ပိုမိုသစ်လွင်တောက်ပလာတော့မည့် နိုင်ငံတော်၏အနာဂတ်
Posted_Date
Image
Body
မြန်မာနိုင်ငံသည် နိုင်ငံတော်ဖွဲ့စည်းပုံအခြေခံဥပဒေ(၂၀၀၈ ခုနှစ်)နှင့်အညီ စစ်မှန်၍စည်းကမ်းပြည့်ဝသော ပါတီစုံ
ဒီမိုကရေစီစနစ်ကို ကျင့်သုံးလျက်ရှိသည်။ ပါတီစုံဒီမိုကရေစီစနစ်၏အသက်သည် လွတ်လပ်၍ တရားမျှတသော ရွေးကောက်ပွဲဖြစ်သည်။ လွတ်လပ်၍တရားမျှတသောရွေးကောက်ပွဲဖြစ်မှသာလျှင် ပြည်သူ့ဆန္ဒ
အစစ်အမှန်ကို ထင်ဟပ်ပေါ်လွင်စေမည်ဖြစ်သည်။ ပြည်ထောင်စုသမ္မတမြန်မာနိုင်ငံတော်၏ ဖွဲ့စည်းပုံ အခြေခံဥပဒေ(၂၀၀၈ ခုနှစ်)အရ နိုင်ငံတော်၏ အချုပ်အခြာအာဏာကို ကိုင်တွယ်ကျင့်သုံးမည့်အစိုးရအဖွဲ့၊ သက်ဆိုင်ရာ လွှတ်တော်အသီးသီး၊ ပြည်ထောင်စုနှင့် တိုင်းဒေသကြီး/ပြည်နယ်အဆင့် အစိုးရအဖွဲ့နှင့် အဖွဲ့အစည်း အသီးသီးတို့ကို ရွေးကောက်ပွဲဖြင့် တိုက်ရိုက်သော်လည်းကောင်း၊ သွယ်ဝိုက်၍ သော်လည်းကောင်း ပြည်သူကရွေးချယ်ရခြင်းဖြစ်သည်။ ထို့ကြောင့် ရွေးကောက်ပွဲသည် လွတ်လပ်၍တရားမျှတပြီး မိမိနိုင်ငံ၏ဖွဲ့စည်းပုံအခြေခံဥပဒေ၊ တည်ဆဲဥပဒေများနှင့်အညီဆောင်ရွက်သော ရွေးကောက်ပွဲမျိုးဖြစ်ရပေမည်။
လွတ်လပ်ပြီး တရားမျှတသောရွေးကောက်ပွဲကျင်းပနိုင်ရေးဆိုသည်မှာ ရွေးကောက်ပွဲများကိုဥပဒေ၊ နည်းဥပဒေများနှင့်အညီ မှန်မှန်ကန်ကန် ဆောင်ရွက်ခြင်းနှင့် လွတ်လပ်၍တရားမျှတပြီး ပွင့်လင်းမြင်သာသော ရွေးကောက်ပွဲဆိုင်ရာလုပ်ငန်းစဉ်များဖြစ်သည့် နိုင်ငံသားတိုင်း ဥပဒေနှင့်အညီ မဲပေးပိုင်ခွင့်ရှိစေရေး၊ မဲဆန္ဒရှင်စာရင်းမှန်ကန်ရေး၊ ပွင့်လင်းမြင်သာစွာမဲပေးရေး၊ မဲရေတွက်ခြင်းနှင့်ရလဒ်များ ထုတ်ပြန်နိုင်ရေး၊ လွတ်လပ်၍တရားမျှတသော မဲဆွယ်စည်းရုံးရေးနှင့်သာတူညီမျှအခွင့်အရေးများ ဆောင်ရွက်ခွင့်ရရှိရေး၊ လုံခြုံရေး၊ အကြမ်းဖက်မှုနှင့်ခြယ်လှယ်မှုမရှိစေရေး၊ အငြင်းပွားမှုကိုဖြေရှင်းရေး၊ ရွေးကောက်ပွဲကော်မရှင်နှင့် ကော်မရှင်အဖွဲ့ခွဲ အဆင့်ဆင့်တို့က သမာသမတ်ကျအောင် ဆောင်ရွက်ရေးတို့ဖြစ်သည်။
