အမေရိကန်က နောက်ဆုံးပေါ်ဒုံးကျည်စနစ်အသစ်များကို ဖိလစ်ပိုင်၌ဖြန့်ကြက်မည်
News Image
အမေရိကန်နိုင်ငံနှင့် ဖိလစ်ပိုင်နိုင်ငံတို့ကြား ကာကွယ်ရေးဆိုင်ရာပူးပေါင်းဆောင်ရွက်မှုကိုတိုးမြှင့်မှုအဖြစ် အမေရိကန်က နောက်ဆုံးပေါ်ဒုံးကျည်စနစ်အသစ်များကို ဖိလစ်ပိုင်နိုင်ငံ၌ ဖြန့်ကြက်သွားမည်ဖြစ်ကြောင်း သိရသည်။
နှစ်နိုင်ငံစလုံးသည် အမေရိကန်နိုင်ငံ၏ နောက်ဆုံးပေါ်ဒုံးကျည်နှင့် မောင်းသူမဲ့စနစ်များကို ဖိလစ်ပိုင်နိုင်ငံ၌ ဆက်လက်တိုးမြှင့်ချထားရန် ကတိပြုထားသည်ဟုဖေဖော်ဝါရီလ ၁၇ ရက်တွင်ထုတ်ပြန်သောပူးတွဲထုတ်ပြန်ချက်တစ်ခု၌ ဖော်ပြထားသည်။
အမေရိကန်နိုင်ငံသည် ၂၀၂၄ ခုနှစ်တွင်၎င်းတို့၏ Typhon ဒုံးကျည်စနစ်ကို ဖိလစ်ပိုင်နိုင်ငံ၌ ဖြန့်ကြက်ချထားပြီးဖြစ်သည်။
ထိုစနစ်သည် တိုမာဟော့အနိမ့်ပျံဒုံးကျည်များအပါအဝင် အမျိုးမျိုးသောဒုံးကျည်များကို ပစ်လွှတ်နိုင်စွမ်းရှိသည်။
၂၀၂၅ ခုနှစ်တွင် နှစ်နိုင်ငံချစ်ကြည်ရေးစစ်ရေးလေ့ကျင့်မှုများအတွက် အမေရိကန်က NMESIS သင်္ဘောဖျက်ဒုံးကျည်စနစ်ကို ဖိလစ်ပိုင်နိုင်ငံသို့ဖြန့်ကြက်ပေးထားသည်။
တောင်တရုတ်ပင်လယ်အတွင်း ပထဝီနိုင်ငံရေးတင်းမာမှုများ ဖြစ်ပေါ်နေစဉ် အမေရိကန်က ဖိလစ်ပိုင်နိုင်ငံသို့ စစ်လက်နက် ပစ္စည်းများစွာကို တိုးမြှင့်ဖြန့်ကြက်လာနေခြင်း ဖြစ်သည်။ အမေရိကန်၏ ယင်းကဲ့သို့စစ်လက်နက်ပစ္စည်းများ တိုးမြှင့်ဖြန့်ကြက်မှုကို တရုတ်နိုင်ငံက ဆန့်ကျင်ကန့်ကွက်ထားပြီး အမေရိကန်၏လုပ်ရပ်က ဒေသတွင်းတည်ငြိမ်အေးချမ်းရေးကို ပျက်ပြားစေမည်ဟု ပြောထားသည်။
Ref: ST
MWD
