပြီဖြစ်ကြောင်း တီဟီရန်အစိုးရက ပြောကြားခဲ့သည်။အီရန်အစိုးရပိုင် မီဒီယာများက ကြာသပတေးနေ့ (ဧပြီ ၉) တွင် ထုတ်ပြန်ရာ၌ "အမေရိကန်-ဇီယွန်ဝါဒီ ရန်သူများ၏ တိုက်ခိုက်မှုကြောင့် ဒဏ်ရာရရှိခဲ့သော Kharazi သည် လွန်ခဲ့သော နာရီအနည်းငယ်ခန့်က အာဇာနည်အဖြစ် အသက်ပေးလှူသွားခဲ့သည်" ဟု ဖော်ပြထားသည်။အဆိုပါ တိုက်ခိုက်မှုအတွင်း Kharazi ၏ ဇနီးဖြစ်သူ သေဆုံးခဲ့ပြီး Kharazi ကိုယ်တိုင်လည်း စိုးရိမ်ရသည့်ဒဏ်ရာများဖြင့် အနီးရှိဆေးရုံ တစ်ခုသို့ အရေးပေါ်ပို့ဆောင်ကုသခဲ့ရကြောင်း အီရန်တာဝန်ရှိသူများက ပြီးခဲ့သည့်သီတင်းပတ်က ပြောကြားခဲ့သည်။CNN သတင်းထောက် Frederik Pleitgen သည် ပြီးခဲ့သည့် မတ်လ အတွင်းက တီဟီရန်မြို့တွင် Kharazi နှင့် သီးသန့်တွေ့ဆုံမေးမြန်းမှု တစ်ခုပြုလုပ်ခဲ့ပြီး ၎င်းမှာ ဒေသတွင်းစည်းမျဉ်းများအရ အီရန်အစိုးရ၏ ခွင့်ပြုချက်ဖြင့် လုပ်ဆောင်ခဲ့ခြင်းဖြစ်သည်။ထိုအင်တာဗျူးတွင် Kharazi က အီရန်နိုင်ငံအနေဖြင့် ပဋိပက္ခကို အချိန် ကြာမြင့်စွာ ဆက်လက်ရင်ဆိုင်သွားနိုင်ကြောင်း CNN သို့ ပြောကြားခဲ့ပြီး သံတမန်ရေးရာအရဖြေရှင်းရန် လမ်းစမမြင်ကြောင်းလည်း ထည့်သွင်း ပြောဆိုခဲ့သည်။ ၎င်းက ထိုစစ်ပွဲသည် စီးပွားရေးအရ ထိခိုက်နစ်နာမှုများ ပြင်းထန်လာမှသာ အဆုံးသတ်နိုင်လိမ့်မည်ဟု ခန့်မှန်းခဲ့သည်။ကိုးကား- CNNဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး
Fri, 10-Apr-2026
နိုင်ဂျီးရီးယားသို့ သွားရောက်ခြင်းမပြုရန် ၎င်း၏နိုင်ငံသားများကို အမေရိကန် သတိပေး၊ သံရုံးဝန်ထမ်းများ ထွက်ခွာခွင့်ပြု
နိုင်ဂျီးရီးယားသို့ သွားရောက်ခြင်းမပြုရန် ၎င်း၏ နိုင်ငံသားများကို အမေရိကန် သတိပေး၊ သံရုံးဝန်ထမ်းများ ထွက်ခွာခွင့်ပြု
နိုင်ဂျီးရီးယားနိုင်ငံ၏ လုံခြုံရေးအခြေအနေ ပိုမိုဆိုးရွားလာခြင်းကြောင့် အမေရိကန်နိုင်ငံသားများအနေဖြင့် နိုင်ဂျီးရီးယားသို့သွားရောက်ခြင်းကို ရှောင်ကြဉ်ကြရန် ဝါရှင်တန်ကတိုက်တွန်းနှိုးဆော်လိုက်ပြီး မြို့တော် အဘူဂျာရှိ အရေးပေါ်မဟုတ်သော သံရုံးဝန်ထမ်းများနှင့် ၎င်းတို့၏ မိသားစုဝင်များအား နိုင်ငံအတွင်းမှထွက်ခွာခွင့်ပြုလိုက်ပြီ ဖြစ်သည်။ဗုဒ္ဓဟူးနေ့ (ဧပြီ ၈) က ထုတ်ပြန်ခဲ့သည့် အဆင့်မြှင့်တင်ထားသော ခရီး သွားလာမှုဆိုင်ရာ အကြံပြုချက်တွင် အမေရိကန် နိုင်ငံခြားရေးဝန်ကြီး