ရွေးကောက်ပွဲတစ်ရပ်ကျင်းပရာတွင် မဲစာရင်းများ တိကျမှန်ကန်ရေးသည်လည်း အရေးကြီးသည့်အချက်ပင်ဖြစ်သည်။ ပြည်ထောင်စုရွေးကောက်ပွဲကော်မရှင်အနေဖြင့် မဲစာရင်းများပြည့်စုံမှန်ကန်စေရေးအတွက် လူဝင်မှု ကြီးကြပ်ရေးနှင့် ပြည်သူ့အင်အားဝန်ကြီးဌာနနှင့် ပြည်ထဲရေးဝန်ကြီးဌာန၊ အထွေထွေအုပ်ချုပ်ရေး ဦးစီးဌာနတို့နှင့် စနစ်တကျပူးပေါင်း ဆောင်ရွက်သည်။ မဲစာရင်းများကိုလည်း အများပြည်သူများ သိရှိနိုင်စေရန်အတွက် သုံးကြိမ်တိုင်တိုင် ကပ်ထားပေးသည်။ မိမိအမည်မပါလျှင်၊ မှားယွင်းနေလျှင် ရွေးကောက်ပွဲမတိုင်မီ ကြိုတင်ပြင်ဆင်ပေးနိုင်ရန်အတွက် ဆောင်ရွက်ခြင်းဖြစ်သည်။ မဲစာရင်းထပ်ခြင်း၊ မှားယွင်း
ခြင်းမရှိစေရန်စနစ်တကျ ပွင့်လင်းမြင်သာစွာ ဆောင်ရွက်ခဲ့သည်။ ပြည်သူအားလုံးပါဝင်မှုရှိစေရန်အတွက် ပထမဆုံးအကြိမ်မဲပေးမည့် မဲဆန္ဒရှင်လူငယ်များ၊ ယာယီနေရပ်စွန့်ခွာနေရသူများနှင့် မသန်စွမ်းသူများ အားလုံးပါဝင်စေရန် အသိပညာပေးခြင်း၊ ရွေးကောက်ပွဲဆိုင်ရာဥပဒေ၊ နည်းဥပဒေများ၊ လုပ်ထုံးလုပ်နည်းများကို ပြင်ဆင်ဖြည့်စွက်ခြင်းများဆောင်ရွက်ပေးခဲ့သည်။
ရွေးကောက်ပွဲတစ်ရပ်သည် ဆန္ဒမဲပေးခြင်းနှင့်စတင်ပြီး ရလဒ်များ ထုတ်ပြန်ကြေညာလိုက်သည်နှင့် ပြီးဆုံးသွားသည့် လုပ်ငန်းစဉ်မျိုးမဟုတ်ပေ။ တစ်ခုနှင့်တစ်ခုချိတ်ဆက်လျက်ရှိသည့်လုပ်ငန်းစဉ်များဖြင့် ပေါင်းစပ်ထားသည့် တစ်ဆက်တစ်စပ်တည်းသော ဖြစ်စဉ်ကြီးတစ်ခုဖြစ်သည်။ ရွေးကောက်ပွဲလုပ်ငန်းစဉ်တိုင်းမှာ တစ်ခုနှင့်တစ်ခုများစွာ မှီခိုလျက်ရှိသည့်အလျောက် လုပ်ငန်းစဉ်တစ်ခုပျက်ယွင်းပါက လွတ်လပ်၍ တရားမျှတသည့် ရွေးကောက်ပွဲဖြစ်နိုင်မည် မဟုတ်ချေ။ ရွေးကောက်ပွဲတစ်ခု၏ စံနှုန်းကို လွတ်လပ်ပြီး တရားမျှတမှုရှိ/မရှိ Free and Fair ဖြစ်၊ မဖြစ်ဟူသည့် ပေတံဖြင့် တိုင်းတာလေ့ရှိသည်။ ယင်းသို့တိုင်းတာသုံးသပ်ရာတွင် ရွေးကောက်ပွဲကျင်းပသော နေ့တစ်နေ့တည်း၏ ဖြစ်စဉ်ကို လေ့လာ သုံးသပ်ရုံမျှမက ရွေးကောက်ပွဲစက်ဝန်း(Election Circle)ပါ ကာလများဖြစ်သည့် ရွေးကောက်ပွဲအကြိုကာလ၊ ရွေးကောက်ပွဲကာလနှင့် ရွေးကောက်ပွဲနောက်ပိုင်း ကာလများကိုပါ ထည့်သွင်းလေ့လာသုံးသပ်ရမည်ဖြစ်သည်။ ၂၀၂၅ ခုနှစ် ပါတီစုံဒီမိုကရေစီ အထွေထွေရွေးကောက်ပွဲသည် အစ၊ အလယ်၊ အဆုံးသုံးခုလုံး မှတ်ကျောက် တင်ခံနိုင်သည့် ရွေးကောက်ပွဲဖြစ်ခဲ့သည်။
ယခုအခါမြန်မာနိုင်ငံတွင် ကျင်းပခဲ့သည့်ရွေးကောက်ပွဲသည်လွတ်လပ်၍ တရားမျှတမှုရှိသည့်အပြင် ညီမျှမှုရှိသော ရွေးကောက်ပွဲဖြစ်စေရန် ဘက်ပေါင်းစုံမှ ကြိုတင်ပြင်ဆင်ပေးထားသည်။
ရွေးကောက်ပွဲကို လုံခြုံရေးနှင့်စီမံခန့်ခွဲရေး ကိစ္စရပ်များစနစ်တကျ ဆောင်ရွက်နိုင်ရန်အတွက် အပိုင်းသုံးပိုင်းခွဲ၍ ကျင်းပပေးခဲ့သည်။ ၂၀၂၅ ခုနှစ် ဒီဇင်ဘာလ ၂၈ ရက်တွင် စတင်ကျင်းပခဲ့သည့် အထွေထွေရွေးကောက်ပွဲတွင် မဲပေးပိုင်ခွင့်ရှိသည့် မဲဆန္ဒရှင်စုစုပေါင်း ၂၄ ဒသမ ၂၂ သန်းရှိပြီး နိုင်ငံရေးပါတီများအနေဖြင့် ပြည်ထောင်စုတစ်ဝန်းလုံးတွင် ယှဉ်ပြိုင်မည့်ပါတီ ၆ ပါတီနှင့်တိုင်းဒေသကြီးနှင့် ပြည်နယ်တစ်ခုအတွင်း ယှဉ်ပြိုင်မည့်ပါတီ ၅၁ ပါတီစုစုပေါင်း ၅၇ ပါတီရှိသည်။
ရွေးကောက်ပွဲကျင်းပရန်မြို့နယ်ပေါင်း ၃၃၀ အနက် ၂၆၃ မြို့နယ်တွင် ရွေးကောက်ပွဲကျင်းပခြင်းဖြစ်ပြီး ကျန်ရှိသည့်မြို့နယ်များကိုလည်း ကြားဖြတ်ရွေးကောက်ပွဲကျင်းပပေးမည်ဖြစ်သည်။
မြန်မာနိုင်ငံ၏ ပါတီစုံဒီမိုကရေစီ အထွေထွေရွေးကောက်ပွဲသည် မြန်မာနိုင်ငံ၊ မြန်မာလူမျိုးတို့နှင့် သက်ဆိုင်သော ရွေးကောက်ပွဲသာ ဖြစ်သည့်အတွက် မလိုလားအပ်သော အနှောင့်အယှက်များ၊ မြန်မာနိုင်ငံ၏ပြည်တွင်းရေးကို ဝင်ရောက်စွက်ဖက်သည့် လုပ်ရပ်နှင့်အပြောအဆိုများမှာ နေလာနှင်းပျောက်သည့်ပမာ မကြာမီတွင် ကွယ်ပျောက်သွားတော့မည်ဖြစ်သည်။ မြန်မာ့ရွေးကောက်ပွဲနှင့်ပတ်သက်၍ လွတ်လပ်ခြင်း၊ တရားမျှတခြင်းရှိ၊ မရှိနှင့် မဲဆန္ဒရှင်ပြည်သူများ၏ စိတ်နေသဘောထားများကို အနီးကပ်စောင့်ကြည့်လေ့လာ အကဲခတ်နိုင်ရန်အတွက် နိုင်ငံတကာ စောင့်ကြည့်လေ့လာရေး အဖွဲ့များ၊ ပြည်တွင်းမှစောင့်ကြည့်လေ့လာရေး အဖွဲ့များလည်း လာရောက်ကြည့်ရှု လေ့လာခဲ့ကြပြီးဖြစ်သည်။ ဇန်နဝါရီလ၂၅ ရက်က ကျင်းပခဲ့သည့် ပါတီစုံဒီမိုကရေစီ အထွေထွေရွေးကောက်ပွဲအပိုင်း(၃)သို့ နိုင်ငံတကာစောင့်ကြည့်လေ့လာသူများအဖြစ် ဘယ်လာရုစ်သမ္မတနိုင်ငံ ဘယ်လာရုစ်ပါတီမှကိုယ်စားလှယ်အဖွဲ့၊ ကမ္ဘောဒီးယားနိုင်ငံ ရွေးကောက်ပွဲကော်မရှင်မှ ကိုယ်စားလှယ်အဖွဲ့၊ နီပေါနိုင်ငံရွေးကောက်ပွဲကော်မရှင်မှ ကိုယ်စားလှယ်အဖွဲ့၊ အင်ဒိုနီးရှားနိုင်ငံ ရွေးကောက်ပွဲကော်မရှင်မှ ကိုယ်စားလှယ်အဖွဲ့၊ ဗီယက်နမ်ဆိုရှယ်လစ်သမ္မတနိုင်ငံမှ ကိုယ်စားလှယ်အဖွဲ့၊ နီကာရာဂွါနိုင်ငံမှ ကိုယ်စားလှယ်အဖွဲ့၊ အိန္ဒိယနိုင်ငံမှကိုယ်စားလှယ်အဖွဲ့နှင့် ICAPP အဖွဲ့မှ ကိုယ်စားလှယ်အဖွဲ့တို့ လာရောက်ခဲ့ကြသည်။
မြန်မာ့ရွေးကောက်ပွဲသည် မြန်မာပြည်သူများ၏ အကျိုးအတွက်သာ ရည်ရွယ်ဆောင်ရွက်ခြင်းဖြစ်၍ ပြည်သူလူထုကတစ်ခဲနက်လာရောက်မဲပေးကြသည်။ ရွေးကောက်ပွဲကို ပြည်သူတို့စိတ်ပါဝင်စားမှုရှိကြောင်းကို ဆန္ဒမဲလာရောက် ပေးကြသည့် ပြည်သူများက သက်သေခံလျက်ရှိသည်။ ရွေးကောက်ပွဲ အနီးကပ် လာရောက်လေ့လာ စောင့်ကြည့်နေကြသည့် ပြည်တွင်းပြည်ပအဖွဲ့အစည်းများကပင် တအံ့တဩ ဖြစ်လောက်အောင် မနက် ၆ နာရီမထိုးမီကတည်းက မဲရုံရှေ့တွင် တန်းစီစောင့်ဆိုင်းနေကြသည်။ ပြည်သူများ အနေဖြင့် သူတို့၏လူမှုစီးပွားဘဝအရေးတွင် အဖျက်အမှောင့်၊ အနှောင့်အယှက်၊ အတားအဆီးများမလိုလားပေ။ အေးချမ်းစွာနေထိုင်လိုကြသည်။ ပညာကိုအေးချမ်းစွာ သင်ကြားသင်ယူလိုကြသည်။ စီးပွားရေးရှာဖွေလိုကြသည်။ ထို့ကြောင့် သူတို့လိုလားသော အစိုးရတစ်ရပ်ပေါ်ထွန်းလာရေးကို မျှော်လင့်ချက်ဖြင့် လာရောက်မဲထည့်ကြသည်။
နိုင်ငံတော်အစိုးရအနေဖြင့် ပါတီစုံဒီမိုကရေစီ အထွေထွေရွေးကောက်ပွဲကိုအောင်မြင်စွာ ကျင်းပနိုင်ရေးနှင့် ပြည်သူများ စိတ်နှလုံးအေးချမ်းစွာ မဲဆန္ဒပေးနိုင်ရေးအတွက် လိုအပ်ချက်မရှိအောင် ဖြည့်ဆည်းပေးထားသည်။ အထူးသဖြင့် ပါတီစုံဒီမိုကရေစီ အထွေထွေရွေးကောက်ပွဲများကို နှောင့်ယှက်ဟန့်တားဖျက်ဆီးခြင်းမှ ကာကွယ်ပေးရေး ဥပဒေထုတ်ပြန်ကာ ထိရောက်စွာ အရေးယူခြင်းမှာလည်း ရွေးကောက်ပွဲ အောင်မြင်ရေးအတွက် ထိရောက်သည့် ကာကွယ်မှုဖြစ်သည်။ မည်သူ့ကိုမျှ အကျိုးမရှိသည့်အဖျက်လုပ်ရပ်များကို လုပ်ဆောင်သူများအား ထိရောက်စွာ အရေးယူအပြစ်ပေးခြင်းကြောင့်လည်း ပါတီများအနေဖြင့် မဲဆွယ်စည်းရုံးဟောပြောခြင်းလုပ်ငန်းများကို ကောင်းမွန်စွာဆောင်ရွက်နိုင်ခဲ့ကြသည်။
“နိုင်ငံတော်၏ အမျိုးသားအကျိုးစီးပွားကိုအလေးထား၍ စစ်မှန်စည်းကမ်းပြည့်ဝသော ပါတီစုံဒီမိုကရေစီစနစ်ကို အကောင်အထည်ဖော်နိုင်မည့် နိုင်ငံရေးအင်အားစုများ၊ ပြည်သူ့ကိုယ်စားလှယ်များဖြစ်ပေါ်လာစေရန် အစဉ်တစိုက် ဆောင်ရွက်ရေးနှင့် ပါတီစုံဒီမိုကရေစီ အထွေထွေ ရွေးကောက်ပွဲလုပ်ငန်းစဉ်များ အောင်မြင်ပြီး ပြည်သူလူထုတစ်ရပ်လုံး လိုလားတောင့်တသည့် ပါတီစုံဒီမိုကရေစီစနစ်ကို အောင်မြင်စွာ လျှောက်လှမ်းနိုင်ရေး ပြည်သူလူထု၏ပူးပေါင်းပါဝင်မှုဖြင့် အကောင်အထည်ဖော်ဆောင်ရွက်ရေး”ဟူသော အမျိုးသားကာကွယ်ရေးနှင့်လုံခြုံရေးကောင်စီ၏ ဦးတည်ချက်များအတိုင်း ပါတီစုံဒီမိုကရေစီအထွေထွေ ရွေးကောက်ပွဲများကို အောင်မြင်ပြီးမြောက်စွာ ကျင်းပနိုင်ခဲ့ပြီဖြစ်သည်။