ဌာနက အကြမ်းဖက်မှုနှင့် လက်နက်ကိုင်ပဋိပက္ခများကြောင့် Plateau ၊ Jigawa ၊ Kwara ၊ Niger နှင့် Taraba ပြည်နယ်များအပါအဝင် မြောက်ပိုင်း နှင့်အလယ်ပိုင်းပြည်နယ်များသို့ သွားရောက်ခြင်းမပြုရန် အထူးသတိပေးထားသည်။ ထို့ပြင် မငြိမ်မသက်မှုများနှင့် ရာဇဝတ်ဂိုဏ်းများ ကြီးစိုးနေသည့် အနောက်မြောက်ပိုင်းနှင့် အရှေ့တောင်ပိုင်းဒေသများသို့သွားရောက်ခြင်းကိုလည်း အလားတူ ကန့်သတ်ထားသည်။အဆိုပါ အကြံပြုချက်အရ နိုင်ဂျီးရီးယားနိုင်ငံတစ်ဝှမ်းတွင် လက်နက်ကိုင်လုယက်မှု၊ ကားလုယက်မှုမှသည် ဓားစာခံအဖြစ်ဖမ်းဆီးမှုနှင့် လမ်းဘေး ဓားပြတိုက်မှုများအထိ အကြမ်းဖက်ရာဇဝတ်မှုများသည် "ပုံမှန်အတိုင်းပင် ဖြစ်ပွားလျက်ရှိသည်" ဟု ဖော်ပြထားသည်။အမေရိကန် နိုင်ငံခြားရေးဝန်ကြီးဌာနသည် ခရီးသွားလာမှုဆိုင်ရာ သတိပေးချက်ကို အဆင့် ၄ ဆင့်ဖြင့် သတ်မှတ်ထားရာ အဆင့် (၃) မှာ "ခရီးသွားရန် ပြန်လည်စဉ်းစားရန်" နှင့် အဆင့် (၄) မှာ "သွားရောက်ခြင်းမပြုရန်" တို့ ဖြစ်ကြသည်။ နိုင်ဂျီးရီးယားနိုင်ငံသည် လွန်ခဲ့သည့် ဆယ်စုနှစ်တစ်ခု နီးပါးကာလပတ်လုံး အဆင့် (၃) သို့မဟုတ် အဆင့် (၄) တွင်သာ ရှိနေခဲ့သည်။ ယခု နောက်ဆုံးထုတ်ပြန်ချက်တွင်မူ နိုင်ဂျီးရီးယားနိုင်ငံရှိ ပြည်နယ် ၃၆ ခုအနက် ၂၃ ခု (နိုင်ငံ၏ သုံးပုံနှစ်ပုံနီးပါး) မှာ အတင်းကျပ်ဆုံးအဆင့်ဖြစ်သည့် "သွားရောက်ခြင်းမပြုရန်" ကဏ္ဍအတွင်း ကျရောက်နေသည်။အမေရိကန်နိုင်ငံသားများသည် ချမ်းသာကြွယ်ဝသူများအဖြစ် ရှုမြင်ခံရလေ့ရှိပြီး ရာဇဝတ်မှုနှင့် ပြန်ပေးဆွဲမှုများ၏ ပစ်မှတ်များဖြစ်လေ့ရှိသည်ဟု အဆိုပါ ထုတ်ပြန်ချက်တွင် ဖော်ပြထားသည်။ထိုအနောက်အာဖရိကနိုင်ငံသည် ပြန်ပေးငွေရယူရန်အတွက် လူများကို မကြာခဏ ဖမ်းဆီးလေ့ရှိသည့် ရာဇဝတ်ဂိုဏ်းများနှင့် အစွန်းရောက်အဖွဲ့ များ၏ အန္တရာယ်ကို ကာလရှည်ကြာ ရင်ဆိုင်နေရခြင်းဖြစ်သည်။ ၂၀၁၄ ခုနှစ်တွင် Borno ပြည်နယ်၊ Chibok မြို့ရှိ ကျောင်းသူရာပေါင်းများစွာကို Boko Haram စစ်သွေးကြွများက ပြန်ပေးဆွဲသွားခဲ့ရာမှ ထိုပြဿနာသည် တစ်ကမ္ဘာလုံး၏ အာရုံစိုက်မှုကို ရရှိခဲ့သည်။ ISWAP သည် Boko Haram မှ ခွဲထွက်သွားသည့် အဖွဲ့တစ်ခုဖြစ်ပြီး စစ်ဘက်နှင့် အရပ်ဘက်ပစ်မှတ်များကို တိုက်ခိုက်မှုများ ပြုလုပ်လျက်ရှိသည်။ယခုသီတင်းပတ် အစောပိုင်းကလည်း Niger ပြည်နယ်၊ Shiroro ဒေသရှိ Bagna နှင့် Erena ကျေးရွာများတွင် လက်နက်ကိုင်စစ်သွေးကြွများ၏ တိုက်ခိုက်မှုကြောင့် အနည်းဆုံး လူပေါင်း ၂၀ ခန့် သေဆုံးခဲ့ရသည်။ကိုးကား- RTဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး
Fri, 10-Apr-2026
အမေရိကန်တွင် အရေးပေါ်အခြေအနေ၌ စစ်မှုမထမ်းမနေရ အလိုအလျောက် စနစ် ကျင့်သုံးရန် ပြင်ဆင်နေ
အမေရိကန်တွင် အရေးပေါ်အခြေအနေ၌ စစ်မှုမထမ်းမနေရ အလိုအလျောက် စနစ်ကျင့်သုံးရန် ပြင်ဆင်နေ
အမေရိကန်နိုင်ငံတွင် အမျိုးသားအရေးပေါ်အခြေအနေအတွင်း စစ်မှုထမ်းရန်အတွက် အလိုအလျောက် စာရင်းသွင်းသည့်စနစ် (Automated military conscription) ကျင့်သုံးရန် အစီအစဉ်များသည် တိုးတက်လျက်ရှိပြီး ယခုနှစ်ကုန်တွင် အကောင်အထည်ဖော်နိုင်ရန် စီစဉ်ထားကြောင်း စာရင်းပြုစုရန် တာဝန်ပေးအပ်ခြင်းခံရသည့် Selective Service System (SSS) အေဂျင်စီက ပြောကြားခဲ့သည်။ပြီးခဲ့သည့် ဒီဇင်ဘာလက အတည်ပြုခဲ့သော FY 2026 အမျိုးသားကာကွယ်ရေးလုပ်ပိုင်ခွင့်အက်ဥပဒေ (NDAA) တွင် ပါဝင်သည့် ပြဋ္ဌာန်းချက် များအရ စစ်မှုထမ်းရန်စာရင်းသွင်းသူ လျော့နည်းလာမှုကို တုံ့ပြန်သည့်အနေဖြင့် ၎င်းတာဝန်ကို တစ်ဦးချင်းစီထံမှ SSS အေဂျင်စီထံသို့ လွှဲပြောင်း ပေးခဲ့ခြင်းဖြစ်သည်။အဆိုပါ အပြောင်းအလဲများသည် အေဂျင်စီ၏ဝက်ဆိုက်ပေါ်တွင် မကြာသေးမီကဖော်ပြခဲ့သော နောက်ဆုံးရအချက်အလက်များကြောင့် ယခုသီတင်းပတ်အတွင်း မီဒီယာများ၏အာရုံစိုက်မှုကို တစ်ကျော့ပြန် ရရှိလာခဲ့သည်။ SSS အနေဖြင့် ၂၀၂၆ ခုနှစ် ဒီဇင်ဘာလ နောက်ဆုံးထား၍ ထိုစနစ်ကို အပြီးသတ်အကောင်အထည်ဖော်ရန် မျှော်လင့်ထားပြီး ပိုမိုမြန်ဆန်သော မှတ်ပုံတင်ခြင်းလုပ်ငန်းစဉ်နှင့် ဝန်ထမ်းအင်အား ပြန်လည် ပြင်ဆင်ဖွဲ့စည်းမှု ကို ရည်မှန်းဆောင်ရွက်နေခြင်း ဖြစ်သည်။လက်ရှိစနစ်အရ အမေရိကန်တွင် နေထိုင်နေသော (တရားမဝင် ဝင်ရောက်လာသူများအပါအဝင်) အသက် ၂၆ နှစ်အောက် အမျိုးသားအများစုသည် စစ်မှုထမ်းရန်အတွက် မဖြစ်မနေ မှတ်ပုံတင်ရမည်ဖြစ်သည်။ စာရင်းသွင်းရန် ပျက်ကွက်သူများသည် ဒဏ်ငွေ ဒေါ်လာ ၂၅၀,၀၀၀ အထိ ပေးဆောင် ရခြင်း၊ ထောင်ဒဏ် ၅ နှစ်အထိ ကျခံရခြင်းနှင့် နိုင်ငံသားဖြစ်ခွင့်လျှောက်ထားရာတွင် ကန့်သတ်ချက်များ ကြုံတွေ့ရနိုင်ပါသည်။ စနစ်သစ် အောက်တွင်မူ SSS သည် အစိုးရ၏ Databases အသီးသီးမှ ကိုယ်ရေး အချက်အလက်များကိုရယူကာ ၎င်းတို့၏ စစ်မှုထမ်းစာရင်းကို အလိုအလျောက် ပြုစုသွားမည် ဖြစ်သည်။အမေရိကန်စစ်တပ်သည် ၁၉၇၀ ပြည့်နှစ်များအစောပိုင်းကတည်းက ဆန္ဒအလျောက် စစ်မှုထမ်းစနစ် (All-volunteer force) ကိုသာ အမှီပြု ခဲ့သည်။ သမ္မတ ရစ်ချက် နစ်ဆင် (Richard Nixon) သည် ဗီယက်နမ် စစ်ပွဲအပေါ် လူထု၏မကျေနပ်မှုကိုဖြစ်စေသော အဓိကအကြောင်းရင်း မှာ မဖြစ်မနေစစ်မှုထမ်းရသည့်စနစ် (Mandatory conscription) ဖြစ်သည် ဟု ရှုမြင်ခဲ့ပြီး ၁၉၆၈ ခုနှစ် ရွေးကောက်ပွဲတွင် ထိုစနစ်ကိုရပ်တန့်ရန် ကတိပြုကာ ယှဉ်ပြိုင်ခဲ့သည်။ ၁၉၇၅ ခုနှစ်တွင် စစ်မှုထမ်းရန် မှတ်ပုံတင်ခြင်းကို ခေတ္တရပ်နားခဲ့သော်လည်း ဆိုဗီယက်တို့ အာဖဂန် နစ္စတန်သို့ ကျူးကျော်ဝင်ရောက်လာပြီးနောက် ၁၉၈၀ ပြည့်နှစ်တွင် ပြန်လည်စတင်ခဲ့သည်။မကြာသေးမီနှစ်များအတွင်း ပင်တဂွန်သည် စေတနာ့ဝန်ထမ်း စုဆောင်းရေးနှင့် အမျိုးသားစစ်မှုထမ်းစာရင်း ထိန်းသိမ်းရေးတို့တွင် စိန်ခေါ်မှုများနှင့် ရင်ဆိုင်နေရသည်။ စစ်သားသစ်ရရှိမှုလိုအပ်ချက်ကို ဖြေရှင်းရန်အတွက် စစ်မှုထမ်းရန်သတ်မှတ်ချက်စံနှုန်းများကို လျှော့ချခဲ့ရသကဲ့သို့အလိုအလျောက်မှတ်ပုံတင်ခြင်းစနစ်သို့ ပြောင်းလဲခြင်းမှာလည်း စစ်မှုထမ်းရန်ဖြစ်နိုင်ခြေရှိသူ အရေအတွက်ကိုမြှင့်တင်ရန် ရည်ရွယ်ခြင်း ဖြစ်သည်။စစ်ပွဲဆန့်ကျင်ရေး အဖွဲ့အစည်းများစွာကမူ အဆိုပါအပြောင်းအလဲကို ပြန်လည်စဉ်းစားရန် ကွန်ဂရက်လွှတ်တော်ကို တိုက်တွန်းထားကြသည်။ ၎င်းတို့က ထိုစနစ်သည် "စစ်မှုထမ်းရမည့်သူများ၏ တိကျပြီး ပြည့်စုံသော စာရင်းကို ထုတ်ပေးနိုင်မည်မဟုတ်သည့်အပြင် စစ်ပွဲဖြစ်ပွားနိုင်ခြေကိုပိုမိုမြင့်မားစေကာ အမေရိကန်နိုင်ငံသားများနှင့် နေထိုင်သူများ၏ ကိုယ်ရေးလုံခြုံမှုကိုလည်း ချိုးဖောက်ရာရောက်လိမ့်မည်" ဟု အငြင်းပွား နေကြသည်။ ဝေဖန်သူများ၏ အယူအဆအရ စုစည်းထားသော Database သည် အစိုးရအဖွဲ့အစည်းများနှင့် ပုဂ္ဂလိကအဖွဲ့အစည်းများ၏ လွဲမှားစွာ အသုံးချခြင်းနှင့် လက်နက်သဖွယ် အသုံးပြုခြင်းတို့ကို ခံရနိုင်ခြေရှိကြောင်း ထောက်ပြနေကြသည်။ကိုးကား- RTဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး
Fri, 10-Apr-2026
© Copyright 2024 SAC All Rights Reserved.