ပြည်ထောင်စုသမ္မတမြန်မာနိုင်ငံတော်သည် အချုပ်အခြာအာဏာပိုင်ဆိုင်သော လွတ်လပ်သည့်နိုင်ငံဖြစ်သည်။ ကမ္ဘာ့ပထဝီဝင် အနေအထားအရ ပြောင်းလဲကျင့်သုံးလာသည့် ပထဝီနိုင်ငံရေး၏အရေးပါသော တည်နေရာ အနေအထားကြောင့် နိုင်ငံတော်၏ အချုပ်အခြာအာဏာတည်တံ့ခိုင်မြဲရေးအတွက် ကမ္ဘာ့အင်အားကြီးနိုင်ငံများမှ ဝင်ရောက်စွက်ဖက်လွှမ်းမိုးခြယ်လှယ်မှုများ မပြုလုပ်နိုင်စေရန် မျက်ခြည်မပြတ်ထိန်းသိမ်း ကာကွယ်စောင့်ရှောက်ရန် လိုအပ်သည်။ ဒီမိုကရေစီကျင့်သုံးရာတွင် အများဆန္ဒဖြင့် ဆောင်ရွက်ကြသော်လည်း အခြေခံအကျဆုံး လိုအပ်ချက်သည် တရားဥပဒေကို စောင့်ထိန်းလိုက်နာကျင့်သုံးခြင်းပင်ဖြစ်သည်။ နိုင်ငံတစ်နိုင်ငံ၏ ဖွဲ့စည်းပုံအခြေခံဥပဒေသည် အစိုးရအဖွဲ့အစည်းများကိုတရားဝင်ဖြစ်စေခြင်းနှင့် နိုင်ငံသားများ၏ အခွင့်အရေးများကို အာမခံရခြင်းဖြစ်သည်။ ပါတီနိုင်ငံရေး ဆောင်ရွက်ကြရာတွင် ဖွဲ့စည်းပုံ အခြေခံဥပဒေကို လေးစားလိုက်နာရန် အထူးလိုအပ်သည်။ နိုင်ငံတော်၊ နိုင်ငံသားများ၏ ကောင်းကျိုးကိုလိုလားသူများ ဖြစ်ကြရသည်။
ထို့ကြောင့် ပြည်သူလူထုအနေဖြင့် ၂၀၂၅ ခုနှစ် ပါတီစုံဒီမိုကရေစီအထွေထွေရွေးကောက်ပွဲတွင် နိုင်ငံတော်နှင့် ဒေသအကျိုးကို ဆောင်ရွက်ပေးနိုင်သည့်သူ၊ အမျိုးဘာသာသာသနာအကျိုးကိုသယ်ပိုးထမ်းရွက်နိုင်မည့်သူ၊ နိုင်ငံတည်ရှိနေသရွေ့ တည်တံ့ခိုင်မြဲစွာ တည်ရှိနေမည့် တပ်မတော်နှင့် လက်တွဲဆောင်ရွက်နိုင်မည့်သူ၊ ဥပဒေပြုရေး လုပ်ငန်းများကို ဆောင်ရွက်မည်ဖြစ်၍ ဥပဒေကိုသိရှိနားလည်သူ၊ ပညာတတ် ကိုယ်စားလှယ်လောင်းများကို ပြည်သူတို့က တစ်ခဲနက်ဆန္ဒပြု ရွေးချယ်ခဲ့ကြပြီး ဖြစ်သည်ဟု စာရေးသူက အပြည့်အဝ ယုံကြည်မိပါသည်။ ယခုအခါ ၂၀၂၅ ခုနှစ် ပါတီစုံဒီမိုကရေစီ အထွေထွေရွေးကောက်ပွဲဆိုင်ရာ လုပ်ငန်းရပ်များ အောင်မြင်စွာ ပြီးစီးခဲ့ပြီဖြစ်သည့်အတွက် နိုင်ငံတော်၏ဥပဒေပြုရေး၊ အုပ်ချုပ်ရေးနှင့် တရားစီရင်ရေး မဏ္ဍိုင်များတွင် တာဝန်ထမ်းဆောင် မည့်သူပေါ်ပေါက်လာတော့မည်ဖြစ်၍ မြန်မာနိုင်ငံ၏ အနာဂတ်သည် ပိုမိုလှပသစ်လွင်တောက်ပကာ ပိုမိုဖွံ့ဖြိုးတိုးတက်လာတော့မည် ဖြစ်ပါကြောင်း ရေးသား တင်ပြလိုက်ရပေသည်။ ။
MWD
